Category: Uncategorized

Nyuma y’uko ihagaritse amasezerano y’abakozi, ikipe ya Kiyovu Sports iherutse gutanga ubufasha ku bakinnyi aho bagenewe ibihumbi 30, ibintu bitabashimishije na gato.

Tariki ya 11 Ukuboza 2020, Minisiteri ya Siporo yasohoye itangazo rihagarika shampiyona umwaka w’imikino wa 2020-2021 bitewe n’uko amwe mu makipe yari yarenze ku mabwiriza yo kwirinda icyorezo cya Corobavirus.

Tariki ya 15 Mutarama 2021, Kiyovu Sports yahise ihagarika amasezerano y’abakinnyi aho babwiwe ko bazagaruka mu kazi shampiyona itangiye, ariko bizeje abakinnyi ko bazagumya kubafasha.

Mu ntangiriro z’uku kwezi kwa Gashyantare, Kiyovu Sports yahaye abakinnyi bayo icyiciro cya mbere cy’ubufasha, bakaba baragenewe amafaranga angana n’ibihumbi 30 by’amafaranga y’u Rwanda.

Bamwe mu bakinnyi bakaba batarashimishijwe n’aya mafaranga bahawe kuko nta kintu yabafasha dore atanakwishyura inzu babamo byibuze n’ukwezi.

Umwe yabwiye ISIMBI ati“ngo baradufashije? Ibihumbi 30 se wowe yakumarira iki? Hari uba mu nzu yayo mafaranga byibuze se ngo tuvuge ko ari yo bishyuye? Hari abafite imiryango icyo nacyo bakwiye kukimenya.”

Undi mu baganiriye na ISIMBI yavuze ko yanze ko byafatwa nk’agasuzuguro n’aho ntayo yari kwemera.

Kugeza ubu ntabwo bizwi igihe shampiyona izagarukira, ku munsi w’ejo Minisiteri ya Siporo yagiranye inama n’amafederasiyo arimo na FERWAFA baganira ku buryo ibikorwa by’imikino byakongera gusubukurwa.

Sinjye wavuze ko umufana ari umukinnyi wa 12! Niko twakuze tubisanga ariko iyo urebye usanga ari byo, ahanini biterwa n’umurindi wabo muri Stade bashyigikiye ikipe bihebeye, bigashyira igitutu n’igihunga ku wo bahanganye, ese bafite uburenganzira bwo kwirukana umutoza? Ese hari aho ubundi byabaye? None se ubundi ubushobozi bwabo ku ikipe buhera he bukagarukira he?'

Iyo ikipe idatsinda byose abafana bazabiryoza umutoza kabone n’iyo haba hari ibitagenda neza bimubangamira mu kazi ke, kimwe n’uko mu gihe itsinda asingizwa.

Ni kenshi abafana iyo ikipe yabo idatsinda batangiza ubukurangamba bwo kwirukana umutoza bavuga ko adashoboye rimwe na rimwe bigashyira igitutu ku buyobozi bukamusezerera bashingiye ku byifuzo by’abafana kandi nyamara bo bari bakinamufitiye icyizere, hari n’igihe yisezerera kubera abafana, icyo gihe nibo baba bamwirukanye.

Muri iyi nkuru ISIMBI iragaruka ku bushobozi abafana bafite mu makipe bihebeye, aho turi bwiyambaze bamwe mu nararibonye muri ruhago mu Rwanda bakadufasha kumva akamaro nyako k’umufana mu ikipe, turifashisha kandi ingero zimwe na zimwe zo mu Rwanda no hanze yarwo.

Si amakipe yose ajyaho igitutu cy’abafana, biterwa n’ikipe iyo ari yo n’abafana ifite uko bangana, dufashe urugero mu Rwanda, ikipe nka Police FC cyangwa AS Kigali biragoye kuvuga ko umutoza yirukanwe kubera abafana, ahubwo usanga ubuyobozi ari bwo bufata umwanzuro bitewe n’umusaruro we yatanze bukaba bwamusezerera, aha bitandukanye nko ku ikipe nka Rayon Sports.

Ese hari aho umutoza yirukanywe n’abafana?

