Category: Uncategorized

Babitangarije mu gikorwa cyo kwibuka ku nshuro ya 31 Jenoside yakorewe Abatutsi, hibukwa imiryango 1144 yazimye mu Karere ka Rutsiro.

Mukura ni umurenge ugizwe n'ibyari amasegiteri ane ari yo Mwendo, Gihara, Kigeyo na Mukura. Ni wo murenge ufite imiryango myinshi yazimye kuko wihariye 30% by'imiryango yose yazimye mu mirenge 13 igize Akarere ka Rutsiro.

Mukamakuza Léonille wari ufite imyaka 20 mu bihe bya Jenoside wanatanze ubuhamya yavuze ko uyu murenge kuwurokeramo byari bigoye kubera ko umuntu atabonaga aho yishiga. Avuga ko Abatutsi bo muri uyu mu murenge babashije kurokoka ari abari baragiye mu Nkotanyi n'abawuhunze rugikubita.

Umusaza witwa Abiyingoma Ignace uvuka muri uyu murenge avuga ko impamvu ari wo ufite imiryango myinshi yazimye ari uko ukikijwe n'imisozi yari ituyemo Interahamwe nyinshi zari zaracengejwemo ingengabitekerezo ya Jenoside bikozwe n'amashyaka arimo MDR na APROSOMA.

Ati “Kuharokokera byari bigoye kuko ntiwashoboraga kubona aho uhungira. Wabaga ukikijwe n'abantu baguhiga wajya mu myobo wajya mu bigunda bakaguhigisha imbwa”.

Mutuyemungu Theodore warokowe n'uko yari yaragiye mu Nkotanyi ati 'Mu 1973 umwana mwigana mu mashuri abanza yarakubwiraga ngo imihoro twayityarishije umunyu, irabitse kandi igihe nikigera tuzabatema. Mwakina umupira ku ishuri akakubwira ati 'burya uri Umututsi'

Visi Perezida wa IBUKA mu Karere ka Rutsiro, Mukansoro Emelienne yagaye abatatiye igihango bakica abaturanyi babo abasaba kubwiza ukuri abana babo.

Ati “Abana nimubabwize ukuri, umwemerere ko wabaye ikigwari, agacaca kaguteze ntikazamutege. Mwiroga abana, nta mubyeyi wirogera.'

Umuyobozi Wungirije w'Akarere ka Rutsiro, Emmanuel Uwizeyimana yavuze ko kuzima kw'imiryango bigaragaza uburemere bwa Jenoside yakorewe Abatutsi, ashima Inkotanyi zayihagaritse.

Ati “Dufite inshingano yo kwibuka ibikorwa byabaranze, urukundo, ubupfura, umurava n'urugwiro bagiraga, tukabibuka muri byose”.

Mu Karere ka Rutsiro habarurwa 1144 yazimye harimo irenga 350 yari ituye mu Murenge wa Mukura.

Umurenge wa Mukura ni wo ufite imiryango byinshi yazimye mu Karere ka Rutsiro

Abayobozi batandukanye bitabiriye igikorwa cyo kwibuka imiryango yazimye mu Karere ka Rutsiro

Habayeho umwanya wo gusoma amazina y’abahagariye imiryango 350 yazimye mu Murenge wa Mukura

Mutuyemungu Theodore yagaragaje uburyo Jenoside yakoranwe ubukana mu Karere ka Rutsiro, avuga ko byatewe n’ingengabitekerezo ya Jenoside yari yaracengeye mu Nterahamwe kuva mu 1973

Abiyingoma Ignace yavuze ko Umurenge wa Mukura wari ugizwe n’imisozi ituweho n’Interahamwe ku buryo kubona aho wihisha byabaga bigoranye

Tariki 27 Kamena 1994, ubwo Ingabo z'Abafaransa zageraga mu Bisesero zasanze Abatutsi bo muri aka gace bamaze igihe birwanaho ndetse bafite imbunda 17 bari barambuye abasirikare, abajandarume n'aba-GP bazaga mu bitero byo kubica.

Gakoko Aaron warokokeye mu Bisesero niwe usigaye mu basaza batatu batozaga Abatutsi bo mu Bisesero uburyo bwo kwirwanaho.

Abasesengura intambara yo kwirwanaho Abatutsi bo mu Bisesero barwanye bavuga ko bateguraga urugamba mu buryo bwa gisirikare nubwo bakoreshaga ubumenyi gakondo kuko nta n'umwe muri bo wari warabaye umusirikare.

Abasesenguzi babishingira ku kuba Abatutsi bo mu Bisesero bari bafite Umugaba w'Ingabo, Birara Aminadab, akagira n'abamwungirije babiri barimo Nzigira Augustin na Gakoko Aaron, bakagira ibirindiro ku Musozi wa Muyira bateguriragaho ibitero, bakagira n'uburyo bw'imirwanire burimo kwiroha no kwivanga.

