Webrwanda Backend

Category: Uncategorized

  • Benshi bavuze amagambure nyuma yuko umwana ukiri muto asifuye umukino w' icyiciro cya mbere #rwanda #RwOT

    Umwana w ' umuhungu usifura muri Zambia yatunguye abakunzi b'umupira w'amaguru ubwo yasifuraga ari we musifuzi ukuriye abandi.

    Raphael Mbotela, w'imyaka 16, yatangiye gusifura imikino kuva afite imyaka 13.

    Kuri uyu wa Gatatu ni bwo yamenyekanye cyane muri Zambia ubwo yasifuraga umukino wa gicuti wahuje amakipe abiri yo mu cyiciro cya mbere, Zesco United na Forest Rangers.

    Mbotela yabwiye BBC dukesha iyi nkuru ko mbere yashakaga kuzaba umukinnyi, ariko mu myaka itatu ishize yavunitse akagombambari bigabanya gahunda yari afite.

    Yagize ati: 'Gukunda kuba umusifuzi kwanjye kwatangiye mu myaka itatu ishize nyuma yuko nsabwe kuba umusifuzi w'amakipe y'abato.Umunsi umwe, naregerewe nsabwa kuba umusifuzi w'umukino wa gicuti w'abagabo bakuze, bisa nkaho buri wese yabonye ukuntu mbizi. Ibi rwose ndimo kubyishimira, cyane cyane nyuma yuko ntashoboye gukomeza kuba umukinnyi w'umupira w'amaguru kubera imvune yo ku kagombambari'.

    Avuga ko yishimiye ko amakipe yo mu cyiciro cya mbere muri Zambia ubu noneho ashobora kumuhamagara ngo asifure imikino ya gicuti.

    Avuga ati: 'Numva nishimye ariko iyo nkoze amakosa mu mukino, nitera akanyabugabo. Byose bibaho mu mukino. Buri muntu wese akora amakosa'.

    Avuga ko umukino yasifuye ku wa gatatu ari wo wa mbere wo ku rwego rwo hejuru asifuye mu kazi ke, ndetse yizeye ko ishyirahamwe ry'umupira w'amaguru muri Zambia rishobora kumuteza imbere.

    Ati: 'Nta kibazo na kimwe nari mfite. Iyo ngeze mu kibuga, ntabwo nita ku by'imyaka yanjye cyangwa ku bakinnyi bakomeye. Ni jye uba uyoboye byose!… Ndashaka kuzaba nka Janny Sikazwe [umusifuzi wo muri Zambia] nindangiza kwiga'.

    Mbotela abana na mama we. Avuga ko ashaka kongera gusubukura amasomo ye kugira ngo nyuma azashobore kwibanda ku kuba umusifuzi.

    Uyu mwana yatangiye gusifura afite imyaka 13

    Source : https://impanuro.rw/2021/03/27/benshi-bavuze-amagambure-nyuma-yuko-umwana-ukiri-muto-asifuye-umukino-w-icyiciro-cya-mbere/

  • Ibitangaje kuri Sugira Ernest wizihiza isabukuru y’imyaka 30 wakuye abantu muri Guma mu Rugo bidasabye inama y’Abaminisitiri #rwanda #RwOT

    Sugira Ernest, rutahizamu wa Rayon Sports, ni izina ramaze kumenyakana mu mateka y’umupira w’amaguru mu Rwanda bitewe n’ibyo amaze gukora cyane cyane mu ikipe y’igihugu, kuri uyu munsi arizihiza isabukuru y’imyaka 30 abonye izuba.

    Kimwe cya vuba abantu bamwibukiraho, ni igitego yatsinze Togo tariki ya 26 Mutarama 2021 mu mukino usoza itsinda muri CHAN 2020 yaberaga muri Cameroun, byatumye u Rwanda rutsinda ku bitego 3-2 ruhita rubona itike ya ¼ cya CHAN.

    Ubwo mu Rwanda bari muri Guma mu Rugo kubera icyorezo cya Coronavirus, iyo ntsinzi yatumye basohoka mu nzu birira mu mihanda, ari n’aho havuye imvugo ngo 'Sugira Ernest umunyarwanda wa mbere wakuye abantu muri Guma mu Rugo bidasabye Inama y’Abaminisitiri.'

    Mu ikipe y’igihugu amaze gukora byinshi

    Buri tariki 27 Werurwe, Sugira Ernest yizihiza isabukuru ye y’amavuko, ni umwe mu bakinnyi bamaze kwandika izina mu mupira w’amaguru mu Rwanda cyane cyane mu ikipe y’igihugu.

    Sugira Ernest yavutse tariki ya 27 Werurwe 1991 avukira mu karere ka Muhanga mu Murenge wa Shyogwe mu kagari ka Kabeza. Sugira Ernest akaba ari ubuheta(umwana wa 2) mu muryango w’abana 6, abakobwa batatu n’abahungu batatu.

