Category: Uncategorized

Rick Warren yatangiye gushakisha umushumba mushya kugirango ayobore megachurch ya California.

Umwanditsi w’igitabo “Ubuzima bufite intego” cyahinduye benshi, mu nyigisho aheruka gutanga yavuze ko arimo gushaka umushumba “uzaza mu gisekuru kizakurikiraho nyuma ye” uzamusimbura, kuko umugambi we wari uwo kuzana impinduka no mu gihe cyizaza.

Warren, ufite imyaka 67, itorero ryavuye mu miryango mike yitabiraga amashuri ya Bibiliya mu 1980. Nk’uko Lifeway Research ibigaragaza, umwaka ushize abitabira iryo torero bari hejuru ya 23.000.

Mu mpera z’icyumweru gishize, Warren yamenyesheje itorero gahunda ye yogushaka undi muntu uzayobora iryo torero mu gihe kizaza. Ati: “Muri iki cyumweru gitaha, tugiye gutangira gushakisha ku mugaragaro uzansimbura. Ibyo ni ibintu bikomeye, gushakisha ku mugaragaro uzansimbura.”

Ariko yasezeranije abari aho agira ati: “Ntabwo ari iherezo. Ntanubwo ari n’intangiriro y’iherezo. Ni intangiriro y’intangiriro, ariko tugiye gutangira gushaka umushumba w’igihe kizaza uzansimbura akayobora umuryango wacu. ejo hazaza. “

Yavuze ko we n’umugore we Kay “bari bazi ko uyu munsi uzagera” kandi ko bari “bategereje igihe cyiza cy’Imana” kugira ngo batangire inzira yo gushaka umushumba uza kuyobora Saddleback.

Asobanura uburyo yaje gufata icyemezo cyo gutangira gushakisha umusimbura, Warren yavuze ko we na Kay biyemeje imyaka myinshi ishize yo kuyobora iryo torero mu myaka 40. Igihe itorero ryizihizaga iyo ntambwe muri Mutarama 2020, bombi barasenze bumva ko Imana ibasaba kugumaho igihe gito.

Mu gihe Amerika yatangiye guhangana n’icyorezo cya Covid19, yavuze ko bombi bumvise Imana ivuga ko “iki atari cyo gihe” cyo kureka undi muntu akayobora itorero(umusimbura).

Intego ye ni ugukora “inzibacyuho yoroheje, akagira uruhare nk’umushumba yego washinze itorero, ariko uro ruhare nturugaragare cyane.” Ati: “Ubu, iki ni icyemezo gikomeye kuko ari njye mushumba wenyine uyobora umuryango w’itorero ryacu.” Yongeyeho ko gushakisha umusimbura ari igikorwa cyo kwizera.

Ati: “Ntiwatera intambwe y’inyuma ujya mbere, ugomba gutera intambwe y’imbere ariyo yo kwizera.”

Source: Christian Today

[email protected]

Hakizimana Patric utuye mu Karere ka Kicukiro, umurenge wa Gahanga yakomerekejwe ndetse abuzwa amahoro n’icyaha yakoze ubwo yagiraga uruhare muri Jenocide yakorewe Abatutsi mu 1994. Byamuteye gufata icyemezo cyo gusaba Imana imbabazi ndetse amaze gukizwa yegera abo yahemukiye abasaba imbabazi barazimuha. Nubwo byamugoye kuzakira kuko yiyumvaga nabi, yageze aho yakira amahoro yo mu mutima ndetse afasha abandi mu rugendo rw’ubumwe n’ubwiyunge.

Burya gusaba imbabazi ni kimwe no kuzakira n’ikindi, ni muri urwo rwego Patric agiye gusobanura inzira ikomeye yanyuzemo mugihe yemezwaga n’Umwuka Wera iby’ibyaha bye akumva bimubujije amahoro:

Ati: 'Ndi umwe mu bagize uruhare muri Jenoside yakorewe Abatutsi mu 1994. Hari ku itariki 10 Mata 1994 ni bwo bwa mbere nari mbonye abantu benshi b’ingeri zose bapfuye kandi mbigizemo uruhare, numvise bimbujuje amahoro kuburyo ntashoboye kumva icyo nari cyo muri uwo mwanya. Nahamagaye umuntu umwe twagendanaga wajyaga ukunda kutwigisha Ijambo ry’Imana yari umusirikare mugenzi wanye ndamubaza ngo ibi bintu Imana irabyemera, yaransubije ngo Imana irabyemera.