Ntabwo umufana azasinya ku rwandiko rwirukana umutoza, ariko ubukangurambaga bakora bagaragaza ko badakeneye umutoza akenshi bishyira igitutu kuri we no ku buyobozi bukaba bwamusezerera n’iyo bwo bukimufitiye icyizere.

Dufashe urugero nko kuri campaign[ubukangurambaga] bwiswe 'WENGER OUT’ kwanga kugura amatike y’umwaka(seasonal ticket) muri Arsenal, iki ni kimwe mu byatumye uyu mutoza atandukana n’iyi kipe kandi ubuyobozi bwa Arsenal bwo bwari bukimufitiye icyizere.

Arsene Wenger yagizwe umutoza wa Arsenal kuva mu 1996 asezera muri 2018 ahanini byatewe n’igitutu cy’abafana batabonaga ibikombe, ni nyuma y’ibikombe 3 bya Premier League na 7 bya FA Cup yabahesheje hagati ya 1998 na 2017.

Ubukangurambaga bwo bwa #WENGEROUT ni kimwe mu byatumye ava muri Arsenal

Byageze aho abafana batangiza ubukangurambaga 'WENGER OUT’, bwakwirakwiye ahantu hose, bakinjira muri Stade bafite ibyapa, ku mbuga nkoranyambaga hari Hash Tag ya #wengerout, byavuye mu Bwongereza bikwirakwira Isi yose ibi byashyize igitutu kuri uyu mutoza wari umaze imyaka 22 atoza Arsenal ndetse agifitiwe icyizere n’ubuyobozi, yahise afata umwnazuro wo gutangaza ko nyuma y’umwaka w’imikino 2017-2018(yarimo atoza) ko azahita atandukana na Arsenal, icyemezo cyishimiwe n’abakunzi ba Arsenal.

Tugarutse mu Rwanda muri 2010 abafana ba Rayon Sports biyirukaniye umutoza Kayiranga Jean Baptiste ubwo bamuteraga inkari kubera kubura umusaruro, uyu mutoza akaba yarahise asezera akazi nyuma yo kunanirwa kwihanganira ibyo yakorewe n’abafana.

Muri 2019, APR FC yatandukanye n’umutoza Zlatko Krmpotic wari wasinye umwaka ariko akahamara amezi 6 gusa, ni nyuma yo kutitwara neza abafana bagatangira gusaba ko yirukanwa, na we yaje kumvikana mu itangazamakuru avuga ko na we adakunda abafana b’iyii kipe we icyo areba ari akazi ke. Nyuma ubuyobozi bwa APR FC bwaje kumwirukana.

Kayiranga Jean Baptiste yigeze gusezera muri Rayon Sports kubera abafana

Paul Muvunyi wabaye perezida wa Rayon Sports ahamya ko ibibazo nk’ibyo bagiye bahura nabyo ariko abona bidakwiye ko umufana yivanga mu mikorere y’ikipe cyangwa yirukana umutoza kuko burya n’abafana bagira aho baba bagomba kugarukira.

Yagize ati'komite igira ibyo isabwa n’abafana bakagira ibyo basabwa, niyo mpamvu umutoza abazwa komite, niyo yicara ikareba uwukenewe, no kugenda rero hari abagenda kuko badashoboye, hari abagenda kubera kudahembwa, hari abagenda kubera ko abo bafana babatesheje umutwe.'

Akomeza avuga ko aho uburenganzira bwabo bugarukira ari ukuba bativanga mu mikorere ya komite n’ubuzima bwa buri munsi bw’ikipe.

'Ni nabyo twakoze, abantu barakubwiraga ngo dufite abafana benshi mu gihugu, ese benshi bangahe, turavuga ngo bajye mu matsinda(Fan Clubs), intego yazo kwari ukugira ngo agenzurwe yaba mu gutanga umusanzu, mu kuganira ku bibazo by’ikipe(…) zarakoze ariko mu gukora kwazo ntaho zivanga mu mibereho y’ikipe umunsi ku munsi yaba mu bakinnyi no mu batoza, ku buryo hagize n’ukosa umuntu amenya aho amubariza.' Paul Muvunyi

Yakomeje avuga ko bibaho ariko na none ko bitagakwiye ko umutoza yirukanwa n’abafana kuko hari igihe hangirika byinshi.

