Category: Uncategorized

Yabitangaje mu ijambo yavuze ku gicamunsi cyo kuri uyu wa mbere tariki ya 27 Ukuboza 2021 rigaragaza uko Igihugu gihagaze.

Mu ijambo rye, Perezida Kagame yavuze ko Igihugu gihagaze neza muri rusange. Ko uyu mwaka ubaye uwa kabiri usojwe Igihugu gihanganye n'icyorezo cya Covid-19.

Yavuze ko byasabye ko igihugu cyiga uburyo bushya bwo guhangana n'iki cyorezo cyadutse mu Bushinwa mu mpera za 2019. Yashimye  Abanyarwanda uruhare bakomeje kugira mu mibereho ndetse n'iterambere ry'igihugu mu bijyanye no guhangana n'iki cyorezo.

Umukuru w'Igihugu, yavuze ko u Rwanda rwahanganye n'ibibazo binyuranye birimo nk'iby'ubuzima, umutekano n'ubukungu. Ko mu rugendo rwo guhangana na Covid-19, hari intambwe imaze guterwa, kuko kugeza ubu 80% by'abaturage bamaze guhabwa doze ya mbere y'urukingo uhereye ku bafite imyaka 12 y'amavuko.

Kagame ati 'Bumwe mu buryo bw’ingenzi twifashishije mu kurinda Abanyarwanda, ni ugukingira Igihugu cyose urukingo rwa Covid-19, kugeza ubu 80% by’abaturage bacu guhera ku bafite imyaka 12 kuzamura, bahawe nibura urukingo rumwe…'

Kagame yashimye abantu bose bakomeje kugira uruhare mu rugamba rwo guhangana n'iki cyorezo, harimo abaterankunga, ibihugu n'abandi.

Akavuga ko ku bufatanye n'abarimo sosiyete ya Bion Tech, mu 2022 mu Rwanda hazatangira gukorerwa inkingo za Covid-19 n'indi miti.

Ati 'Bitewe n’ibyemezo bishingiye ku bushishozi byafashwe muri uyu mwaka, ubukungu bw’u Rwanda bwariyongereye bishimishije. Kandi twizeye ko bizakomeza.'

Umukuru w'Igihugu, avuga ko mu kuzahura ubukungu, hashyizweho ikigega Nzahurabukungu cyashyizwemo miliyari zirenga 100 Frw cyafashije mu kongera kuzamura ubukungu bwashegeshwe n’iki cyorezo, cyane ubucuruzi bwibasiwe n'urwego rw'ubukerarugendo.

Yanagaragaje ariko ko hamaze gukusanywa andi mafaranga azakomeza gufasha mu kunganira ibikorwa nk'ibi birimo n'ishoramari mu gihugu.

Kagame yanashimye abasora bakomeje kugira uruhare mu iterambere ry'igihugu.  Ati 'Ndagira ngo nshimire abasora bakomeje kugira uruhare mu iterambere ry'igihugu, mu bukungu bw'u Rwanda n'ubwo hari icyorezo.'

Anavuga ko kuba ikoranabuhanga ryarimakajwe rigashyirwamo imbaraga, byatumye icyorezo cya Covid-19 kidakomeza guhagarika imikorere mu bihe bitandukanye. Igihugu nticyabohwa n'iki cyorezo.

Avuga ko urubyiruko rukwiye gukomeza gufatanyiriza hamwe mu guhanga udushya no gushakira 'ibisubizo ibibazo bitwugarijwe uyu munsi n'ejo hazaza'.

Umukuru w'Igihugu, avuga ko Covid-19 yagize ingaruka ku banyeshuri bituma amashuri mu bihe bitandukanye afungwa, ariko hishimirwa ko igihe cyageze agafungurwa, ndetse abanyeshuri bakora ibizamini.

