Webrwanda Backend

Category: Uncategorized

  • ABANYONZI BADUKORESHA IMPANUKA BABISHAKA'Abashoferi' #rwanda #RwOT

    Bamwe mu batwara ibinyabiziga bya moto n'imodoka bo mu mujyi wa Kigali bavuga ko hari bamwe mu batwara abantu n'ibintu ku magare babakoresha impanuka ku bushake kugirango babakureho amafaranga ngo kuko bo bafatwa nk'abanyamaguru.

    Aba bamotari n'abashoferi barasaba ko abatwara amagare bakigishwa amategeko y'umuhanda bakanahabwa ibyangombwa bajya bakora amakosa bagahanwa nkuko utwaye ikindi kinyabiziga ahanwa.

    Umwe yagize ati' Bimaze kumbaho inshuro esheshatu nkabavuza, nkabishyura kuko ntakundi nabigenza ngo nuko ntwara moto ifite moteri.'

    Undi nawe ati' Hari mugenzi wange wamukojejeho indorerwamo aba arahwereye, yumvise amafaranga arazanzamuka.'

    Undi ati' Babajyane kwiga amategeko y'umuhanda babahe icyangombwa icyo aricyo cyose kuko birakabije.'

    Nabajije abanyonzi iby'iki kibazo bahakana ibyo bashinjwa na bagenzi babo, ngo nukoze ikosa arikora kubera kutamenya amategeko y'umuhanda ariko ngo babaye bayigishijwe byafasha mu kugabanya impanuka zo mu muhanda.

    Umwe yagize ati' Iyo utwara uzi n'amategeko bigufasha kwirinda impanuka kuko uba uzi icyo amategeko avuga…'

    Naho mugenzi we ati' Hari abakora amakosa kubera kutamenya amategeko y'umuhanda ariko tubaye tuyigishijwe byadufasha cyane.'

    Umunyonzi

    Nikobisanzwe André Glomico inzobere mu mikoreshereze y'umuhanda asanga igisubizo kirambye ari uko habaho ahantu hagenewe abatwara amagare kuburyo ubirenzeho ahanwa ariko ngo nanone bisaba igihe kubaka bene ibyo bikorwaremezo.

    Iyi nzobere yagize iti' Bagomba kwiga amategeko y'umuhanda ariko nizo nzira nazo zirakenewe….banagombye kugira n'ibimenyetso biranga icyo batwaye kuko nka nijoro ujya kubona ukabona umunyegare aragenda nta tara afite, nta matara ndangacyerekezo, nta matara aranga ko agiye guhagarara nta na kimwe…'

    NIKOBISANZWE Andre Glomico/Usobanukiwe imikoresheze y'umuhanda

    Twagerageje kuvugana na Polisi y'u Rwanda kuri iki kibazo ntibyadukundira ariko ubwo Minisitiri w'Ibikorwaremezo Amb. Claver Gatete yasobonuriraga abadepite umushinga w'itegeko rigenga gutwara abantu n'ibintu mu muhanda no mu mazi, yavuze ko muri uwo mushinga uri gutegurwa, harimo ingingo zireba abatwara amagare.

    Yagize ati 'Ku bijyanye n'amagare bazashyiraho icyemezo cyerekana ko utwara igare afite ubumenyi bw'ibanze ku mategeko y'umuhanda. Amagare ni uburyo bwo gutwara abantu n'ibintu bwihariye, kugira ngo habeho umutekano w'abatwara amagare birasaba kugira ngo hajyeho amabwiriza muri rya tegeko twababwiye rya Traffic rizaza.'

    Amb. Claver Gatete /Ministri w'ibikorwa remezo

    Ubusanzwe bisaba gusa kuba umuntu azi gutwara igare n'ibyangombwa bya Koperative kugira ngo abone uburenganzira bwo gutwara abantu n'ibintu ku igare mu mihanda y'umujyi wa Kigali.

    Abatwara ibindi binyabiziga bavuga ko abanyonzi bagomba no kuba bafite ibyangombwa byo gutwara kugirango bagabanye impanuka zo mu muhanda bagiramo uruhare cyane ko amagare ari kwiyongera umunsi ku wundi mu mujyi wa Kigali.

    CYUBAHIRO GASABIRA Gad

    The post ABANYONZI BADUKORESHA IMPANUKA BABISHAKA'Abashoferi' appeared first on Flash Radio TV.

    Source : https://flash.rw/2021/11/10/abanyonzi-badukoresha-impanuka-babishakaabashoferi/?utm_source=rss&utm_medium=rss&utm_campaign=abanyonzi-badukoresha-impanuka-babishakaabashoferi

  • Abafite ubumuga bw'uruhu baratabaza Leta kubw'ihohoterwa rishingiye ku gitsina #rwanda #RwOT

    Umuryango w'Abafite ubumuga bw'uruhu mu Rwanda uratabaza Leta kubw'ibikorwa byo gufata ku ngufu abagore n'abakobwa bafite ubumuga bw'uruhu bikorwa n'abagabo bafite imyumvire ko kuryamana n'ufite ubumuga bw'uruhu Bizana amahirwe.