Gakoko Aaron wambuye imbunda eshatu abajandarume babiri n'umusirikare wari ufite ipeti rya Lieutenant Colonel akoresheje inkoni n'icumu yabwiye IGIHE ko kwirwanaho kw'Abatutsi bo mu Bisesero gukomoka ku kuba baratereranywe kuva mu 1959 bigakomeza no Leta ya Kayibanda n'iya Habyarimana.

Avuga ko ikindi cyatumye bamenya kurwana ari inkomati y'abashumba bashoraga inka ku iriba ari benshi bigasaba ko umushumba agomba kuba azi kurwana kugira ngo inka ze zishoke mbere.

Ubu butwari nibwo bwakoze ku mutima abagize Ihuriro ry'abafite amashuri yigisha amategeko y'umuhanda no gutwara ibinyabizima bituma mu nka 15 bari bateguye kugabira abarokotse Jenoside yakorewe Abatutsi batishoboye bo mu Karere ka Karongi bongeraho iy'ubutwari bayiha umusaza Gakoko.

Umuyobozi wa ANPAER, Habumugisha Jean Paul yagize ati “Twari twateguye gutanga inka 15, ariko nyuma yo kumva ubutwari bw'uyu musaza tumuhaye y'ubutwari mu rwego two kumushimira”.

Gakoko Aaron yashimiye iri shyirahamwe, avuga ko ariyo nka ya mbere ahawe y'ubutwari. Uyu musaza avuga ko nubwo banyuze mu bikomeye ubu babanye neza n'ababiciye bagafashanya mu mirimo itandukanye.

Ati 'Turababaye kuba badahari ngo barebe uko abarokokeye mu Bisesero twiyubatse'.

Umuyobozi wungirije w'Akarere ka Karongi, ushinzwe iterambere ry'ubukungu, Ntakirutimana Julienne yavuze ko uyu mwaka bateganya koroza imiryango 470 y'abatishoboye barokotse Jenoside yakorewe Abatutsi, ashimira abafatanyabikorwa bakomeje kubafasha muri iki gikorwa.

Gakoko Aaron akunze gutanga ubuhamya iyo hari abasuye urwibutso rwa Bisesero

Gakoko Aaron wambuye Interahamwe imbunda eshatu, yahawe inka y’ubutwari

Mu kiganiro n'abanyamakuru, Ambasaderi Weiss yavuze ko igitero cyagabwe na Israel muri Iran, cyatewe n'amakuru y'ubutasi igihugu cye cyakiriye, agaragaza umuvuduko ukabije Iran yari ifite mu rugendo rwo gukora intwaro kirimbuzi.

Yavuze ko Iran yari igeze ku rwego ibura gato cyane ngo ikore intwaro kirimbuzi, aho ku ikubitiro yari guhita itunga intwaro icyenda.

Ati 'Twabona ubutasi bugaragaza ko Iran yari irimo gusatira igihe cyo gukora intwaro kirimbuzi. Yari hafi kugera ku bubiko bwa 90% bya Iranium (bukenewe mu gukora intwaro kirimbuzi). Iran yari guteza ibibazo kuri Israel ikoresheje intwaro kirimbuzi…Iran yari gukora intwaro kirimbuzi zigera ku icyenda.'

Uyu mudipolomate yavuze ko mu mezi atatu ashize, ari bwo Iran yakajije ibikorwa byo gutunganya iranium yashoboraga gukoreshwa mu gukora intwaro kirimbuzi.

Ati 'Mu mezi atatu ashize, twabonye ibimenyetso by'uko bari barimo kongera umuvuduko mu gukora intwaro kirimbuzi, kandi ubwo bari mu biganiro na Leta Zunze Ubumwe za Amerika.'

Yakomeje avuga ko Israel itari kubona uwo muvuduko ngo ibyihanganire, ati 'Umuvuduko bagezeho [wo gukora intwaro kirimbuzi] mu mezi atatu ashize, urusha uwo bakoresheje mu myaka irenga 20 ishize.'

Ambasaderi Weiss yagarutse ku myitwarire y'Igisirikare cya Israel muri iyi ntambara, ati 'Dushyiraho imbaraga mu kurasa ibikorwa bya gisirikare, mu gihe ibikorwa bya Iran bishyira imbaraga mu kurasa ibikorwa bya gisivile. Mu gihe cyashize twabonye igisasu cyaguye mu gace gatuwe n'abaturage.'

Ku bijyanye n'imyitwarire ya Iran, Ambasaderi Wiess yanenze uburyo iki gihugu kiri kurasa mu baturage, ati 'Iyo Iran iri kurasa mu baturage, igira ingaruka kuko turi igihugu gito. Intego yabo ni ugusenya no kwica.'