Nyuma yo kwica abantu numvise mbuze amahoro yo mu mutima niyemeza guhungira muri Congo naho ngezeyo kuko nari umusirikare abatuyoboraga bakomeje gutegura gahunda yo gutera mu Rwanda ni bwo nabajije uwatuyoboraga nti:

'Muribuka ibyo twakoze mu Rwanda none murashaka ko twongera kujya kubabauza umutekano? Nabimubwiraga ngira ngo nibura agaruke mu murongo tugire ibyo duhindura'. Kuva ubwo bahise bandakarira bavuga ko ndi icyitso ndetse bapanga uko bazanyica.

Nahise mfata ingamba zo kugaruka mu gihugu kandi ni igihugu nakozemo Jenoside kandi namaze kumenya ko hari abarokotse. Nasabaga Imana ngo imfashe ngaruke mu gihugu mbasabe imbabazi wenda bahite banyica ariko nazisabye. Naraje rero ngera mu rugo aho mvuka kandi nagiye mu gisirikare kubawira ko naje barambwira bati 'icyaha wakoze ugomba kugihanirwa'. Narabyemeye ndafungwa.

Nkigera muri gereza nari naraciye bugufi cyane ku buryo umuntu wese wacitse ku icumu yangeraga imbere ngahita mubwira nti 'Rwose umbabarire'. Iyo ntaza kugira amahirwe yo kumenya Yesu biba byarangizeho ingaruka yo guhahamuka. Naricaye nibaza inzira byacamo kugira ngo mbone amahoro yo mu mutima, nari mfite umuryango n’incuti bansura ariko sinabashaga kurya maze ndagenda ndananuka kubera kwibaza ku kintu cy’imbabazi mbabajwe n’icyaha nakoze.

Igihe kimwe nari ndyamye mbona izuba ririmo kwaka, mbona rimpamagaye mu izina rirambwira ngo uyu munsi ugomba kwihana, njyewe ndi Yesu umwana w’Imana nazanywe mu isi no kubabarira abantu ibyaha ariko babanje kwihana, ariko ngiye kumubaza arigendera nsigarana agahinda nibaza ibyo ari byo'.

Patric akiri mu gihirahiro yahise abona igisubizo cy’Imana haza abantu muri gereza bamubwira ko Imana ibamutumyeho aratura, baramusengera ndetse yakira Yesu nk’Umwami n’Umukiza w’ubugingo bwe nk’uko abisobanura.

Ati: 'Hahise haza gufungwa abantu bo mu bibare (Louis na Benjamin) bashinjwaga ko basenga ariko gusenga kwabo bakaba batakwemera ko bashobora kuba bari mu cyiciro cy’abacengezi. Ngo barimo basenga Imana ibabwira ko hari intama iri mu gihuru yabuze uyiha ubwatsi, ibabwira ko ari bo ihaye kuzajya guha iyo ntama ubwatsi. Barabajije bati 'Umuntu wakijijwe muri mwebwe ni nde?' Barimo basenga baraje bati 'Ni wowe Imana yadutumyeho'. Baranyigishije, bambwira gusaba imbabazi bamwira ko ari iminsi ine Imana yabahaye yo kunyigisha kandi koko irangiye baratashye.

Bakimara kuva aho bahise bajya kumfungira muri gereza ya gisirikare ntangira kujya mu byumba by’amasengesho, nafashe amasengesho y’iminsi 3 ngasenga nti: 'Mana ubwo umwenda watabutsemo 2 ndaje ubanze umpe imbabazi nurangiza umpe umurongo wo kuzisaba kandi umpe n’ikimenyetso cy’uko umbabariye. Ndimo nsenga ku munsi wa 3 numvise ahantu haratigise cyane bikomeye numva umuriro mwinshi ushyushye uciye m u mubiri wanjye numva hari ibintu byinshi bihiye muri njye.Byamazemo nk’iminota ibiri, ariko ngaruye ubwenge mbona ndacyafunze.

Bigeze nijoro yarambwiye ngo reka inyereke ko yambabariye, yanyambitse amababa inshyira hejuru y’ibiri ku isi byose igenda ibinyereka imbwira ko imbabariye, ariko ko nanjye ngomba gusaba imbabazi. Abashinzwe iby’inkiko bavugaga ko iyo umusirikare atsinzwe ari ukumwica. Nahise negera umuyobozi nti 'N’ubwo muzatwica, wamfashije nkagera ku musozi w’iwacu ngasaba imbabazi? Ubwo burenganzira bwari butaraza ariko musaba kumfasha nkandika inzandiko zisaba imbabazi abo nahemukiye.

Igihe cyarageze inzandiko zigerayo inteko ziraterana barazisoma bamwe batangira kuza kunsura bambaza niba koko narabikoze mbikuye ku mutima. Narababwiye nti: 'Yego kandi binshobokeye najya mu nteko y’abaturage b’i Gahanga ngasaba imbabazi'. Kubera ko intego nari mfite ari ukubona ubugingo no kubohora imitima y’abantu bakibaza bati ' Kuki abantu batwiciye abandi?'.

