Category: Uncategorized

Yabigarutseho ubwo yakiraga indahiro z'Abayobozi bashya muri guverinoma baherutse gushyirwa mu myanya barahiriye gutangira inshingano nshya.

Yagize ati'Ndizera ko ari urugendo rwo gukora, gukorera igihugu, gukorera abaturage bisanzwe. Icyo bivuze gusa uyu munsi ni uko imbaraga mwakoreshaga, ubu zigiye kwiyongera, mube mwiteguye kongera imbaraga kurusha uko byari bisanzwe.

Ibi ni ukubisubiramo gusa, twese ni imirimo dukorera abaturage, Abanyarwanda tugomba kujya twiyibutsa ko tuba dukorera abantu, abandi Banyarwanda benshi kugira ngo ubuzima bwabo buhinduke bumere neza. Ntidukora twiganishaho, ntabwo aritwe tubona inyungu z'ibikorwa ba mbere n'ubwo natwe bitugeraho, ariko ababona inyungu nyinshi ni Abanyarwanda.

Hari ugukora uganisha mu nyungu zawe bwite, ibitekerezo byawe bwite […], aho iteka ni ho hakunze kuba ibibazo, abayobozi bakaba bakwiye kubyirinda. Ni ugukorera mu nyungu z'Abanyarwanda kandi bo bazi izo nyungu izo arizo n'uburyo zigomba kubageraho, ngira ngo twajya duhora twiyibutsa cyangwa twibukiranya kugira ngo bitaba ukundi.'

Abarahiye ni Gatabazi Jean Marie Vianney wagizwe Minisitiri w'ubutegetsi bw'igihugu na Habyarimana Béata Wagizwe Minisitiri w'Ubucuruzi n'inganda.

Minisitiri mushya w'Ubucuruzi n'Inganda, Habyarimana Béata, ni umubyeyi w'imyaka 45, asanzwe ari umuntu urambye mu rwego rw'imari n'ubukungu kuko aribyo yize muri Kaminuza y'u Rwanda no mu ya Maastricht mu Buholandi aho yakuye Masters mu Miyoborere mu by'Imari.

Mu mirimo yakoze harimo kuba yarabaye Umuyobozi Mukuru Wungirije w'Iyahoze ari Agaseke Bank Limited yaje guhinduka Bank of Africa, yanabaye kandi mu buyobozi bwa Banki y'Abaturage y'u Rwanda.

Habyarimana kandi ari mu bashinze Umuryango Nyafurika wa New Faces, New voices, uhuza abagore mu rwego rw'imari, ukaba ufasha abari n'abategarugori kugera kuri serivisi z'imari.

Uyu mubyeyi kandi ari mu bashinze Ikigega cyitwa Rugori Investment Network gifasha abari n'abategarugori kugerwaho na serivisi z'imari.

Minisitiri mushya w'Ubutegetsi bw'Igihugu, Gatabazi Jean Marie Vianney, afite imyaka 53 y'amavuko. Yari agiye kumara imyaka ine ari Guverineri w'Intara y'Amajyaruguru kuko yagiye kuri uyu mwanya mu mpinduka zakozwe mu 2017 nyuma y'amatora ya Perezida wa Repubulika.

Yavukiye i Mukarange mu Karere ka Gicumbi. Amashuri abanza yayigiye ku Mulindi, asoje akomereza muri EAV Kabutare. Kaminuza yayigiye muri KIST anakomereza Masters muri Mount Kenya University.

Mu 2011 yize muri Kaminuza ya Tsinghua mu Bushinwa ibijyanye n'Imicungire y'Ibiza n'Itumanaho ndetse yiga Amasomo ajyanye no guteza imbere ibijyanye n'Urwego rw'Ubuzima muri Kaminuza y'u Rwanda mu 2011. Ni umubyeyi w'abana bane.

Yatangiye gukora mu nzego za Leta mu 1990 ubwo yari ashinzwe Ubuhinzi mu yahoze ari Komini Cyungo na Kiyombe mu Majyaruguru.

