Webrwanda Backend

Category: Uncategorized

  • Messi na Ramos bayoboye ikipe yabakinnyi 11… – #rwanda #RwOT

    Kuri uyu wa Kane tariki ya 01 Nyakanga 2021, nibwo benshi mu bakinnyi I Burayi basoje amasezerano bari bafite mu makipe bakiniraga, kuko yarangianye na tariki ya 30 Kamena.

    Aba bakinnyi bose basoje amasezerano bemerewe kuvugana n'ikipe iyo ariyo yose yabifuza ubwabo nta rundi ruhande banyuzeho.

    Mu izamu: Gianluigi Donnarumma

    Uyu munyezamu ukomoka mu Butaliyani, umaze imyaka itanu akinira AC Milan, yamaze gusoza amasezerano yari afite muri iyi kipe ndetse akaba nta biganiro byo kongera amasezerano yigeze yifuza kugiraubuyobozi.

    Donnarumma w'imyaka 22 y'amavuko ashobora kwerekeza muri Paris Saint-Germain yo mu Bufaransa cyangwa Juventus de Turin.

    Mu Bwugarizi:

    Sergio Ramos: Uyu munya-Espagne w'imyaka 35 y'amavuko, yamaze gusezera muri Real Madrid yari amazemo imyaka 16, nyuma yuko hari ibyo atumvikanaga n'ubuyobozi bw'ikipe ku masezerano mashya, byatumye yanga kuyongera, ubu ni umukinnyi wigurisha.

    Ramos ashobora kwerekeza muri PSG cyangwa muri Inter Milan yo mu Butaliyani.

    Jerome Boateng: Uyu myugariro wakiniraga Bayern Munich, yamaze gusoza amasezerano ntiyongererwa andi, nawe arigurisha.

    Boateng w'imyaka 32 y'amavuko, ashobora kwerekeza muri Monaco, Roma cyangwa Tottenham.

    Elseid Hysaj: Uyu munya- Albania ukina aca ku mpande wakiniraga ikipe ya Napoli guhera mu 2015, yayikiniye imikino 157, kuri ubu ni umukinnyi wigurisha.

    Ezgjan Alioski: Uyu munya-Macedonia y'amajyaruguru wanagaragaye mu irushanwa rya Euro 2020, ni umwe mu bakinnyi bigaragaje cyane mu ikipe ya Leeds gusa kuri ubu yamaze gusoza amasezerano, arigurisha.

    Mu kibuga hagati:

    Juan Mata: Uyu mukinnyi waraye asoje amasezerano yari afite muri Manchester United mu ijoro ryo ku wa gatatu, magingo ay anta kipe afite n'ubwo bivugwa ko ku myaka ye 33 y'amavuko, iyi kipe yo mu Bwongereza yifuza kumusinyisha undi mwaka umwe w'amasezerano.

    John Lundstram: Uyu mwongereza w'imyaka 27 y'amavuko, ni umwe mu bakinnyi ba Sheffield United basoje amasezerano, ubu badafite ikipe.

    Jeffrey Schlupp: Ntabwo Crystal Palace yakiniraga yifuje kongera amasezerano uyu mukinnyi w'imyaka 28 y'amavuko, dore ko nta biganiro n'ubuyobozi birabaho, ubu ariguirisha, yavugana n'ikipe iyo ariyo yose yamwifuza.

    Ubusatirizi:

    Lionel Messi: Uyu munya-Argentine wasoje amasezerano muri FC Barcelona mu ijoro ryo kuri uyu wa gatatu tariki ya 30 Kamena 2021, ubu arigurisha nta kipe afite, yemerewe kuvugana n'iyamwifuza yose.

    Amakipe arimo PSG na Manchester City biravugwa ko ariyo amwifuza ndetse na Inter Miami yo muri Amerika, nubwo ashobora kongera amasezerano muri Barcelona amazemo imyaka 21.

    Stevan Jovetic: Uyu mukinnyi w'imyaka 31 wakiniye Manchester United, magingo aya ari ku isoko yigurisha, dore ko nta kipe afite nyuma yo gusoza amasezerano muri Monaco yari amazemo imyaka 4.

    Josh King: Uyu rutahizamu w'imyaka 29 wakiniraga ikipe ya Everton, yamaze gusoza amasezerano muri iyi kipe ndetse ubu yemerewe kuganira n'iyamwifuza yose nyuma yo kudahirwa i Goodison Park muri uyu mwaka, nyuma yo kuva muri AFC Bournemouth abica bigacika.