    Sugira Ernest ahora ashengurwa no kuba ataragize amahirwe yo kubona se witwaga Nkeneyimana Fidele kuko yitabye Imana ubwo Sugira yari afite amezi 7 gusa y’amavuko, ubu asigaranye mama we, Nyiraneza Blandine.

    Yize amashuri abanza mu Karere ka Kamonyi i Muganza, 2008 Sugira Ernest yatangiye amashuri yisumbuye mu ishuri rya ACJ Karama i Muhanga ahasoreza icyiciro rusange, Icyiciro cya kabiri cy’amashuri yisumbuye akaba yarakize kuri Ecole Technique de Kabgayi aho yize ibijyanye n’amashanyarazi (Electricity), akaba yaraharangije muri 2013.

    Urugendo rwa Sugira Ernest muri ruhago

    Amaze gukinira amakipe 5, AS Muhanga, AS Kigali, APR FC, AS Vita Club na Rayon Sports ndetse n’Amavubi.

    Uyu mukinnyi uri ku ibere ukunzwe cyane n’abanyarwanda bitewe n’ibyo amaze gukora, ntabwo atsinda ibitego byinshi ariko yagiye atsindira Amavubi ibitego bikenewe mu gihe nyacyo.

    Mu kiganiro yagiranye n’ikinyamakuru ISIMBI mu minsi yashize, yavuze ko urugendo rwe mu mupira w’amaguru atari rurerure cyane n’ubwo hari icyo amaze gukora kuko imyaka awumazemo ishobora kuba itarenze 10.

    Yagize ati 'Ntabwo ari urugendo rurerure, natangiye gukina umupira nkina muri Muhanga muri 2011, nkina muri AS Muhanga mu cyiciro cya kabiri tuza no kuzamukana na yo ijya mu cyiciro cya mbere, nkinamo umwaka umwe mpita nerekeza muri APR FC muri 2013, APR FC nari nasinyemo imyaka 2 mbasha kurangizamo umwe n’ubwo na wo ntawukinnye, njya muri AS Kigali maramo imyaka 2 mbere yo kujya muri AS Vita Club.'

    Yashyizeho agahigo ko kuba ari we munyarwanda wa mbere uguzwe amafaranga menshi agiye gukina hanze ya rwo

    Nyuma ya CHAN ya 2016 yabereye mu Rwanda, Sugira Ernest wari wigaragaje cyane yabengutswe na AS Vita Club yo muri DR Congo ihita imugura imutanzeho amadorali ibuhumbi 100, yandika amateka ko ari we mukinnyi w’umunyarwanda wa mbere uguzwe amafaranga angana atyo.

    Muri AS Vita Club akaba yarabanje kugorwa n’igitutu cy’abafana b’iyi kipe kuko bari benshi kandi yari avuye mu ikipe idafite abafana akajya mu ikipe ifite abafana benshi. yakinnye umwaka umwe ahita atandukana n’iyi kipe kubera ko ibintu byari bimaze guhinduka aho yari imaze kubura umwe mu bayobozi bayo. Yayikiniye imikino 19 ayitsindira ibitego 12.

    Yagiye gukina muri AS Vita Club aba umunyarwanda wa mbere uvuye mu gihugu ajya gukina hanze aguzwe menshi

    Yahise agaruka muri APR FC ayisinyira mbere y’uko umwaka w’imikino wa 2017/2018 utangira, tariki ya 15 Kanama 2017 yahise avunikira mu myitozo y’ikipe y’igihugu Amavubi yiteguraga umukino wo gushaka itike y’igikombe cya CHAN. Imvune yaje kumuzengereza yakize neza muri 2019 nabwo yatsinze igitego Ethipia no muri 2020 arayisubira bihesha u Rwanda itike ya CHAN 2020.

    Mu kuboza 2019, ikipe ya APR FC yari asigaraniye amasezerano y’umwaka umwe, yamutije muri Rayon Sports akinira kugeza ubu.

    Uyu musore yemeza ko atifuza gusoreza umupira w’amaguru muri Afurika, akaba afite intumbero yo kuba yakwerekeza ku mugabane w’u Burayi.

    Muri APR FC ntabwo yahiriwe

    Sugira Ernset Mu ikipe y’igihugu

    Sugira Ernest ni izina ryamenyekanye cyane muri CHAN 2016 yabereye mu Rwanda, ni bwo yashimangiye ko ari umukinnyi ukomeye dore ko ari naho yigurishirije kuko ni ho Vita Club yamubonye.

    Yatangiye guhamagarwa muri 2013 ikipe y’igihugu igiye gukina na Benin. Akishimira kuba yaraje asimbura Karekezi Olivier wahamagawe ariko ahita asezera, ni na we mukinnyi yakuze afatiraho icyitegererezo.