Yakoze mu Kigo cy'Igihugu gishinzwe Ubuzima, RBC ndetse yabaye umwe mu bagize Inteko Ishinga Amategeko mu gihe cy'imyaka 12.

Source : http://umuryango.rw/amakuru/mu-rwanda/politiki/article/perezida-kagame-yasabye-abayobozi-bashya-gukora-mu-nyungu-z-abanyarwanda-gusa

Ku wa Kane tariki 25 Werurwe nibwo Minisitiri Dr Ngirente azaba ari imbere y'Inteko. Mu kwezi gushize yandikiye Inteko Ishinga Amategeko asaba abayobozi b'imitwe yayo yombi kumuha umwanya akagaragariza inteko gahunda za Guverinoma zijyanye no kuzahura ubukungu bwashegeshwe na Coronavirus.

Mu byitezwe mu byo Minisitiri w'Intebe azaganiriza Abagize Inteko Ishinga Amategeko harimo umusaruro w'Ikigega Nzahurabukungu cyashyizweho na guverinoma ngo gifashe abacuruzi kuzahura ibikorwa byabo.

Icyo kigega cyashyizwemo miliyoni 100 $ ndetse Minisitiri w'Imari n'Igenamigambi, Dr Uzziel Ndagijimana aherutse gutangaza ko uwo mubare hari gahunda yo kuwongera kugira ngo urwego rw'abikorera rufashwe mu buryo bwisumbuyeho.

Muri ayo mafaranga, nk'abakora mu rwego rw'ubukerarugendo n'amahoteli bagenewe hafi icya kabiri, banki zifashwa kuvugurura imiterere y'inguzanyo zazo, ku buryo nibura uburambe bwazo bugera ku myaka 15 hanyuma zihabwa n'igihe cy'imyaka nibura itatu yo gukora nta misoro yishyurwa.

---

Source : http://igihe.com/amakuru/u-rwanda/article/minisitiri-w-intebe-agiye-gusobanurira-inteko-ibimaze-gukorwa-muri-gahunda-yo

Uyu mugabo weretswe Itangazamakuru kuri uyu wa Gatanu tariki ya 19 Werurwe 2021, yemera icyaha akanagisabira imbabazi ariko akavuga ko biriya bikorwa yabitewe n’ubusinzi bwatewe n’ikigage yari yanyoye.

Avuga ko ubwo yari atashye ageze mu rugo yasomye kuri icyo kigage, umugore we akaba ari mukase w’uriya mwana w’imyaka ine, yamumuregeye amakosa atandukanye ndetse ngo anamwuka inabi ko atajya amukubita.

Ati 'Nagiye kubona mbona umwana yitumye aho twari kurira ngira umujinya mukubita agasinga kari aho hafi. Ariko rwose nyuma mbyutse mu gitondo nabonye uko namukomerekeje mbona ko nakosheje.'

Bivugwa ko uriya mwana bahise bamukingirana mu nzu iminsi ibiri, abaturage bakaza kubimenya ari na bo babimenyesheje inzego.

Umuvugizi wa RIB, Dr Murangira B. Thierry yavuze ko uyu mugabo akurikiranyweho ibyaha bihanwa n’amategeko y’u Rwanda birimo guhoza ku nkeke umwana no kumuha ibihano by’indengakamere ndetse n’iyicarubozo.

Ati 'Yaramukubise aramubabaza cyane amuca ibisebe amuziza amakosa abana bakora hanyuma amubika iminsi ibiri mu nzu amuhishe. Kuko yari arembye ngira ngo ni na ho yagize ubwoba bw’ibyo yakoze akajya ajya kumugurira imiti hanyuma ku bw’ubufatanye n’abaturage baza kubimenya arafatwa ubu akaba ari gukorerwa dosiye.'

Mu gihe RIB igikomeje iperereza kuri uyu mubyeyi, ubu afungiye kuri station ya RIB ya Rusororo mu Karere ka Gasabo mu Mujyi wa Kigali.

