Webrwanda Backend

Category: Uncategorized

  • Kigali: Umusore w’imyaka 23 yafatanwe moto ebyiri zibwe mu rugo rw’Umunyamerika – #rwanda #RwOT

    Uyu musore yafashwe mu gitondo cyo ku wa 16 Kanama 2021, akaba yari mu itsinda ry’abantu batatu basunikaga moto bari bamaze kwiba bitewe n’uko bari bananiwe kuzifungura, babiri muri bo bakaba bacitse nyuma yo kubona abapolisi.

    Umuvugizi wa Polisi y’u Rwanda, Commissioner of Police (CP) John Bosco Kabera yavuze ko uyu musore yafashwe ku bufatanye bw’abaturage na Polisi binyuze mu guhanahana amakuru.

    Yagize ati “Polisi yabonye amakuru atanzwe n’abaturage bo mu Murenge wa Kimihurura saa kumi n’ebyiri, bavuze ko hari moto ebyiri bacyeka ko zibwe n’abo bantu batatu barimo kuzisunika. Hashakishijwe bariya bantu bafatirwa mu Murenge wa Kimihurura mu kilometero kimwe uvuye mu rugo rw’umuturage (Umunyamerika) ari naho izi moto zari zibwe.”

    CP Kabera yashimiye abaturage ku gikorwa bagaragaje mu kwicungira umutekano binyuze mu gutanga amakuru ku bantu bijandika mu byaha. Yashimiye uribyiruko rw’abakorerabushake by’umwihariko ku ruhare rwabo mu kurwanya ibyaha.

    Uyu musore wafashwe yahise ashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Kimihurura mu gihe hagishakishwa abandi babiri bari kumwe na we.

    Ukekwaho ubujura bwa moto yafashwe ari kuzisunika nyuma yo kunanirwa kuzifungura bakimara kuziba

    source : https://ift.tt/3mbupgG

  • MTN Rwanda yaremeye abangavu batewe inda – #rwanda #RwOT

    Ni igikorwa cyabaye ku wa Gatanu tariki ya 14 Kanama 2021, ubwo iyi sosiyete ifatanyije n’umuryango wo kwita ku bari n’abategarugori Empower Rwanda bashyikirizaga aba bangavu inkunga yo kubafasha kwiteza imbere.

    Inkunga yatanzwe ingana na miliyoni 1o z’amafaranga y’u Rwanda ikaba yahawe abangavu 110 barimo 60 bo mu Karere ka Rwamagana na 50 bo muri Gatsibo. Bagenewe amatungo magufi, ibikoresho by’isuku ndetse bashyirirwaho ikigo bazajya bigiramo kudoda.

    Umuyobozi ushinzwe Imibanire n’Imikoranire n’inzego muri MTN, Numa Alain, yavuze ko iki gikorwa cyateguwe kugira ngo begere aba bana, banabafashwe kwiteza imbere ngo hato batazagwa mu bishuko.

    Yagize ati “Tugamije kubegera nk’ikigo, kugira ngo bumve ko batari bonyine. Twaje kugira ngo tubabwire ko ejo habo ari heza batagomba gutakaza ibyiringiro. Ariko tubagenera ibintu bitandukanye kugira ngo babashe kwiteza imbere.”

    Umuyobozi w’Akarere ka Rwamagana, Mbonyumuvunyi Radjab, yashimiye MTN Rwanda na Empower Rwanda ku nkunga bahaye aba bangavu yizera ko izabagirira akamaro.

    “Iyi nkunga izadufasha kuko aho guha umuntu ifi uzamwigishe kuyirobera aha ni ko byagenze, bahawe ihene zizabyara izindi akajya agenda agurishaho azaba afite amafaranga. Buriya yabona n’amashunushunu ashobora kurinda abana imirire mibi. Ni ibintu byo gushimira MTN na Empower Rwanda.”

    Ku ruhande rw’abangavu batewe inda bavuze ko bagiye bashukishwa utuntu duto tukabaviramo guterwa inda.

    Mukeshimana Divine wo mu Karere ka Gatsibo yatewe inda afite imyaka 14 yavuze ko iyi nkunga izamurinda kongera kugwa mu bishuko.

    Yagize ati “Hari umuntu wajyaga aza iwacu rimwe arambwira ngo yavuye i Kigali hari akantu yanzaniye ningende akampe, ngiye ni bwo twaryamanye ndatwita.”

    Mukarugizwa Daphrose wo mu Karere ka Rwamagana yagize ati “Uwanteye inda yanshukishije amafaranga, kumwe uba ukeneye amavuta cyangwa umwambaro utari buwubone ni bwo buryo banshutse.”

    Bakomeje bavuga ko iyi nkunga bahawe bazayibyaza umusaruro mu kwirinda abakongera kubagusha mu bishuko.

    Mukeshimana yagize ati “Ndashimira MTN na Empower Rwanda kuba baduhaye iyi nkunga ndizera ko izamfasha nkabasha kubona ibyo nkeneye ku buryo ntawe uzongera kugira icyo anshukisha.”

    Abana batewe inda mu Karere ka Gastibo uyu mwaka bamaze kugera kuri 800, mu Karere ka Rwamagana ho habarirwa abangavu baterwa inda bari hagati ya 250 na 300 ku mwaka.

