Webrwanda Backend

Category: Uncategorized

  • Perezida Kagame yasezeranyije gukemura ikibazo cya FDLR ifitanye umubano na ADF, agaruka no ku mupaka wa Gatuna n'umubano n'abaturanyi #rwanda #RwOT

    Perezida Kagame yagarutse ku mubano w'u Rwanda n'abaturanyi barimo Uganda,u Burundi,RDC ndetse ahishura ko biteguye guhangana na FDLR ifitanye umubano wihariye na ADF irwanya ubutegetsi bwa Uganda.

    Kuri uyu wa Kabiri tariki ya 08 Gashyantare 2022,Perezida Kagame yageze mu ngoro y'Inteko Ishinga Amategeko aho yakiriye indahiro z'abayobozi bashya muri guverinoma barimo Minisitiri w'Ibikorwaremezo Dr Ernest Nsabimana n'Umunyamabanga wa Leta muri iyo Minisiteri Eng Patricie Uwase.

    Muri uyu muhango,Perezida Kagame yagarutse ku mubano w'ibihugu bituranye n'u Rwanda ndetse agaruka ku kibazo cy'umutwe wa FDLR urwanya ubutegetsi bw'u Rwanda ufitanye imikoranire na ADF irwanya ubutegetsi bwa Uganda.

    Ku mubano wa FDLR na ADF,Perezida Kagame yagize ati “Hari abantu b'iterabwoba twafatiye mu Rwanda bakorana n'umutwe w'Iterabwoba wa ADF.Niyo mpamvu ADF ari ikibazo cy'akarere,ntabwo ari ikibazo cy'igihugu kimwe cyangwa 2.

    Twasanze abo bantu bakorana n'uwo mutwe wo muri kongo ariko bafite ibikorwa bashaka gukora hano mu Rwanda ariko twabafashe mbere y'uko babikora ndetse bakavuga ko icyo babikoreraga ari uguhorera abo basangiye imyumvire n'ibikorwa abo muri Cabo Delgado muri Mozambike.Bagiraga ngo bagirire nabi u Rwanda kubera ko rwagiye Mozambike kurwanya iyo mitwe.

    Iyo niyo mpamvu ikibazo duhanzeho amaso ari icyo muri RDC.Impamvu duhanze amaso muri RDC ni FDLR n'indi mitwe iri muri RDC ishobora kwivanga na ADF kuko urabona ko bafitanye imikoranire.Niyo mpamvu tuzagikemura uko bikwiriye.

    Yakomeje ati “Hari aho twinginga,hari aho twumvikana,hari aho dusaba,hari n'aho iyo byarenze umurongo tutagira uwo dusaba tugakemura ikibazo uko gikwiriye gukemuka.

    Turacyari muri iyo nzira yo kumvikana no gushaka uburyo kubera ko ikibazo kitureba twese tugomba kucyumvikanaho.ariko tutacyumvikanyeho kikavamo ko kigiye guhungabanye umutekano w' u Rwanda kubera ko abandi birengagije ibyo tubasaba,niho havamo ko dukora ibya ngombwa gukora twaba twumvikanye cyangwa tutumvikanye.Umutekano w'u Rwanda niwo wa mbere. Abakomeza kwibwira ko umutekano wacu tutawukomeyeho baribeshya.”

    Ku mubano w'u Rwanda na Uganda, Perezida Kagame yavuze ko hari hari ibibazo byatumye umupaka wa Gatuna ufungwa, ariko ibiganiro byamuhuje n'Intumwa ya Perezida Museveni, Gen Muhoozi Kainerugaba byasize bemeranyije ko impamvu zatumye ufungwa zikurwaho.

    Ati 'Ikibazo iteka cyari ukuvuga ngo uyu mupaka ntushobora gufungwa, ibyatumye ufungwa bitabanje gukemurwa. Hanyuma muri iyi minsi ishize, habaho uburyo Abanya-Uganda batumye intumwa ariko hari n'izindi zari zisanzwe ziza hakaba impaka gusa zitagira ruca.

