Webrwanda Backend

Category: Uncategorized

  • Perezida Kagame na Touadéra biyemeje kubaka igisirikare cy’umwuga muri Santarafurika #Rwanda #RwOT via @kigalitoday #rwanda #RwOT

    Ayo masezerano ajyanye no kuvugurura inzego z’umutekano muri Repubulika ya Santarafurika zirimo Igisirikare na Polisi zikaba iz’umwuga, ubucukuzi bw’amabuye y’agaciro, guteza imbere ubwikorezi (transport) hakaba n’amasezerano y’ubufasha ndetse n’ay’ubufatanye mu bijyanye n’igenamigambi.

    Perezida Faustin-Archange Touadéra avuga ko u Rwanda ruzafasha cyane Repubulika ya Santarafurika, nk’igihugu gikeneye kwiyubaka gifatiye urugero kuri gahunda z’u Rwanda zijyanye n’ubukungu, kwigira, ubwiyunge ndetse no kubana mu mahoro.

    Yagize ati “Uruzinduko rwacu hano i Kigali ni amahirwe yo kubaka imibanire itajegajega, ndetse no kungurana ibitekero ku bijyanye n’inyungu duhuriyeho ziri ku rwego rw’ibihugu byombi no ku rwego mpuzamahanga”.

    Yavuze ko Repubulika ya Santarafurika itarageramo umutekano kuva yagera ku buyobozi muri 2016, kuko bagifite imitwe y’abarwanyi igera kuri 14.

    N’ubwo Leta ye yagiranye amasezerano y’amahoro n’iyo mitwe, ngo ntibyabujije ko mu mwaka ushize uwari Perezida François Bozizé ayikoresha mu gushaka kuburizamo amatora no guhungabanya inzego ziyobora igihugu.

    Perezida wa Repubulika ya Santarafurika yashimiye u Rwanda cyane ku kuba rutanga Ingabo mu muryango w’Abibumbye zigamije kubungabunga amahoro muri icyo gihugu (zitwa MINUSCA), hamwe n’izindi zagiyeyo ku bw’amasezerano ibihugu byombi bifitanye.

    Perezida Touadéra yashimye kandi ubufasha mu bijyanye no gutwara abantu n’ibintu butangwa na Kompanyi y’indege z’u Rwanda (Rwandair), akomeza ararikira Abanyarwanda kujya gushora imari mu gihugu cye.

    Perezida wa Santarafurika avuga ko yaje gushimira “umuvandimwe” Perezida Kagame ku bufasha butandukanye Abanyarwanda bagenera igihugu cye mu bijyanye n’ubukungu ndetse no kubaka umutekano urambye.

    Ku rundi ruhande, Perezida wa Repubulika y’u Rwanda, Paul Kagame yavuze ko amasezerano hagati y’ibihugu byombi agira umumaro wo gutabarana mu buryo bwihuse hadategerejwe ubufasha bw’Umuryango w’Abibumbye ngo buza butinze.

    Perezida Kagame yashingiye ku bufasha bw’abasirikare batari muri gahunda ya MINUSCA u Rwanda rwahaye Leta ya Touadéra, agira ati “Ndabizi neza MINUSCA ntabwo yifuzaga ko imitwe y’abarwanyi ifata umujyi wa Bangui, ariko ntabwo yari gutabara vuba kubera uburyo bibanza kunyura mu nzego zo hejuru (za UN)”.

    Perezida wa Repubulika ya Santarafurika uzamara iminsi ine mu Rwanda, biteganyijwe ko mu nzego n’uduce dutandukanye tw’u Rwanda azasura, harimo Ingoro y’Amateka y’urugamba rwo kubohora igihugu (ku Nteko), hamwe n’umudugudu w’icyigererezo mu Kinigi mu Karere ka Musanze.

  • Perezida wa Centrafrique yageze mu Rwanda mu ruzinduko rw'iminsi 4 #rwanda #RwOT

    Perezida wa Centrafrique, Faustin-Archange Touadéra, yatangiye uruzinduko rw'iminsi ine mu Rwanda kuri uyu wa Kane tariki ya 5 Kanama 2021.Ku kibuga cy'indege yakiriwe na Minisitiri w'Ububanyi n'Amahanga,Dr.Vincent Biruta.

    Perezida wa Repubulika y'u Rwanda Paul Kagame nawe yakiriye muri Village Urugwiro mugenzi we wa Centrafrique, Faustin-Archange Touadéra.

    Bakomereje mu biganiro biri kubera mu muhezo biza gukurikirwa n'isinywa ry'amasezerano ndetse n'ikiganiro n'abanyamakuru.

    Hateganyijwe gahunda nyinshi zirimo isinywa ry'amasezerano atandukanye.