Naragiye ku musozi ntanga ubuhamya bw’ibyo nakoze ndangije mbasaba ko nazagaruka bahamagaye abantu bose nahemukiye nkabasaba imbabazi mu ruhame. Barabinyemereye mbasaba imbabazi barazimpa mbese Imana n’abantu bari bamaze kumbabarira. Igihe cyarageze njya kuburana muri gacaca banakatira imyaka 10 ariko basanga narayirangije nuko bankorera ibyangombwa ndataha ngeze mu rugo nsaba abacise ku icumu nabonaga banyiyumvamo ko bamfasha bakampuza na bagenzi babo kugira ngo numve ko imbabazi nazihawe kuko nk’uko Jenoside idasaza ni nako gusaba imbabazi na byo bidasaza.

Hamwe no kgenda mbegera bampa imbabazi, bansura, bansuhuza numvise ngarutse mu buzima bwiza. Hari n’undi muryango witwa GR wadusuye udukorera isanamitima, uradusura ndetse uratuganiriza numva ndabohotse'.

Kugira ngo yemere ko yahawe imababazi, Patric yateguye ibirori atumiramo abantu batandukanye bimubera igihamya ati 'Natumiye umuyobozi GR, abacitse icumu, abaturanyi, inshuti n’abanyetorero mu birori by’isabukuru' Nabwiye umuyobozi nti 'Kuko ndi umugeni sindibufate ijambo, ariko wowe ubimvugire ko nakoze Jenoside n’abatari babizi babimenye bambabarire. Byarakozwe bigenda neza cyane kandi nyuma numvise nakiriye imbabazi ndetse ndabyibuha'.

Asoza ubuhamya bwe arishimira imbabazi yahawe n’abantu ndetse n’Imana, si ibyo gusa ahubwo yishimira intabwe amaze gutera mu gikorwa cy’ubumwe n’ubwiyunge. Aboneraho kandi gukangurira n’abandi bafite umutima ubacira urubanza kwegurira Yesu ubuzima bwabo akaba ari we ubugenga ndetse bagasaba imbabazi z’ibyaha bakoze.

Source: Agakiza tv

[email protected]

Suhukira muri iki gihugu, nanjye nzabana nawe, nguhe umugisha kuko wowe n’urubyaro rwawe nzabaha ibi bihugu byose, kandi nzakomeza indahiro narahiye Aburahamu so. Itangiriro 26: 3

Ntabwo nzi ibyo urimo kunyuramo uyu munsi, ariko ukwiye kwita ku mugenga wa byose aho guhangayikishwa n’ibyo ubona. Mperutse kwigira kuri Mose, ahari urugamba yarwanye rushobora guhura n’ibyo urimo uyu munsi.

Mose igihe yari aragiye umukumbi wa sebukwe, yabonye igihuru cyaka umuriro aterwa ubwoba n’uko icyo gihuru gifashwe n’ibirimi by’umuriro kigashya kigakongoka. Igihe Mose yegeraga icyo gihuru ngo amenye ibyo ari byo, niho Imana yavuganiye nawe, Imana imusaba ko ari we ugiye guhangara Farawo ukamubwira ibyo Imana yifuzaga ko amenyeshwa. Kwari ukurekura ubwoko bw’Imana bukava mu buretwa bakorehwaga muri Egiputa.

Mose yabwiye Imana ko adashobora guhinguka mu maso ya Farawo, ako kanya Imana iramubwira ngo ' Nzabana nawe'

Mose yari azi neza ibyo yasize akoze muri Egiputa kandi yari asobanukiwe ko nawe ari umucakara nk’abene wabo nubwo yabanje kuba umwana w’ibwami kwa Farawo. Igihe kimwe yabonye umunyegiputa ari kurwanya mwene wabo biramurakaza cyane niko guhita yica uwo munyegiputa. Igira ubwoba ndetse agerageza guhisha uwo murambo ariko biranga biba iby’ubusa kuko byari byamaze kumenekana hose ko ariwe wishe umunyegiputa. Mu buhungiro rero aho yari ari ubwo yari aragiye umukumbi niho Imana yamubwiye ayo magambo “Nzabana nawe” ubwo yegeraga igihuru cyaka.

Mose we yabwiraga Imana ko atatinyuka kujya mu maso ya farawo, kandi ko atazi no kuvuga ko ibintu byose atabishobora ntacyo ari cyo ariko Imana yakomeje kumubwira ko izabana nawe. Twese tuzi uko byagenze, Mose yabaye umuntu w’intwari wakuye abisiraheri mu buretwa bakoreshwaga muri Egiputa.

