Blog

Mashami Vincent yavuze ko amaze umwaka n’igice adaca iryera rutahizamu Sugira Ernest bityo ko nta hantu na hamwe yigeze ahurira na we ngo amwizeze kuba yaza mu ikipe ya Police FC.

Mu ntangiriro z’iki cyumweru ni bwo haje inkuru y’uko Sugira Ernest yaba yarababajwe cyane n’ibyo uwahoze ari umutoza w’ikipe y’igihugu, Mashami Vincent yamukoreye aho yamwijeje kujya muri Police FC akabenga andi makipe.

Mu kiganiro Mashami Vincent yahaye ikinyamakuru ISIMBI, yavuze ko aya makuru atari yo ko ahubwo we amuheruka mbere y’uko ajya gukina muri Syria (muri Kanama 2022) ari na bwo aheruka kuvugana na we, ubu akaba atazi aho ari.

Ati 'Njye nshobora kuba mperukana na Sugira [Ernest], hashize nk’umwaka n’igice, duherukana mbere y’uko ajya muri Syria, ni bwo duherukana ubwo ababivuze ni bo babifite amakuru njye ntacyo nabivugaho, ariko njye icyo nakubwira ni uko duherukana mbere y’uko ajya muri Syria. Nta biganiro byo kuza muri Police FC twagiranye.'

Iyo ugerageje gutera icyumvirizo bakubwiraga ko Police FC yifuje uyu mukinnyi mbere y’uko ajya gukina muri Syria (2022), ngo ni bwo yabonanye n’ubuyobozi bwa Police FC ariko ntiyishimira ibyo bamuhaga ahitamo kwerekeza muri Syria.

Ikinyamakuru ISIMBI cyabonye andi makuru ko ubwo isoko rito ryo kugura abakinnyi mu Rwanda ryari rifunguye muri Mutarama 2024, abatoza ba Musanze FC, Habimana Sosthene n’umwungiriza Mugiraneza Jean Baptsiste Migi bari bamaze gutakaza Peter Agblevor basanze Sugira yaba umusimbura mwiza we.

Ni bwo bigiriye inama yo kumuvugisha, ISIMBI amakuru yizewe yamenye ni uko mu magambo ye Sugira Ernest yahakaniye umutoza Sosthene, Migi bakinanye muri APR FC ashyiraho ake na we biranga ababwira ko atajya i Musanze.

ISIMBI yagerageje kuvigisha uyu rutahizamu kuri iyi ngingo ngo na we atange ukuri kwe ariko ntibyakunda kuko atitabaga telefoni ye ngendanwa.

Sugira Ernest muri 2013 yakiniye APR FC avuye muri AS Muhanga, 2014 yerekeje muri AS Kigali ayikinira imyaka 2 ari nabwo muri 2016 yahitaga yerekeza muri AS Vita Club yo muri DR Congo yakiniye umwaka umwe maze ahita agaruka mu Rwanda asinyira APR FC yakiniye kugeza 2020 atizwa muri Rayon Sports amezi 6, yaje guhita yerekeza muri AS Kigali yavuyemo mu mpeshyi ya 2022 ari nabwo yerekezaga muri Syria mu ikipe ya Al-Wahda Sports Club yakiniye amezi 6 agaruka mu Rwanda kugeza ubu akaba nta kipe afite.

Ni igitaramo cyabereye ahitwa UMA SHOW GROUNDS hasanzwe habera ibitaramo bikomeye. Cyabaye kuri uyu wa 14 Gashyantare 2024 ku munsi w’abakundana.

The Ben yagiye ku rubyiniro ahagana saa Saba z'ijoro ategerejwe n'ibihumbi by'abantu biganjemo abakundana bari banasohokanye abakunzi babo.

Mbere y'uko ajya ku rubyiniro yabanjirijwe n'abarimo Sintex waje atunguranye muri iki gitaramo, n'abanyarwenya batandukanye barimo Tenge Tenge ugezweho muri iyi minsi i Kampala, Sheebah Karungi, n'abandi.

