Webrwanda Backend

Category: Uncategorized

  • Iyubakwa ry’imihanda ryasembuye ishoramari ry’inganda i Muhanga (Amafoto) –

    I Muhanga nk’umwe mu mijyi yunganira uwa Kigali naho hashyizwe ibikorwa remezo birimo imihanda, hagamijwe gufasha abatuye muri aka karere kugerwaho na serivisi z’ingenzi bakenera mu buzima bwa buri munsi.

    Ibi bikorwa byishimiwe n’abaturage cyane ko byongereye agaciro k’ubutaka bwabo, bica intege ubujura, hakumirwa Ibiza byaterwaga ahanini n’amazi y’imvura ava ku nzu ariko adafite aho anyura agana ahabugenewe.

    Iyubakwa ry’imihanda ya kaburimbo na ruhurura byubatswe mu mushinga ukorerwa mu mijyi itandatu yunganira uwa Kigali, watewe inkunga na Banki y’Isi.

    Ubusanzwe Umujyi wa Muhanga wanyurwagamo n’imihanda ibiri ya kaburimbo irimo ujya i Huye ugana ku Mupaka w’u Burundi n’ukomeza Ngororero na Karongi.

    Binyuze muri uyu mushinga, mu cyiciro cya mbere hubatswe imihanda ireshya na 5,056 Km, yatanzweho 4.046.219.224 Frw mu gihe ruhurura zubatswe mu Ruvumera no mu Kibirigi za metero 996 zatanzweho 281.715.876 Frw.

    Mu cyiciro cya kabiri ho hubatswe imihanda y’ibilometero birindwi byatanzweho 5.132.338.822 Frw mu gihe ruhurura zubatswe zireshya na metero 922 zatanzweho 541.384.562 Frw.

    Ibi bikorwa remezo byanogeje isuku, byoroheje ingendo ku bagana ku bigo nderabuzima, ku bitaro no ku mashuri. Abashoramari na bo batangiye kwerekana inyota yo kuhatangiza inganda aho batatu batangiye urwo rugendo.

    -  Abanyenganda batangiye gushinga ikirenge i Muhanga

    Nk’Umujyi wunganira uwa Kigali, Muhanga yagennye agace kihariye kahariwe inganda aho hari abashoramari batangiye kuhazamura inyubako bazakoreramo mu gihe abandi na bo bahahanze ijisho.

    Mu cyanya cyahariwe inganda hari abashoramari batatu babengutse aka gace mu minsi ya vuba. Bafite inganda zirimo uruzakora ibikoresho by’isuku, urw’amakaro n’urukora amasafuriya rwamaze kuzura.

    IGIHE yamenye ko hakiri gukorwa ibiganiro ku buryo Minisiteri y’Ubucuruzi n’Inganda izafasha kwimura abaturage batuye muri iki gice gusa hari abamaze kuguramo ibibanza.

    Umunyarwanda uba muri Amerika, Irene Basil, ari mu bagiye gutangiza uruganda rukora ibikoresho by’isuku. Abinyujije muri Basil Industries Ltd agiye gutangira kubaka inyubako zizakorerwamo iyo mirimo.

    Yabwiye IGIHE ko akigera mu Rwanda yafashijwe kubona ibyangombwa by’ingenzi mu rugendo rwo gutangira ishoramari rye, anasobanurirwa ibiryerekeye byimbitse.

    Ati “Twasobanuriwe ibibazo bikirimo by’ibikorwa remezo [amazi, amashanyarazi n’imihanda] bigikenewe. Bamfashije kwandikisha ishoramari ryanjye no kubona ibyangombwa byari bikenewe mu kwishyura abaturage.’’

    Yavuze ko yabonye iki cyanya gisurwa ku buryo bitanga icyizere ko kizuzura bidatinze.

    Yakomeje ati “Abantu benshi baraza kuhasura, ni hafi y’umujyi. Ibibazo birimo ujya kuhagura abikora yamaze kubyerekwa, ko aho hantu hatarajya mu maboko ya Minicom.’’

    Uruganda rwa Basil ruri ku butaka bungana na hegitari hafi ebyiri, aho yimuye abaturage 33. Uyu mushinga uzakorwa mu byiciro bibiri washowemo miliyoni 3,5$.

    Uru ruganda rugiye kubakwa muri Muhanga nyuma y’ibikorwa remezo biri kuhegerezwa

    -  Abatuye i Muhanga kera bakojeje intoki ku iterambere

    Umuyobozi w’Umudugudu wa Murambi, Nteziyaremye Oswald, watuye muri Muhanga mbere ya Jenoside, yavuze ko mbere hari abantu bake cyane ariko umuhanda ukimara gukorwa, ubuzima bwarahindutse.

    Ati “Aya mahirwe twagize ni menshi. Abantu batangiye kwiyongera, natwe abahasanzwe tugomba gushakisha uko dukora ubucuruzi tugatera imbere.’’

    Uyu mugabo umaze imyaka itanu ayoboye Murambi mu Kagari ka Ruli mu Murenge wa Shyogwe yavuze ko umuhanda utirukanye abaturage ahubwo wabunganiye kuko ‘‘N’abahawe amafaranga nk’ingurane y’aho wanyuze, na bo biteje imbere.’’

    Mukasekuru Clessence utuye mu Mudugudu wa Kamugina [ahazwi nka Ruvumera] muri Nyabisindu yavuze ko kubakirwa umuhanda byababereye inkuru nziza.

    Ati “Byaraturenze, amanywa ntitubasha kuyatandukanya nijjoro. Abajura badushikuzaga amasakoshi ubu dutaha neza dutekanye, abana bajya ku ishuri, imodoka ziragenda neza, mbese byarahindutse.’’

    Yavuze ko nkawe ucuruza restaurant, abantu borohewe no kugera aho akorera bituma ubucuruzi buzamuka.

    Umuyobozi wungirije ushinzwe Iterambere ry’Ubukungu mu Karere ka Muhanga, Kayiranga Innocent, yavuze ko ibikorwa remezo byubatswe byagize uruhare mu guhindura isura y’umujyi.

    Ati “Icyanya cy’inganda cya Muhanga cyazamuye agaciro, agakiriro kariyo kahageze kubera imihanda. Dufite n’inganda zitangiye kuhaza kubera hari umuhanda wahageze. Ubu dufite inganda eshatu zitangiye kubakwa ndetse rumwe rw’amasafuriya rwaruzuye, hari urugiye gukora amakaro n’izindi.’’