Perezida Kagame yanagarutse ku matora y'abayobozi mu nzego z’ibanze yagiye asubikwa, ariko hishimirwa ko igihe cyageze agasubukurwa; asaba abayobozi gukomeza gushyira imbere kunoza serivisi baha umuturage.

Yavuze ko u Rwanda ruzakomeza kwihaza mu biribwa, ashima abahinzi bakomeje kwihangana muri ibi bihe bitoroshye bagakomeza imirimo. Agaragaza ko ubuhinzi bufatiye runini u Rwanda, kuko bwatanze 25% ku bukungu bw'Igihugu mu 2021.

Yavuze ko u Rwanda rukomeje kwihaza mu biribwa, kandi ko hari ibigega bihagije. Ati 'Ndagira ngo nshimire abahinzi bacu kuba barakomeje kwihangana muri ibi bihe.'

Akomeza avuga ko n'ubwo u Rwanda ruri mu bihe bitoroshye bya Covid-19, ariko muri uyu mwaka rwabashije kwakira ibirori n'inama birimo n'imikino ya BAL [Basketball Africa League].

Umukuru w'Igihugu, avuga ko u Rwanda ruzakomeza ubufatanye n'ibindi bihugu mu bijyanye n'umutekano, aho u Rwanda rugira uruhare mu kugarura umutekano mu bihugu bitandukanye hirya no hino.

Perezida yasabye Abanyarwanda gukomeza kubakira ku byagezweho, abifuriza umwaka mushya muhire wa 2022.

Perezida Kagame yagaragarije Abanyarwanda uko igihugu gihagaze

KANDA HANO UREBE IJAMBO RYOSE RYA PEREZIDA KAGAME

“>

Umwaka wa 2021 wabayemo imikino myinshi ugereranyije n'umwaka wari wabanje, waranzwe n'isubikwa ry'imikino kubera icyorezo cya Covid-19. Mu mupira w'amaguru, u Rwanda rwitabiriye imikino ya CHAN yabereye muri Cameroun nderse bakina n'imikino yo gushaka itike y'igikombe cy'Isi kizabera muri Qatar umwaka utaha wa 2022. U Rwanda rwakinnye imikino y'ijonjora ryo gushaka itike y'igikombe cya Afurika kizabera muri Cameroun mu ntangiriro z’umwaka utaha. Mu Rwanda kandi habaye shampiyona ya 2020-21 yakinwe amezi abiri gusa, ndetse hanatangira indi ubu igeze ku munsi wa 10.

Itsinda ry’Abanyamakuru ba siporo ku Inyarwanda, ryarebeye hamwe muri iyi mikino yose yakinwe mu 2021 rikora ikipe y'abakinnyi 11 bakiri bato bahiriwe n'uyu mwaka mu kibuga ndetse bamwe batangira kuba abakinnyi amakipe bakinira yubakiyeho.

Mu izamu: Ntwari Fiacre

Fiacre yakiniye Marine FC mu mwaka w'imikino 2020-21 ndetse yitwara neza byatumye asinyira ikipe ya As Kigali uyu mwaka w'imikino ugiye gutangira. Ntwari yakomerejeho no muri As Kigali ndetse atangira gukoreshwa mu ikipe y'igihugu Amavubi, hari n'imikino yabanje mu kibuga.

Nshimiyimana Emmanuel

Myugariro akaba na kapiteni wungirije wa Gorilla FC, ni umwe mu bakinnyi bakiri bato bahiriwe n'uyu mwaka turi gusoza. Emmanuel yazamukanye na Gorilla FC mu cyiciro cya mbere akaba yaranahamagawe mu ikipe y'igihugu y'abatarengeje imyaka 23.

Ishimwe Christian

Ishimwe ari mu mwaka we wa kabiri mu ikipe ya As Kigali yagezemo avuye muri Marine FC. Uyu musore kuva yagera muri iyi kipe, yatangiye kuba umukinnyi ngenderwaho nka nimero 3 byanatumye atangira kwitabazwa no mu ikipe y'igihugu Amavubi.