    Iyo ntumwa yazanye ubwo butumwa mu biganiro twumvikana ko hari ibyo twese twakora. Ariko njye nkomeza kuvuga ko gufungura umupaka ni byiza ariko gufungura umupaka udakemura ikibazo cyatumye umupaka ufungwa ntabwo byakunda. Habaho kwemeranya ko n'ibyateye umupaka gufungwa nabyo bigiye kwitabwaho.'

    Yakomeje ati 'Umupaka twarawufunguye, muri Uganda nabo hari ibyo batangiye gukora bigaragara ko bavana za nzitizi mu nzira, bya bindi byatumye umupaka ufungwa. Turabikurikira, tubiganira nabo, ndibwira ko nabyo turi mu nzira nziza.'

    Umukuru w'Igihugu yavuze ko umupaka wafunguwe bijyanye no kwirinda Covid-19, ariko kandi ko inzego z'ubuzima hagati y'ibihugu byombi zishobora kumvikana ku buryo zidahura n'ikibazo ku mpande zombi.

    Perezida Kagame ku mubano w'u Rwanda n'u Burundi “Mu bihe biri imbere umubano uraza kugenda urushaho kuba mwiza, Abarundi n'Abanyarwanda babane nk'uko byari bisanzwe ndetse n'ibyajyaga bitera ibibazo bindi by'umutekako bijyanye no ku mupaka tugenda tubyumvikanaho n'Abarundi.

    Perezida Kagame yavuze ko u Rwanda rutiteguye kumva ibihuha bivugwa n'abanyamahanga bahitamo gukoresha ibitangazamakuru n'abantu bo hanze bagashyushya imitwe abantu bashinja u Rwanda ibinyoma.

    Perezida Kagame yavuze ko uwo ari “umuziki mubi tutumva”.Ati “Turareka bagasakuza,tugakora ibikorwa,abantu bagahangana n'ibifatika.Nguha umwanya ukantuka nkakwihorera ubundi nkagusubiza bibaye ngombwa.”

    Perezida Kagame yavuze ko nubwo hari ibhugu bishaka gushyigikira abahungabanya umutekano w'u Rwanda,bikorwa n'isoni.

    Perezida Kagame yavuze ko abantu bose barwanya u Rwanda yaba abari mu gihugu no hanze yacyo, 'nta kintu na kimwe bashobora kugeraho.'

    Ati 'Icyo bageraho ni iminsi yabo iba ibaze bagenda begera nta kindi'.

    Ati “Kuri Internet nzwi nk'umuntu ubuza abantu amahoro ariko njyewe ntabwo bintwaye.”

    Ku bijyanye na Mozambique,Perezida Kagame yavuze ko nubwo Cabo Delgado iruta u Rwanda inshuro zisaga 3 ariko ingabo zarwo zashoboye kugarura amahoro mu gice kinini ndetse n'ahatarafatwa biri hafi.

    Perezida Kagame yavuze ko Inzego z'umutekano z'u Rwanda kuva zagerayo muri Nyakanga 2021 zagize uruhare mu gutuma igice kinini cya Cabo Delgado kibona umutekano, aho bigeze ku kigero cya 85%.

    Ati 'Ingabo z'u Rwanda, Abapolisi, izindi nzego zose zagiyemo zikorana n'ingabo za Mozambique […] nka 85% [ikibazo] cyarakemutse, 15% uduce duto tw'aba bantu basigaye, bahunze bajya mu bindi bice batari barimo ubu barabakurikirana nabo kugira ngo naho bahasukure neza.'

    Source : https://umuryango.rw/amakuru/mu-rwanda/politiki/article/perezida-kagame-yasezeranyije-gukemura-ikibazo-cya-fdlr-ifitanye-umubano-na-na

  • Abareganwa na Rusesabagina bavuze ko batagomba kuryozwa indishyi z’ibyangijwe n’ibitero bya MRCD-FLN #Rwanda #RwOT via @kigalitoday #rwanda #RwOT

    Bumvise basabwa kuzatanga indishyi z’impozamarira, kubera abantu bishwe ndetse n’imitungo yangirijwe mu bitero bya FLN mu myaka ya 2018-2019, bahita bajuririra mu Rukiko basaba kwisobanura, ko nta ruhare bagize muri ibyo bitero.