    Mu byo abangavu bahawe harimo n’imshini zo kudoda

    Abangavu batewe inda bahaweamatungo magufi n’ibindi bikoresho bizabafasha kwirinda kongera kugwa mu bishuko

    Empower Rwanda yiyemeje kwegera abana b’abakobwa batewe inda imburagihe

    Umuyobozi ushinzwe Imibanire n’Imikoranire n’inzego muri MTN, Numa Alain, yavuze ko iki gikorwa cyateguwe kugira ngo begere aba bana, banabafashwe kwiteza imbere ngo hato batazagwa mu bishuko.

    Umuyobozi w’Akarere ka Rwamagana, Mbonyumuvunyi Radjab, yashimiye MTN Rwanda na Empower Rwanda inkunga bageneye aba bangavu

    source : https://ift.tt/3D42nd5

  • Nyaruguru: Abaturage barinubira kugira imiyoboro n’amavomero bitagira amazi – #rwanda #RwOT

    Ibikorwaremezo bishyirirwaho kugira ngo abaturage babashe kugira ubuzima bwiza ariko hari aho usanga ibikorwa byarashyizweho, ntibigire umusaruro bitanga.

    Abaturage bo mu Murenge wa Cyahinda baganiriye na Radio1 bavuze ko nubwo bafite ibikorwaremezo by’amazi igihe kinini bakimara ntayo bafite, bakaba bagorwa no kujya kuvoma mu bishanga n’inzuzi.

    Umwe yagize ati “Dufite ikibazo cy’amazi ntabwo tuzi aho yapfiriye, tubona yarakamye ariko akanyaruka rimwe na rimwe akaza ariko nyuma y’iminsi ibiri akaba aragiye, iyo ntayo dufite tuvoma mu kabande.”

    Undi ati “Ayo mazi nubwo bayazanye usanga tutayabona, bavuga ko ahari kandi ntayo. Iminsi myinshi ntaba ahari, ubu kuva mu kwezi kwa kane nari ntarabona amazi, ejo bundi aje na bwo aba aragiye.”

    Aba baturage bavuga ko batazi impamvu amazi yabo aza agahita agenda, mu gihe Umunyamabanga Nshingwabikorwa w’uyu Murenge, Nirere Yvette Aline, asobanura ko ikibazo cy’amazi giterwa n’ibibazo bitandukanye birimo iyangirika ry’imiyoboro iterwa n’ikorwa ry’imihanda n’ibiza.

    Yagize ati “Ikibazo cyari gihari cy’amazi cyaturakaga ku muyoboro dufatiraho wa Nyabimata, ni ikibazo cy’akarere kose; wari warangiritse hashira igihe bari kuwukora, bawurangije bikubitana no kwimura amatiyo y’amazi kubera umuhanda wa kaburimbo.”

    “Ariko hari hashize iminsi abaturage bavoma natwe tuvoma ariko kubera imvura yaguye ni yo mpamvu yongeye akagenda ariko mu byumweru nka bitatu yari ahari.”

    Kuba hari abagifite ibikorwaremezo by’amazi ariko babibona bishobora gukoma mu nkokora gahunda ya Guverinoma y’u Rwanda, iteganya ko mu 2024 Abanyarwanda bose bazaba baramaze kwegerezwa amazi meza ku kigero cya 100%.

    Abaturage bo mu Murenge wa Cyahinda mu Karere ka Nyaruguru barataka ko batajya babona amazi mu buryo buhoraho

    source : https://ift.tt/3g7KW12

  • Nyabihu: Abaturiye Pariki y’Ibirunga barifuza ko bakemurirwa mu buryo buramye ikibazo cy’inyamaswa zibonera – #rwanda #RwOT

    Abatuye mu ri aka gace babwiye Radiyo Rwanda ko babangamiwe n’inyamaswa ziganjemo imbogo ziri kurenga imbibi za parike zikabonera imyaka irimo ibirayi baba barahinze bibavunnye.

    Bemeza ko ibi biri guterwa n’uko umuringoti wari waraciwe mu rwego rwo gukumira izi nyamaswa wuzuye ku buryo biri kubatera igihombo gikomeye. Umwe yagize ati “Hari gihe imbogo zisohoka ziri hagati ya 50 cyangwa 100.”

    Undi ati “Zimanuka (imbogo) ari nk’icumi cyangwa se 20 gutyo kandi nabwo zikamanuka ziri mu byiciro zimwe zimanukira kuri uru ruhande izindi muri kuri ruriya ruhande.”

    Yongeyeho ko izi mbogo zibonera buri munsi ku buryo hari n’ubwo abashinzwe kurinda imirima y’ibirayi batinya kubisikana nazo bakazihunga.

    Bakomeza bavuga ko ikibabaza ari uko batishyurwa ingurane z’ibyo izi nyamaswa ziba zangije nk’uko bikorerwa abaturage bo mu Kinigi mu Karere ka Musanze batuye hafi ya Pariki y’Igihugu y’Ibirunga.

    Umuyobozi w’Ikigega cy’Ubwishingizi ku mpanuka no ku bangirijwe n’inyamaswa, Dr Joseph Nzabonikuze yavuze ko iyo babonye raporo y’ibyangijwe byose n’inyamaswa byishyurwa.