The Ben waririmbye nyinshi mu ndirimbo ze zakunzwe, yeretswe urukundo n'abakunzi b'umuziki muri Uganda, aririmba indirimbo nka “Habibi”, “Binkorera” yakoranye na Sheebah, “This is Love” yakoranye na Rema Namakula, “Ndaje”, “Naremeye” n'izindi. Yageze kuri “Ni Forever” abantu barirekura cyane.

Indirimbo “Ni Forever” igezweho muri iyi minsi mu karere bwari ubwa mbere The Ben yari ayiririmbye ku mugaragaro, muri Uganda ariko yerekanye ko ari indirimbo yakunzwe cyane.

The Ben yahawe amafaranga imifuka iruzura ayandi barayasanza!

Byagaragaye ko mu muco w'abagande Iyo bishimye batanga amafaranga, Ari nabyo byabaye ubwo The Ben yari Ari ku rubyiniro.

The Ben yahawe amafaranga menshi kugeza ubwo yayahawe akagenda ayashyira mu mufuka ariko biba ibyubusa iruzura, bahitamo kuyashyira ku rubyiniro.

Icyumba cyaberagamo igitaramo cyuzuye bamwe barebera ku matereviziyo yabugenewe.

Inyubako ya Uma Show Grounds yaberagamo igitaramo yuzuye bamwe babura aho bajya barebera ku byuma bisakaza amashusho.

The Ben yerekanye ibyishimo ndetse yerekwa ko akunzwe i Bugande asezeranya abakunda umuziki ko azakomeza kubashimisha.

Abantu benshi bishimiye The Ben

The Ben yageze ku ndirimbo Ni Forever abantu barabyina karahava

The Ben yaririmbanye n'abafana kuva ku munota wambere

The Ben urukundo yeretswe I Bugande ntazarwibagirwa

Sheebah Karungi ku rubyiniro

Sheebah mu ndirimbo yakoranye na The Ben

Sintex yageze kuri Cyakoze abantu baranyurwa

Tenge Tenge umwe mu banyarwenya bagezweho

Umufaransa utoza APR FC, Thierry Froger ntabwo yishimiye imikinire y’abakinnyi babiri Apam Assongue Bemol na Ndikumana Danny ku mukino baraye banganyijemo na Gasogi United.

Ku mugoroba w’ejo hashize ku wa Gatatu tariki ya 14 Gashyantare 2024, APR FC yari yakiriye Gasogi United mu mukino ubanza wa 1/4 cy’igikombe cy’Amahoro aho amakipe yombi yanganyije ubusa ku busa.

Muri uyu mukino yari yahisemo kubanzamo umunya-Cameroun Apam Assongue Bemol adasanzwe aha umwanya yaje gusimburwa na Ndikumana Danny ukomoka i Burundi ku munota wa 82.

Nyuma y’uyu mukino, abajijwe ku myitwarire y’aba bakinnyi bamishinja kudaha umwanya, Froger yavuze ko bamutengushye kuko bajyaga bavuga ko bafite ubushobozi ariko ibyo yabonye biratandukanye.

Ati 'Ni cyo nashakaga kureba, ubwo ubushake bwo kuvuga ko bafite ubushobozi bwo kuba babanzamo ariko ibyo nabonye nta cyizere bimpa, birababaje kuko inshuro nyinshi ni bo baba batishimye ariko uyu munsi nanjye ntabwo nishimiye imikinire yabo.'

APR FC ikaba isabwa gutsinda umukino wo kwishyura uri mu cyumweru gitaha kugira ngo igere muri 1/2 cy’igikombe cy’Amahoro.

Kuri uyu wa Gatatu tariki 14 Gashyantare 2024, Abakiristu Gatolika mu Rwanda no ku Isi hose batangiye igisibo gitagatifu, niyo mpamvu tugiye kubagezaho urugendo rwose abakiristu bakora kugira ngo bizihize Umunsi Mukuru w’izuka rya Yezu Kiristu.

