Webrwanda Backend

Category: Uncategorized

  • Igitekerezo : Abigize abagenzuzi b’ibikwiye n’ibidakwiye ku mbuga nkoranyambaga ububasha mubukura he? #Rwanda #RwOT via @kigalitoday #rwanda #RwOT

    Ubundi n’ubwo ibi byitwa imbuga nkoranyambaga, biba ibya rusange ari uko nyiri ubwite yahisemo kubisangiza imbaga (abantu bnshi), kuko bitangira ari urubuga rwe yitangirije, nyuma akajya ahitamo ko ibyo ashyizeho bibonwa n’imbaga cyangwa akabigenera itsinda ry’abo ashaka kubyereka.

    Ibi rero biba ari amahitamo y’umuntu y’ibyo ashaka kwerekana bitewe n’impamvu ze. Ariko ukabona irindi tsinda ry’abantu runaka rirabijyaho impaka ngo ntabwo ibyo yashyizeho byari bikwiye nk’aho ari bo bashinzwe kumuhitiramo ibikwiye n’ibidakwiye.

    Ibi ndabigarukaho cyane ntavuga ku mbuga nini nka Twitter na Instagram cyangwa Facebook n’izindi. Ndagaruka kuri Whatsap akenshi ikoreshwa mu matelefone ngendanwa y’abantu. Aho umuntu ashyiraho sitati (status) ikabonwa n’abantu bamufitiye nomero kandi na we abafitiye izabo. Ni ukuvuga ko aba ari abantu baziranye mu buryo bumwe cyangwa ubundi.

    Ugasanga abantu bahora bavunwa n’ibyo mugenzi wabo ashyira kuri sitati ye, ngo aba yakabije, ararengera abenshi bakanabihuza n’imyaka, inshingano n’ibindi byinshi. Ariko se ko nyiri ubwite ari we ufite uburenganzira bwo kwihitiramo ibyo abona ashaka gushyiraho, muri make aba azi ibikwiriye kuri we n’ibidakwiriye. Abandi bibavunira iki ?

    Ibi bintu n’ubwo byashyirwaho na nyiri ubwite agasigira uburenganzira buri muntu umufitiye nomero ko yabibona, ntibiba bivuze ko ubireba ku gahato. Ni amahitamo nawe uba wagize kujya kureba kuri sitati ze. None se kuki ubihitamo kubireba ubundi bikakubera umutwaro ? Mba numva harimo kudakura mu mutwe no kutamenya nawe ubwawe icyo ukunze n’icyo wanze.

    Hari abantu bakunze kunengwa n’inshuti zabo cyangwa abavandimwe n’amatsinda runaka bahuriyemo ngo ashyira ibintu bidahuye kuri sitati ye, ngo agaragaza ubuzima bwe, abandi bakanabihuza n’ubwirasi cyangwa ubwibone… Ibi kandi bigarukwaho hirya no hino. Ariko bintera kwibaza mu byukuri ugomba kumenyera nyiri ubwite ibikwiriye n’ibidakwiriye kuri sitati ye. Kandi na we ari umuntu mukuru ukuze.

    Igitangaje uyu muntu unengwa n’abantu benshi bamutaramanye ngo ashyiraho ibintu bidakwiriye, ni we usurwa n’abantu benshi ku buryo ntawutuza atarajya kureba ibyo yashyizeho. Bamara kubireba bakiciraguraho ngo ibyo ni ibiki aba yashyizeho. Ibi bigatuma nibaza niba koko aba baba babyanze cyangwa baba babikunze.

    Ku bwanjye numva abantu bakagombye kurenga ibintu nk’ibyo bibavuna mu mutwe kandi ntacyo bibamariye. Umuntu aba ari mukuru wo guhitamo ibyo ashyira ku mbuga nkoranyambaga ze. Nawe uba uri mukuru wo guhitamo kubireba cyangwa ukabireka, ubundi ugakomeza ubuzima n’ibintu bifite icyo bikumariye binakungura. Aho guhora muvuga kanaka ngo ashyira ibi kuri sitati kandi we yabishyizeho akikomereza ubuzima bumuryoheye kuko yakoze ibyo yumva ashaka.

    source : https://ift.tt/3lZzLvk

  • CP John Bosco Kabera aragira inama abacuruza Mukoro kuzibukira #rwanda #RwOT

    CP John Bosco Kabera yabivuze nyuma y’uko ku gicamunsi cyo kuri uyu wa Gatanu tariki ya 13 Kanama ahagana saa cyenda Abapolisi bo mu ishami rya Polisi y’u Rwanda bashinzwe kurwanya ubucuruzi bwa magendu n’ibindi byaha bafashe uwitwa Sinayobye Augustin w’imyaka 43 na Nzamurambaho Laurent w’imyaka 33, bariho bacuruza amavuta yangiza uruhu (Mukorogo). Sinayobye yafatanwe amacupa 47 naho Nzamurambaho afatanwa amacupa 55.

    Bafatiwe mu Karere ka Gasabo, Umurenge wa Gisozi, mu tugari n’imidugudu bitandukanye. Nzamurambaho yafatiwe mu Kagari ka Musezero mu Mudugudu wa Agasharu naho Sinayobye yafatiwe mu Kagari ka Ruhago mu Mudugudu wa Rukeri.

    Umuvugizi wa Polisi y’u Rwanda, Commissioner of Police (CP) John Bosco Kabera yavuze ko gufatwa kwa bariya bantu ni bimwe mu bikorwa bya Polisi imaze igihe ikora bigamije kurwanya abacuruza amavuta yo kwisiga atejuje ubuziranenge.

    Yagize ati 'Si ubwa mbere dufata abantu nka bariya, inshuro nyinshi bagiye berekwa itangazamakuru kubera gukomeza gucuruza ariya mavuta yaciwe mu Rwanda kubera ingaruza zayo ku buzima bw’abantu. Turakomeza kuburira abagicuruza ariya mavuta ko ibikorwa byo kubafata bigikomeje bitazigera bihagarara, abayafite turabagira inama yo kuyakura mu maduka yabo bakayajugunya bagacuruza ibyemewe.'

    CP John Bosco Kabera yongeye gushimira abaturage bakomeje kugaragaza umusanzu wabo mu kurwanya aya mavuta babinyujije mu gutanga amakuru kandi bakayatangira ku gihe. Yavuze ko bariya bafashwe ndetse n’abandi bagiye bafatwa bafashwe biturutse ku guhanahana amakuru.