    Yagize ati 'ikipe y’igihugu natangiye kuyikinamo muri Nyakanga 2013 tujya gukina na Benin iwabo mpamagawe na Eric Nshimiyimana, ni we watozaga ikipe y’igihugu idutsinda 2-0 ni wo mukino wanjye wa mbere mu ikipe y’igihugu n’ubwo ntakinnye ariko nari mu bakinnyi 18 bagombaga kwifashishwa kuri uwo mukino.'

    Sugira amaze gukinira Amavubi imikino 25 aho amaze kuyitsindira ibitego 11 yizeye kuzongera.

    Mu buzima yababajwe n’umukino ikipe ya DR Congo yatsinzemo u Rwanda muri CHAN ibitego 2-1 byari muri ¼, igitego 1 u Rwanda rwabonye ni we wagitsinze. Gusa ngo ntabwo yakibagirwa ko igitego cye cya mbere mu ikipe y’igihugu cyahesheje u Rwanda amanota 3 ubwo bari mu mikino yo gushaka itike y’igikombe cy’Afurika cya 2017 ubwo yagitsindaga Mozambique i Maputo umukino ukaza kurangira ari 1-0. Ikipe y’igihugu amaze kuyikinira imikino 35 ayitsindira ibitego 12.

    Ibindi wamenya kuri Sugira Ernest

    • Imikino yakiniye AS Muhanga ni 29 yayitsindiye ibitego 16, APR FC yayikiniye imikino 22 ayitsindira ibitego 9, AS Vita Club yayikiniye imikino 19 ayitsindira ibitego 12, AS Kigali mu mikino 64 yayikiniye, yatsinze ibitego 29 mu gihe Rayon Sports amaze kuyikinira imikino 7 yayitsindiye ibitego 5
    • Ahamya ko umupira w’amaguru umutunze ku kigera cya 90%
    • Afite umukunzi atifuza gutangaza mu itangazamakuru, ni na we ateganya ko bazabana
    • Yakubitiwe gukina umupira kuko yagendaga agatinda gusa ngo ntabwo mama we yari azi ko afite iyo mpano
    • Ni umufana wa Manchester United na AS Muhanga yamuzamuye
    • Akunda Cristiano Ronaldo n’ubwo na Messi ari umuhanga
    • Sugira Ernest yakundaga gukubagana mu ishuri
    • Ni umukunzi w’umuhanzi Christopher
    • Asengera muri kiliziya Gatulika

    AS Kigali yayikiniye igihe kinini

    Ubu ni umukinnyi wa Rayon Sports

    Source : http://isimbi.rw/imyidagaduro/article/ibitangaje-kuri-sugira-ernest-wizihiza-isabukuru-y-imyaka-30-wakuye-abantu-muri-guma-mu-rugo-bidasabye-inama-y-abaminisitiri

  • MenEngage yamaganye abavuga ko abagore n’abakobwa barwanya ikandamizwa ari ‘ibishegabo’ #Rwanda #RwOT via @kigalitoday #rwanda #RwOT

    Mu nkuru ya Kigali Today igira iti “Abakobwa bo muri MenEngage barashaka abagabo batazabavunisha imirimo y’urugo”, bamwe mu basomyi bayo bayitanzeho ibitekerezo bamagana iyo myumvire MenEngage ije kwigisha mu Rwanda.

    Harimo n’abakomeje kuvuga ko abo bakobwa n’abagore bitwa “Feminists” ari ‘ibishegabo’, ndetse ko baje kwica umuco karande uhesha umugabo ubutware kuva umuntu yaremwa kugeza ubu.

    Uwiyita Williams agira ati Bazigishe abakobwa no gutereta abahungu, babarambagize, bafate irembo, basabe banakwe aho ngaho imyumvire izahura, …Biragoye guhindura uko Imana yaremye abantu,…buri wese akora icyo yaremewe gukora, c’est la loi de la nature(ni itegeko rya kamere) ntabwo mwabihindura”

    Uwiyita Leki na we akomeza avuga ko MenEngage yahugura abantu cyangwa itabahugura, umugore ngo ‘azakomeza yitwe umugore, ntacyo bizafasha usibye gusenyuka burundu kw’ingo’.

    Uwiyita Iddy na we yarasetse cyane ati”Hhhhhhh abo bakobwa ni ibishegabo pe! None se ubwo abakobwa na bo bazajya bakwa abagabo???? Mbese gutanga inkwano! Niba barabuze abagabo nibareke koshya abandi!!!”

    Fidèle Rutayisire, umwe mu bagize ihuriro MenEngage akaba anayoboye Umuryango RWAMREC w’abagabo baharanira uburinganire bw’umugore n’umugabo no kurwanya ihohoterwa, avuga ko ibi bitekerezo hamwe n’ibindi nkabyo, bitemewe kuko bitesha agaciro umugore.

