Webrwanda Backend

Category: Uncategorized

  • Ingabo z'u Rwanda zikomeje kwigarurira uduce twari twaragizwe ingwate n'Ibyihebe, Agace ka Mbau kaguyemo ibyihebe 11 #rwanda #RwOT

    Mu bikorwa zirimo byo guhashya iterabwoba Ingabo z'u Rwanda hamwe niza Mozambique zamaze kwigarurira agace ka Mbau kari karabaye ubuhungiro bw'ibyihebe nyuma yo guhatwa umuriro n'ingabo z'u Rwanda igihe habaga ibohozwa rya Macimboa da Praia yari yaragizwe icyicaro gikuru cy'abo barwanyi basanzwe bakorana n'Imitwe igendera ku mahame ya Islam

    Aka gace ka Mbau kari ku birometero bisaga 45 (45km) uvuye mu mujyi wa Macimboa da Praia, ni agace karangwamo amashyamba y'inzitine ku kigero cya Nyungwe yo mu Rwanda; bityo amakuru akaba yaragiye avugwa ko ariho izo nyeshyamba zaba zifashisha mu gukora ibikorwa bitandukanye birimo n'imyitozo.

    Kuwa gatanu taliki 20 Kanama nibwo ako gace kigaruriwe n'ingabo z'u Rwanda nyuma y'imirwano yari imaze iminsi mu duce twa Chinda no mu nkengero zaho, mu kugaba icyo gitero Abasirikari b'u Rwanda baturutse mu mu bice bibiri aribyo Macimboa da Praia na Mueda.

    Mbere yo kwinjira mu mujyi wa Mbau; mu birometero bitanu (5 km) niho Ingabo z'u Rwanda zasakiranye n'ibyihebe bibarirwa hagati ya 80 na 100 haba ukurasana gukomeye kwahosheje Ingabo z'u Rwanda zikubise inshuro abo banzi b'amahoro n'umudendezo, aho nyuma y'imirwano hagaragaye ibyihebe bisaga 11 byari byaguye muri iyo mirwano.

    Hari amakuru yandi avugwa ko hashobora kuba harishwe ibyihebe byinshi ariko imirambo yabyo igatwarwa na bigenzi byabyo dore ko bashobora kuba barayitwaye bayikurura bakoresheje imigozi.

    Muri iyo mirwano hakaba harafatiwemo ibikoresho byinshi birimo imbunda zo mu bwoko bwa SMG n'ibindi abo barwanyi bakoreshaga mu guhungabanya umutekano w'abaturage no kwangiza ibikorwa remezo muri Cabo Delgado.

    Umuvugizi w'Ingabo z'u Rwanda Col. Rwivanga Ronald yatangarije itangazamakuru ko nubwo umujyi wa Mbau wamaze kubohorwa ariko ibikorwa byo kurwanya no guhashya burundu iyi mitwe bigikomeje.
    Aho yagize ati 'Twahafashe kandi twabakuye muri ako gace ariko ntibivuze ko birangiye, ibikorwa birakomeje'.

    Hari amakuru aturuka muri Mozambique yemeza ko mu nzira Ingabo z'u Rwanda guhera kuwa kabiri ubwo zatangiraga kurwana zagendaga zibona ahantu abo barwanyi bagiye banyuza imodoka nyinshi bari bafite ubwo RDF yabakubitagaho ikibatsi cy'umuriro muri Macimboa da Praia, ibyo byihebe kandi ngo byagendaga bifunga inzira kugirango bitinze ababa babikurikiye bityo bagatema ibiti bakabirambika mu muhanda.

    Urugero ni urwo mu gace kitwa Naquitengue karimo ibiti byinshi aho byasabye ko Ingabo z'U Rwanda RDF zifashisha imashini yo gukata ibiti cyangwa se zigakoresha ibimodoka binini by'intambara kugirango zibashe gutambuka zisatira aho ibyo byihebe byahungiye.

    Nyuma y'ibohorwa rya Mbau ubu uduce tubiri nitwo dusigaye mu maboko y'izo nyeshyamba aritwo Siri ya Mbere na Siri ya Kabiri.

    Muri uru rugamba rwo kurwanya iterabwoba, ahamaze kubohorwa hahita hasigara mu maboko y'abapolisi bakahacungira umutekano mu gihe Ingabo zo zikomeza imbere zirwana
    Uyu mutwe w'iterabwoba urwanira muri Mozambique cyane cyane mu ntara ya Cabo Delgado ufite izina ryitwa Ahlul Sunna wa-Jammah, gusa benshi mu baturage bawita 'al-Shabaab'.

    Amakuru avugwa ko mu ishingwa ryawo abenshi mu bawugize baba baraturutse mu mahanga aho havuzwe Tanzania aho ngo baje baha abaturage ngo bikenure, ari nako ngo babigishaga amwe mu mahame y'idini ya Islam gusa bafite intego yo guhindura Cabo Delgado icyicaro gikuru cy'uwo mutwe w'Iterabwoba ugendera ku matwara akakaye ya Islam.