    Gusambanya ku gahato abagore n'abakobwa bafite ubumuga bw'uruhu bikorwa n'ababeshywe n'abapfumu ko bitanga  amahirwe ,ni kibazo cyakunze kuvugwa muri ibi bimwe mubihugu bityo mu karere  biturutse ariko kurui iyi nshuro no mu Rwanda iyi myumvire mibi yarahageze aho bamwe mubagabo bafata kungufu abagore n'abakobwa bafite ubumuga bw'uruhu ngo bashaka amahirwe nkuko Nikodeme HAKIZIMANA ukuriye umuryango w'abafite ubumuga bw'uruhu abisobanura.

    Ati ' Mu nama twagiye tugirana n'abanyamuryango bafite ubumuga bw'uruhu  hirya no hino mugihugu bagiye bagaragza ko abagore nabakobwa bahura n'ihohoterwa rishingiye kugitsina cyane abafite ubumuga bw'uruhu ,dukurikije uko batubwiye abvuga ko ababahohotera akenshi bashingira kukuba hari amakuru avuga ko ngo iyo uryamanye n'umukobwa ufite ubumuga bw'uruhu ugira amahirwe bigutera amashaba bikuvura indwara zidakira ibi akaba aribyo bituma bahohoterwa akenshi ibi bigira ingaruka kuko hari ababyaye kandi ababateye inda ntibabafashe kurera abo bana.'

    Hari bumwe mubuhamya bw'abafite ubumuga bw'uruhu bafashwe ku ngufu kandi ko byabagizeho ingaruka zikomeye.

    Ati ' Naringiye gusura musaza wanjye ubwo nabaga I rubavu ubwo nagezeyo ari kumugoroba kuko mbere imodoka ntabwo zakundaga kuboneka cyane ubwo rero butangira no kwira ,rero uwo musore babanaga yabonye musaza wanjye agiye guhaha utuntu ahita amfata ku ngufu tutabivuganye ubwo ahita anyataka gutyo ubwo mpita nsamiramo n'inda'.

    Undi ati ' hari umuhugu wabaga hepfo y'iwacu wenda nagiye gushaka n'ibyo banaryangononeho akajya amufata  akamusambanya noneho nza kuganiriza umwana kuko nkunda kuganira n'abana armbwira ngo runaka ngo ajya afata ikintu cye akagishyira mu cyanjye kandi ngo akambabaza arambwira njya kumubaza ngiye kumubaza ambwira nabi cyane icyo yakoze yahise ahamagara umugabo ,umugabo ambwira nabi cyane ngo ese ngo urabona icyo ari ikirori cyawe ngo urabona hari ugishoboye kuburyo yagisambanya'.

    Iki kibazo cyo gufata  ku ngufu abagore n;abakobwa bafite ubumuga bw;uruhu bikorwa nababeshywe ko bitanga amahirwe  kigaragazwa nk'igihangayikishije ndetse Umuryango uhuza abafite ubumuga bw'uruhu wasabi sosiyete nyarwanda guhaguruka bakakirwwanya bivuye inyuma.

    Ati 'Umuntu ufite ubumuga bw'uruhu ni umuntu nk'abandi kuryamana nawe ntibitera amahirwe ahubwo iyo uryamanye nawe igihe kitaragera uba umuhohoteye turasaba kandi n'inzego za Leta gukora ubukangurambaga abantu bafite ubumuga bw;uruhu cyane abagore n'abakobwa baracyitinya bafite ubwoba amateka twabayemo arashaririye umuryango nyarwanda ntiwigeze utwakira nk'abantu uyu munsi umuntu wahohotewe ntashiobora kujya kuvuga ikibazo cye kuri Polisi usanga n'ubuyobozi bubabwira nabi'.

    Kugeza umubare w'abafiet ubumuga bw'uruhu mu Rwanda ntuzwi neza ariko imibare iheruka gukusanywa  umwaka ushize igaragza ko  hari abagerga 1238.

    The post Abafite ubumuga bw'uruhu baratabaza Leta kubw'ihohoterwa rishingiye ku gitsina appeared first on Flash Radio TV.

    Source : https://flash.rw/2021/11/10/abafite-ubumuga-bwuruhu-baratabaza-leta-kubwihohoterwa-rishingiye-ku-gitsina/?utm_source=rss&utm_medium=rss&utm_campaign=abafite-ubumuga-bwuruhu-baratabaza-leta-kubwihohoterwa-rishingiye-ku-gitsina

  • Haruna Niyonzima yashimiye abakinnnyi n'abatoza abamufashije kugera ku rutonde rwa “FIFA Century Club” #rwanda #RwOT

    Haruna Niyonzima usanzwe ari kapiteni w'Ikipe y'Igihugu 'Amavubi , waje ku rutonde rw'abakinnyi b'ibihe byose babashije gukinira ibihugu byabo byibuze imikino 100 izwi n'Ishyirahamwe ry'Umupira w'Amaguru ku Isi “FIFA Century Club”, ari mu byishimo bikomeye nyuma yo gushyirwa kuri urwo rutonde ,ashimira abakinnyi bakinanye n'abatoza bamufashije kugera kuri aka gahigo.