    Rutayisire Fidèle, Umuyobozi Nshingwabikorwa wa RWAMREC aramagana abantu bakoresha izina igishegabo bavuga umugore cyangwa umukobwa uharanira uburenganzira bwe
    Rutayisire Fidèle, Umuyobozi Nshingwabikorwa wa RWAMREC aramagana abantu bakoresha izina igishegabo bavuga umugore cyangwa umukobwa uharanira uburenganzira bwe

    Rutayisire yagize ati “Iryo jambo rifite ubusobanuro bubi, ntabwo ari byo(ntibikwiye), iyo urebye neza umuntu bita igishegabo ni uba yaramenye uburenganzira bwe, arimo guharanira impinduka”.

    Uyu muyobozi wa RWAMREC avuga ko kuvuga ko umuntu ari igishegabo ari ukumutuka, ahubwo abantu ngo bagakwiriye kumva ko umugore yakandamijwe kuva kera.

    Ntabwo yemeranywa na Bibiliya, aho avuga ko yanditswe n’Abayahudi badaha agaciro abagore n’abana mu muco wabo.

    Rutayisire yaganiriye n’Itangazamakuru mu gihe i Kigali hari hateraniye inama mpuzamahanga yiswe ‘MenEngage Symposium’, yahuje abantu barenga ibihumbi 100 bo hirya no hino ku isi hifashishijwe ikoranabuhanga.

    Rutayisire avuga ko iyo nama yashyizeho icyo bita “Kigali Declaration(Amasezerano ya Kigali) agamije kuzakorera ubuvugizi abagore n’abakobwa mu miryango mpuzamahanga irimo uw’Abibumbye(UN), Umuryango wa Afurika yunze Ubumwe (AU) n’indi, kugira ngo abagabo batangire gutekereza gusangira ubutegetsi n’abagore.

    Uwase Aisha avuga ko bagiye kwigisha abahungu n
    Uwase Aisha avuga ko bagiye kwigisha abahungu n’abakobwa kuzakura bafite kubahana no gufashanya

    Umwari witwa Uwase Aisha, wo muri MeEngage na we akomeza avuga ko mu rwego rwo kwirinda ko abantu bazakomeza kubagiraho imyumvire idakwiye, bagiye kujya kwigisha urubyiruko rw’Abanyarwanda gucika ku mvugo n’imikorere ishyira umugore hasi y’umugabo.

    Biteganyijwe ko ubu bukangurambaga buzakorerwa ahahurira abantu benshi nko mu mashuri no ku biro by’inzego z’ibanze mu gihe cy’amezi umunani ari imbere guhera muri uku kwezi k’Ugushyingo 2020.

    Inama mpuzamahanga yigaga ku buringanire bw
    Inama mpuzamahanga yigaga ku buringanire bw’abagore n’abagabo yanzuye ko ibiganiro bigiye kubera mu bihugu bitandukanye byo ku isi kugera muri Kamena 2021

    source https://www.kigalitoday.com/amakuru/amakuru-mu-rwanda/article/menengage-yamaganye-abavuga-ko-abagore-n-abakobwa-barwanya-ikandamizwa-ari-ibishegabo

  • Bamenya yerekanye umukobwa umurutira Fiancée|bahishuye uko bamenyanye – YEGOB #rwanda #RwOT

    Benimana Ramadhan wamamaye nka Bamenya bitewe na Filime akinamo ikanamwitirirwa yongeye kuvuga ko umukobwa witwa Alliance Isimbi amurutira fiancée ndetse nuyu mukobwa avuga ko kuri we Bamenya amukunda birenze uko yakunda musaza we.

    Bamenya umaze kubaka izina muri cinema nyarwanda n'uyu mukobwa na we ukina amafilime ubwo bari mu kiganiro na ISIMBI TV bavuze byinshi bitandukanye ku mubano wabo.

    Bamenya yavuze ko hari byinshi yagezeho kubera Alliance, ndetse ahamya ko yamumenye cyera bakiri abakene, ariko ubu bakaba barakize.Alliance na we abajijwe igituma akunda Bamenya yavuze ko urukundo amukunda ntaho ruhuriye no kuba fiancée ariko na none ruruta ubuvandimwe nubwo urukundo rwabo rutazagera aho gushakana nk'umugabo n'umugore. Avuga ko ari we wafashije Bamenya akamuzamura ndetse akaba anamushimira ko ari umusore w'umuhanga cyane.

    Leave your vote

    Comments

    0 comments

    Source : https://yegob.rw/bamenya-yerekanye-umukobwa-umurutira-fianceebahishuye-uko-bamenyanye/

  • Imiterere ya “Isange Estate”, umushinga w’inzu zigezweho uhuriweho n’urubyiruko rwo mu Rwanda no mu Bufaransa –

    Uyu mushinga uhuriweho wiswe “Isange Estate”, ni igitekerezo cy’abanyarwanda batatu n’inshuti zabo zo mu Bufaransa no mu Bubiligi. Watangiriye mu bitekerezo ubwo aba banyarwanda barimo Serge Kamuhinda uyobora Volkswagen mu Rwanda; Aimé Bakata Nkunzi ukora mu bijyanye no gushushanya inzu na Alain Ngirinshuti usigaye uri mu buyobozi bukuru bwa RSSB bahuriraga na bagenzi babo mu mahanga aho bigaga.