    Yavuze ko bitewe n’imiterere ya Muhanga ba rwiyemezamirimo bagirwa inama yo gushora imari mu bijyanye n’ubucuruzi.

    Ati “Umujyi wa Muhanga kuva na kera waranzwe n’ubucuruzi kandi nanone iyo urebye mu Majyepfo, za Ngororero na Karongi mu Burengerazuba, barangura hano. Tubona ko abantu bashoye imari hano bakubaka ububiko bunini bw’ibicuruzwa ku buryo ubikeneye atajya i Kigali.’’

    Muhanga ifite gahunda yo kuzamura inganda zubakwa ku buryo abayigana babona ibyo bakeneye byose. Icyanya cyayo cyahariwe inganda kiri ku buso bwa hegitari 67 harimo enye zahariwe Agakiriro.

    Imihanda yubatswe mu bice bitandukanye bya Muhanga yahinduye isura yayo

    Imihanda yubatswe mu duce turimo Kibirigi, Kabgayi n’ugana mu gakiriro ireshya n’ibilometero 5,056

    Abatuye mu Ruvumera borohewe no gukora ingendo nyuma yo guhabwa umuhanda mushya

    Mukasekuru Clessence utuye mu Mudugudu wa Kamugina [ahazwi nka Ruvumera] yavuze ko kubakirwa umuhanda byatumye ubucuruzi bwe burushaho kugira agaciro

    Mu mwaka w’ingengo y’imari utaha hari indi mihanda biteganyijwe ko izubakwa

    Abanyeshuri bakoresha uyu muhanda mu minsi ya vuba bazaba bagendera ku muhanda wirabura

    Abakoresha umuhanda ugana ku Bitaro bya Kabgayi borohewe n’ingendo ziganayo

    Umuhanda ugana i Murambi wahinduye isura y’aka gace binatuma ubutaka bwaho burushaho kugira agaciro

    Umuyobozi wungirije ushinzwe Iterambere ry’Ubukungu mu Karere ka Muhanga, Kayiranga Innocent (wifashe mu mayunguyungu) asobanura imiterere ya ruhurura yubatswe ikanapfundikirwa muri Muhanga

    Uyu muhanda uri mu yashyizwe mu izakorwa mu cyiciro cya kabiri cy’umushinga watewe inkunga na Banki y’Isi

    Mu Mudugudu wa Gakombe, Akagari ka Ruli muri Shyogwe hari inzu zigezweho zizamurwa bitewe n’uburyo abashoramari bakomeje kugana Muhanga

    Aho imihanda igeze, ubuzima bw’abahatuye burushaho guhinduka

    Isuku yarushijeho kwimakazwa mu bice bitandukanye bya Muhanga nyuma y’imihanda mishya yubatswe

    Ubu kugera ku musigiti wa Nyabisindu biroroshye kuko inzira iganayo iraharuye

    Nteziyaremye Oswald watuye muri Muhanga mbere ya Jenoside, yavuze ko mbere hari abantu bake cyane ariko umuhanda ukimara gukorwa, ubuzima bwarahindutse. Yavuze ko hamaze kuzura inzu nziza ndetse kubona ikibanza biragoye

    Umuhanda ugana i Murambi unyura ku Kigo cy’Igihugu cy’Amahugurwa mu by’Imicungire y’Abakozi n’Umutungo (​Rwanda Management Institute, RMI) kiri i Muhanga

    Imihanda mishya iyo uyirebesheje ijisho ubona iteye amabengeza

    Imihanda igana mu gakiriro yarakozwe ndetse ubu imodoka zihagera nta nkomyi

    Abanyeshuri borohewe no gukora ingendo nyuma y’iyubakwa ry’imihanda mishya

    Ubwiza bwa Muhanga mu masaha ya nijoro. Uyu mujyi urara ucaniwe

    Muhanga iri mu mijyi itandatu yunganira uwa Kigali

    Umujyi wa Muhanga uri mu iri ugutera imbere mu buryo bwihuse

    Iyo uhagaze mu Mujyi wa Muhanga uba witegeye inzu zizamurwa mu duce dutandukanye tuwukikije

    Imihanda mishya yubatswe yamaze no gucanirwa, kuri ubu irara yaka

    Imiterere ya Gare ya Muhanga mu masaha y’ijoro

    Muhanga ifatwa nk’Umujyi w’ubucuruzi ndetse igaburira uduce tuyikikije mu Majyepfo no mu Burengerazuba bw’u Rwanda

    ICK iri mu mashuri akomeye abarizwa mu Karere ka Muhanga

    Ugana ku Bitaro bya Kabgayi mu masaha y’ijoro watora n’urushinge hasi

    Umuhanda ugana mu cyanya cyahariwe inganda cya Muhanga washyizwemo kaburimbo ndetse n’amatara

    Imihanda mishya yubatswe muri Muhanga yatumye ishoramari rikorerwa muri aka gace rigenda rizamuka umunsi ku wundi

    Umujyi wa Muhanga wanyurwagamo n’imihanda ibiri ya kaburimbo irimo ujya i Huye ugana ku Mupaka w’u Burundi n’ukomeza Ngororero na Karongi

    Banki y’Ubucuruzi ya Cogabenque ifite ishami muri Muhanga rifasha abayigana kubona serivisi z’imari

    Isoko rya Kijyambere rya Muhanga rikorera muri iyi nyubako

    Inyubako zikorerwamo ubucuruzi zizamurwa ahenshi

    Inyubako ikoreramo Banki ya Kigali mu Karere ka Muhanga

    Cogebanque yashinze imizi muri Muhanga

    Amafoto: Niyonzima Moïse

  • Umukinnyi wari upfiriye mu kibuga yavuze ko ameze neza yizeza bagenzi be kubashyigikira mu mikino itaha #rwanda #RwOT

    Uyu mukinnyi yaguye mu kibuga abura umwuka mu mukino ikipe ye ya Denmark yakinagamo n’iya Finland tariki 12 Kamena 2021 ubwo uyu mukino wari ugeze ku munota wa 42 ugahita uhagarara.