Ibi ni nk’uko nawe uyu munsi wibaza ku makosa no gucika intege kwawe, ukiciraho iteka ariko uyu munsi menya ko Imana iri kumwe nawe. Nkuko yirengagije intege nke n’amakosa ya Mose ikamukoresha ibikomeye, niko nawe yiteguye kukugirira neza niwemera guca bugufi ukemera imbabazi zayo.

Iyi ni inyigisho yateguwe na Becky Murray, umuyobozi washinze umuryango w’ivugabutumwa One by One Missions.

Source: One by One Missions Tv

[email protected]

Komisiyo y’amatora ya FERWAFA yemeje ko abakandida babiri batanze kandidatire biyamamariza kuyobora FERWAFA mu matora azaba tariki ya 27 Kamena 2021 ari bo Rurangirwa Louis na Mugabo Nizeyimana Olivier bujuje ibisabzwa bemerewe utangira kwiyamamaza.

Rurangirwa Louis yatanze kandidatire ye tariki ya 1 Kamena(ni wo wari umunsi wa mbere wo kuzitanga), Nizeyimana Olivier ayitanga tariki ya 4 Kamena(ni wo wari umunsi wa nyuma wo kuzitanga).

Komisiyo y’amatoro ya FERWAFA, iyobowe na perezida wayo Bwana Adolphe Kalisa yateranye kuri uyu wa Kabiri tariki 7 Kamena 2021 no kuri uyu Gatatu tariki 8 Kamena 2021 mu rwego rwo gusesengura no gusuzuma ko kandidatire zatanzwe na Bwana RURANGIRWA Louis ndetse na Bwana MUGABO NIZEYIMANA Olivier biyamamariza umwanya wa perezida wa FERWAFA mu matora y’abagize Komite Nyobozi ya FERWAFA ateganyijwe tariki 27/06/2021 zujuje ibisabwa.

Nyuma yo gusuzuma ko abari ku rutonde rw’abakandida bombi bujuje ibisabwa n’amategeko nk’uko biteganywa n’ingingo ya 4 y’Amabwiriza agenga amatora Komisiyo yasanze abakandida bombi aribo Bwana Rurangirwa Louis na Bwana Mugabo Nizeyimana Olivier bujuje ibisabwa bakaba bemerewe kwiyamamaza nk’uko biteganywa n’amategeko agenga amatora.

Abakandida bombi bakaba bamaze kumenyeshwa ibyemezo bya Komisiyo y’Amatora. kwiyamamaza biteganyijwe hagati y’itariki 19/06/2021 na tariki 26/06/2021 nk’uko byagenwe mu ngengabihe y’ibikorwa by’Amatora yashyizwe ahagaragara na Komisiyo y’Amatora.

Amatora y’abagize Komite Nyobozi ya FERWAFA ateganyijwe tariki ya 27/06/2021 mu nama y’Inteko Rusange idasanzwe izabera kuri Lemigo Hotel.

Rurangirwa Louis uretse kuba ari perezida wa Rugende WFC, ni umugabo uzwi mu mupira w’amaguru mu Rwanda aho yabaye umusifuzi mpuzamahanga ndetse akanayobora ishyirahamwe ry’abasifuzi mu Rwanda (RAF).

Yari yatanze kandidatire muri 2018 aza gutsindwa na Rtd Brig Gen Sekamana Jean Damascene ku majwi 45 kuri 7.

Mu bantu 10 yatanze na we arimo basanze abujuje ibisabwa ari 8 gusa aho nka komiseri ushinzwe amarushanwa na komiseri ushinzwe amategeko(Me. Mukashyaka Joséphine) basanze batujuje ibisabwa.

Amategeko avuga ko iyo 2/3 bujuje ibisabwa umukandida aba yemerewe gukomeza akazabuzuza nyuma.

Nizeyimana Olivier akaba yari amaze imyaka 10 ari umuyobozi w’ikipe ya Mukura VS kuko yatorewe kuyobora iyi kipe ku nshuro ya mbere muri 2011.

Muri iyi myaka yose intsinzi ikomeye yagezeyo ni muri 2018 ubwo iyi kipe yegukanaga igikombe cy’Amahoro.

Nizeyimana Olivier kandi akaba ari umuyobozi wa kompanyi itwara abagenzi ya Volcano Ltd akaba ahagarariye kompanyi ikora amamodoka ya Hyundai mu Rwanda.

Ni umunyamuryango ukomeye w’ikipe ya FC Barcelona aho ajya anitabira inama z’iyi kipe. Uyu mugabo nk’uko twabigarutseho mu nkuru zacu ziheruka, ni we uhabwa amahirwe yo kuyobora FERWAFA.

Nizeyimana Olivier we abantu bose yatanze yasanze yujuje ibisabwa.

