Urushako ni umugisha ukomeye bikaba akarusho iyo rushingiye ku bwami bw’Imana ariko kandi ni indorerwamo umuntu areberamo imyitwarire ye bwite mu buryo budasanzwe kuko haba habayeho guhuza imico hagati y’umugore n’umugabo. Niyo mpamvu bikwiriye ko umuntu ategura umutima we mbere yo kwinjira mu rushako.
Ni muri urwo rwego tugiye kurebera hamwe ibintu 9 ukwiye kwitaho mbere yo gufata umwanzuro wo gushaka
1. Tangira gusengera uwo muzabana
Urushako rugomba kuba rushingiye ku rukundo. Nta gitangaza kuba umukobwa cyangwa umusore w’umukristo yatangira gusengera uwo bazabana hakiri kare, ashobora guhera mu kigereo cy’ubwangavu n’ubugimbi asenga aragiza Imana uwo bazabana n’ubwo aba ataramumenya.
Bene iri sengsho rirafasha cyane kuko riragenda rigategura umutima w’uwo muzabana hanyuma igihe cyo guatngira kurambagiza (dating) kigera yaramaze gutegurwa mu buryo bw’umwuka kandi Yesu aba yarabarinze mugihe cy’ubuto bwanyu mukabasha gutsinda ibishuko by’uburyo butandukanye.
2. Kwegera igihe cy’irambagiza nk’igikorwa kiyobowe n’Umwuka Wera
Nkiri muto, niyemeje ko ntazarambagizanya igihe kirenga umwaka umwe ntari namenya byimbitse ko nzamarana na we ubuzima bwanjye bwose. Imana yabishyize mu mutima wanjye kudatakaza igihe cyanjye n’umuntu ntizeye ko tuzamarana ubuzima bwose.
Izi ni ingamba nashyizeho ubwanjye ntabwo ari itegeko ryo kugera ku butsinzi, ariko ikintu buri mubano ushingiye ku kurambagiza uhura na cyo, ni ukubona urufunguzo rwo kwiyemeza kubana n’umuntu ubuzima bwawe bwose.
Mubyukuri kurambagiza ni igikorwa gikwiriye kuyoborwa n’Umwuka Wera, ni ahantu ho kwitoreza ubuzima bwo mu rushako. Umusingi w’urushako ruhamye ni ibikorwa biganisha ku kwiyemeza kuba buri weae yakwitangira mugenzi we.
3. Kwitoza kuba incuti nziza
Mugihe urimo guhitamo uwo wifuza ko muzashakana, mbere ya byose ugomba guhitamo uwo ushaka ko azakubera incuti nziza ubuziraherezo.Urushako ruhamye rugomba kuba rushingiye ku rukundo rurimo kwizerana, naho ibindi ni inyongera.
Ese incuti nziza iba imeze gute? Incuti nziza ni umuntu ugutega amatwi, akagusangiza ubuzima bwe, mugihe umukeneye ukamubona kandi mukishimira kubaka ubucuti igihe cyose mukiri bazima.
4. Kwiyigaho wowe ubwawe mugihe ugitegereje
Niba uri mugihe cyo gutegereza, ndagushishikariza kwiyigaho wowe ubwawe. Ni byiza kwiga ku mitekerereze yawe, icyizere n’inzozi zawe by’ahazaza, kwiga kumenya ibyiza n’ibibi byawe mu mibanire yawe n’uwo mukundana.
Kumenya byimazeyo uwo uri we bishobora kugufasha kumenya ifoto y’uwo uzaba uri we mugihe uzaba warabaye umugore cyangwa umugabo. Bishobora kandi kugufasha gukura byihuse mugihe utaratangira gukora nk’uwo wifuza kuba we.
5. Baho ubuzima bwuzuye
Urushako ntabwo ariyo ntangiriro y’ubuzima! Abantu b’ingaragu nabo babaho ubuzima bwuzuye ndetse bafite igihe nk’impano Imana yabahaye kugira ngo kibafashe kunezerwa no kugera ku ntego n’inzozi zabo.