    Ubwo yagwaga akabura umwuka benshi babanje gukeka ko yashizemo umwuka ariko Imana ikinga akaboko aza guhita ajyanwa kwa muganga kugira ngo yitabweho.

    Christian Eriksen yanyujije ubutumwa kuri Instagram buherekejwe n’ifoto ari mu bitaro amenyesha uko ubu amerewe.

    Yavuze ko yashimishijwe n’ubutumwa bw’abantu benshi bamwoherereje bamwifuriza gukira. Ati 'Bisobanuye byinshi kuri njye n’umuryango wanjye.'

    Yavuze ko agikomeje kujya gukorerwa ibizamini kwa muganga ariko 'Ubu ndumva meze neza.'

    Yaboneyeho gushimira abakinnyi bagenzi be bamubaye hafi ndetse abasezeranya kuzabashyigikira mu mikino itaha.

    UKWEZI.RW

    Source : http://www.ukwezi.rw/Imikino/Umukinnyi-wari-upfiriye-mu-kibuga-yavuze-ko-ameze-neza-yizeza-bagenzi-be-kubashyigikira-mu-mikino-itaha

  • Mineduc yashyizeho porogaramu y’ikorabuhanga izifashishwa mu kugenzura imyigishirize y’abarimu –

    Iyi porogaramu yiswe ’Teacher Management and Information System (TMIS)’ yashyizwe hanze ku mugaragaro ku wa 1 Kamena 2021.

    TMIS yakozwe n’Urwego rw’Igihugu rushinzwe Uburezi bw’Ibanze, REB, rufatanyije na Unicef, izifashishwa mu gukusanya amakuru yose ajyanye n’abarezi bigisha mu mashuri abanza n’ayisumbuye, kugira ngo harebwe ahagomba gushyirwa ingufu, ndetse ikazanafasha mu gukomeza kubakurikiranira hafi.

    Binyuze muri TMIS, hazajya hagenzurwa umusaruro w’abarimu ujyanye n’uburyo bigisha mu gihe bari mu ishuri.

    Umunyamabanga wa Leta muri Minisiteri y’Uburezi ushinzwe Amashuri y’Incuke, Abanza n’Ayisumbuye, Twagirayezu Gaspard, yavuze ko gukoresha ikoranabunga mu buryo bwo gufasha abarimu ari ingenzi cyane ndetse ko bazakomeza kubaba hafi kuko ari bo zingiro ryo kuzamura ireme ry’Uburezi.

    Yongeyeho ati “TMIS izadufasha kumenya abarimu bari gukora, bidufashe gutegura no kugena ingengo y’imari. Turashimira Unicef na Mastercard Foundation bateye iyi ntambwe ikomeye mu guteza imbere imikorere y’abarimu mu Rwanda. TMIS ni igisubizo ku bibazo byibasiraga uburezi mu gihugu cyacu.”

    Iri koranabuhanga rikozwe ku buryo rishobora gukoreshwa n’ibyiciro birenga 14 by’abakora mu rwego rw’uburezi mu Rwanda. Kuva ku buyobozi bukuru bwa REB kugeza ku bashinzwe kohereza abarimu mu mashuri, kubafasha no kubaha amahugurwa ndetse n’abayobozi bashinzwe uburezi mu turere twose tw’u Rwanda.

    Umuyobozi uhagarariye Unicef mu Rwanda, Julianna Lindsey, yagize ati “Iyi TMIS izatuma urwego rw’uburezi mu Rwanda rugira ikoranabuhanga rifasha mu miyoborere ndetse no mu mikorere y’abarimu ndetse yongere umusaruro wabo.”

    Ireme ry’Uburezi ryagiye rigarukwaho na benshi ari yo mpamvu hagenda hafatwa ingamba zitandukanye kugira ngo rizamuke.

    Umuyobozi wa Mastercard Foundation mu Rwanda, Rica Rwigamba, yashimiye abafatanyabikorwa batumye iyi TMIS ijyaho, avuga ko ibibazo biri mu myigishirize atari urugamba rwatsindwa n’Ikigo kimwe gusa ahubwo bisaba ubufatanye.

    Yongeyeho ati “Kongera ireme ry’uburezi binyuze mu guteza imbere uburyo bw’imyigishirize ni kimwe mu biduhangayikishije, kandi tuzahora tubishyiramo ingufu. Ibi bitangirira mu barimu, twishimiye ko TMIS izafasha gahunda y’uburezi mu Rwanda mu kumenya aho ishyira imbaraga ndetse iteze imbere n’uburyo abarimu bigisha.”

    Nubwo iyi porogaramu ya TMIS yashyizweho ku bufatanye n’inzego zitandukanye, Unicef yayeguriye REB ariko izakomeza gutanga ubufasha mu by’ikoranabuhanga ry’iyi porogaramu kugeza mu Ukuboza 2021, nyuma ikomeze gukoreshwa mu rwego rwo gukurikirana imikorere y’uburezi mu Rwanda.

    Kugira ngo umwarimu abashe gukoresha iyi porogaramu, ajya kuri www.education.rw/tmis/ agahitamo ahanditse ‘exisiting teacher’, agahitamo ubwenegihugu bwe, ubundi agahita yuzuza imyirondoro ye mu mbonerahamwe ihari. Nyuma akora ahanditse ngo ‘check’. Iyi porogaramu ihita imwereka indi mbonerahamwe, akayuzuza bitewe n’icyo asabwa.

    Mineduc yashyizeho porogaramu y’ikorabuhanga izifashishwa mu kugenzura imyigishirize y’abarimu

  • Hagiye kuba impinduka mu burezi ziganisha ku bushingiye ku ndangagaciro Nyarwanda #rwanda #RwOT

    Politike y’Uburezi icyo aricyo :

    Politike y’Uburezi ni inyandiko igaragaza imirongo migari izakurikizwa kugira ngo intego z’Uburezi zigerweho mu byiciro byose.

    Kubera iki hakenewe ivugururwa rya Politike y’Uburezi ?

    Hagiye haba impinduka zitandukanye mu burezi, zishingiye ku ntego n’icyerekezo bishya by’Igihugu. Ibi bisaba ko Politike y’Uburezi yari isanzwe igenderwaho ihuzwa n’ibyifuzo by’Igihugu ndetse n’impinduka ziri ku Isi. Iyi ikaba ari imwe mu mpamvu zituma politike y’Uburezi ya 2003 irimo kuvugururwa.

