Blog

Abo baturage bavuga ko iki gitekerezo cyo kwiyubakira imihanda ya kaburimbo bakigize bashaka gufatanya n'Umujyi wa Kigali, aho bagombaga kuzana 30% naho Umujyi wa Kigali ukazana 70% by'amafaranga yose.

Gusa ngo baje gusanga iyo gahunda yo gufatanya n'Umujyi wa Kigali itinda kuko yo inubakwamo kaburimbo zikomeye, bahitamo kwiyubakira imihanda ya kaburimbo yorohereje yabasha kuva muri ayo mafaranga ariko bikihuta.

Nyuma ngo bakusanyije amafaranga bayashyira kuri konti iri mu Murenge SACCO wa Kimironko ndetse banashaka rwiyemezamirimo uzayubaka atangira gukora.

Muri uwo Mudugudu w'Inshuti hagombaga kubakwa imihanda ine ijya mu ma 'quartiers', nyamara ngo hubatswe umwe gusa, ibiri ikorwa igice undi umwe ntiwagira icyo ukorwaho none ubu umwaka urirenze.

Abo baturage babwiye TV1 ko batazi aho ikibazo kiri kugeza ubu kandi baratanze amafaranga yabo bashaka gutura heza ariko ivumbi rikaba ritaboroheye.

Umwe yagize ati 'Harimo ivumbi ryishi kuko mbere mu muhanda hari harimo ibinogo imodoka zitahagenda zihuta ariko kuko bari bamaze kuhatsindagira, ubu zicamo zihuta bikazamura ivumbi ryinshi'.

Bafuza ko ayo mafaranga yashyizwe kuri konti yakoreshwa uko ari aho kugira ngo akomeze kubikwa cyangwa bakabwirwa niba hari ikindi kibazo cyavutsemo.

Umuvugizi w'Umujyi wa Kigali, Emma Claudine Ntirenganya yavuze ko ikibazo nyamakuru cyabiteye ari uko hari abaturage bamwe batatanze umusanzu basabwaga.

Yagize ati 'Mu gukora umuhanda ntiwavuga ngo urahera ahari abantu batanze amafaranga. Ikibazo bafite uyu munsi ni uko harimo abatarayatanga. Iyo bibaye ngombwa nk'ubuyobozi iyo ari igikorwa nk'icyo gifite inyungu rusange, turamanuka tukaza kureba niba nta manyanga arimo cyangwa ibindi'.

Aba baturage bo mu Mudugudu w'Inshuti bari bumvikanye ko buri wese atanga umusanzu hakurikijwe ubuso atuyeho. Gusa hari andi makuru avuga ko uwo muhanda wa mbere wubatswe ukarangira hari abadatanze uwo musanzu ari byo bishobora kuba byaratumye rwiyemezamirimo ahagarika ibikorwa kubera ibibazo byo kwishyurwa.

Umujyi wa Kigali ufite gahunda yo gufatanya n'abaturage kwiyubakira imihanda ya kaburimbo aho batuye, icyakora yabaye ihagaritswe ngo habanze hakemurwe ibibazo byajemo byatumaga itinda kandi abaturage baramaze gutanga umusanzu wabo.

Agace ka Kimironko kabarizwa mu karere ka Gasabo, mu mujyi wa Kigali

Uyu mukino wakinwe kuri iki Cyumweru Saa Kumi n’Imwe n’igice kuri Etihad Stadium.

Umukino watangiye ikipe ya Manchester City iri hejuru ndetse ku munota wa 7 yashoboraga kuba yabonye igitego ku mupira mwiza Bernado Silva yari ahaye Ilkay Gundogan gusa kuwutereka mu izamu biramunanira.

Bidatinze ku munota wa 9 iyi kipe yafunguye amazamu ku mupira mwiza Savinho yari azamukanye awucisha mu maguru ya ba myugariro ba Arsenal usanga Erling Haaland nawe awutereka mu nshundura.

Manchester City yaje gukora impinduka mu kibuga hakiri kare aho Rodri wagize  ikibazo cy’imvune yasimbuwe na Mateo Kovacic.

Ku munota wa 22 Arsenal yabonye uburyo bwa mbere imbere y’izamu muri uyu mukino ndetse ihita inabubyaza umusaruro itsindamo igitego cyo kwishyura aho uwitwa Gabriel Martinelli yazamukanye umupira yiruka ahita awuhereza Ricardo Calafiori nawe arekura ishoti riragenda rijya mu nguni ya ruguru rinyeganyeza inshundura.

Nyuma y’uko Manchester City yishyuwe yihariye umupira cyane arinako isatira ishaka uko yabona igitego cya 2 ariko ba myugariro ba Arsenal bakomeza kuba maso.