Igisibo ku bakurisitu ni umwanya wo kureka ibyaha bagasenga ndetse bakigomwa ibyabashimishaga byose bakanafasha abakene. Abigishwa, bazabatizwa mu gihe cya Pasika bakorerwaho imihango mbere yo guhabwa isakaramentu rya Batisimu.

Igihe cy’Igisibo gitangira kuwa Gatatu w’Ivu, kikagera kuwa Kane Mutagatifu mbere ya Misa y’Isangira rya Nyagasani. Muri iki gihe ntibavuga cyangwa ngo haririmbwe Aleluya kuva igisibo gitangiye kugeza ubwo haba Misa yitwa igitaramo cya Pasika iba kuwa Gatandatu Mutagatifu.

Igisibo gitangizwa n’umuhango wo Gusigwa Ivu ku gahanga nk’ikimenyetso cyo kwicisha bugufi; uwo munsi kandi abakiristu bubahiriza gusiba kurya.

Igisibo kimara iminsi 40 ariko hatabariwemo iminsi yo ku cyumweru, icyumweru gisoza igisibo bacyita icyumweru gitagatifu kikaba gitangira ku munsi Mukuru wa Mashami ndetse icyo cyumweru bakita icyumweru cy’Ububabare bwa Nyagasani.

Icyumweru gitagatifu cyagenewe kwibutsa Ububabare bwa Yezu, kuva ubwo asesekaye i Yeruzalemu ari Umutabazi. Mu maparuwasi no mu masantarali yo muri Kiliziya Gatolika haba umwanya wo kuzirika Ububabare bwa Yezu mu nzira y’umusaraba bazirikana urugendo Yezu yaciyemo bagiye kumubamba ku musaraba.

Kuwa Kane w’icyumweru Gitagatifu, mu gitondo, Umwepiskopi atura Misa afatanyije n’Abasaserdori bo muri diyosezi ye, agaha umugisha amavuta matagatifu azakoreshwa mu mihango Mitagatifu.

Ku gicamunsi cyo kuwa Kane mu w’icyumweru gitagatifu hasomwa Misa bita iy’Isangira Ritagafu ndetse umusaseridoti agakoreramo umuhango wo koza ibirenge abateguye mu rwego rwo kwibuka uko Yezu yogeje ibirenge Intumwa 12.

Kuwa Gatanu Mutagatifu nta Gitambo cya Misa batura ahubwo basoma ivanjiri y’Ububabare. Icyo gihe Ubushyinguro Butagatifu (Tubernacle) nta Ukarisitiya ziba zikirimo ahubwo Misa yo kuwa Kane irangiye isakaramentu rijyanwa muri Chapelle kuburyo inkongoro zongera kugarukamo nyuma yo gutura igitambo cya misa mu gitaramo cya Pasika.

Mu butumwa bwatanzwe na Perezida w’Inama y’Abepisikopi Gatolika mu Rwanda, Antoine Cardinal Kambanda kuri uyu wa Gatatu tariki ya 14 Gashyantare 2024 mu muhango wo gutangiza Igisibo gitagatifu, yavuze ubusobanuro bw’iki Gisibo.

Ati: “Igisibo ni igihe cyo gutsinda ukwikunda kugira ngo dushyire Imana imbere mu buzima bwacu, abe ariyo ihabwa ikuzo, aho kugira ngo abe ari twe twubahwa cyangwa tugaragara. Ni igihe cyo gutsinda ukwireba gutuma tutakira abandi.” 

Igisibo ku bakiristu Gatolika gihuzwa na rimwe mu mategeko ya Kiliziya Gatolika rigira riti” Urajya usiba mu minsi yategetswe.” Bityo abakiristu basabwa gusiba kurya by’umwihariko abatabashije gusiba kurya bagomba kureka kurya ndetse bagafasha abakene basabwa gusenga cyane.