    Intego Nyamukuru ya Politike y’Uburezi :

    Guha abanyarwanda ubumenyi n’ubushobozi bishingiye ku burezi bufite ireme kandi budaheza, bujyanye n’ibikenewe kw’isoko ry’umurimo ndetse bujyanye n’igihe, byose byubakiye ku ndangagaciro z’umuco nyarwanda.

    Icyerekezo cya Politike y’Uburezi :

    Kuba inkingi ya mbwamba n’umusemburo w’iterambere n’imibereho myiza y’abanyarwanda binyuze mu kubaha ubumenyi, ubumenyingiro, n’ubushobozi byubakiye ku ndangagaciro nyarwanda.

    Ibyo Politike y’Uburezi yibandaho by’umwihariko :

    1. Indangagaciro Nyarwanda

    Inkingi ya mwamba ya politike nshya y’uburezi ishingiye ku ndangagaciro nyarwanda zirimo ; kwihesha agaciro, kwigira n’umurimo unoze.

    2. Nta muntu n’umwe ugomba gusigara inyuma

    Politike nshya y’uburezi ishimangira ko nta muntu n’umwe ugomba gusigara inyuma mu burezi.

    3. Ubumenyi n’ubushobozi bikwiye ku isoko ry’umurimo, rya none n’ejo hazaza

    Politike nshya y’uburezi ifite intego yo gutanga ubumenyi n’ubushobozi bikwiye ku isoko ry’umuriomo rya none n’ejo hazaza

    4. 'Mbere na mbere Abarezi’

    Uruhare rw’umurezi ni ihame mu guteza imbere uburezi bufite ireme kuri buri rwego rw’uburezi.

    Intego zihariye za Politike y’Uburezi :

    1. Guha umunyeshuri uburezi bushingiye ku ndagagaciro nyarwanda, ubumenyi mu mibereho n’imibanire ndetse no mu bijyanye no gusoma, kubara no kwandika bihereye mu bwana.

    2. Abana bose bagomba kwiga amashuri y’incuke, bagatangira amashuri abanza mu gihe cyabugenewe, bakiga kandi bakarangiza uburezi bw’ibanze mu myaka iteganyijwe.

    3. Ubuzima n’umutekano ku ishuri : Imirire myiza (kugaburira abana ku ishuri) ubuzima bwiza mu gihagararo n’imitekerereze y’abanyeshuri ni ingenzi. Ibindi bizibandwaho ni ; isuku n’isukura, ahantu hafite umutekano no kwitegura bihagije guhangana n’ibihe bidasanzwe bitunguranye.

    4. Kugera ku musaruro mwiza mu myigire (gutsinda) hibandwa ku nteganyanyigisho ishingiye ku bushobozi, isuzuma bumenyi ryimbitse n’ikoreshwa ry’icyongereza nk’ururimi rukoreshwa mu kwigisha.

    5. Gukomeza gutanga uburezi kuri bose kandi budaheza kugira ngo abanyeshuri babashe kubona amahirwe yose ashoboka.

    6. Amasomo ya siyansi, ikoranabuhanga n’imibare (STEM) bishimangirwa hakoreshejwe uburyo bugezweho bwo kwigisha, kwiga, gusuzuma no gukoresha neza ikoranabuhanga.

    7. Kuvugurura amashuri y’imyuga n’ubumenyingiro hamwe n’amashuri makuru hagamijwe guteza imbere ihuzwa ry’ubumenyingiro butangwa n’ubukenewe ku isoko ry’umurimo.

    8. Kuvugurura uburyo abarimu bategurwa (mu mashuri nderabarezi) ndetse no mu gihe bari mu kazi harimo kuba bahugurana ubwabo igihe bari mu kazi, ubujyanama mu mwuga wabo.

    9. Kongera ubufatanye n’abafatanyabikorwa mu burezi, harimo n’ibijyanye no kwimenyereza umwuga ku banyeshuri.

    10. Kugira urwego rw’Uburezi ruhamye, imikorere inoze iganisha ku ntego, ubuyobozi n’imicungire, igenamigambi n’isuzumabikorwa rinoze.

    Ivomo : MINEDUC

    Source : http://www.ukwezi.rw/mu-rwanda/3/article/Hagiye-kuba-impinduka-mu-burezi-ziganisha-ku-bushingiye-ku-ndangagaciro-Nyarwanda

  • Espagne yatangiye nabi igikombe cy’u Burayi(AMAFOTO) #rwanda #RwOT

    Espagne yatangiye nabi igikombe cy’u Burayi(Euro2020) inanirwa gutsinda Sweden mu mukino wabereye kuri Estadio de La Cartuja mu Mujyi wa Seville muri Espagne aho amakipe yombi yanganyije 0-0.

    Ku munsi w’ejo hari hatahiwe itsinda E muri Euro, habanje umukino ikipe ya Slovakia y’abakinnyi 10 yatsinze Poland 2-1, Wojciech Szczesny wa Poland yaje kwitsinda igitego ku munota wa 18, cyane kwishyurwa na Karol Linetty ku munota wa 46, hari mbere y’uko Milan Skriniar atsindira Slovakia icya 2 ku munota wa 69.

    Hahise hakurikiraho umukino wa Espagne na Sweden, Luis Enrique n’abakinnyi be basatiriye Sweden cyane ndetse barema n’uburyo bw’ibitego bwinshi ariko kububyaza umusaruro biranga neza.

    Ku mmunota wa 6, Jordi Alba yagerageje amahirwe ariko umupira ugarurwa n’ubwugarizi bwa Sweden. K’umunota wa 10 guhererekanya umupira Espagne yari ifite 90%, Sweden ari 10%.

    Ku munota wa 22, Emil wa Sweden yagerageje ishoti inyuma y’urubuga rw’amahina ariko umupira unyura hanze y’izamu.

    Ferran Torres yinjiranye ubwugarizi bwa Sweden ku munota wa 25 ariko aya mahirwe yabonye ntiyayabyaza umusaruro.

    Ku munota wa 29, umukinnyi ukina hagati mu kibuga wa Espagne, Jorge Merodio uzwi nka Koke, yagerageje amahirwe yakavuyemo igitego ariko umupira ntiwaboneza mu rushundura.