    Abandi bakinnyi basoje amasezerano kandi beza i Burayi: Willy Caballero, Nikola Maksimovic, David Luiz, Mamadou Sakho, Gary Cahill, Scott Dann, Ryan Bertrand, Patrick van Aanholt, Nathaniel Clyne, Branislav Ivanovic, Adam Smith, Ahmed Elmohamady, Martin Kelly, Joel Ward, Jack Wilshere, Robbie Brady, Adam Reach, James McCarthy, Santos Borre, Dwight Gayle, Troy Deeney, Kevin Gameiro, Andy Carroll, Connor Wickham, Hal Robson-Kanu, Andros Townsend, Robin Quaison, Marcos Paulo, Jacob Murphy, Andre Ayew, Jose Izquierdo, Christian Atsu na Junior Stanislas.

    Ikipe y’abakinnyi 11 beza i Burayi basoje amasezerano

    Donnarumma ashobora kwisanga muri PSG cyangwa Juventus

    Messi uri gukina Copa America ashobora kuyisoza asinyira ikipe nshya   

    Source : https://inyarwanda.com/inkuru/107129/messi-na-ramos-bayoboye-ikipe-yabakinnyi-11-beza-i-burayi-basoje-amasezerano-mu-makipe-bak-107129.html

  • Abarenga 1100 bafashwe barenze ku mabwiriza mashya yo kwirinda Covid-19 mu Majyaruguru – #rwanda #RwOT

    Polisi y’Igihugu ikorera muri iyo Ntara, yatangaje ko muri rusange bigaragara ko abantu bagerageje kubahiriza amabwiriza mashya yashyizweho kuwa 28 Kamena 2021 yagombaga gutangira kubahirizwa kuwa 1 Nyakanga 2021 nubwo hari bamwe hari bamwe bagaragaye mu makosa yo kuyarengaho nkana.

    Mu bafashwe harimo 232 batubahirije amasaha yo kugera mu rugo ku isaha ya saa kumi n’ebyiri, abandi bafatwa kubera kutubahiriza andi mabwiriza arimo kutambara neza agapfukamunwa, kudahana intera byibuze ya metero ndetse hari n’abafashwe bari mu tubari banywa inzoga.

    Umuhuzabikorwa w’Ibikorwa bya Polisi n’abaturage, CIP Alex Ndayisenga yanenze iyi myitwarire yo kurenga ku mabwiriza aba yaratanzwe kandi barahawe igihe gihagije cyo kwitegura, asaba abaturage guhindura iyo myumvire.

    Yagize ati “Ibi ntibikwiye mu gihe hatanzwe igihe gihagije cyo gusobanurirwa no kwitegura gushyira mu bikorwa ibikubiye mu mabwiriza mashya, Polisi ikaba itazihanganira abadashaka kumva bica amabwiriza nkana mu gihe imibare y’abandura Covid-19 n’abo ihitana ikomeje kwiyongera.”

    Mu bantu bafashwe kuri uyu munsi wa mbere harimo 55 bafatiwe mu tubari banywa inzoga, bakaba bajyanywe ahantu hatandukanye haba harateguwe ngo bahugurwe ubundi bacibwe n’amande yateganyijwe.

    Mu gihe muri iyi minsi umubare w’abandura Covid-19 ukomeje kwiyongera mu Rwanda, Intara y’Amajyaruguru nayo ni uko kuko mu banduye mu minsi ine ishize bangana na 3287, Amajyaruguru afitemo 816.

    Urubyiruko rw’abakorerabushake rwagize uruhare rukomeye mu gukurikirana iyubahirizwa ry’amabwiriza yo kwirinda Covid-19

    Muri Musanze hari bamwe bafashwe barenze ku mabwiriza ku munsi wa mbere wo kubahiriza amabwiriza mashya

  • Nyanza: Imiryango 497 yabaga mu nzu zimeze nka nyakatsi yafashijwe kuzivugurura – #rwanda #RwOT

    Umuyobozi w’Akarere ka Nyanza, Ntazinda Erasme, yavuze ko uwo muhigo bari barihaye bamaze kuwesa mu 2021, bakaba bari kuri kubarura abandi kugira ngo nabo bafashwe.

    Yagize ati “Hari abaturage twari twabaruye mu 2017 bari bafite amazu ameze nabi, uyu mwaka turangije kubafasha gusana amazu yabo bose, ariko ntibivuga ko abafite amazu ameze nabi mu Karere ka Nyanza barangiye, ni igikorwa kizakomeza igihe cyose hakiri abantu bagaragara ko bafite amazu ameze nabi.”