Ambasaderi Weiss yongeye gushimangira ibiherutse kuvugwa na Minisitiri w'Intebe w'Igihugu cye, Benjamin Netanyahu, ko Israel idafitanye ikibazo n'abaturage ba Iran.

Ati 'Israel ntabwo iri kurasa Abanya-Iran, abaturage ba Iran ni inshuti za Israel.'

Yanagarutse ku buzima bugoye bw'Abanya-Israel mu bitero bya Iran, asobanura ko abantu bamaze amajoro atatu bataryama kubera guhunga ibitero bya Iran.

Adaciye ku ruhande, Ambasaderi Weiss yasobanuye ko Iran ifite intego yo kurimbura Israel ikoresheje intwaro kirimbuzi, asobanura ko nubwo Israel ari yo iri muri iyi ntambara, ariko iri kugirira neza Isi.

Ati 'Turi kugirira neza Isi, harimo n'ibihugu by'Abarabu. Iran iramutse ibonye intwaro kirimbuzi, byaba ari ikintu gihindura ibintu. Ntabwo ari Israel yagirwaho ingaruka gusa, n'ibindi bihugu byagirwaho ingaruka.'

Uyu muyobozi yagaragaje ko hari ibihugu byo mu Burasirazuba bwo Hagati bifitanye umubano mwiza na Israel, ashimangira ko bitifuza kubona Iran itunze intwaro kirimbuzi.

Ati 'Ibihugu by'Abarabu ntabwo byakwishimira kubona Iran ifite intwaro kirimbuzi. Ntabwo baza kubivugira mu ruhame ariko ntibabishaka.'

Ku bijyanye n'ubufasha Amerika yaha Israel muri iyi ntambara, Ambasaderi Weiss yirinze kubuhamya, ariko ati 'Tuzi ko Amerika ari umufatanyabikorwa mwiza wa Israel kandi tuzi ko Trump yavuze ko adashyigikiye ko Iran itunga intwaro kirimbuzi.'

Yongeyeho ko 'Intego nyamukuru y'ibi bikorwa ni ugukoraho ikibi gishobora gutera ibibazo kuri Israel.'

Ku ngingo y'ibiganiro, uyu muyobozi yavuze ko bigoye cyane kubera ubushake buke bwa Iran, ati 'Ushobora kugira ibiganiro, [ariko] twabigirana n'umuntu ushaka kugira ibiganiro, ntabwo wagirana ibiganiro n'umuntu ushaka kukwica.'

Yongeyeho ko intwaro kirimbuzi Iran yifuza gutunga, izishakira gusenya Israel, aho kwirinda, ati 'Kuki Iran ishaka kurimbura Israel? Kuki babona Israel nk'igihugu kibi? Icyo tuzi ko ni uko imwe mpamvu bari gukora intwaro kirimbuzi, ari uko bashaka gutera Israel, ntabwo ari uko bashaka kwirinda ibitero bituruka muri Israel.'

Umuhango wo gutaha iyi laboratwari iherereye ku Cyicaro Gikuru cya NAEB i Gikondo mu Mujyi wa Kigali, wabaye ku wa 16 Kamena 2025. Yuzuye itwaye miliyoni 3,4 z'Amayero (arenga miliyari 5,6 Frw).

Iyi laboratwari ifite umwihariko wo kugira ibikoresho bigezweho byifashishwa mu gusuzuma ko ibiribwa cyangwa ibinyobwa byoherezwa mu mahanga byujuje ubuziranenge busabwa ku isoko mpuzamahanga.

Ifite ubushobozi bwo kuzajya ipima ibintu birenze 200 harimo ubutaka, ibinyabutabire bihumanya ubuzima bw'abantu ndetse hanapimwe n'ibindi bitandukanye.

Minisitiri w'Ubuhinzi n'Ubworozi, Dr. Mark Cyubahiro, yagaragaje ko mu bikoresho biri muri iyi laboratwari harimo n'imashini ishobora gutahura hakiri kare udusimba dusangwa mu bihingwa.

Yakomeje avuga ko kugira ngo iyo miti iboneke bidashoboka ko wabibonesha amaso ahubwo bisaba imashini zabugenewe kandi zifitemo ikoranabuhanga rihambaye.

Ati 'Niba warateye umuti, kugira ngo wice udusimba twangiza bya bihingwa hagomba kuba nta bisigazwa by'imiti birimo birenze igipimo runaka.'

Minisitiri Dr. Cyubahiro yavuze ko iyo umuntu yohereje ibicuruzwa mu mahanga, byagerayo bagasanga bitujuje ubuziranenge akenshi bitwikwa.