Mu gitabo cy’Umubwiriza haranditse ngo wa musore we wishimire ubusore bwawe⦠Bishatse kuvuga ko umuntu adakwiye kwanga ikigero cy’ubusore ngo usange avuga ko azanezerwa ari uko yabaye umugore cyangwa umugabo, Reka da! Birakwiye ko ubaho ubuzima bwuzuye mugihe ugitegereje kwinjira mu rushako.
6. Fatira amasomo ku zindi nshako
Tangira gufatira amasomo ku bandi bantu uzi bashakanye kandi babanye neza. Wigane ubushishozi imbaraga babishyiramo, wige inkuru zanditswe ku bashakanye bakuzengurutse. Niba ababyeyi bawe bafite urushako rushimishije ushaka kwigana, bishyire mu bitekerezo byawe mu gihe utangiye gukundana n’uwo utegenya ko muzabana.
Niba ababyeyi bawe baragize intambara, reba abandi bashobora kukubera icyitegererezo cy’urushako wifuza kuzagira. Biragoye kubaka ikintu udafite igishushanyo mbonera ureberaho. Ukwiye gutegura, ukagira umusingi mwiza kugira ngo ubashe kubaka ubuzima buhamye.
7. Kubaho ubuzima bw’ingaragu
Imana yaremye igitsina (sex) kugirango kibe ikimenyetso cyo guhura k’umugabo n’umugore (Itangiriro 2:23-24). Twongera kandi kubibona mu Isezerano Rishya (1Abakorinto 7:2) ko imibonano mpuzabitsina igenewe abashakanye ni ukuvuga hagati y’umugabo n’umugore. Igitsina cyashyiriweho guhuriza hamwe abantu babiri (umugabo n’umugore).
Bibiliya itubwira yeruye ko yashyizeho igitsina nk’ikimenyetso cy’urukundo no kwiyemeza kubaho ubuzima bw’urushako. Nk’abakurikiye Kristo dukwiriye kwiyemeza gutegereza kugeza ku munsi mukuru wo gushaka. Tugomba kwizera Imana, tukamenya ko yaremye igitsina kugira ngo kizakoreshwe mugihe gikwiriye.
8. Guhitamo uwo muzabana witonze
Nta buryo buhari bwo kumenya buri cyose ku muntu uteganya ko muzabana mbere yo kurushinga. Inkuru y’uwo umuntu ariwe ni isomo rikomeza ubuzima bwanyu bwose. Bishatse kuvuga ko abantu bahura n’ibibazo bitandukanye batigeze gutekereza mbere. Aha ubuntu bw’Imana burahagije kubayizera.
Bivuze ko kugira igitekerezo cy’imiterere y’umuntu ushaka ko muzabana bishobora kugufasha kureka kurwazwa umutwe n’urugendo rurerure rw’ubuzima. Ni byiza kureba umuntu ubaho mu buzima bwo kwera imbuto z’umwuka mu miberho ye.
9. Iga kuyobora umutima n’intekerezo byawe
Mu muco habaho igitutu gikomeye ku buzima bw’urubyiruko ku bijyanye n’urukundo, imibonano mpuzabitsina n’ibindi nk’ibyo. Usanga rimwe na rimwe bigisha abantu kwigenga cyangwa kwisanzura muri byose ariko dukwiye gusaba Imana ikaduha ubushobozi bwo kuyobora imitima n’intekerezo zacu tuyobowe na Bibiliya.
Muri macye nk’abantu bakurikiye Yesu birakwiye kubanza kugira ubumenyi n’indangagaciro za gikristo mbere yo gufata icyemezo cyo kubaka urugo. Nitwubahiriza inama tumaze kubona, bizatuma tugira umuryango uzira amakimbirane kandi wubaha Imana.
Source: crosswalk.com
Source : https://agakiza.org/Ibintu-9-ukwiye-kwitaho-mbere-yo-kwinjira-mu-rushako.html