    Kugeza nubu umuyobozi w'uyu mutwe ntazwi gusa abaturage bo muri Cabo Delgado bavuga ko ari umunyamahanga kandi yaba yaramaze guhunga igihugu nyuma yuko u Rwanda rwari rumaze gufata umwanzuro wo kohereza Ingabo muri Mozambique guhashya uwo mutwe.

    Leta zunze ubumwe z'amerika ziherutse kuvuga ko umugabo witwa Bonomade Machude Omar uzwi na none nka AbuSulayfa Muhammad nundi witwa Ibn Omar bashobora kuba aribo bayobozi buwo mutwe
    Gusa abatuye agace ka Palma gafatwa nk'izingiro ry'uwo mutwe abahatuye bavuga abo bagabo ataribo bayobozi b'uwo mutwe kuko ngo umwe muri bo bamuzi dore ko ari kavukire muri ako gace kandi undi muyobozi akaba ari umunyamahanga ndetse na benshi mu bawushinze.

    Impamvu nyinshi bashingiraho ni uko abenshi muri abo barwanyi babaga bavuga Igiswahili ndetse ngo banafite inyandiko zo muri urwo rurimi kandi ngo iyo bazaga kwica abaturage bavugaga mu majwi aranguruye bati ' Allah Akbar' ngo hanyuma bagaca abantu imitwe bakayishinga ku bisongo ahantu hagaragarira buri muntu ndetse ngo bagakata ubugabo bw'abagabo babaga bamaze kwica.

    Si ukwica gusa ibyo byihebe byakoraga dore ko byashimutaga abana bakiri bato bikabajyana mu myitozo ya gisirikari aho bajayaga gutozwa kurwana mu gihe abandi babagiraga abagore babo cyangwa se abazajya babafasha indi mirimo mu gihe babaga ari igitsina gore, ndetse abenshi bavuganye n'abanyamakuru bavuga ko ibyihebe byatwaraga abeza ku isura gusa.

    Kuva ibikorwa byo guhashya imitwe y'iterabwoba byatangira muri Cabo Delgado ituze risa niriri kugenda rigaruka aho benshi mu baturage batangiye gusubira mu byabo bari baravukijwe n'umutekano muke muri iyo ntara.

    The post Ingabo z'u Rwanda zikomeje kwigarurira uduce twari twaragizwe ingwate n'Ibyihebe, Agace ka Mbau kaguyemo ibyihebe 11 appeared first on RUSHYASHYA.

    Source : https://rushyashya.net/ingabo-zu-rwanda-zikomeje-kwigarurira-uduce-twari-twaragizwe-ingwate-nibyihebe-agace-ka-mbau-kaguyemo-ibyihebe-11/?utm_source=rss&utm_medium=rss&utm_campaign=ingabo-zu-rwanda-zikomeje-kwigarurira-uduce-twari-twaragizwe-ingwate-nibyihebe-agace-ka-mbau-kaguyemo-ibyihebe-11

  • Hamenyekanye ba rutahizamu 4 Manchester United izakuramo usimbura Cavani mu mpeshyi itaha #rwanda #RwOT

    Ikipe ya Manchester United yaguze abakinnyi barimo Jadon Sancho na Raphael Varane,irashaka kuzamena Banki mu mpeshyi ikagura rutahizamu ukomeye aho hashyizwe hanze urutonde rw'aba rutahizamu 3 bashobora kuvamo umwe igura.

    Ibinyamakuru byo mu Bwongereza byavuze ko iyi kipe yamaze gukora urutonde rw'aba rutahizamu 4 bagomba kuvamo umwe uzayikinira byanze bikunze.

    Kugeza ubu,United igiye gucungira kuri Edinson Cavani,Marcus Rashford,na Mason Greenwood gusa mu mwaka w'imikino utaha izazana rutahizamu wa nyawe.

    United irashaka Kylian Mbappe ukinira ikipe ya Paris Saint-Germain cyane ko muri Kamena 2022 azasoza amasezerano ye gusa bivugwa ko yamaze kumvikana na Real Madrid.

    ESPN ivuga ko United iri gucungira hafi Mbappe ndetse ko yiteguye kumuha umushahara wose yifuza igihe azaba arangije amasezerano.

    Uyu musore w'imyaka 22 watwaye igikombe cy'isi afatwa nka rutahizamu ugezweho kuko yatsinze ibitego 79 mu mikino 82 aheruka gukina muri Ligue 1 akinira PSG.

    Abandi ba rutahizamu 3 United izakuramo umwe ni Erling Haaland w'imyaka 21, Harry Kane w'imyaka 28,na Lautaro Martinez wa 23.

    Kane na Haaland babarirwa agaciro ka miliyoni £150 gusa uyu munya Norway we igiciro ke kizagabanuka mu mpeshyi itaha kigere kuri miliyoni 64 z'amapawundi.

    United niyo bivugwa ko byayorohera kwegukana Haaland kubera ko umutoza wayo Ole bakomoka mu gihugu kimwe.Abandi bamwifuza ni Real na Bayern Munich.

    Source : https://umuryango.rw/imyidagaduro/imikino/article/hamenyekanye-ba-rutahizamu-4-manchester-united-izakuramo-usimbura-cavani-mu

  • Polisi yerekanye abantu 4 bari mu birori bya “Baby Shower” kwa Kimenyi Yves barenze ku mabwiriza yo kwirinda Covid-19 #rwanda #RwOT

    Polisi yasabye batatu babura kureka gukomeza kwihisha, bakitaba bagahabwa ibihano nk'ibyo abandi bahawe.