    Alvaro Morata yakabaye yatumye ikipe ye ya Espagne iyobora umukino ku munota wa 38 ku mahirwe akomeye yari abonye ariko na we ananirwa gushyira umupira mu rushundura.

    Ku munota wa 61, Sweden yanyujijemo irasitira ariko amahirwe babonye, Marcus Berg umupira awushyira hanze y’izamu.

    Espagne yakomeje kurema amahirwe abasore nk’aba Pedri, Alba ndetse Gerard Moreno wateye umupira n’umutwe ku munota wa 90 ariko umunyezamu akawukuramo, ntibyaje kuborohera.

    Nubwo Espagne yarushije Sweden ariko umukino warangiye amakipe yombi asangiye amanota nyuma yo kunganya 0-0.

    Iri tsinda Slovakia ifite amanota 3, Sweden na Espagne 1 mu gihe Poland ifite 0.

    Na Sweden yahushije igitego cyabazwe

    Nyuma yo guhusha iki gitego, Breg ntabwo yabyumvaga

    Koke agerageza gutera mu izamu rya Sweden

    Morata ntabwo wari umunsi we

    Dani Olmo agerageza umutwe ariko ubwugarizi bwa Sweden bwari buhagaze neza

    Mikael agerageza gutera mu izamu rya Espagne

    Umunyezamu wa Sweden, Olesen yakoze akazi gakomeye cyane

    Source : http://isimbi.rw/siporo/article/espagne-yatangiye-nabi-igikombe-cy-u-burayi-amafoto

  • Rubavu : Inkuru iteye agahinda y’umwana ufite ubumuga umaze imyaka 5 atava mu nzu #rwanda #RwOT

    Uyu mwana yasohotse mu nzu kubera Olivier Bitwayiki ukuriye abafite ubumuga muri Murenge wa Nyundo wagiye gusura uriya mwana nyuma yo kubibwirwa n’ukuriye abafite ubumuga mu Kagari.

    Bitwayiki kandi avuga ko nk’ubuyobozi bukuriye abafite ubumuga butari buzi ko uriya mwana ahari kuko byari byarahishwe gusa ngo abaturanyi b’umuryango we bari babizi ariko na bo baranze kubihingutsa.

    Ni umwana wa Ndayambaje Jean Pierre na Mukeshimana Epiphanie ariko kubera amakimbirane umugabo ntahaboneka buri gihe.

    Uwo mwana bigaragara ko ananutse bikabije, akagira imisatsi yacuramye, ubona ameze nk’utajyaga ku kazuba cyangwa ngo yitabweho.

    Yavutse mu 2016, avukira mu Murenge wa Nyundo, Akagari ka Nyundo, Umudugudu wa Kiziguro ari ho umuhuzabikorwa w’abafite ubumuga yamusanze.

    Bitwayiki avuga ko nyuma yo kubimenya yagiye mu rugo asanga nta muntu uhari atumaho Mukeshimana ngo aze bavugane kuko yamushakaga.

    Agira ati “Yaje ndamuganiriza mwereka ko bidakwiye guheza umwana mu nzu abona kumunyereka”.

    Mukeshimana avuga ko umwana we atamutererana ahubwo amusiga mu nzu kuko ntawundi yamusigira ngo ajye gushaka imibereho mu gihe umugabo atabitayeho.

    Bitwayiki avuga ko yasanze ari umwana ufite ubumuga bukomatanyije kubera kutitabwaho.

    Ai “Ni umwana uteye impuhwe, imisatsi yaracuramye, nta rugingo rukora kubera ko atafashijwe akiri muto.”

    Akomeza agira ati “Ni umwana mwiza, namufashe ngira ngo ndebe ingingo ko zakora ukabona araseka, twamusohoye abana b’abaturanyi ubona bishimiye kumubona kuko batari basanzwe bamubona.”

    Mukeshimana avuga ko ibibazo umwana afite bikomoka ku makimbirane mu rugo kuko umugabo amutererana bigatuma amusiga ngo ashobore kubona ikibatunga.

    Ati “Umwana ngerageza kumwitaho ikibazo ni ubushobozi, umugabo araduta ntaduhahira, bikaba ngombwa ko njya gushaka ikidutunga.”

    Mukeshimana ufite abana babiri avuga ko ubuzima abayeho atari bwiza ku buryo kurera uyu mwana adafite umufasha bigoye.

    Abaturanyi ba Mukeshimana bemeza ko uyu mubyeyi abayeho mu buzima bugoye akaba akeneye gufashwa.

    Bitwayiki avuga ko hakenewe ubutabazi bwihuse mu gufasha uyu mwana. Ati “Akeneye ubutabazi bwihuse burimo igare rimufasha kwicara, imisatsi yaracuramye hakenewe ibihabwa umwana ufite imirire mibi, gusa hakenewe ko nyina afashwa kugira ngo ashobore gutunga umuryango.”

    Akomeza agira ati “Iyo urebye uyu mwana umugirira impuhwe kubera uko ameze, gusa n’umuryango abayemo ukeneye gufashwa, kuko inzu umuryango ubamo si iyabo irakodeshwa kandi batakoze ntibayigumamo, hakenewe ko uyu mubyeyi ashyirwa muri VUP.”

    Byagiye bivugwa kenshi ko abana bafite ubumuga bahishwa mu nzu, uyu akaba rumwe mu ngero z’abana bakorerwa bene iryo hohoterwa.

    Inkuru dukesha : Kigali Today

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Rubavu-Inkuru-iteye-agahinda-y-umwana-ufite-ubumuga-umaze-imyaka-5-atava-mu-nzu

  • Salomon Nirisarike wifuzwaga n'amakipe yo mu bihugu by'Abarabu yongereye amasezerano muri Urartu FC yo muri Armenia. #rwanda #RwOT

    Myugariro w'ikipe y'igihugu y'u Rwanda Amavubi, Nirisarike Salomon w'imyaka 24 yongereye amasezerano mu ikipe ya Urartu FC yo mu kiciro cya mbere mu gihugu cya Armenia.

    Kongera amasezerano kwa Salomon bikozwe mu gihe hari amakuru yavugaga ko ashobora kwerekeza mu bihugu by'Abarabu dore ko ngo n'ibiganiro byari byatangiye hagati y'umuhagarariye ndetse n'amwe mu makipe yaho.

