Category: Uncategorized

Ibi byuma bije byiyongera ku bindi u Rwanda rwari rusanzwe rukoresha mu kubika neza inkingo ngo zitangirika, gusa byo bikagira umwihariko w'uko bishobora kuzikonjesha ku kigero cya dogere -40 na -86.

Kuba u Rwanda ruguze ibi byuma ni indi ntambwe itewe mu kubaka ubushobozi bwo gukomeza guhangana na Covid-19 cyane ko ubushakashatsi bwagiye bugaragaza ko inkingo za Covid-19 zimaze kuboneka zizasaba kuzibika ahantu hakonje cyane.

Uretse ibi byuma biri i Masoro mu Mujyi wa Kigali, u Rwanda rufite n'ibindi bikoresho bishobora kuzifashishwa mu kugeza hirya no hino mu gihugu inkingo zitandukanye za Covid-19 kandi zidataye ikigero cy'ubukonje zigomba kubikwamo.

Kubona ibi byuma bikonjesha ni kimwe mu bikomeye biri mu myiteguro yo kwakira inkingo kuri ubu igeze kuri 95%.

U Rwanda rwamaze gutanga ubusabe bwarwo bw'inkingo za COVID-19, byitezwe ko muri Werurwe 2021 zizaba zabonetse.

Uretse kuba ibi byuma bizakoreshwa mu kubika inkingo za COVID-19 bizanakoreshwa no mu kubika izindi 12 zisanzwe zihari zirimo izihabwa abana ndetse n'abantu bakuru.

U Rwanda rwakwakira inkingo zose za Covid-19

Hari hashize iminsi hari impungenge z'uko u Rwanda rushobora kuzitirwa n'ubushobozi buke mu bijyanye no kubika inkingo bigatuma hari zimwe rutabasha kwakira kandi wenda arizo zaba zoroshye kuzibona.

Ibi byaterwaga n'uko nk'inkingo enye ziri mu cyiciro cya nyuma cy'igerageza, zose zifite amabwiriza yihariye ajyanye n'uburyo zibikwamo n'uko zitwarwamo. Urukingo rwa AstraZeneca rwakozwe na Kaminuza ya Oxyford mu Bwongereza, ni rwo rwonyine rwagaragaraga nk'urushobora korohera u Rwanda kuko rutagoranye mu buryo rubikwamwo.

Mu kiganiro Umuvugizi wa Minisiteri y'Ubuzima, Julien Mahoro Niyingabira, yagiranye na IGIHE yavuze ko nyuma yo kubona ibi byuma bikonjesha u Rwanda rufite ubushobozi bwo kwakira urukingo rwose rwaboneka.

Yagize ati 'Bivuze ko u Rwanda rushobora kwakira urukingo urwo ari rwo rwose kuko biriya byuma bikonjesha bifite ubushobozi bwo kubika inkingo za Pfizer kuko arizo zisaba kuzibika ahantu hakonje kuri dogere 70 munsi ya zeru, izindi nkingo yaba Moderna na AstraZeneca zo dusanganywe ubushobozi bwo kuzibika, ubu urukingo rwose rwaza mu Rwanda twabasha kurubika no ku rutanga neza.'

Ibi byuma u Rwanda rwaguze bifite ubushobozi bwo kubika dose ibihumbi 300.

Mu Ukuboza 2020 Minisitiri w'Ubuzima yabwiye IGIHE ko hari icyizere cy'uko u Rwanda ruzabona urukingo rwa Covid-19 mu mezi ya mbere ya 2020.

Ibi abishingira ku kuba u Rwanda rwarubahirije itariki ya 07 Ukuboza 2020 yari yatanzwe nk'igihe ntarengwa ibihugu byose bigomba kuba byatanze ubusabe bw'inkingo za COVID-19, aho ari kimwe mu byemerewe kuzahabwa inkingo 20% by'abaturage bose b'igihugu mu cyiciro cya mbere.

Izi nkingo zizatangwa n'ihuririo rigamije kwihutisha kugeza urukingo rwa Covid-19 ku bihugu, Covax, ari naryo rizazigura ku ikubitiro rikazisaranganya hirya no hino ku bihugu.

