Blog

Manishimwe Djabel, nyuma yo gusinyira ikipe ya Al-Quwa Al-Jawiya mu cyiciro cya mbere muri Iraq, yakinaga umukino we wa mbere ndetse babyitwaramo neza batsinda Naft Maysan.

Muri iyi nkuru tugiye kurebera hamwe uko abakinnyi b’abanyarwanda bitwaye mu mpera z’icyumweru gishize. Amwe mu makipe ntabwo yakinnye aho ari mu karuhuko.

Kwizera Olivier – Al-Kawkab

Kwizera Olivier yari mu izamu rya Al Kawkab mu cyiciro cya 3 muri Saudi Arabia ku wa Kane w’icyumweru gishize tariki ya 15 Gashyantare 2024 mu mukino iyi kipe yatsinzemo Al-Lewaa 3-2.

Nyuma y’umunsi wa 23 Al Kawkab iri ku mwanya wa 11 n’amanota 30, Neom ya mbere ifite 51.

Runanguka Steve- Al Nojoom

Ntabwo Al Nojoom ya Rubanguka Steve mu cyiciro cya gatatu muri Saudi Arabia byayigendekeye neza ku wa Kane w’icyumweru gishize aho yanganyije na Al-Zulfi 1-1. Rubanguka Steve yari mu kibuga. Iyi kipe iri ku mwanya wa 13 n’amanota 21.

Hakim Sahabo – Standard Liege

Hakim Sahabo yinjiye mu kibuga ku munota wa 21 aza gusimburwa ku munota wa 81 mu mukino ikipe ye ya Standard de Liège yatsinzwemo na Westerlo 2-1ku wa Gatanu tariki 16 Gashyantare 2024

Nyuma y’umunsi wa 25 iyi kipe iri ku mwanya wa 11 n’amanota 28, Union Saint-Gilloise ya mbere ifite 62.

Maxime Wenssens – Royale Union Saint-Gilloise

Ntabwo umunyezamu w’umunyarwanda, Maxime Wenssens yari muri 18 bifashishijwe n’ikipe ya Union Saint-Gilloise mu mukino w’icyiciro cya mbere mu Bubiligi iyi kipe yatsinzemo 3-1 Kortrijk ejo hashize ku Cyumweru. Iyi kipe iyoboye urutonde n’amanota 62 nyuma y’umunsi wa 26.

Emeran Noam – Groningen FC

Groningen yo mu cyiciro cya kabiri mu Buholandi ya Emeran Noam ejo hashize ku Cyumweru tariki ya 18 Gashyantare 2024, yatsinze FC Eindhoven 3-0 mu mukino w’umunsi wa 26. Emeran ntabwo yari mu bakinnyi bifashishijwe. Iyi kipe iri ku mwanya wa 4 n’amanota 44 ku rutonde ruyobowe na Willen II na 57.

Gitego Arthur – AFC Leopards

Gitego Arthur ntabwo yari muri 18 ejo hashize ku Cyumweru ubwo ikipe ye ya AFC Leopards yo muri Kenya yanganyaga na Kakamega Home Boyz 0-0.

Nyuma y’umunsi wa 22, iyi kipe iri ku mwanya wa 8 n’amanota 31 ku rutonde ruyobowe na Gor Mahia n’amanota 47.

Sibomana Patrick Papy & Emery Bayisenge- Gor Mahia

Ku wa Gatandatu tariki ya 17 Gashyantare 2024 Papy na Emery bakinira Gor Mahia muri Kenya bari ku ntebe y’abasimbura ubwo batsindaga City Stars 1-0. Gor Mahia iracyayoboye urutonde rwa shampiyona n’amanota 47 ni nyuma y’umunsi wa 22.

Manzi Thierry – Al Ahli Tripoli

Manzi na Al Ahli Tripoli mu cyiciro cya mbere muri Libya, ku wa Kane w’icyumweru gishize tariki ya 15 Gashyantare 2024, batsinze Olympic Azzaweya 2-0.

Nyuma y’umunsi wa 12 iyi kipe ni yo iyoboye urutonde n’amanota 29.

Haruna Niyonzima – Al Ta’awon

Impera z’icyumweru ntabwo zagenze neza kuri Haruna Niyonzima na Al Ta’awon mu cyiciro cya mbere muri Libya ubwo ku wa Gatanu w’icyumweru gishize batsindwaga Al Ahli Benghazi 3-0 mu mukino w’umunsi wa 11. Muri iri tsinda rya bo iyi kipe ye iri ku mwanya wa 5 n’amanota 18 ku rutonde ruyobowe na Al Nasr na 25.

Mugisha Bonheur Casemiro – AS Marsa

Muri shampiyona ya kamarampaka mu makipe arwana no kutamanuka mu cyiciro cya kabiri muri Tunisia, ejo hashize Mugisha Bonheur Casemiro na AS Marsa akinira batsinzwe Métlaoui 3-1.