Antoine Cardinal Kambanda yasabye abakiristu gusenga bicishije bugufi

Hirya no hino ku isi, abakundana bakomeje kwizihiza umunsi ngarukamwaka wabahariwe wa Saint Valentin. Bamwe bari guhana impano z'akataraboneka, abandi bari kubwirana amagambo meza, abandi bari kwitegura gusohokera ahantu heza bakarya ibintu byiza ubundi bakifotoza, n'ibindi byinshi.

Kuva ku isaha y'i saa sita z'ijoro, ubutumwa bwuje amagambo y'urukundo, amafoto atagira uko asa yiganjemo ibara ry'umutuku, ni byo bikomeje gucicikana ku mbuga nkoranyambaga zose by'umwihariko izikoreshwa n'ibyamamare.

Bamwe mu byamamare byo mu Rwanda bizwi ko bari mu rukundo, nabo bazirikanye abakunzi babo kuri uyu munsi uba buri mwaka tariki 14 Gashyantare.

1.     Kimenyi Yves

Umukinnyi w’umupira w’amaguru, Kimenyi Yves ni umwe mu byamamare nyarwanda byazirikanye abakunzi babo ku munsi mukuru wa Saint Valentin mu butumwa bwuje urukundo. 

We n’umugore we, Muyango Claudine barushinze mu ntangiriro z’uyu mwaka, bisobanuye ko kuri aba bombi iyi ari Saint Valentin ya mbere bizihije babana nk’umugabo n’umugore byemewe n’Imana ndetse n’amategeko.

Yifashishije indirimbo ‘Ndagukunda’ y’umuhanzi w’umurundi witwa Kiki Toure, Kimenyi yanyarukiye ku rubuga rwe rwa Instagram ashyiraho ifoto nziza ari kumwe na Muyango maze aragira ati: “Nkukunda cyane kandi cyane mugore wanjye. Iyi nseko yawe ikora ku mutima wanjye.”

2. Keza Maolithia

Mu gihe isi yose yizihiza umunsi w’abakunda ‘Saint Valentin,’ Keza Maolithia wabaye igisonga cya mbere cya Nyampinga w’u Rwanda mu 2022 yerekanye umunsi we mushya. 

Yifashishije ijambo ry’Imana riboneka mu 1 Abakorinto: 13, maze yifuriza umukunzi we umunsi mwiza w’abakundana.

3. Nishimwe Naomi

Miss Nishimwe Naomi wegukanye ikamba rya Miss Rwanda mu 2020, yifurije umunsi w’abakundana umukunzi we uherutse kumwambika impeta.

4. Fleury Legend

Fleury Legend nawe yafashe umwanya yifuriza umugore we wamubyariye imfura, Bahavu Usanase Jannet umunsi mwiza wa Saint Valentin.

Mu magambo ye yaherekeje ifoto yabo baryohewe n’urukundo, Fleury yagize ati: “Ndi kumva ndi umunyamugisha cyane kuba mfite urukundo nyakuri nkawe. Ndashaka kubana nawe mu buzima nsigaje bwose. Saint Valentin nziza ya 2024. Bahavu Usanase Jeannet iteka ryose”.

5.  Uwicyeza Pamella

Uwicyeza Pamella uherutse kwiyegurira umuhanzi nyarwanda Mugisha Benjamin [The Ben] yatangaje ko yishimiye kwizihiza umunsi w’abakundana wa mbere abana n’umugabo we.

Mu gihe aba bombi bamaze kugera mu gihugu cya Uganda aho The Ben agiye gutaramira abakunzi be ku munsi wa Saint Valentin, Pamella yanyarukiye kuri Instagram arandika ati: “Ndi kwishimira urukundo n’umuntu wanjye w’ikirenga.  

6. Harmonize

Umuhanzi wo mu gihugu cya Tanzania, ari mu byamamare byifurije abakunzi babo umunsi mwiza w’abakundana, aho yashyize ifoto ye n’umukunzi we Poshy Queen bamaze iminsi bameranye neza ku rubuga rwa Instagram maze akandikaho ati: “Amahoro agomba kubahirizwa.”