    Urutonde rwakozwe na FIFA tariki ya 1 Ugushyingo 2021 rugaragaraho abakinnyi batandukanye bakiniye ibihugu byabo byibuze imikino 100 barimo n'abasezeye gukina umupira w'amaguru.Kapiteni w'Amavubi, Niyonzima Haruna watangiye gukinira Amavubi mu 2006, ni we mukinnyi rukumbi w'Umunyarwanda uri kuri uru rutonde.

    Kuri Haruna Niyonzima, FIFA yagaragaje ko yakiniye Amavubi imikino mpuzamahanga 104, kuri iyi mikino hakaba hiyongeraho imikino 4 yakinnye na Zanzibar ariko ikaba itabarwa kuko iyo bigeze mu mikino mpuzamahanga iki gihugu cyivanga na Tanzania.

    Uyu mukinnyi FIFA igaragaza ko yavutse mu 1990, yagaragaye mu mikino ine u Rwanda rumaze gukina mu gushaka itike y'Igikombe cy'Isi cya 2022 mu gihe kandi yongeye guhamagarwa mu ikipe yitegura guhura na Mali na Kenya muri iki cyumweru, tariki ya 11 n'iya 14 Ugushyingo 2021.

    Haruna Niyonzima akaba yavuze ko ari iby'agaciro gakomeye gukinira Amavubi iyi mikino n'ubwo byari ibihe bitoroshye na gato.

    Ati 'kuva nkiri umwana, narotaga gukinira ikipe y'igihugu. Kuba umukinnyi na kapiteni w'ikipe y'igihugu ugakina imikino 104, ni icyubahiro gikomeye ndetse ugaterwa ishema n'iyo ugeze kuri uru rwego. Ndishimye kuba narabaye mu ikipe y'igihugu igihe kingana gutya. Byari ibihe byiza n'ibibi ariko byose ni ibigize ubuzima bw'umupira.'

    Yakomeje avuga ko atazi igihe asigaje mu kibuga uko kingana ariko ngo aracyishimira gufasha abakinnyi barumuna be, yashimiye abakinnyi n'abatoza babanye mu ikipe y'igihugu.

    Ati 'Sinzi igihe nsigaje uko Kingana, gusa ndakishimira kuza gufasha barumuna banjye, nifuriza kugera ku byiza Abanyarwanda bifuza banakwiriye twe tutagezeho. Abakinnyi twakinanye mu ikipe y'igihugu mwarakoze, n'abatoza mwampaye aya mahirwe ndabashimira.'

    Haruna Niyonzima wakiniye Amavubi kuva 2006, mu minsi ishize yari yatangaje ko igihe u Rwanda rwari kubona itike ya CAN 2021 yari gusezera mu ikipe y'igihugu, nyuma y'uko itabonetse yavuze ko mu gihe abatoza bazamwereka ko bakimukeneye mu kibuga we yiteguye gukomeza gukorera u Rwanda rwamwibarutse.

    Source : https://umuryango.rw/imyidagaduro/imikino/article/haruna-niyonzima-yashimiye-abakinnnyi-n-abatoza-abamufashije-kugera-ku-rutonde

  • Iserukiramuco rya “HAMWE”rizanye undi mwihariko ku nshuro yaryo ya 3 #rwanda #RwOT

    Iri serukiramuco ngarukamwaka ribera mu Rwanda, riratangira uyu munsi tariki 10 Ugushyingo 2021 rizasozwe tariki 14 Ugushyingo 2021 aho rizaba imbonankubone mu bice bitandukanye bigize umujyi wa Kigali hanakoreshwe ikoranabuhanga mu rwego rwo kwirinda ikwirakwira rya Covid-19.

    Iri serukiramuco rya Hamwe ryitabiriwe n'abatuye impande zose z'isi aho rigizwe n'ibitaramo bitangaje,abahanga mu gukina filimi,gufotora n'amarushanwa yo kwandika inkuru. Umuhango wo gufungura iri serukiramuco uraba uyu munsi saa kumi.

    Kuri uyu wa Kabiri,tariki ya 09 Ugushyingo 2021,Kaminuza ya UGHE yasohoye itangazo rigenewe abanyamakuru, rivuga ko yateguye Hamwe Festival ku nshuro ya gatatu ndetse ivuga izahuza abahanzi mu ngeri zitandukanye n'abatanga ibiganiro baturuka mu bihugu 13 byo hirya no hino ku isi.

    Isobanura intego ya Hamwe Festival,UGHE yagize iti“Muri UGHE twizera ko kubaka ibiraro bihuza inganda zitandukanye ari ngombwa, atari uguteza imbere gusa kubona serivisi nziza mu buvuzi ku isi yose gusa ahubwo no gukuraho ikinyuranyo hagati y'abahiriwe n'abatarahiriwe.

    Ni muri ubwo buryo twatekereje Iserukiramuco rya Hamwe nk'urubuga ruhuza urwego rw'ubuzima n'urw'Ubuhanzi . Uyu mwaka,ibirori bizaba ari imvange, bizabera ahantu hatandukanye hafi ya Kigali, ndetse no kuri Interineti [online].”