Ku munota wa 46 Arsenal yabonye igitego cya 2 gitsinzwe na Gabriel Maghalhaes akoresheje umutwe ku mupira wari uvuye muri koroneri yaritewe na Bukayo Saka.

Mbere yo kujya kuruhuka ikipe y’abarashi yahawe ikarita y’umutuku aho Leandro Trossard yari akoreye ikosa Bernado Silva, umusifuzi ahita amuha ikarita ya kabiri y’umuhondo bibyara umutuku.

Igice cya kabiri cyatangiye Mike Arteta akora impinduka mu kibuga akuramo Bukayo Saka ashyiramo Ben White.

Manchester City yakomeje yagiye ishimuta umupira bigera aho igira 91% mu bijyanye no guhererekanya ndetse ikaba arinako igerageza uburyo nk’aho Kayle Walker yahaye umupira mwiza Erling Haaland ashyiraho umutwe gusa David Raya aratabara.

Manchester City yagiye yakoze impinduka mu kibuga Jeremy Doku,Kayle Walker na Savinho bavamo basimburwa na Phil Foden,John Stones na Jack Grealish ndetse arinako ikomeza gusatira gusa ba myugariro n’umunyezamu wa Arsenal bihagararaho.

Abasore ba Arsenal bagiye barugarira karahava gusa umukino ubura amasegonda 55 ngo urangire Manchester City ibona igitego cya 2 gitsinzwe na John Stones.

Manchester City yahise ijya ku mwanya wa mbere n’amanota 13 naho Arsenal ijya ku wa 4 n’amanota 11.

Arsenal yanganyije na Manchester City ibitego 2-2

Umukino wa Gatandatu wa BetPawa Playoffs, ni umukino wari wakaniwe ku mpande zombi, haba APR BBC na Patriots BBC. Ni umukino watangiye APR BBC ifite intsinzi eshatu, naho Patriots BBC ifite intsinzi ebyiri. 

Umukino wa mbere watsinzwe na Patriots BBC, uwa kabiri n’uwa gatatu itsindwa na APR BBC, uwa kane urongera utsindwa na Patriots BBC, naho uwa Gatanu utsindwa na APR BBC, ibyahise biyiha amahirwe yo kwegukana igikombe, kuko yamanutse mu kibuga mu mukino wa Gatandatu, bizwi ko gutsinda kwayo ihita yegukana igikombe bidasubirwaho. 

Abakinnyi bafashije APR BBC muri uyu mukino ni Isaiah Muller, Shema Bruno, Chris Ruta, William Robenys, Nshobozwabyosenumukiza, Bush Wamukota, Ntore Habimana, Axel Mpoyo, Dan Manzi, Diarra Aliou Fadila na Shema Osborn.

Abakinnyi bafashije Patriots BBC ni Nyamwasa Bruno, Furaha Cadeaux de Dieu, Prince Ibeh, Sagamba Sedar, Branch Stephanus, Ishimwe Emmanuel, Kamndoh Frank, Kenny Gasana, NIYONSABA Bienvenie, Kamilindi Oliver, Hagumintwari Steven na Ndizeye Ndayisaba Dieudonne.

Ni umukino APR BBC yatangiranye imbaraga zidasanzwe, cyane ko yari izi neza ko gutsinda uyu mukino biza kuyihesha igikombe cya Shampiyona. Na Patriots BBC, yari izi neza ko niza gutsinda uyu mukino, yongera kugira amahirwe 50% yo kwegukana igikombe, cyane ko amakipe yombi byari kuzasaba gukina umukino wa karindwi. 

Umukino watangiye mpande zombi haba APR BBC na Patriots BBC zigerageza gukina neza, nuko agace ka mbere karangira Patriots BBC iri imbere n’amanota 19 kuri 17 ya APR BBC. 

Mu gace ka kabiri, APR BBC yagarukanye gahunda yo gushota amanota atatu no kubuza abakinnyi ba Patriots BBC kuyisatira. Ibyo byatumye mu gace ka kabiri Patriots BBC inanirwa gutsinda amanota menshi, nuko karangira APR BBC itsinze amanota 19 kuri 14 ya Patriots BBC, nuko igice cya mbere kirangira APR BBC iri imbere n’amanota 36 kuri 33 ya Patriots  BBC. 

Mu gace ka gatatu, APR BBC yongeye kugaragaza inyota y’igikombe, nuko ibuza Patriots BBC kuyisatira. Ako gace nako, karangiye APR BBC igatsinze n’amanota 25 kuri 18 ya Patriots BBC, nuko APR BBC ikomeza kuyobora umukino n’amanota 61 kuri 51 ya Patriots BBC. 

Agace ka kane, Patriots BBC yagarukanye imbaraga zidasanzwe ishaka gukuramo amanota yatsinzwe na APR BBC, nuko agace ka Kane igatsinda n’amanota 19 kuri 12 ya APR BBC. 