Urutonde rw’abujuje ibisabwa batanzwe n’umukandida Rurangirwa Louis:

Mr. Rurangirwa Louis — Perezida
Ms. Kayisime Nzaramba — Visi Perezida
Mr. Ndayambaje Pascal — Komiseri ushinzwe umutungo
Rtd SSP Higiro Willy Marcel — Komiseri ushinzwe umutekano
Dr. Mpatswenumugabo Jean Bosco — Komiseri ushinzwe ubuvuzi
Mr. Nkurunziza Benoit — Komiseri ushinzwe iyamamazabikorwa n’abaterankunga
Mr. Ndarama Mark — Komiseri ushinzwe iterambere ry’umupira w’amaguru
Ms. Mukasekuru Deborah — Komiseri ushinzwe umupira w’abagore

Urutonde rw’abujuje ibisabwa batanzwe n’umukandida Mugabo Nizeyimana Olivier:

Mugabo Nizeyimana Olivier – Perezida

Habyarimana Marcel Matiku- Visi Perezida: Asanzwe ari we visi perezida wa FERWAFA yagiyeho muri 2018 ubwo hatorwaga Rtd Brig Gen Sekamana Jean Damascene. Yanabaye visi perezida wa Espoir FC.

Habiyakare Chantal – Komiseri ushinzwe Umutungo.

Cyamwenshi Arthur – Komiseri ushinzwe Iyamamazabikorwa no gushaka Abaterankunga.

Gasana Richard- Komiseri ushinzwe Amarushanwa

IP Umutoni Chantal – Komiseri ushinzwe umutekano

Nkusi Edmond Marc- Komiseri ushinzwe Tekinike n’Iterambere rya ruhago

Tumutoneshe Diane- Komiseri Ushinzwe umupira w’abagore: Uyu ni umuyobozi wa Dream Team Academy yazamuye abakinnyi benshi ku Kicukiro, yamekanye ari umutoza wayo.

Uwanyirigira Delphine – Komiseri ushinzwe Amategeko

Lt. Col. Mutsinzi Hubert – Komiseri w’Ubuvuzi

Rurangirwa Louis yemerewe gukomeza akiyamamariza kuyobora FERWAFA

Nizeyimana Olivier abo yatanze bose bujuje ibisabwa

Abefeso 2:3- 6 ' 1 Namwe yarabazuye, mwebwe abari bapfuye muzize ibicumuro n’ibyaha byanyu, 2ibyo mwagenderagamo kera mukurikiza imigenzo y’iyi si, mugakurikiza umwami utegeka ikirere, ari we mwuka ukorera mu batumvira. 3Kandi natwe twese twahoze muri bo dukurikiza ibyo kamere yacu yifuza, tugakora ibyo kamere n’imitima byacu byishakira, kandi ku bwa kavukire yacu twari abo kugirirwa umujinya nk’abandi bose. 4Ariko Imana kuko ari umutunzi w’imbabazi, yaduhinduranye bazima na Kristo 5 ku bw’urukundo rwinshi yadukunze, ubwo twari dupfuye tuzize ibicumuro byacu (ubuntu ni bwo bwabakijije), 6 nuko ituzurana na we, itwicaranya na we mu ijuru mu buryo bw’Umwuka turi muri Kristo Yesu.

Mbese abibaza ngo ubuzima bushya ni iki? Ni amahirwe umuntu aba yongeye kubona abuboneye muri Kirisitu Yesu, akamuha ubugingo bushya. Mu buzima busanzwe iyo haje ikintu gishya gisimbura icyari gihari biba bivuze ko icyari gihari kitari gifite akamaro, gishaje cyangwa kikirusha ubwiza.

Ni iyihe mpamvu haje ubundi buzima bushya? Bivuze ko ubwo buzima bwa mbere abantu barimo kujyenderamo bwari bupfuye. Iyo usomye uhereye mu gitabo cy’Itangiriro ubona urugendo rurerure rwagiye rukorwa kugira ngo umwana w’umuntu acungurwe. Kuko Imana ikimara gushyira Adamu na Eva muri Edeni Satani yararebye abona ko ikintu gishobora gutandukanya Imana n’umuntu burundu ari icyaha. Kuko Ijambo ry’Imana rivuga neza ko ibihembo by’ibiyaha ari urupfu. Yumvaga atandukanije umuntu n’Imana burundu nubwo yari igiye kubigeraho ariko si byo nanone.

Ingaruka z’icyaha zageze ku muntu. Kuko Bibiliya ivuga ko batari bambaye bisobanuye ko bari bambaye ubwiza bw’Imana. Nyuma yo gukora icyaha, ubwiza bw’Imana bwarabahunze. Ikintu icyaha kigukorera ni ukukwambura ubwiza bw’Imana.