Ati 'Iyo babitwitse, uretse kuba uwabyohoreje ahomba n'igihugu kirahomba ndetse n'izina ryacyo rikangirika.'

Umuyobozi Mukuru wa NAEB, Claude Bizimana, yavuze ko iyo laboratwari izajya inatanga na serivisi zirimo gutanga icyemezo cyemeza ko ibihingwa byujuje ubuziranenge bwo koherezwa mu mahanga n'ibindi.

Yasobanuye ko iki gikorwaremezo cyavuguruwe mu gihe cy'imyaka itanu kuva mu 2018 kugeza 2023 binyuze mu bufatanye n'Umuryango w'Ubumwe bw'u Burayi kugira ngo hongerwe ubushobozi bw'ibipimirwa mu Rwanda.

Yagize ati 'Twifuzaga kongera ubushobozi bw'ibicuruzwa dupima, kunoza uburyo dutangamo ibyemezo by'ubuziranenge no gutanga ibisubizo byizewe kandi bishingiye ku bumenyi kugira ngo twongere umusaruro w'ibyoherezwa mu mahanga.'

Ibikomoka ku buhinzi byoherejwe mu mahanga byinjirije u Rwanda arenga miliyoni 839,2$ (arenga miliyari 1,16 Frw) mu 2023/2024.

Ubwo umuhanga mu gusuza icyayi cy’u Rwanda yasobanuriraga Minisitiri w’Ubuhinzi n’Ubworozi na Ambasaderi wa EU mu Rwanda uburyo hapimwa ubuzirange bwacyo

U Rwanda rwungutse laboratwari izajya yifashishwa mu gupima ibikomoka ku buhinzi

Inzobere mu gusuzuma ikawa irigusogongera ngo yumve niba yujuje ubuziranenge

Uhereye ibumoso ni Ambasaderi w'Umuryango w'Ubumwe bw'u Burayi (EU), Belén Calvo Uyarra, akurikiwe na Minisitiri w'Ubuhinzi n'Ubworozi, Dr. Mark Cyubahiro, Umuyobozi Wungirije wa Komisiyo ya EU ushinzwe ububanyi n'amahanga, Martin Seychell, Umuyobozi Mukuru wa NAEB, Claude Bizimana, bafungura laboratwari izajya ipima ubuziranenge bw’ibihingwa byoherezwa mu mahanga

Iyi laboratwari yiteguye kuzajya itanga ibipimo by’ubuziranenge bikenerwa ku rwego mpuzamahanga

Ambasaderi w'Umuryango w'Ubumwe bw'u Burayi, Belén Calvo Uyarra yashimiye ibihugu bitandukanye bigize EU byagize uruhare mu iyubakwa ry’iyi laboratwari

Umuyobozi wa NAEB, Claude Bizimana yavuze ko ibyoherezwa mu mahanga bigiye kuzajya byoherezwayo byujuje ubuziranenge busabwa n’isoko mpuzamahanga kubera iyo laboratwari yafunguwe

Minisitiri w'Ubuhinzi n'Ubworozi, Dr. Mark Cyubahiro yagaragaje ko iyi laboratwari izajya yifashisha ikoranabuhanga rihambaye mu gutahura ibinyabutabire byaba biri mu bihingwa

Umuyobozi Wungirije wa Komisiyo y'Umuryango w'Ubumwe bw'u Burayi ushinzwe ububanyi n'amahanga, Martin Seychell yitabiriye igikorwa cyo gufungura laboratwari izajya ipima ubuziranenge bw’ibihingwa byoherezwa mu mahanga

Amafoto: Rusa Willy Prince

Babitangaje nyuma yo gusoza ihuriro ry'urubyiruko rw'Abanyarwanda, ryiswe 'Rwandan Youth Connect Germany' ryitabiriwe n'urubyiruko rw'Abanyarwanda 90 batuye mu bice bitandukanye byo mu Budage.

Ryabaye iminsi itatu kuva ku wa 13 kugeza ku wa 15 Kamena 2025, kibera mu Mujyi wa Munich usanzwe ari Umurwa Mukuru w'Intara ya Bavaria ndetse ukaba uwa gatatu mu minini igize u Budage nyuma ya Berlin na Hamburg.

Abitabiriye bangana na 53% ni abakobwa mu gihe 47% basigaye ari abahungu, basangira ibitekerezo by'uburyo bakomeza kugira uruhare mu iterambere ry'igihugu cyabo cy'inkomoko binyuze mu kunga ubumwe.

Inzego zateguye icyo gikorwa zagaragaje ko bari gutegura uburyo cyajya kiba buri mwaka ndetse imyiteguro igeze kure, ibizafasha urubyiruko rw'Abanyarwanda kugira uruhare mu iterambere ry'igihugu cyabo cy'inkomoko.