Niyigena Clement

Myugariro mu ikipe ya Rayon Sports ni umwe mu basore bakiri bato bitwaye neza muri uyu mwaka by’umwihariko muri shampiyona ya 2020-21 ndetse byanatumye atangira guhamagarwa mu ikipe y'igihugu Amavubi.

Buregeya Prince

Yagize shampiyona nziza mu 2019 aho yakinnye imikino hafi ya yose muri APR FC,  ariko nyuma aza kugira ikibazo cy'imvune byanatumye abura umwanya wo gukina kuko ikipe yari yarazanye abakinnyi bakomeye barimo Mutsinzi Ange na Manzi Thierry. Nyuma yaho aba basore bagendeye Buregeya yagarutse mu kibuga, ubu ni umwe mu bakinnyi bafatiye runini APR FC.

Mugisha Bonheur

Kuva mu ikipe ya Heroes akerekeza muri Mukura yaje no kwigaragaza ubwo iyi kipe yarwanaga no kutamanuka mu cyiciro cya kabiri, Mugisha yasoje umwaka w'imikino ahagaze neza ndetse byatumye agurwa na APR FC.

Ruboneka Bosco

Ari gukina umwaka we wa kabiri muri APR FC, gusa ubu ni umwe mu bakinnyi ngenderwaho. Ruboneka yatangiye no guhamagarwa mu Amavubi n'ubwo atabonaga umwanya ubanza.

Nishimwe  Blaise

kuva yava muri Marine akerekeza muri Rayon Sports, yerekanye icyo ashoboye ndetse mu gihe ikipe bitari bimeze neza muri shampiyona iheruka, Nishimwe yari mu bakinnyi basoje shampiyona bafite uruhare rukomeye mu musaruro w’ikipe. Uko yagendaga azamura urwego byamufashije guhamagarwa mu Amavubi makuru, anayakinira mu mikino yo gushaka tike y’igikombe cy’Isi.

Niyibizi Ramadhan

Ramadhan yafashije ikipe ya Etincelles FC kuguma mu cyiciro cya mbere, byaje gutuma agurwa na AS Kigali amaze gutsindira ibitego bine muri shampiyona n'ubwo nyuma yaje kugira ikibazo cy'imvune.

Ishimwe Fiston

Ni umwaka we wa 3 ari gukinira Marines FC, aho muri shampiyona iheruka yari mu bakinnyi bari bafite ibitego byinshi muri iyi kipe ndetse yaranatanze imipira myinshi yavuyemo ibitego. Uyu mwaka w'imikino nyuma yaho Mugenzi  Bienvenue avuye muri iyi kipe, Fiston ni umwe mu bakinnyi Marines iri kugenderaho.

Byiringiro Lague

Mu mikino ya CHAN niho yatangiye kuzengereza amahanga, anafasha u Rwanda kubona amanota 3 ubwo yatsindaga igitego kuri Mozambique. Muri APR FC yabaye umukinnyi ntakorwaho ndetse utanga umusaruro haba mu Rwanda no hanze. Uyu mwaka twavuga ko urangiye ari umwe mu bakinnyi bahagaze neza imbere mu gihugu.

Kuri icyi cyumweru kuwa 26 Ukuboza 2021 ku munsi w'Imana ukurikira Noheli (Boxing Day), mu karere ka Gasabo mu ishuri rya Groupe Scolaire Busanza, niho habereye umuhango wo gusangira no gushyikiriza abana ibikoresho by'ishuri.

Ni igikorwa ngarukamwaka umuryango Ndineza Organization usanzwe ukora, ariko muri uyu mwaka ukaba warabaye umwihariko kuko Ndineza Organanization yafatanyije na DHIM, umuryango washinzwe na Bishop Habineza usanzwe atuye muri Amerika.