Icya kabiri, umwana w’umuntu yirukanywe mu ngobyi ya Edeni, ikigaragara ni uko Satani yari atangiye kugera ku mugambi we. Nuko Imana imwirukana mu cyanya (presence) cyayo ikirindisha abakerubi bafite inkota kugira ngo atazarya ku giti cy’ubugingo kuko yari yamaze gususugura Imana. Icya gatatu yatakaje ubwenge. Ubwo bwenge Yobu arabuvuga ko ari ukubaha Uwiteka, aribwo bwenge kandi kuva mu byaha ariko ku jijuka.

Icya kane yatakaje ubutware. Kuko Imana imurema yamuremanye ubutware ngo atware ikintu cyose none ubu ibyinshi biramutwara, ni yo mpamvu muri iyi minsi uhura n’umuntu akakubwira ati gusambana byarananiye kubireka, ni ukubera ko umuntu aba yaratakaje ubutware. Ariko uko byagenda kose utakiri kumwe n’Imana ntabwo wazigera ubitegeka.

Satani atangiye kunezerwa ko atandukanije umuntu n’Imana nibwo urukundo rwayo rwahise rugaragara. Kuko Imana ibonye ko umuntu agiye kuzimira burundu yerekanye ko ishaka kumugarura mu cyanya cyayo. Kuko mu itangiriro Imana yica inyamaswa ikambika Adamu na Eva bisobanuye uwari kuzaza kuducungura ariwe Kirisitu kugira ngo atange ubugingo bwe acungure umuntu. Ibyo bitungura Satani. Aya ni yo mahirwe ya kabiri yabonetse, ari yo abantu bafata uko bishakiye ariko ni yo azashyirisha abantu mu rubanza.

Imigani 8:29-30 'Kristo agaragaza neza ko ibinezaneza by’Imana ari ukugira ngo izabane n’umuntu' aribyo Satani yarwanyaga. Hari ibintu byinshi cyane Imana yagiye ikora kuko umuntu yakomeje kuba mubi, bigera n’aho yagambiriye kumurimbura ikamuvanaho, ari bwo yabonaga Nowa nk’umukiranutsi, imutegeka kubaza inkuge ari yo bagombaga guhungiramo, nayo yashushanyaga ubuhungiro bwa nyabwo umuntu ashobora guhungiramo akaga kose gatewe na Satani, aribwo Kirisitu Yesu. Ariko muri iyi minsi ntabwo abantu bari kubwira abantu kwinjira mu buhungiro, buzima, ahubwo barabwira guhunga ubukene nibindi ariko ubuhungiro bwa nyabwo ni Kirisitu. Uku ni ko byagenze ku bwa Nowa kugeza ubwo umwuzure wabatunguye bakarimbuka.

Tugeze mu mwaka abantu bari kwishimiramo ariko umuntu wese yari akwiriye kwicara agafata umwanzuro wo gukurikira Kirisitu neza, adakebakeba , cyangwa ufite intege nke agasanga abatambyi bakamufasha, kuko ni umwaka Imana itwongereye kugira ngo dukosore ibyo mu ngeso zacu zidatunganye.

Iri ni irengayobora ikintu Imana yakoze (kohereza Kirisitu). None rero nubwo ukora ibyaha Imana ikakwihorera, ntukagire ngo ntabwo Imana ikubona. Kuko kubura ubwenge kw’abantu amakosa yabo agenda yiyongeranya imbere yayo. Nubwo abantu benshi bakemeranya bakeza umurimo mubi ntabwo bivuze ko Imana yatubona nk’abakiranutsi, kuko ntabwo iba yabuze uko igenza. Kubw’urukundo rwayo ntiyahwemye gushaka uko icungura umuntu. Niryo isezerano rishya ariryo twahawe kubera Yesu. Kuko yari imaze kubona ko ibitambo ntacyo byatumariye. Yesu araza avukira mu mugore, avuka mu buryo bworoheye buri muntu wese kugirango amwisangemo, ntakindi kiraro, cyabasha gusiba umworera uri hagati y’umuntu n’Imana usibye amaraso ya Kirisitu.

1korinto 15: 22 'nkuko bose bazaniwe gupfa na Adamu ninako bazaniwe kubaho na Kristo'. Uku ari ko kuva mu gisekuru cya Adamu tukimukira mu gisekuru gishya cya Kristo . Hari ibintu bidashoboka, gushakira imirimo y’uwazutse ku muntu utarigeze apfa. Ibi bireze mu matorero menshi aho abantu bari kwihangisha gukora imirimo y’abantu bazutse kandi kamere zabo zikiri nzima. Ntibishoboka nimba kamere yawe itarapfuye ngo ihambwe uzukire mu gisekuru cya Kirisitu.