    Nizeyimana Marc, Nsengimana Herman, Nshimiyimana Emmanuel, Niyirora Marcel, Iyamuremye Emmanuel, Nsabimana Jean Damascène na Shabani Emmanuel, bose bahuriza ku kuba ngo batarageze ahakorewe ibyaha ku buryo babiryozwa.

    Bavuga ko batagize uruhare mu gushinga uwo mutwe wa MRCD- FLN wagabye ibitero ku baturage, bakumva ko abayobozi b’uwo mutwe ngo ari bo bakwiye kubiryozwa bonyine.

    Nizeyimana Marc ushinjwa kuba mu bayobozi ba MRCD-FLN, ubwe yagize ati 'Uburyozwacyaha ni gatozi, jyewe ku bwanjye nta muntu nigeze mpemukira, nta cyaha nigeze nkora, ntawe nangirije umutungo ku buryo naryozwa ibyo ntakoze'.

    Nsengimana Herman na bagenzi be bakomeje bavuga ko mu byaha bagiye baburana, kuva mu rukiko rw’ibanze kugera aho bageze mu rw’Ubujurire, ngo ntaho basabwe kwisobanura ku bijyanye no kwangiza imitungo, ahubwo ko byari ibijyanye no kuba mu mitwe y’iterabwoba.

    Me Jean Rugeyo wunganira Nsengimana yagize ati 'Mu byaha aregwa, harimo kuba mu mutwe w’Iterabwoba, ibyo gutwikira abantu cyangwa kubasahura n’ibindi ntabyo yigeze aregwa, si na we washinze uwo mutwe (wa FLN)!'

    Uruhande rw’abaregera indishyi bagera kuri 84 bahagarariwe na Me Munyamahoro René na Me Mukashema Marie Louise, bajuririye Urukiko bashingiye ku ngingo ya kabiri y’Itegeko riteganya ibyaha n’ibihano, ivuga ko kuryozwa ibyabaye bidasaba ko nyiri kwangiza ubwe nka gatozi ari we wabiryozwa wenyine, ahubwo ko n’uwamufashije mu buryo bumwe cyangwa ubundi na we yaryozwa ibyangijwe.

    Abunganira abaregera indishyi banashingira ku ngingo ya 33 y’iryo tegeko ishimangira ko abantu bose bafatanyije icyaha kimwe, bafatanya no kwishyura ibyangijwe, indishyi z’akababaro n’amagarama y’urubanza.

    Uwitwa Karerangabo Antoine uri mu baregera indishyi avuga ko abahakana kuziryozwa, ibyo bavuga byose ngo bitagomba guhabwa agaciro, ashingiye ku nkoni ngo yakubiswe ubwo bamwikorezaga ibintu bakamwinjirana mu ishymba rya Nyungwe.

    Ntabwo birasobanuka neza ahantu hazava indishyi ishobora kugera muri za miliyari abaturage barimo kwishyuza abaregwa, kuko benshi muri bo ari abavuga ko nta mitungo bagira mu Rwanda.

    Icyakora abaregera indishyi na bo bigaragara ko batatanze byinshi kuri uru rubanza, kuko bose ngo batanze igarama rimwe mu rukiko, ahasigaye bashaka ibyemezo by’uko batishoboye.

    Mu bajuririye Urukiko bamwe bavuga ko indishyi bahawe itajyanye n’agaciro k’ibyabo byangijwe, abandi bakavuga ko nta kintu na kimwe bemerewe n’Urukiko Rukuru rwaciye urubanza mu mwaka ushize.

    Source : https://www.kigalitoday.com/ubutabera/imanza/article/abareganwa-na-rusesabagina-bavuze-ko-batagomba-kuryozwa-indishyi-z-ibyangijwe-n-ibitero-bya-mrcd-fln

  • Gasabo/ Kinyinya: Baratabariza umuturanyi wabo ubayeho nabi nyuma y'aho umugabo we yiyahuye akamusigira abana 4 n'undi atwite #rwanda #RwOT

    Abaturanyi b'umugore witwa Uwitonze utuye mu murenge wa KInyinya mu karere ka Gasabo barasaba ubuyobozi uko bwamufasha kuko ntaho kuba agira ndetse nta bushobozi afite bwo gutunga  abana bane yasigiwe na nyakwigendera kuri ubu bamaze no guta ishuri.