    Ntazinda yavuze ko icya mbere bakora ari ukubibutsa ko inzu zabo zikwiye kuvugururwa no kubereka uko byakorwa, abafite ubushobozi bakabyikorera naho abakeneye ubufasha bakabuhabwa.

    Hari abubakirwa inzu yose bakayihabwa yuzuye, abazamura inzu bagahabwa isakaro ndetse n’abo abaturanyi baza kubakira mu buryo bw’umuganda.

    Bamwe mu baturage bafashijwe kubakirwa inzu zo kubamo bavuga ko nyuma yo kubona aho kuba heza bagiye gushaka icyo bakora kibateza imbere.

    Matabaro Abeli wo mu Murenge wa Busasamana ati “Ubu ndishimye cyane kuko ubuyobozi bwanyubakiye inzu yo kubamo, ndatuje rwose kandi mpora mbasabira umugisha.”

    Umuyobozi w’Akarere ka Nyanza, Ntazinda Erasme avuga ko usibye ingengo y’imari bagenerwa na Leta, ubushobozi bwo gukemura ibibazo by’abaturage nk’ibyo babukura mu bafatanyabikorwa b’akarere.

    Muri uyu mwaka w’ingengo y’imari wa 2020/21 abafatanyabikorwa b’Akarere ka Nyanza batanze amafaranga y’u Rwanda miliyari 3 na miliyoni 141, angana na 15% y’ingengo y’imari y’akarere yose.

    Visi Perezida w’ihuriro ry’abikorera mu Karere ka Nyanza, Kabayiza Louis-Pasteur, avuga ko ayo mafaranga yakoreshejwe mu bikorwa bitandukanye birimo kubakira abatishoboye, kubaka amarerero y’abana, kubaka ubukarabiro, guhugura abahinzi, gutera ibiti by’imbuto ziribwa n’ibindi.

    Abafashijwe gusana inzu basabwe gutuza bagashaka icyo bakora kibateza imbere

    Akarere ka Nyanza kubakiye abafite inzu zitameze neza ku bufatanye n’abafatanyabikorwa

    Hari abamara kubakirwa bagahabwa n’ibikoresho by’ibanze bibafasha mu mibereho

    Imiryango itandukanye yari imaze igihe iba mu nzu zitameze neza yafashijwe kuzisana

    [email protected]

  • Ruhango: Mu mezi abiri bazaba bamaze kwishyura 100% Mituweli ya 2021/2022 #Rwanda #RwOT via @kigalitoday #rwanda #RwOT

    Habarurema yemeza ko mu mezi abiri bazaba bamaze kwishyura 100% Mituweri y
    Habarurema yemeza ko mu mezi abiri bazaba bamaze kwishyura 100% Mituweri y’umwaka wa 2021-2022

    Byatangarijwe mu kiganiro n’abafatanyabikorwa mu iterambere ry’Akarere ka Ruhango, aho ubuyobozi bw’akarere bwagaragaje ko umwaka w’ingengo y’imari wa 2020-2021 urangiye ako karere kari ku mwanya wa kane mu kwishyura ubwisungane mu kwivuza.

    Bumwe mu buryo akarere n’abaturage bafatanyamo kwishyura amafaranga y’ubwisungane mu kwivuza harimo ibimina bya Mituweli muri buri mudugudu aho abaturage bagenda bakusanya amafaranga make make umwaka ukarangira buri muryango waramaze kwishyurira abawugize.

    Umuyobozi w’Akarere ka Ruhango, Habarurema Valens, avuga ko ashingiye kuri ubwo buryo babashije kwesa umuhigo wa Mituweli ku gipimo gishimishije umwaka ushize, kandi umwaka utaha batazasubira inyuma.

    Agira ati “Uyu mwaka w’ingengo y’imari urangiye turi aba kane mu gihugu hose, ubu amafaranga y’umwaka utaha wa Mituweli tumaze kwishyura ku kigero kiri hejuru ya 60%, bivuze ko mu mezi abiri ari imbere nibura tuzaba tugeze ku 100% twishyura amafaranga y’ubwisungane mu kwivuza dufatanyije n’abaturage”.

    Habarurema avuga ko mbere wasangaga kwishyura ubwisungane mu kwivuza bigorana cyane ku buryo wasangaga umwaka wa Mituweli urangira bageze hagati ya 15% na 20%, ariko byose byagenze neza nyuma y’uko ubuyobozi bugaragaje ko abaturage bafite uruhare rukomeye mu kwishakamo ibisubizo bagamije guteza imbere imibereho myiza yabo.