Urwo rubyiruko rwaganirijwe n'abantu 10 bafite ubunararibonye mu nzego zitandukanye, babaganiriza ku ngingo zirimo izijyanye n'ubuyobozi, kwihangira udushya, gukomera ku muco ndetse no ku mahirwe akomeye urubyiruko rufite kugira ngo rutere imbere ndetse runateze imbere u Rwanda.

Habaye ibiganiro bitandukanye, bakora ibikorwa bibumvisha ingingo yo gukorera hamwe, bituma biyumvanamo, banunguka uburyo bakomeza gutezanya imbere aho batuye mu Budage, ariko bakanasangira ibitekerezo n'abandi Banyarwanda baba mu bindi bihugu bijyanye n'uko bagira uruhare mu iterambere ry'igihugu cyababyaye.

Ni kenshi Abanyarwanda baba mu Budage bakunze kugaragaza inyota yo guteza imbere igihugu cyabo mu buryo butaziguye.

Nko mu 2024 itsinda ry'abagore b'Abanyarwanda baba muri iki gihugu cyo mu Burayi bwo Hagati, ryamaze iminsi mu Rwanda, risobanurirwa amahirwe menshi y'ishoramari ari mu gihugu cyabo ndetse n'uburyo babyabyaza umusaruro.

Byari mu murongo w'intego ya Leta yo gukomeza gushishikariza Abanyarwanda baba mu mahanga gukomeza gushora imari mu bikorwa bitandukanye by'iterambere ry'igihugu, bigizwemo uruhare na buri wese.

Ni ibikorwa bitanga umusaruro kuko nko mu 2024 amafaranga yoherejwe mu gihugu n'Abanyarwanda baba mu mahanga, yageze kuri miliyoni 502$ mu 2024 avuye kuri miliyoni 505$ mu mwaka wari wabanje wa 2023.

Ndatirwa Jeanne usanzwe ari umugore wa Ambasaderi w'u Rwanda mu Budage, Igor Cesar, yagarutse ku mbaraga u Rwanda rukomeje gushyira kubakira urubyiruko ubushobozi ashishikariza urubyiruko kubibyaza umusaruro

Abanyarwanda baba mu Budage basoje ihuriro ry’urubyiruko ryari rimaze iminsi ribera i Munich

Urubyiruko rw’Abanyarwandaba ruba mu Budage rwagaragarijwe uburyo rukwiriye gubyaza umusaruro amahirwe u Rwanda rwarushyiriyeho

Abayobozi mu nzego zitandukanye ni bo baganirije urubyiruko rw’Abanyarwanda ruba mu Budage ku buryo rwagira uruhare mu iterambere ry’u Rwanda

[email protected]

Ni igihembo RwandAir yegukanye kuri uyu wa Kabiri tariki 17 Kamena 2025. Yagihawe n'ikigo Skytrax gisanzwe gitanga ibihembo ku bigo by'indege n'ibibuga by'indege.

Umuhango wo gutanga ibi bihembo by'umwaka wa 2025 wabereye i Paris mu Bufaransa. Witabiriwe n'abayobozi ba Sosiyete z'indege zo hirya no hino ku Isi.

RwandAir yari ihagarariwe n'Umuyobozi w'agateganyo ushinzwe ibikorwa, Ernest Mushi.

Muri ibi bihembo RwandAir yahembwe nka sosiyete nziza ikora ingendo z'indege muri Afurika mu mwaka wa 2025.

Mu butumwa iyi sosiyete yashyize hanze, yavuze ko 'dutewe ishema no kwakira iki gihembo, ndetse turashimira abagenzi bacu ku cyizere bakomeje kutugirira. Mwarakoze gukora ingendo natwe, iki gihembo namwe ni icyanyu.'

Umuyobozi Mukuru wa Skytrax, Edward Plaisted yavuze ko RwandAir yegukanye iki gihembo kubera imikorere myiza.

Ati 'RwandAir ikomeje kwerekana itandukaniro binyuze mu kwita cyane mu bijyanye na serivisi, kandi turayishimira kuba yegukanye igihembo cya sosiyete y'indege nziza mu ngendo zo muri Afurika mu mwaka wa 2025 muri World Airline Awards. Iki kigo cy'indege cyashyizeho uburyo bw'imikorere bw'indashyikirwa mu cyiciro kirimo.'

Muri ibi bihembo Qatar Airways isanganywe imikoranire na RwandAir niyo yahize ibindi bigo by'indege ku Isi. Yakurikiwe na Singapore Airlines, ku mwanya wa gatatu haza Cathay Pacific.

Umwanya wa kane wegukanywe na Emirates, uwa gatanu utwarwa ANA All Nippon Airways, mu gihe Turkish Airlines yaje ku mwanya wa gatandatu.