Mu bazahabwa urukingo mu cyiciro cya mbere harimo abakozi bo kwa muganga, abafite indwara zitadakira nk'umuvuduko w'amaraso, diabète, asthma n'izindi zo mu buhumekero, abakuze bafite hejuru y'imyaka 65, abakora mu nzego zituma bashobora kugira ibyago byo kwandura nko kuri gasutamo n'abandi bahura n'abantu benshi.

Ubu mu Rwanda umubare w'abamaze kwandura Covid-19 n'abo ihitana ukomeje kwiyongera, kuri ubu abayanduye barenga ibihumbi 10 mu gihe abo yahitanye ari 128.

---

Ahagana saa yine n'igice z'amanywa kuri uyu wa Kane tariki ya 14 Mutarama 2021, nibwo aba baturage barwanye n'ubuyobozi n'abanyerondo ndetse banabatera amabuye mu rwego rwo kwanga ko babasenyera inzu.

Abaturage babwiye IGIHE ko batiyumvisha impamvu ubuyobozi buza kubasenyera inzu mu gihe baba barazubatse bareba.

Imiryango ine yasenyewe inzu ivuga ko zasenywe kuko yanze gutanga ruswa cyane ko hari n'izindi zubatswe zitasenywe kandi nazo ziri ahitwa ko ari mu manegeka.

Umwe yagize ati 'Kuki baza kudusenyera ubu kandi twarubatse bareba, ubu koko wakubaka inzu igahagarara nta muyobozi n'umwe ubizi ?'

Dusengimana Obed yavuze ko yarwanye n'abayobozi kuko bashakaga gusenya inzu mu gihe hari hakirimo umwana muto wari uryamye.

Ati ' Kugira ngo turwane n'uko abaje gusenya bohereje umunyerondo umwe noneho ageze aha aravuga ngo abari mu nzu nimusohoke kandi umwana yari aryamye, noneho ndi kubimusobanurira ahita ankubita anjugunya hirya iriya.'

Umunyamabanga Nshingwabikorwa w'Umurenge wa Gatenga, Mugisha Emmanuel, yavuze ko ubwo bari bamaze kubona abaturage basagariye abaje gusenya aribwo hitabajwe Polisi.

Ati 'Twari tuje kureba abaturage bubatse mu kajagari kugira ngo tubashakire ahandi heza hatari mu manegeka bajya gutura. Hari harimo umukecuru ufite abana bakuru nibwo batangiye gutera amabuye twitabaza polisi.'

Yongeyeho ko inzu abaturage basenyewe nibigaragara ko nta bushobozi bafite bazashakirwa ahandi ndetse banabaremere mu rwego rwo kubafasha.

Amakuru IGIHE yamenye ni uko abo baturage batafunzwe kuko ubwo Polisi yahageraga batongeye gutera amahane.

---

Mu minsi ishize nibwo RAB yatangaje ko hari icyorezo cyagaragaye mu ngurube zo mu turere twa Nyagatare, Kirehe, Kicukiro, Gasabo na Rwamagana. Yasabye abo borozi kuba bitonze ingurube zirwaye zikavurwa, izitarwaye zikabanza gutegereza kugeza icyorezo kirangiye.

Icyakora, iki kigo cyatangarije Rwanda Today ko hari aborozi bari kugica mu rihumye bakagurisha ingurube zabo birinda ibihombo, ibintu bishobora gushyira ubuzima bw'izindi ngurube mu kaga ndetse n'ubuzima bw'abantu barya inyama zazo.

Umuyobozi Mukuru w'Ishami ry'Ubushakashatsi mu bworozi no gusakaza ikoranabuhanga muri RAB, Dr Fabrice Ndayisenga, yavuze ko aborozi bakomeje iyo myitwarire, amatungo yabo ashobora gushyirwa mu kato.

Ati 'Nibyo hari indwara ya rouget y'ingurube iri gukwirakwira mu bice bitandukanye by'igihugu. Ntabwo byari byagera mu cyiciro cya mbere ku buryo hashyirwaho akato ariko dukurikije uko tureba ibintu niho bigana kuko aborozi bamwe bari kubirengaho bakagurisha ingurube zanduye.'

Yavuze ko nubwo iyo ndwara ivurwa igakira, hari aborozi batabikora ndetse n'ababikoze ntibubahirize inama zatanzwe n'abaganga b'amatungo.