    Yavuze ko ikibazo cy’abaturage batishyurwa ingurane ku myaka yabo iba yangijwe n’inyamaswa hari igihe usanga byapfiriye mu nzego z’ibanze.

    Ati “Ni ibintu bishoboka y’uko umuntu ashobora nko gutanga dosiye akayiha umunyamabanga Nshingwbaikorwa ntayitugezeho kubera impamvu zitandukanye, bibaho kuko baba bafite amadosiye menshi cyane, ndumva ejo bundi baraje bafite amadosiye ageze mu 2000 y’abangirijwe n’inyamaswa mu mezi nk’atatu ashize aho.”

    Yavuze ko kuri ubu imirimo yo kubarura abangirijwe n’inyamaswa yarangiye hasigaye kuyisuzuma ubundi amafaranga y’indishyi agashyirwa kuri konti zabo.

    Abaturiye Pariki y’Ibirunga mu Karere ka Nyabihu barifuza ko ikibazo kinyamaswa zirimo imbogo zibonera cyakemurwa vuba

    source : https://ift.tt/3yYqNCi

  • Gisozi: Agakiriro kongeye kwibasirwa n’inkongi y’umuriro yangije byinshi (Amafoto) – #rwanda #RwOT

    Kuri uyu wa Kabiri tariki ya 17 Kanama 2021, ahagana saa tatu za mu gitondo ni bwo aka gakiriro kongeye kwibasirwa n’inkongi y’umuriro, ku gice gikoreramo Koperative ADARWA.

    Bamwe mu baturage bagakoreramo babwiye IGIHE ko iyi nkongi yatewe n’ibishashi by’umuriro byaturutse ku bikorwa byo gusudira byaje kugwa kuri matela bituma umuriro utangira gufata ibindi bintu bitandukanye byari aho hafi.

    Uwase Clarisse yagize ati “Iyi nkongi yatewe n’uwasudiraga noneho akantu k’igishashi gatakara muri matela zihita zitangira gushya.”

    Yasabye inzego zibishinzwe ko zakangurira abahakorera kugira kizimyamoto kugira ngo igihe inkongi yibasiriye aka gakiriro bajye bahita babasha kuyizimiriza itarafata ibintu byinshi.

    Umusore witwa Habimana Selemani yavuze ko matela zikwiye gukurwa muri aka gakiriro kugira ngo hakumirwe n’inkongi za hato na hato zikunze kuhagaragara anashishikariza abagakoramo kugira ubwinshingizi ngo kuko benshi mu bahakorera ntabwo bagira.

    Ubwo iyi nkongi yibasiraga aka gakiriro, kizimyamoto eshanu za polisi zahise zihagera zitangira kuyizimya uretse ko kugeza saa ine n’igice z’amanywa yari itarazima, ibyangiritse bikababaka miliyoni 400 z’amafaranga y’u Rwanda.

    Ibikoresho bitandukanye byahiye birakongoka

    Abakorera mu gakiriro bafashije polisi mu kuzimya inkongi

    Ubukana bw’inkongi mu Gakiriro bwatumye benshi bakuka umutima abandi bababazwa n’ibyabo byangiritse

    Mu byangiritse harimo n’imashini zifashishwaga mu bikorwa bitandukanye

    Imbaho na zo zafashwe n’inkongi zirashya

    Ibikorwa byo kuzimya iyi nkongi byamaze umwanya munini bitaratanga umusaruro

    Polisi yatabaye vuba ihita itangira kuzimya iyi nkongi

    Amafoto: Thamimu Hakizimana

    source : https://ift.tt/3m9DM09

  • Ubucuruzi bw’indabo mu Rwanda bwiyongereyeho 96.6% umwaka ushize – #rwanda #RwOT

    source : https://ift.tt/3iT4Ler

  • Igisubizo cya Ambasaderi Karega ku bashinja u Rwanda ko rukijijwe na zahabu ya RDC – #rwanda #RwOT

    Ni mu gihe mu bitangazamakuru byo muri RDC hakunda kugarukwa ku nkuru zivuga ko amabuye y’agaciro atunganywa mu nganda z’u Rwanda aturuka muri Repubulika Iharanira Demokarasi ya Congo, kandi u Rwanda rukaba rushoza intambara muri iki gihugu kugira ngo ruyabone.

    Mu kiganiro yagiranye n’abanyamakuru ku wa 14 Kanama 2021, Amb. Karega yavuze ko ibirego bishingiye ku mabuye y’agaciro nta shingiro bifite.

    Yavuze ko bitangaje kuvuga ko u Rwanda rushoza intambara kugira ngo rubashe kubona amabuye y’agaciro mu gihe nta n’imwe rwigeze rurwana igamije kwigarurira cyangwa kwegukana ikirombe icyo ari cyo cyose.

    Ambasaderi Karega yakomeje avuga ko igitangaza bamwe ari uburyo u Rwanda rufite inganda zitunganya amabuye y’agaciro, bagakeka ko rwo rutayagira.

    Yagize ati “Ni ukuri koko u Rwanda rutunganya zahabu, coltan na gasegereti kandi ni byo birya abantu mu mitwe nkurikije ibyo numva mu bitangazamakuru bitandukanye bavuga ngo ni gute batunganya ibintu batagira? Muramutse muguze ikintu runaka mukagitunganya, ikibazo kiri he? Abakora imodoka ko bakoresha ibyuma, ababikora ni bangahe? Dutunganya ayo tugura mu bindi bihugu haba muri RDC cyangwa ahandi.”