    Ku nshuro ya mbere,Hamwe Festival yabaye muri 2019,yari igamije kureba ku ruhare rwo kuzuzanya kw'Inganda ndangamuco n'ubuzima.

    Mu 2020, ryabaye ku nshuro ya kabiri guhera tariki 11 Ugushyingo 2020 kugera tariki 15 Ugushyingo 2020, hifashishijwe ikoranabuhanga haganirwa ku buzima bwo mu mutwe n'uko ubuhanzi bwakifashishwa mu buvuzi cyane cyane mu buzima bwo mu mutwe. Iri serukiramuco ryarebwe n'abantu barenga 26,000.

    Ku nshuro yaryo ya gatatu, Iserukiramuco rya Hamwe rigamije gutekereza ku mpinduka zishingiye ku mibereho zabaye kuva icyorezo cya SRAS-COVID-2 (COVID-19) cyatangira kwaduka mu mpera za 2019.

    By'umwihariko, uburyo izi mpinduka zagize ingaruka ku mibereho yacu n'uburyo bwacu bw'imibereho n'ubusumbane burimo.

    Iri serukiramuco ryatumiye abahanzi,abanyeshuri, abareberera rubanda, inzobere mu by'ubuzima baganire ku buryo COVID-19 yateje ibibazo bitandukanye nk'impinduka mu muryango, kwita kubasaza,gutera inkunga ubuvuzi, ubufatanye bw'abaturage, imisoro, kwimuka, ubuzima bwo mu mutwe, imihindagurikire y'ikirere,
    urusobe rw'ibinyabuzima kimwe n'akamaro gakomeye k'ubuhanzi.

    Hamwe Festival yahurije hamwe abatanga ibiganiro n'abahanzi baturutse mu bihugu 13 kandi izagaragaramo ibintu bitandukanye mu minsi 5, birimo ibiganiro mpaka,ibiganiro byateguwe n'abahanga mu nzego z'ubuzima,kwigaragaza kw'abahanzi baturutse hirya no hino ku isi, kwerekana amafilime, amarushanwa y'inkuru ngufi, hamwe n'imurikagurisha.

    Abahanzi nka Deo Munyakazi, umusizi Manzi le Poete, Kivumbi King, Mutiganda wa Nkunda uzamurika filime ye n'abandi bo mu bindi bihugu bitandukanye bazaririmba muri iri serukiramuco.

    Source : https://umuryango.rw/imyidagaduro/umuziki/article/iserukiramuco-rya-hamwe-rizanye-undi-mwihariko-ku-nshuro-yaryo-ya-3

  • Ibyo wamenya ku burenganzira bw'abagiye kunyongwa hirya no hino ku Isi #rwanda #RwOT

    John Ramirez wakatiwe urwo gupfa ntashaka gupfa ari wenyine, arashaka gupfa arimo ahabwa ihumure, arambitsweho ibiganza na pasitoro we.

    Ariko ubwo busabe bwe bwanzwe na Texas Department of Criminal Justice none ubu umwanzuro wa nyuma ku cyifuzo cye uri mu bindi biganza — Urukiko rw'ikirenga rwa Amerika.

    Uyu mugabo w'imyaka 37 wahoze ari umusirikare, yakatiwe urwo gupfa kubera kwiba akanakomeretsa bikomeye nyiri iduka mu 2004.

    Avuga ko 'isengesho,indirimbo, no gukorwaho n'umuntu' mu gihe cyo gupfa ari igice gikomeye mu kwemera kwe kwa gikristu.

    Yumva ko ari uburenganzira bwe ko pastoro we amukoreraho iyo mihango bwa nyuma, ariko abategetsi ba Texas ibyo ntibabikozwa. Bumva ko ibyo arimo ari ugutinza kunyongwa kwe azanamo ibihato 'n'umukino w'amaringushyo mu by'ukwemera'.

    Gereza ya Texas State Penitentiary iri i Huntsville, aho icyumba cyo gutangiramo igihano cy'urupfu kiri muri iyi leta

    Gereza ya Texas State Penitentiary iri i Huntsville, aho icyumba cyo gutangiramo igihano cy'urupfu kiri muri iyi leta

    Yahise abarega, ko bari guhonyora uburenganzira bwe bw'ibanze mu kwemera, ubucamanza nabwo bwemeye kwakira ikirego cye, bituma kumwica byari biteganyijwe tariki 08 z'ukwezi kwa cyenda byigizwayo kugeza urukiko rufashe umwanzuro muri iki cyumweru.

    Inyongwa rya Ramirez ni irya gatatu risubitswe n'Urukiko rw'ikirenga mu myaka itatu, kubera uburyo abanyamadini bemererwa kuba bari aho abakatiwe icyo gihano bari igihe cyo kubica.

    Mu 2019, abantu benshi barinubye nyuma y'uko imfungwa y'umusilamu yishwe yangiwe kuba iri kumwe na imam we ariko ukwezi kumwe nyuma yaho ubusabe nk'ubwo bukemererwa imfungwa y'umu-Buddhist.

    Ariko imanza ku myemerere n'ubundi burenganzira ku bagiye guhabwa urupfu ntabwo ari umwihariko kuri Amerika.