    Abantu bane mu munani bagaragaye bari mu birori bya 'Baby shower' byabereye mu rugo kwa Kimenyi Yves na Muyango Claudine, batawe muri yombi mu gihe abandi 3 bagishakishwa ndetse basabwa kurekera aho kwihisha inzego zishinzwe umutekano.

    Kimenyi Yves na we uri mu batawe muri yombi yabwiye itangazamakuru ko yatunguwe no kubona iwe habereye ibirori kuko batari babiteguje, icyakora yemeza ko ari amakosa bakoze kandi ayicuza.

    Yavuze ko ababajwe cyane no kuba aya makosa yarabayeho bikaba bitumye amaze iminsi afunze ndetse hakiyongeraho kugaragara imbere ya camera yambaye amapingu.

    Ati 'Birababaje, ndicuza kuba ndi hano gutya mumbona nakabaye hari ubundi butumwa ndi gutanga bwo kwirinda ikwirakwira rya Covid-19.'

    Kimenyi Yves yasabye imbabazi Abanyarwanda n'abakunzi be by'umwihariko abizeza ko amakosa nk'ayo yaguyemo atazongera.

    Umuvugizi wa Polisi y'u Rwanda, CP John Bosco Kabera, yabwiye itangazamakuru ko aba bantu bakoze amakosa yo kwica amabwiriza yo kwirinda ikwirakwira ry'icyorezo cya Covid-19 bagategurira ibirori mu rugo kandi bitemewe.

    Yavuze ko abakurikiranwa ari abantu umunani ariko kugeza ubu hamaze gufatwa batanu bityo asaba abandi ko na bo bakwitaba bitabaye ngombwa ko Polisi ibashakisha.

    CP John Bosco Kabera yasabye urubyiruko kureka kugwa mu mitego yatuma bica amabwiriza yo kwirinda ikwirakwira rya Covid-19.

    Kimenyi Yves yatawe muri yombi mu gihe ku wa 17 Kanama 2021 hasohotse amashusho agaragaza ibirori we n'umukunzi we Muyango Claudine bakorewe byo kwitegura kwakira imfura yabo.

    Source:IGIHE

    Source : https://umuryango.rw/amakuru/mu-rwanda/umutekano/article/polisi-yerekanye-abantu-4-bari-mu-birori-bya-baby-shower-kwa-kimenyi-yves

  • Hon Dr. Habineza Frank mu banyapolitiki bifurije iruhuko ridashira Amb.Habineza Joseph wahitanwe n'Uburwayi #rwanda #RwOT

    Amb Habineza Joseph 'Joe' wayoboye Minisiteri y'Urubyiruko, Siporo n'Umuco, akayisubiramo ari iya Siporo n'Umuco ndetse akaba Ambasaderi w'u Rwanda muri Nigeria, yatabarutse ku wa 20 Kanama 2021.

    Dr.Frank Habineza abinyujije ku rukuta rwe rwa Twitter, yihanganishije umuryango wa Nyakwigendera ndetse n'inshuti ze muri rusange.

    Yagize ati 'Nihanganishije umuryango n'inshuti z'uwahoze ari Minisitiri akaba n'Ambasaderi w'u Rwanda muri Nigeria: Amb.Joseph Habineza .Roho ye iruhukire mu mahoro.'

    Mu bandi bifurije iruhuko ridashira uyu munyapolitiki wari uzwiho gusabana n'abandi harimo na Minisiteri yahozemo ya Minisports.

    Iyi Minisiteri yagize iti '@Rwanda_Sports yifatanyije mu kababaro n'umuryango wa HABINEZA Joseph wayoboye Minisiteri ya Siporo n'Umuco. MINISPORTS irazirikana uruhare rwe mu guteza imbere siporo mu Rwanda, kandi yihanganishije umuryango we. Nyakwigendera aruhukire mu mahoro.

    Minisitiri wa siporo,Munyangaju Aurore Mimosa yagize ati 'Mbabajwe by'ukuri n'urupfu rw'uyu muntu mwiza.Uruhukire mu mahoro muvandimwe Amb. Joe!.Amahoro n'imbaraga ku muryango we.'

    Umunyamabanga wa Leta muri Minisiteri y'Urubyiruko n'umuco,Hon.Bamporiki Edouard,yagize ati 'Umutware w'ubukunzi, inkuru mbi yamuhindukiye umutwaro ati: Amagambo ashize ivuga!. Hari ubwo imfura zitabaruka tuti: utabarutse atutira aba yujuje, nibyo kuko nawe ubwo utabarutse ugitutira urujuje! ariko inkuru y'itabaruka ryawe ihungabanyije imfura umu. RIP my Minister Joe.'

    Uwahoze ari Minisitiri w'intebe,akanaba Perezida wa Sena,Bernard Makuza yagize ati 'Mbabajwe cyane no kumva inkuru y'urupfu rw'inshuti yacu Joe.Nubaha kandi nzahora nzirikana ubumuntu bwe.Imana ishobora byose imuhe iruhuko ridashira kandi ihe imbaraga zo kwihanganira ibi bihe bibabaje umuryango we.'