    Muri uru ruzinduko biteganywa ko Perezida Faustin-Archange Touadéra asura Ingoro Ndangamateka y'Urugamba rwo guhagarika Jenoside iri mu nyubako y'Inteko Ishinga Amategeko ku Kimihurura, mbere yo kwakirwa mu musangiro na Perezida Paul Kagame.

    Ku wa 6 Kanama 2021 azasura Umudugudu w'Icyitegererezo wa Kinigi uzwi nka 'Kinigi IDP Model Village' watashywe ku wa 4 Nyakanga 2021 ku munsi wo Kwibohora. Ucumbikiye imiryango 144.

    Perezida Faustin-Archange Touadéra yakiriwe ku kibuga cy'indege Mpuzamahanga cya Kigali na Minisitiri w'Ububanyi n'amahanga, Dr Vincent Biruta.

    U Rwanda na Centrafrique bifitanye umubano ushingiye ku bufatanye mu nzego z'umutekano n'ubucuruzi.

    U Rwanda ruherutse gutangiza ingendo z'indege zarwo mu Murwa mukuru Bangui, kandi ba Minisitiri b'ububanyi n'amahanga b'ibihugu byimbi baherutse kugendererana.

    Touadéra w'imyaka 63 warahiriye kuyobora Centrafrique muri manda ya kabiri muri Werurwe mu 2021, asuye u Rwanda mu gikorwa gisa nko gushimira uko yafashijwe n'Ingabo z'u Rwanda gucunga umutekano mu matora yamugejeje ku butegetsi aheruka.

    U Rwanda ni umwe mu bagize uruhare runini mu butumwa bw'Amahoro bw'Umuryango Abibumbye muri Santarafurika (MINUSCA) kuva mu 2014, by'umwihariko rukaba ruherutse no kohereza itsinda ry'ingabo zishinzwe kunganira ibikorwa byo kugarura umutekano muri iki gihugu binyuze mu bufatanye bw'ibihugu byombi.

    Muri iki Cyumweru, Ubuyobozi bw'Ingabo z'u Rwanda (RDF) bwatangiye kohereza Batayo y'inyongera y'abasirikare 750 mu butumwa bwa MINUSCA.

    Mu kwezi k'Ukwakira 2019 ni bwo Perezida Kagame aheruka kugirira uruzinduko rw'umunsi umwe muri Santarafurika, we na Perezida Touadéra bakaba barahagarariwe isinywa ry'amasezwerano arimo ajyanye n'ubufatanye mu bya gisirikare, ubucukuzi bw'amabuye y'agaciro n'ibikomoka kuri Peteroli hamwe n'ajyanye n'ubufatanye mu guteza imbere ishoramari.





    Source : https://umuryango.rw/amakuru/mu-rwanda/politiki/article/perezida-wa-centrafriue-yageze-mu-rwanda-mu-ruzinduko-rw-iminsi-4

  • Eddy Kenzo na bagenzi be bakoze impanuka Imana ikinga ukuboko #rwanda #RwOT

    Umuhanzi Eddy Kenzo uri mu bakomeye cyane mu gihugu cya Uganda yatangaje ko yasimbutse urupfu nyuma y'aho akoze impanuka y'imodoka yakoreye mu muhanda uva i Kampala ugana i Masaka.

    Edrisah Musuuza wubatse izina nka Eddy Kenzo mu muziki wa Uganda,yatangarije ku mbuga nkoranyambaga ze ko imodoka ye yarenze umuhanda iribirindura ubwo bari bageze ahitwa Maya.

    Yagize ati “Twagize impanuka iteye ubwoba.Umuhanda wari utose ndetse unyerera kubera imvura ndetse ubwo twageraga i Maya hari dodane hafi ya sitasiyo yitwa Stabex Petro yatumye imodoka yanjye iyoba inzira.

    Twaguye mu muhanda uri hafi ya Stabex Petro.Ibi byabaye mu gitondo kandi abantu 3 bari mu modoka barokotse nta mvune.Turashima Imana ku bw'Uburinzi.

    Kuri uyu wa Kane tariki 5 Kanama 2021 nibwo Eddy Kenzo yatangaje iby'iyi mpanuka.

    Iyi mpanuka ikimara kuba, abapolisi bashinzwe umutekano wo mu muhanda bahise bahagera, babwiye itangazamakuru ko yabaye kuri uyu wa Kane tariki 5 Kanama 2021 saa mbili za mu gitondo.

    Iyi mpanuka ikimara kuba, Eddy Kenzo n'abo bari kumwe bahise bajyanwa mu bitaro bya Nakirebe kugira ngo bahabwe ubutabazi bw'ibanze.