Ku mugabane wa Afurika sosiyete y'indege yahize izindi ni Ethiopian Airways, biba inshuro ya karindwi yikurikiranya iyi sosiyete yegukana iki gihembo.

Igihembo cyegukanywe na Ethiopian Airways gitandukanye n'icyegukanywe na RwandAir, kuko yo yahembwe nk'ikigo gikomoka muri Afurika ariko gikora ingendo mpuzamahanga, mu gihe iyi sosiyete nyarwanda yo yahize izindi muri Afurika mu bijyanye n'ingendo zo kuri uyu mugabane.

Mu 2024 RwandAir yari yaje ku mwanya wa gatatu mu bigo by'ubwikorezi bwo mu kirere byo muri Afurika bizwiho gutanga serivisi nziza no gufata abakiliya mu buryo utasanga ahandi, na cyane ko uru rwego ku mugabane wa Afurika ruri gutera imbere umunsi ku wundi.

RwandAir ni sosiyete y'igihugu yatangiye ingendo ku wa 1 Ukuboza mu 2002 yitwa Rwandair Express. Mu 2009 yaje guhindura izina yitwa RwandAir, ari naryo ikoresha kugeza ubu.

Kugeza ubu RwandAir ifatwa nka Sosiyete z'indege ziri gutera imbere byihuse. Ikora ingendo zijya hirya no hino muri Afurika, Aziya n'i Burayi.

Mu ndege ikoresha harimo Boeing 737-800NG, Boeing 737-700NG, Bombardier Q-400NG na Airbus A330.

RwandAir yegukanye igihembo cya sosiyete y'indege nziza ngendo zo muri Afurika

Iyi hoteli yahoze yitwa Umubano iherereye ku Kacyiru mu Karere ka Gasabo, biteganyijwe ko izatangira gukora muri Nzeri 2025.

Ni imwe mu zimaze iminsi mu Rwanda kuko ari iya mbere ya Jenoside yakorewe Abatutsi. Yagiye igira amazina atandukanye arimo Hôtel Novotel, Hôtel Meridien na Hoteli Umubano, mbere y'uko igurwa igatangira kwagurwa.

Yaguzwe bwa mbere mu 2017 na Marasa Holdings Ltd, Ishami rya Sosiyete Mpuzamahanga yitwa Madhvani Group.

Byari biteganyijwe ko yari gufungurwa mu 2019 ariko imirimo iza kugenda idindira ku mpamvu zitandukanye zirimo no kongera ikagurwa n'ibindi bigo.

Umuyobozi Mukuru wa Mövenpick Kigali Hotel, Umulisa Médiatrice yabwiye IGIHE ko imirimo yo kwagura iyi hoteli igeze kuri 70% ku buryo muri Nzeri 2025 izaba yatangiye gukora.

Yakomeje ati 'Izaba yitwa Mövenpick Kigali kandi twongeyemo n'icyumba kigenewe Abaperezida. Izaba iri mu maboko y'ikigo cyitwa Kasada.'

Mövenpick ni izina ry'amahoteli y'ikigo cy'Abasuwisi cyitwa Mövenpick Hotels & Resorts kiri mu bikomeye bibarizwa mu kigo cyitwa Accor cy'Abafaransa.

Mövenpick Kigali Hotel yaraguwe iva ku byumba 100 yari ifite, bigera kuri 124 n'ibigenewe abantu biyubashye muri ibyo birongerwa.

Iyo hoteli kandi yavuye ku nyenyeri eshatu yari ifite ikiri Hoteli Umubano igera kuri eshanu izatangirana nifungurwa.

Ifite ibyumba bine by'inama, ikinini cyakira abantu 360. Ifite kandi ahashobora gukorera ibiro bihoraho cyangwa iby'igihe gito n'ibindi bitandukanye byiyongeyemo.

Umulisa Médiatrice ni we mugore wa mbere uyoboye hoteli y'inyenyeri eshanu mu Rwanda mu zigera kuri 10 ziri kuri urwo rwego kugeza ubu.

Umulisa yavuze ko iyo hoteli izaha akazi abantu bagera kuri 100 bahoraho biganjemo Abanyarwanda ndetse abagore bazaba bagize 50% by'abazahakora mu rwego rwo kwita ku ihame ry'uburinganire n'ubwuzuzanye.

Mövenpick Kigali hotel izaba ifite inyenyeri eshanu

Icyakora kuba igicumbi cy'imari ntabwo ari ibintu byikora kuko bikenera ibintu byinshi birimo ibikorwaremezo, ubumenyi n'ibindi. Mu cyiciro cy'ibikorwaremezo, inyubako zigezweho ni ingenzi cyane ko u Rwanda ruri mu isiganwa ryo gukurura ibigo by'imari birimo n'ibyo ku rwego mpuzamahanga, bikenera gukorera mu nyubako zigezweho.