7. Haji Manara

Haji Manara uherutse gusezerana n’umugore we Nailah Juakali, mu butumwa bwuje imitoma myinshi yagize ati: “Umunsi mwiza w’abakundana mugore wanjye mwiza, ndagukunda ni wowe munezero wanjye. 

Kuri njye, ni wowe mugore ubaruta munsi y’ijuru, komerezaho mukundwa nanjye nzakomeza kukubaha. Ntabwo ngira isoni zo kuvuga ku mugaragaro ko nkukunda cyane, wagaruye umunezero n’amahoro mu mutima none ndumva uri Umwami hagati mu ishyamba.”

Haji Manara yakomeje avuga ko yibuka ubutumwa bw’abamubwiraga ko batazagera ku munsi w’abakundana bazaba baratandukanye.

Ati: “Mubansuhurize mubabwire ko urukundo rwacu ruri mu byifuzo by’Imana. Uyu mubano wacu uzatandukanwa n’urupfu gusa Imana nibishaka. Iryo ni isengesho mugore wanjye.”

Umugore we nawe ntiyatinze kumusubiza, ahubwo yishimiye ko Saint Ventin ya mbere bizihije babana, amwibutsa ko ari uwe wese kandi amushimira urwo amukunda.

8. Ayoo Rash

Producer Ayoo Rash umenyerewe mu gutunganya indirimbo z’abahanzi nyarwanda, yifurije umugore we umunsi mwiza wa Saint Valentin, yifashishije ifoto yabo y’ubukwe. 

9. Iradukunda Moses

Umunyamakuru Iradukunda Moses w’Ikigo cy’Igihugu cy’Itangazamakuru, nawe ntiyatanzwe, ahubwo yifurije umugore we, Umubyeyi Shantizon umunsi mwiza w’abakundana.

Yanyarukiye ku rubuga rwa Instagram aragira ati: “Saint Valentin nziza rukundo rwanjye. Uri urukundo rw’ubuzima bwanjye, ndagushimira ko wazanye urukundo rwinshi n’ibyishimo by’ubuziraherezo.”

10. Teta Trecy

Teta Trecy, umukunzi w’umuhanzi nyarwanda Okkama wanamubyariye imfura, yifashishije amashusho agaragaza urukundo rwabo maze ayaherekesha amagambo yuje imitoma.

Trecy yanditse ati: “Saint Valentin nziza rukundo rwanjye rw’iteka ryose. Mu gihe twishimira ibyishimo dufite kuri uyu munsi w’urukundo, ndifuza kugirana nawe ibihe bidashira by’umunezero ibitwenge n’umurunga ukomeye. Ndagukunda, ndi umunyamugisha kubera wowe mukunzi wanjye.”

Okkama nawe yahise amusubiza ati: “Nawe mukunzi.”

11. General Benda

Umwe mu babyinnyi nyarwanda babigize umwuga General Benda yifurije umukunzi we Shakira Kay umunsi mwiza w’abakundana, amugenera ubutumwa bukubiyemo amagambo aryoshye ndetse n’impano zibereye ijisho.

Yifashishije urubuga rwa Instagram yagize ati: “Saint Valentin nziza rukundo rwanjye. Ndahari ku bwawe.”

Ku rundi ruhande, Shakira Kay nawe yagize ati: “Nakiriye kandi nishimiye urukundo rwose rumuturukaho. Saint Valentin nziza kuri mwese.

12. Gitego Puissant

Umukinnyi wa filime mu Rwanda uzwi nka Gitego Puissant yanyarukiye kuri Instagram agenera ubutumwa umukunzi we Iradukunda Yvette, aho yagize ati: “Uyu munsi ntabwo ari uw’agaciro ahubwo agaciro ni uburyo unyitaho umunsi ku wundi muri macye, twe duhora muri Saint Valentin.”

13. Afia Schwarzenegger

Uyu munyamakurukazi Afia ukomeye mu gihugu cya Ghana yifurije umugabo we umunsi mwiza w’abakundana amwibutsa urukundo amukunda.