    Izo nshuti zatangiye gusura u Rwanda, ariko iterambere ryarwo rikazikora ku mutima, maze bose biyemeza gushyira imbaraga hamwe bakora umushinga wunganira urugendo igihugu kirimo. Bahise bashinga sosiyete y’ubwubatsi bise “Imara Properties” bahuriyeho ari batandatu.

    Iyi sosiyete ifite umushinga wo kubaka umudugudu bise “Isange Estate” ku musozi wa Rebero. Abazaba batuye muri “Isange Estate” bazaba bari mu mudugudu aho inzu imwe ifite ibyumba bitatu cyangwa bine, uruganiriro, igikoni, imbuga abana bashobora gukiniraho, ubwogero n’ibindi.

    Muri “Isange Estate”, ku ikubitiro hazubakwa inzu 15. Aho zizaba zubatse umuntu uhari azaba yitegeye Umujyi wa Kigali wose, abashe guterera amaso abone hirya kure mu bice bya Bugesera ku buryo wanabona n’ahari kubakwa Ikibuga cy’Indege gishya.

    David Benazeraf ukomoka mu Bufaransa, ni umwe muri batandatu batangije “Imara Properties”. Ni we ushinzwe gukurikirana ubuzima bwa buri munsi bwayo nk’Umuyobozi Mukuru. Yahoze ari mu ihuriro ry’Abanyeshuri b’Abayahudi mu Bufaransa aho yari umucungamari waryo.

    Yabwiye IGIHE ko kimwe mu bintu bitayeho mu gukora uyu mushinga, ari uko inzu zizubakwa zizaba zijyanye n’igihe, kandi ko bigaragarira mu gishushanyo mbonera cyakozwe.

    Ati “Buri nzu izaba ifite ubusitani bwayo, kandi zubatswe bijyanye n’ibyo Umujyi wa Kigali uteganya mu myubakire. Ibikoresho byose bishoboka kuboneka mu Rwanda nibyo tuzakoresha tutagiye kubishakira ahandi, ibidakorerwa mu Rwanda, bizasaba ko tubikura hanze. Urugero, nk’amadirishya ya Aluminium, ubwoko butandukanye bw’ibirahure ku buryo niba abana bari gukina utaba ufite impungenge ko bari bubyangize cyangwa se ngo bibakomeretse.”

    Ni umushinga wa mbere…

    Muri iki gihe, abantu benshi baba bafite indoto zo kugira inzu zabo bwite, ku buryo imishinga yose ituma umuntu yava mu bukode, isamirwa hejuru n’abatari bake.

    David yasobanuye ko bo nka sosiyete igitangira, bahisemo gutangirira ku nyubako nke, ariko bafite gahunda yo kuzamura ubushobozi no kubaka inzu zishobora kwigonderwa na buri wese.

    Ati “Igitekerezo cyacu cy’igihe kirekire ni ugukora byinshi kurushaho, inzu 15 ni nke ariko twabonye imishinga minini itarigeze itanga umusaruro. Twe twasanze byaba ari byiza gushyira imbaraga mu mishinga mito aho guhera ku minini tutabasha kwitaho neza.”

    Ku muntu ushaka inzu imwe muri izi 15 ziri muri uyu mushinga, avugana na Imara Properties anyuze kuri Website yayo ya https://www.imara-properties.com agasobanurirwa uko umushinga uteye hanyuma akaba yatangira kwishyura mu byiciro ari nako inzu ye yubakwa kandi bijyanye n’uko ashaka.

    Ati “Ashobora kuvuga imiterere yihariye ashaka y’inzu ariko bidahinduye ishusho rusange kuko uko umudugudu umeze ugomba gukomeza kugira isura imwe. Ariko nk’igikoni, umuntu ashobora kuvuga ati ndagishaka gutya, ngishaka aha n’aha. Ntabwo ari nk’uko umuntu yavuga ati ndashaka inzu y’ubururu, umutuku gutyo gutyo.”

    Ku muntu wishyuriye rimwe, nk’inzu ifite ibyumba bibiri iri ku buso bwa metero kare 132 yatanga 113 000 $ cyo kimwe n’iy’ibyumba bitatu. Mu gihe inzu ifite ibyumba bine, iri ku buso bwa metero kare 170, umuntu asabwa kwishyura 135 000 $. Ushaka ikibanza cyonyine cya metero kare 300-500 gihera kuri miliyoni 9 Frw.