    Amb.Olivier Nduhungire,uhagarariye u Rwanda mu Buholandi n'ahandi yagize ati 'Uru rupfu rwo muri Kanama na rwo rurarambiranye! [email protected] n'umuryango we muri aka kababaro!

    Abantu benshi batandukanye yaba abahanzi,abakinnyi,amashyirahamwe y'imikino n'abandi benshi bakoresha Twitter,bifurije iruhuko ridashira uyu mugabo wagaragaje ko kuba umunyapolitike no kuba inshuti ya buri wese bishoboka.

    Source : https://umuryango.rw/amakuru/mu-rwanda/ubuzima/article/dr-habineza-frank-mu-banyapolitiki-bifurije-iruhuko-ridashira-amb-habineza

  • Nizzo Kabosi yasabye imbabazi Safi Madiba bashyamiranye kugeza avuye muri Urban Boys #rwanda #RwOT

    Mu kiganiro uyu muhanzi yahaye Ikinyamakuru IGIHE dukesha iyi nkuru,Nizzo Kabosi yavuze ko we na Safi Madiba nta kibazo bafitanye nubwo atahakanye ko hagiye habaho gushyamirana hagati yabo.

    Ati 'Gushyamirana ntaho kutaba, n'umugore n'umugabo barashyamirana. Gusa ndamusaba imbabazi niba hari aho namukoshereje kandi nanjye namaze kumubabarira kera.'

    Icyakora nubwo yasabye imbabazi, Nizzo Kaboss yahakanye amakuru yavuzwe ko yajyaga afata Safi Madiba akamukubita.

    Ati 'Uriya musore urabona uko ngana uku namubasha? Ayo ni amagambo abantu baba bavuga ngo baryoshye inkuru.'

    Uyu muhanzi abajijwe niba atajya akumbura gukorana na Safi Madiba indirimbo, yavuze ko ahora abyifuza kandi azabimusaba.

    Yavuze ko atazacika intege zo gusaba Safi Madiba ko bakongera gukorana indirimbo nka Urban Boys kandi asanga afite icyizere ko izabaho.

    Ati 'Ndabyifuza, nifuza kongera kuririmbana na we gusa atari njye gusa ahubwo nk'itsinda rya Urban Boys. Nzabimusaba kandi mfite icyizere ko ntazapfa bitabayeho.'

    Nizzo asabye imbabazi Safi Madiba mu gihe bari bamaze imyaka igera kuri ine umwuka utameze neza hagati yabo, uku kurebana ay'ingwe ni na byo byatumye iyahoze ari Urban Boys y'abahanzi batatu ubu isigayemo babiri nyuma y'uko Safi Madiba ayisezeyemo mu mpera za 2017.

    Inkuru ya IGIHE

    Source : https://umuryango.rw/imyidagaduro/umuziki/article/nizzo-kabosi-yasabye-imbabazi-safi-madiba-bashyamiranye-kugeza-avuye-muri-urban

  • Impaka zirashize! Amashusho y’indirimbo irimo Rocky Kirabiranya nk’umugeni yasohotse #rwanda #RwOT

    Kuva tariki ya 16 Kanama 2021 hari urujijo ku mafoto y’umusobanuzi wa Filime, Rocky Kirabiranya byavugwaga ko yakoze ubukwe, ni mu gihe byaje kurangira ari indirimbo ya Papa Cyangwe na Social Mula yitwa Bambe.

    Igikuba cyatangiye gucika mu ijoro ryo ku wa 16 Kanama ubwo hajyaga hanze amafoto ya Rocky aterera ivi Carmene umukobwa umenyerewe muri sinema nyarwanda, byatunguye benshi kuko uyu musore yari yaravuze ko atazigera atera ivi.

    Nyuma y’akanya gato, Rocky wari uharawe mu mvugo ya “Nta Gikwe” hahise hasohoka n’amafoto y’ubukwe, abinyujije kuri Instagram ye nawe yashyizeho ifoto y’ubukwe ari kumwe na Carmene, iherekezwa n’amagambo agira ati ” Imana ni nziza.”

    Benshi bagiye bamwifuriza urugo ruhire, abandi bavuga ko adohotse, gusa hari n’abatarabyemeye bavuga ko ari amashusho y’indirimbo cyangwa filime.

    Benshi bagiye bemeza ko koko iki cyamamare cyakoze ubukwe, abandi bakabihakana, urujijo rwari rugihari, impaka zaje gucika nyuma y’uko hasohotse uyu munsi indirimbo Bambe ya Papa Cyangwe na Social Mula.

    Byagaragaye ko aya mafoto yasohotse yari ayo mu mushusho y’iyi ndirimbo, Rocky yakinnyemo yakoze ubukwe na Carmene.

    Ni indirimbo y’urukundo ishingiye k’umusore ugiye kurushinga ku munsi we w’ubukwe, ategereje umukobwa ariko na none amusezeranya ko azamukunda iteka kandi atazamuhemukira ndetse atewe ishema na we.

