Category: Uncategorized

Amakipe 3 akinamo abanyarwanda muri Tanzania yageze muri ½ cya Mapinduzi Cup, igikombe kirimo kubera muri Zanzibar.

Ayo makipe ni Simba SC ya Meddie Kagere, Yanga ya Haruna Niyonzima na Azam FC ya Niyonzima Ally.

Muri ½, Haruna Niyonzima wafashije ikipe ye kugera muri ½ banganya na Jamhuri SC 0-0 ariko bakaza gutsinda Namungo FC 1-0 uyu munsi irahura na Azam FC ya Niyonzima Ally yanganyije na Mlandege 1-1 ariko ku munsi w’ejo ikaba yaratsinze Malindi 1-0. Ni umukino uri bube saa 15 z’i Kigali.

Nyuma yo gutsinda Chipukizi 3-1 na Mtibwa Sugar 2-0, Simba SC ya Kagere uyu munsi saa 19:15′ z’i Kigali, muri ½ irahura na Namungo FC yatsinzwe na Yanga 1-0 ikaza gutsinda Jamhuri 2-0.

Meddie Kaere abajijwe niba atekereza ko ku mukino wa nyuma bashobora guhura na Yanga, mukeba wabo w’ibihe byose, yavuze ko ari ikipe nk’izindi atumva impamvu abantu baba bamubaza guhura na Yanga.

Ati'ikipe yose twahura icy’ingenzi ni ugutwara igikombe. Sinzi impamvu muduhatira Yanga, ikipe twahura yose ni ikipe iba yarakoze kugira ngo igere ku mukino wa nyuma, sinzi impamvu muvuga Yanga mutavuga andi makipe.'

Umukino wa nyuma uzaba tariki ya 13 Mutarama 2021. Igikombe cy’umwaka ushize gifitwe na Mtibwa Sugar yagitwaye itsinze Simba SC 1-0 ku mukino wa nyuma.

Haruna yafashije Yanga kugera muri 1/2

Ally Niyonzima arahura na Haruna muri 1/2

Kagere utarakinnye umukino wa Mtibwa Sugar yitezwe muri 1/2

Kubera ubuzima bwo gukora cyane, ndetse no guhirwa mu mupira w’amaguru, twavuga ko Ronaldo ubu ari mu myaka yo gushyiraho uduhigo dore ko kuri uyu mugoroba mu mukino wa shampiyona Juventus yatsinzemo ikipe ya Sassuolo ibitego 3-1, igitego Cristiano Ronaldo yatsinze cyatumye ashyiraho akandi gahigo k’umukinnyi wa mbere ku isi utsinze ibitego 15 cyangwa se akabirenza mu myaka 15 y’imikino.

Ibi byatangiye mu mwaka w’imikino 2006-2007 ubwo Ronaldo yakiniraga ikipe ya Manchester united akayitsindira ibitego 17 mu mikino 34 kuva ubwo ntaratsinda ibitego biri munsi ya 15.

Ronaldo ubwo urugendo rwe rw’imyaka 15 rwatangiraga agikina muri Manchester United

Umwaka mwiza Ronaldo yagize ni umwaka w’imikino 2014-15 ubwo yatsindaga ibitego 48 mu mikino 35 yashampiyona ya Espogne. Messi n’ubundi basanzwe bahanganye mu duhigo, aka gahigo yarakagerageje ariko akagozi gacika ku mwaka wa cumi na kabiri.

Akandi gahigo Ronaldo yashyizeho nyuma yo gutsinda igitego cya 3 ubwo Juventus yatsindaga Sassuolo ibitego 3-1,ni uko uyu rutahizamu yahise anganya ibitego n’umukinnyi wa mbere ku isi mu bafite ibitego byinshi kandi bizwi.

Cristiano Ronaldo ubu afite ibitego 759 mu ikipe y’igihugu ndetse no mu makipe yagiye anyuramo

Josef Bican ni we wari ufite agahigo k’ibitego byinshi ku isi, mu bakinnyi b’umupira w’amaguru, ibitego 759. Josef Bican ni umunya- Australia wakinnye hagatiya ya 1931 na 1955 atsinda ibitego 759. Ku mugoroba w’ejo, Cristiano Ronaldo bakaba bahise banganya agahigo.

Kuva Ronaldo yagera mu ikipe ya Juventus amaze kugaragaza uruhare rukomeye kuko bigaragarira ku mikino Juventus yakinnye uyu rutahizamu atarimo, ndetse n’iyo bakinnye ahari. Juventus ifite impuzandengo ya 72.4% y’intsinzi mu gihe Ronaldo yakinnye, bakanagira kandi 46.7% k’intsinzi mu gihe Ronaldo atakinnye. Ibi bivuze ko iyo Ronaldo ari mu kibuga Juventus iba ifite ibitego 2.1 ku mukino ariko yaba atarimo bikamanuka bikajya ku gitego kimwe n’ibice bitanu ku mukino.

Mu Ukwakira 2020 nibwo Akarere ka Musanze kagiranye ibiganiro n'abikorera bigira hamwe uko hanozwa isuku aho bakorera, maze bafata umwanzuro wo gusiga amarangi inzu zose z'ubucuruzi ari mu masantere atandukanye yo muri aka Karere.