    CP Kabera yakomeje avuga ko bariya bombi amavuta bafatanwe mu maduka yabo bari bafite abantu batandukanye bayabaha. Nzamurambaho yavuze ko ayahabwa n’umucuruzi ukorera i Nyamirambo witwa Ndayambaje naho Sinayobye we ayahabwa n’uwitwa Nkurikiyimana Juvenal bakunze kwita Gatoya, uyu acururiza i Nyabugogo.Yavuze ko amayeri yose bakoresha bakwirakwiza ariya mavuta yamenyekanye.

    Ati 'Nkuriya witwa Nzamurambaho amavuta ayazanirwa n’abanyonzi, bayakura i Nyamirambo kwa Ndayambaje, uyu afite ububiko bwayo (Stock). Naho Sinayobye we n’abantu bayagendana bayafite mu bikapu bakayamusangisha mu Murenge wa Gisozi bayakuye Nyabugogo kwa Nkurikiyimana bakunze kwita Gatoya.'

    CP Kabera yibukije abaturarwanda kwirinda ariya mavuta bakazirikana ko inzego z’ubuzima zagaragaje ko agira ingaruka zikomeye ku buzima bw’uyisize.

    Ati 'Ariya mavuta azwi nka mukorogo arimo ibinyabutabire byangiza uruhuru bikaba byagira ingaruka ku buzima bw’uyisize. Ishami ry’umuryango w’abibumbye ryita ku buzima (OMS) rivuga ko ayo mavuta ashobora kugira ingaruka zikomeye ku mpyiko n’umwijima, abaganga kandi bavuga ko ingaruka zayo zihita zigaragara ku ruhu kuko ruhita rutukura.'

    Abafashwe bishyikirijwe Urwego rushinzwe ubugenzacyaha(RIB) rukorera muri sitasiyo ya Polisi ya Kacyiru kugira ngo hakorwe iperereza.

    Itegeko nº68/2018 ryo ku wa 30/08/2018 riteganya ibyaha n’ibihano muri rusange Ingingo ya 266 ivuga ko Umuntu wese ukora, ugurisha, utanga ibintu bibujijwe bikurikira : umuti ; ibintu bihumanya ; ibintu binoza cyangwa bisukura umubiri ; ibindi bikomoka ku bimera ; aba akoze icyaha.

    Iyo abihamijwe n’urukiko, ahanishwa igifungo kitari munsi y’umwaka umwe (1) ariko kitarenze imyaka ibiri (2) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano.

    Source : http://www.ukwezi.rw/mu-rwanda/Amakuru-anyuranye/article/CP-John-Bosco-Kabera-aragira-inama-abacuruza-Mukoro-kuzibukira

  • Menya aho kwizihiza Asomusiyo tariki 15 Kanama byaturutse #Rwanda #RwOT via @kigalitoday #rwanda #RwOT

    Umusaseridoti Ndagijimana Theogene ubarizwa muri Diyosezi ya Nyundo waganiriye n’umunyamakuru wa Kigali Today, mu kwemera kwe yizera ko Bikira Mariya yari umuziranenge, ndetse umuhungu we Yezu yamujyanye mu ijuru kubera urukundo yamukundaga cyane kugira ngo bajye kubana mu ijuru.

    Ati: “Ijyanwa mu ijuru rya Bikira Mariya ryabaye nk’ikimenyetso cyo kubaha uwo mubyeyi, nyuma yo gusoza ubutumwa bwe hano ku isi. Nk’uko umubyeyi n’umwana badatandukana ni nako Yezu wari ugiye mu ijuru atari busige umubyei we ku isi yuzuye ibyaha kandi yari umuziranenge utagira icyasha, bityo yari akwiriye kujyanwa mu ijuru ahagenewe abatagira icyaha. Niba rero twifuza kujya mu ijuru, twige kubaho nka Bikira Mariya”.

    Ikindi kandi ngo ni uko ijyanwa mu ijuru rya Bikira Mariya ari ubutoneshwe yagiriwe nyuma y’urupfu rwe, atabikesheje kamere ye ahubwo abikesheje umwana we.

    Mu mateka bavuga ko mu kinyejana cya gatandatu aribwo uyu munsi mukuru watangiye kwizihizwa i Yeruzalemu, ariko utaramenyekana cyane. Mu kinyejana cya karindwi nibwo uyu munsi wo guhimbaza ubutarasamanywe icyaha bwa Bikira Mariya wamenyekanye henshi ndetse uranizihizwa, umaze kugirwa ihame muri Kiliziya Gatolika.

    Iminsi myinshi yizihizwa muri Kiliziya Gatolika, Umusaseridoti Theogene avuga ko igirwa ihame hanagendewe ku bitangaza runaka bihamya uwo munsi, bityo ikabona kwizihizwa no kugirwa ihame ku mukirisitu wese.

    Umunsi w’ijyanwa mu ijuru kwa Bikiramariya wagizwe ihame tariki 1 Ugushyingo, Iyi tariki ikaba inizihizwaho umunsi umunsi w’Abatagatifu bose.

    Uwo munsi wizihizwa tariki 15 Kanama kuko hari umwami w’u Bufaransa Louis XIII wamaze imyaka makumyabiri (20) atarabyara we n’umugore we. Mu isengesho ryabo bisunze ibikorwa bya Bikira Mariya, bamusaba kugira ngo abahe urubyaro, bityo baza kubona igitangaza babona umwana tariki 15 Kanama uwo munsi utangira kwizihizwa kuri iyo tariki kuva ubwo, ariko ugirwa ihame nyuma mu kwezi k’Ugushyingo.

    Umusaseridoti Ndagijimana Theogene yasobanuye ibyerekeranye na Asomusiyo
    Umusaseridoti Ndagijimana Theogene yasobanuye ibyerekeranye na Asomusiyo

    Ndagijimana Theogene asaba abakirisitu kumenya ihame ry’ukwemera ku munsi nk’uyu wizihizwaho ijyanwa mu ijuru rya Bikiramariya, kuko bifasha umukirisitu wese. Yibutsa abakirisitu bose kutabaho uko bashaka, ko ahubwo bari mu rugendo bw’ubutumwa hano ku isi ruzabageza mu ijuru. Avuga ko kandi imibereho y’ubuzima bwa Bikiramariya igomba gufasha umukirisitu wese kwitwararika, kunogera Imana, gukurikiza ugushaka ku Imana no kubaho mu rukundo n’ubudahemuka.