Yagize ati: “Mugabo wanjye nkunda Jay, ndagushimira ku bw’ibintu byose… impano, amahoro, n’ibindi byose. Warakoze kumpindura umuntu mwiza kurushaho, warakoze ku bw’impano y’amasengesho n’inama ungira. 

Kukubwira ko nkukunda ntabwo bihagije, nishimira umwuka uhumeka, ndakwizihiza umunsi ku wundi kandi ndi umunyamahirwe kuba ndi umugore wawe. Umunsi mwiza w’abakundana mukunzi.”

14. David Beckham 

Mu mafoto yabo y’urukundo, David Beckham yifurije umugore we Victoria Beckham umunsi mwiza. Yagize ati: “Saint Valentin nziza ku mugore wanjye utangaje, mama & inshuti yanjye magara. Ndagukunda urankurura.”

15. Shakib Luutaya

Shakib Lutaaya, umugabo wa Zari Hassan yambwifurije umunsi mwiza, agira ati: “Iyo ahari, ibintu byose biba ari ubusitani bw’indabo.”

Ayo ni amagambo yanditse ku mbuga nkoranyambaga ze, nyuma y’uko amutunguje indabo nziza n’impano y’igipupe kinini ku kazi maze Zari ibyishimo bikamurenga.

16. Rayvanny

Umuhanzi Rayvanny yizihizanije umunsi wa Saint Valentin mu buryo bwihariye, bafata amafoto meza mu myambaro yubahiriza amabara aranga uyu munsi.

17. Kwizigira Jean Claude

Umunyamakuru w’imikino uri mu bakunzwe mu Rwanda, Jean Claude Kwizigira yifurije umugore we Kwizigira Umubyeyi Clarisse umunsi mwiza w’abakundana, ashimangira ko urukundo ari ikintu cyiza.

18. Isimbi Model

Isimbi Vestine yashyize amafoto ye n’umugabo we Shaul Hatzir kuri Instagram maze ayaherekeresha amagambo agira ati: “Ba Valentin wanjye iteka ryose.”

19. Wema Sepetu

Umukinnyi wa filime muri Tanzania, Wema Sepetu yifurije umukunzi we Don Dingoo umunsi mwiza wa Saint Valentin. 

Yagize ati: “Ni undi munsi nubwo kuri twe buri munsi aba ari Saint Valentin. Ariko reka ntugende gutyo gusa…Umunsi mwiza w’abakundana mutima wanjye.”

20. Winnie Harlow

Umunyamideli Winner Harlow wamenyekanye cyane kubera uburwayi bw’Ibibara ‘Vitiligo,’ yifurije umunsi mwiza umukunzi we Saint Valentin nziza.

Mu magambo ye yagize ati: “Umukunzi wanjye w’ibihe byose, Valentin wanjye w’ibihe byose. Icyampa Imana ikatwitaho ibihe byose. Saint Valentin nziza kuri mwese.”

Ibyamamare Nyarwanda byifashishije umunsi w’abakundana mu kwibutsa abakunzi ba bo urwo babakunda, uburyo ari ingenzi mu buzima bwa bo ari na ko bafata umwanya wo gusangira na bo, bakabasohokana ahantu heza mu rwego rwo kwishimana.

Tariki ya 14 Gashyantare buri mwaka ni umunsi wahariwe abakundana ku Isi yose, uyu munsi uzwi nka ‘Saint Valentin’ cyangwa ‘Valentine’s Day’ mu ndimi z’amahanga.

Ni umunsi abakundana baba bari kwizihiza umunsi urukundo rwa bo, bahana impano zitandukanuye ziganjemo indabo ari na ko babwirana amagambo meza y’urukundo.

Ni umunsi kandi abenshi bakunze kurimba (kwambara) imyenda yiganjemo amabara y’umutuku, umweru, umukara ndetse n’iroza.