    Source : https://umuryango.rw/imyidagaduro/umuziki/article/eddy-kenzo-na-bagenzi-be-bakoze-impanuka-imana-ikinga-ukuboko

  • URUGAN’ INKOMERE: Inkuru Ndende y’urukundo #rwanda #RwOT

    Akenshi mu rukundo habamo ibyishimo bidasanzwe kimwe n’uko ibigeragezo iyo byageze mu rukundo ahanini usanga bake aribo babasha kubyihanganira no kubyakira ariko ugasanga abandi bibagora guhagarara ku cyemezo bahisemo cyo kujya mu rukundo.
    Urugana Inkomere ni inkuru mpampo yabayeho, gusa nk’uko bigaragara mu ijambo ribanza ni urukundo rutakunze kurangwa n’inzira itambika kuko akenshi hagiye habonekamo, umunyenga w’urukundo ariko nanone rukanabonekamo inzira y’ahaterera ndetse huzuyemo amahwa atyaye kandi bisaba kuyanyuramo.

    Urugana Inkomere igice cya 1

    Liza kuri ubu ni umugore w’umugabo umwe batarabyarana kuko bakoze ubukwe vuba, ubu akaba atuye i Nyanza ya Kicukiro ho mu Mujyi wa Kigali, akaba akora akazi ko gucuruza muri Super Market (Alimentation). Liza kimwe n’abandi benshi batandukanye, mbere y’uko abana n’umugabo we Kalisa, yabanje kugira amateka y’inzira y’urukondo yanyuranyemo n’umusore bakundanye igihe kitari munsi y’imyaka 5 witwa Nelson. Liza akaba yarakuze ari umwana utamenyereye ibintu by’ikoranabuhanga ndetse n’ibyo gukundana n’abahungu, gusa agakunda gukoresha Facebook ndetse na Instagram. Nubwo Liza yakoreshaga izi mbuga nkoranyambaga ntabwo yari yarigeze ashyiraho ifoto ye n’imwe kuko ngo ntiyakundaga kugaragaza isura ye.

    Liza yaje kujya kuri Facebook yifuza kuganira n’inshuti ze ni uko aza kwisanga yatse ubushuti Nelson (Friend request), maze Nelson aramwemerera, gusa bifata igihe mbere yo gutangira ibiganiro kuko bombi ntibakundaga gukoresha cyane ariko igihe kiza kugera Liza yandikira Nelson nuko batangira ibiganiro.

    Ubwo ibiganiro bya Liza na Nelson kuri facebook bwa mbere byari:
    Liza : hi
    Nelson: Hi

    Hashira icyumweru batongeye kwandikirana

    Nelson: amakuru ki yawe Liza?
    Liza: Ni meza, Amakuru ?
    Nelson: I’m feeling good
    Uranzi se sister ??
    Liza: Wapi ntabwo nakumenye!

    Gusa kuva ubwo nyine ibiganiro bya Nelson na Liza bisa n’ibitangiye gusa ntibyabashije gukurura cyane Nelson doreko nta n’ifoto yari iri account ya Liza ngo nibura abe ariyo imukurura. Nelson akimara kubonako Liza atamuzi yahise acika intege, ariko nyuma asibiye kuri Facebook, aza kurebe abona Liza afite amazina meza cyane yumva unyuzwe nayo mazina. Ibyo rero byabaye impamvu yindi ndamukuru yo gutuma Nelson yifuza kongera kuvugisha Liza. Nelson, yumvaga ko umukobwa ufite amazina meza nk’aya Liza byanze bikunze ari mwiza cyane. Ni uko ibiganiro birongera birasubukurwa nyuma y’iminsi 3.

    Nelson: … Ok! Ubwo ni ugushaka uko twamenyana
    Liza: Yego
    Nelson: None se ko nta foto yawe mbona ?
    Liza: Urayishaka ? ……

    Liza hano yari abonye ihurizo rikomeye kuriwe gusa yagerageje gutanga igisubizo ni uko abasha ku…..

    Ntucikwe igice gikurikira…

    Source : https://imirasire.com/?URUGAN-INKOMERE-IInkuru-Ndende-y-urukundo

  • Perezida Archange Touadéra yageze mu Rwanda, nyuma ya mugenziwe wa Tanzania Prezida Suluhu #rwanda #RwOT

    Nyuma yo kwakirwa ku kibuga cy’indege mpuzamahanga cya Kigali, biteganyijwe ko Perezida Touadéra ahita akomereza muri Village Urugwiro, aho yakirwa na Perezida wa Repubulika y’u Rwanda, Paul Kagame, bakagirana ibiganiro hagati yabo hanyuma bakaza kuganira n’itangazamakuru.

    Biteganyijwe ko Perezida Touadéra asura inzu ndangamurage y’amateka y’urugamba rwo guhagarika Jenoside, iyo nzu ikaba iherereye mu ngoro y’Inteko Ishinga Amategeko, azanasura kandi Umudugudu w’icyitegererezo wa Kinigi i Musanze ndetse n’ibindi byiza nyaburanga by’u Rwanda bitandukanye.