    Hari imidugudu yamaze kwishyura 100% bya Mituweli ya 2021-2022

    Abayobozi b’imidugudu muri aka karere bagaragaza ko komite zabo zashyize imbaraga mu kwegeranya amafaranga y’ubwisungane mu kwivuza hakurikijwe ibimina by’amasibo n’iby’amatsinda basanzwe bizigamiramo.

    Habimana Ferdinand uyobora umudugudu wa Gitwa avuga ko nta bintu bidasanzwe byokozwe ngo abaturage babe bamaze kwishyura ubwisungane mu kwivuza umwaka wa 2022.

    Agira ati “Umuntu arizigamira mu kimina ayo bashoboye, igihe cyagera akishyurira umuryango we ntabwo byabagoye kuko agera bitamuvunnye, ibyo byatumye abaturage basigaye bivuza ku gihe batararemba”.

    Avuga ko gutanga Mituweli bikakubera urukingo ari byiza kurusha kwita ku bindi kuko kurwara bitungurana, kandi buri wese akwiye guhora yiteguye.

    Esperence Mujawayezu utuye mu Mudugudu wa Bugaramantare avuga ko kwishyurira mu midugudu bikorwa aho buri kimina gishyiraho umunsi wo kwakira ubwisungane mu kwivuza hakurikijwe ubushobozi bw’umunyamuryango.

    Agira ati “Buri mudugudu ufite konti kuri SACCO umukuru w’Ikimina ni Umuyobozi w’Isibo, iyo wujuje amafaranga wishyurira umuryango wawe, bahita bakwishyurira, amatsinda yandi twizigamiramo na yo aradufasha kuko abafite ubushobozi buke mu kimina cya Mituweli bashobora kwiguriza muri icyo kindi, ubwo ni uburyo twatsinzemo kandi budufasha”.

    Yongeraho ati “Iyo ufite Mituweli wishyura 200Frw, nk’ejo nivuje ntanze 220Frw biramfasha kuko nivuza ntararemba nta kibazo cyo kuvuga ngo ndarwaye, ubwo tumaze kwishyura uyu mwaka tugiye kongera twizigamire, tuzageza igihe cyo kwishyura turi imbere y’abandi bose”.

    Ku bijyanye na serivisi zishobora kutanyura abaturage ku bigo nderabuzima, ubuyobozi buvuga ko buzakomeza gukebura abatanga serivisi zitanoze ku baturage kandi baba bagize uruhare mu bibakorerwa.

    Mu bindi Akarere ka Ruhango kishimira ko kageze umwaka w’ingengo y’imari 2020-2021 ku bufatanye n’abafatanyanyabikorwa mu iterambere ryako harimo kubaka inzu zisaga 100 z’abatishoboye, ibikorwa by’amazi meza n’amashanyarazi ku baturage ariko byo bikaba bizakomeza kuko bikiri ku rugero ruto.


  • Twaganiriye! Kate Bashabe yavuze iherezo ryi… – #rwanda #RwOT

    Kate Bashabe yamenyekanye cyane  mu gutegura ibirori bya 'Posh Party', bihuriramo abantu b'ingeri zitandukanye cyane cyane abakora ubucuruzi kugira ngo bamenyekane, bahurize hamwe ibitekerezo bibafasha mu iterambere.

    Kate kandi yigeze gutegura ibirori yise ‘Soiree de champagne et Caviar’ byavugishije abatari bake bitewe n'ibiciro byo kwinjira muri iryo joro ryo gusangira dore ko umuntu umwe yasabwaga kwishyura amadorali magana abiri (200$) mu gihe batandatu bari kumwe bo bishyuraga amadorali igihumbi (1000$).

    Twagiranye ikiganiro n’uyu mukobwa mu gushaka kumenya byinshi byerekeye ibyo bitaramo ndetse n'indirimbo yitwa ‘You & I’ imaze imyaka ibiri yahurijemo ibyamamare birimo The Ben, Mani Martin, Andy Bumuntu, Christopher na Yvan Buravan, tumubaza niba hari izindi ndirimbo zizasohoka nyuma yayo nyuma y'abakunzi be batandukanye bagendaga babaza amakuru yerekeye Kate Bashabe.