Ndayisenga yavuze ko imiti ivura iyo ndwara iboneka mu turere twose kandi Guverinoma yatangije uburyo bwo gusuzuma no gukingira ingurube.

Yagize ati 'Kugurisha no kurya izi nyama ni ibintu bibi cyane, byagira ingaruka ku buzima bw'abantu. Inyama zose zivuye ku nyamaswa zirwaye ziba zifite ikibazo.'

Yavuze ko hari umugore bari gukurikirana wagurishije ingurube ze mu karere ka Rubavu kandi zaranduye nyuma y'uko imwe mu zo yari atunze ipfuye.

Indwara ya Rouget y'ingurube izwi nka Swine Erysipelas cyangwa Rouget du Porc iterwa n'agakoko kitwa Erysipelothrix Rhusiopathiae.

Ingurube yafashwe igira umuriro mwinshi, igacika intege, ikagira ibibara bitukura ku ruhu, igahumeka nabi, amatwi akirabura, ikanga kurya no kunywa amazi, ikabyimba mu ngingo, ikananirwa no kugenda. Ibi akenshi bikurikirwa n'urupfu. Ingurube ipfuye ntiribwa iratabwa.

---

Ikigega Mpuzamahanga cy'Ubukungu, IMF, mu mwaka ushize, na cyo cyari cyavuze ko ubukungu bw'u Rwanda buzazamuka ku kigero cya 5,7%, buvuye kuri 0,2% bwari bwagabanutseho umwaka ushize.

IMF yavuze ingamba zashyizweho na Leta y'u Rwanda, zirimo gufasha ibigo by'imari gukomeza kubona amafaranga, korohereza abafite imyenda, gukomeza ibikorwa by'ubwubatsi byatanze imirimo myinshi n'izindi ngamba zitandukanye, byagize uruhare mu gutuma ubukungu bw'u Rwanda budahungabana cyane.

Ku rundi ruhande, kuba igihugu gikomeza gutsinda urugamba rwa Coronavirus, bituma ubuzima muri rusange bukomeza bityo n'ubucuruzi bugakorwa, mu gihe abantu batangira kongera gutinyuka kujya ku masoko guhaha ndetse no gusubukura imirimo yabo.

Impunguke mu bukungu zivuga ko muri rusange, ubukungu bw'u Rwanda uyu mwaka buzubakira ku nzego zirimo ubuhinzi n'ubucukuzi bw'amabuye y'agaciro zakomeje imirimo yazo kandi zigatanga umusaruro ushimishije, na cyane ko izo nzego zombi ari zo zigize igice kinini cy'ibyo u Rwanda rwohereza mu mahanga.

IMF ivuga mu mwaka utaha, ubukungu bw'igihugu n'ubundi bwitezweho kuzazamuka ku kigero cya 6,7%, ahanini bitewe n'uko ibikorwa birimo ubukerarugendo bizakomeza gutanga umusaruro byari bisanzwe bitanga mbere ya Coronavirus, ndetse n'imikorere y'ubukungu bw'Isi ikazaba ijya kumera nk'uko yahoze mbere y'ibihe bya Coronavirus.

Impuguke mu by'ubukungu, Ted Kaberuka, yabwiye CNBC Africa ko inzego z'ubukungu zirimo ubwubatsi n'inganda zizagira uruhare rufatika mu kuzamura umusaruro w'ubukungu muri rusange, zikiyongera ku zindi nk'ubuhinzi n'ubucukuzi bw'amabuye y'agaciro ziri gutanga umusaruro mwiza muri iyi minsi.

---

Yabivugiye mu mashusho y'indirimbo ye ya mbere yise 'Fight Corona' igamije gukangurira buri wese kugira uruhare mu guhangana no kurwanya ikwirakwira ry'icyorezo cya Covid-19 kimaze kwambura ubuzima umubare munini w'abatuye Isi.

Mu masengonda ya mbere y'iyi ndirimbo, Umwiza Phiona atangaza ko ari we watworanyijwe kuzaserukira u Rwanda muri iri rushanwa. Ati 'Ndabasuhuje b'Abanyafurika. Ni Phiona Miss University Africa Rwanda.'