Aline Gahongayire yanyuzwe no gusangira nabo

Abana barenga 60 baturutse mu miryango ikennye nibo bashyikirijwe ibikoresho by'ishuri, ndetse Aline Gahongayire na Bishop nk'uko babitangarije InyaRwanda bakaba bavuze ko bitewe n'uburyo babonye aba bana, bagiye kuganira ku buryo bakwishyurirwa amashuri.

Umuryango Ndineza Organization washinzwe na Aline Gahongayire, usanzwe wita ku bana ndetse n'ababyeyi bari mu za bukuru bakeneye ubufasha bwo kwivuza, kwiga (abana) ndetse no mu buryo bwo kwiteza imbere hagendewe ku mishinga baba bafite.

Aline Gahgongayire yasangiye n’abana iminsi mikuru

Bishop Habimeza ubwo yahaga abana kuri bimwe bari bari gusangira

Abana bahawe n’amata

Abana barengaga 60

KANDA HANO UREBE UBURYO ALINE GAHONGAYIRE YASANGIYE N’ABANA

KANDA HANO UREBE INDIRIMBO NSHYA RENDEZ VOUS YA ALINE GAHONGAYIRE

Ibiro by’Umurenge wa Kimihurura

Abapfuye bari batuye mu mudugudu w’Intambwe mu Kagari ka Kimihurura mu Karere ka Gasabo, ahantu bivugwa ko ari agace gasanzwe karangwamo n’ibikorwa by’ubusinzi kubera uburyo hagaragaramo utubari twinshi ducururizwamo inzoga z’inkorano zirimo n’iyo bivugwa ko yaba yahitanye abo bantu.

Uretse abapfuye barimo umugore umwe n’abagabo batatu, hari n’abandi babiri barimo umugore n’umugabo bajyanywe kwa muganga bigaragara ko barembye, bose bikaba bivugwa ko bahereye ku munsi ubanziriza uwa Noheli barimo kunywa iyo nzoga inzwi ku izina ry’Umuneza.

Kuba bari bamaze iminsi barimo kunywa kandi batarya niho bamwe mu baturage bahera bavuga ko iyi nzoga ariyo yabahitanye n’ubwo batabivugaho rumwe bose, kuko hari n’abavuga ko inzoga atariyo ntandaro y’urupfu, kubera ko bashobora kuba bavangiwemo amarozi, kuko atari bo ba mbere banyoye iyo nzoga, isanzwe inywebwa muri uwo mududugu.

Bamwe mu baturage batuye muri uyu mudugudu basaba inzego z’ubuyobozi gukurikirana byimbitse amakuru y’urupfu rw’aba bantu kuko batemera ko bazize inzoga ahubwo bavuga ko bishoboka cyane ko hari nk’uwaba yari afitanye ikibazo n’umwe muri bo akamushyiriramo amarozi, bitewe n’uko banywa basangira abandi bakaba babigendeyemo batyo.

Hari n’abavuga ko abapfuye bari abantu basanzwe n’ubundi bikundira inzoga kuko nta kindi bakoraga uretse kubyukira mu kabari, ari naho bahera basaba ubuyobozi gukaza ingamba utubari twiganje mu gace kabo tugacika, kuko usanga buri nzu yose yarabaye akabari kandi dukora mu buryo bw’akajagari.

Umunyamabanga Nshingwabikorwa w’umusigire w’Umurenge wa Kimihurura, Etienne Nduwimana yemeje ayo makuru, akavuga ko ibyabaye bisa n’ibyatunguranye ariko kandi ngo abaturage barasabwa kujya batanga amakuru.

Ati 'Nyuma yo kubona ibyabaye aha, mu by’ukuri bisa nk’ibyatunguranye, turasaba abaturage bose ko abantu bafite utubari mu ngo, ko rwose babikuraho, kuko ni nacyo ubu tugiye gukurikizaho. Abantu bose bafite utubari mu ngo, turagenda dusaba abaturage kugira ngo ayo makuru bayatange, abo bantu bagaragare'.