    Source : https://imirasire.com/?Perezida-Archange-Touadera-yageze-mu-Rwanda-nyuma-ya-mugenziwe-wa-Tanzania

  • Agahuru k'imbwa karagurumanye! Leta y'u Burundi igiye gushyikiriza u Rwanda inyeshyamba 20 zo mu mutwe w'iterabwoba FLN, wa Paul Rusesabagina. #rwanda #RwOT

    Amakuru dukesha urubuga 'Burundi Daily', muri rusange ruzwiho gutanga amakuru yizewe, aravuga ko Leta y'u Burundi igiye gushyikiriza u Rwanda inyeshyamba zibarirwa muri 20 zo muri wa mutwe w'iterabwoba wa FLN.

    Ibi bije bikurikira igikorwa nk'iki Leta y'u Rwanda yakoze mu mpera z'icyumweru gishize, cyo gushyikiriza u Burundi abarwanyi 19 bo mu mutwe wa RED-Tabara, urwanya Leta y' Uburundi, bakaba barafatiwe ku butaka bw'u Rwanda muri Nzeri umwaka ushize wa 2020.

    Burundi Daily iravuga ko inyeshyamba za FLN zigiye koherezwa mu Rwanda zafatiwe mu ishyamba rya Kibira mu byumweru bike bishize, ubwo ziteguraga kugaba ibitero mu Rwanda. Amapeti y'abazoherezwa mu Rwanda ntarashyirwa ahagaragara, kimwe n'umubare ndetse n'ubwoko bw'intwaro bafatanywe.

    Uyu mutwe wa FLN uyobowe n'uwiyise 'Gen JEVA', utaratamba hagati y'amashyamba y'u Burundi n'ayo muri Kivu y'Amajyepfo muri Kongo. Wahoze ukuriwe na Paul Rusesabagina, mbere y'uko gashyiga imushyigura akizanira ubutabera bw'u Rwanda muri Kanama umwaka ushize.

    Yagiye yigamba kenshi ibitero byagabwe mu turere twa Nyaruguru na Nyamagabe mu mwaka wa 2018 na 2019, byanaguyemo abaturage b'inzirakarengane abandi barakomereka, ibyabo birasahurwa ibindi birangizwa. Ibi byaha ni nabyo Paul 'Rusisibiranya' akurikiranyweho, kimwe n'abandi bagaragu be babana muri gereza.

    Imitwe y'iterabwoba ishaka guhungabanya umutekano w'u Rwanda igizwe ahanini n'inzererezi zishoye cyangwa zishorwa mu ntambara zidashoboye kurwana, kuko uretse n'ubumenyi mu bya gisirika, nta n'impamvu bafite yo kurwana.

    Ibi byagiye bibaviramo kwicwa nk'udushwiriri, abandi amagana bagafatwa mpiri, bigaragaza ko mu by'ukuri ari impehe zitazi iyo ziva n'iyo zijya. Si FLN gusa kandi, kuko na P5/RNC ya Kayumba Nyamwasa ndetse na FDLR imaze imyaka mu mashyamba ya Kongo bisigaye ku izina gusa.

    Abo bacakara bo muri FLN ye baje kurushya iminsi mu Rwanda, kimwe na shebuja Rusesabagina, Nsabimana Callixte 'Sankara' na Herman Nsengimana , n' ibindi byihebe biri mu maboko y'ubutabera mu Rwanda.

    Aba bo urubanza rwabo ruzasomwa tariki 20 z'uku kwezi, abaturage bakaba basaba ko bazahabwa igihano ntangarugero, kizatuma n'abandi bishora mu bikorwa byo kuvutsa Igihugu umudendezo babihurwa.

    Amakuru avuga ko hakiri amagana y'inyeshyamba za FLN zikibundabuda mu ishyamba rya mu Kibira, ariko abasesenguzi bagahamya ko iki gikorwa cy'uBurundi gishobora gukurikirwa n'ibindi byinshi, bigamije guhashya burundu aka gatsiko k'abagizi ba nabi.

    Iki gikorwa kandi cyo guhererekanya abanyabyaha hagati y'uRwanda n'u Burundi kiratanga icyizere ko umubano w'ibihugu byombi uri mu nzira nziza yo kuzahurwa, ndetse n'ubushake bw'ibihugu byombi byo kubumbatira umutekano mu karere.

    The post Agahuru k'imbwa karagurumanye! Leta y'u Burundi igiye gushyikiriza u Rwanda inyeshyamba 20 zo mu mutwe w'iterabwoba FLN, wa Paul Rusesabagina. appeared first on RUSHYASHYA.

