Category: Uncategorized

Habesha ni imwe muri Hashtag zikomeje gukoreshwa ku mafoto abafana Meddy (Inkoramutima) bari gushyira ku mbuga nkoranyambaga, akaba ari ubwoko bukomoka ku mwamikazi Sheba witiriwe indirimbo ‘Queen of Sheba’ Meddy ateganya gusohora mu minsi iri imbere yanaririmbye mu bukwe bwe na Mimi.

Kuba Meddy yararirimbiye umugore we iyi ndirimbo, bishoboka ko Sossena Aseffa (Mimi) yaba akomoka mu bwuko bw’aba Habesha. Mu gihe byaba bimeze gutyo, uyu mugore wa Meddy yaba afite aho ahuriye n’amateka n’ibyanditse muri Bibiliya bivuye ku kuba akomoka ku mwami Salomon umuhungu w’umwami Dawidi.

Aba Habesha ni bantu ki muri rusange?

Aba Habesha ni umuryango w’umwami w'ubunyabwenge Salomon wo muri Israel uvugwa muri Bibiliya Yera na Bibiliya Ntagatifu, hamwe n'umwamikazi Sheba wiswe Makeda mu mateka ya Ethiopia.

Uyu muryango umaze imyaka myinshi nk’uko byemezwa n'inyandiko ya Kebra Negast imaze imyaka 700. Iyi nyandiko ikaba ivuga ko uyu muryango wabayeho mu myaka 1225 mbere y’ivuka rya Yesu Kristo. Iyi nyandiko igaragaza uko umwami Salomon yahuye n'umwamikazi Sheba ikagaruka ku ruhererekane rw'abana babo n'imiryango.

Salomon bivugwa ko yashukashutse umwamikazi bigatuma babyarana umwana w'umuhungu wabaye umwami w'abami wa mbere wa Ethiopia, Menelik I. Bivugwa kandi ko uyu mwamikazi yari umukobwa w’umwe mu batware ba Ethiopia wasuye Salomon mu murwa mukuru wa Israel, Jerusalem. Ibi kandi byanditse mu gitabo cy'umunyamateka karundura Josephus.

 Mu mafoto ihere ijisho ubwiza bw’abakobwa n’abagore b’aba Habesha

Mimi wa Meddy nawe ashobora kuba akomoka mu ba Habesha

Kiyovu Sports inyagiriye Mukura VS ku Mumena ibitego 3-0 muri shampiyona, ni umukino Babuwa Samson yatsinzemo igitego.

Kiyovu Sports nyuma yo gutsinda AS Muhanga 2-0 mu mukino w’umunsi wa mbere w’amakipe ahatanira kutamanuka mu cyiciro cya 2, uyu munsi kuri Stade Mumena yari yakiriye Mukura VS.

Igice cya mbere cy’umukino amakipe yombi yagerageje gusatirana ariko nta mahirwe akomeye yigeze aboneka. Igice cya mbere cyarangiye ari 0-0.

Kiyovu Sports yatangiye igice cya kabiri ishaka igitego ku kabi na keza.

Umutoza Ndayiragije Etienne yakoze impinduka ku munota wa 60 Kevin na Saleh bavamo hajyamo Babuwa Samson na Nsengiyumva Moustapha.

Izi mpinduka zafashije Kiyovu Sports kuko ku munota wa 63 Babuwa Samson yafunguye amazamu ku mupira yari ahawe na Nsengiyumva Moustapha.

Nyuma y’iminota 2 Marc Govin yakoreye ikosa Moustapha mu rubuga rw’amahina maze bahita hatanga penaliti yinjijwe neza na Robert Saba.

Nyuma y’iyi minota, Mukura VS yatangiye gusatira ishaka kwishyura ariko kumenera mu bwugarizi bwa Kiyovu Sports biranga.

Ku munota wa 80, ku burangare bwa ba myugariro ba Mukura VS, Saba Robert yatsinze igitego cya 3. Umukino warangiye ari 3-0.

Abakinnyi 11 ba Mukura VS bari babanje mu kibuga

11 ba Kiyovu Sports babanjemo

Ba kapiteni n’abasifuzi mbere y’umukino

Saba Robert yatsinze ibitego 2 muri uyu mukino

Mansur wa Mukura agerageza gutera ishoti

Ishimwe Saleh ntabwo yigeze yuzuza inshingano yahawe n’umutoza aramusimbuza

Uyu munsi kandi mu cyiciro cy’amakipe ahatanira igikombe, hari hitezwe umukino wa Bugesera FC yakinnye na Rayon Sports kuri Stade ya Bugesera.

Nyuma yo gutsindwa na AS Kigali mu mukino w’umunsi wa mbere, nta kosa Rayon Sports yagombaga gukora imbere ya Bugesera FC yari yatsinze Police FC.