Ati'bibaho rwose ko umutoza na komite iba ikimufitiye icyizere ariko akirukanwa n’abafana, ariko ntabwo byagakwiye ko abafana bamwirukana, kuko rimwe na rimwe bigora ubuyobozi bitewe n’amasezerano ye kuko hari ibyo baba bamugomba.Ni nayo mpamvu polisi iza ku kibuga, ibintu birimo amarangamutima hari igihe hangirika byinshi.'

Umutoza akaba n’umusesenguzi wa B&B FM, Muhire Hassan avuga ko kuba umufana yagira uruhare mu kwirukana umutoza ahanini bishingira ku musaruro we kandi abantu bakwiye kumenya ko umufana ari umuntu ukomeye mu ikipe ari nayo mpamvu ibyifuzo bye bihabwa agaciro harimo no kuba bakwirukana umutoza mu gihe ikipe ititwara neza.

Ati'Ibyo wakora mu buryo bumwe cyangwa ubundi, imbaraga z’abafana ni ikintu gikomeye, akenshi ibyo ikipe ikora ibikorera abafana. Niba abafana bavuze ngo ntabwo umutoza tumushaka ntabwo tumushaka, bashobora gukomeza guhuma amaso abafana ariko iyo bikomeje kuba bibi birangira umutoza batandukanye, icyo mugomba kumenya abafana ntabwo bazirikana niyo waba warakoze byiza bingana gute, baba bakeneye ibyishimo byako kanya.'

'Ikipe ishobora gukora kugira ngo idatakaza ubucuruzi bwayo. Nka Wenger kugira ngo agende byatewe n’abantu bagera kuri 30% banze kugura amatike biriya byapa byo nta gihe batabimanitse. Babonye harimo igihombo baramurekura, izo rero ni za mbaraga za wa mufana.'

Muhire Hassan kandi ahamya ko igihe cyose umutoza yahawe ibikenewe ariko ntiyitware neza, iyo abafana batangiye gusaba ngo yirukanwe ubuyobozi budatekereza kabiri, ni mu gihe iyo ubuyobozi buzi ko hari icyo butamuhaye ari bwo bugumya kumuryamaho birengagije ubusabe bw’abafana, ariko nabwo hari igihe kigera bakarushwa imbaraga.

Yasobanuye kandi ko hari n’igihe umutoza atandukana n’ikipe kubera ibihe abantu bagakeka ko ari abafana kandi bitandukanye, nk’aho yatanze urugero kuri Klopp ajya kuva muri Dortmund byatewe n’uko hafi y’abakinnyi 11 babanzaga mu kibuga yari afite batandukanye n’ikipe, bataniye undi mushinga bazana abandi bashya, aragerageza biranga ari nabwo yasabye gutandukana na Dortmund.

Paul Muvunyi avuga ko hari imirongo abafana baba batagomba kurenga

Yemeza ko ibyo ikipe ikora byose iba ibikorera abafana ari nayo mpamvu bagomba kugira ijambo rikomeye

'Igabanwa ry'ihumanwa ry'ikirere nirigerwaho ni cyo gikorwa gihambaye ikiremwamuntu kizaba gikoze gihambaye mu mateka y'Isi'. Ibi ni ibyatangajwe na Bill Gates. Uyu munshoramali avuga ko ikibazo cya Covid-19 cyoroshye cyane ugeranije n'ihumana ry'ikirere.

Uyu mugabo yatangaje imibare igera kuri 2 aho avuga ko buri wese utuye ku Isi agomba kuba ayizi, iyo mibare ni Miliyari 51 na o. Uyu mushoramali avuga ko iyi mibare isobanuye ko nibura ibicupa bya Gaze bigera kuri miliyari 51 byoherezwa mu kirere bigomba kugabanuka bikagera kuri 0.

Bwana Bill Gates avuga ko nta bundi buryo bwo kugabanya iyi myuka ihumanya ikirere uretse gutera ibiti byinshi bikajya bisohora imyuka mizima noneho bigakoresha iyi mibi (Carbon dioxide).