    Source : https://rushyashya.net/agahuru-kimbwa-karagurumanye-leta-yu-burundi-igiye-gushyikiriza-u-rwanda-inyeshyamba-20-zo-mu-mutwe-witerabwoba-fln-wa-paul-rusesabagina/?utm_source=rss&utm_medium=rss&utm_campaign=agahuru-kimbwa-karagurumanye-leta-yu-burundi-igiye-gushyikiriza-u-rwanda-inyeshyamba-20-zo-mu-mutwe-witerabwoba-fln-wa-paul-rusesabagina

  • Diaspora Nyarwanda mu nzira yo kugira uruhare mu ngengo y'imari y'Igihugu #rwanda #RwOT

    Abashakashatsi mu rwego rw'imari n'impuguke mu by'ubukungu basanga ibihugu bya Afurika bikwiye gushyiraho uburyo bunoze bwo korohereza abenegihugu baba hanze kugira uruhare mu iterambere ry'ubukungu bw'ibihugu byabo.

    Bifatwa n'abashakashatsi mu by'imari  nk'ibisanzwe ko amafaranga yinjira mu gihugu  aturutse  ku benegihugu baba hanze agira uruhare mu iterambere ry'ubukungu, ariko byagera mu bihugu byo munsi y'ubutayu bwa Sahara bikaba umwihariko.

    Umushakashatsi mu by'imari akaba n'umukozi w'urwego rw'igihugu rw'iterambere RDB mu ishami ryo kubaka ubushobozi, Dr Edward Kadozi , arabisobanura.

     Aragira ati 'Twasanze umusanzu wabo ungana na 0.26% by'umusaruro mbumbe w'ubukungu bw'ibihugu buri munsi y'ubukungu bwa Afurika. '

    Mu kiganiro umunyabanga wa leta muri Minisiteri y'Urubyiruko n'Umuco Bamporiki Edouard, yagiranye n'abanyarwanda baba mu mahanga tariki 03 Kanama 2021, yashingiye ku birango by'umuco abibutsa ko ari inshingano zituruka ku murage w'abakurambere kugira uruhare mu iterambere ry'igihugu cyabo.

    Bwana Bamporiki ushinzwe umuco yabwiye abanyarwanda baba mu mahanga igitekerezo kiri kunononsorwa cy'uburyo bushya bazajya bagiramo uruhare mu gushyigikira ubukungu bw'igihugu cyabo.

    Yagize ati 'Ubu turi gutecyereza kuzakora porogaramu y'ikoranabuhanga, aho mu kwezi kwa Kanama ko mu myaka ibiri cyangwa itatu iri imbere uzaba wicaye mu Buholandi, ugafata Telefone ukavuga uti ariko u Rwanda rwampaye umwero ngiye kuruganuza.'

     Bwana Bamporiki  yakomeje agira ati 'Tukavuga ngo niba ari ku wa Gatanu w'icyumweru cya mbere cy'ukwezi kwa Kanama kuva Saa Moya  kugera Saa Sita z'ijoro, umuntu ashobora gukura amafara cyangwa amadorali kuri Konti ye akayashyira mu ngengo y'imari y'igihugu nta wundi biciyeho. Abanyarwanda mu masaha nk'atanu bakaba bagira uruhare mu kuba bakubaka  stade runaka, umuhanda runaka.'

    Abashakashatsi mu rwego rw'imari bagaragaza ko amafaranga ava hanze  mu mifuka y'abenegihugu akajya mu bihugu byabo by'inkomoko agira uruhare mu bukungu bw'ibyo bihugu, mu buryo bwagutse harimo no kurinda ifaranga ry'igihugu guta agaciro kandi na rubanda rugufi rubona kuri ayo mafaranga rukabyungukiramo.

    'Buriya ariya mafaranga  adufasha kurinda ifaranga ryacu guta agaciro. Icyo ni ikintu gikomeye cyane kuko iyo agaciro k'ifaranga  gahungabanye  ubukungu bwose burahungabana. Urugo rubona amafaranga avuye hanze mu banyamahanga  ayakoresha kurusha mugenzi we wundi  baturanye utabona ayo mafaranga' Dr Edward Kadozi umushakashatsi mu by'imari niwe ukomeza.

    Nk'uko bigaragazwa n'abashakashatsi, mu myaka 30 ishize amafaranga abanyarwanda baba mu mahanga bohereza mu Rwanda yariyongereye bituma n'uruhare agira mu bukungu bw'igihugu rwiyongera.

     Umushakashatsi Dr Edward Kadozi arabisobanura ashingiye ku ruhare rwayo mafaranga  mu musaruro mbumbe w'imbere mu gihugu.