    Ku isi, mu bihugu aho igihano cy'urupfu cyemewe, hagiye haba impaka n'ibiganiro ku bifatwa nk'ibyemewe — ariko abategetsi ntabwo buri gihe babifata kimwe.

    Mu Ubuyapani, abantu babiri bakatiwe urwo gupfa, mu cyumweru gishize baregeye urukiko nyuma yo kubwirwa ko bazicirwa umunsi umwe.

    Muri icyo gihugu, imfungwa zimenyeshwa habura amasaha macye gusa ngo zicwe zimanitswe, ariko ubu impirimbanyi z'uburenganzira zivuga ko uko kubwirwa habura gato 'bitarimo ubumuntu na bucye' kandi byica ubuzima bwo mu mutwe.

    Kuwa kane ushize, abo bagabo baregeye urukiko rwa Osaka, ikirego bikekwa ko ari icya mbere, bavuga ko kubwirwa habura gato bitabaha igihe cyo kwitegura mu mutwe no gutekereza byimbitse ku iherezo ry'ubuzima bwabo.

    Kwica mu ibanga biri mu biteza sakwe sakwe y'amahanga kuri Iran.

    Mu manza z'ubwicanyi muri Iran, aho abaregwa bakatirwa qisas (igihano cyo kwicwa), abantu bo mu miryango yabo nibwo ubwabo bashishikarizwa guha icyo gihano umuntu wabo.

    Uwakatiwe icyo gihano ashobora no kubabarirwa kikavanwaho — ibi nibyo byagejeje ku nkuru idasanzwe aho umugore uri mu gahinda k'umwana we, ubwo yari ahagaze imbere y'umugabo wamwishe agiye guhanishwa urwo gupfa, yamukuye mu ijosi umugozi bari bagiye kumunyongesha akamubabarira.

    Itsinda rito ry'abigaragambya bamagana igihano cy'urupfu ku rukiko rw'ikirenga rwa Amerika

    Abanyamerika benshi bashyigikiye igihano cy'urupfu kurusha abacyamagana, nk'uko ubushakashatsi bubivuga

    Uwo mugore na nyina w'uwo mugabo wamwiciye umwana, bahise bahoberana imbere y'imbaga yari yakoranye ngo irebe uko uwo mugabo anyongwa.

    Itegeko rya Iran rivuga ko abahagarariye uwakatiwe icyo gihano bamenyeshwa ibyo kwicwa mbere y'amasaha 48, ariko impirimbanyi zivuga ko ibi bidakorwa buri gihe, cyane cyane ku manza za politiki n'umutekano.

    Birenzeho, ikigo cya Iran giharanira uburenganzira bwa muntu kivuga ko imigirire iri hose mu gihugu ari ukubanza gufunga iminsi myinshi abakatiwe icyo gihano bari bonyine mbere yo kwicwa, kandi bagafungwa ibiganza biboshye.

    Hagati aho, muri Singapore hari kuvugwa cyane umugabo ugomba kunyongwa ufite igipimo cy'ubwenge (IQ) cya 69, igipimo cyemerwa henshi nk'icy'umuntu ufite ubumuga mu bwenge.

    Nagaenthran Dharmalingam yafashwe mu 2009 aregwa kwinjiza muri Singapore garama 42 za heroin, yagombaga kwicwa none kuwa gatatu mu gitondo, ariko ibye byateje uburakari bidasanzwe muri iki kirwa aho igihano cy'urupfu ubusanzwe gishyigikiwe cyane.

    Umunyamategeko wa Dharmalingam n'amatsinda y'impirimbanyi ari kumurengera, bavuga ko Singapore iri guhonyora itegeko mpuzamahanga ribuza kwica umuntu ufite ubumuga mu mutwe.

    Abo, banyuze mu byiciro byose by'ubucamanza n'ubujurire, ndetse n'inyandiko ihuriweho na benshi isaba perezida kumuha imbabazi ntacyo yagezeho.

    Leta ya Singapore ikomeye ku cyemezo cyayo, ko uyu mugabo w'imyaka 33 'yari azi neza ibyo yakoze kandi atigeze atakaza ubushoshozi ku cyiza n'ikibi ubwo yabikoraga.'

    Umujinya uri kwihembera kandi mu Misiri kubera uburyo bwo gutanga iki gihano.

    Nubwo itegeko rirengera umwana rivuga ko abana bose bari munsi y'imyaka 18 bakoze icyaha gihanwa batagomba 'guhanishwa igihano cy'urupfu, gufungwa burundu, cyangwa imirimo y'agahato', raporo ya Reprieve (ikigo mpuzamahanga cy'impirimbanyi cyiyobowe n'abanyamategeko mpuzamahanga) ivuga ko nibura abana 17 mu Misiri bishwe banyonzwe kuva mu 2011.

    Reprieve ivuga ko abashinjacyaha bakoresha icyuho mu mategeko bagashyira abana mu nkiko z'abakuru, kuko itegeko ryemera ko abarengeje imyaka 15 bashobora kureganwa n'abantu bakuru.