Gutsinda agace ka Kane, ntacyo byamariye Patriots BBC, kuko umukino warangiye APR BBC itsinze amanota 73 kuri 70 ya Patriots BBC. 

Gutsinda uyu mukino wa Gatandatu, byahise bishimangira ko APR BBC yegukanye igikombe cya Shampiyona ya Basketball 2024, itsinze Patriots BBC, APR BBC kandi ibona amahirwe yo kuzahagararira u Rwanda mu mikino ya BAL. 

Iki gikombe cya Shampiyona mu ya Basketball APR BBC yegukanye, kibaye icya 15, iguma kuba ikipe ifite iki gikombe inshuro nyinshi. 

Ikipe iyikurikiye ni Espoir BBC ifite ibikombe bitanu, Patriots BBC ifite ibikombe bine, REG BBC igitego ibikombe bitatu, Kigali Basketball Club igifite inshuro ebyiri, naho Marines ikakigira inshuro imwe. 

APR BBC yegukanye igikombe cya Shampiyona ya Basketball, ihigitse Patriots BBC 

Abakinnyi bafashije Patriots BBC 

Abakinnyi bafashije APR BBC 

Igikombe cyari cyazanywe ku mukino 

APR BBC yabujije Patriots BBC kwisanzura nuko iyitsinda umukino wa kane 

Umutoza wa Patriots BBC Henry Mwinuka, yatwawe igikombe na APR BBC 

APR BBC yegukanye igikombe cya shampiyona nyuma yo gutsinda Patriots BBC imikino 4-2.

Aya makipe yombi yageze ku mukino wa nyuma wa kamarampaka, akaba yagombaga gutanguranwa imikino 4 muri 7.

Wari umukino wa 6 mu ya nyuma ya Kamarampaka aho Patriots BBC nta kosa yagombaga gukora kuko yashakaga kuwutsinda ubundi bakazakiranurwa n’uwa 7.

APR FC yari yaratsinze 3 muri 5 yasabwaga kuwutsinda igahita yegukana igikombe cya shampiyona. Yaje kuwutsinda ku manota 73-70.

Amanota 10 ya Branch Stephaun, 7 ya Kamndoh Frank na 6 Furaha Cadeau bagoye APR BBC mu duce tubiri twa mbere ntacyo yafashije Patriots kuko muri utu duce Axel Mpoyo yatsinzwemo 8, Ntore Habimana 6, Diarra Aliou bari hejuru y’abandi bafashije ikipe y’ingabo z’igihugu kujya kuruhuka iri imbere n’amanota 36-33.

Agace ka gatatu APR FC ibifashijwemo n’abarimo Miller, Shema Hesbone na Ntore Habimana bagatsinze amanota 25-18.

Agace ka nyuma Patriots yaje ishaka kugatsinda ngo inakuremo ikinyuranyo cyose, abarimo Branch na Gaston bakoze ibishoboka byose bagatsinda amanota 19-12 ariko APR BBC yegukana umukino ku manota 73-72.

Wari umukino utoroshye

Abafana bari baje ku bwinshi

Byari ibyishimo bikomeye kuri APR FC

Iki kigo bise Busengo Living Lab, iherereye mu Murenge wa Busengo, iri mu mushinga GREATER watewe inkunga n'Umuryango w'Ubumwe bw'Uburayi, EU, ugamije gufasha u Rwanda mu guhangana n'ingaruka zo kwangiza ikirere, hibandwa ku gutunganya ingufu zisubiramo, Energy Renewable.

Muri uyu mushinga, biteganyijwe ko umwaka wa 2026 uzarangira, urubyiruko rugera ku 1000 ruhawe ubumenyi bwo gukora imirasire y'izuba no gukora bimwe mu bikoresho byayo biba byarangiritse.

Bazafashwa kandi na leta gukwirakwiza amashanyarazi akomoka ku mirasire y'izuba muri icyo gice cy'icyaro bigoranye ko andi mashanyarazi agerayo.

Umuyobozi w'Akarere ka Gakenke, Vestine Mukandayisenga, yavuze ko iryo koranabuhanga urubyiruko ruzaryungukiramo byinshi birimo gukoresha ingufu zisubiramo kuko baziga gukora no gukoresha imirasire y'izuba kandi ko bizabafasha gukura ako gace mu bwingunge.

Ati “Bizadufasha gukura aha hantu mu bwigunge kuko murabona ko ari mu cyaro, bagiye kwegerezwa amashanyarazi y'imirasire y'izuba ndetse abazaba barabyize bazajya bafasha abaturage mu gukora izagiye zangirika ndetse bakore n'imirasire y'izuba mishya.”