    Ndagijimana avuga ko gupfa neza bibanzirizwa no kubaho neza, ari yo mpamvu umukirisitu wese akwiye gusaba inema yo gupfa neza.


    source : https://ift.tt/3g4xrzm

  • Abantu bake ni bo bemerewe kwizihiriza Asomusiyo i Kibeho #Rwanda #RwOT via @kigalitoday #rwanda #RwOT

    I Kibeho mu Karere ka Nyaruguru ni hamwe mu hari hasanzwe hahurira abantu benshi kuri uyu munsi wizihizwa na Kiliziya Gatolika ku itariki ya 15 Kanama buri mwaka. Ubuyobozi bw’Akarere ka Nyaruguru buvuga ko ubusanzwe kuri uyu munsi mukuru hakorwaga ibirori bikomeye. By’umwihariko i Kibeho ku butaka butagatifu wasangaga hahuriye abantu benshi babarirwa mu bihumbi bisaga 40 baturutse hirya no hino ku Isi, ariko kuri iyi nshuro hahuriye abantu bake cyane babarirwa muri 300 mu rwego rwo kubahiriza amabwiriza yo kwirinda ikwirakwira ry’icyorezo cya Covid-19.

    Mu kiganiro yagiranye na RBA, umuyobozi w’agateganyo w’Akarere ka Nyaruguru, Janvier Gashema, yavuze ko hari uburyo bwashyizweho bwo kugira ngo abantu babashe gukomeza kwizihiza umunsi mukuru wa Asomusiyo bubahiriza amabwiriza yo kwirinda icyorezo.

    Ati “Ubundi uyu munsi mukuru wabaga ari umunsi ukomeye cyane hano mu Karere ka Nyaruguru mu Murenge wa Kibeho ariko kubera ko turimo guhangana n’icyorezo cya Covid-19 birasaba ko umuntu uhaza ari uwiyandikishije ku buryo tutarenza umubare w’abantu tubasha kwakira kandi twubahirije amabwiriza yo kwirinda, bishingiye ku mibare isanzwe yakirwa kugira ngo tubashe kwirinda icyorezo.”

    Icyorezo cya COVID-19 cyatumye abitabiriye uyu munsi mukuru muri iyi myaka ibiri bagabanuka cyane kandi bubahiriza amabwiriza yo kwirinda
    Icyorezo cya COVID-19 cyatumye abitabiriye uyu munsi mukuru muri iyi myaka ibiri bagabanuka cyane kandi bubahiriza amabwiriza yo kwirinda

    Yongeyeho ati “Dukoresheje uburyo buhari turakira abantu bacye cyane kugira ngo abahaje tutagira ibyago byo kugira ngo bagende banduzanya covid, abaturiye hafi barabizi ariko n’abatahaturiye barabizi kuko hari uburyo bwacishijwe mu ma Paruwasi bwo kubabwira uko bizagenda, handikwa umubare w’abantu bagomba kuza, abiyandikishije rero ni bo baje hanyuma abatabashije kwiyandikisha hari uburyo twumvukanye na Kiliziya Gatolika bwo kuzana televiziyo ndetse na radiyo kugira ngo byibuze abantu babashe gukurikirana ibirimo kubera ku butaka butagatifu badahari ariko na bo bari kumwe n’umubyeyi Bikira Mariya”.

    Mu biyandikishije harimo n’abanyamahanga n’ubwo hari n’undi mubare munini w’abari bifuje kuhagera ariko ntibibakundire kubera ingamba zo kwirinda icyorezo kuko hagomba kwakirwa bacye ugereranyije n’umubare wari usanzwe uhakirirwa.

    Umuyobozi w’agateganyo w’Akarere ka Nyaruguru yaboneyeho kongera gukangurira abikorerwa gushora imari muri aka Karere.

    Ati “Ibyo Leta yasabwaga yarabikoze mu bijyanye n’ibikorwa remezo, umuhanda wa kaburimbo, amashanyarazi, Internet, amazi, uburyo bwo kwivuza ku wagira ikibazo cyo kwivuza ariko ibijyanye n’amacumbi biracyari ikibazo, nkaba nasaba n’abikorera kubyaza umusaruro amahirwe ari mu Karere ka Nyaruguru kuko ni ahantu dufite isoko rihagije. Uretse kuba turi mu cyorezo ariko kandi dutekereza ko kitazahoraho ku buryo uwahashora imari mu bijyanye n’amahoteri yahasanga ibyo bikorwa remezo byashoboye kuhagera hanyuma na we akabasaha kwakira abagana Kibeho kugira ngo umushinga yashoyemo imari abashe kubonamo inyungu”.

    Mu bihe bisanzwe kuri Asomusiyo i Kibeho habaga hateraniye abakirisitu benshi baturutse hirya no hino ku isi
    Mu bihe bisanzwe kuri Asomusiyo i Kibeho habaga hateraniye abakirisitu benshi baturutse hirya no hino ku isi

    I Kibeho ubusanzwe hateraniraga abantu benshi babaga buzuye ku kibuga gihari no mu nkengero zacyo, ariko kuri iyi nshuro abemerewe kuhateranira bahuriye imbere mu ngoro ya Bikira Mariya bituma baba umubare muto cyane ko abarimo na bo batayuzuye kuko hakurikijwe amabwiriza ateganywa yo kwakira umubare muto hagamijwe kwirinda Covid-19.


    source : https://ift.tt/3CQZagP

  • Dore impamvu zitandukanye zituma abantu bacana inyuma – YEGOB #rwanda #RwOT

    Rimwe  na rimwe wumva abantu bakundana umwe yaciye inyuma undi ndetse n'abantu babana barashakanye gucana inyuma n'ibintu bakora cyane, aho uzasanga abantu benshi bahora mu ntonganya ndetse no mu marira ngo bacibwa inyuma gusa burya nta kintu kiba kidafite impamvu burya hari ababigiramo uruhare kugira ngo bibabeho.

    Ni ibintu byinshi bigaragara bituma bamwe mu bantu bakundana bacana inyuma, ni muri urwo rwego tugiye kurebera hamwe Bimwe muri ibyo bintu:

    Kuba umuntu asanzwe nta rukundo agira mu we

    Iki ni kimwe mu bibazo byugarije abantu benshi muri rusange kuko usanga abakobwa cg abahungu b'iki gihe batakigira urukundo rw'ukuri aho umuntu ahura n'undi bagakundana ejo yahura n'undi nawe bagakundana.

    Benshi rero ntibaba banibuka ko bafite abakunzi ahanini kubera ikibazo cyo kutagira Urukundo ruhamye.

    Kugira agahararo

    Bamwe mu bakobwa cg abahungu batendeka abakunzi babo kubera guharara cyane kuko ashobora kuba akundana n'umuntu ejo yabona undi wateye imbere nawe agahita yifuza gukundana na we ariko byibuze ntabwire uwo bari basanzwe bakundana ko byarangiye yabonye undi ahubwo agakomeza kumubeshya ko amukunda kugira ngo nawe atamutakaza gusa uzasanga abantu bakora ibi bintu no mu buzima busanzwe baba bahuzagurika mu byo bakora byose.