Aha ni ho havuye igitekerezo cyo kubaka inyubako ya 'Kigali International Financial and Business Square'. Muri rusange izaba igizwe n'inyubako ebyiri ziteye kimwe (Twin Towers).

Inyubako imwe izakorerwamo n'ibigo by'ubucuruzi, indi ikorerwemo na hoteli ndetse n'inzu zigezweho zo guturamo (apartments).

Mu 2022, uyu mushinga watangiye gushyirwa mu bikorwa ndetse nta gihindutse, uzaba warangiye mu gihe kitarenze amezi 12.

Umuyobozi Mukuru wa Equity Bank Rwanda Limited iri gukurikirana imirimo yo kubaka iyi nyubako, Hannington Namara, yavuze ko uyu mushinga waturutse ku ntego z'igihugu zo kuba igicumbi cy'ishoramari.

Ati 'Ni inyubako twatangiye umushinga dufatanyije na Leta mu buryo bwo kudufasha kuyubaka, ariko tuyubakira Financial Center.'

'Iyo igihugu gitangiye kugira ibitekerezo bigari gutyo, utangira no kwibaza uti 'Financial Center nibaho, izaba he? Umujyi wa Kigali wafashe uyu musozi dukoreraho, uba ari ho uhindura Financial District. Ariko wareba inyubako zirimo, ugereranyije n'ahandi financial centers, ukabona ko hakenewe ibikorwaremezo.'

Yakomeje asobanura ko niba u Rwanda rwifuza guhinduka igicumbi cy'iterambere, rukwiriye no kubijyanisha no guteza imbere ibikorwaremezo birimo inyubako zigezweho.

Ati 'Ni naho igitekerezo cyavuye cy'uko twafasha u Rwanda mu kubaka ibikorwaremezo, bikazatuma ishyirwa mu bikorwa [ryo guhindura u Rwanda financial center] yihuta kurushaho. Inyubako twayitangiye cya gihe Nyakubahwa Perezida wa Repubulika ashyiraho ibuye ry'ifatizo.'

Miliyoni 100$ niyo yateganyirijwe uyu mushinga. Namara ati 'Inyubako iri kubakwa ku muvuduko mwiza, ndakeka uyu mwaka urangira igice cy'ingenzi cy'inyubako cyarangiye. Ubu tugeze ku igorofa rya 17 ku nyubako imwe, indi nyubako tugeze ku igorofa rya 13. Ubu navuga ko tugeze hagati ya 60% na 70% y'igice cy'ingenzi cy'inyubako (structure). Ahari hagoye hari hasi mu gutangira, ariko uko igenda izamuka bigenda byihuta.'

Uyu muyobozi kandi yatanze icyizere cyo kurangiza iyi nyubako mu gihe gito, ati 'Turatekereza ko bitaragera muri Kamena umwaka utaha, kuko twari twihaye kuzasoza muri Nyakanga, 2026 [tuzaba twasoje imirimo yose]. Inyubako imwe izarangira muri Werurwe umwaka utaha. Indi nyubako [iri hafi na Car Free Zone] izaba irimo hoteli n'inyubako zo guturamo [apartments]. Nayo izarangira muri Kamena, 2026, kuko imiromo yo kuyisoza irangira vuba.'

Uretse ibibazo bijyanye n'imvura byadindije imirimo yo kubaka iyi nyubako, Namara avuga ko nta kindi kibazo cyabayeho, ati 'Nta kibazo ku ngengo y'imari nubwo habayeho izamuka ry'ibiciro ku rwego rw'Isi. Turabona tuzabishobora.'

Ikiganiro n'Umuyobozi Mukuru wa Equity Bank Rwanda Plc

Amafoto y'inyubako ya Twin Towers iri kubakwa na Equity Bank Rwanda Plc

Imirimo yo kubaka izi nyubako igeze kuri 60%

Iyi nyubako izahindura isura y’Umujyi wa Kigali

Byitezwe ko izi nyubako zizagira uruhare mu mugambi w’u Rwanda wo guhinduka igicumbi cya serivisi z’imari

Imirimo yo kubaka izi nyubako iri ku muvuduko mwiza

Inyubako za Twin Towers zizaba zarangije kubakwa mu mezi 12 ari imbere

Imwe muri Twin Towers igeze ku igorofa rya 17, indi igeze ku rya 13

Inyubako za Twin Towers zizaba zihuzwa n’ibiraro

Twin Towers nizimara kuzura, zizahindura isura y’Umujyi wa Kigali mu buryo bufatika