Bamwe mu babyeyi bo muri uwo Murenge wa Busengo, bavuga ko kuba abana babo bagiye kwigishwa gukora imirasire y'izuba babifitemo inyungu cyane kuko bizatuma urwo rubyiruko rubona imirimo.

Habumuremyi Jean Baptiste, ni Umuyobozi wa Busengo TSS, yagize ati “Abaturage bakeneye umuriro utishyurwa buri munsi kandi iyo bakoresheje imirasire y'izuba bakoresha umuriro neza kandi badahenzwe kuko izuba rirahari.”

“Urubyiruko rwacu rwo ruzahungukira ubumenyi, bahungukire amafaranga kuko nibo bazajya babafasha kuzibashyirira ku nzu byongeye kandi bakorere n'amafaranga igihe bari kuyikora yahuye n'ikibazo, aya ni amahirwe rero tudashobora kwitesha dushishikariza n'urundi rubyiruko kuyabyaza umusaruro, bihugure bamenye gukora amashanyarazi y'ingufu zisubira kuko birengera ibidukikije.”

Umuyobozi Mukuru wa INES Ruhengeri, Padiri Dr Jean Bosco Baribeshya, yavuze nka Kaminuza baba bagomba gukora ubushakashatsi kandi bukagira impinduka ku baturage.

Ati “Turifuza kuzana impinduka nziza mu miturire y'abaturage twongera ingo zitunze amashanyarazi muri aka gace k'icyaro, twigishe urubyiruko kuyakora no kuyakoresha bayabyaze umusaruro kuko ahatari amashanyarazi iterambere riba rigoye.”

“Tuzigisha urubyiruko uko biriya byuma bituma izuba ribyara umuriro w'amashanyarazi bikora, babikore ndetse bamenye no kubisana igihe byangiritse kandi birakenewe kuko hari n'abari basanganywe imirasire yangiritse nayo bazayisana.”

Kugeza muri Kamena 2024, ingo zifite umuriro w'amashanyarazi zari 78.9% nkuko imibare y'Ikigo cy'Igihugu gishinzwe Ingufu (REG) kibigaragaza.

Iki kigo cyitezweho gufasha urubyiruko rwo mu murenge wa Busengo, kubona akazi

Urubyiruko rwinshi rwitabiriye itangizwa ry’iki kigo, ryitezweho gutanga akazi

Uyu muhango wabaye kuri iki Cyumweru, uyoborwa n'Umugaba Mukuru w'Ingabo z'u Rwanda, Gen Mubarakh Muganga.

Itangazo rya RDF rigaragaza ko muri uyu muhango, abasoje imyitozo n'amahugurwa bagaragaje ubumenyi mu byo bigishijwe birimo tekiniki zitandukanye za gisirikare, uko bita ku ntwaro ndetse n'umurava mu nshingano.

Gen Mubarakh Muganga yashimiye abasoje imyitozo ku bw'ukwihangana bagaragaje ndetse n'umuhate mu gihe cyose bamaze batozwa.

Yabahaye ikaze mu muryango mugari wa RDF, abasaba gukoresha ubumenyi bahawe mu kurinda ubusugire bw'u Rwanda n'abaturage barwo.

Yabasabye kurangwa n'indangagaciro zisanzwe ziranga ingabo z'u Rwanda, RDF, by'umwihariko ikinyabupfura no gukorera hamwe nk'ikipe.

Pte Bizumuremyi Elissa ni we wahembwe nk'uwahize abandi mu masomo, akurikirwa na Pte Nshimiyimana Leonce, waje ku mwanya wa kabiri.

Gen Mubarakh Muganga yasabye abasirikare bashya kurangwa n’ikinyabupfura

Aba basore n’inkumi bagaragaje ubuhanga mu bijyanye n’imitegurire y’urugamba

Gen Mubarakh Muganga ashimira umwe mu bitwaye neza mu masomo bahawe

Abinjije muri RDF bagaragaje bimwe mu byo bize mu mezi atandatu ashize

Ni ikiraro kiri kubakwa ahitwa i Mwogo ku muhanda Buhanda-Kaduha, ahari hari ikindi kiraro ariko kinubirwaga n'abakoresha uwo muhanda ndetse kikabatera imbogamizi cyane mu gihe cy'imvura kuko cyarengerwaga n'amazi kigahagarika ingendo.

Ibyo ngo byiyongeraho no kwangiza imyaka ihinze mu kibaya cyegereye icyo kiraro nk'uko bamwe mu baganiriye na RBA babivuga.

Umwe yagize ati 'Icyo kiraro cyaruzuraga kikamena amazi mu mirima ihinzemo umuceri, ibigori soya n'ibindi amazi akabitwara inzara ikica abantu. Twizeye ko nicyuzura tutazongera gusonza kuko amazi azaba yahawe inzira'.