    Nkuko byatangajwe n'ubuyobozi bw'ikipe ya Urartu FC bubonyujije ku rubuga rwa Twitter, batangaje ko uyu mukinnyi yongereye amasezerano.

    Iyi kipe ikaba yagize iti'Twishimiye gutangaza ko myugariro w'umunyarwanda Salomon Nirisarike azakomeza gukinira ikipe ya Urartu Fc. Uyu mukinnyi wa Urartu Fc yongereye amasezerano ye y'akazi.'

    Nubwo hatatangajwe uko amasezerano ye mashya angana, uyu myugariro Salomon Nirisarike yongereye amasezerano muri iyi kipe nyuma yaho yari ayimazemo umwaka umwe kuko yayigezemo muntangiriro z'uyu mwaka w'imikino wa 2020-2021.

    Ari muri iyo kipe Salomon yakinnye imikino 14, ayifasha gusoza ku mwanya wa gatatu aho bahise banabona itike yo gukina imikino y'marushanwa mashya yo ku mugabane w'i Burayi yiswe 'Europa Conference League.'

    Salomon Nirisarike yakinnye kandi mu ikipe ya FC Pyunik nayo yo muri Armenia, uyu myugariro yanyuze mu FC Tubize, Sint-Truiden na Royal Antwerp zo mu Bubiligi.

    The post Salomon Nirisarike wifuzwaga n'amakipe yo mu bihugu by'Abarabu yongereye amasezerano muri Urartu FC yo muri Armenia. appeared first on RUSHYASHYA.

    Source : https://rushyashya.net/salomon-nirisarike-wifuzwaga-namakipe-yo-mu-bihugu-byabarabu-yongereye-amasezerano-muri-urartu-fc-yo-muri-armenia/?utm_source=rss&utm_medium=rss&utm_campaign=salomon-nirisarike-wifuzwaga-namakipe-yo-mu-bihugu-byabarabu-yongereye-amasezerano-muri-urartu-fc-yo-muri-armenia

  • Indi foto yakoze benshi ku mutima #rwanda #RwOT

    Ni ifoto igaragaza umugabo n’umugore bari mu muhanda bagenda, umugabo ari imbere ateruye umwana ushobora kuba ari uwabo mu gihe umugore we amuri inyuma yiumba agakoni.

    Bigaragara ko aba bantu ari umuryango aho bari bagiye kwa muganga, umugore bigaragara ko nta ntege afite kuko yicumba agakoni ariko umugabo we yamutwaje umwana.

    Iyi foto yashyizwe kuri Twitter ya Plaisir Muzogeye, yayiherekesheje amagambo agira ati 'Kugendana muri uru rugendo rw’ubuzima.'

    Ni ifoto yakoze ku mutima benshi bakoresha urubuga rwa Twitter aho bagiye bashima uyu mufotozi wafashe ifoto ifite byinshi ivuga kuko igaragaza uburyo uburinganire bumaze kuganza.

    Uyu mufotozi kandi aherutse gufata ifoto igaragaza abana b’abakobwa babiri bariho bajya ku ishuri bari ku nkengero z’umuhanda mu gihe irushanwa rya Tour du Rwanda ryariho riba ariko abo bana ubona berecyeje umutima ku cyabagenzaga.

    Aba bana kandi bari bahanye intera banambaye udupfukamunwa neza nka zimwe mu ngamba zo kwirinda icyorezo cya COVID-19, ifoto yabo yashyizwe kuri Twitter n’Umuvugizi wa Polisi y’u Rwanda, CP John Bosco Kabera ashima uburyo bariya bana bubahiriza amabwiriza yaba ari ay’umuhanda ndetse n’ayo kwirinda COVID-19.

    Bariya bana bitwa Ange na Loaunge biga mu ishuri rya G.S Rusiga mu Karere ka Rulindo, baherutse kugenerwa ibihembo n’ubuyobozi bw’Akarere gusa Muzogeye wafashe iriya foto yabo na we yabageneye igihembo cyo kuzabishyurira ishuri kugeza barangije amashuri abanza.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Indi-foto-yakoze-benshi-ku-mutima

  • Ibyo wamenya ku mubano n’ubufatanye bw’u Rwanda na Pologne, igihugu gishya rwafunguyemo Ambasade –

    Ni Ambasade ya 40 u Rwanda rugize mu mahanga, zivuye kuri 34 rwari rufite mu 2017 na 39 rwari rufite mu 2020.

    Prof Shyaka Anastase wari uherutse gusimbuzwa ku buyobozi bwa Minisiteri y’Ubutegetsi bw’Igihugu, niwe wahawe izi nshingano. Yashimiye Perezida Kagame wamuhaye imirimo mishya yo guhagararira u Rwanda muri iki gihugu cyo mu Burayi bwo hagati.

    Mu butumwa yanyujije kuri Twitter, yagize ati “Niteguye gutumika, ngatebuka ntategwa ku nkiko iyo, ngo duhamye ubudasa bw’u Rwanda n’Igitego cyacu.”

    Uyu mugabo wahawe inshingano zo guhagararira u Rwanda muri Pologne ni umwe mu babaye igihe kinini muri iki gihugu dore ko amashuri ye ya kaminuza kugeza ku cyiciro gihanitse cya PhD ariho yayize.

    Prof Shyaka icyizeyo icyiciro cya gatatu cya Kaminuza mu bijyanye n’ikoranabuhanga ryifashishwa mu binyabutabire, icyiciro cya gatatu cya kaminuza mu bijyanye n’ubucuruzi ndetse n’icyiciro gihanitse cya Kaminuza, PhD mu bumenyi bwa Politiki.

    Uretse kuba Prof Shyaka yarize mu gihugu cya Pologne hari amakuru IGIHE ifite avuga ko umugore we bafitanye abana batatu afite inkomoko muri Pologne ariko ubu bakaba babana mu Rwanda.

    Ibihugu byombi byari bisanzwe bifitanye umubano

    U Rwanda na Pologne bisanzwe bifitanye umubano ushingiye ku bufatanye mu bucuruzi kuko nko mu 2016, itsinda ry’abashoramari bahagarariye ibigo 10 byo muri Pologne bikora mu bijyanye no gutunganya umusaruro ukomoka ku buhinzi n’ubworozi, ikoranabuhanga, ubuvuzi n’iby’imiti, ndetse n’abatanga serivisi zo kwakira abantu bagiriye uruzinduko mu Rwanda.