Ngo izi nzoga z’inkorano zitwa Umuneza zatangiye kugaragara cyane mu gihe cya Guma mu rugo, zikaba zikunda kunywebwa n’abantu bamwe badahinduka barimo abo bitabye Imana.

Bamwe mu bangavu bo mu Karere ka Huye batewe inda imburagihe bavuga ko bahuye n'ibibazo birimo gutotezwa no gutereranwa n'imiryango yabo by'umwihariko bagaragaza akababaro baterwa n'uko ababyeyi babo babahatira kongera kuryamana n'abagabo babateye inda kugira ngo 'babomore' ndetse n'abana babo bamere amenyo icyo bita 'kurisha amenyo'.

Ngo babibategeka bababwira ko ari ko bimeze mu muco nyarwanda kandi bagomba kubikora uko byagenda kose.

Iki kibazo bakigaragarije umuryango witwa 'Family Circle Love Lab Organization (FCLLO), ukora bikorwa byo kurwanya ihohoterwa rishingiye ku gitsina rikorerwa abagore n'abakobwa.

Nakabonye Dative uyobora uwo muryango yabwiye IGIHE ko ubwo bahuguraga abangavu babyaye imburagihe, bagaragaje ko bahohoterwa nyuma yo kubyara kuko ababyeyi babo babahatira kuryamana n'abagabo babateye inda kugira ngo babomore ndetse n'abana babo bazamere amenyo.

Ati 'Twahuguye abakobwa babyariye iwabo bagera kuri 200 n'abagore 100, muri abo bakobwa harimo abatubwiye ko nyuma yo kubyara ababyeyi babo babashishikariza kujya kwiyomoza no kujya kurisha amenyo, bavuga ko babawiye ko iyo batabikoze umwana aba umuhanga [nta menyo amera].'

'Kwiyomoza ngo biri mu muco nyarwanda aho bemera ko umugore nyuma yo kubyara iyo adahuye n'umugabo [uwamuteye inda] ngo bakore imibonano mpuzabitsina ngo adakira igikomere aba yatewe no kubyara. Ibyo hari abana b'abakobwa babitubwiye, ni ubwa mbere natwe twari tubyumvise bidukora ku mutima twumva ko hari ahantu tutaragera mu gucukumbura ibiri mu muco wacu bikomeza gutiza umurindi ihohoterwa rishingiye ku gitsina rikorerwa abagore n'abakobwa.'

Nakabonye yasobanuye ko abo bangavu bagaragaje ko baterwa agahinda n'uko babihatirwa n'ababyeyi babo kandi bakabatera ubwoba ko utazabikora atazakira neza igisebe yatewe no kubyara kandi umwana we azaba umuhanga.

Ati 'Hari abahita bongera gusama cyangwa bakandura indwara zandurira mu mibonano mpuzabitsina ndetse n'agakoko gatera Sida ku buryo usanga bavanamo ingaruka mbi nyinshi.'

Umwe mu bangavu bo mu Murenge wa Huye mu Karere ka Huye byabayeho yabwiye IGIHE ko umubyeyi we yamutegetse kujya gushaka umugabo babyaranye kugira ngo amwomore birangira amuteye indi nda.

Ati 'Mama ni we wambwiye ko ntitutaryamana ntazakira neza igisebe kandi n'umwana atazamera amenyo. Uwo mugabo namumbwiye ko mushaka duhurira mu mujyi turaryamana ahita antera inda. Ikibazo cyarushijeho gukomera kuko nabyaye indahekana, abo mu muryango bose baranyanze ngo ndi ikirara, bituma mbaho nabi kuko n'uwo mugabo ntacyo amfasha kandi twarabyaranye abana babiri.'