Undi yagize ati 'Iyo imodoka zavaga i Kigali zizanye ibyo kurya i Musange zigasanga cyarengewe zaburaga uko zibigezayo. Turifuza ko badufasha ubwo buhahirane ntibujye buhagarara'.

Aba baturage bavuga ko imirimo yo kucyubaka yakwihutishwa kuko kuri ubu icyo cyari gishaje ubu cyamaze gukurwaho kubera imirimo yo kubaka icyo kindi.

Ibyo rero ngo bibateye impungenge ko mu gihe imvura yakongera kugwa amazi bayobeje ngo babashe kucyubaka yahita yongera gukwira mu mirima yabo bikongera bikabateza inzara ndetse n'umuhanda w'agategenyo wubatswe bayobeje amazi y'umugezi icyo kiraro gicaho ukaba ushobora gusenyuka.

Guverineri w'Intara y'Amajyepfo, Kayitesi Alice yavuze ko binyuze mu Kigo gishinzwe Iterambere ry'Ubwikorezi mu Rwanda, (RTDA) imirimo yo kubaka icyo kiraro izajyana no kubaka neza umuhanda kiriho.

Yagize ati 'Tugenda tureba aho abaturage bakeneye cyane kurusha ahandi. Ku bufatanye na RTDA uriya muhanda na wo tugiye kuwuvugurura kugira ngo ugendwe neza kurushaho ariko twibanda cyane kuri icyo kiraro'.

Guverineri Kayitesi kandi yijeje abaturage ko imirimo yo kubaka icyo kiraro igiye kwihutishwa.

Imirimo yo kubaka Ikiraro cya Mwogo yatangiye muri Mutarama uyu mwaka, kikaba kizuzura muri Gicurasi mwaka utaha wa 2025.

Abaganiriye na BTN batifuje kumenyekana bagaragaje ko ahanini ikibazo gishingiye ku kuba amazi ava kuri uwo muhanda atarubakiwe inzira, ahubwo akayoborwa mu mirima yabo agacamo za ruhurura bikaba bibangiriza umusaruro w'ibyo bahahinga ku buryo bukomeye.

Umwe yagize ati 'Ikawa n'urutoki n'ibishyimbo mpinga byose amazi araza akabitwara. N'ibiti bisanzwe ndetse n'ibya avoka n'iby'imyembe byose byararimbutse'.

Undi yagize ati 'Nka njye mfite umwana wiga mu mashuri yisumbuye ariko nta mafaranga mfite kuko ayo nari nashoye mu kugura ifumbire yo gushyira ku ikawa yarahombye. Izo kawa amazi yazitwaye zikiri ingemwe ndetse hari n'umuyoboro uca mu murima watwaye ibishyimbo nari mpafite'.

Abo bahinzi bagaragaza ko icyo kibazo batagicecetse ariko ko ubuyobozi bw'inzego z'ibanze nta cyo bwabamariye mu myaka yose ishize.

Umwe muri bo ati 'Abayobozi batubwiye ko bazahagera ariko nta wahageze, twandikiye n'akarere ariko nta gisubizo twabonye. Uwo twari twashyizeho ngo aduhagararire kuri iki kabazo baramubwiye ngo 'nta kintu yemerewe kuzongera kubaza mu karere', ubwo na we abishyira hasi. Baranatubwiye ngo dukore urutonde rw'ibyangijwe n'amazi ya ba nyirabyo na bwo dutegereza igisubizo ntitwakibonye'.

Umuyobozi w'Ikigo k'Igihugu gishinzwe Iterambere ry'Ubwikorezi (RTDA), Imena Munyampenda yavuze ko ku wa Mbere ku itariki 23 Nzeri 2024 azatanga igisubizo gihamye kuri iki kibazo.

Sheikh Musa Sindayigaya yatorewe kuyobora Umuryango w'Abayisilamu mu Rwanda tariki 27 Gicurasi 2024.

Uyu mubyeyi w'abana batatu yahise atangira urugamba rwo kugarura ubumwe muri Islam, no guharanira kubaka imishinga y'iterambere.

Mu kiganiro cyihariye yagiranye na IGIHE yatangaje ko mu kuva afite imyaka 17 yinjiye mu byerekeye ibwirizabutumwa, agera ku rwego rwa Sheikh afite imyaka 23 gusa.

IGIHE: Sheikh Musa Sindayigaya ni muntu ki, yize amashuri angana iki?

