Category: Uncategorized

Itangazo rya RDB riravuga ko ibyo bikorwa byafunguwe mu rwego rwo gukomeza ingamba za Leta zo kuzahura ubukungu bwahungabanyijwe n’icyorezo cya coronavirus.

Abatangaga izi serivisi bavuga ko ari iby’agaciro kuba zongeye gufungura, ibintu bavuga ko biragira ingaruka nziza ku buzima bw’abantu ariko n’abakozi bakongera kubona akazi.

Ubuyobozi bwa Nyakabanda Heath Spa, itangira izi serivisi mu Mujyi wa Kigali ahazwi nko kuri kontineri butangaza ko uretse kuba abakozi bari barabuze akazi kubera guhagaraga kw’izi serivisi ariko n’abagana izi serivisi nabo bashoboraga kuzafatwa n’uburwayi butandukanye.

Impuguke muby’ubuvuzi akaba n’umuyobozi wa Fame Lounge ari nayo ifite iki kigo cya Nyakaganda Health Spa, Dr Kintu Muhammed yabwiye UKWEZI ko indwara y’umunaniro muri iyi minsi iri kugira ingaruka ku buzima bwa benshi harimo n’abo ihitana.

Dr Kintu avuga ko ari byiza kuba RDB, yafashe icyemezo cyo gufungura serivisi za 'massage’ kuko birafasha mu gutanga ubu buvuzi ku bantu baba bafite ibibazo birimo umunaniro.

Ati 'Kuba bafunguye massage ni ibintu byiza kuko hari uburyo umubiri w’umuntu by’umwihariko bamwe bari baragize ibibazo by’umunaniro barongera batugane tubafashe bakorerwe massage zihite zikira.' Dr Kintu usanzwe afite ikigo cya Nyakabanda Health Spa gitanga serivisi za sauna na massage

Mu mbwiriza abatanga izi serivisi bahawe kubahiriza harimo gushyiraho uburyo buboneye bwo gusukura intoki, bakaraba cyangwa bifashishije umuti umenyerewe nka 'hand sanitizer’.

Harimo kandi gushyiraho uburyo buboneye bwo gusukura ibyumba n’ibikoresho byo mu byumba bikorerwamo 'massage’ n’ahandi hantu hose abantu bahurira.

Abakora massage n’abakiliya kandi bagomba kwambara udupfukamunwa igihe cyose.

Muri ayo mabwiriza RDB yakomeje iti 'Gushyiraho uburyo bwo guha gahunda mbere abashaka gukoresha massage, hagamijwe kwirinda ko abakiliya bahahurira ari benshi no gutanga umwanya wo gukora isuku ; gushyira byibura iminota 15 hagati y’umukiliya n’undi kugira ngo isuku ikorwe neza, kandi hirindwe ko abantu benshi bahurira aho bakirirwa.'

Muri ayo mabwiriza kandi harimo gushyira ahantu hose abantu bategerereza cyangwa mu bwiherero, ibyapa n’amatangazo byibutsa abantu kwirinda Coronavirus, cyane cyane ibirebana no guhana intera, gukaraba intoki n’izindi ngamba.

Mu byo basabwe kandi harimo gushishikariza abakiliya kwishyura hakoreshejwe ikoranabuhanga.

Serivisi za massage ni zimwe mu zari zifunzwe kuva muri Werurwe, ubwo mu gihugu hashyirwagaho gahunda ya guma mu rugo, hagamijwe guhangana n’ikwirakwira rya Coronavirus.

Mu itangazo rya RDB, ntihavugwa niba serivisi za sauna zemewe, bivuze ko hafunguwe massage gusa.

Abazatsindira ibi bihembo byiswe 'Inganji Perfoming Arts Awards 2020′, binyuze mu gutorwa bityo ugize amajwi menshi akaba ariwe uzahembwa, bazabihabwa mu muhango uteganyijwe kuba ku wa 18 Ukuboza 2020.

Muri rusange ibyiciro by’abazahembwa birimo ; Ikinamico, Urwenya/Comedy, Ubusizi/Poetry, Imbyino gakondo ndetse n’izigezweho.