Ibikoresho bigezweho birakoreshwa mu kubaka izi nyubako

Imwe mu nyubako za Twin Towers izaba irimo hoteli na apartments

Izi nyubako ziri kubakwa hafi ya Ecobank

Igice cy’ingenzi cy’inyubako kiri kugana ku musozo

Igice cy’ingenzi (structure) cyatangiye gutwikirwa

Abakozi bari gukora ibishoboka byose kugira ngo iyi nyubako izarangire vuba

Hifashishwa ibikoresho bizamura ibintu biremereye mu kubigeza ku magorofa yo hejuru

Igice cy’ingenzi mu nyubako (structure) kiri kubakwa ku muvuduko uri hejuru

Igice cy’ingenzi cy’inyubako kiri kugana ku musozo

Amafoto: Nzayisingiza Fidele

Ubu si ko bikimeze kuko abana biga mu mashuri y'incuke basigaye biga bakina, bakora ku buryo ibyo biga baba bazi no kubikora bikaborohereza mu kwagura ubwonko bwabo.

Ubu umwana aho kumwereka ku rupapuro ngo iyi ni imodoka, abana bafatanya na mwarimu bagakora imodoka mu bikarito, noneho wa mwana aho kuyimwereka ahubwo akagira uruhare mu kuyikora.

Ibi bituma umwana atangira kumenya ubufatanye na bagenzi be hakiri kare, amaboko ye akamenyera gukora ku buryo bimutegura neza mu gutangira umwaka wa mbere w'amashuri abanza.

Ntaganira Marie Rose wigisha kuri mu Ishuri ribanza rya Kavumu, riherereye mu Karere ka Bugesera, yavuze ko icyo umwana yize agikina bituma agifata vuba kandi yishimye atari bya bintu byo kuvuga gusa.

Ati 'Ubu ibikoresho twifashisha ibyinshi turabyikorera. Iyo ngiye nko kubigisha ibijyanye n'ikoranabuhanga niba mbabwiye televiziyo mfatanya n'abana tukayikora mu gikarito, niba ari radiyo na yo turayikorana ku buryo bayivuga banayikoraho.''

Umwe mu babyeyi bafite umwana wiga mu mashuri y'incuke, Mitari Regis, avuga ko iyo agereranyije umwana we n'abandi bakuru bagiye biga mu bigo by'incuke, usanga bitandukanye cyane.

Ati 'Abakuru wasangaga bacecetse cyane ariko umuto mfite ubu ubona ko hari icyo abasumbya. Ubona ko azi no kugabanya kandi ni muto, ubu wamuha ibintu akamenya kubigabanya abandi bana kandi yabimenye kubera ubwo buryo bushya bigamo.''

Impuguke mu burezi akanaba umuhuzabikorwa wa Twigire mu Mikino, muri VSO Rwanda, Pontien Nizeyimana, yavuze ko bari gufatanya na Leta mu gushyiraho ingamba zihariye zinjiza imikino mu myigire.

Yavuze ko mbere hari hariho icyuho cy'uko abarezi batari bafite ubumenyi buhagije mu kwigisha hakoreshejwe imikino ariko ubu bamaze kubahugura.

Umuyobozi Mukuru wungirije w'Ikigo cy'Igihugu gishinzwe Uburezi bw'Ibanze, REB, Dr. Mutezigaju Flora, avuga ko gahunda yo kwigisha abana biri gutanga umusaruro ugereranyije na mbere.

Ati 'Ubu iyo abana biga ntabwo biga ari ugufata mu mutwe gusa ibyo mwarimu abahaye, bagira uruhare runini mu myigire yabo kandi ibyo biga bikaba ibintu bibagaragarira, iyo abana b'incuke bakina ni bwo bafata. Byazamuye ireme ry'uburezi kuko bashishikariye kujya kwiga.''

Gahunda yo kwigisha binyuze mu mikino yatangiye mu 2016 mu nteganyanyigisho ishingiye ku bushobozi, aho umwana ahabwa umwanya munini akerekana ibimurimo.

Kugeza ubu amashuri y'incuke 3900 ni yo abarurwa mu Rwanda mu gihe agera ku 2500 ari yo amaze guhabwa ibikoresho.

Abarimu b'incuke barenga 9000 ni bo bari mu Rwanda, mu gihe abarimu 3000 bangana na 35% muri bo bamaze guhugurwa ku kwigisha abana binyuze mu mikino.

Kwiga hisunzwe imikino bituma abana bakunda ishuri

Ntaganira Marie Rose wigisha kuri E.P Kavumu mu Bugesera ni umwe mu bahamya ko kwigisha abana hakoreshejwe imikino biri gutanga umusaruro

Mitari Regis avuga ko umwana we wiga mu ishuri ry'incuke asigaye azi ibintu byinshi ugereranyije n'abakuru be batanyuze muri gahunda y’imyigishirize yisunga imikino