    Gukunda ibintu cyane (ibintu n'amafaranga)

    Abantu benshi hari igihe baba bafite abakunzi ariko ugasanga batanyurwa n'ibyo babaha cyangwa se babakorera, bagahitamo gushaka abandi kugira ngo bahabwe bya bindi babuze ku ruhande.

    Ibyo rero barabikora ariko ugasanga ntabwiye wawundi yari asanzwe afite ko byarangiye ngo batandukane ahubwo agakomeza kumukina kugira ngo nawe akomeze ajye amuha byabindi yamuhaga ndetse nundi yabonye agakomeza kumuha ibindi.

    Ibishuko

    Guca inyuma akenshi bishobora kutava ku mukunzi wawe ahubwo ushobora gusanga afite nk'undi muntu ku ruhande umushukisha ibintu bitandukanye.Iyo rero umukunzi wawe w'umusore afite umukobwa kuruhande umushukisha kuryamana cyane ko abasore batazi kwifata kuri iyo ngingo bashiduka baguye mu mutego wo guca inyuma abakobwa bakunda.

    Kurambirwa

    Hari igihe kigera ugasanga umuntu mukundana yaba umuhungu cyangwa umukobwa yakurambiwe ariko akirinda kukwereka ko yakurambiwe ahubwo akigira gushaka abandi batari wowe, yababona agatangira kuguca inyuma utabizi wowe ugakomeza kwizera ko umuntu akigukunda kandi by'ubyukuri we yarakurambiwe kera.

    Source : https://yegob.rw/dore-impamvu-zitandukanye-zituma-abantu-bacana-inyuma/

  • Abantu 10 bakoranye bya hafi na Perezida Kagame ubu bakaba bafunze cyangwa barahunze bashinjwa kurwanya ubutegetsi bwe #rwanda #RwOT

    Muri iyi nkuru, nyuma yo gusubiza amaso inyuma, turabagezaho urutonde rw’abantu 10 bigeze gukorana bya hafi na Perezida Paul Kagame mu myanya ikomeye y’ubuyobozi n’iya gisirikare, bakaba bari mu baza ku isonga mu bashinjwe mu nkiko ibyaha birimo ibyo kurwanya ubutegetsi bwe no kugambirira kubugirira nabi cyangwa kumugirira nabi ubwe nk’Umukuru w’igihugu.

    1- Gen Kayumba Nyamwasa

    JPEG - 42.6 ko

    Lt Gen Kayumba Faustin Nyamasa yigeze kuba umugaba mukuru w’ingabo z’u Rwanda, nyuma aza guhagararira u Rwanda mu Buhinde ku mwanya wa ambasaderi, aho yavuye afata iy’ubuhungiro akerekeza muri Afurika y’Epfo.

    Muri 2011, Lieutenant General Kayumba Nyamwasa yahamwe n’ibyaha byo kurema umutwe w’abagizi ba nabi, gukurura amacakubiri n’ivangura ; ibyaha bivutsa igihugu na Leta umudendezo no gusebanya. Yahamwe kandi n’icyaha cyo gutoroka igisirikare. Yaburanishijwe adahari, akatirwa imyaka 24 y’igifungo. Afatanyije na bagenzi be barwanya Perezida Kagame n’ubutegetsi bwe, bashinze ishyaka RNC rirwanya byeruye ubutegetsi bw’u Rwanda. Yagiye kandi ashinja Perezida Kagame ibyaha birimo n’icyo guhanura indege y’uwahoze ari Perezida Juvenal Habyarimana.

    2 – Colonel Patrick Karegeya

    JPEG - 55.2 ko

    Col Patrick Karegeya nawe yahoze afite umwanya ukomeye yahawe na Perezida Kagame, akaba yarigeze gukorera ishami rishinzwe iperereza ryo hanze y’igihugu. Nyuma yo gufungwa kabiri, muri 2006 yaje kwamburwa ipeti rye rya Colonel.

    Uyu nawe yaje guhungira muri Afurika y’epfo muri 2007 ndetse aza kuburanishwa adahari muri 2011, ahamwa n’ibyaha byo kurema umutwe w’abagizi ba nabi, gukurura amacakubiri n’ivangura ; ibyaha bivutsa igihugu na Leta umudendezo no gusebanya, hanyuma akatirwa imyaka 20 y’igifungo. Uyu nawe yaje kwerura ko adacana uwaka na Perezida Kagame anarwanya ubutegetsi bw’u Rwanda mu buryo bweruye, kugeza ubwo yaje kwicwa arasiwe muri Afurika y’Epfo muri Mutarama 2014.

    3- Major Rudasingwa Theogene

    JPEG - 166.1 ko

    Major Rudasingwa Theogene we yabaye umuyobozi w’ibiro bya Perezida wa Repubulika, aba Umunyamabanga mukuru wa RPF ndetse yanabaye Ambasaderi w’u Rwanda muri Leta Zunze Ubumwe za Amerika. Yahungiye muri Amerika muri 2004 ndetse nawe muri 2011 aza guhamwa n’ibyaha byo kurema umutwe w’abagizi ba nabi, gukurura amacakubiri n’ivangura ; ibyaha bivutsa igihugu na Leta umudendezo no gusebanya. Yahamwe kandi n’icyaha cyo gutoroka igisirikare. Yaburanishijwe adahari, akatirwa imyaka 24 y’igifungo. Kugeza n’ubu, uyu ari mu barwanya byeruye ubutegetsi bw’u Rwanda.

    4- Gerard Gahima

    JPEG - 37.4 ko

    Gerard Gahima yigeze kuba umushinjacyaha mukuru w’u Rwanda, ndetse yanabaye Visi Perezida w’urukiko rw’ikirenga. Nyuma nawe yaje guhunga, ndetse aza no kujya mu ishyaka rya RNC rirwanya ubutegetsi buriho mu Rwanda. Nawe yagejejwe imbere y’ubutabera ahamwa n’ibyaha byo kurema umutwe w’abagizi ba nabi, gukurura amacakubiri n’ivangura ; ibyaha bivutsa igihugu na Leta umudendezo no gusebanya, hanyuma akatirwa imyaka 20 y’igifungo.

    5- Col Tom Byabagamba

    JPEG - 68.3 ko

    Col.Tom Byabagamba yahoze akuriye itsinda ry’abasirikare barinda Perezida Paul Kagame, ariko nyuma yaje gutabwa muri yombi ndetse yaje guhamwa n’ibyaha akatirwa igifungo no kwamburwa amapeti ya gisirikare.