    Zahabu si umwihariko wa RDC gusa

    Ambasaderi Karega yasobanuye ko zahabu atari umwihariko wa RDC gusa, ko itunganyirizwa mu Rwanda iva mu bindi bihugu birimo Ghana na Zambia, igatunganywa ikongera koherezwa mu mahanga kandi ko bidakorwa na leta ahubwo ari abashoramari bahisemo gushora imari mu rwego rw’ubucukuzi.

    Yavuze ko u Rwanda rwatejwe imbere no gushyira ingufu mu nzego zitandukanye zirimo ubuhinzi, uburezi, inganda zirimo izikora telefone n’ibindi.

    Yavuze ko abarushinja gukizwa n’amabuye ya Congo ari abagamije kuruharabika gusa.

    Ambasaderi Karega yavuze ko ibyo u Rwanda rukora byose bikorwa mu mucyo. Kuba haba hari abakwihisha inyuma bagakora ubucuruzi bwa magendu, Karega yavuze ko byo bishoboka cyane kuko magendu no mu bihugu byateye imbere ihaba.

    Ati “Ntabwo dushobora guhakana ko hatari za magendu, no mu bihugu bimaze igihe muri demokarasi nka Leta Zunze Ubumwe za Amerika cyangwa u Bufaransa irahaba. Icyakora, u Rwanda nta rimwe rurishora mu bucuruzi butemewe muri Congo, ibyo rukora byose biragaragara.”

    Yakomeje avuga ko “Nta na rimwe twigeze duteza intambara igamije kwigaruira ikirombe runaka cyangwa amabuye y’agaciro runaka muri RDC. N’ikimenyimenyi, amasezerano na SAKIMA ni yo ya mbere mu bijyanye n’amabuye y’agaciro sosiyete yo mu Rwanda isinyanye n’iya Congo. Ntiwabona sosiyete z’amabuye y’agaciro muri Congo ziyobowe n’Abanyarwanda”.

    Aya masezerano ya SAKIMA Karega yavuze, ni aherutse gusinywa agamije kunoza ubucuruzi bwa zahabu yashyizweho umukono na Société Aurifère du Kivu et du Maniema (Sakima S.A) yo muri Congo, mu gihe uruhande rw’u Rwanda rwari ruhagarariwe na Dither Ltd.

    Ambasaderi Karega yavuze ko kuba u Rwanda rwagira inganda zitunganya amabuye y’agaciro rutayafite ku bwinshi, nta kibazo kirimo.

    Ati“Hari ibinyamakuru bitandukanye njya numva bivuga ngo kuki batunganya amabuye y’agaciro kandi ntayo bagira? None se kuki u Bwongereza butunganya ibikomoka kuri peteroli butayigira?”.

    “Dutunganya amabuye tugura hanze haba muri Congo n’ahandi. Ntabwo zahabu ari umwihariko wa Congo. Urugero, uruganda rukora zahabu mu Rwanda ruyikura no muri Zimbabwe na Ghana, ntabwo zahabu itunganyirizwa mu Rwanda ngo yoherezwe mu mahanga, byanze bikunze igomba kuba ivuye muri Congo.”

    Raporo yakozwe kuri Repubulika Iharanira Demokarasi ya Congo mu 2020, igashyikirizwa Perezida w’Akanama k’Umuryango w’Abibumbye gashinzwe Umutekano, niyo yashyizwemo iby’uko hari amabuye y’agaciro anyura mu Rwanda agiye kugurishirizwa mu mahanga, bigakorwa n’imitwe yitwaje intwaro muri Congo. U Rwanda rwabyamaganiye kure, rugaragaza ko amabuye yose anyura mu Rwanda aba afite ibiyaranga n’aho yaturutse kandi ku buryo buzwi.

    Ambasaderi Karega yavuze ko u Rwanda rwihaye icyerecyezo 2050 gishingiye ku guteza imbere inzego nyinshi, ku buryo ibijyanye n’amabuye y’agaciro atari byo rurambirijeho gusa.

    Ati “Icyerekezo 2020 cyacu cyageze ku musozo, ubu turi mu cya 2050 kirangamiye iterambere rishingiye ku bushobozi no guhanga udushya. Ni ukuvuga kongerera agaciro ibishobora kongererwa agaciro byose. Tugeregeza kureba ubwoko bwose bw’inganda na serivisi bishobora kwinjiza ariko si ngombwa ko ziba zishingiye ku bucukuzi bw’amabuye y’agaciro.”

    Agaruka ku biteza umutekano muke mu Burasirazuba bwa Congo, Vincent Karega yavuze ko imitwe yitwaje intwaro yayogoje aka karere ahanini igizwe n’Abanye-Congo kimwe n’abanyamahanga.

    Kuba imwe muri iyo mitwe yacuruza amabuye y’agaciro binyuranyije n’amategeko cyangwa mu buryo bwa magendu, yavuze ko ari ikibazo kitabazwa u Rwanda.