    Nyuma y'iminsi itanu gusa Uwitonze n'abana be 4 basanze Niyibigira Olivier akaba se w'abo bana I Kigali bavuye mu karere ka Nyagatare uwo Niyibigira yahise afata umwanzuro wo kwiyahura bigakekwako yabitewe no kurengwa n'ibibazo byo kudashobora kwita ku bibazo by'umuryango. Mu kiniga kinshi Uwitonze utwite inda y'imvutsi aribuka amagambo ya nyuma yaganiriye n'umugabo we yari aje asanga I Kigali ngo bafatanye kurera urubyaro rwabo. Ni amagambo arimo guca amarenga ko Niyibigira yari afite umugambi wo kwiyambura ubuzima.

    Uwitonze yagize ati 'Yaraje azanye imineke ahaho aka kana gato aravuga ati hari igihe waba ari uwa mbere n'uwanyuma yaba gusa sinamenya icyo abivugiye, yinjiye mu nzu ndi hanze ndi guteka ninjiye nsanga yafunguye umuti yamaze no kuwunywa mpita niyambaza abaturanyi baje basanga nyine byarangiye. '

    Uwitonze n'abana bane yasigiwe na Niyibigira barimo umwe yabyaye hanze kuri ubu batuye mu isibo y'ibyiringiro,umudugudu wa Binunga akagari ka Murama umurenge wa Kinyinya ni mu karere ka Gasabo.Imibereho y'uyu muryango ni urugero rwa nyarwo n'umuryango ubayeho nabi,isaa sita iri hafi kuvuga ariko icyizere cyo kubona ifunguro rya kumanywa kiri kure nk'ukwezi kuri uyu mubyeyi utwite n'abana 4 bakabaye bari ku ishuri nk'abandi ariko bikaba bidashoboka kubera ubushobozi.

    Uwitonze avuga bigoye kubona ifunguro ry'urubyaro rwe kuko nta kazi agira.

    Yagize ati 'Hari igihe njya gushakisha nk'akazi ko gufura nabona n'ako guhinga nkahinga ariko ubu kabuze.'

    Inzu y'icyumba kimwe nto cyane itagira ibyangombwa byuzuye nk'ubwiherero igikoni n'ubwogero niyo uyu muryango w'abantu 5 n'undi wa gatandatu bitegura kwakira ubamo nawo uyikodesherezwa n'abaturanyi amafaranga 5000 y'u Rwanda,ako kazu gato cyane ni uko Uwitonze n'abana 4 bararamo bagatekeramo iyo babibonye kubaho ni ukubara ubukeye.

    Uwitonze abana n'abana bane n'undi atwite

    Abaturanyi b'uyu muryango nabo bagaragaza impungenge z'ubuzima Uwitonze n'abana bane yasigiwe n'umugabon we babayemo .

    Umwa yagize ati 'Uyu mudamu ahantu ari ni ahantu hameze nabi, abana ni benshi, no kurya ni ikibazo, aranatwite kandi nkuko mubizi umubyeyi utwite aba akeneye kwitabwaho.'

    Undi nawe ati 'Urabona inzu arimo, imvura iguye isaha n'isaha ishobora kumugwaho'

    Uwitonze n'abaturanyi be baratakambira ubuyobozi ngo bugire icyo bufasha uyu muryango ubone aho kuba habereye umubyeyin utwite abana babone ibibatunga kandi basubizwe ku ishuri.

    Uwitonze yagize ati 'Aba bana nkeneye aho baba, bakeneye no kwiga kandi sinamenya icyo bazaba ejo hazaza.'

    Naho umwe mu baturanyi agira ati 'Uyu mubyeyi nuwo gufashwa pe. Bitari iby'ikindi gihe ahubwo bibaye bishoboka byahera ubu.'

    Undi nawe ati 'Aba bana bagomba kujya ku ishuri kugira ngo batazaba Mayibobo muri uyu mujyi.'

    Naho uyu we ati 'Icyo twasaba ubuyobozi, nuko bwamushakira aho kuba akava ahantu hameze gutya.'