UKWEZI.RW

Source : http://www.ukwezi.rw/mu-rwanda/Amakuru-anyuranye/article/Gasabo-RIB-yerekanye-umugabo-ukekwaho-guhohotera-bikabije-umwana-we-amukubise-urusinga

Xie Xiaozhen yari ategereje ngo yambuke umuhanda hagati mu mujyi wa San Francisco ubwo umugabo yamukubitaga ikofe, nk'uko abivuga.

Yahise nawe amusubiza atora urubaho 'ararumwasa', nk'uko bivugwa n'ibinyamakuru byaho.

Kuva mu mezi macye ashize hari kuvugwa kwiyongera kw'ibikorwa byo gusagarira Abakomoka muri Aziya bari muri Amerika.

Ku rubuga nkoranyambaga rwo mu Bushinwa rwa Weibo hashtag ya “Umukecuru w'umunyamerika ukomoka muri Aziya yishyuye uwamusagariye”, yarebwe inshuro miliyari 1.4

Benshi kuri internet bashimagije Xie, bavuga ko “ari intwari nyayo”, undi yavuze ko “yahaye isomo” uwari umuteye.

Abandi bavuga ko ari ngombwa ko Abanyamerika bakomoka muri Aziya “bashyira hamwe bakirwanirira… cyangwa bakazahora bababazwa bucece”.

Undi yagize ati: “Ubushinwa, Ubuyapani na Koreya y'Epfo ntibijya birebana neza, ariko abantu bakomoka aho bari muri Amerika, rwose nimushyire hamwe kuko ingufu zanyu ziziyongera”.

'Afite ubwoba bwinshi'

Gusagarira Xie, ukomoka Guangdong, byabaye kuwa gatatu ubwo yari ahagaze agiye kwambuka umuhanda.

Bivugwa ko yumvise umuntu asakuza ngo “Umushinwa” mbere y'uko akubitwa ikofe mu maso. Yahise yitabara afata urubaho yabonye hafi aho arwasa uwo umuteye, nk'uko amakuru abivuga.

Amashusho yashyizwe kuri internet nyuma yerekana Xie ari kubabara anashyira ikintu gikonje ku isura ye yakomeretse biboneka, mu gihe uwamusagariye yari aryamishijwe ku gatanda k'abarwayi yanegekaye.

Polisi ya San Francisco yavuze ko umugabo w'imyaka 39 yatawe muri yombi kandi iri guperereza ku byabaye.

Umukobwa wa Xie yavuze ko nyina “yagize ubwoba bwinshi” nyuma y'iki gikorwa, kandi ijisho rye ry'iburyo ryakomeretse.

Dong-Mei Li yabwiye KPIX- TV ati: “Afite ubwoba bwinshi kandi ijisho rye riri kuva amaraso. Ijisho rye ry'iburyo ubu ntiribona.”

Umwuzukuru we John Chen, nyuma yashyizeho GoFundMe (urubuga rwo gukunsanya inkunga) kuri nyirakuru, asaba ubufasha bwo kumuvuza.

Yavuze ko “yakomeretse cyane mu maso, rimwe rikaba riva bidahagarara, kandi yabyimbye mu bujana ku kaboko”.

Chen yavuze ko no mu mutwe “ubu adakomeye”, kandi ko “buri uko bavuze ibyabaye… agira igishyika cyane agatangira kurira”.

Ku munsi wari wabanje, umugabo wo muri leta ya Georgia yari yashinjwe kwica abantu umunani – batandatu muri bo ni abagore bakomoka muri Aziya.

Ubwo bwicanyi ntiburitwa ko bushingiye ku irondaruhu ariko abakomoka muri Aziya benshi baba muri Amerika bwabasize mu bwoba.

Muri Amerika hiyongereye ibihuha ko abakomoka muri Aziya ari bo nyirabayazana wa coronavirus.

Minisitiri w'ububanyi n'amahanga w'Ubushinwa Zhao Lijian yasohoye itangazo kuwa kane ryamagana ivangura rikorerwa Abashinwa “ryiyongereye muri Amerika”.