Bwana Gates ahamya ko ibi bijyanye no gutera ibiti bizakora ku kigero cya 70% naho 30%  ikazakurwaho no kwimakaza gukoresha ibicanwa bishingiye ku mashanyaraza abyarwa n'izuba ndetse n'abyarwa n'amazi.

Bill Gates avuga ko uyu mushinga wo gushaka ubusugire bw'ikirere ugoranye kuwukora mu gihe za Leta z'ibihugu zitabigiramo uruhari ndetse inzira imwe yo kubikora ni ukongera ibiciro ku bicanwa bitumura imyotsi mu kirere cyane cyane iby'imodoka. Ati 'Ntabwo ubu uri kubona uburibwe uri guteza mu gihe uri kohereza ibyuka bihumanya mu kirere”.

Uyu mushoramali akaba na nyiri Microsoft, magingo aya arabarirwa umutungo ufite agaciro ka Miliyari $124. Ku bwe avuga ko ababajwe n'ahantu habi ikiremwamuntu kiri kwerekeza akanavuga ko ari bimwe mu bimuraje ishinga kugira icyo yakora binyuze mu kigo cy'ubugiraneza cye yashinze.

Iyo havuzwe icyorezo cya Covid-19 hari benshi bahita bagendera ku bihuha bakavuga ko ariwe nyirabayazana ndetse ko afite n'inyungu zibyihishe inyuma harimo no gukoresha inkingo z'iki cyorezo mu gukwirakwiza utwuma nkurura makuru tuzaterwa mu bantu akabona uko azajya abagenga.

Gusa ibi byose ababivuga ni abakwiza ibihuha nta gihamya n'imwe baba bafite kuko inzego zibishinzwe harimo n'Ishami ry'Umuryango w’Abibumbye rishinzwe ubuzima ntacyo zivuga kuri iyi ngingo, gusa risaba abatuye Isi kwirinda icyorezo hagendewe ku mabwiriza atangwa kuko benshi mw'iyi minsi bari kukitwaza bakabeshya. 

Icyakora mbere y’uko Covid-19 yaduka, Bill Gates yakunze kugira inama abatuye isi y’uko hagiye kuza icyorezo kizahangayikisha Isi, ndetse n’umugore we aherutse gutangaza ko iki cyorezo kitaraza babashije kwibikira ibiryo bihagije.

Iyo Bill Gates abajijwe ibijyanye no kuba icyorezo cya covid-19 waba ari umushinga we ndetse agamijwe kugenga abatuye Isi, asubiza agira ati 'Kubera iki nashaka kugenga abatuye Isi? Urazi ntabwo ndajwe ishinga no kumenya amakuru y’ahazaza ha muntu'. Ibi yabitangarije ikinyamakuru cya BBC dukesha iyi nkuru. 

Binyuze kuri shene ya Youtube ya Rayon Sports, Umuyobozi w'Umuryango Rayon Sports, Uwayezu Jean Fidèle, yavuze ko umukunzi nyawe wa Rayon Sports atari uyikunda yatsinze kuko no gutsindwa bibaho, ahubwo ari ubana nayo mu byiza no mu bibi.

Uyu muyobozi yatangaje ibi mu gihe ikipe ifite ibibazo by’amikoro, haba mu guhemba abakozi bayo ndetse no kugwatura imodoka yayo yaheze mu Kagera Ltd.

Yagize ati”Umukunzi atandukanye n’umufana. Umuntu afana ikipe kubera yamushimishije ariko itamushimishije ntayifana. Umukunzi abana nayo ibihe byose, haba mu ntsinzi ndetse akanamenya ko gutsindwa bibaho. Ndasaba abakunzi ba Rayon Sports yaba abari mu Rwanda ndetse no hanze yarwo, niba koko muyikunda, nimuyishyigikire mu byiza ndetse no mu bibi”.

Iyi kipe kandi muri gahunda yo gushyira mu bikorwa intego z’icyerekezo 2030 ifite zikubiyemo kubaka Stade yayo bwite ndetse no kugira aho ikorera idakodesha, ikeneye ko buri mukunzi wayo agira umusanzu atanga kugira ngo bigerweho.