    Umushinga w’izi nyubako uzashyirwa ku i Rebero mu Mujyi wa Kigali ku buryo abazaba bahatuye bazaba bitegeye umujyi wose

    Zizaba zifite ahantu abana bashobora gukinira, ubwogero n’ibindi bikorwa bihuza abantu

    Zimwe ni uku zizaba ziteye. Buri yose izaba ifite ubusitani bwayo bwihariye

    Ibyumba ni uku bizaba biteye, bizaba byubatse mu buryo bujyanye n’igihe

    Umuntu azaba afite uburenganzira bwo kuvuga uko ashaka imiterere y’inzu ye imbere

    Ibikoresho bizakoreshwa ni ibikorerwa mu Rwanda keretse ibizakenerwa bitahaboneka

  • Musenyeri Sinayobye wahawe inkoni y'ubushumba bwa Diyoseze ya Cyangugu yahimbiwe indirimbo – #rwanda #RwOT

    Iyi ndirimbo uyu muhanzi yayiririmbanye na mugenzi we witwa Epiphanie Uwayezu. Ndayisabye yavuze ko yagize iki gitekerezo cyo gukora iyi ndirimbo ubwo Papa Francis yatoreraga Sinayobye kuba Umushumba Diyoseze ya Cyangugu, asimbuye Bimenyimana Jean Damascène witabye Imana mu 2018.

    Yavuze ko amaze kugira igitekerezo cyo guhimbira indirimbo umwepisikopi mushya, yatekereje ku ntego ya gishumba y'uyu mwepisikopi maze indirimbo ye akayitirira iyi ntego igira iti 'Fraternitas In Christo' biri mu rurimi rw'ikilatini mu Kinyarwanda bivuga ngo 'Ubuvandimwe muri Kirisitu'.

    Ati 'Nakunze cyane intego y'uyu mwepisikopi kuko itwibutsa ko turi abavandimwe. Niba rero turi abavandimwe muri Kirisitu, imibanire yacu na bagenzi bacu izaba ntamakemwa, tube intangarugero, tube koko abakirisitu binyuranye no kuba twashingira ku magambo gusa, ahubwo tukabishyira mu bikorwa mu mibereho yacu ya buri munsi.'

    Iyi ndirimbo igaruka ku bumwe bukwiye kuba hagati y'abakirisitu, abihayimana n'umwepisikopi.

    Uyu muhanzi yasohoye amashusho y'iyi ndirimbo ku munsi w'ibirori byo kwimika Munsenyeri Sinayobye Edouard. Ndayisabye yaherukaga gukora indirimbo zirimo 'Nimuhindure imitima' na 'Igisibo gitagatifu'.

    Ndayisabye wahimbye iyi ndirimbo avuka mu Karere ka Rusizi mu Murenge wa Nyakabuye ahitwa i Busozo, afite imyaka 37. Amashuri abanza yayize muri Ecole Primaire Bunyereri, akomereza kuri Petit Seminaire Saint Aloys Cyangugu, yiga muri TTC Mururu, Grand Séminaire Propédeutique de Rutongo, Grand Seminaire de Kabgayi no muri UTAB.

    Ni umuhanga mu gusoma, kwandika no kwigisha umuziki wanditse, kwigisha amakorali yo muri Kiliziya Gatolika, gucuranga inanga ndetse akaba yaranayoboye iyandikwa ry'igitabo cy'indirimbo zinyuranye cyasohowe na Seminari Nkuru ya Kabgayi ubwo yahigaga mu 2009.

    Reba indirimbo 'Fraternitas in Christo'

    Musenyeri Sinayobye mu muhango wo kumuha inkoni y’ubushumba yasabye abakirisitu ba Diyoseze ya Cyangugu ubufatanye

    Source : http://igihe.com/amakuru/u-rwanda/article/musenyeri-sinayobye-wahawe-inkoni-y-ubushumba-bwa-diyoseze-ya-cyangugu

  • Gisagara iri imbere mu gutanga ubwisungane mu kwivuza, Kicukiro ni iya nyuma mu gihugu – #rwanda #RwOT

    Akarere ka Gisagara kaje ku mwanya wa mbere kuko kamaze kwitabira gutanga mituweli ku kigero cya 94.5%. Aka Gakenke kari ku mwanya wa kabiri na 92.7% mu gihe ubwitabire mu Karere ka Nyaruguru bugeze kuri 91.8%.

    Akarere ka Nyamagabe kari ku mwanya wa Kane n'ubwitabire bwa 91% mu gihe aka Ruhango kari ku mwanya wa Gatanu ku kigero cya 90.9%

    Ku rwego rw'intara, iy'Amajyepfo iri ku mwanya wa mbere ku kigero cya 88.9%, ikurikirwa n'Amajyaruguru afite ubwitabire bwa 87%, mu gihe Uburengerazuba buri ku kigero cya 83.2%, naho iy'Uburasirazuba iri ku kigero cya 82.7% mu gihe Umujyi wa Kigali uri ku mwanya wa gatanu n'ubwitabire bwa 78.1%.

    Uturere dutatu tw'Umujyi wa Kigali turi muri dutanu twa nyuma mu bwitabire bwo gutanga ubwisungane mu kwivuza mu 2021.