    Ati “Ndashaka gusobanura neza ko u Rwanda nka guverinoma nta ruhare na ruto ifite mu bucuruzi ku rwego rw’igihugu cyangwa mpuzamahanga. Guverinoma yacu yorohereza abashoramari baba Abanyarwanda cyangwa abanyamahanga. Si yo ubwayo yivanga mu bikorwa by’ubucuruzi bw’abikorera. Amabuye y’agaciro ya Congo ntabwo yinjira mu isanduku y’u Rwanda, ntacyo yinjiriza u Rwanda kidasanzwe.”

    Mu 2019 nibwo mu Rwanda hatangijwe uruganda rutunganya zahabu rufite ubushobozi bwo gutunganya toni esheshatu ku kwezi.

    Raporo y’Ikigo Impact gikora ubucuruzi bwa zahabu mu Karere, iheruka kugaragaza ko u Rwanda mu 2014 rwatangaje ko rwavanye miliyoni 8,1$ mu mabuye y’agaciro yoherejwe mu mahanga arimo na zahabu, yaje kugera kuri miliyoni 80,06$ mu 2016 naho Ugushyingo 2020 ya Banki Nkuru y’u Rwanda,yagaragaje ko umusaruro wavuye muri zahabu, wazamutseho 754,6%.

    Ku rundi ruhande imibare y’Ikigo cy’u Budage gishinzwe umutungo kamere yerekana ko buri mwaka RDC itanga umusaruro wa zahabu ubarirwa hagati ya toni 14 na 20 ku mwaka, zifite agaciro kari hagati ya miliyoni 543$ na miliyoni 812$.

    U Rwanda rufite inganda zitunganya amabuye y’agaciro arimo na zahabu

    Ambasaderi Vincent Karega yavuze ko zahabu atari umwihariko kuri RDC

    source : https://ift.tt/2W0NeYK

  • Impungenge ku bibuga by’imikino bigezwe ku buce byubakwamo amashuri mu Rwanda – #rwanda #RwOT

    Hari benshi banyujijweho ikinyafu, bazira ko bagorobereje mu ku ishuri bakina karere, cyangwa se bashiki bacu baryoherewe n’udukino nka mabigibigi, agatenesi, gusimbuka umugozi n’ibindi, bakibagirwa ko hari uturimo tw’umugoroba tubategereje imuhira.

    Ibibuga ku mashuri yaba abanza n’ayisimbuye byahoze ari isoko y’ibyishimo ku banyeshuri, bikabafasha gusubiza ubwenge ku gihe nyuma y’amasaha menshi y’imihiriko n’amahurizo, bikaba n’isoko y’ubusabane hagati y’abanyeshuri.

    Hari aho wasangaga nk’ikibuga kimwe gihuriraho abanyeshuri barenga 1000 bigabanyije mu dukipe duto bitewe n’icyo buri mwana akunda gukina mu byishimo by’akaburarugero.

    Ubusanzwe siporo ifatwa nka kimwe mu bishobora gufasha umuntu kugira ubuzima bwiza nko gukumira indwara y’umubyibuho ukabije n’izidakira nka diyabete, izifata umutima n’izo mu mutwe nubwo akamaro kayo katarangirira aho gusa by’umwihariko mu bana bakiri bato.

    Abahanga bavuga ko gukina byigisha abana amasomo y’ubuzima nko gukorera hamwe, kwigirira icyizere, kwimenyereza kugira inshingano, kwiremamo ikinyabupfura no kwiha intego ndetse no kuyigeraho.

    Ibikorwa by’imikino yo ku ishuri ngo bishobora kugira uruhare rungana na 50% by’imyitozo ngororamubiri abana basabwa gukora buri munsi. Ni naho abana bitoreza bakanakuza impano zabo zikaba zabageza no ku rwego rwo guhatanira imidali mu mikino Olempike nk’iyaberaga i Tokyo mu minsi ishize.

    Nubwo bimeze bityo, amwe mu mashuri y’iki gihe yaba aya leta cyangwa abikorera, afite ikibazo gikomeye cyo kutagira ibibuga by’imikino.

    Amwe aherereye aho twakwita mu manegeka ku buryo bigoye ko hakorwa ibibuga runaka nubwo haba hari ubutaka. Andi afite icyo kibazo cyo kutagira ubutaka, byatumye mu gihe cyo kwagura ibyumba by’amashuri hakenurwa ikibazo cy’ubucucike, ibibuga byarasatiriwe bikubakwamo.

    Kuva u Rwanda rutangije gahunda y’uburezi bw’ibanze bw’imyaka icyenda mu mu 2008, yaje kwaguka ikaba 12, Guverinoma yatangiye kubaka ibyumba by’amashuri bishya kugira ngo abo bana babone aho bigira. Hamwe harubatswe ubutaka burashira amahitamo asigara ari ukubaka mu bibuga.

    Usibye kudindiza impano z’abana ni ikibazo gishobora no kubangamira imyigire

    Umuyobozi w’Urwunge rw’Amashuri rwa Kimisagara, mu Karere ka Nyarugenge, Nsengimana Charles, yaganiriye na IGIHE ku bijyanye n’uburyo bitwara nka kimwe mu kigo gifite abanyeshuri benshi badafite aho bisanzurira kuko abana bagera ku 4000 barimo abiga mu cyiciro cy’incuke, icy’abanza n’ayisumbuye.