    Muri aya mashusho kandi Social Mula aba ari we Parrain, ni mu gihe kandi hanagaragaramo Dj Briane.

    Ifoto ye atera ivi yavugishije abantu batandukanye

    Ntabwo byari ubukwe byari amashusho y’indirimbo ya Papa Cyangwe na Social Mula

    Byateye benshi urujijo

    Source : http://isimbi.rw/imyidagaduro/article/impaka-zirashije-amashusho-y-indirimbo-irimo-rocky-kirabiranya-nk-umugeni-yasohotse

  • Rutahizamu Jacques Tuyisenge yasabye anakwa u… – #rwanda #RwOT

    Kuri uyu wa Gatanu tariki ya 20 Kanama 2021, Tuyisenge yasabye anakwa umukunzi we Jordin mu birori byabereye mu Murenge wa Ndera mu Karere ka Gasabo. Abitabiriye ibi birori babanje kwipimisha COVID-19 mu gihe nyuma yabyo, bafashe imodoka berekeza mu Karere ka Rubavu, ahabera gusezerana imbere y'Imana kuri uyu wa Gatandatu muri Gorilla Hotel.

    Kuri uyu wa Gatandatu tariki ya 21 Kanama 2021, Tuyisenge Jacques n'umukunzi we Musiime Recheal Jordin bazasezerana imbere y'Imana, nyuma yo gusezerana imbere y'amategeko tariki ya 18 Gashyantare 2021 mu murenge wa Kimihurura. Ubukwe bwa Tuyisenge na Jordin bwasubitswe n'icyorezo cya Coronavirus kubera ko nta bantu bari bemerewe kwitabira ibirori muri icyo gihe bituma budakorwerwa igihe cyari cyateganyijwe.

    Nyuma y'ibyemezo by'Inama y'Abaminisitiri yateranye ku wa 11 Kanama 2021 iyobowe na Perezida Kagame, bivuga ko imihango y'ubukwe harimo gusaba, ishyingirwa rikorewe imbere y'Ubuyobozi bwa Leta n'irikorewe mu nsengero bisubukuwe, ariko bikitabirwa n'abantu batarenze 50, ndetse ko  abitabiriye iyo mihango bagomba kwerekana ko bipimishije COVID-19 mu masaha 72 mbere y'ibyo bikorwa, kandi bakubahiriza amabwiriza yo kwirinda COVID-19 (gusiga intera hagati y'umuntu n'undi, gukaraba intoki, kwambara agapfukamunwa neza), uyu mukinnyi yahise afata icyemezo cyo gusubukura gahunda y'ubukwe bwe na Jordin buzaba kuri uyu wa Gatandatu.

    Uyu mukinnyi w'imyaka 29 y'amavuko, yari mu bari mu mwiherero w'Amavubi ari kwitegura imikino ya Mali na Kenya izaba mu ntangiriro z'ukwezi gutaha mu ijonjora rya kabiri ryo gushaka itike y'Igikombe cy'Isi cya 2021. Ariko yawuvuyemo ku wa Kane nyuma ya saa Sita kugira ngo ajye kwitegura ubukwe buzabera mu Karere ka Rubavu ku wa Gatandatu muri Gorilla Hotel.

    Tuyisenge wari kapiteni w'Amavubi yitabiriye CHAN 2020, ndetse akagarukira muri ¼ nyuma yo gutsindwa na Guinea 1-0, yakiniye amakipe atandukanye yo mu Rwanda no hanze yarwo, arimo Kiyovu Sports, Police FC, Gormahia, Petro-Atlético de Luanda na APR FC.

    Tuyisenge Jacques yasabye anakwa umukunzi we Jordin

    Ibi birori byabereye mu murenge wa Ndera muri Gasabo

    Gusezerana imbere y’Imana biteganyijwe kuri uyu wa Gatandatu

    Muri Gashyantare ni bwo Tuyisenge na Jordin basezeranye imbere y’amategeko

    Tuyisenge Jacques ni umwe mu nkingi za mwamba mu Amavubi

    Source : https://inyarwanda.com/inkuru/108796/rutahizamu-jacques-tuyisenge-yasabye-anakwa-umukunzi-we-jordin-amafoto-108796.html

  • Umutoza Bisengimana Justin yongereye amasezerano y'imyaka ibiri mu ikipe ya Rutsiro FC  #rwanda #RwOT

    Ikipe ya Rutsiro FC yamaze kumvikana n'uwahoze ari umutoza wayo mu mwaka ushize w'imikino ariwe Bisengimana Justin wayifashije gusoza mu makipe umunani ya mbere mu mwaka w'imikino wa 2020-2021.

    Kumvikana hagati y'impande zombi byasojwe n'ibiganiro byabaye kuri uyu wa gatanu ndetse bumvikana ko uyu mutoza agiye kuyigumamo mu gihe cy'imyaka ibiri iri imbere, ibi bivuze ko uyu mutoza mu gihe yayigumamo amasezerano ye yaba ayimazemo imyaka itatu kuko ubu amazemo umwaka umwe.