    Ni uruzinduk0 rwabaye nyuma y’amasezerano Urugaga rw’Abikorera mu Rwanda, PSF, rwarasinyanye n’urwo muri Pologne mu 2014, aho bumvikanye ubufatanye mu guhanahana amakuru ajyanye n’ubucuruzi, gusangizanya ubunararibonye ndetse n’amahirwe y’ubucuzi mu bihugu byombi.

    Muri urwo ruzinduko, abashoramari bo muri Pologne beretswe inzira y’iterambere u Rwanda rwahisemo ndetse n’amahirwe ahari bashobora gushoramo imari n’uburyo igihugu cyorohereza abashoramari baturutse mu bihugu by’amahanga.

    Nyuma y’imyaka mike, muri Kamena 2018, Abashoramari bo muri Pologne batangiye umushinga w’uruganda rwa LuNa Smelter Ltd rukorera imirimo yo gutunganya gasegereti i Karuruma mu karere ka Gasabo.

    Ni rwo ruganda rwa mbere mu Karere ka Afurika y’Iburasirazuba, rufite ubushobozi bwo gushongesha rukanatunganya gasegereti mu gihe mu myaka yashize, yacukurwaga ikajya gutunganyirizwa mu mahanga.

    Kuri ubu uru ruganda rutanga imirimo ku banyarwanda barenga 100, rugakorana n’amakoperative afite ibirombe bicukura gasegereti ndetse rukaba rufite abahanga baturutse muri Pologne bafasha mu gutunganya gasegereti.

    Mu myaka ya 2017, Amb Igor César wari uhagarariye u Rwanda mu bihugu birimo Pologne, yagiranye ibiganiro na Perezida w’icyo gihugu, Andrzej Duda aho yamusabye ko ibiganiro ku mishinga y’amasezerano yari hagati y’ibihugu byombi yakwihutishwa.

    Mu byo Amb Igor yasabye ni ibiganiro ku mishinga y’amasezerano yo gukuraho isoreshwa ry’ibicuruza ku mpande ebyiri (Double Taxation) n’ayo guteza imbere no kubungabunga ishoramari (Promotion and Protection of Investment).

    Mu mwaka wakurikiyeho wa 2018, uwari Minisitiri w’Ububanyi n’Amahanga wa Pologne, Jacek Czaputowicz yagiriye uruzinduko mu Rwanda. Icyo gihe ibihugu byombi byaganiriye ku bufatanye mu bijyanye n’umutekano no kugarura amahoro ku Isi, ubuhinzi nk’urwego Pologne ifitemo ubunararibonye n’ibindi.

    Kuva ku wa 11 Gicirasi 2021, Minisitiri w’Ububanyi n’Amahanga n’Ubutwererane w’u Rwanda, Dr Biruta Vincent, yagiriye uruzinduko rw’iminsi itatu muri Pologne aho yakiriwe na mugenzi we w’icyo gihugu, Zbigniew Rau.

    Minisitiri Zbigniew Rau yavuze ko uruzinduko rwa Minisitiri Dr Biruta ari ingenzi cyane mu gushimangira umubano n’ubufatanye hagati y’ibihugu byombi cyane ko basinyanye amasezerano atandukanye.

    Yagize ati “Ubufatanye bwacu buri gutera imbere mu nzego zitandukanye. Ibi byagaragaje ko hari n’ibindi bishoboka, muri aya masezerano atatu twasinyanye uyu munsi n’inama zitandukanye intumwa z’u Rwanda zagiranye n’ibigo n’inganda zacu muri Pologne mu gushyira mu bikorwa imishinga ibyara inyungu ku isoko ryo mu Rwanda.”

    Icyo gihe kandi Minisitiri Zbigniew Rau yavuze ko umubano w’ibihugu byombi uri kugana ahashimishije cyane ko abanyeshuri benshi bo mu Rwanda bari guhitamo kujya kwiga muri icyo gihugu aho kuva hagati ya 2018-2020, abarenga 1000 bari bamaze kujya kwiga muri kaminuza zo muri icyo gihugu zaba iza leta n’izigenga.

    Minisitiri Dr Biruta yahavuye impande zombi zisinyanye amasezerano atatu arimo ay’ubufatanye mu rwego rw’uburezi, ubufatanye mu mu rwego rw’umutekano by’umwihariko mu kurwanya ibyaha bikorerwa kuri Internet. Ibihugu byombi kandi byasinye amasezerano ashyiraho uburyo bw’ibiganiro bya politiki bizajya bikorwa binyuze muri Minisiteri z’Ububanyi n’Amahanga z’ibihugu byombi.

    Minisitiri Dr Biruta na mugenzi we, kandi bemeranyije guteza imbere umubano w’ibihugu byombi hibandwa ku bikorwa by’ubucuruzi n’ishoramari, cyane cyane mu nzego zishinzwe guhanga udushya.

    Muri urwo ruzinduko kandi Minisitiri Dr Biruta n’intumwa bari bajyanye bagiranye ibiganiro n’abayobozi b’ibigo birimo ibyo muri Mazovia na Upper Silesia.

    Icyo gihe kandi ngo ibigo bitanga serivisi z’ikoranabuhanga muri Pologne byagaragaje inyota yo kuza ku isoko ryo mu Rwanda nyuma yo gusobanurirwa uko u Rwanda rworohereza abashoramari ndetse n’uburyo rufite Internet igera hafi ya hose mu gihugu.

    Amahirwe mu burezi

    Pologne ni kimwe mu bifite urwego rw’uburezi rwubatswe neza mu myaka ishize ndetse kiri mu bihugu bifite uburezi buteye imbere cyane mu Burayi.

    Iki gihugu kiri mu byohereza abanyeshuri benshi muri za Kaminuza, uburezi bwihariye 1 % by’umusaruro mbumbe w’igihugu, buza ku mwanya wa Gatanu mu Burayi, n’ubwa 11 ku Isi hose.

    Kugeza uyu munsi binyuze mu bafite imishinga ifasha abanyeshuri kubona za kaminuza zo mu mahanga bigamo, muri Pologne hajya kwigayo nibura abanyarwanda 300 buri mwaka.