    Ati “Ni uko turi mu bihe bya Covid-19 aho abana batemerewe gukina nk’uko bisanzwe ariko ubundi kutagira ibibuga ni ingorane. Ntabwo abana bidagadura uko bikwiye. Mu bihe bisanzwe bisaba ko bakina mu byiciro kuko dufite ikibuga cya Volleyball.”

    “Bagombye kujya mu bibuga ari benshi bagakora n’umwanya munini. Bituma hari impano zimwe na zimwe zitigaragaza uko byakagombye. Birumvikana bigira ingaruka ku banyeshuri no ku iterambere rya siporo mu Rwanda. Natwe abarimu hari igihe dukenera gukina, ntabwo abantu baba bisanzuye uko bikwiye.”

    Umuyobozi w’Ishuri Ribanza rya Kamuhoza, Nkomezi Alex Sebagabo avuga ko kuba umwana yakwiga atidagadura bibangamira amasomo n’imyitwarire kuko abana badakina barigunga.

    Ati “Siporo mu burezi yubaka umwana mu buryo bwinshi; n’uwakinnye akaruhuka ubasha kumuha umubare cyangwa Icyongereza akarushaho kubyumva. Habamo no gusabana birenze uko basabanira mu isomo.”

    “Ubusanzwe n’abakinnyi bose bakina ku rwego rw’igihugu imikino nka football, basketball, volleyball, akenshi bavaga mu bigo by’amashuri. Niba umwana atabitojwe akiri muto agategereza ko azajya muri ‘internat’ aho azakubitana n’ababifite, uwo azaba afite ubukererwe mu mikinire.”

    Mu Ishuri Ribanza rya Kamuhoza na ho ikibazo cy’ibibuga by’imikino baragifite kandi bigaragara ko ntaho bafite byakubakwa bitewe n’imiterere yaho. N’ahari hasigaye harubatswe hagamijwe kurwanya ubucucike mu mashuri

    Yongeyeho ati “Inzego zishinzwe uburezi zivuga ko aho bishoboka bazimura abaturage bakabaha ingurane hakaboneka imbuga yo gukiniramo ariko aho kugira ngo byaguke haza inyubako n’ahari gato kakagenda. Nihaba ubushake bizakorwa cyangwa uburyo turi kubaka amashuri ya ‘etage’ buzatuma ibibuga biboneka ariko na bo barabizi.”

    Kwari ugukemura ikibazo cyihutirwa

    Umwarimu wigisha Siporo muri Kaminuza y’u Rwanda, Koleji y’Uburezi, Ngarambe François, yavuze ko kuba ibibuga by’imikino byaratewemo ubusitani cyangwa bikubakwamo amashuri, ari ikibazo cyizwi ku rwego rw’igihugu.

    Ahamya ko mbere na mbere icyari gikenewe ari uko abana babanza kubona aho bigira ariko ngo n’aho bidagadurira harakenewe.

    Ati “Kugira ngo umuntu agire ubuzima bwiza akenera gukora siporo; n’aba barwayi ba Covid-19 mu miti ya mbere babaha harimo no kubakoresha siporo. Umwana akuze adakora siporo yazayikora afite imyaka ingahe?”

    “Twanabiganiriyeho mu itorero ry’aba-Sportif ryabereye i Nkumba na Minisitiri [Uwacu Julienne] twabimubwiye avuga ko bigiye gukosorwa. Twanagaragazaga n’ibigo by’amashuri byubatse mu manegeka bidashobora kugira ibibuga.”

    Ntabwo gahunda ihari ari ugusenya ibibuga hubakwa amashuri

    Umunyamabanga wa Leta Ushinzwe Amashuri Abanza n’Ayisumbuye, Twagirayezu Gaspard, yavuze ko bizwi ko hari amashuri atagira ibibuga by’imikino ariko ko bikenewe.

    Kuba ibibuga byarubatswemo amashuri ngo si yo yari amahitamo ya mbere ahubwo harebwe igikenewe kurusha ibindi.

    Ati “Ntabwo twavuga ko gahunda ihari ari ugusenya ibibuga tukubaka amashuri, ni ukubikora byombi aho bishobotse. Aho twubaka amashuri aho bishoboka n’ibibuga biba birimo nk’ayubakwa mu Midugudu y’intangarugero.”

    Aho byagiye bibaho ko ibibuga byubakwamo amashuri si uko ari byo byari bigambiriwe, hari igihe rimwe na rimwe ikibazo kiba kiri ahantu nk’ubucucike abantu bareba igikenewe kurusha ibindi muri icyo gihe ariko na none hari izindi gahunda zo gushyira ibibuga ahantu hatandukanye mu gihugu no mu buryo busanzwe abaturage bakaba babona aho bakinira, n’ibyo bibuga bisanzwe bibakaba byakoreshwa n’abanyeshuri.

    Yavuze ko aho bidashoboka ko hajya ibibuga bisanzwe harebwa nk’ibya football na volleyball bitavuze ko abana batakina ahubwo hazakomeza kurebwa ubwoko bw’imikino yindi yakinwa.