    Abigaragambya bafashe ibyapa bisaba guhagarika kwica Nagaenthran Dharmalingam

    Abigaragambya bafashe ibyapa bisaba guhagarika kwica Nagaenthran Dharmalingam

    Muri iki cyumweru ubwo Urukiko rw'ikirenga rwa Amerika rufata umwanzuro kuri Ramirez, rurasabwa kwibanda ku buryo umuntu yanyongwa mu buryo butabangamiye uburenganzira bwo kwemera.

    Gusa impaka hagati y'ihame ry'agaciro ka muntu n'imigirire mu gutanga igihano cy'urupfu ni ibintu bigarukwaho cyane ku isi.

    Nibyo kandi ko izo mpaka zishobora kwaguka kurushaho ku burenganzira bw'abagabo bose n'abagore baba bagiye guhabwa igihano cy'urupfu.

    SRC:BBC

    The post Ibyo wamenya ku burenganzira bw'abagiye kunyongwa hirya no hino ku Isi appeared first on IRIBA NEWS.

    Source : https://iribanews.rw/2021/11/10/ibyo-wamenya-ku-burenganzira-bwabagiye-kunyongwa-hirya-no-hino-ku-isi/

  • Abagore gusa: Dore impamvu ari byiza kwambara… – #rwanda #RwOT

    Abakobwa cyangwa abagore bambara amapantaro kubera impamvu zabo bwite zihariye ariko zifite aho zihuriye n’ubuzima. Abandi bakambara amapantaro kubera kwigana no kureberanaho. Abakobwa bamwe batambara amapantaro abenshi bahura n’ingaruka zimwe na zimwe, dore ko hari aho bagera bakagirwa inama yo kwambara n’utwenda tw’imbere tubafashe. Kwambara ipantaro ku gitsina gore ni byiza kubera ko bamwe mu bagabo cyangwa abasore b’ubu nta muco bafite.

    Kwambara ipantaro bishobora kukurinda ibisambo cyangwa bikakurinda gukoreshwa ingeso mbi mu gihe uri ahantu utizeye. Bamwe mu bagabo cyangwa abasore bakoresha ingano y’ikanzu cyangwa ijipo wambaye bagashimisha imitima yabo by’akanya gato.

    Amafoto mabi ushobora gufatwa ashobora gukoreshwa nabi ku by’inyungu z’amafaranga bahabwa nyamara wowe nta ruhare wabigizemo. N’ubwo bimeze bityo, abagore cyangwa abakobwa bagirwa inama yo kutajya bambara amapantaro abaziritse cyane ku by’impamvu z’ubuzima nanone.

    Ese wajya mu mikino ngorora mubiri cyangwa indi myitozo wambaye ikanzu? Ntabwo byakunda, ni byiza gushaka ipantaro yabigenewe, ukajya ugorora umubiri wawe. Bamwe mu bagore batambara amapantaro nta n’ubwo bakora imyitozo ngororamubiri nyamara nayo ikenewe cyane. Menya aho wambara ipantaro n’impamvu ishobora gutuma uyambara, mu gihe gikwiye.

    Inkomoko: Opera NEws

    Source : https://inyarwanda.com/inkuru/111271/abagore-gusa-dore-impamvu-ari-byiza-kwambara-amapantaro-gusa-111271.html

  • APR FC igiye kwipima n’amakipe 2 #rwanda #RwOT

    Nyuma y’iminsi ine basubukuye imyitozo, ikipe y’ingabo z’igihugu igiye gukina imikino ibiri ya gicuti mu rwego rwo kwitegura RS Berkane bazakina muri CAF Confederation Cup na shampiyoma izakomeza mu cyumweru gitaha.

    APR FC izakina n’ikipe ya Gasogi ku munsi w’ejo ndetse n’ikipe ya na Gorilla mu FC bazakina ku wa Cyumweru.

    Ikipe y’ingabo z’igihugu izakina umukino wa mbere wa gicuti na Gasogi ejo kuwa Kane tariki 11 Ugushyingo saa y’ine (10h00) ku kibuga cya Shyorongi .

    Nyuma y’uwo mukino APR FC ikaba igomba gukomeza imyitozo yitegura undi mukino wa gicuti uzabahuza na Gorilla ku Cyumweru tariki 14 Ugushyingo kuri stade ya Kigali i Nyamirambo.

    APR FC igiye gukina imikino ibiri ya gicuti

    Source : http://isimbi.rw/siporo/article/apr-fc-igiye-kwipima-n-amakipe-2

  • Sobanukirwa byinshi ku ndwara y’umwingo #Rwanda #RwOT via @kigalitoday #rwanda #RwOT

    Ubushakashatsi bwagaragaje ko indwara y’umwingo yibasiye abatuye isi mu mwaka wa 2004 aho abagera kuri 15,8 % byabo bagezweho na wo, bitewe n’igabanuka ry’umunyu ngugu wa iyode ryagaragaye ku bantu bagera kuri miliyari 2 na miliyoni 200.

    Nk’uko tubisanga mu gitabo cyitwa Anatomy and Physiology, cyanditswe na Stephen Tate, bavuga ko umwingo urimo amoko abiri.