Ababitegura bagize iki gitekerezo nyuma yo kubona ko hari amarushanwa menshi mu Rwanda ashimira ndetse agahemba abakoze neza kurusha abandi mu byiciro bitandukanye by’ubuhanzi ariko bakabona abari muri iki gisata cy’ubuhanzi bukinwe badakunze gutekerezwaho.

Umuyobozi wa 'Inganji Performing Arts Awards’, Kalinda Isaie yabwiye UKWEZI ko abahanzi bo muri iki gisata bakora cyane kandi bagira umubare munini w’ababakunda bitewe n’ubutuwa batanga ari nayo mpamvu bakwiye gushimirwa.

Kalinda yasabye abakunzi n’abafana b’abahatanira ibihembo kubashyigikira bakabahundagazaho amajwi kugira ngo begukane ibi bihembo.

Yagize ati 'Icyo dusaba abakunzi b’ibihangano bikinwe bigaragara ndetse n’abanyarwanda muri rusange gutora abakinnyi bakabahundagazaho amajwi, kuko nibyo bigaragaza rwa rukundo babafitiye na kwa kubashyigikira.'

Umukinnyi wa filime uri mu bakomeye mu Rwanda Niyitegaka Gratien [Papa Sava] ahataniye igihembo mu cyiciro 'Acting Comedy Male’ aho ari kumwe n’umukinnyi wa filime Njuga, Karisa Erneste [Samusure], Yaka Mwana uzwi ku mbuga nkoranyambaga, Putino, Rebero Norbert uzwi nka Digidigi n’abandi.

Ayirwanda Jean Claude uzwi nka Bushombe mu ikinamico Urunana ahatanye mu cyiciro 'Theatre Radio Drama Male Actors’ ahuriyemo na Ndabananiye Jean de La Croix uzwi nka Shyaka mu Urunana, Sibomana Emmanuel uzwi nka Patrick/Urunana, Higiro Adolphe uzwi nka Shema muri Musekeweya, Mukeshabatware Dismas/Rutaganira muri Musekeweya n’abandi.

Kalinda uhagarariye Inganji Performing Arts Awards, ibihembo bigiye gutangwa ku nshuro ya mbere mu Rwanda

Hari kandi icyiciro kirimo Murekatete Marium [Budensiyana], Muhutukazi Mediatrice [Kankwanzi], Liliane Karangwa [Indamutsa], Kabahizi Mariana [Chantal] ukina muri Musekeweya bahatanye mu cyiciro cyiswe 'Theatre/Radio Rwanda Female.

Mu cyiciro cy’amatorero gakondo [Traditional Dance Troups] harimo Inganzo Ngari, Inyamibwa, Inganzi mu nganzo, Indatirwabahizi, Urwiririza, Garukurebe, Intayoberana ndetse n’itorero Imena.

Icyiciro cya 'Traditional Dance Male’ harimo Gatore, Patrice, Gashamira Aimable, Sembuga Djuma n’abandi. Ni mu gihe mu cyiciro cya 'Modern Dance Female’ harimo Fofo Dancer, Kelia, Arbina, Nadia, Nelly n’abandi.

Bimwe mu bihembo bizatangwa harimo nka Best Radio Drama Actor of the Year (Male and Female), Most Popular Radio Drama Actor of the Year (Male and Female), Umunyarwenya mwiza w’umwaka (Umugabo n’umugore [Best Comedian of The year].

Hari kandi munyarwenya ukunzwe w’umwaka (umugabo n’umugore), Best Radio Drama Script writer of the Year, umubyinnyi mwiza w’umwaka, umwanditsi mwiza w’imivugo w’umwaka, Itorero ry’imbyino gakondo ryiza ry’umwaka n’ibindi.

Gutora byatangiye kuri uyu wa Kane tariki 05 Ugushyingo 2020 bizasozwa ku wa 10 Ukuboza 2020. Wifashisha urubuga rwa www.mni.rw ahari icyiciro cyanditseho 'Inganji Performing Arts Awards 2020′.

Ushobora gutora unifashije uburyo bwa Mobile Money. Wemerewe gutora inshuro zose ushaka ku munsi, ariko ukabikora nyuma y’iminota 30′.

Kanda hano utangire guha amahirwe uwo ushyigikiye muri ibi bihembo kanda hano