    Mu Rwunge rw’Amashuri rwa Kabusunzu mu Karere ka Nyarugenge, imbuga nto abanyeshuri bashoboraga gukiniramo iri kubakwamo ibyumba by’amashuri

    Mu Kigo cy’Urwunge rw’Amashuri rwa Kimisagara bafite ikibuga cya Volleyball abanyeshuri bashobora gusimburanamo

    Mu Rwunge rw’Amashuri rwa Kimisagara habarurwa abanyeshuri bagera ku bihumbi bine ntaho kwidagarurira bafite

    Amafoto: Yuhi Augustin

    source : https://ift.tt/3soOLnv

  • Minisiteri ya Siporo mu Rwanda yahaye FERWAFA uburenganzira bwo gusubukura amarushanwa y'ikiciro cya 2 mu bagabo ndetse n'ayo mu kiciro cya 1 n'icya 2 mu bagore (2021) #rwanda #RwOT

    Ku mugoroba wo kuri uyu wa mbere, tariki ya 16 Kanama 2021 nibwo Minisiteri ya Siporo mu Rwanda yemereye ishyirahamwe ry'umupira w'amaguru mu Rwanda FERWAFA, ko bemerewe gusubukura amarushanwa y'ikiciro cya kabiri mu bagabo ndetse n'ikiciro cya mbere ndetse n'icyakabiri mu bagore mu mwaka w'imikino wa 2020-2021.

    Aya marushanwa agiye gukinwa nyuma y'ubusabe bw'ishyirahamwe ry'umupira w'amaguru mu Rwanda, aho mu kwezi kwa Kamena 2021 bandikiye Minisiteri ya Siporo bayisaba ko basubukura ibi byicior byombi biheruka kugaragara mu marushanwa ya 2019-2020, ni nyuma yaho mu Rwanda ndetse no hirya no hino ku isi icyirezo cya Koronavirusi cyari kibasiye isi muri rusange bityo amarushanwa yo muri ibyo byiciro byombi ntiyaba.

    Mu ibaruwa Minisiteri ya Siporo yandikiye FERWAFA, yemereraga iri shyirahamwe gusubukura amarushanwa mu byiciro bitandukanye. Aha ni naho ishyirahamwe ry'umupira w'amaguru mu Rwanda ribinyujije ku rubuga rwayo rwa Twitter banditse bavuga ko bemerewe gusubukura amarushanwa.

    Bagize bati 'Minisiteri ya Siporo mu Rwanda yahaye FERWAFA uburenganzira bwo gusubukura amarushanwa y'ikiciro cya 2 mu bagabo ndetse n'ayo mu kiciro cya 1 n'icya 2 mu bagore (2021).'

    FERWAFA kandi yaboneyeho gutangaza ko mu gihe cya vuba, baza gushyura hanze uko amakipe azahura muri ayo marushanwa, bati 'mu minsi mike cyane, tuzatangaza ingengabihe y'ayo marushanwa kimwe n'ingamba zivuguruye zo kwirinda COVID-19 zizakurikizwa.'

    Hari amakuru ikinyamakuru RUSHYASHYA cyamenye ko amakipe 15 yo mu kiciro cya kabiri ariyo yari yiyandikishije ngo azahatanire gukina imikino izabazana mu kiciro cya mbere hashakishwa amakipe abiri azasimbura ikipe ya Sunrise FC ndetse na AS Muhanga yamanutse mu kiciro cya kabiri cya 2021-2022.

    Mu minsi ishize nibwo hari amakuru yavugaga ko iki kiciro kitazakinwa kuko hari hamazwe gutangaza ko ikiciro cya mbere cya 2021-2022 kizatangira ku itariki ya 16 Ukwakira 2021, bityo bamwe bagaheraho bavuga ko ikiciro cya kabiri cy'umwaka wa 2020-2021 kitazakinwa bityo ko AS Muhanga na Sunrise zo zizaguma mu kiciro cya mbere.

    Ibi byatumye ku ruhande rwa Sunrise FC yiyongerera imbaraga, aho yari imaze kongerera amasezerano y'imyaka ibiri abakinnyi bayo babibiri Twagirimana Innocent uzwi nka Kavatiri na Wanji Pius, iyi kipe kandi yanaguze Rucogoza Dhijad wakinaga muri Bugesera FC.

    Ku ruhande rwa AS Muhanga nyuma yaho yari yatandukanye na Nduwantare Ismael nk'umutoza wayo mukuru, iyi kipe nayo yari mu nzira zo kwiyubaka ishaka umutoza mukuru. Amakuru yavaga muri iyi kipe ngo nuko Thierry Hitimana na Kayiranga Babptiste aribo iyi kipe yarimo ishaka kureba ko umwe muribo bakorana mu gihe iyi kipe yaba igumye mu kiciro cya mbere.

    The post Minisiteri ya Siporo mu Rwanda yahaye FERWAFA uburenganzira bwo gusubukura amarushanwa y'ikiciro cya 2 mu bagabo ndetse n'ayo mu kiciro cya 1 n'icya 2 mu bagore (2021) appeared first on RUSHYASHYA.