Imanishimwe Emmanuel Mangwende – FAR Rabat

Ejo hashize ku Cyumweru, Imanishimwe Emmanuel Mangwende yabanje ku ntebe y’abasimbura mu mukino ikipe ye ya FAR Rabat mu cyiciro cya mbere muri Maroc yanyagiyemo Oujda 5-0mu mukino w’umunsi wa 19. Iyi kipe ubu ni yo iyoboye urutonde n’amanota 43.

Meddie Kagere – Namungo FC

Ejo hashize Meddie Kagere yari ku ntebe y’abasimbura mu mukino ikipe ya Namungo FC mu cyiciro cya mbere muri Tanzania yatijwemo na Singida Fountain Gate yanganyijemo na JK Tanzania 0-0.

Nyuma y’umunsi wa 16, Namungo FC iri ku mwanya wa 8 n’amanota 19, Yanga ya mbere ifite 43.

Ntwali Fiacre – TS Galaxy

Umunyezamu mpuzamahanga w’Umunyarwanda ukinira ikipe ya TS Galaxy yo muri Afurika y’Epfo mu cyiciro cya mbere, Ntwari Fiacre yari ku ntebe y’abasimbura ejo hashize ubwo batsindaga Golden Arrows 3-1. Iyi kipe iri ku mwanya wa 7 n’amanota 24 ku rutonde ruyobowe na Mamelodi Sundowns na 39.

Manishimwe Djabel – Al-Quwa Al-Jawiya

Ku wa Kane w’icyumweru gishize Al-Quwa Al-Jawiya ya Manishimwe Djabel mu cyiciro cya mbere muri Iraq yanyagiraga Naft Maysan 4-0 mu mukino w’umunsi wa 14 . Manishimwe Djabel yari yabanje mu kibuga akaba wari n’umukino we wa mbere muri iyi kipe. Iyi kipe ikaba ari yo iyoboye urutonde rwa shampiyona n’amanota 36.

Rwatubyaye Abdul – FC Shkupi

Nyuma yo gusinyira ikipe ya FC Shkupi mu cyiciro cya mbere muri Macedonia avuye muri Rayon Sports, Rwatubyaye Abdul ejo hashize yakinaga umukino we wa mbere muri iyi kipe ubwo banyagiraga Voska Sports 3-0. Ubu iyi kipe iyoboye urutonde n’amanota 41.

Manishimwe Djabel yatangiye neza mu ikipe ye nshya muri Iraq

Kwizera Olivier yafashije ikipe ye mu mpera z’icyumweru gishize

Kuri iki cyumweru tariki 18 Gashyantare 2024, nibwo isiganwa ngarukamwaka rya Tour du Rwanda ryakinwaga ku nshuro ya 16 mu Rwanda. Ni isiganwa ryakinwe mu buryo ikipe yakinaga ihanganye n'igihe, Soudal Quickstep niyo yegukanye aga gace ikoresheje iminota 20 n’amasegonda 32.

Nubwo iri rushanwa ryakinwe ku buryo amakipe ahanganye n’ibihe,byatumye abakinnyi bitwaye neza baboneka ndetse baranahembwa.

Uko ibihembo byatanzwe

Umukinnyi mwiza ku rutonde rusange yabaye Jonathan Vervenne ukinira Soudal Quickstep, akaba yahembwe na Visit Rwanda, umukinnyi watowe nk’uwegukanye agace yabaye William Junior Lecerf ukinira Soudal Quickstep akaba yahembwe na Amstel.

Umukinnyi muto witwaye neza, yabaye Milan Donie akaba yahembwe na Prime Insurance. Umunyarwanda witwaye neza, yabaye Samuel Niyonkuru akaba yahembwe na Forzza bet. Umunyafurika mwiza yabaye Merhawi Kudus akaba yahembwe na RwandAir

Umukinnyi mwiza muto ukomoka muri Afurika yabaye Akilu Arefayne, akaba yahembwe na MoMo. Umunyarwanda ukiri muto witwaye neza, yabaye Janvier Shyaka, ahembwa na Ingufu Gun

Umukinnyi w’agaragaje guhangana yabaye Jan Kino, akaba yahembwe na Horizon Express, mu gihe ikipe nziza yabaye Soudal Quick Step yahembwe na Inyange. 

Kuri uyu wa mbere Tour du Rwanda irakomeza hakinwa agace ka kabiri karibuhaguruke i Muhanga abakinnyi berekeza i Nyaruguru.

MTN iherutse gusinya amasezerano y’ubufanye na Tour du Rwamukazajya ihemba umukinnyi muto mwiza w’umunyafurika 

Uyu ni umwaka wa kane Visit Rwanda itanga igihembo ku mukinnyi uhagaze neza ku rutonde rusange

Inyange yahembye ikipe yitwaye neza mu gace ka mbere kandi  ninako izakomeza kubikora

Kuri iki Cyumweru nibwo hakomeje gukinwa imikino yo ku munsi wa 21 wa shampiyona y’icyiciro cya mbere mu Rwanda.