Mu gihe ku Isi yose benshi baba bari kwizihiza uyu munsi, ni na ko ibyamamare bitandukanye hano mu Rwanda kimwe n’abandi Banyarwanda baba bizihiza uyu munsi, niyo mpamvu muri iyi nkuru tugiye kubagezaho uko ibyamamare bitandukanye hano mu Rwanda byizihuje uyu munsi.

Muyango Claudine na Kimenyi Yves

Muyango na Kimenyi bizihije umunsi w’abakundana barya umunyenga mu ndege, bava Kigali berekeza Musanze.

Miss Muyango Claudine wabaye nyampinga uberwa n’amafoto (Miss Popularity) mu irushanwa rya Nyampinga w’u Rwanda mu 2019 n’umugabo we Kimenyi Yves usanzwe ari umukinnyi w’umupira w’amaguru aho ari umunyezamu wa AS Kigali, bizihije umunsi w’abakundana barya umunyenga mu ndege.

Sosiyete yitwa Akagera Aviation ni yo yatembereje Muyango na Kimenyi mu ndege nyuma y’uko batsinze irushanwa ryari ryateguwe n’iyi sosiyete bahigitse Couple ya Miss Nishimwe Naomie n’umukunzi we.

Iyi ndege yabavanye i Kigali ibajyana i Musanze muri Virunga Lodge aho bafatiye amafunguro ya saa sita, iyo ndege yongeye irabafata urabacyura nyuma yo kugirana ibihe byiza.

Miss Keza Maolithia yerekanye umukunzi we

Mu gihe Isi yose iri kwizihiza umunsi w’abakundana (Valentine’s Day), Keza Maolithia wabaye igisonga cya mbere cya nyampinga w’u Rwanda mu 2022 yerekanye umukunzi we.

Miss Keza Maolithia abinyujije ku mbuga nkoranyambaga akoresha, yasangije abamukurikira amafoto ari kumwe n’umusore yihebeye witwa Cedric Rutazigwa, amwifuriza umunsi mwiza w’abakundana 'St Valentin’.

Ababyinnyi General Benda na Shakira Kay bamaze umwaka bakundana bateranye imitoma karahava

Ababyinnyi bagezweho kandi bakunzwe na benshi General Benda na Shakira Kay bizihije umunsi w’abakunda baterana imitoma.

Amakuru agera ku kinyamakuru ISIMBI avuga ko aba bombi bamaze umwaka bakundana, bakaba badahwema kugaragaza urwo bakundana ku mbuga nkoranyambaga zabo n’ubwo benshi babifata nk’aho ari inshuti gusa.

Kuri uyu wa 14 Gashyantare 2024, umunsi wahariwe abakundana, General Benda yahaye impano zitandukanye umukunzi we Shakira Kay zirimo indabo, amwifuriza umunsi mwiza w’abakundana.

Yagize ati “Umunsi mwiza w’abakundana rukundo rwanjye.”

Shakira nawe yamusubije amushimira amubwira ko amukunda.

Ati “Urakoze cyane rukundo rwanjye, urandyohera kandi ndagukunda bikomeye.”

Umunyarwenya Rusine Patrick yahamije urwo akunda Iryn Uwase Nazra

Kuri uyu munsi wahariwe abakundana, umunyarwenya akaba n’umunyamakuru Rusine Patrick yongeye guhamya urwo akunda inkumi yitwa Iyrn Uwase Nizra yigaruriye umutima we, amwifuriza umunsi mwiza w’abakundana.

Mu butumwa Rusine yashyize ku rukuta rwe rwa Instagram (Instagram story), abukurikije ifoto y’uyu mukobwa yagaragaje ko amukunda kandi ko anyuzwe no kuba amufite mu buzima bwe.

Ati “By’umwihariko uyu munsi, ndizera ko uri kumva uburyo ngukunda n’uburyo nishimira kukigira mu buzima bwanjye, Umunsi mwiza w’abakundana Iyrn”.

Mu minsi micye ishize ni bwo Rusine yasangije abamukurikira ifoto ari kumwe n’uyu mukobwa biba igihamya ko bari mu rukundo. Hari amakuru avuga ko kandi aba bombi bari mu myiteguro yo gukora ubukwe mu gihe cya vuba.