    Kate Bashabe yavuze nta yindi ndirimbo izaza cyane ko n'iriya yayikoze hari ubutumwa yashakaga gutanga. Kate Bashabe yigeze kubwira InyaRwanda ko indirimbo ‘You & I’ bayikoze bitewe n'ubutumwa yifuzaga gutanga mu muryango nyarwanda bitewe n’uko aho akunze gutemberera agiye gufasha akenshi asanga abantu baratakaje icyizere. Avuga ko yari akeneye uburyo bwo guha abantu ubutumwa butuma basubirana icyizere, ni ko kwisunga abahanzi bakorana indirimbo.

    Yagize ati “Oya nta yindi, nta muziki hari impamvu twari twakoze iriya ndirimbo nta yindi ndirimbo.'' Ku bijyanye n'ibitaramo Kate yagize ati “Wabitegura gute se muri iyi Covid nta muntu uzi uko bizagenda”. Muri 2010, Bashabe yatsindiye amarushanwa ya Miss MTN ndetse anaba Ambasaderi wa MTN muri uwo mwaka. Mu gihe yarangije amashuri yisumbuye, yanatangiye gutanga serivisi za protocole ku masosiyete menshi nka MTN, FERWACY n’ibikorwa by’amasosiyete. 

    Muri 2011, Bashabe yabaye umuyobozi ushinzwe kugurisha no kwamamaza ibicuruzwa muri farumasi ya RAK. Nyuma yo gukora muri farumasi ya RAK imyaka hafi ibiri muri 2012, yatangije isosiyete ye itumiza mu mahanga, aho yatumizaga ibicuruzwa nk’imodoka, imyenda, ibikoresho byo mu nzu mu izina ry'abakiriya. Nyuma y’amezi make, yahisemo gukurikiza inzozi zo mu bwana bwe mu myambarire maze akingura inzu y’imyambarire ya Kabash. 

    Iki ni kimwe mu bitaramo byavugishije abatari bake

    Muri 2013, yaguye ubucuruzi bwe ashyiraho ubucuruzi bwa kabiri aho yibanze ku gishushanyo mbonera cy’imbere, ubukorikori bwa Afurika, byose munsi ya label ya Kabash. Bashabe yatumiriwe kwitabira ibirori mpuzamahanga byerekanwa muri Amerika muri 2016 na Guverinoma y’u Rwanda mu rwego rwo kumenyekanisha ibicuruzwa bya Kabash mu mahanga no kwagura abakiriya be. 

    Uburanga n’ikimero cya Kate Bashabe bikunda kurangaza abatari bake

    Muri 2017, yateguye ibirori by’urukundo aho abahanzi bakoraga Live bateye inkunga abana bakennye mu Rwanda. 

    Kimwe mu bitaramo Kate Bashabe yategaruga kitwa The Posh Party

    Amafaranga yakusanyijwe muri iki gikorwa yerekanwe mu gutera inkunga abanyeshuri barenga 500 bo mu Rwanda. Yahise ashyiraho Kabash Cares muri 2018. Kabash Cares ni igikorwa gitera inkunga abanyeshuri batishoboye mu bukungu no mu bikoresho.

    Kate Bashabe afite iduka ricuruza imyenda mu mujyi wa Kigali


    INDIRIMBO KATE BASHABE YAHURIJEMO IBYAMAMARE IGAMIJE GUTANGA UBUTUMWA

    Source : https://inyarwanda.com/inkuru/107088/twaganiriye-kate-bashabe-yavuze-iherezo-ryibitaramo-bikomeye-yateguraga-anakomoza-ku-ndiri-107088.html

  • Saa kumi n'ebyiri yabaye saa kumi n'ebyiri! abarenga 1100 bafashwe barenze ku mabwiriza, mu Majyaruguru. #rwanda #RwOT

    Nyuma yaho hashyizweho amabwiriza mashya yo kwirinda COVID-19 harimo no gutaha saa kumi nebyiri , yatangiye ku wa 1 Nyakanga 2021 hafashwe abagera ku 1188 barenze kumabwiriza mashya yo kwirinda ubwiyongere bw'abandura ikicyorezo.

    Mu gihe muri iyi minsi umubare w'abandura COVID-19 ukomeje kwiyongera mu Rwanda mu ntara y'Amajyaruguru hafashwe abantu 55 bafatiwe mu tubari banywa inzoga , harimo kandi 232 batubahirije isaha ya saa kumi nebyiri yo kuba bageze murugo.

    Aba Bose bafashwe bajyanywe ahantu hatandukanye haba harateguwe ngo bahugurwe ubundi bacibwe n'amande.

    Kugeza ubu abandura bakomeje kwiyongera dore ko mu minsi ine ishize abandura bangana na 3287 , , Intara y'Amajyaruguru ifitemo abagera kuri 816.