Umutoza Guy Bukasa, abifashijwemo n’abakinnyi babiri bakomoka muri DR Congo, Manace Mutatu na Héritier Luvumbu ndetse n’umunyarwanda Mugisha Gilbert yatsinze Bugesera FC 3-1, igitego kimwe cya Bugesera cyatsinzwe na Rucogoza Djihad.

11 ba Rayon Sports babanjemo

Ba kapiteni n’abasifuzi mbere y’umukino

Sugira Ernest agenzura umupira

Mugisha Gilbert atera ishoti ryavuyemo igitego cya Rayon Sports cya kabiri

Imikino y’umunsi wa kabiri uko yagenze

Abahatanira igikombe

Tariki ya 26 Gicurasi

AS Kigali 1-1 APR FC
Espoir FC 2-2 Rutsiro FC

Tariki ya 27 Gicurasi

Rayon Sports 3-1 Bugesera FC
Police FC 2-1 Marines FC

Abahatanira kutamanuka mu cyiciro cya kabiri

Tariki ya 26 Gicurasi

Gasogi United 2-2 Gorilla

Tariki ya 27 Gicurasi

Musanze FC 3-1 AS Muhanga
Etincelles FC 2-1 Sunrise FC
Kiyovu Sports 3-0 Mukura VS

Mu ijoro ryo kuri uyu wa Kane tariki ya 27 Gicurasi, hateganyijwe umukino wa ¼ muri BAL uza guhuza Patriots BBC ihagarariye u Rwanda muri iri rushanwa na Ferroviario de Maputo yo muri Mozambique.

Uyu mukino uza gutangira saa tatu z'ijoro ufite byinshi usobanuye kuri Patriots, kuri Basketball Nyarwanda ndetse no ku gihugu muri rusange cyacyiriye iri rushanwa riri gukinwa ku nshuro ya mbere.

Ni umukino usaba Patriots imibare myinshi ndetse no gukoresha ubwenge mu kibuga kugira ngo ikomeze mu mikino ya ½.

Aya makipe yombi yatomboranye muri ¼, yarazamutse mu matsinda ari kumwanya wa kabiri, kuko Patriots yazamutse mu itsinda A ari iya kabiri inyuma ya US Monastir yayoboye itsinda, mu gihe Ferroviario de Maputo yazamutse mu itsinda C iri ku mwanya wa kabiri inyuma ya Zamalek yabaye iya mbere.

Patriots yatsinze imikino ibiri yo mu itsinda A harimo uwa GNBC yo muri Madagascar n'uwa Rivers Hoopers yo muri Nigeria, ariko itsindwa umukino wa US Monastir yo muri Tunisia mu mukino wa Gatatu mu itsinda.

Patriots nk'ikipe iri mu rugo irasabwa kwihagararaho igatsinda iyi kipe yo muri Mozambique kugira ngo ikomeze muri ½, ndetse izanagaragare mu makipe ane ya mbere muri iri rushanwa.

Ni umukino ukomeye ndetse unagoye, ariko intsinzi irashoboka ku ruhande rwa Patriots nubwo iza kuba ikina n'ikipe ikomeye.

Uko iyi kipe ihagarariye u Rwanda yakinnye mu mikino y'amatsinda, byagaragaje ko ishobora gutsinda ikipe iyo ariyo yose, gusa bikaba bisaba gushyira hamwe, gukoresha imbaraga n'ubwenge ndetse n'ishyaka ryo gukunda Igihugu.

Patriots kandi ikaza gukina idafite J.Cole wayitsindiye amanota atanu mu mikino y'amatsinda, kubera ko yamaze gusubira muri Amerika.

Uyu mukino wa saa tatu uhuza Patriots na Ferroviario de Maputo, urabanzirizwa n'uhuza US Monastir na As Douanes saa 17:30.

Amakipe aza gutsinda azahurira muri ½ hashakwa izagera ku mukino wa nyuma.

Kugeza ubu Zamalek na Petro de Luanda niyo makipe yamaze gukatisha itike ya ½ muri iri rushanwa, ndetse akazahura ku wa Gatandatu hashakwa ikipe izagera ku mukino wa nyuma.

Patriots BBC irasabwa ubwitange kugira ngo igere muri 1/2

Gushyira hamwe n’urukundo rw’Igihugu nibyo biza kubasunika imbere ya Ferroviario de Maputo

Patriots irakina idafite J.Cole wasubiye muri Amerika

Mu gitondo cyo kuri uyu wa 27 Gicurasi 2021 ni bwo impunzi nyinshi zinjiye mu Rwanda nyuma y'uko Guverineri wa Gisirikare w'Intara ya Kivu y'Amajyaruguru, Lieutenant General Constantin Ndima, asabye abaturage kwimukira mu gace ka Sake mu rwego rwo kwirinda ingaruka zaterwa n'irindi ruka rya Nyiragongo rishobora kubaho.