    Dr Kadozi ati 'Mu 1980 twari  dufite miliyoni 3 z'amadorali yavaga muri Diaspora. Uyu munsi  turebye ku mibare y'umwaka ushize itangwa na Banki y'Isi, twari dufite miliyoni  241 z'amadorali'

    Abashakashatsi n'impuguke mu bukungu bahuriza kukuba ibihugu by'afurika bikwiye gushyiraho uburyo bunoze bwatuma abenegihugu baba hanze barushaho kugira uruhare ruziguye mu iterambere ry'ubukungu bw'ibihugu by'inkomoko.

    Straton Habyarimana impuguke mu bukungu na Dr Edward Kadozi umushakashatsi mu by'imari barasobanura uko byakorwa.

    Impuguke mu by'ubukungu Habyarimana aragira ati 'Iyo hashyizweho uwo murongo wo kuvuga ngo dushyizeho  gahunda inoze, ushaka wese kugira uruhare  dore ahantu ushobora kohereza amafaranga azajya ahagera. Ariko  ukanagaraza uburyo ki uzajya uyacunga, bakazagira ijambo mu kugenzura ibyo ayo mafaranga yakoreshejwe.'

    Dr Kadozi ni umushakashatsi mu by'imari ati 'Ariko ni ibyifuzo by'abadiaspora, usanga rimwe bavuga bati mudushyirireho gahunda zimwe na zimwe zidufasha, tubone amakuru  tuze dushore imari, kuko bose siko baba bafite amakuru.'

    Nabajije abanyarwanda baba hanze uko bakwakira igitekerezo gishya cyo kubereka uko bagira uruhare rw'ako kanya mu gushyigikira ingengo y'imari y'igihugu cyabo, maze Bernard NTEZIMANA uba mu Bushinwa na Niyigena Salim uba muri Turikiya basubiza ko ari igitekerezo cyiza kuko basanzwe babitozwa.

    Bernard Ntezimana uba mu Bushinwa ati 'Igitekerezo cy'uko Diaspora yajya igira uruhare mu gushyigikira (Remittance Contributions) ingengo y'imari y'u Rwanda ni igitekerezo kiza kandi nkuko twabitojwe aho tuba tujya hose, tuba dushaka amaboko y'Igihugu.'

    Salim Niyigena uba muri Turikiya nawe yagize ati 'Njye numva ari igitekerezo cyiza kuko twese turi Abanyarwanda, ni inshingano zacu  twese nk'Abanyarwanda  kugira uruhare mu iterambere ry'igihugu cyacu.'

     Imibare y'Ishami ry'Umuryango w'Abibumbye rishinzwe Abimukira iheruka igaragaza ko abanyarwanda baba hanze mu buryo buzwi ni ukuvuga abafite ibyangombwa barenga ibihumbi 513.

    Tito DUSABIREMA

    The post Diaspora Nyarwanda mu nzira yo kugira uruhare mu ngengo y'imari y'Igihugu appeared first on Flash Radio TV.

    Source : https://flash.rw/2021/08/05/diaspora-nyarwanda-mu-nzira-yo-kugira-uruhare-mu-ngengo-yimari-yigihugu/?utm_source=rss&utm_medium=rss&utm_campaign=diaspora-nyarwanda-mu-nzira-yo-kugira-uruhare-mu-ngengo-yimari-yigihugu

  • Nyaruguru: Padiri Jean Claude Buhanga yitabye Imana azize impanuka #Rwanda #RwOT via @kigalitoday #rwanda #RwOT

    Iyo mpanuka yabereye ahitwa i Ndago mu Karere ka Nyaruguru, hafi y’isoko, aho abakunze kugenda muri ako karere bazi ku izina rya ‘Community Center’.

    Padiri Buhanga yaturukaga i Cyahinda yerekeza i Kibeho, kandi mu modoka yari kumwe na Faratiri Thacien Niyonsaba.

    Imodoka barimo yagonganye n’ikamyo y’Abashinwa barimo gushyira kaburimbo mu muhanda Huye-Nyaruguru, yari yikoreye umucanga, ni uko Padiri Buhanga ahita yitaba Imana, ariko Faratiri Niyonsaba we yari agihumeka, maze ajyanwa ku bitaro bya CHUB i Huye.

  • Abaguzi barasaba leta ko yashyiraho ibihano ku Bacuruzi bakizamura ibiciro bya Cotex #rwanda #RwOT

    Abaguzi barasaba Leta ko yakurikirana abazamura ibiciro by'impapuro z'isuku zikoreshwa n' abagore n'abakobwa zizwi nka 'Cotex' kuko bahendwa n'ibi bikoresho, ababizamura bagahanwa.