    Inzego zishinzwe ubuzima zisaba Abaturarwanda baba abakingiwe n'abatarakingirwa gukomeza kwitwararika birinda kwandura cyangwa kwanduza abandi icyorezo cya COVID-19 gikomeje kugaragaza ubukana mu Rwanda n'ahandi ku isi.

    Source : https://impanuro.rw/2021/07/02/saa-kumi-nebyiri-yabaye-saa-kumi-nebyiri-abarenga-1100-bafashwe-barenze-ku-mabwiriza-mu-majyaruguru/

  • Ibaruwa Perezida Kagame yandikiye mugenzi we Ndayishimiye w’u Burundi #rwanda #RwOT

    Iyi baruwa ya Perezida Paul Kagame yo ku wa 28 Kamena 2021, igaragaza ko Perezida Kagame yari amaze kwakira ubutumire bwa mugenzi we Ndayishimiye muri uriya muhango wabaye kuri uyu wa Kane tariki 01 Nyakanga 2021.

    Muri iyi barurwa yashyizwe kuri Twitter ya Perezidansi y’u Burundi, iherekejwe n’ubutumwa bwo kongera gushimira Perezida Kagame Paul kuba yarashimiye mugenzi we Evariste Ndayishimiye ndetse ko bigaragaza kongera 'guha imbaraga igihuza ibihugu byombi byacu.'

    Ibaruwa ya Perezida Kagame irimo iki ?

    Muri iriya baruwa ya Perezida Kagame, atangira ashimira mugenzi we kuba yaramutumiye muri uriya muhango wo kwizihiza isabukuru y’imyaka 59 u Burundi bumaze bubonye ubwigenge.

    Ivuga kandi ko buriya butumire bugaragaza ubushake bw’u Burundi mu kongera kubura umubano w’ibihugu byombi umaze igihe urimo igitotsi mu gihe ibi bihugu byari bisanzwe ari nk’ibivandimwe.

    Perezida Kagame akomeza amenyesha mugenzi we ko atazabasha kuboneka muri uriya muhango ariko ko 'nzohereza itsinda rizaba riyobowe na Minisitiri w’Intebe Edouard Ngirente uzaba ampagarariye muri uyu muhango udasanzwe.'

    Akomeza kandi amenyesha mugenzi we ko ku giti cye ndetse n’Abanyarwanda muri rusange na Guverinoma y’u Rwanda bamwifuriza amahoro n’uburumbuke yaba we ndetse n’Abarundi bose mu gihe bizihiza ubwigenge.

    Perezida Kagame asoza avuga ko yizeye kuzahura na mugenzi we Evariste Ndayishimiye no gukomeza gukorana mu gutsimbataza umubano w’ibihugu byabo.

    UKWEZI.RW

    Source : http://www.ukwezi.rw/mu-rwanda/3/article/Ibaruwa-Perezida-Kagame-yandikiye-mugenzi-we-Ndayishimiye-w-u-Burundi

  • Burera: Umugabo arakekwaho kwambura ubuzima umugore we amukubise agafuni_ inkuru irambuye #rwanda #RwOT

    Mu Kagari ka Nyamabuye, mu Murenge wa Kagogo mu Karere ka Burera, Umugabo witwa Hashakimana Jean Pierre arakekwaho kwica umugore we amukubise agafuni mu mutwe agahita acika.

    Ubu bwicanyi bukekwa kuri Hashakimana Jean Pierre wo mu Mudugudu wa Mudugudu wa Kikubo bwabaye kuri uyu wa Gatatu tariki 30 Kamena 2021.

    Amakuru avuga ko uriya mugabo we yishe umugore we bavuye guhinga, bagera mu rugo bakagirana amakimbirane ashingiye ku micungire y'umutungo wo mu rugo dore ko ngo umugabo yashakaga kugurisha inkoko boroye ariko nyakwigendera akamubera ibamba.

    Bikekwa ko ari bwo uriya mugabo yahise yegura agafuni akagakubita umugore we mu mutwe agahita yitaba Imana.

    Mugiraneza Ignace uyobora Umurenge wa Kagogo avuga ko aho basanze nyakwigendera aryamye hari agafuni ku buryo ari byo baheraho bakeka ko yishwe n'umugabo we agahita atoroka.

    Uyu muyobozi kandi avuga ko uriya muryango wari usanzwe ufitanye amakimbirane ndetse ko bigeze kwitabaza inzego muri 2018.

    Ati 'Ubundi ngo byabaga bakabikemurira mu miryango, ejo bwo byatangiye ku mugoroba ubwo umugabo yashakaga kugurisha umusaruro w'amasaka bari bejeje ariko umugore ntiyabyemera.'