     Ubwoko bwa mbere bw’umwingo buterwa no kubura imyunyu ngugu ya iyode mu maraso, ibi bigatuma iyo mvubura ibyimba ikaza inyuma (exterior of the neck) cyangwa ikagana mu ijosi imbere (interior in the neck).

     Ubwoko bwa kabiri bwo ngo buterwa no kwiyongera kw’ imisemburo ya thyroxine mu maraso. Icyo gihe na bwo iyo mvubura irabyimba n’ amaso agaturumbuka (toxic goiter).

    Ibimenyetso bigaragara ku murwayi w’ umwingo:

     Kugira ubushyuhe bwinshi, haba mu gihe hakonje cyangwa hashyushye, bitewe n’uko ya misemburo yabaye myinshi bigatuma umubiri ukora cyane.
     Kugira isesemi no gusonza cyane.
     Kunanirwa guhumeka no kumira
     Kwitsamura kenshi no gukorora
     Kugira ijwi risaraye

    Hari ibimenyetso byihariye biboneka bitewe n’ubwoko bw’umwingo.
    Iyo ari umwingo watewe n’ikorwa ry’umusemburo wa thyroxine mwinshi (Hyperthyroïdie)

     Umurwayi atakaza ibiro cyane (kunanuka)
     Gutera cyane k’umutima
     Gususumira
     Kumva ufite ubwoba no kurakazwa n’ubusa
     Kugira icyocyere no kubira ibyuya mu buryo bukabije
     Gucibwamo, n’ibindi.

    Mu gihe umwingo watewe n’ikorwa ry’umusemburo muke wa Thyroxine (Hypothyroïdie) umurwayi agaragaza ibi bimenyetso:

     Kubyimba mu maso bigendana no kwiyongera ibiro mu buryo budasobanutse (kubyibuha)
     Imikorere mibi (kugenda buhoro) y’ubwonko bishobora kuganisha ku kwiheba (Depression)
     Guhorana umunaniro
     Kwituma impatwe (Constipation),
     Gutera buhoro k’umutima

    Icyakora ngo iyo umwingo ukiri muto nta bimenyetso ugaragaza, ahubwo bigenda biboneka uko ugenda ukura buhoro buhoro.

    Abakunze kwibasirwa n’indwara y’umwingo

    • Abagore barengeje imyaka 50
    • Kuba mu muryango harimo uwigeze kuwurwara
    • Gukoresha imiti imwe n’imwe,
    • Abagore batwite

    Ese Umwingo uravurwa ugakira?

    Umwingo ni indwara ikira bitewe n’urugero igezeho cyangwa n’icyawuteye. Urugero mu gihe ufite umwingo uterwa no kubura imyunyu ngugu ya Iyode, kwa muganga bashobora gushishikariza umurwayi kurya amafunguro akungahaye ku myunyu ngugu ya iyode ndetse no kugabanya amafunguro akennye kuri iyo myunyu ngugu.

    source : https://ift.tt/306nGeP

  • Umuyobozi w’Intara y’Iburasirazuba n’uwa Polisi muri iyo Ntara baganirije abamotari ku kwirinda ibyaha #Rwanda #RwOT via @kigalitoday #rwanda #RwOT

    Guverineri Gasana yasabye abamotari kwirinda ibyaha
    Guverineri Gasana yasabye abamotari kwirinda ibyaha

    Mu kiganiro cyatanzwe na Guverineri Gasana, yakanguriye abamotari kwirinda ibikorwa bikunze kubaranga byo kwinjiza mu Rwanda ibicuruzwa bya magendu, ibiyobyabwenge n’ibindi bicuruzwa bitemewe mu Rwanda. Yabagiriye inama yo kubireka ndetse bakajya bihutira gutanga amakuru igihe hari abo babonye bajya muri ibyo bikorwa.

    Yagize ati “Bamwe muri mwe twabazanye muri iyi nama bafatiwe mu bikorwa bitemewe ndetse bigize ibyaha nko kwinjiza mu Rwanda ibiyobyabwenge, ibicuruzwa bya magendu n’ibindi bicuruzwa bitemewe. Bamwe muri mwe mutwara abantu bambuka imipaka bitemewe n’amategeko, mukirengagiza ko mushobora kwinjiza mu gihugu abagizi ba nabi.”

    Yakomeje akangurira abo bamotari kwibumbira mu makoperative mu rwego rwo kunoza imikorere yabo no gutanga serivisi nziza, kwirinda ababashukisha amafaranga nyamara bikarangira bafatiwe mu byaha bagafungwa imyaka myinshi, yabagiriye inama yo gukorera amafaranga meza atarimo ibyaha.

    CP Emmanuel Hatari mu kiganiro cye yagarutse kuri bamwe mu bamotari batwara moto badafite ibyangombwa, abagendera ku muvuduko ukabije. Yanabibukije gukomeza kubahiriza amabwiriza yo kwirinda COVID-19 ntaho yagiye.