Saa Cyenda kuri sitade y’akarere ka Bugesera ikipe ya Bugesera FC yari yahakiriye APR FC. Ni umukino wari utegerejwe na benshi barimo n’abafana ba Rayon Sports bari bari inyuma ya Bugesera FC kugira ngo yitambike ikipe y’Ingabo z’igihugu ubundi ikomeze kubarinda ku rutonde rwa shampiyona.

Ibi niko byaje kugenda , Bugesera FC izonga APR FC binashoboka ko  yari kuyibonamo igitego bijyanye n’uburyo abakinnyi bayo barimo Annie Elijah barataga imbere y’izamu ariko birangira banganyije 0-0.

Undi mukino wabaga, ikipe ya AS Kigali yari yakiriye Marine FC kuri Kigali Pelé Stadium. Ni umukino watangiye iyi kipe y’Abanyamujyi ifungura amazamu ku munota wa 1 gusa ku gitego cyari gitsinzwe na Kevin Ebene ariko Marine FC iza kwishyura ku munota wa 32 kuri penaliti.

Ku wa 75 AS Kigali yaje kubona igitego gitsinzwe na Ishimwe Fiston maze bituma umukino urangira batsinze ibitego 2-1.

Kuri iyi saha kandi ikipe ya Muhazi United yari yakiriye Police FC kuri sitade y’akarere ka Ngoma maze umukino urangira amakipe yombi anganya 0-0.

Kuri ubu ikipe ya APR FC ikomeje kuyobora urutonde rwa shampiyona n’amanota 46 n’umukino umwe w’ikirarane, Rayon Sports ni iya kabiri n’amanota 42 mu gihe Etoile de l’Est ikomeje kuba ku mwanya wa nyuma n’amanota 13.

Abakinnyi 11 ba AS Kigali bari babanje mu kibuga 

Abakunzi 11 ba Marine FC bari babanje mu kibuga 

Kevin Ebene yishimira igitego cya 1 yatsinze 

Abakinnyi ba Marine FC bishimira igitego cyo kwishyura bari babonye

Mu ijoro ryakeye ryo ku wa 17 Gashyantare 2024 n’ibwo uruganda ruhiga ibindi mu kwenga no gucuruza ibinyobwa bisembuye n’ibidasembuye ‘Bralirwa Plc’ yamuritse amazi mashya ya Vitalo'O, mu birori byebereye muri Kozo Kigali Restaurant.

Ni ibirori byatangiye ku isaha ya saa kumi n’ebyiri z’umugoroba aho uwinjiraga wese yahabwaga icyo kunywa asanzwe ashobora byumwihariko mu byengwa na Bralirwa Plc isanzwe ikorana na Heineken.

Amazi yamuritswe ari mu macupa abiri ariyo, irya santilitilo 50 rikozwe muri pulasitiki (ridasubizwa) ndetse n'irya santilitilo 30 ry'icyuma  ryo risubizwa ku ruganda.

Amazi ya Vitalo'O ntabwo ahenze kuko iryo mu icupa rya santilitilo 30 rigura 500 frw, mu gihe irya santilitilo 30 rigura 700 Frw.

Umuyobozi mukuru wa Bralirwa Plc, Etienne Saada, yatangaje ko iyi ari intambwe ikomeye kuri uru ruganda rumaze imyaka 67.

Mu ijambo rye yagize ati “Mu myaka 67 Bralirwa Plc yakoze uko ishoboye kugirango abakiliya bayo bagerweho ibinyobwa bifite ubuziranenge.

Igihe cyose dushyira imbere gushyira inshingano zacu mu bikorwa, duhanga udushya kugirango dushimishe abakiliya bacu”.

Avuga ko Bralirwa izakomeza gukora ibishoboka byose kugirango abakiliya babo babone ibyo bagombwa bitabahenze kandi bifite ubuziranenge.

Aya mazi ya Vital’O aje ku isoko ahasanga andi ya ‘Vitalo'O yamenyekanye nka Eau Gazeuse imaze imyaka 50 ku isoko.

Uyu muyobozi avuga ko gushyira ku isoko amazi mashya ya Vital’O, ari ugukomeza guhaza ibyifuzo by’ababagana kugirango barusheho kunogerwa na serivisi bahabwa dore ko ibyifuzo byiyongera umunsi ku munsi.

Ibi birori byaranzwe no kunywa no kurya, byitabiriwe na Nyampinga w’u Rwanda 2018 Iradukunda Liliane ndetse na Dj Marnaud wari umuvangamuziki

Bralirwa Plc yamuritse amazi mashya ku isoko ry’u Rwanda 

Abayobozi muri Blarirwa bishimiye gushyira hanze amazi mashya 

Abantu bizihiwe mu birori byo kumurika amazi ya Vital’O

Dj Marnaud niwe wavanze imiziki muri ibi birori 

Miss Rwanda 2018 Iradukunda Liliane ni umwe mu bari babukereye