Rayon Sports yakunze kurangwa n’ibibazo bitandukanye birimo iby’imiyoborere ndetse n’iby’ubukungu, aho byagiye biyikoma mu nkokora kenshi ndetse bikanagira uruhare rukomeye mu musaruro wayo.

Komite nshya ya Rayon Sports iherutse gutorwa ifite akazi gakomeye ko guhangana n’ingaruka za COVID-19, cyane cyane ko aho iyi kipe yakuraga ubushobozi hamaze igihe hatayigaburira, Nko ku masitade ndetse no mu baterankunga batandukanye.

Perezida wa Rayon Sports yasabye abakunzi bayo kuyigoboka, haba mu byiza no mu bibi

Shampiyona yasubitswe Rayon Sports imaze gukina umukino umwe gusa yanganyije na Rutsiro FC

Umugabo witwa Mr Zhang, ukora akazi k’ubushoferi mu gace ka Yunnan mu Bushinwa, yerekanye ubuhanga budasanzwe bwo gutwara imodoka kuko yashoboye kwambutsa igishanga imodoka neza ayinyujije ku biti bibiri bahatambitse. Ibi biti ntabwo byari bifite umubyimba minini ndetse iyo ipine iza gutirimuka gato umushoferi yari guhita ahasiga ubuzima bwe.

Ni amashusho y’iminota ibiri yafatiwe ahitwa Kunming mu Majyepfo y’Intara ya Yunnan mu Bushinwa ashyirwa hanze na Lao Kun wayanyujije ku rubuga runyuzwaho amashusho menshi yo mu Bushinwa nk’uko bitangazwa na Daily Mail dukesha iyi nkuru.

Nk’uko bigaragara muri aya mashusho, imodoka y’umweru yambutse iki kiraro inyuze ku biti bibiri, igitangaje yagendaga ikinyuma (Marche Arriere). Amakuru avuga ko uyu mushoferi yageze ku gishanga ashaka kwambuka maze avuga bakora ikiraro bagashyiraho ibiti bihari 2, byakozwe nawe abereka ubuhanga butigeze kuborwa n’undi muntu uwo ari we wese.

Abantu bashungeraga bavuza induru babuza umushoferi gukora ibyo yiyemeje, mu gihe umushoferi we yavugaga ko yiyizeye cyane nta kibazo. Abakoresha imbuga nkoranyambaga zirimo Twitter na Instagram bahise basamira hejuru ubu buhanga bw’uyu mushinwa basangiza abandi bantu aya mashusho.

Mr Zhanga yakoze ibidasanzwe mu gutwara imodoka

KANDA HANO UREBE UBURYO UYU MUSHOFERI YEREKANYE UBUHANGA BUHAMBAYE!

Src: Dailymail

Idamange w'imyaka 42, amaze iminsi yumvikana ku mbuga nkoranyambaga mu bikorwa bya politiki n'ibindi bitandukanye bigize ibyaha bihanwa n'amategeko y'u Rwanda.

Ku mugoroba wo kuri uyu wa Mbere tariki 15 Gashyantare 2021, nibwo Polisi y'Igihugu ifatanyije na RIB, bagiye gufata Idamange akorweho iperereza kuri ibi bikorwa bye bikekwa ko ari ibyaha.

Itangazo rya Polisi y'Igihugu rivuga ko ubwo bari bagiye kumufata yagerageje gushaka kwanga gutabwa muri yombi, akubita umupolisi icupa mu mutwe aramukomeretsa bikomeye.

Rikomeza rigira riti 'Ukekwaho ibyaha [Idamange] yagerageje kwanga gutabwa muri yombi nk'uko biteganywa n'amategeko, yakoresheje icupa arikubita umupolisi mu mutwe aramukomeretsa.'

Polisi y'u Rwanda itangaza ko umupolisi wayo wakomerekejwe na Idamange yahise ajyanwa mu Bitaro bya Kacyiru.

Urwego rw'Igihugu rw'Ubugenzacyaha, RIB, rwatangaje ko rwataye muri yombi Idamange Iryamugwiza Yvonne akurikiranyweho ibyaha birimo guteza imvururu cyangwa imidugararo muri rubanda.

Inkuru bifitanye isano: Idamange yatawe muri yombi

Idamange yakubise umupolisi icupa mu mutwe aramukomeretsa