    Abaturanyi b'uyu muryango bavuga ko batewe impungenge n'uko Uwitonze ashobora gufata umwanzuro nk'uw'umugabo we akiyambura ubuzima dore ko  yatangiye kugaragaza ibimenyetso bigaragarira  mu mvugo akoresha ziganjemo amagambo yo kwiheba,ibishobora gushyira mu kaga kurushaho no kwangiza burundu ahazaza  h'abo bana.

    Tito DUSABIREMA

    The post Gasabo/ Kinyinya: Baratabariza umuturanyi wabo ubayeho nabi nyuma y'aho umugabo we yiyahuye akamusigira abana 4 n'undi atwite appeared first on FLASH RADIO&TV.

    Source : https://flash.rw/2022/02/08/gasabo-kinyinya-baratabariza-umuturanyi-wabo-ubayeho-nabi-nyuma-yaho-umugabo-we-yiyahuye-akamusigira-abana-4-nundi-atwite/?utm_source=rss&utm_medium=rss&utm_campaign=gasabo-kinyinya-baratabariza-umuturanyi-wabo-ubayeho-nabi-nyuma-yaho-umugabo-we-yiyahuye-akamusigira-abana-4-nundi-atwite

  • Amasendika y'abakozi ntiyemeranya n'abavuga ko umushahara fatizo waca intege abashoramari #rwanda #RwOT

    Mu gihe amasendika y'abakozi mu Rwanda akomeje kotsa Leta igitutu ngo ishyireho umushahara fatizo, abasesengura iby'ubukungu bo bagaragaza ko gushyiraho umushahara fatizo bisaba kwigengesera kugirango bidasubiza inyuma ishoramari.

    Imyaka igiye kuba ine Inteko Ishinga Amategeko ivuguruye Itegeko ry'Umurimo mu Rwanda, ariko igumishamo ingingo ivuga ko hagomba kujyaho umushahara fatizo ariko ukagenwa n'Iteka rya Minisitiri ufite umurimo mu nshingano.

    Abatari bacye mu bakozi bagaragaza  umushahara fatizo nk' igisubizo cy'ibibazo by'imibereho badakemura kubera guhembwa umushahara utajyanye n'igihe.

    Umwe ati 'N'abafite imishahara fatizo yabo ndacyeka ntabwo ihagije kuko ibintu uko bwije nuko bucyeye amafaranga agenda ata agaciro.'

    Undi ati 'Ibigezweho uyu munsi haba ubwumvikane hagati y'umukozi n'umukoresha buri wese uko abyumvya umuntu ashobora gukorera macye kubera ibibazo yifitiye , aho ngaho  ariko  icyo nakubwira buriya uriya  wemeye gukorera macye burya akazi agakora nabi bitewe nuko uwo mushahara ntabwo aba awishimiye mu byukuri.'

    Impuguke mu bukungu Straton Habyarimana, asanga gushyiraho umushahara fatizo ari ingenzi cyane, ariko ko bisaba kwigengesera kugirango bidaca intege abashoramari.

    Ati ' Icyambere umushahara fatizo ni inyungu ku baturage bo ubwabo  kubera ko icyo gihe nta muntu uguhemba munsi y'umushahara fatizo gushyiraho umushahara fatizo ntabwo bigira igihe,  bikorwa mu gihe abantu babona ko bikenewe, koko icyo tutakwirengangiza ni uko ibiciro ku masoko byarazamutse , akenshi iyo ugiye kubikora ugomba kubanza ukareba nko mu isoko wenda tuvuge nko mu isoko rya Afurika y'uburasirazuba turamutse dushyizeho umushahara fatizo nta risqué yuko umushahara ushobora kujya hejuru y'ibihugu twegeranye ugasanga abantu bagiye gushora imari muri bya bihugu bifite umushahara twakwita ko ari muto?'

    Impuguke mu bukungu Straton Habyarimana

    Ku rundi ruhande ariko amasendika y'abakozi yo ntiyemeranya  n'abavuga ko gushyiraho umushara fatizo byaca intege abashoramari. Bwana Ntakiyimana Francois ni umunyamabanga mukuru wa COTRAF inganda n'ubwubatsi.