    Yagize ati “Hari bamwe mu bamotari bajya bafatirwa mu byaha byavuzwe haruguru ugasanga nta n’ibyangombwa bafite bibemerera gutwara ibinyabiziga (Moto), abandi bafatwa bagendera ku muvuduko ukabije bakanateza impanuka. Ibi byose tubagira inama yo kubicikaho mugahesha agaciro umwuga wanyu mwubahiriza amategeko.”

    Muri ibi biganiro harimo bamwe mu bamotari baherutse gufatwa barimo kwinjiza mu Rwanda ibicuruzwa bitemewe. Batanze ubuhamya bakangurira bagenzi babo kubyirinda kuko biteza ibibazo birimo no gufungwa.

    Uwitwa Gakunde Theo wo mu Murenge wa Mimuri, tariki ya 04 Ugushyingo 2021 yafashwe atwaye inzoga zitemewe zitwa Maisha Bola. Yafatiwe mu Murenge wa Tabagwe azijyanye mu Murenge wa Mimuri, akicuza ibyo yakoze akangurira bagenzi be kubyirinda.

    Yagize “Umuntu yampaye ikiraka cy’amafaranga ibihumbi bitatu ngo njye ku mupaka kumuzanira inzoga zitemewe. Nageze mu nzira abapolisi baramfata ubu ndafunze, moto yanjye yarafunzwe kandi nzatanga amande. Ndicuza ibyo nakoze binyuranyijwe n’amategeko nkanagira inama bagenzi banjye kubyirinda.”

    CP Emmanuel Hatari yibukije abamotari kwirinda gutwara badafite ibyangombwa
    CP Emmanuel Hatari yibukije abamotari kwirinda gutwara badafite ibyangombwa

    Uwitwa Bazibaza na we avuga ko aherutse gufatirwa mu bikorwa byo kugenda imbere y’abatwaye ibicuruzwa bya magendu akagenda abacungira ahari abapolisi. Avuga ko yaje gufatirwa muri ibyo bikorwa arabyicuza akabisabira imbabazi.

    Yagize ati “Nahawe ikiraka cyo guhembwa amafaranga ibihumbi bitanu nkagenda imbere y’abantu bahetse ibicuruzwa bya magendu. Nagendaga mfite telefoni nkagenda mbwira abafite ibicuruzwa ahari abapolisi, umunsi mfatwa nari kumwe n’abantu batatu bari inyuma yanjye nko muri metero 300, nabanje gucika bariyeri ya mbere yariho abapolisi mpita ntanga amakuru baba bantu bari inyuma basubira inyuma baracika, nageze imbere ku yindi bariyeri abapolisi baramfata.”

    Bazibaza yakomeje avuga ko ibikorwa yarimo atari byiza, avuga ko bisa nko kugambanira Igihugu. Yagiriye inama bagenzi be kwirinda kuzagwa mu mutego nk ‘uwo yaguyemo kuko ubu arafunzwe na moto ye irafunzwe kandi agomba no gutanga amande.

    Mu gihe cy’amezi atatu gusa mu Karere ka Nyagatare hafatiwe abamotari 28 bari batwaye ibicuruzwa bya magendu n’abantu barimo kwambuka umupaka binyuranijwe n’amategeko, ubu bukangurambaga burakomereza no mu tundi turere tugize Intara y’Iburasirazuba.

    source : https://ift.tt/3wzMsA1

  • G.Buffet akiva mu Rwanda kuganira na P.Kagame yahise ajya Uganda anabonana na Museveni #rwanda #RwOT

    Ku cyumweru tariki indwi Ugushyingo 2021, Ibiro by’Umukuru w’u Rwanda byari byatangaje ko Perezida Paul Kagame yakiriye mu biro bye umunyemari Howard Graham Buffett bakagirana ibiganiro bigamije gushyira mu bikorwa imishinga isanzwe iri hagati y’umuryango w’uyu munyemari na Guverinoma y’u Rwanda.

    Ubutumwa bw’Ibiro by’Umukuru w’Igihugu bwari buherekejwe n’amafoto agaragaza Perezida Kagame na bamwe mu buyobozi bukuru bw’u Rwanda baganira n’uyu muherwe Howard Graham Buffett n’itsinda bari kumwe.

    Kuri uyu wa Kabiri tariki 09 Ugushyingo 2021, Perezida wa Uganda, Yoweri Kaguta Museveni na we yatangaje ko yahuye na Howard Graham Buffett usanzwe ari umunyemari n’umushoramari mu bijyanye n’imishinga y’ubuhinzi.

    Perezida Museveni yavuze ko mu byo baganiriye harimo kwagura ishoramari ry’imishinga y’ubuhinzi by’umwihariko iyo asanzwe afite muri kiriya gihugu.

    Mu minsi ibiri gusa, uyu muherwe agendereye ibihugu bibiri by’ibituranyi bimaze iminsi bitabanye neza, akaba yanahuye n’abakuru b’ibi bihugu byombi.

    UBWO YAKIRWAGA NA PEREZIDA KAGAME

    MURI UGANDA YAKIRWA NA MUSEVENI

    UKWEZI.RW

    Source : http://www.ukwezi.rw/mu-rwanda/3/G-Buffet-akiva-mu-Rwanda-kuganira-na-P-Kagame-yahise-ajya-Uganda-anabonana-na-Museveni