    Uyu muyobozi asaba abaturage kujya bitabaza inzego z'ubuyobozi mu gihe bafitanye ibibazo mu

    Nyakwigendera yasize abana bane yabyaranye n'umugabo we, ukekwaho kumwica agahita atoroka ubu akaba ari gushakishwa.

    Source : https://impanuro.rw/2021/07/02/burera-umugabo-arakekwaho-kwambura-ubuzima-umugore-we-amukubise-agafuni_-inkuru-irambuye/

  • Abakozi by’Ibitaro bya Ruhengeri banenze bagenzi babo bakoze Jenoside – #rwanda #RwOT

    Mu gikorwa cyo kwibuka Jenoside yakorewe Abatutsi ku nshuro ya 27, hubahirizwa ingamba zo kwirinda Covid-19, abakozi b’Ibitaro bya Ruhengeri, bunamiye abasaga 800 bashyinguye mu Rwibutso rwa Muhoza biciwe ku cyahoze ari Urukiko rw’Iremezo rwa Ruhengeri bashyira indabo aho baruhukiye ndetse banifatanya n’abarokotse batishoboye baboroza inka.

    Bamwe mu barokotse Jenoside yakorewe Abatutsi, basabye abaganga kwita ku babagana babungabunga amagara yabo, batabanje kubavangura nk’uko byaranze bagenzi babo bakoze Jenoside.

    Umuyobozi wungirije w’Umuryango w’Abarokotse Jenoside yakorewe Abatutsi Ibuka mu Karere ka Musanze, Mukanoheli Josée, yavuze ko ibikorwa byo kwibuka abazize Jenoside bibatera imbaraga zo kwiyubaka n’icyizere cyo kubaho ariko anenga abakozi bo mu nzego z’ubuvuzi bataye indangagaciro zabo bagakora Jenoside aho kurengera ubuzima bwabo.

    Yagize ati “Birababaje kuba hari abaganga bijanditse muri Jenoside bakica abantu aho kubarengera nk’uko biri mu ndangagaciro baba bararahiriye n’izo batozwa, ibi byatesheje agaciro ikiremwamuntu ku rwego utabyiyumvisha. Ubu turishimye kubera ubuyobozi bwiza dufite bwatugaruriye icyizere n’Ibitaro bya Ruhengeri ku bushake n’uruhare basigaye bagira ngo natwe twongere kubaho neza. Turabasaba ko hakubakwa ikimenyetso cy’Urwibutso ku Bitaro kandi hari icyizere ko bazabikora dufatanye kubungabunga amateka y’ibyahabereye.”

    Ngabonziza Louis na we warokotse Jenoside yakorewe Abatutsi, yagize ati ” Ni ibintu bigoye kubyumva ukuntu aha twari duteze amakiriro ari ho abacu baguye kandi abaganga na bo bakabigiramo uruhare bakica. Turasaba Ibitaro bya Ruhengeri ko byashyiraho uburyo bwihariye bwo kubungabunga amateka y’ibyabereye hano.”

    Nibagwire Domitille ni umukecuru uri mu kigero 70 washyikirijwe inka, avuga ko kubona amata byamugoraga cyane, ariko akaba yishimira ko agiye gusazira ku nkongoro, ndetse icyizere cyo kubaho yari afite kikaba cyiyongereye.

    Umuyobozi w’Ibitaro Bikuru bya Ruhengeri, Dr. Muhire Philbert, asaba abaganga kurangwa n’umutima wa kimuntu urangwa no kwita ku barwayi batavanguye kuko ari bwo bazabasha guhangana n’ingengabitekerezo ya Jenoside.

    Yagize ati “Ni ibintu bibabaje kumva ko umuganga wabonaga umurwayi amugana amutezeho gukira ari we wamwicaga, ibyaranze bagenzi bacu muri Jenoside biteye agahinda. Uyu munsi ubutumwa tubaha ni ukurangwa n’umutima wa kimuntu, bakavura abarwayi nta kubatandukanya, bakumva ko bigomba kujya mu nshingano zabo birinda amacakuburi agamije kuvutsa ubuzima abantu kugira ngo babashe kuzuza neza inshingano zabo.”

    Uyu muyobozi akomeza avuga ko icyifuzo cy’abarokotse Jenoside bifuza ko ku Bitaro hashyirwa ikimenyetso cy’Urwibutso, biri muri gahunda bafite, ariko bizajyana n’uko ibikorwa byo kubaka Ibitaro bizashyirwa mu bikorwa kuko nibitangira kubakwa bizabafasha kugena aho icyo kimenyetso cy’Urwibutso kizashyirwa kandi ko biri mu nshingano zabo.