    Muri Werurwe 2016, Col Tom Byabagamba yahamijwe icyaha cyo gukwiza nkana ibihuha agomesha rubanda, arwangisha ubutegetsi, icyaha cyo gusebya leta ; icyaha cyo guhisha nkana ibintu byagombye gufasha kugenza icyaha gikomeye hamwe n’icyaha cyo gusuzugura ibendera ry’igihugu cyangwa ibimenyetso biranga ubwigenge. Yakatiwe gufungwa imyaka 21 no kwamburwa impeta zose za gisirikare. Yahise ajurura maze igifungo kiza kugezwa ku myaka 15.

    Nyuma ariko, muri uyu mwaka wa 2021, Urukiko rw’ibanze rwa Kicukiro mu mujyi wa Kigali rwakatiye igifungo cy’imyaka itatu Col Tom Byabagamba ku cyaha cy’ubujura aregwa ko yakoze ubwo yari muri gereza.

    6 – Brig Gen Frank Rusagara

    JPEG - 136.2 ko

    Brig Gen Frank Rusagara, yahoze ari umusirikare mukuru mu ngabo z’u Rwanda, ndetse uyu ni muramu wa Col Tom Byabagamba dore ko n’urubanza baburanaga bari kumwe, nawe akaba yarakatiwe igifungo muri Werurwe 2016 ahita ajurira.

    Rtd Brig Gen Frank Rusagara yahamijwe kwamamaza nkana ibihuha no kugomesha rubanda abangisha ubutegetsi buriho, gukora igikorwa kigamije gusebya Leta ari Umuyobozi, ndetse no gutunga imbunda binyuranije n’amategeko. Yahise ahanishwa gufungwa imyaka 20 ariko arajurira, biza kurangira akatiwe igifungo cy’imyaka 15.

    7- Lt Joel Mutabazi

    JPEG - 33.4 ko

    Mbere yo gutoroka mu ngabo z’u Rwanda, Lt Joel Mutabazi yakoreraga akazi mu mutwe urinda Umukuru w’igihugu n’abandi bayobozi. Akaba yari mu barinze urugo rw’umukuru w’igihugu ruherereye ku kiyaga cya Muhazi.

    Lt Joel Mutabazi yahanishijwe igifungo cya burundu ndetse no gukurwaho impeta za gisirikare, uyu mwanzuro ukaba warafashwe n’urukiko rukuru rwa gisirikare tariki 3 Ukwakira 2014 nyuma yo gusanga Joel Mutabazi wari ufite ipeti rya Lieutenant ahamwa n’ibyaha byose yaregwaga muri uru rubanza rwitiriwe urw’iterabwoba. Yaregwaga ibyaha birimo iterabwoba, kugambirira kugirira nabi igihugu n’umukuru w’igihugu ndetse no gukorana n’imitwe ifite imigambi mibi ku Rwanda irimo FDLR na RNC, bimwe mu bikorwa bashinjwaga hakaba hari harimo gutera gerenade zagiye zihitana ubuzima bw’abantu mu gihugu.

    8 – Rujugiro Ayabatwa Tribert

    JPEG -

    Umunyemari Rujugiro, ni umwe mu bahoze ari abajyanama ba Perezida Kagame mu by’ubukungu, by’umwihariko mu mwaka 2006 yashyizwe mu bajyanama b’Umukuru w’Igihugu bakomoka ku isi hose barimo na Tony Blair. Rujugiro kandi yayoboye Rwanda Investment Group.

    Igihe cyaje kugera ariko Rujugiro ashinjwa ibyaha birimo umugambi wo guhungabanya umudendezo w’igihugu ndetse aza guhungira muri Afurika y’Epfo, ubu akaba ari umwe mu batavuga rumwe n’ubutegetsi bw’u Rwanda.

    Rujugiro mu myaka ishize yareze Leta y’u Rwanda mu rukiko rwa Afurika y’Uburasirazuba rukorera i Arusha muri Tanzania avuga ko Leta y’u Rwanda, ibinyujije muri Komisiyo y’Umujyi wa Kigali ishinzwe gucunga imitungo yatawe na ba nyirayo, yafatiriye imitungo ye nyuma y’uko agiye mu buhungiro mu gihugu cya Afurika y’Epfo. Iyo mitungo irimo inyubako yahoze yitwa UTC ikorerwamo ubucuruzi butandukanye, yavugaga ko ifite agaciro ka miliyoni 20 z’amadolari y’Amerika, ni ukuvuga abarirwa muri 20.000.000.000 uyabaze mu mafaranga y’u Rwanda.

    Muri 2017 ariko iyi nyubako yaje gutezwa cyamunara kuburyo ubu yanahinduriwe izina n’abayegukanye mu cyamunara. Ikigo Kigali Investment Company ni cyo cyegukanye iyi nyubako cyemeye kwishyura igiciro kiruta ibyatanzwe n’abandi cya 6.877.150.000 Frw

    Ikigo cy’igihugu cy’imisoro cyavugaga ko inyubako ya UTC igifitiye ibirarane bigera kuri miliyari na miliyoni 200 by’amafranga y’u Rwanda. Umunyemari Tribert Rujugiro, cyamunara irangiye yavuze ko bitari kera azasubirana inyubako ye ngo kuko ikintu cy’umuntu kiguma ari icye kugeza igihe nyir’ubwite yifuje kukigurisha.

    Yagize ati 'Abayiguze baribeshya cyane kuko ikintu cy’umuntu kiguma ari icye kugeza igihe nyene cyo we yemeye akakigurisha.Kuba rero waguze ikintu cy’umuntu uziko uwo ukiguzeho atari we nyene cyo naho yaba ari Leta uratakaza.'

    9- David Himbara

    JPEG - 28.8 ko

    Dr David Himbara ni impuguke mu by’ubukungu, akaba ndetse yaranabaye umujyanama wa Perezida Paul Kagame mu by’ubukungu. Gusa yaje guhunga ndetse ntavuga rumwe n’uwo yari abereye umujyanama kimwe n’ubutegetsi bwe bwose, mu binyamakuru no ku mbuga nkoranyambaga zitandukanye akaba ahora agaragaza ko arwanya Leta y’u Rwanda.

    10- Twagiramungu Faustin

    PNG - 304.6 ko

    Guverinoma yashyizweho tariki 19 Nyakanga 1994 nyuma y’ihagarikwa rya Jenoside, yari igizwe na Perezida Pasteur Bizimungu, Visi Perezida Major General Paul Kagame ndetse na Twagiramungu Faustin ku mwanya wa Minisitiri w’Intebe. Twagiramungu yahawe umwanya bigizwemo ubushake na Perezida Kagame, kuko nk’uwari uyoboye ingabo zari zimaze gutsinda urugamba rwo kubohora u Rwanda, yari afite ijambo nyamukuru.