Umubyeyi w'uwo mwangavu na we avuga ko yari asanzwe azi ko mu muco nyarwanda umugore utomowe n'umugabo babyaranye adakira igisebe kandi n'umwana wabo atamera amenyo.

Ati 'Niko umuco nyarwanda wamye uvuga ko iyo umubyeyi wabyaye umugabo atamwomoye adashobora gukira neza ahora ava amaraso kandi n'umwana atamera amenyo. Nyuma yo kuduhugura ko ibyo bitakijyanye n'igihe tugezemo narabisobanukiwe ko kubikora ari uguhohotera umugore, ubu ntabwo nabisubira kandi n'abagifite iyo myumvire nabasaba guhinduka.'

Nakabonye avuga ko kugira ngo iryo hohoterwa rishingiye ku muco ricike bisaba ko abantu babishinzwe bakora icukumbura n'ubushakashatsi bakamenya ibiri mu muco nyarwanda biritiza umuri bakabitangaho inyigisho.

Ati 'Ni byiza ko twigisha ibyo bintu tukabivugaho kandi tukabivuga ku buryo busobanutse tukabibwira abantu tukaganira n'ababyeyi kugira ngo basobanukirwe n'ibyo bintu bashoramo abana kuko bishinze imizi mu bantu bakuru.'

Umukozi w'Akarere ka Huye ushinzwe uburinganire n'iterambere ry'umuryango, Dusabeyezu Christine, yavuze ko icyo kibazo batari basanzwe bakizi ariko bagiye gushyira hamwe mu kugikumira.

Ati 'Twari dusanzwe tuzi ko ababyeyi bahatira abakobwa babo gusanga abagabo babateye inda ariko ibyo komorwa no kurisha amenyo bwo ni ubwa mbere mbyumvise, gusa nshingiye ko hari Abanyarwanda benshi bakiziritse ku muco ntabwo twabihakana kuko buriya uwabigaragaraje yarabibonye.'

Yakomeje avuga ko bagiye gushishikariza ababyeyi gukomeza inshingano yo kurera neza no kwirinda guhohotera abana. Yasabye abakobwa ko uhuye n'ihohoterwa cyangwa akabona umubyeyi we ari kumuhata kujya kuryamana n'abagabo akwiye guhita abimenyesha ubuyobozi kugira ngo bumurengere.

Mu minsi ishize tariki ya 24 Ukuboza 2021 Association Modeste et Innocent (AMI) yahurije hamwe imiryango itari iya Leta igera kuri 32 kugira ngo barebere hamwe uko bahuza imbaraga mu kurwanya ihohoterwa rishingiye ku gitsina himakazwa ihame ry'uburinganire n'ubwuzuzanye hagati y'abashakanye.

Mu bahagarariye iyo miryango baganiriye na IGIHE bavuze ko ari ubwa mbere bumvise iryo hohoterwa rikorerwa abangavu babyaye imburagihe.

Gusa biyemeje ko bagiye kugikurikirana aho bakorera ari nako batanga inyigisho ku babyeyi kugira ngo abagifite uwo muco bawucikeho.

Mu Karere ka Huye imibare igaragaraza ko muri uyu mwaka, abangavu 71 batewe inda imburagihe batarageza ku myaka 18 y'amavuko naho abarenga 300 baziterwa bayirengeje.

Mu bangavu bo mu Karere ka Huye batewe inda hari abavuga ko bahatiwe n’ababyeyi kongera kuryamana n’abazibateye

Dative Nakabonye uyobora FCLLO yavuze ko hari abangavu babyara bagahatirwa kuryamana n’abagabo babateye inda kugira ngo babomore ndetse n’abana babo bazamere amenyo

Nyirabizimana Emertha ushinzwe gahunda muri AMI yavuze ko bahurije hamwe imiryango itandukanye ngo barebere hamwe uko bahuza imbaraga mu gukumira no kurwanya ihohoterwa rishingiye ku gitsina

[email protected]