    Ati 'Ntabwo ari uko tubibona kuko n'abo bashoramari mu bihugu baturukamo bo bavuye kuri salaire Minimum interprofessionelle grantit bagera kucyo bita salaire de croissance bo bizeye ko imishahara uhari noneho batangira kuvuga bati uko ubukungu buzamuka natwe niko tuzamuka, iyo bavuze ikibazo cy'ubukungu ntabwo ubwo bukungu bushobora gutera imbere mugihe icyo bita classe intermediaire kimeze nabi ntabwo uzaza ngo ushore imari wenda mu nganda zikora imyenda, iyo myenda ninde uzayigura mugihe wa mukozi adashobora kubona umushahara?'

    Ku ruhande rw'abashoramarai bamwe mu ribo babwiye itangazamakuru ryacu ko nabo basanga Leta ikwiye gushyiraho umushahara fatizo ariko ngo hari ibikwiye kuziganwa ubushishozi. Nkurunziza Muhamed ayobora Kompanyi, Four FiVE LTD itanga servise zo kwandika imitungo kuri ba nyirayo no kuyigaruza mu gihe yibwe.

    Ati 'Twe rero nk'abikorera kugena umushahara fatizo mbona ari ngombwa ariko nanone hakaba ibyo mbona byagenderwaho, ni ukuvuga ngo niba ari umukozi wo mu rugo agire umushahara fatizo agenerwa niba ari umufundi agire umushahara fatizo agenerwa, nimba ari umubaji ni ukuvuga ngo hajyaho itegeko rifata buri bwoko bwose bw'umurimo rikagena umushahara ku buryo hatazagira umukozi ushwana n'umukorehsa.'

    Nkurunziza Muhamed ayobora Kompanyi, Four FiVE LTD

    Umushahara fatizo u Rwanda rwagize umaze imyaka isaga 40 ugiyeho, wateganyaga ko umukozi wese ukorera abandi mu gihugu, atagomba guhembwa munsi ya 100 Frw ku munsi.  Abarebera ibintu ahirengeye bagaragza ko kudashyiraho umushahara fatizo bigira ingaruka  ku bukungu bw'igihugu by'umwihariko ku mibereho y'abakozi n'imiryango yabo. Icyakora kurundi ruhande abasesengura iby'ubukungu bo banagaragaza impungenge z'uko ibiciro bishobora kuzamuka kubera gushyiraho umushahara fatizo, ubukungu bukaba bubi aho kumera neza.

    HAKIZAMANA Daniel

    The post Amasendika y'abakozi ntiyemeranya n'abavuga ko umushahara fatizo waca intege abashoramari appeared first on FLASH RADIO&TV.

    Source : https://flash.rw/2022/02/08/amasendika-yabakozi-ntiyemeranya-nabavuga-ko-umushahara-fatizo-waca-intege-abashoramari/?utm_source=rss&utm_medium=rss&utm_campaign=amasendika-yabakozi-ntiyemeranya-nabavuga-ko-umushahara-fatizo-waca-intege-abashoramari

  • Kigali: Umunyamakuru yatangiye kuburana n'uwamutukiye mu ruhame #rwanda #RwOT

    Kuri uyu wa 8/2/2022 Urukiko rw'ibanze rwa Gasabo mu mujyi wa Kigali rwasubitse urubanza ruregwamo Iraguha Prudence uzwiho gukoresha imbuga nkoranyambaga cyane. Uyu Prudence yarezwe n'umunyamakuru Scovia Mutesi icyaha cyo gutukana mu ruhame akoresheje imbuga nkoranyambaga.

    Nk'uko byatangajwe n'ubushinjacyaha mu rubanza rwabaye kuri uyu wa kabiri iki cyaha cyabaye ku wa 19/3/2021 aho Prudence yatutse umunyamakuru Mutesi scovia ngo ni igicucu ku rubuga bahuriraho.

    Umushinjacyaha yavuze ko Prudence yabanje gusaba Scovia ko yazamutumira mu kiganiro akora kuri flash TV nyuma Scovia ntiyamutumira kubera ko atari yujuje ibyo bagendereho batumira abantu mu kiganiro.