    Nyuma yo kuva kuri uyu mwanya wa Minisitiri w’Intebe, Twagiramungu yahungiye i Burayi, aho yahise ashinga ishyaka RDI Rwanda rwiza ritavuga rumwe kandi rirwanya byeruye ubutegetsi bw’u Rwanda. Mu bitangazamakuru no ku mbuga nkoranyambaga, ahora avuga amagambo agaragaramo kunenga no gutuka Perezida Kagame n’ubutegetsi bwe.

    Source : http://www.ukwezi.rw/mu-rwanda/3/Abantu-10-bakoranye-bya-hafi-na-Perezida-Kagame-ubu-bakaba-bafunze-cyangwa-barahunze-bashinjwa-kurwanya-ubutegetsi-bwe

  • Menya byinshi kuri Rujugiro, umuherwe wa mbere mu Rwanda wize amashuri abanza gusa #rwanda #RwOT

    Tribert Rujugiro Ayabatwa niwe washinze uruganda rukora itabi ruzwi nka African Tobacco Group (PTG), rukaba ari narwo ruganda rw’itabi rukomeye kandi rukora itabi ryinshi muri Afurika. Rukorera mu bihugu 9, birimo Nigeria, Angola, Burundi, Repubulika Iharanira Demokarasi ya Kongo, Tanzania na Leta Zunze Ubumwe z’Abarabu (United Arab Emirates).

    Uru ruganda, ruhanganye ku rwego mpuzamahanga n’izindi zikomeye nka Altria na British American Tobacco, rukoresha abakozi barenga 20,000 kandi buri mwaka rwinjiza akayabo k’amadolari arenga 250.000.000, ni ukuvuga arenga 250.000.000.000 uyabaze mu mafaranga y’u Rwanda. Rujugiro yatanze imwe mu migabane muri uru ruganda, ariko n’ubundi niwe munyamigabane ukomeye.

    Muri 2014, Rujugiro yasobanuriye Forbes Magazine uburyo nyina yapfuye akamusiga ari umwana w’imyaka 12 y’amavuko, nyuma akaza no kwirukanwa mu ishuri ubwo yari ageze mu mwaka wa munani w’amashuri abanza. Yirukanywe afite imyaka 16, ndetse ninayo mashuri yize muri rusange, ntiyigeze abasha kwiga amashuri yisumbuye.

    JPEG -

    Yirukanywe bigizwemo uruhare n’abanyamadini ndetse n’abakoloni bagenzuraga uburezi bw’u Rwanda icyo gihe, hanakoreshwa ivanguramoko mu mashuri. Yaje no gutotezwa bituma ku myaka 19 ahungira i Burundi, kuko yabonaga nta hazaza heza ateze ku butegetsi bw’u Rwanda bw’icyo gihe. Icyo gihe, Rujugiro yari ataraba umuherwe, ndetse ahubwo yari abayeho mu buzima bubi cyane.

    Nyuma yo kugera i Burundi, mu 1960 Rujugiro yabonye akazi ko gukorera iposita yo mu karere yari ihuriweho n’u Rwanda n’u Burundi. Aka kazi yagakoze agakunze cyane, agakorana imbaraga ndetse arushaho kuba inzobere, kuburyo yahuguye benshi bakoreye iposita mu Rwanda no mu Burundi, nyuma y’uko abakoloni bari bamaze kugenda ibi bihugu bigasigara byigenga.

    Muri aka kazi yahigiye cyane ururimi rw’igifaransa, nyuma aza no kugera ku rwego rwo kukigisha abanyarwanda benshi bari barahungiye i Burundi. Rujugiro azi no kuvuga icyongereza, ariko cyo akaba yaraje kukimenya kubera kuba cyane no gukorera mu bihugu by’amahanga bitandukanye bikoresha icyongereza.

    Rujugiro yatangiye kwikorera ku giti cye ubwo yari afite imyaka 22 y’amavuko. Yagiye azigama amafaranga yakoreraga, maze aza kubasha kwigurira imodoka yo mu bwoko bwa “Pick Up”, akajya ayikoresha atwara abantu n’ibintu.

    Nyuma y’imyaka 7 akora aka kazi, yaje gutangira kwinjira mu bindi bikorwa by’ubucuruzi, atangira acuruza imigati, amafu atandukanye ndetse n’umunyu. Mu 1970, yabonye akazi ko kuzajya agurisha itabi mu Burundi, arikuye mu gihugu cya Tanzania. Yanakoze ibikorwa byinshi by’ubucuruzi, birimo gutwara abantu mu mazi, gukora itabi, gukora inzoga n’ibindi binyuranye, aza kugera ku rwego rwo kuba rwiyemezamirimo w’umuherwe cyane.

    Umutungo bwite wa Rujugiro ugizwe n’amazu, inganda n’ibikorwa bitandukanye by’ubucuruzi. Muri 2010 yatangajwe mu kinyamakuru Forbes Magazine nk’umuherwe wa mbere mu Rwanda, ufite imitungo ya miliyoni 280 z’amadolari, ni ukuvuga ko ubu uyabaze mu mafaranga y’u Rwanda yakabakaba 230.000.000.000.

    Rujugiro ni umwe mu bahoze ari abajyanama ba Perezida Kagame mu by’ubukungu, by’umwihariko mu mwaka 2006 yashyizwe mu bajyanama b’Umukuru w’Igihugu bakomoka ku isi hose banarimo na Tony Blair. Rujugiro kandi yayoboye Rwanda Investment Group.

    Igihe cyaje kugera ariko Rujugiro ashinjwa ibyaha birimo umugambi wo guhungabanya umudendezo w’igihugu ndetse aza guhungira muri Afurika y’Epfo, ubu akaba ari umwe mu batavuga rumwe n’ubutegetsi bw’u Rwanda.

    Rujugiro mu myaka ishize yareze Leta y’u Rwanda mu rukiko rwa Afurika y’Uburasirazuba rukorera i Arusha muri Tanzania avuga ko Leta y’u Rwanda, ibinyujije muri Komisiyo y’Umujyi wa Kigali ishinzwe gucunga imitungo yatawe na ba nyirayo, yafatiriye imitungo ye nyuma y’uko agiye mu buhungiro mu gihugu cya Afurika y’Epfo. Iyo mitungo irimo inyubako yahoze yitwa UTC ikorerwamo ubucuruzi butandukanye, yavugaga ko ifite agaciro ka miliyoni 20 z’amadolari y’Amerika, ni ukuvuga abarirwa muri 20.000.000.000 uyabaze mu mafaranga y’u Rwanda.