Pawulo yaranditse aravuga ngo abayoborwa n’Umwuka ni bo bana b’Imana. Rero ntiwakora imirimo y’Umwuka kandi kamere yawe itarigeze ipfa. Impamvu ubona biri kugenda bikugora ni uko kamere yawe itari yapfa. Kubera hari kamere abantu bagiye bagundira mu mitima yabo, bituma bagenda bahanga utundi dushya tudahishuwe n’Umwuka w’Imana ahubwo ari utuzanwa n’abadayimoni. Ni imikorere ya Satani.

Umva ikikintu, ntabwo umwana w’umuntu ari we kitegererezo cyo gukizwa. Nubwo ufite ibyo wamureberaho, ntabwo ariwe kitegererezo, cyo kugenderwaho. Ikitegererezo ni Kirisitu wenyine. Kuko abantu muri iyi minsi barimo bagenda bagushwa n’abantu basanze bakuze mu ma dini. Ariko Pawulo arandika aravuga ati 'Natwe yaratuzuye idukuye mu mirimo yacu mibi ariko Imana kuko ari umutunzi w’imbabazi iduhindurana bazima na Kirisitu' uwatuzuye niwe kitegererezo.

Ikibereye cyiza umuntu ni uko ahinduka, gakora umurimo w’Imana akiranuka, nubwo kuwukora atari igisobanuro cyo kugwiza ibyo ushaka byose, ahubwo icy’ingenzi ni ubugingo. Ngwino ugurane na Kirisitu, utange kamere yawe igiye ku kurimbuza, nawe aguhe ubugingo buhoraho.

Pawulo ati 'Ariko ntimwishushanye n’abiki gihe ahubwo muhinduke rwose mugize imitima mishya'. Kuko hari igihe umuntu ahinduka ariko ntahinduke rwose. Hanyuma imbaraga zagukuye hahandi kure ni nazo zakubashisha kunesha burundu. Kuko muri Kirisitu Yesu harimo imbaraga zibashisha kunesha byose, kuko impamvu wumva bidashoboka ni uko ukiri hanze. Kuko ibitambo byinshi by’indirimbo n’amashimwe avanze no gukiranirwa, ntabwo bishobora kunezeza Imana, gukora imirimo myinshi itegetswe n’abapasitoro udafite gukiranuka muri wowe nta gisobanuro bifite imbere y’Imana.

Birasanaho abantu bari kwishyiriraho isezerano rya gatatu ryo kwicungura nk’aho amaraso ya Yesu nta cyo yabamariye. Aho abantu bari kwihimbira gukiranuka ko mu butunzi bwinshi, cyangwa ibintu abantu batanga mu nzu y’Imana bigatuma bakora amafuti nta muntu wabakoma, abandi bakitwaza imyanya y’ubuyobozi. Ariko ntabwo ibyo byose abantu bishingikirijeho byatuma bakizwa. Uyu ni umurimo w’Imana ntihakagire uwikomanga mu gatuza ngo avuge ngo nijyebishingiyeho.

Ongera wigenzure kugira ngo urebe ko wahindutse, kugira ngo n’iby’Imana yakubwiye bizabashe kugusohoreraho. Ahari uyu mwanya ni ukugira ngo wisubiremo n’imigisha Imana yakugeneye izabashe ku kugeraho. Hinduka ube mu buzima bushya ubwo Kristo yaguteguriye.

Umwigisha: Jean Claude DUKUZUMUREMYI

Source: https://cepurhuye.org/

Wakwibaza uti 'Ese ni ukubera iki tuvuga gucana inyuma?'. Ni ukubera ko umusore umaze gukura iyo yatangiye guca inyuma umugore we bihinduka ukundi akitwa andi mazina bigatuma abagabo beza ku bagore babo nabo bahinduka nabi, mbese akabicira isura.

Ahari wakuze ubibona cyane, ukura ubona bamwe bahirika ingo zabo kubera gucana inyuma. Wowe uri gusoma iyi nkuru wasanga uhise utekereza urugero rufatika rw'urugo rwahirimye kubera umugabo cyangwa umugore wacaga inyuma uwo bashakanye, sibyo se? Igisubizo ni wowe wagitanga.

Ahari hari umugabo ubona babeshyera ko aca umugore inyuma, iyi nkuru numara kuyisoma neza ni wowe urafata uruhande umushyiramo kuko igaragaza ko umugabo wa nyawe akatajya aca inyuma umugore we.

1.      Umugabo wa nyawe abazi uko yubaha umugore

Kubaha ni igice cy'imbere mu mibanire y'abantu babiri. Kubaha bituma umubano ubaho nk'ikintu gikuru cy’ingenzi ndetse kubaha bituma umubabo w'abantu babiri (Umugore n'umugabo) uramba, bakamarana igihe. Kubaha ni cyo kintu gishyira urukundo rwabo ku yindi ntera, bikabafasha gukura muri byose.