Bidatinze aya mabwiriza yatangiye gushyirwa mu bikorwa, inzu ziri mu dusantere tw'ubucuruzi zitangira gusigwa amarangi y'ibara rimwe, igikorwa cyakozwe hagamijwe kunoza isuku, no kugaragaza umujyi wa Musanze neza nk'Akarere k'ubukerarugendo.

Bamwe mu bacuruzi bakorera ahasabwe gusiga aya marangi, baganiriye na IGIHE bavuga ko hari aho aya mabwiriza ababangamiye cyane, kuko basabwa gusiga irangi risa nyamara hari aho bigaragara ko amarangi atarandura, ndetse ngo bakanasabwa gusiba ibirango biba ku nkuta z'amazu bakoreramo, bigaragaza ubucuruzi bakoreramo, ibintu ngo babona ko byazabagabanyiriza ababagana.

Umwe mu babyeyi bakora umwuga w'ubudozi mu nzu iri mu isantere y'ahazwi nko ku Ngagi, yagize ati ” Nk' ubu aha ku rukuta aho nkorera hari hashushanyije ubwoko by'ibyo ndoda, ibitenge, amakanzu n'ibindi, bamaze gusiga irangi batubujije kongera kubishushanyaho, kandi ni ibyamamaza ibyo dukora. Ubu uwahanyura atinjiye ntiyamenya ikihakorerwa, ibintu bitugabanyiriza abakiliya.'

'Ubu uwo mutaziranye cyangwa ngo yinjiremo ntiyaguha akazi, usibye kubura uko tubigira tukubahiriza amategeko ariko bizaduhombya”

Undi nawe ufite inzu isanzwe ari depo y'ibinyobwa yavuze ko inzu yakoreragamo yari isize irangi ry'umuhondo n'ibirango by'iki kinyobwa, ariko aho amariye gusiga iri rangi ibi birango byose atemerewe kubisubizaho, agasaba ko bakwemererwa ibi birango bakabisubizaho kuko bibafasha kwamamaza ibyo bakora.

Ati ” Mbere aha hari hasize irangi ry'umuhondo, hariho ibirango bitandukanye bigaragaza ikinyobwa cya Skol kihacururizwa kuko ari kuri depo yayo, ariko urabona ko utamenya ikihakorerwa usibye kariya kapa k'amafuti gahari. Nta wanze isuku ariko bareke natwe dukomeze kwamamaza ibyo dukora, kuko umukobwa wabuze umuranga ahera iwabo, bitabaye ibyo abakiriya badushiraho”

Ikibazo nk'iki kandi cyagaragajwe n'abandi bacuruzi bakorera mu isantere ya Kimonyi mu Murenge wa Kimonyi, nabo bavuga ko batanze impinduka zo kunoza isuku, ariko bifuza ko byakorwa mu buryo butababangamira cyangwa ngo bitume batakaza abakiriya babo.

Umuyobozi w'urugaga rw'abikorera mu Karere ka Musanze Turatsinze Straton yavuze ko gusiga irangi ry'ibara rimwe atari itegeko, ahubwo icyo bareba ari isuku. Yavuze ko ibyo gusaba abacuruzi gusiba ibirango byamamaza ibyo bakora atari abizi ariko agiye kubikurikirana.

Yagize ati ” Kuvuga ko amabwiriza asaba abacuruzi gusiga ubwoko bw'irangi ry'ibara rimwe ntabwo aribyo, icyo tureba ni uko irisizwe ku nzu ritanduye, gusa icyo kuba babasaba gusiba ibirango byamamaza ibyo bakorera muri ayo mazu, ntabwo twari tubizi tugiye kubikurikirana, ariko turimo gutekereza uko nabyo byazajya bisora kuko byamamaza, tukabikora nk'uko i Kigali bikorwa”

Umuyobozi w'Akarere ka Musanze, Nuwumuremyi Jeannine yabwiye IGIHE ko icyo bakora nk'Akarere ari ukugenzura niba isuku yubahirizwa, ariko bigashyirwa mu bikorwa n'abikorera.

Yagize ati “Icyo tureba ni uko amabwiriza y'isuku yubahirizwa, kandi ntabwo ireba abacuruzi gusa, ireba umuturage wese aho ari hose mu rugo, ku mubiri n'ahandi hose. Ikindi gusiga irangi n'ibara bashaka byavuye mu bushake bw'abikorera tunabashimira ko babikoze neza, ariko ahakiri ibibazo tugiye kubigenzura bigororwe cyane ko gucuruza ari ukwamamaza, tugiye kubikurikirana nabyo bikemuke”

Biteganyijwe ko ibikorwa byo gusiga amarangi ku nzu z'ubucuruzi ari mu mujyi wa Musanze no mu nkengero zawo, bizakorwa mu masantere 25, bikazarangirana n'uku kwezi kwa Mutarama 2021, ahasigaye bikagenda bikorwa buhoro buhoro mu rwego rwo kurwanya umwanda ukunze kuvugwa muri aka Karere.

Abacuruzi bavuga ko babangamiwe no kuba batemerewe gushushanya ibyo bakora ku nzu zabo

Gusiga amarangi asa biri muri gahunda yo guca umwanda mu mujyi wa Musanze ukunze gukorerwamo ubukerarugendo