    JPEG - 57 ko

    Iyi ni inyubako yahoze ari UTC iri mu mujyi wa Kigali rwagati, aho benshi bakunda kwita kwa Rujugiro

    Johnston Busingye, Minisitiri w’Ubutabera akaba n’intumwa nkuru ya Leta y’u Rwanda, avuga ko ibyo Leta y’u Rwanda yakoze byari bikwiye kandi bikurikije amategeko, kuko byakozwe mu rwego rwo gucunga neza iyi mitungo ngo itangirika. Avuga ko Komisiyo ibishinzwe irimo gucunga iyi mitungo, n’ubwo Rujugiro we avuga ko imitungo ye yafatiriwe na Leta mu buryo budakurikije amategeko.

    Muri 2017 ariko iyi nyubako yaje gutezwa cyamunara kuburyo ubu yanahinduriwe izina n’abayegukanye mu cyamunara. Ikigo Kigali Investment Company ni cyo cyegukanye iyi nyubako cyemeye kwishyura igiciro kiruta ibyatanzwe n’abandi cya 6.877.150.000 Frw

    Ikigo cy’igihugu cy’imisoro cyavugaga ko inyubako ya UTC igifitiye ibirarane bigera kuri miliyari na miliyoni 200 by’amafranga y’u Rwanda. Umunyemari Tribert Rujugiro, cyamunara irangiye yavuze ko bitari kera azasubirana inyubako ye ngo kuko ikintu cy’umuntu kiguma ari icye kugeza igihe nyir’ubwite yifuje kukigurisha.

    Rujugiro kandi yareze Leta y’u Rwanda ashaka ko yanasubizwa indi mitungo irimo inyubako iri i Gikondo mu karere ka Kicukiro ndetse n’imigabane ye iri mu ruganda rw’icyayi ruri mu Majyepfo y’igihugu. Aha i Gikondo, naho haramwitiriwe kuburyo hazwi nko mu mudugudu wo kwa Rujugiro.

    JPEG - 71.5 ko

    Iyi ni inzu yahoze ari iya Rujugiro iri i Gikondo, naho bakunda kuhita mu mudugudu wo kwa Rujugiro

    Source : http://www.ukwezi.rw/mu-rwanda/3/Menya-byinshi-kuri-Rujugiro-umuherwe-wa-mbere-mu-Rwanda-wize-amashuri-abanza-gusa

  • Salome na Roberto basohoye indirimbo yo kwifa… – #rwanda #RwOT

    Tariki ya 15 Kanama buri mwaka, Kiliziya Gatolika ku Isi yose yizihiza umunsi Mukuru wa Asomusiyo (Assomption), wizihizwaho ijyanwa mu ijuru rya Bikira Mariya.

    Roberto na Salome bavuze ko bakoze indirimbo 'Umwiza ubaruta' mu gufasha Abakiristu Gatolika kwizihiza Umunsi Mukuru wa Asomusiyo wizihizwa kuri iki Cyumweru tariki 15 Kanama 2021.

    Iyi ndirimbo ikubiyemo amagambo meza ataka umubyeyi Bikira Mariya. Bayikoze nk'isengesho ryo gusaba Bikira Mariya gukomeza gusabira buri wese.

    Ni indirimbo iri tsinda ryitezeho gufasha Abakristu n'abakunzi babo kwizihiza umunsi wa Asomusiyo neza, cyane cyane abakunda Bikira Mariya.

    Bikira Mariya ni urugero rwiza rwo kwicisha bugufi no kwemera icyo Imana isaba buri wese nk'uko nawe yabikoze.

    Roberto na Salome babwiye INYARWANDA, ko iyi ndirimbo ihimbye ku buryo bw'isengesho ku buryo 'yaba ari twe cyangwa undi wese ashobora kuyifashisha mu kwiyambaza Umubyeyi Bikira Mariya, aho ku bakristu Gatolika twemera ko aduhakirwa.'

    Bati 'Umunsi wa Assomption ni umunsi twizihizaho ijyanwa mu ijuru rya Bikira Mariya. Ni umunsi ukomeye kuri twe ndetse no ku bakristu muri rusange kuko twongera kumutura amasengesho yacu twizeye ko ayatugereza ku Mwana we Yezu.'

    Roberto yavuze ko iyi ndirimbo bayitezeho ko izafasha abakristu Gatolika ndetse n'abandi bose bemera umubyeyi Bikira Mariya kwizihiza umunsi uhimbazwaho ijyanwa mu ijuru rye.

    Kandi ikazakomeza kubaherekeza mu isengesho ryabo bakora umunsi ku wundi biyambaza uwo mubyeyi.

    Baniteze ko izafasha n'abandi baririmbyi muri korali kuko bashobora no kuyikoresha mu gitambo cya Misa.

    Roberto avuga ko umuziki wabo wakirwa neza muri rusange bigaragarira mu butumwa bakira buvuye ku bakunze ibihangano byabo bitandukanye ku mbuga bakoresha ndetse n'aho basengera umunsi ku wundi.

    Ati 'Tubona rero uri gutera imbere kubera ko ubu dufite umubare utari muke w'abadukurikira kandi tubona bizakomeza uko ibikorwa bizakomeza kwiyongera.'

    Salome yavuze ko indirimbo 'Umwiza ubaruta' ari igisigo kirata Umubyeyi Bikira Mariya

    Roberto bavuze ko indirimbo zabo zakirwa neza ashingiye ku bitekerezo bakira umunsi ku wundi

    KANDA HANO UREBE AMASHUSHO Y’INDIRIMBO ‘UMWIZA UBARUTA’ YA SALOME NA ROBERTO

    “>

    Source : https://inyarwanda.com/inkuru/108615/salome-na-roberto-basohoye-indirimbo-yo-kwifatanya-nabakristu-mu-kwizihiza-asomusiyo-video-108615.html

  • Iwacu Muzika Festival: Israel Mbonyi yakoze i… – #rwanda #RwOT

    Uyu muhanzi wakunzwe mu ndirimbo zitandukanye ziha Ikuzo Imana yabaye umuramyi wa mbere uririmbye mu bitaramo by'iserukiramuco rya Iwacu Muzika Festival riri kuba ku nshuro ya Gatatu hifashishijwe ikoranabuhanga kubera kwirinda Covid-19.