    Ikigo cy'Imisoro n'Amahoro (RRA)giherutse kuburira abacuruzi, kibasaba guhagarika kwishyuza imisoro ku bikoresho by'isuku by'abagore n'abakobwa bizwi nka 'Cotex' n'ibindi, bituma igiciro cyabyo gitumbagira.

    Abagore n'Abakobwa bakomeje kwinubira igiciro gihanitse cy'ibi bikoresho muri ibi bihe by'icyorezo cya Covid-19.

    Kuva muri 2019 leta y'u Rwanda yatangaje ko umusoro kuri ibi bikoresho uvuyeho, ariko ku isoko nta cyahindutse.

    Mu itangazo Ikigo cy'Imisoro n'Amahoro (RRA) giheruste gushyira ahagaragara, yongeye kwihaniza abacuruzi bari kuba intandaro y'itumbagira ry'ibiciro binyuze mu kwishyuza imisoro kandi ibi bikoresho byarasonewe mu rwego rwo kwirinda ko byahenda.

    Bamwe mu baguzi baganiriye n'itangazamakuru rya Flash baravuga ko ibikoresho byifashishwa n'abagore n'abakobwa bari mu mihango bigihenze.

    Aba bavuga ko nka Cotex ahenshi utayibona ku mafaranga ari munsi ya 800.

    Uwingabire Yvonne yagize ati 'Kuba leta yarakuyeho imisoro abacuruzi bakaduhenda ni akarengane rwose. Ubu ujya ku isoko ugasanga Cotex iragura amafaranga 800Rwf wasubirayo usagasanga ni 1000Rwf.  Bagakwiye gushyiraho ibiciro bihoraho ababizamura bagafatirwa ibihano.''

     Mukaneza Esperance nawe yagize ati 'Ibiciro nibadufashe babigabanye kuko imisoro ya cotex yakuweho. Ahenshi abacuruzi bagurisha uko bishakiye, ibiciro bigakomeza bigahindagurika.''

    Abacururiza mu mujyi wa Kigali babwiye itangazamakuru rya Flash ko umusoro w'ibi bikoresho utakuweho kuko barangura ku biciro biri hejuru nabo bakabizamura, aho usanga barangura cotex ku mafaranga 800 bakayigurisha igihumbi.

     'Nkatwe abacuruzi, iyo tugiye kurangura usanga baduhera ku biciro bishakiye natwe twagurisha tukabizamura kuko tuba twabiranguye biduhenze. Njye mbona igikwiye gukorwa ari uko Ikigo cy'Imisoro n'Amahoro n'abafite inganda na Minisiteri y'ubucuruzi n'inganda, bajya inama bakajya bashyiraho ibiciro bidahinduka. Ibyo natwe byazadufasha mu kudahenda abakiriya.'' Manishimwe Winnie ni umucuruzi mu mujyi wa Kigali

    Umuyobozi ushinzwe kumenyekanisha ibikorwa mu ruganda SUPA rukora ibikoresho by'isuku, Jean Bisumbukuboko, avuga ko ibikoresho by'isuku bya cotex  byamanutse bitewe n'uko RRA yakuyeho umusoro wabyo, aho ibiciro byo ku ruganda byavuye ku bihumbi 35 bikagera ku bihumbi 30.

    Bisumbukuboko ati 'Natwe icyo kibazo twarakirebye, tugerageza kugishungura ariko dusanga ntibyumvikana. Abo ni barusahurira mu nduru nziko ibiciro byacu bitigeze bihenda na n'ubu ntituzi impamvu bakomeje kubihenda, ariko kugira ngo icyo kibazo gikemuke twakoranye inama  na Minicom hamwe na MIGEPROF twumvikana ko abantu bareka guhenda abaturage. Kuko leta yigomwe umusoro, natwe aho twari tugeze ibiciro turabimanura tubikura ku bihumbi 35 twari tugezeho tubishyira ku bihumbi 30.'

    Bisumbukuboko yagaragaje ko abazafatwa bacuruza cotex ku biciro bihabanye n'ibyashyizweho bazajya bakurwa ku rutonde rw'abakiriya b'uruganda rwa SUPA.

    Yagize ati 'Abo bazajya bafata babirenzeho bajye babahana, abo bazajya bafata ari abantu bacu bajye babazana tubakure mu mubare w'abakiriya bacu, kuko baba bakora ibihabanye nibyo twifuza.'

     Ibi bikoresho by'isuku bikoreshwa n'abagore n'abakobwa bigurwa ku mapaki, agapaki kamwe karimo udukoresho 10 kagura amafaranga hagati y'amafaranga 800 n'1,000.

    Icyakora ku ruganda bavuga ko Cotex ya macye ari amafaranga y'u Rwanda 300, nyamara ku isoko iya macye ntijya munsi y'amafaranga 500.