    Umushinjacyaha yakomeje avuga ko Prudence yakomeje kubimusaba ariko scovia agahitamo kumubroka aribyo byatumye ajya Ku mbuga nkoranyambaga akamutuka.

    Umucamanza yabajije uregwa niba hari icyo avuga kubyo aregwa, niba yemera icyaha cyangwa agihakana avuga ko atiteguye kuburana mu gihe umwunganira mu mategeko atarahagera.

    Uwunganira Scovia mu rubanza we yavuze ko byashoboka ko ari uburyo bwo gutinza urubanza ariko na none akaba ari uburenganzira bw'uregwa bwo kwiburanira yangwa kugira umwunganizi bityo asaba ko hakurikizwa icyifuzo cye.

    Urubanza rwari ruteganyijwe gutangira saa mbili za mu gitondo aho ababurana bari binjiye mu cyumba cy'urukiko ariko byageze sa yine uwunganira iraguha prudence ataragera mu cyumba cy'urukiko. Umucamanza yahise afata umwanzuro wo gusubika urubanza rukazasubukurwa mu kwezi kwa gatatu 2022.

    Scovia ati: 'Nta mbabazi za Nyirarureshwa'

    Nk'uko bigaragara mu ibaruwa Prudence yandikiye scovia ku wa 16 Kamena 2021, Prudence yasabye scovia imbabazi avuga ko yamubwiye nabi ariko avuga ko yatebyaga. Scovia Mutesi yagize icyo avuga kuri izo mbabazi yasabwe.

    Ati: 'Usomye ibaruwa usanga avuga ko twateranye amagambo kandi sibyo. Izo mbabazi nasanze ari iza nyirarureshwa. Ikindi icyaha yankoreye abantu bagifata nk'aho ntacyo cyivuze kandi bakumva ko nta n'uwo warega ngo bakire ikirego. Njye ndashaka ko icyaha nk'iki gihanwa kandi nkwiriye ubutabera'.

    Scovia akomeza avuga ko umuryango mugari nawo ukwiriye ubutabera kuko yamutukiye mu ruhame asanga yaratutse benshi bamukunda ,abavandimwe bose bakwiye ubutabera kuko bababajwe nuburyo yamwandagaje.

    Abantu bakwiye kumenya ko igitabo mpanabyaha mu Rwanda kivuga ko icyaha cyo gutukana mu ruhame, gihanishwa igifungo cy'iminsi itari munsi ya 15 ariko itarenze amezi abiri, ihazabu y'amafaranga y'u Rwanda atari munsi y'ibihumbi ijana ariko atarenze ibihumbi magana abiri.

    SRC:JOBCENTER 

    The post Kigali: Umunyamakuru yatangiye kuburana n'uwamutukiye mu ruhame appeared first on IRIBA NEWS.

    Source : https://iribanews.rw/2022/02/08/kigali-umunyamakuru-yatangiye-kuburana-nuwamutukiye-mu-ruhame/

  • Perezida Kagame yavuze ko hari ikizere k'umubano w'u Rwanda n'u Burundi #rwanda #RwOT

    Perezida Kagame yagarutse ku mubano w'u Rwanda n'ibihugu by'ibituranyi agaragaza ko nk'u Burundi hari intambwe imaze guterwa mu gihe mu bibazo ruhanze amaso harimo n'ibyo muri Repubulika Iharanira Demokarasi ya Congo.

    Umukuru w'Igihugu yabigarutseho ubwo yakiraga indahiro z'abayobozi bashya muri Guverinoma harimo iya Minisitiri w'Ibikorwaremezo, Dr Erneste Nsabimana n'Umunyamabanga wa Leta muri iyo Minisiteri, Patricia Uwase.

    Perezida Kagame yagaragaje ko hari intambwe iri guterwa mu mubano w'u Rwanda n'u Burundi. Ni nyuma y'uko ba Minisitiri b'Ububanyi n'Amahanga ku mpande zombi bahuye ndetse Perezida Evariste Ndayishimiye akoherereza mugenzi we intumwa kugira ngo bige ku cyatuma ibintu bisubira mu buryo.