    Nka Nyarugenge ni iya 26 aho ubwitabire bugeze kuri 79.5%, Gasabo ni iya 27 inganya ubwitabire na Nyarugenge, Nyagatare ni iya 28 aho ubwitabire bugeze kuri 79%, Rutsiro ifite 76.1% ni iya 29, naho Kicukiro iri ku mwanya wa 30 n'ubwitabire bwa 74.1%.

    Mu gihugu hose, ubwitabire mu gutanga mituweli ya 2020/2021 bugeze ku kigero cya 85.3%.

    24.03. 2021: Uturere 5 twa nyuma mu kwishyura #Mituweli 2020/2021
    30. Kicukiro 74.1%
    29. Rutsiro 76.1%
    28. Nyagatare 79.0%
    27. Gasabo 79.5%
    26. Nyarugenge 79.5%#IshyuraMituweli2020_2021 pic.twitter.com/Vh21vx51yA

    — Rwanda Social Security Board (@RSSB_Rwanda) March 26, 2021

    24.03.2021: Uko Intara n’Umujyi wa #Kigali bikurikirana mu kwishyura #Mituweli 2020/2021
    1. Amajyepfo 88.9%
    2. Amajyaruguru 87.0%
    3. Uburengerazuba 83.2%
    4. Uburasirazuba 82.7%
    5. Umujyi wa Kigali 78.1%#IshyuraMituweli2020_2021 pic.twitter.com/3LPfTGvE0X

    — Rwanda Social Security Board (@RSSB_Rwanda) March 26, 2021

    Source : http://igihe.com/amakuru/u-rwanda/article/gisagara-iri-imbere-mu-gutanga-ubwisungane-mu-kwivuza-kicukiro-ni-iya-nyuma-mu

  • Umunyamakurukazi akaba n’umukunzi wa Arthur Nkusi yashishuye ko yari agiye gufatwa ku ngufu na Dr Kayumba #rwanda #RwOT

    Umunyamakuru wa CNBC, Fiona Ntarindwa Muthoni akaba n’umukunzi w’umunyarwenya Arthur Nkusi yavuze ko uwari umwarimu we mu ishuri ry’itangazamakuru muri Kaminuza y’u Rwanda, Dr. Kayumba Christopher yamukoreye ihohoterwa rishingiye ku gitsina.

    Kamaraba Salva yifashishije Twitter muri uku kwezi yashyizeho inkuru y’uko uyu mukobwa yari agiye gufatwa ku ngufu n’uyu mwalimu, hari muri Mutarama 2017 ubwo bari mu gihe cyo kwandika ibitabo basoza amashuri yabo, Fiona ubwo yangaga kuryamana na we yamubwiye ko azamukomanyiriza ntagire akazi abona mu itangazamakuru.

    RIB imaze iminsi ikurikirana uyu mwalimu kuri iki kirego cyo kuba yagerageje gufata ku ngufu umunyeshuri we.

    Abinyuje ku rukuta rwe rwa Twitter, Fiona Muthoni wabaye igisonga cya 3 cya Miss Rwanda 2015, yavuze ko koko Kayumba yagerageje kumufata.

    Ati“Umwarimu wanjye yankoreye ihohoterwa rishingiye ku gitsina'.

    Yakomeje avuga ko ubwo inshuti ye Kamabara yahishuraga ko yahohotewe abantu bibajije impamvu abizanye nyuma y’imyaka 3.

    Ati 'Ariko se hari igihe cya nyacyo ku wakorewe ihohoterwa rishingiye ku gitsina cyo kuvuga?'

    Yakomeje avuga ko yahise abibwira uwari umuyobozi wa w’ishuri ry’itangazamakuru, Joseph Njunguna ariko ntiyagira icyo abikoraho.

    Ati” nahise mbibwira umuyobozi utarabyitayeho. Nahatiwe kwicara mu ishuri hamwe n’uwampohoteye, ibintu umuntu uwo ariwe wese adakwiriye kunyuramo.'

    Muthoni Fiona yavuze ko iyo wakorewe ihohoterwa uba wumva uri wenyine wigunze ko ndetse ntawabasha kukumva, ari nayo mpamvu yabicecetse iyi myaka yose.

    Dr Kayumba Christopher akaba nawe yahise aza anyomoza ibi byavuzweho n’uyu mukobwa kuko n’ubwo amushinja kumuhohotera ariko yakomeje kujya amutumira mu biganiro bye.

    Muthoni Fiona yahishuye iby’ihohoterwa yakorewe na Dr Kayumba

    Dr Christopher Kayumba ahakana ibyo aregwa

    Source : http://isimbi.rw/imyidagaduro/article/umunyamakurukazi-akaba-n-umukunzi-wa-arthur-nkusi-yashishuye-ko-yari-agiye-gufatwa-ku-ngufu-na-dr-kayumba

  • Muhanga : Akurikiranyweho gusambanya umukobwa bakundanaga yarangiza akamwica #rwanda #RwOT

    Uyu musore ubu uri mu Bushinjacyaha, dosiye ikubiyemo ikirego cye yakiriwe muri iki cyumweru kugira ngo ikorerwe iperereza ubundi ishyikirizwe Urukiko rumuburanishe kuri ibi byaha akekwaho.