    Source : https://rushyashya.net/minisiteri-ya-siporo-mu-rwanda-yahaye-ferwafa-uburenganzira-bwo-gusubukura-amarushanwa-yikiciro-cya-2-mu-bagabo-ndetse-nayo-mu-kiciro-cya-1-nicya-2-mu-bagore-2021/?utm_source=rss&utm_medium=rss&utm_campaign=minisiteri-ya-siporo-mu-rwanda-yahaye-ferwafa-uburenganzira-bwo-gusubukura-amarushanwa-yikiciro-cya-2-mu-bagabo-ndetse-nayo-mu-kiciro-cya-1-nicya-2-mu-bagore-2021

  • Amafoto ya Rocky wamamaye mu mvugo ya 'Nta Gikwe’ yakoze ubukwe yateje ururondogoro (AMAFOTO) #rwanda #RwOT

    Uwizeyimana Marc wamamaye nka Rocky Kirabiranya mu mwuga wo gusobanura filime, amafoto ye amugaragaza yakoze ubukwe, yateje ururondogoro benshi bibaza ukuri kwayo, ni mu gihe ari umusore wakunze kumvikana avuga ko 'Nta Gikwe’ azakora.

    Rocky Kirabiranya ni umwe mu bantu bakurikirwa cyane n’urubyiruko, akenshi ibyo avuze hari ababifata nk’ukuri ariko hari n’abatabyitaho.

    Ni umwe mu basore bagiye bumvikana bavuga ko atapfukamira umukobwa amusaba ko bazabana ibyo benshi bita 'Gutera Ivi’ ngo kuko amavi ye ayapfukamisha asenga gusa, no muri filime yagiye asobanura iyo yabonaga umuhungu ubikoze yamwitaga imbwa.

    Muri iyi minsi kandi yari yarazanye imvugo ya 'Nta Gikwe’, ngo nta bukwe azakora ndetse ashishikariza n’abandi kutadohoka ngo bakore ubukwe.

    Ku mugoroba w’ejo hashize ku wa Mbere tariki ya 16 Kanama 2021, hasohotse amafoto y’uyu musobanuzi wa filime apfukamye, yateye ivi arimo yambika impeta Ishimwe Carmene, umukobwa usanzwe ari umukinnyi wa filime.

    Ni amafoto yahise akurikirwa n’andi y’ubukwe, bigaragara ko yakoze ubukwe n’uyu mukobwa.

    Benshi bahise bibaza niba koko uyu musore yakoze ubukwe cyangwa niba ari ukubeshya, akaba ari ugutwika, amakuru ISIMBI yabashije kumenya ni uko bari mu ifatwa ry’amashusho y’indirimbo ya Papa Cyangwe na Social Mula wari parrain wa Rocky muri ubwo bukwe.

    Rocky yasembuye ibitekerezo bya benshi bitewe n’ifoto yashyize kuri Instagram ye ari kumwe na Carmene igagaragaza yakoze ubukwe, yahekerejwe n’amagambo agira ati 'Imana ni nziza'.

    Abantu benshi batanze ibitekerezo kuri iyo, bamwe bamwifurije urugo rwiza abandi bahakana ko atari ubukwe bwabaye ari filime, ni mu gihe hari n’abamubwiye ko ahemukiye amaniga.

    Umuraperi Riderman yamubwiye ko ngo gahunda ya nta gikwe ari ugutegereza mu ijuru kuko mu Isi ubukwe bwo bwakozwe.

    Ati 'congs ma nigga, ubwo nta gikwe tuzayiririmba tugeze mu ijuru kuko ku isi igikwe ni ngombwa', Rocky yahise amusubiza ati 'umugore mwiza umuhabwa n’Imana muvandi.'

    Uwitwa Schadrack Gihana yagize ati 'Uradohotse pe, gusa uhemukiye ama Niger n’abapampe, guhera ubu ninjye ugiye kuyobora Gahunda ya Nta Gikwe munzibacyuho mu gihe tutarakora amatora anyuze mumucyo.'

    Obed Francis250 'waradushutse sha dukatira aba baby none…'

    Gasigwa Jean ati 'Ayo mavi upfukamisha usenga Imana uyapfukamishije imbere y’isadunda koko.'

    Sebera Joseph ati 'Rock niyihe nzu urikwamamaza igira imyenda y’abageni?'

    Marie Josee Atete ati 'Jye n’ubu sindabyemera ndumva ari ugutwika pe'

    Sharpteefsheep-godin ati 'Genda uzi kwamamaza wa mugabo wee, can’t wait kubona iyi pubulisite.'

    Uretse iyi foto kandi yashyize ku mbuga nkoranyambaga ze, iki n’icyo kiganiro kiriwe hirya no hino ku mbuga nkoranyambaga bibaza niba ari ubukwe cyangwa se koko atari bwo.

    Akunda kuvuga ko atapfukamira umukobwa ngo amusaba ko bazabana

    Byarangiye apfukamye amwambika impeta

    Carmene na Rocky bagaragaye nk’abakoze ubukwe, gusa amakuru avuga ko ari amashusho y’indirimbo bakoze

    Amafoto yabo agaragaza bakoze ubukwe, yateye benshi urujijo

    Carmene umukobwa bivugwa ko yakoze ubukwe na Rocky

    Papa Cyangwe na Kadafi baru babukereye

    Source : http://isimbi.rw/siporo/article/amafoto-ya-rocky-wamamaye-mu-mvugo-ya-nta-gikwe-yakoze-ubukwe-yateje-ururondogoro-amafoto