Indirimbo ye yise 'Fight Corona' yashyizwe kuri konti ya Instagram y'iri rushanwa ikurikirwa n'abantu barenga ibihumbi 28. Mu magambo bashyizeho bavuze ko ari indirimbo yakozwe na Umwiza Phiona Miss University Africa Rwanda igamije kurwanya Covid-19.

Umwiza Phiona wanagaragaje impano ye yo kuririmba ubwo yari muri Miss Rwanda 2020, aririmba asaba buri wese kugira uruhare mu guhanga n'ubwandu bushya bwa Covid-19. Akavuga ko buri muntu akwiye kubahiriza ingamba zo kwirinda iki cyorezo.

Uyu mukobwa asaba abantu kwambara agapfukamunwa, guhana intera igihe umuntu agiye ahantu hateraniye abantu benshi, gukaraba intoki neza kandi kenshi, gukoresha umuti wa 'Hand Sanitizer' n'ibindi.

Umwiza agaragaza amashusho atandukanye y'abantu bari mu Mujyi wa Kigali binjira mu nyubako zitandukanye babanje gukaraba intoki, abahana intera n'ibindi byinshi bigaragaza gushyira mu ngiro amabwiriza yo kwirinda iki cyorezi kibasiye Isi muri iki gihe.

Amashusho y'iyi ndirimbo, uyu mukobwa yayafatiye muri Scheba Hotel iherereye mu Kiyovu. Ijwi rye ryumvikanisha ko yavamo umuhanzi mwiza abikomeje.

Aherutse kubwira INYARWANDA ko yatekereje gukora iyi ndirimbo kugira ngo atange umusanzu we mu gufasha Leta gukomeza gukangurira abaturarwanda guhashya iki cyorezo bubahiriza amabwiriza yatanzwe n'inzego z'ubutima.

Uyu mukobwa avuga ko yari amaze igihe kinini afite igitekerezo cyo gukora indirimbo nk’iyi, aza kugishyira mu ngiro nyuma y'uko abonye n'abandi bakobwa bafite amakamba bo mu bihugu bitandukanye byo ku mugabane wa Afurika bari gusohora indirimbo zikangurira abantu gukomeza kwirinda Covid-19.

Irushanwa rya Miss Univeristy Africa rizabera muri Nigeria muri Gashyantare 2020 n'ubwo hari amakuru avuga ko rizigizwa imbere bitewe n'uko Covid-19 yakajije umurego muri iki gihugu.

Imibare ya Minisiteri y'Ubuzima muri Nigeria yo mu ijoro ry'uyu wa Gatatu tariki 13 Mutarama 2021, igaragaza ko abantu barenga ibihumbi 104 (+1,398) bamaze kwandura Covid-19, ibihumbi 82 (981) bamaze kuyikira n'aho 1,382 (+9) bitabye Imana.

Umwiza Phiona azahatana n'abakobwa bo mu bihugu bitandukanye byo muri Afurika bari hagati y'imyaka 18 na 26 y'amavuko barimo Uganda, Ethiopia, Burkina Faso, Uganda n'abandi.

Umwiza agiye guserukira u Rwanda abisikana na Umutoni Linda wahagarariye u Rwanda mu 2017, Umunyana Shanitah mu 2018 wegukanye ibihembo bitatu. Mu 2019, u Rwanda rwari guserukira na Uwase Sangwa Odille wabaye igisonga cya kabiri cya Miss Rwanda 2019, ntibyakunda kuko irushanwa ryasubitswe.

Umukobwa wegukanye ikamba rya Miss University Africa ahembwa amadorali 50,000 n'imodoka nshya. Agirwa kandi Ambasaderi b'Abanyeshuri b'Umuryango w'Abibumbye.

Umwiza Phiona wabaye igisonga cya mbere cya Miss Rwanda 2020, yasohoye indirimbo ikangurira abantu kurwanya Covid-19

Umwiza yemeje ko azitabira irushanwa rya Miss University Africa rizabera muri Nigeria muri uyu mwakaUyu mukobwa uherutse kwizihiza isabukuru y'amavuko, yujuje impapuro zitandukanye zimwerera kwitabira iri rushanwa rizaba Covid-19 nicogora

Umwiza Phiona aherutse kubwira INYARWANDA, ko atiteguye gukora umuziki mu buryo buhoraho