    Bisengimana Justin yongereye amasezerano muri Rutsiro FC nyuma yaho yifuzwaga n'amakipe atandukanye arimo ikipe ya Etincelles FC yo mu karere ka Rubavu ndetse na Musanze FC, gusa uyu mutoza yavuze ko kuguma muri iyi kipe byatewe n'uko bakoranye neza mu mwaka umwe yari amaranye n'iyi kipe.

    Mu ntego uyu mutoza yahawe ni uko ngo agomba gusoza mu makipe umunani ya mbere nk'uko ubushize yagaragaje ubushobozi bwo kuba yaza muri ayo makipe, gusa ngo bidakunze nabwo ntarenge uwo mwanya yari mu mwaka wa 2020-2021.

    Nyuma yo gusinya amasezerano y'imyaka ibiri, Bisengimana Justin ngo hakurikiyeho kongerera amasezerano abandi bakinnyi bayobowe na kapiteni w'iyi kipe Nova Bayama ndetse kandi na rutahizamu Lomami Frank.

    Bisengimana Justin nk'umutoza yanyuze mu makipe atandukanye arimo Gicumbi FC, Police FC, Sunrise FC ndetse na Bugesera FC.

    The post Umutoza Bisengimana Justin yongereye amasezerano y'imyaka ibiri mu ikipe ya Rutsiro FC  appeared first on RUSHYASHYA.

    Source : https://rushyashya.net/umutoza-bisengimana-justin-yongereye-amasezerano-yimyaka-ibiri-mu-ikipe-ya-rutsiro-fc/?utm_source=rss&utm_medium=rss&utm_campaign=umutoza-bisengimana-justin-yongereye-amasezerano-yimyaka-ibiri-mu-ikipe-ya-rutsiro-fc

  • Aubameyang na Lacazette banduye COVID-19: Int… – #rwanda #RwOT

    Ku wa Gatanu tariki ya 13 Kanama 2021, Arsenal yakinnye umukino wa mbere ufungura Premier League idafite amwe mu mazina akomeye ndetse itsindwa irushwa na Brentford ibitego 2-0, ibintu byababaje cyane abakunzi n'abafana bayo.

    Ikinyamakuru Daily Mail cyo mu Bwongereza ku wa kabiri w'iki cyumweru cyatangaje ko umukino wa Brentford na Arsenal wari hafi gusubikwa, abagize Arsenal bose bapimwa COVID-19 igitaraganya amasaha macye mbere y'uko utangira, byanatumye benshi mu bakinnyi b'iyi kipe batagaragara muri uyu mukino.

    Kuri uyu wa Kane tariki ya 19 Kanama 2021, iyi kipe yatangaje ko abakinnyi bayo bane barimo Pierre-Emerick Aubameyang, Alexandre Lacazette, Willian na Alex Runarsson bamaze iminsi baranduye COVID-19.

    Arsenal yavuze ko Aubameyang yamaze gukira ndetse byitezwe ko ashobora gukina umukino wa Chelsea ku Cyumweru nyuma y'uko yasibye uwa Brentford. Gusa, abandi barimo Lacazette na Runarsson baracyari gukurikiranwa n'abaganga ndetse ntibazakina umukino wo ku Cyumweru mu gihe kuri Willian we hari amahirwe ko yahura n'ikipe yahozemo.

    Abandi bakinnyi bafite ibibazo muri iyi kipe ni Gabriel Magalhães wavunitse mu ivi ry'iburyo, Eddie Nketiah wavunitse akabombambari ku kirenge cy'iburyo kimwe na Thomas Partey ufite ikibazo nk'icyo.

    Arsenal izagaruka mu kibuga ku Cyumweru tariki ya 22 Kanama 2021, ikina na Chelsea mu mukino wa kabiri muri Premier League isabwamo intsinzi kugira ngo yiyunge n'abafana bayo bafite umujinya w'umuranduranzuzi.

    Aubameyang na Lacazette kuba baranduye Coronavirus byatumye itakaza umukino ufungura Premier League

    Arsenal yatsinzwe na Brentford mu mukino ufungura Premier League 2-0

    Source : https://inyarwanda.com/inkuru/108795/aubameyang-na-lacazette-banduye-covid-19-intandaro-yintsinzwi-ya-arsenal-ku-mukino-wa-bren-108795.html

  • Ibyaranze Nyakwigendera Joseph Habineza muri politiki y'u Rwanda nuko yahuye na Perezida Kagame #rwanda #RwOT

    Ambasaderi Joseph Habineza wabaye Minisitiri wa Siporo mu Rwanda mu bihe bitandukanye,yaraye atabarutse ahitanwe n'uburwayi mu gihugu cya Kenya bitera benshi intimba cyane ko yakundaga gusabana n'abandi.

    Habineza Joseph yavutse tariki 03 Ukwakira 1964), avukira muri Segiteri Kayenzi mu Karere ka Kamonyi.

    Yabyawe na Utumyebahutu Jean na Nyiranzabonitegeka Ziripa.

    Joseph Habineza yabyaye impanga inshuro ebyiri, yabyaranye na Justine Kampororo.

    Abana be b'imfura (Umuhungu n'umukobwa) bavutse 1988, abandi babiri (bombi ni abahungu) bavutse mu 1991.

    Amb.Habineza yari umuntu ukunda gusetsa kandi yisanzuraga mu byo yavugaga ubuzima bwe n'uburyo abona ibintu muri rusange.