Kubaha bituma umugabo wanyawe, amenya urwego umugore ariho bigatuma amwubaha cyane kandi neza, bituma amenya ingano y'urukundo akwiriye kumuha. Umugabo w'ukuri yubaha umugore cyane kuko abazi ko ari cyo kintu cyiza agomba kumuha, ibi ni byo bigaragaza ko atamuca inyuma na rimwe. Ntabwo yamwubahuka ntibibaho.

2.      Umugabo wa nyawe ntahubuka

Umugabo w'ukuri ajya mu mubano yamaze kubona ko ari umubano uhamye ndetse ushyitse ku buryo atapfa gukundana n'umuntu abona ko adashobotse kugeza babanye. Uyu mugabo aba ashaka umugore uzamufata ikiganza mu buzima bwose, ubwiza cyangwa ububi.

Umugore uzamufasha mu bihe byiza n'ibibi. Guhubuka ni iby'abasore nabo badashobotse bashakana n’abakunzi babo b’abakobwa ejo bagatandukana. Umugabo w'ukuri urukundo rwe arugira ruzima ndetse umubano we n'uwo akunda awuha agaciro cyane (Very Serious).

3.      Umugabo w'ukuri ntaba ashaka kubaho mu kinyoma

Iyo umuntu aguca inyuma aba yumva yakubeshya cyane, mbese aba yumva yahora akubeshya, uyu muntu aba atunzwe n'ikinyoma. Umugabo uca inyuma uwo bashakanye ahora ari gushaka uburyo arashushanya ikinyoma mu gihe yaba yenda gufatwa. Umugabo w'ukuri rero ntaba yifuza kubaho mu buzima bw'ikinyoma na rimwe. Avugisha ukuri naho bitari ngombwa. Uyu mugabo nimuba mutarabana azakubwira ubuzima bwe bwose kugira ngo ubone ishusho y'uwo ari we.

4.      Umugabo w'ukuri amenya kwiyobora

Umugabo w'ukuri aba afite imbaraga zihagije ku buryo amenya kuyobora ubuzima bwe we ubwe. Kuba yashobora kuba umugabo w'umugore umwe (One-woman-man) ni ikintu aharanira kandi akanakigeraho. Uyu mugabo nta n’ubwo aba yumva yagendana n'abandi cyane kuko aba afite uwo akunda kandi ari wo yumva ko batemberana.

5.      Umugabo w'ukuri ntatekereza icyababaza uwo bashakanye

Nk'uko twabivuze mu ntangiriro, umugabo w'ukuri yubaha uwo bashakanye. Ntabwo atekereza icyababaza uwo bashakanye. Iyo uciye inyuma uwo mubana mugatana bibabaza uwo mwabanaga ukamubera isomo mubuzima.

6.      Kubana n'abagore babiri biba ari nk'igihano ku mugabo w'ukuri

7.      Umugabo w'ukuri aba yifitemo imbaraga zo kuba yatandukana n'uwo bashakanye.

Impamvu nyamukuru ituma abantu bacana inyuma ni uko baba batishimanye n'abo bashakanye maze bagahitamo kujya kwirebera abandi bantu. Mu rundi ruhande baba batinya gutandukana n'ubwo ibintu biba bitameze neza. Uyu mugabo we rero yizera ko icyiza ari ugutandukana n'umuntu kuruta kumuca inyuma cyangwa kumubeshya. Nibwo buryo bwiza bwo kwerekana icyubahiro n'agaciro kabo.

8.      Umugabo w'ukuri aba azi ikintu cy'ukuri mu buzima kandi cy'agaciro k’uwo akunda

Amarangamutima, ibyiyumviro, urukundo, ibitazibagirana,.. Hari ibintu byinshi mu buzima bikwiye kuba iby'ingenzi cyane kurenza ibindi, ibi rero ni byo uwo mugabo yubaha kandi akabiha agaciro.Uyu mugabo ntazigera aguca inyuma.

ISOMO: Ese aha hanze turacyafite abagabo b'ukuri, abagabo beza cyane ku bo bashakanye? Ese twavuga ko ari nk'abagabo bangahe b'ukuri basomye iyi nkuru? Ese niba uri umugore wasomye iyi nkuru wemeranya natwe? Ni ngombwa ko mu buzima duharanira kubana neza n'abo twashakanye hatabayemo kwikunda. Urukundo ruharanira kubana niba wubaha mugenzi wawe nzi neza ko utazemera ikintu na kimwe cyo kumubabaza. Ngaho rero mukunde nk'uko nawe agukunda.