    Umwe mu barangije muri Wyższa Szkoła Bankowa [WSB University] mu Mujyi wa Poznań muri Pologne, mu 2019, yabwiye IGIHE ko uburezi bwo muri iki gihugu buri ku rwego rwo hejuru kandi abanyarwanda bakunze kugirirayo amahirwe.

    Ati “Urumva kwiga hariya uri umunyarwanda biba bifite icyo bivuze, icya mbere ni ubwo burezi uhavana ariko hari n’uburyo usanga abanyarwanda baba bafashwe neza hariya ku buryo waba ushaka nko gukora imenyereza mwuga.

    Yakomeje agira ati “Byorohera n’abanyarwanda kubona akazi cyane cyane ku banyeshuri baba batiga amasaha yose ku munsi. Nkanjye nigaga nimugoroba ku manywa nkajya mu kazi kandi wasangaga biba byoroshye ndetse bigafasha kurangiza amashuri umaze no kugira ubunararibonye.”

    Kaminuza zo muri iki gihugu usanga zibanda ku masomo y’Ubucuruzi (Business), Ubuvuzi (Medecine) na Farumasi.

  • Serge Brammertz yakurugutuye Afurika y’Epfo icumbikiye Kayishema ukurikiranweho gusenyera Kiliziya ku Batutsi –

    Kayishema Fulgence wahoze ari Umugenzacyaha wa Komine Kivumu muri Perefegitura ya Kibuye, ashinjwa ibyaha bya Jenoside birimo kuba umufatanyacyaha w’abakoze Jenoside, ubwumvikane bugamije gukora Jenoside n’ibyaha byibasiye inyokomuntu byakorewe muri Komine Kivumu, hagati y’itariki ya 6 n’iya 20 Mata 1994.

    Tariki ya 15 Mata 1994, Kayishema yategetse kandi acura umugambi wo gusenya Kiliziya ya Nyange, yarimo Abatutsi barenga 2000 babuze uko basohokamo bagapfiramo.

    Hashize igihe IRMCT igaragaza ko Kayishema aba muri Afurika y’Epfo nk’impunzi, nyamara icyo gihugu cyanze kumufata nubwo yashyiriweho impapuro mpuzamahanga zo kumuta muri yombi n’igihembo cya miliyoni eshanu z’amadolari k’uzamufata.

    Afurika y’Epfo yabaye ubwihisho bw’abakoze Jenoside

    Ku wa 8 Kamena 2021 ubwo yari imbere y’Akanama k’Umuryango w’Abibumbye gashinzwe Umutekanoku Isi, Dr Serge Brammertz yavuze ko ibyo Afurika y’Epfo ikomeje gukora yanga gutanga Kayishema ari nko kwerekana ko ari ahantu hatekanye ku bakekwaho uruhare muri Jenoside yakorewe Abatutsi.

    Yagize ati “Uko ibintu bihagaze uyu munsi, abayobozi ba Afurika y’Epfo bari gutanga ubutumwa buvuga ko igihugu cyabo ari ubwihisho ku ba Jenosideri bahunze. Uruhare rw’Akanama k’Umuryango w’Abibumbye gashinzwe Umutekanoku Isi rurakenewe cyane. Gukomeza kunanirwa kubahiriza imyanzuro y’aka kanama bigomba kugira ingaruka.”

    Dr Serge Brammertz yakomeje avuga ko igenzura ibiro bye byakoze mu 2018 ryagaragaje ko Kayishema ari muri Afurika y’Epfo.

    Ati “Tugendeye ku bimenyetso n’abaduha amakuru, ibiro byanjye mu 2018 byanzuye ko Kayishema aba muri Afurika y’Epfo muri Cape Town. Ibi kandi byanemejwe n’abayobozi ba Afurika y’Epfo binyuze muri Interpol muri Kanama mu 2018.”

    Yakomeje avuga ko nyuma yo kumenya aya makuru bakoze ibishoboka byose kugira ngo Kayishema atabwe muri yombi ariko biranga biba iby’ubusa.

    Ati “Ako kanya twahise twohereza ubusabe bw’uko Afurika y’Epfo yadufasha kumuta muri yombi, ariko twatunguwe no kubwirwa ko Kayishema yahawe ubuhungiro muri Afurika y’Epfo, ko atatabwa muri yombi binyuze muri ubu buryo. Uru rwitwazo rwaje gukurwaho nyuma y’amezi make, rusimbuzwa urundi rwo kuvuga ko Afurika y’Epfo idafite amategeko ateganya ko yafatanya muri ubu buryo.”

    Amakuru dukesha All Africa avuga ko nyuma y’aya magambo ya Dr Serge Brammertz uhagarariye Afurika mu Muryango w’Abibumbye yijeje ko ikibazo cya Kayishema cyagejejwe mu bayobozi bo hejuru b’iki gihugu ndetse ko hari gukorwa ibishoboka byose ngo iki gihugu gikore igikwiye.

    Si ubwa mbere Dr Serge Brammertz asaba ko Kayishema atabwa muri yombi kuko no mu Kuboza 2020 yasabye Akanama k’Umutekano ka Loni ubufasha mu guhatira Afurika y’Epfo.

    Muri Mata mu 2021 ubwo yari mu Rwanda mu rwego rwo gutegura raporo ihoraho ashyikiriza Akanama gashinzwe Umutekano mu Muryango w’Abibumbye kabiri mu mwaka, Dr Serge Brammertz yavuze ko hari gushyirwa imbaraga nyinshi mu gufata no kuzana abasize bahekuye u Rwanda muri Jenoside yakorewe Abatutsi mu 1994, cyane ko bamwe bamaze kumenya aho baherereye.

    Uretse Kayishema mu bandi bashakishwa na IRMCT batarafatwa harimo Protais Mpiranya wahoze ari komanda w’Umutwe w’abasirikare barindaga Perezida Habyarimana, Munyarugarama Phénéas wahoze ari Lt Col mu Ngabo z’u Rwanda; Ndimbati Aloys wahoze ari Burugumesitiri wa Komine ya Gisovu muri Perefegitura ya Kibuye, Sikubwabo Charles na Ryandikayo.

    Hashyizweho igihembo cya miliyoni 5$ ku muntu wese uzafata kayishema Fulgence

    Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Dr Serge Brammertz yanze Afurika y’Epfo yanze gutanga Kayishema Fulgence