Sheikh Sindayigaya: Navukiye mu Murenge wa Gacurabwenge mu Karere ka Kamonyi ni ho nakuriye niga amashuri abanza, amashuri yisumbuye nayize muri Institut Islamique al Hidaya ryigisha Theologie ku rwego rw'amashuri yisumbuye, nkomereza muri Kaminuza ya Kiyisilamu yitwa Islamic University of Madina muri Arabia Saoudite mpamara imyaka ine niga ibijyanye n'Amategeko ya Kiyisilamu n'Ururimi rw'Icyarabu, aho naharangije mu mwaka wa 2003.

Nagarutse mu Rwanda mu 2003 bivuze ko ubu maze imyaka 21 muri gahunda z'ibwirizabutumwa zitandukanye kandi kugeza ubu nabaye mu nzego zitandukanye z'Umuryango wa Islam mu Rwanda, nakoranye n'abayobozi batandukanye, wavuga ko mfite ubunararibonye bw'imyaka 20 mu buyobozi imbere.

Nabaye umuyobozi ushinzwe iby'ibwirizabutumwa ku rwego rw'igihugu, icyo gihe hari ku buyobozi bwa Sheikh Saleh Habimana, nyuma nza kuba Mufti Wungirije ku gihe cya Sheikh Gahutu Abdulkarim, icyo gihe nyabwo nabashije gukomeza kurangiza manda ariko nakomeje kuba n'ubundi mu buyobozi, hanyuma guhera muri 2013 kugeza 2018 nanone nabaye umuyobozi wa Islam mu Mujyi wa Kigali, mvamo 2018 nsubira mu buyobozi bukuru ari ho nari nkiri kugeza ubwo natorewe kuba Mufti byari ku rwego rw'Umuyobozi Mukuru ushinzwe iteganyabikorwa n'imari.

Icyampaye ububasha bwo kuyobora uwo mwanya wumva utari muri Theologie ni uko mu bumenyi nize bw'idini, ariko nanone mfite icyiciro cya gatatu cya kaminuza muri Public Administration and Management nize muri Islamic University in Uganda, nize muri Kabale University hanyuma kandi ubu ndi kwitegura kugira impamyabumenyi y'ikirenga muri byerekeye ubuyobozi n'imiyoborere [Leadership and Governance] muri Jomo Kenyatta University. Narangije amasomo, nsigaje kujyayo gukora ubushakashatsi.

Ndubatse, mfite umugore n'abana batatu, ndi umubwirizabutumwa w'idini ya Islam kandi ntuye muri Kigali.

IGIHE: Ni irihe somo ryakurazaga udasinziriye?

Sheikh Sindayigaya: Imibare ntabwo nayikundaga cyane nabonaga indushya ariko nanone amasomo yose narayakundaga nkanayatsinda, ntabwo nigeze ngira amanota atari mu rwego rwo hejuru cyane, haba mu mashuri yisumbuye nabaga uwa mbere mu ishuri, narangije ari njye wa mbere mu kigo ndetse no muri kaminuza i Madina ho wenda ntabwo nari uwa mbere ariko nari mu banyeshuri bafite amanota meza cyane kandi haba hari ibihugu byinshi, Isi yose iba ihari, navuga ko u rwego rw'amasomo nta kibazo nigeze ngira nubwo haba hari ayo umuntu yiyumvamo kurusha ayandi, muri rusange ntabwo nigeze ngira imbogamizi zijyanye no kwiga, ndashima Imana kuko nigaga mbona bigenda neza.

Kwa kundi umuntu avuga ngo iri somo rirananira, nta na rimwe ahubwo njyewe naharaniraga kwiga, nakundaga bimwe bita gusubiramo amasomo nabihaga imbaraga zishoboka, umwanya wanjye mu kwiga nawukoreshaga neza bishoboka kuko njyewe kwakundi umuntu ajya kwiga akajya mu kizamini avuga ngo nambaza aha ndumva ntiteguye, njyewe narigaga nkava ku rupapuro rwa mbere nkagera ku rwa nyuma ku buryo nagendaga mvuga ngo aho yabaza hose nditeguye.

Urabona kumwe nijoro iyo umuntu yize neza byafashe atari ibyo guhutiraho, ubundi iyo ufite ikizamini hari igihe ukanguka ukumva nk'igitabo urakireba neza ukumva n'ahantu handitse niba ari igika urakireba neza mu rupapuro, uko niko nasubiragamo amasomo. Ni yo mateka yanjye mu buzima bwo kwiga.

No mu ishuri nakundaga kwicara ku ntebe ya mbere ku buryo twiga i Madina muri Arabia Saoudite habaga ubunebwe bwo kwandika, umwalimu akaza akababwira mu magambo, umuvuduko we rero hari abanyeshuri rero bategereza abandi bandika neza cyangwa vuba bakazafotoza ibyo banditse. Njyewe rero ntabwo nafotozaga, n'ubu amakaye yanjye ndayafite amaze imyaka 20 nigiyemo arimo umukono wanjye.