    Mu kiganiro kirambuye yagiranye i n'umunyamakuru Fred Muvunyi kigatangazwa bwa mbere n'ikinyamakuru cyahoze cyitwa IZUBA RIRASHE,Amb.Habineza Joseph yagarutse ku buzima bwe muri rusange by'umwihariko yibanda kuri Politike.

    Muri iki kiganiro twisunze ikindi kinyamakuru cyatangaje iyi nkuru Popote.rw,tugiye kugaruka ku buzima bw'uyu munyapolitiki wisanzuraga ku bantu bose ndetse agakundwa n'urubyiruko cyane.

    Joseph Habineza yavuze ko yahuye bwa mbere na Perezida Paul Kagame tariki 03 Mata 1994, ku Mulindi ahari ibirindiro bikuru by'ingabo za RPA Inkotanyi.

    Ndetse ubwo indege ya Perezida Habyarimana yahanurwaga, Joseph Habineza, yari yicaranye na Major General Paul Kagame barimo kureba Igikombe cy'Afurika.

    Umubonano wabo waje ukurikira ibihe bikomeye Habineza yari amaze kunyuramo nyuma yaho tariki ya 28 Mutarama 1994 yateguye umukino wa Volley Ball wahuje abasirikare ba RPF n'urubyiruko rw'i Nyamirambo.

    Ni umukino wakurikiwe n'abantu ngo 'basaga 10.000' harimo abasirikare bakuru ba Habyarimana ndetse n'abasirikare ba LONI (MINUAR) na bo bari baje kwirebera.

    Uyu mukino warakaje bikomeye ubutegetsi bwa Habyarimana bituma bafunga Habineza Joseph umunsi wose i Remera (Ubu hari station ya Polisi-Remera).

    Amaze kurekurwa, Habineza yamaze amezi abiri ari mu kazi ke (Yakoreraga Blarirwa icyo gihe) ariko yumva afite impungenge z'Umutekano we, byaje kumuviramo guhungira mu birindiro bya RPA — Ku Murindi tariki 03 Mata 1994.

    Imikino ya Gicuti yateguye igahuza urubyiruko cyane rw'i Nyamirambo n'abasirikare ba RPA/RPF yatumye agirana ubucuti n'abasirikare bakuru barimo Gen. Charles Kayonga, Gen. Rudakubana Charles, Gen. Mushyo Kamanzi n'abandi banyapolitiki.

    Uyu munyapolitike utaragiraga ishyaka abarizwamo,yagizwe Minisitiri w'Urubyiruko umuco na siporo muri Nzeri 2004.

    Avuga uko yahamagawe kuba Minisitiri,Amb.Habineza yagize ati “

    'Rimwe nari i Nairobi mu biruhuko bambwira ko Afande (Perezida Kagame) anshaka; ndibaza nti aranshakira iki koko? Icyo gihe His Excellency ( Perezida Kagame) yampamagaye ngiye kwegura muri Bralirwa [09/2004].Nahamagawe na Musoni James, nibwiye ko Musoni ashaka kumpa akazi muri Rwanda Revenue, [duhuye] numva nta kintu na kimwe ambwira cy'akazi ahubwo anganiriza ibintu bya politiki, nyuma arambwira ngo simve i Kigali ngo hari abandi bashaka ko tuganira nimugoroba, bwaje kwira nta muntu umpamagaye.

    Umunsi wakurikiyeho mu gitondo, mbona nimero itazwi [Unknown number] barambwira ngo hano ni muri State House (mu Rugwiro aho Perezida Kagame akorera), nti yampayinka!!! Barambwira ngo Afande [Perezida Kagame] aragushaka, ube standby (witegure), hashize akanya [General] Kazura [Yari umujyanama wihariye wa Perezida] arampamagara arambwira ngo 'ikoti ryawe ryiza uritegure afande aragushaka'… nyuma naje kujya muri state house turaganira [na Perezida] ndi kumwe na Musoni James nyuma arambwira ati nasanze ari wowe wasimbura Robert Bayigamba, ambwira ibyo nzaba nshinzwe hanyuma tariki 28/09/2004 nibwo babitangaje…'

    Minisitiri Joseph Habineza,yavuye muri Minisiteri y'Urubyiruko,umuco na Siporo yeguye muri Gashyantare 2011,yeguye kubera amafoto yashyizwe hanze ari kumwe n'abakobwa.

    Amb.Habineza yabwiye Popote.rw ko yababajwe bikomeye n'aya mafoto yakwirakwijwe ku mbuga nkoranyambaga ndetse ko ibyamubayeho byamubereye isomo rikomeye mu buzima.

    Ati'Mbere na mbere byabonywe n'umuhungu wanjye, arambwira ngo ninkureho facebook account yanjye kuko hari umuntu urimo gushyiraho amafoto ari 'scandal' ariko ndebye amafoto mbona ntanayibuka, nyuma nibuka ko hari igihe nigeze gutumirwa muri Party (Ibirori) abakobwa banyuzuraho ngo twifotoze.