    Muri iki gikorwa cyo Kwibuka Jenoside yakorewe Abatutsi ku nshuro ya 27, Ibitaro bya Ruhengeri byaremeye abarokotse biboroza inka ebyiri zihaka.

    Abakozi b’Ibitaro bya Ruhengeri mu gikorwa cyo Kwibuka Jenoside yakorewe Abatutsi ku nshuro ya 27

    Ibitaro bya Ruhengeri byoroje imiryango y’abarokotse Jenoside

  • U Rwanda rwahawe miliyari 257 Frw yo kuzahura ubukungu – #rwanda #RwOT

    Ni ubwa mbere u Rwanda rwakiriye amafaranga aturutse kuri AIIB ndetse ni nawo mushinga wa mbere iyi banki iteye inkunga muri Afurika yo munsi y’Ubutayu bwa Sahara.

    Amafaranga AIIB yahaye u Rwanda yiyongera ku yandi miliyoni 157.5 $ (asaga miliyari 157.4 Frw) yari aherutse kwemezwa n’Inama y’Ubutegetsi ya Banki y’Isi mu cyumweru cyari cyabanje. Intego yayo ni ugufasha ibikorwa by’ubucuruzi kuzahuka mu gihe gito n’igihe kirekire.

    Aya mafaranga u Rwanda rwahawe azafasha mu kuzahura ubukungu bwashegeshwe na Covid-19 kuva muri Werurwe 2020 ubwo iki cyorezo cyageraga mu gihugu. Cyatumye ubukungu busubira inyuma, imirimo myinshi irahagarara bituma benshi babura akazi.

    Azifashishwa nk’inguzanyo ku bigo by’imari kugira ngo nabyo bibashe kuguriza abantu bahuye n’ibibazo by’ubukungu byatewe na Covid-19.

    Kubera Covid-19, umusaruro mbumbe w’ubukungu bw’u Rwanda wagabanutseho 0.2% mu mwaka wa 2020, nyamara wari witezweho kuzamuka ku kigero cya 8% muri uwo mwaka.

    Ikindi kandi umubare w’abantu bafite akazi ugereranyije n’umubare w’abaturage b’u Rwanda, wageze kuri 43% uvuye kuri 48.3%, igabanukaho 5%. Kwiyongera kw’abashomeri birushaho kongera umubare w’abantu bari mu bukene, aho byitezwe ko muri uyu mwaka, umubare w’abakene mu Rwanda uziyongeraho abantu 550 000 ugereranyije n’uko ibintu byari kuba bihagaze iyo Covid-19 itabaho.

    Minisitiri w’Imari n’Igenamigambi, Dr. Uzziel Ndagijimana, yatangaje ko aya mafaranga yose u Rwanda rwahawe azafasha mu Kigega Nzahurabukungu.

    Ati “Binyuze mu gufasha urwego rwacu rw’abikorera rwagizweho ingaruka na Covid-19 kugira ngo rubone igishoro gihendutse cyakwifashishwa mu ishoramari ry’igihe kirekire, ibintu bizagira uruhare mu guhanga imirimo no mu iterambere ry’ubukungu.”

    Muri Mata 2020 nibwo Guverinoma y’u Rwanda yashyizeho Ikigega Nzahurabukungu, gitangirana muri Kamena miliyoni 100$. Kubera amafaranga yatanzwe na Banki y’Isi na AIIB kigiye kongererwa ubushobozi ku buryo kizaba kirimo miliyoni 357.5 $. Izindi nzego zagize uruhare mu gushyigikira iki kigega harimo nk’imiryango mpuzamahanga nka IMF, OFID and USAID.

    Kuri iyi nshuro, iki kigega kigiye kongerwamo ibindi byiciro nyuma y’aho ubwo cyatangiraga cyahaye umwihariko abanyamahoteli bari barahombye bidasanzwe.

    Ubu amashuri makuru na za Kaminuza yigenga nayo azahabwa umwihariko cyo kimwe n’ibigo bitwara abagenzi n’abandi.

    Inkuru bifitanye isano: Guverinoma igiye kongera miliyoni 350$ mu Kigega Nzahurabukungu

    Ikigega Nzahurabukungu kigiye kongerwamo amafaranga ku buryo abikorera bafashwa kgusubiza ku murongo ibikorwa byabo