Umunsi wa Sheik Musa uba uteye ute?

Urebye iminsi yanjye myinshi irasa usibye impera z'icyumweru ariko urebye kuva ku wa Mbere kugeza ku wa Kane saa tatu mba ndi ku kazi, abakozi bose tuba turi hano mu biro tukagira ikiruhuko saa Sita kugeza saa Saba tukanasenga, akazi kakarangira saa Kumi n'imwe ariko hari abakozi bagenda mu rwego rw'intangiriro za manda shya kandi dufite byinshi bidushishikaje tugomba kugeza ku Bayisilamu, twe ntidufite amasaha y'akazi.

Muri iyi ntangiriro na bo narabateguje barabinyemerera ntitugira week-end, ku wa Gatandatu cyangwa ku Cyumweru ndetse hari igihe na saa Tanu z'ijoro zidusanga mu biro. Mu minsi ishize hari n'abaraye hano kugeza mu gitondo.

Hanze y'akazi, Mufti Sindayigaya aba ari muntu ki?

Tugira ibikorwa bisanzwe dutumirwamo byawe bwite, ujya mu bukwe, mu minsi mikuru runaka, usura naka na naka akagusura, umuryango se n'inshuti zacu, ni ukuvuga ngo ugerageza kubihuza n'umwanya w'abana.

Nkunda gutemberana n'umuryango, dukunda kujya ku mazi ahantu runaka, nko mu mpera z'icyumweru cyane ku wa Gatanu iyo nta kazi kenshi gahari iyo tumaze gusenga [ijumaa] umuntu ntabwo asubira mu rugo urabasohokana ukabasengerera.

Mu byo kurya mukunda iki?

Nkunda brochette y'ifi cyane, inyama zo ntabwo nzikunda, ahari umenya nariye nyinshi kera tukiba mu barabu ariko ababyeyi bambwiye ko nariye inyama bampaye umuti wo guhugura, ahari byarongeye bisubira uko ariko ntacyo zintwara.

Ifi ndayikunda, nkakunda icyayi cy'amata, nkunda amata cyane inshyushyu. Ku mafunguro ya Kinyarwanda ntabwo nkunda igitoki ariko nkunda umwumbati nkawunywesha amata y'ikivuguto.

Mufti Sindayigaya akora iyihe siporo?

Siporo ndayikora mu rwego rw'ubuzima, urabona twirirwa twicaye, nkunda gukora siporo yo kwiruka. Urabona aha dutuye ku mugoroba ni ukwiruka nka kilimetero eshanu nibura gatatu mu cyumweru ngomba kuyikora.

Nari nsanzwe mbikora ariko amasaha menshi y'umuyobozi mukuru aba yicaye hamwe, ibyo usinya cyangwa usoma rero kwiruka nsigaye nshyiramo imbaraga nyinshi ariko mfite umwuka wo kwiruka nta kibazo.

Ni iyihe kipe ufana mu Rwanda n'i Burayi?

Ntabwo nkurikira umupira cyane ariko nk'imipira y'iburayi, UEFA Champions League nshobora gukurikira ikipe zakinnye nkamenya nk'umukinnyi umwe, abana banjye usanga bansega ngo ntabwo nzi abakinnyi kuko barambaza ngo uriya ni nde nkababwira ngo ntabwo mbizi.

Mu Rwanda njye kuva na kera nafanaga Kiyovu Sports gusa wenda ni uko ntagiye nkomeza gukunda ibintu by'umupira ariko nanakinaga umupira tukikiri abana, mu mashuri yisumbuye, muri kaminuza nakinaga mu izamu kandi narageragezaga. Gusa hashize igihe ntajya mu mupira.

Ibihe by'ubusore kuri Mufti Musa byari bimeze bite?

Nakuriye mu ibwirizabutumwa, kuva mfite imyaka nka 17 ni ho nari ndi ubwo rero hari imyifatire runaka byansabye guhagarika nk'iby'urubyiruko byo kwinezeza byinshi ntabwo nigeze mbigenderamo. Nabaye Sheikh nkiri muto kuko nari mfite imyaka 23, iyo myaka ni yo ubundi urubyiruko rundi rujya muri ibyo, nta n'indirimbo njya menya, sinzi no kubyina cyane ko umuziki twe ntabwo tuwemera mu Idini ya Islam.

Gusa wenda umuntu ntiyabura kuvuga ku bahanzi ba kera n'ab'iki gihe, abahanzi ba kera ubona barabaga bafite indirimbi zifite aho zaganishaga ariko hari ab'iki gihe ubona biba bidafite umurongo [ntabwo atari bose] ari iby'igihe gito bihita byibagirana ariko umuntu ugasanga afite indirimbo imaze imyaka mirongo 50 kandi ukiyumvamo ubutumwa bwubakitse.