Yagize ati: “Ibikorwa nk'ibyo biteye isoni, biva ku ivangura ridafite ishingiro, bidutera umujinya n'agahinda”.

BBC

Source : http://umuryango.rw/ubuzima-115/udushya/article/umukecuru-yiswe-intwari-kubera-kwirwanaho-agakubita-uwamusagariye

Yannick Mukunzi yageze i Nyamata mu gitondo cyo kuri uyu wa Gatanu tariki 19 Werurwe 2021 nyuma yo kubona ibisubizo bya COVID-19 nk’umuntu uvuye hanze y’Igihugu.

Ishyirahamwe ry’Umupira w’Amaguru mu Rwanda (FERWAFA) ritangaza ko Yannick Mukunzi agomba no gukorana imyitozo na bagenzi be iteganyijwe ku mugoroba wo kuri uyu wa Gatanu.

Yannick Mukunzi aje nyuma y’abandi bakinnyi bakina hanze bamaze kugera mu mwiherero w’Amavubi.

Ku ikubitiro, aba bakinnyi bakina hanze, babimburiwe na Kapiteni w’Ikipe y’Igihugu, Haruna Niyonzima waje akurikirwa na Salomon Nirisarike ndetse na Steven Rubanguka.

Bari kwitegura imikino ibiri Ikipe y’Igihugu ifite muri uku kwezi irimo uwo izakina na Mozambique mu cyumweru gitaha tariki 24 Werurwe 2021.

UKWEZI.RW

Source : http://www.ukwezi.rw/Imikino/article/Yannick-Mukunzi-na-we-yageze-mu-mwiherero-w-Amavubi

Umuherwekazi w’umugande, Zari Hassan yavuze ko umugore wa Magufuli ari we wenyine ushobora kumva uburibwe bw’urupfu rwa Perezida wa Tanzania Dr John Pombe Magufuli, ni mu gihe na we ari umupfakazi kuva 2017.

Mu ijoro ryo ku wa Gatatu tariki ya 27 Werurwe nibwo inkuru y’urupfu rw’uwari Perezida wa Tanzania, Dr. John Pombe Magufuli yamenyekanye.

Ni inkuru yashegeshe benshi ndetse yanagoranye kwakira aho bamwe babifashe nk’ibihuha ariko kuko byari bitangajwe na Visi Perezida w’iki gihugu barabyemeye.

Zari Hassan abinyujije ku rukuta rwe rwa Instagram yabanje kwifuriza Magufuli kuruhukira mu mahoro.

Ati'sinzira neza databukwe'. Aha yamwise sebukwe kuko yabanye na Diamond ukomoka muri Tanzania nk’umugore n’umugabo bakabyarana n’abana n’ubwo baje gutandukana.

Mu kugaragaza agahinda ko kubura umugabo nk’uko byamubayeho muri 2017, yavuze ko kuri ubu umuntu wakumva uburibwe ari umugore wa Magufuli, Janet Magufuli.

Abinyujije kuri Instagram yashyizeho ifoto ya Janet Magufuli iherekezwa n’amagambo agira ati'mwohereze urukundo n’urumuri. Uyu ni we wenyine ushobora kumva uburibwe.'

Zari ati “umugore wa Magufuli ni we wenyine uzi uburibwe arimo kunyuramo”

Zari Hassan yapfakaye muri 2017 ubwo Ivan Semwanga yapfaga azize umutima. Nyuma y’urupfu rwe uyu mugore yanyuze muri byinshi harimo ihangana n’umuryango w’umugabo bashakaga gutwara imitungo y’umugabo.

Zari Hassan yihanganishije umugore wa Magufuli

Source : http://isimbi.rw/imyidagaduro/article/mu-magambo-yakoze-ku-mitima-ya-benshi-zari-hassan-yavuze-ku-buribwe-umugore-wa-magufuli-arimo

Source : https://yegob.rw/umugore-windaya-bamushyinguye-mu-isanduku-imeze-nkubugabo-nyuma-yo-gupfa-arimo-gutera-akabariro/