Harabura umukino umwe igikombe cya shampiyona 2021 kikabona nyiracyo, ni hagati ya APR FC na AS Kigali zinganya amanota aho zizakiranurwa n’umunsi wa nyuma imwe ikina na Espoir FC indi ikina na Police FC, ni mu gihe aya makipe ari yo azasohokera u Rwanda mu mikino Nyafurika.
Ni nyuma y’uko AS Kigali yatsinze Bugesera FC 1-0, APR FC ikaba yanyagiye Marines 6-0.
Umukino wagombaga guhuza Rayon Sports na Rutsiro FC muri iki cyiciro cy’amakipe ahatanira igikombe cya shampiyona 2021 ukaba wari wasubitswe bitewe n’uko akarere ka Rubavu hagombaga kubera uyu mukino kashyizwe muri Guma mu Karere.
Umukino wabanje muri iki cyiciro ni uwo Police FC yakiriye Espoir FC ku isaha ya saa 12:00′ ku kibuga cya Bugesera.
Umukino waje kurangira ku ntsinzi ya Police FC y’ibitego 2-1. Ibitego bya Police FC byatsinzwe na Nsabimana Aimable kuri penaliti na Martin Fabrice Twizeyimana ni mu gihe Espoir FC yatsindiwe na Muhozi Fred.
Iki kibuga cyahise cyakira umukino wa Bugesera FC yakiriye AS Kigali yari iyoboye urutonde n’amanota 13 aho yanganyaga na APR FC ariko AS Kigali yari izigamye ibitego 9, APR FC ikazigama 8.
AS Kigali ntiyari ifite Emery Bayisenge aho umutoza yari yahisemo kumubanza hanze, ntiyari ifite kandi Muhadjiri na Lawal bari bafite ikibazo cy’imvune.
AS Kigali yatangiye umukino isatira cyane ishaka igitego ku kabi na keza, yasatiraga ariko abasore barimo Orotomal Alex bari mu busatirizi bwa AS Kigali ntibabashije kureba mu izamu ryari ririnzwe na Amani.
Nkinzingabo Fiston yagiye agerageza amashoti ya kure ariko umunyezamu aba maso. Igice cya mbere cyarangiye ari 0-0.
AS Kigali yaje mu gice cya kabiri yariye Karungu mu gice cya kabiri maze ku munota wa 55 Nkinzingabo Fiston wari wagerageje uburyo bwinshi mu gice cya mbere atsindira AS Kigali igitego cya mbere. Umukino warangiye ari 1-0.
I Huye ikipe ya APR FC yari yakiriye Marines, ni umukino APR FC yatangiye isatira cyane ariko umunyezamu Fiacre aba maso, yaje no kugira ikibazo cy’imvune asimburwa na Ntagisanayo Serge.
Kuri uyu munota Mugiraneza Frodouard yagerageje ishoti rikomeye ariko umunyezamu Ishimwe Pierre awushyira muri koruneri.
Kuva kuri uyu mukino APR FC yasatiriye cyane igenda ibona amahirwe ariko abakinnyi b’iyi kipe bagenda bayapfusha ubusa aho banagowe cyane n’ubwugarizi bw’iyi kipe.
Nshuti Innocent wa APR FC yagiye abona amahirwe ariko ayapfusha ubusa. Bosco Ruboneka yateye mu izamu rya APR FC ishoti rikomeye ariko umupira ukubita umutambiko w’izamu.
Ku munota wa 43, Jacques Tuyisenge yacomekewe umupira mwiza na DJabel asigara arebana n’umunyezamu ariko ateye mu izamu unyura hanze gato yaryo. Yongeye kubona andi mahirwe ku munota wa 45 aroba umunyezamu Serge ariko myugariro wa Marines arahagoboka awohereza muri Koruneri. Amakipe yagiye kuruhuka ari 0-0.
APR FC yaje mu gice cya kabiri ishaka igitego iza no kukibona ku munota wa 51 cya Manishimwe Djabel.
Yakomeje gusatira maze ku munota wa 66 Lague ashyiramo icya kabiri hari mbere y’uko Omborenga Fitina ashyiramo icya gatatu ku munota wa 68.
Byiringiro Lague yongeye gutsinda ku munota wa 78 ndetse na 81, mu gihe Mugunga Yves yashyizemo icya nyuma ku munota wa 89. Umukino warangiye ari 6-0.
Nyuma y’uko aya makipe atsinze imikino y’uyu munsi, APR FC niyo iyoboye n’amanota 16 izigamye ibitego 16, AS Kigali nayo ifite 16 izigamye ibitego 10, bivuze ko bizasobanuka ku munsi wa nyuma APR FC ikina Rutsiro FC mu gihe AS Kigali izasoreza kuri Police FC. Gusa AS Kigali ikaba isabwa gukuramo iki kinyuranyo cy’ibitego 4 yashyizwemo na APR FC.
Nk’uko amategeko ya shampiyona y’uyu mwaka abivuga, amakipe abiri ya mbere muri shampiyona niyo azasohokera u Rwanda mu mikino Nyafurika, bivuze ko ari APR FC na AS Kigali kuko amakipe bari kumwe ntayizageza amanota 16 zifite.
Ikimenyetso cyakorewe i Wembley mbetre y’umukino w’u Bwongereza na Scotland cyakoze ku mitima ya mbenshi
Uyu mukino warangiye amakipe yombi aguye miswi 0-0
  Â