Ariko ibyo kumenya imiziki no kumenya abahanzi no kubicengera no kuzifata mu mutwe, nta ndirimbo n'imwe nzi mu mutwe wavuga ngo uyu arayizi kubera ko sinigeze mbigenderamo.

Ni nde ufata nk'icyitegererezo mu buzima bwawe?

Navuga mu buryo bubiri, mu buryo bw'imyemerere icyitegererezo cyanjye ni Intumwa y'Imana Muhammad [Imana imuhe amahoro n'imigisha] kuko ni we rugero rw'Abayisilamu bose hanyuma mu buryo bw'imiyoborere n'uburyo bwo gukora no guha ibintu umurongo, uwo mfata nk'icyitegererezo ni Perezida Paul Kagame kuko ayobora neza ndetse akaba yarubatse igihugu akivanye kure.

Mu bintu bye mpora ntekereza cyane ni ukuntu yagaruye ubumwe bw'Abanyarwanda nyuma y'igihugu cyabayemo Jenoside igahitana abarenga miliyoni mu minsi 100 gusa.

Numva ngize amahirwe nkayobora nka we byagenda neza kandi ni umwalimu mwiza, tumwigiraho ibikorwa bitandukanye, ikindi ni ukubaza inshingano abantu bose nta n'umwe udakorwaho, aha nta muntu ukomeye igikomeye ni itegeko.

Ingingo zijyanye n'uburinganire wemeranya na zo?

Mu idini ya Islam twemera ubwuzuzanye. Hari aho abantu baringaniye imbere y'amategeko hari n'ibyo amategeko atabaringanizaho imbere y'amategeko Imana yashyizeho mu idini ya Islam. Bahuriye ku bumuntu, kubahiriza amategeko y'Imana, kuzahanwa nibarengera kuko nta we bizafasha ngo kuko ari umugabo cyangwa umugore, ariko uburinganire ntabwo ari mu bintu byose 100%.

Mu miterere, umugore agira ibihe bya buri kwezi ntabwo umugabo abigira. Mu mategeko y'idini ya Islam umugore wagiye mu bihe bya buri kwezi ntabwo asiba ahubwo iriya minsi azayibara azayishyure yarasubiye mu bihe bisanzwe. Aho Islam iramutse igizemo uburinganire yaba igiye guhutaza uriya mugore kuko hari imbaraga z'umubiri aba ari gutakaza, anongeyeho no gusiba akabwiyiriza harimo ikibazo.

Ku birebana n'inshingano zo mu rugo, idini ya Islam yemera ko umugabo ari we muhagararizi w'urugo, ni we muyobozi w'urugo ariko nanone Islam yateganyije inshingano za buri ruhande. Umugabo afite inshingano azabazwa n'umugore afite inshingano azabazwa, hari n'izo bahuriyeho bombi nko guha abana uburere.

Mu idini ya Islam ntabwo umugore ategetswe gutunga urugo. Yabikora mu buryo bw'ubushake bwe ariko atari ukuvuga ngo ni inshigano Imana izamubaza. N'ayo yakoreye mu idini ya Islam umushahara w'umugore uba ari uwe, agize icyo agura ku giti cye ni uburenganzira bwe.

Ay'umugabo yo barayasangiye kuko ategetswe kumuhamo ibyo akeneye.

Islam ivuga iki kuri feminism?

Twabyita gushyira imbere abagore, twe nta kibazo tubifiteho. Hari abantu bavuga ngo umuntu yarize ariko ntagomba gukora kuko ari umugore, ibyo ni ukubuza umuntu uburenganzira mu byo yemerewe kandi atigeze abuzwa n'Imana.

Imana ntabwo yigeze ivuga ngo hazige umugabo gusa, umugore gusa. Yategetse ko umubyeyi yigisha abana bose atarobanuye harebewe ko bose bagomba kwiga. Ku birebana n'akazi nubwo Islam ifite imirongo migari yashyizeho ariko umugore yemerewe gukora, kwiga akaminuza akaba umuhanga akaba igitangaza mu rwego rw'ubumenyi n'ubwenge yarangiza akabutanga agafasha igihugu n'idini ye.

Dufite abayisilamukazi bari mu nzego z'igihugu, Abadepite, Abasenateri abikorera benshi bafite za kaminuza, ibikorwa bitandukanye, abarimu muri za kaminuza, rero Islam ntabwo ibuza umugore kwiteza imbere ariko agomba kuzirikana ya nshingano y'urugo no kubaka umuryango kimwe ntikibangamire ikindi.

Sheikh Sindayigaya Musa yahamije ko yinjiye mu ivugabutumwa akiri muto ku buryo mu busore bwe nta birangaza yanyuzemo