    Bivugwa ko uyu musore w’imyaka 21 y’amavuko yajyanye n’uwo mukobwa bakundanaga kwahira ubwatsi bw’amatungo, ubundi nyamusore akamusambanya ku gahato, yarangiza akamwica.

    Uyu musore ukekwaho kwica umukunzi we w’imyaka 28 y’amavuko, ngo yamuhambiriye umugozi w’inzitiramubu mu ijosi, amuhambira ku giti, anamubohera amaboko inyuma akoresheje inshinge yaranduye aho, akaba yari yabanje kumupfuka mu maso yifashishije igitenge cya nyakwigendera n’ingofero.

    Na none kandi hari amakuru avuga ko bikekwa ko uriya musore yacuze uriya mugambi wo kwivugana umukunzi we ngo kuko ashobora kuba yari yaramuteye inda.

    Umuryango wa nyakwigendera washakaga ko uriya musore amurongora bakabana nk’umugore n’umugabo ariko nyamusore akaba afite undi mukobwa bateganyaga kubana.

    ITEGEKO RIVUGA IKI ?

    Mu gitabo cy’Itegeko riteganya ibyaha n’ibihano mu Rwanda, Ingingo ya 107 ifite umutwe ugira uti 'Ubwicanyi buturutse ku bushake n’uko buhanwa'

    Iyi ngingo igira iti 'Umuntu wica undi abishaka, aba akoze icyaha. Iyo abihamijwe n’urukiko, ahanishwa igihano cy’igifungo cya burundu.'

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Muhanga-Akurikiranyweho-gusambanya-umukobwa-bakundanaga-yarangiza-akamwica

  • Inkomoko y’izina “Ntungaruze” ry’agasantere k’i Gatsibo –

    Ni agasantere gakorerwamo ubucuruzi bunyuranye cyane ubujyanye n’ibiribwa ndetse n’ibinyobwa. Abahatuye bavuga ko kimwe mu bintu bidashobora kuhabura ari inzoga yo kwica inyota ngo kuko ituma abahatuye basabana.

    Kuhita Ntungaruze byaturutse he?

    Bamwe mu baturage baganiriye na IGIHE, bavuze ko izina Ntungaruze bakuze basanga ariryo ryahawe aka gasantere, gusa bose bahuriza ku kuba ryariswe aha hantu mu myaka ya 1950-1960.

    Bankundiye Faustin w’imyaka 71 yavuze ko iri zina ryavuye ku mugabo wahapimiraga urwagwa ruryoshye ku buryo uwarunywagaho byarangiraga ayo yajyanye mu kabari yose ayanywereye.

    Ati “Bamuhaga amafaranga bakumva inzoga iryoshye cyane bakamubwira ngo ntungaruze yose ndayanywera, uwo mugabo yitwaga Gatema.”

    Ntambara Onesphore ufite imyaka 50 we yavuze ko uwo mugabo witwaga Gatema yapimaga urwagwa ruryoshye cyane, abaje kuyigura akajya ababaza niba yabashyiriramo urundi aho kubagarurira.

    Ati “Kubera yari yiyizeye mu kugira inzoga iryoshye, nawe ntiyashakaga kugaruza abantu noneho yakubaza niba yakongera irindi cupa aho ku kugaruza ukemera, birangira aka gasantere kose kiswe Ntungaruze.”

    Ntambara yavuze ko iyi santere yamaze kumenyekana cyane kuko ituwe n’abaturage benshi kandi bakunda urwagwa rw’ibitoki.

    Rwagasore Alexandre ufite imyaka 64 yavuze ko ikiganiro cyabaga mu kabari ka Gatema aricyo cyatumye iri zina ryamamara cyane.

    Ati “Mu myaka y’ubusore bwacu niho twagoroberezaga, hari nubwo wajyagayo ugiye gutarama gusa kuko habaga igiparu cyinshi.”

    Kabuzima Safina yavuze ko iri zina ntacyo ribatwaye ndetse ko ubu abacuruzi bisubiyeho ku buryo basigaye bagarurira abakiliya.

    Agasantere ka Ntungaruze gasigaye gatuwe n’abaturage benshi banivanzemo n’impunzi zituruka mu nkambi ya Nyabiheke bituma karushaho gukomera cyane.

    Aka gasanteri kamaze gutera imbere ku buryo bugaragara

    Bankundiye Faustin w’imyaka 71 ni umwe mu bataramiye muri Ntungaruze akiri umusore

    Iyi nzu niyo yapimirwaga urwagwa rwasize umugani muri aka gace