    Numvaga ari ibintu bisanzwe, amafoto ubwayo ntacyo yari atwaye; inkuru yanditswe ni yo yanteye umujinya, article yaciye kuri le prophete, yarimo kwangiza isura yanjye, bavuga ngo twararenzwe ngo hari uwo natereye umukobwa Sida…shyiiii umwanda gusa….

    Uwari Perezida wa Sena ni we wabanje kumpamagara (Biruta) ambaza niba nabonye ibimvugwaho mubwira ko nabibonye, ati “ese urimo gukora iki?,Arambwira ati; byaba byiza ubimenyesheje boss [Perezida Kagame] mbere y'uko abimenya.Nahise mpamagara Ines [Mpambara] nsanga na we yabibonye, musaba kubibwira Boss [Nawe] ati; ariko wamwandikira ukamusobanurira, ni uko ndabikora musobanurira ko harimo montage [gukabya] kandi ko n'amafoto ari ayo muri 2008 … ariko inkuru yari itarasohoka, isohotse mpamagara Minisitiri w'Intebe na we ati ngwino ku biro byanjye ni uko njyayo mubwira ko nshaka kwegura, maze ambwira ko nandikira Perezida mbimunyujijeho, nuko nsubira ku biro ndayandika mpita nyimuha…'

    Muri Kanama 2011 kugeza Nyakanga 2014,Amb.Joseph Habineza yagizwe Ambasaderi w'u Rwanda muri Nigeria.

    Muri Nyakanga 2014 yagizwe Minisitiri wa Siporo n'Umuco amara kuri uwo mwanya iminsi 183 kuko yasimbujwe ku wa 24 Gashyantare 2015.

    Agaruka ku kugaruka kwe muri Guverinoma bigashimisha benshi,Amb.Joseph Habineza yagize ati “Nari ambasaderi kandi ntawaba ambasaderi ubuzima bwose, gusa numvaga nzakora nk'imyaka itanu ndi ambasaderi hanyuma nkisubirira muri Private business ariko byarantunguye kuko ntari mbyiteze.

    Numvaga ngize imyaka 50 ngomba gutangira gutegura kujya mu zabukuru ariko nabiketse mbonye bahinduye guverinoma, hari kuwa gatatu bavanyeho Minisitiri w'intebe noneho mbona kuri za Twitter; ndavuga nti c'est pas possible, nabonaga Murekezi twabanye muri guverinoma bwa mbere kandi numva ko na Cabinet yose ihinduka…uwo mugoroba Secretariat ya RPF irampamagaye, barambwira ngo reka tuguhe Ngarambe (Umunyamabanga mukuru wa RPF) muvugane…[Ku mutima] nti yampayinka!!! Ambaza niba ndi i Kigali, nti 'oya' ndi Nigeria, ambaza niba nahita mugeraho, buracya kuwa kane bashyiraho Guverinoma ndi muri Nigeria numva basomye izina ryanjye…'

    Ubwo Amb.Habineza yasubizwaga muri Guverinoma(Nyakanga 2014), Joseph Habineza yishimiwe bidasanzwe n'abanyapolitike bari bitabiriye umuhango wo kurahira kwa Minisitiri w'intebe Anastase Murekezi n'abari bagize Guverinoma nshya.

    Abajijwe uko yakiriye kumva mu nteko yose bishimye agaruwe muri Guverinoma,Amb.Habineza yagize ati 'Jyewe nabaye surprised (Naratunguwe) ntabwo nari nzi ko abantu banyishimira kuriya, narumiwe, byarantangaje cyane ariko ndavuga nti; iyi ni challenge ya hatari! Kuko Urukundo n'urwango ni ibintu byegerana cyane, bishobora guhinduka igihe icyo ari cyo cyose. Naravuze nti muzambabarire ntimuzangenze nkuko Abayuda bagize Yezu, baramwishimiye basasa imyenda yabo hasi ariko ni nabo bamubambye…'

    Amb.Joseph Habineza wari inzobere mu bijyanye n'Ikoranabuhanga,yabonye impamyabumenyi muri Informatique yakuye muri Kaminuza ya Montpellier mu Bufaransa.

    Ubwo yaganiraga n'Ikinyamakuru ISIMBI muri 2019,Amb.Joe Habineza yagize ati 'Njyewe nkunda ibibazo kuko iyo ibibazo bije ushaka ibisubizo.'

    Yavuze ko umuntu adakwiriye guhora arakaye kuko bisazisha umuntu vuba, gusa yongeyeho ko mu kazi ukwiriye kugira igitsure rimwe na rimwe.

    Amb.Habineza Joe yavuze ko nta muntu ukwiriye gucika intege kuko ibiba mu buzima ari isomo. 'Mu gihe ukiriho ntukihebe kandi buri munsi wose haranira kunguka ikintu gishya.'

    Mu buzima busanzwe Joseph Habineza yakundaga Siporo cyane cyane agakina Tennis, yari Umufana w'ikipe ya Arsenal.


    Amb.Joseph Habineza n'umuryango we bari kumwe na Perezida Kagame

    Source : https://umuryango.rw/amakuru/mu-rwanda/politiki/article/ibyaranze-nyakwigendera-joseph-habineza-muri-politiki-y-u-rwanda-nuko-yahuye-na