    AGAHOZO Amiella

    The post Abaguzi barasaba leta ko yashyiraho ibihano ku Bacuruzi bakizamura ibiciro bya Cotex appeared first on Flash Radio TV.

    Source : https://flash.rw/2021/08/05/abaguzi-barasaba-leta-ko-yashyiraho-ibihano-byabacuruzi-bakizamura-ibiciro-bya-cotex/?utm_source=rss&utm_medium=rss&utm_campaign=abaguzi-barasaba-leta-ko-yashyiraho-ibihano-byabacuruzi-bakizamura-ibiciro-bya-cotex

  • Kamonyi: Abantu 13 barimo abayobozi mu Mudugudu bishe amabwiriza ya Covid-19 barekuwe ku bw'imbabazi #rwanda #RwOT

    Uko ari 13, bose bafashwe ku cyumweru ahagana ku i saa kumi z'igicamunsi. Icumi muri bo ni abo mu Murenge wa Nyamiyaga, mu gihe 3 ari abo mu Murenge wa Musambira. Barekuwe nyuma y'iminsi itanu bafunze, bahabwa inama n'impanuro batahana, nabo biyemeza ko bagiye guca ukubiri no kwica amabwiriza ya Covid-19 kandi ari bo gakabaye urugero rwiza ku bandi.

    Muri aba 10 bafatiwe mu Murenge wa Nyamiyaga, bari mu kabari hamwe n'Umukuru w'Umudugudu witwa Ndayisenga Jean Claude hamwe n'ushinzwe umutekano mu Mudugudu ariwe Nzabahimana Alexis. Bose ni abo mu Kagari ka Kabashumba, Umudugudu wa Ruyumba. Abandi 3 bo bafatiwe Musambira.

    Vice Mayor Uwamahoro aganiziza aba bafatiwe mu kwica amabwiriza ya Covid-19.

    Kuva ku cyumweru ahagana ku I saa kumi ubwo bafatwaga, barekuwe kuri uyu wa Kane bamaze guhabwa inama n'impanuro n'Umuyobozi w'Akarere ka Kamonyi wungirije ushinzwe imibereho myiza y'Abaturage. Baganirijwe kandi n'ubuyobozi bwa Polisi muri aka karere nabwo bwabasabye kwitwararika bakirinda kwica amabwiriza ya Covid-19.

    Yaba Uwamahoro Prisca, Umuyobozi w'Akarere wungirije ushinzwe imibereho myiza y'Abaturage, yaba Uhagarariye Polisi mu Karere, bose mu butumwa bwabo kuri aba bantu barekuwe nyuma yo kubabarirwa, amande agasimbuzwa imbabazi, babasabye kwirinda gukerensa amabwiriza yo kwirinda Covid-19 kuko iyo batayubahirije bibagiraho ingaruka, byaba kuri bo ubwabo no mu miryango yabo ndetse n'Igihugu muri rusange.

    Mu ngaruka bahura nazo, uvanyeho icyorezo ubwacyo kitabasha ku bababarira, bibukijwe ko hari ibihano mu rwego rw'amategeko ku bishe cyangwa se barenze ku mabwiriza yo kwirinda Covid-19. By'umwihariko abayobozi basabwe kuba bandebereho bakirinda gukora ibikorwa bibi nko kurenga ku mabwiriza nkana; kuko iyo batanze urugero rubi bigira ingaruka mu gukurikirana ishyirwamubikorwa ry'ingamba zo gukumira iki cyorezo. Basabwe gukomeza kwitwararika haba aho batuye n'aho bagenda.

    Nyuma yo kurekurwa no kuganirizwa mu nama n'impanuro, aho bibukijwe ububi n'ubukana bw'icyorezo cya Covid-19,  aba bose basabye imbabazi bavuga ko batazongera, ko kandi bagiye kwitwararika bakabera abandi urugero rwiza mu gukumira no kwirinda icyorezo cya Covid-19.

    Mu gihe icyorezo cya Covid-19 gikomeje gucana maremare ndetse bimwe mu bice by'Igihugu bikaba biri muri Gahunda ya Guma mu rugo, Akarere ka Kamonyi nako ni kamwe mu twagiye tigaragaramo ubwandu buri hejuru kugera n'aho kari mu turere Umunani duherutse gushyirwa muri Guma mu rugo nubwo ubu kakuwemo. Kwirinda iki cyorezo bijyana no Guhana intera hagati y'umuntu n'undi, Gukaraba intoki n'amazi meza ndetse n'isabune hamwe no kwambara agapfukamunwa n'amazuru kandi neza.

    Munyaneza Theogene / intyoza.com

    Source : https://www.intyoza.com/kamonyi-abantu-13-barimo-abayobozi-mu-mudugudu-bishe-amabwiriza-ya-covid-19-barekuwe-ku-bwimbabazi/