    Israel Mbonyi witegura gusohora indirimbo nshya yakoze igitaramo cy'ivugabutumwa yisunze indirimbo ze zinyuranye mu ijoro ry'uyu wa Gatandatu tariki 14 Kanama 2021 cyabereye kuri Televiziyo y'u Rwanda.

    Yari amaze iminsi ararikiye abafana be n'abakunzi b'umuziki kuzaririmbana nawe urutonde rw'indirimbo yahisemo kuri Album ya mbere yasohoye mu 2014, Album ya kabiri yasohoye mu 2017 na Album ya Gatatu yashyize ku isoko mu 2020.

    Mu ikiganiro kibanziriza igitaramo yakoze, yasobanuye ko Gospel ari umuziki waremewe guhimbaza Imana, guha ihumure n'icyizere abantu batandukanye.

    Asobanura ko arajwe ishinga no gukora indirimbo umuntu yumva akagira icyo asigarana. Kandi agakora uko ashoboye ubutumwa atanga bukagera kure.

    Uyu muhanzi uririmba anicurangira yavuze ko uko umuziki w'u Rwanda utera imbere ari nako Gospel itera imbere.

    Avuga ko imyaka itatu yagiye icamo kugira ngo asohore Album, wari umwanya yahaga abantu kugira ngo bumve neza Album ye anategura indirimbo nshya. 

    Israel yashimangiye ko insengero zubatse izina hanze aha byagizwemo uruhare n'abahanzi b'indirimbo zihimbaza Imana, bityo ko insengero zikwiye kubazirikana mu igenamigambi ryazo.

    Ati “…Insengero ureba zateye imbere abahanzi babo bagizemo uruhare runini cyane. Rero bareke kubashyira ku ruhande ngo bahe ibindi agaciro ahubwo nabo babahe agaciro.'

    Uyu muhanzi yavuze ko umuziki uvuna kuva ku ikorwa ry’indirimbo kugeza isohotse. Bityo ko ari ah’insengero gushyigikira abahanzi babo.

    Ati '…Babashyigikire bumve ko ari abahanzi bafitiye runini urusengero noneho no mu rusengero bajye babaha agaciro nibwo n’umuziki nawo uzatera imbere.”

    Muri iki gitaramo, Mbonyi yaririmbye indirimbo nka 'Mbwira', 'Urwandiko', 'Karame', 'Mbega ubuntu' ya Appolinaire', 'Ndagushima' ya Dudu, 'Ibihe', 'Ku marembo y'ijuru' ndetse na 'Baho'.

    Israel aherutse kubwira INYARWANDA, ko mu minsi iri imbere azasohora indirimbo nshya nyuma y'amezi atanu ashize asohoye amashusho y'indirimbo yise 'Baho'.

    Uyu muhanzi yanavuze ko yamaze guhitamo abaririmbyi 50 bazavamo abazamufasha kuri Album ye nshya yise 'Cross songs'.

    Israel Mbonyi yakoze igitaramo gikomeye muri Iwacu Muzika Festival

    Israel Mbonyi yifashishije abaririmbyi basanzwe bamufasha mu bitaramo no mu ikorwa ry'indirimbo ze Uyu muhanzi yaririmbye indirimbo 'Mbega ubuntu' ya Appolinaire ndetse na 'Ndagushima' ya Dudu Israel Mbonyi yavuze ko abahanzi ba Gospel bafatiye runini iterambere ry’insengero Uyu muhanzi avuga ko abahanzi ba Gospel badakwiye kwirengagizwa mu igenamigambi ry'insengero  Israel Mbonyi yasabye ko abahanzi ba Gospel bahabwa agaciro mu nsengeroNyuma yo kuririmba muri iki gitaramo, Israel Mbonyi yashimye abagikurikiye, avuga ko 'byari byiza'

    Israel Mbonyi yaririmbye indirimbo 'Baho' aherutse gusohora   

    Uyu muhanzi aherutse kubwira INYARWANDA ko agiye gusohora indirimbo nshya Israel Mbonyi afatwa nk'umunyamuziki w'indirimbo zihembura imitima ya benshi

    KANDA HANO UREBE AMASHUSHO Y’IGITARAMO ISRAEL MBONYI YAKOZE

    “>

    AMAFOTO: BJC Official-EAP

    Source : https://inyarwanda.com/inkuru/108614/iwacu-muzika-festival-israel-mbonyi-yakoze-igitaramo-gikomeye-asaba-insengero-guhindura-uk-108614.html

  • Nkusi Arthur na Miss Muthoni Fiona basezeran… – #rwanda #RwOT

    Ubukwe bwa Nkusi na Muthoni bwabaye kuri uyu wa 14 Kanama 2021 ku mucanga wa Rushel Kivu Lodge Hotel. Ni ubukwe bwatashywe n'abantu bake b'inshuti magara ndetse nta muntu n'umwe mu bari baburimo wari wemerewe gusakaza amafoto. Ubu bukwe bubabaye nyuma yaho ku wa Gatatu tariki 11 Kanama 2021, Rutura na Miss Muthoni Fiona basezeranye imbere y'amategeko muri umwe mu mirenge igize Umujyi wa Kigali.

    Gusezerana imbere y'amategeko nabyo byabaye mu ibanga rikomeye, ndetse amafoto n'amashusho yafashwe n'ababyishyuriwe bari bafite amabwiriza yo kutagira n'imwe ibacika. Uretse aba, abari batumiwe muri uyu muhango nabo bari basabwe kudafata amafoto cyangwa amashusho ngo bayasakaze ku mbuga nkoranyambaga.

    Mu ntangiriro z’umwaka wa 2021 ni bwo umunyarwenya Nkusi Arthur yemeye ko akundana n'umunyamakuru wa CNBC Africa, Fiona Muthoni Naringwa wanabaye Igisonga cya Gatatu cya Nyampinga w'u Rwanda 2015, akaba n'Igisonga cya Mbere cya Miss Africa Calabar 2017. Urukundo rw'aba bombi rwari rumaze igihe ariko baragerageje kurugira ibanga rikomeye.

    Nkusi Arthur yarushinze na Miss Muthoni Fiona mu bukwe bwabaye mu ibanga rikomeye

    Kubona amafoto y’abageni byabaye indyankurye. Ibi birori byabereye ku Nkengero z’Ikiyaga cya Kivu muri Rutsiro

    Nta muntu wari wemerewe gufata ifoto y’abageni ndetse nta foto yashyizwe hanze iberekana mu maso

    Source : https://inyarwanda.com/inkuru/108605/nkusi-arthur-na-miss-muthoni-fiona-basezeranye-kubana-akaramata-mu-bukwe-bwagizwe-ibanga-a-108605.html