Teta Trecy ukundana na Okkama yifurije uyu muhanzi umunsi mwiza w’abakundana

Kuri uyu munsi w’abakundana, Teta Trecy umukunzi wa Okkama banabyaranye umwana w’umukobwa bise ‘Aira’, yasangije abamukurikira ku rukuta rwe rwa Instagram amashusho y’ibihe byiza yagiye agirana n’uyu muhanzi ayakurikiza amagambo meza y’urukundo amubwira ko amukunda.

Yagize ati “Umunsi mwiza w’abakundana ku rukundo rwanjye rw’buziraherezo. Nk’uko twishimisha uyu munsi w’urukundo ndashaka ibihe bidashira by’ibyishimo guseka […]Ndagukunda, ndi umunyamugisha kubera wowe Okkama.”

Okkama na we abinyujije kuri Instagram story yifurije umukunzi we umunsi mwiza w’abakundana.

The Ben na Pamella barizihirije umunsi w’abakundana muri Uganda

The Ben n’umufasha we Uwicyeza Pamella bari kubarizwa muri Uganda aho uyu muhanzi ari butaramire abari bwitabire igitaramo cyahariwe abakundana giteganyijwe kuri uyu wa 14 Gashyantare 2024.

Pamella abinyujije ku rukuta rwe rwa Instagram (Instagram story) yashyize ifoto ari kumwe na The Ben ubwo bari bageze muri Uganda ayimurikiza amagambo agira ati “Ndikwizihiza urukundo n’umuntu udasanzwe.”

Ni ifoto kandi yakurikije agace gato k’indirimbo ‘Best friend’ ya Anthony Trouma kumvukanamo amagambo meza y’urukundo.

Ati “Ndizera ko Isi iri kwijima ariko ndi kubona urumuri muri wowe, iyo numvishe ibihe biri kunkomerera nshimira lmana kuko ndi kumwe nawe.”

Umunyarwenya Gitego Puissant uzwi muri Nyaxo Comedy yerekanye umukunzi we

Umunyarwenya Gitego Puissant uzwi muri Nyaxo Comedy yerekanye umukunzi we, amutera imitoma amushimira ko ahora amwitaho.

Kuri uyu munsi w’abakundana, ni bwo Puissant yateye imitoma umukunzi Yvette agaragaza ko bahora muri St Valentin.

Mu butumwa yanyujije kuri Instagram ahanyura ubutumwa bumara amasaha 24 (Instagram story), Puissant yagize ati “Uyu munsi ntabwo ari uwagaciro ahubwo agaciro ni uburyo unyitaho umunsi ku wundi, muri macye twe duhora muri valentine’s day”.

Fleury Legend yifurije umugore we Bahavu Jannet Usanase umunsi mwiza w’abakundana

Umuhanga mu gutunganya amashusho (Director) Fleury Legend yifurije umugore we Bahavu Jannet Usanase usanzwe ari umukinnyi wa filime umunsi mwiza w’abakundana, amutera imitoma amubwira ko kuba amufite ari ibintu by’agaciro gakomeye kandi ko yifuza kubana nawe ubuzima bwe bwose.

Mu butumwa yanyujije kuri Instagram ye, Fleury Legend yagize ati “Niyumva nk’umunyamugisha kuba mfite umukunzi nkawe. Nifuza kuguhorana ubuzima bwange bwose. Umunsi mwiza w’abakundana 2024”

Miss Uwase Sangwa Odile wabaye igisonga cya kabiri cya Nyampinga w’u Rwanda mu 2019, yerekanye umusore wigaruriye umutima we

Abinyujije ku mbuga nkoranyambaga ze, Miss Uwase yasangije abamukurikira amafoto ari kumwe n’umusore bakundana.

Ni amafoto agaragaza indabo uyu mukobwa yahawe n’umukunzi we n’ayo bari kumwe mu modoka.

RUKUNDO Sulaiman / ISIMBI.RW