Uyu muyobozi yavuze ko uduce tuzagirwaho ingaruka ari Majengo, Mabanga Nord, Mabanga Sud, Virunga, Mujovu, Murara, Kahembe, Miteno na Quartier Les Volcans. Utu duce bigaragara ko ariho hanyura amahindure ikirunga kiramutse kirutse.'

Yakomeje ati 'Turasaba rero ko abaturage bakomeza kuba maso kandi bakumva amakuru yatanzwe n'inzego zibishinzwe kuko ibintu bishobora guhinduka vuba. Ibintu birakurikiranwa ku gihe kandi bivugururwa ku gihe.'

Nyuma yo kumva iyi nkuru, bamwe mu batuye mu Mujyi wa Goma Burasirazuba bwa Congo bahise batangira guhunga, bamwe bajya mu bice bya Sake abandi benshi berekezwa mu Rwanda, aho bahise bakirwa n'inzego zishinzwe umutekano, zikabohereza ku kibuga cy'ishuri rya College du Gisenyi Inyemeramihigo riri mu Murenge wa Rugerero, nko mu birometero bitanu uvuye ku mupaka w'u Rwanda na Congo.

Imirimo yo kubaka amahema azacumbikira izi mpunzi iri gukorwa n'Ishami ry'Umuryango w'Abibumbye Rishinzwe kwita ku Mpunzi, UNHCR, mu gihe Ishami ry'Umuryango w'Abibumbye Ryita ku Biribwa, PAM, naryo riri gutegura amafunguro yo guha izi mpunzi.

Muri iki kibuga, ni naho izi mpunzi ziri kubakirwa inkambi y'igihe gito, ndetse ikaba iri gushyirwamo ibikenerwa byose birimo ubwiherero ndetse n'amazi, ari gushyirwamo Ikigo cy'Igihugu Gishinzwe Amazi, Isuku n'Isukura, WASAC.

Sosiyete y'u Rwanda Ishinzwe Ingufu, REG, nayo yatangiye ibikorwa byo gushyira amashanyarazi muri aya mahema, mu gihe abakozi b'Ikigo cy'Igihugu Gishinzwe Ubuzima, RBC, bari mu bikorwa byo gupima izi mpunzi icyorezo cya Covid-19, kandi bikaba biri gukorwa ku buntu.

Ku rundi ruhande, inzego z'umutekano zirinze umutekano w'iyo nkambi, ndetse zirimo no kwita ku bafite ibibazo birimo uburwayi, ubusaza n'ibindi bikeneye kwitabwaho by'umwihariko.

Urubyiruko rw'abakorerabushake ruri gufasha izi mpunzi mu bikorwa byo kwirinda ikwirakwira ry'icyorezo cya Covid-19, binyuze mu kwibutsa izi mpunzi kwambara agapfukamunwa ndetse no guhana intera.

Impunzi zose ziri muri iyi nkambi zahawe udupfukamunwa tw'ubuntu, mu rwego kwirinda icyorezo cya Covid-19, ndetse ibikorwa byo kubarura umubare w'izi mpunzi birakomeje.

Irafasha wahunganye n'umugabo we bavuye i Masisi, bavuze ko yahunze kubera 'Iruka rya Nyiragongo.'

Irafasha yavuze ko atagiye mu gace ka Sake kuko 'Mu Rwanda ari ho batwakira neza…baduhaye amazi yo kunywa, baduha ibyo kurya, baduha n'udupfukamunwa.'

Yavuze ko mu gihe ibintu byagenda neza, yasubira muri RDC.

Christophe Salum nawe uri muri izi mpunzi yavuze ko yahunze 'Kubera ikirunga cya Nyiragongo…twaje mu Rwanda kuko hari umutekano, u Rwanda rwita ku baturage barwo.'

Amakuru aturuka mu Karere ka Rubavu ahamya ko imitingito yari imaze iminsi iyogoza ako Karere yari yagabanutse cyane kuri uyu munsi, n'ubwo humvikanye imitingito micye.

Iyi nkambi iri kubakwamo ubwiherero buzakoreshwa n’impunzi

Bamwe mu mpunzi bazanye imodoka zabo baziparika hanze y’inkambi

Inzego z’umutekano ziri gukurikirana imibereho y’impunzi zinjiye mu Rwanda

Inzego z’ubuzima ziri gupima izi mpunzi icyorezo cya Covid-19

Imodoka za Polisi nizo zari zitwaye izi mpunzi zizijyana aho zateganyirijwe

Urubyiruko rw’abakorerabushake ruri gufasha impunzi ziturutse muri Congo

Abapolisi b’u Rwanda bari gufasha impunzi kugera mu nkambi

Impunzi zicaye zitegereje ko zibarurwa

Imodoka iyobora impunzi iri kuzirangira aho ziri mu Mujyi wa Rubavu

Impunzi zirimo kubarirwa nyuma yo kugezwa mu nkambi bateguriwe