    Ati 'Ngira ngo mu bihe biri imbere umubano uraza kugenda urushaho kuba mwiza n'Abarundi n'Abanyarwanda babane uko byari bisanzwe.'

    'N'ibyajyaga bitera ibibazo bindi by'umutekano ku mupaka muri za Kibira na Nyungwe, hari abantu bitwaje intwaro bambuka batera u Rwanda ibyo turagenda tubyumvikanaho n'Abarundi uko tuzagenza icyo kibazo kugira ngo kiveho burundu. Ubwo ababiri inyuma bazarushaho kugira ibyago.'

    Ku mubano w'u Rwanda na Uganda, yavuze ko hari hari ibibazo byatumye umupaka wa Gatuna ufungwa, ariko ibiganiro byamuhuje n'Intumwa ya Perezida Museveni, Gen Muhoozi Kainerugaba, byasize bemeranyije ko impamvu zatumye ufungwa zikurwaho.

    Ati 'Ikibazo iteka cyari ukuvuga ngo uyu mupaka ntushobora gufungwa, ibyatumye ifungwa bitabanje ngo bikemurwe. Hanyuma muri iyi minsi ishize, habaho uburyo Abanya-Uganda batumye intumwa ariko hari n'izindi zari zisanzwe ziza hakaba impaka gusa zitagira uruca.'

    'Iyo ntumwa yazanye ubwo butumwa mu biganiro twumvikana ko hari ibyo twese twakora. Ariko njye nkomeza kuvuga ko gufungura umupaka ni byiza ariko gufungura umupaka udakemura ikibazo cyatumye umupaka ufungwa ntabwo byakunda. Habaho kwemeranya ko n'ibyateye umupaka gufungwa nabyo bigiye kwitabwaho.'

    Perezida Kagame yavuze ko mu byatumye umupaka ufungwa, harimo ko Abanyarwanda baba muri Uganda bahigwaga bashinjwa kuba intasi. Kuri we, ntibyumvikana uburyo wakora ubutasi wifashishije abantu bose, abato, abakuru n'abakecuru ku buryo ngo unabakoresheje waba uri 'umuginga'utazi icyo ashaka.

    Ku rundi ruhande ariko, ngo Abanyarwanda bafitanye isano n'u Rwanda, baruvuga neza, biyumva mu Rwanda aribo bahigwaga ariko abafitanye ibibazo narwo ntibagire ikibazo bahura nabyo.

    Ati 'Niba mwibuka neza hari abantu bigeze gutera Kinigi, abasagutseho bake cyane [abandi bose barahasigaye] barambuka bajya muri Uganda barabakira barangije batubwira ko babafunze hanyuma tugiye kumva twumva ngo bageze muri Congo aho bari baraturutse. Ibyo byose tukabiganira n'Abayobozi ba Uganda.'

    Perezida Kagame yavuze ko abantu bose barwanya u Rwanda yaba abari mu gihugu no hanze yacyo, 'nta kintu na kimwe bashobora kugeraho.'

    Ati ' Icyo bageraho ni iminsi yabo iba ibaze bagenda begera nta kindi'.

    Umukuru w'Igihugu yavuze ko umupaka wa Gatuna wafunguwe ariko hubahirizwa amabwiriza yo kwirinda Covid-19, ariko kandi ko inzego z'ubuzima hagati y'ibihugu byombi zishobora kumvikana zigashyiraho amabwiriza ku buryo zidahura n'ikibazo ku mpande zombi.

    Ati 'Umupaka twarawufunguye, muri Uganda nabo hari ibyo batangiye gukora bigaragara ko bavana za nzitizi mu nzira, bya bindi byatumye umupaka ufungwa. Turabikurikira, tubiganira nabo, ndibwira ko nabyo turi mu nzira nziza.'

    Perezida Kagame yavuze ko u Rwanda rwifuza amahoro mu gihugu, mu karere, kandi ko ruyifuriza na buri wese.

    Ati 'Ntawe twifuriza umutekano muke, nta n'uwo twifuriza amahoro make ariko utwifurije intambara nawe turayirwana. Ibyo nta kibazo rwose, dufite abanyamwuga babikora uko bikwiriye. Haba hano haba n'ahandi.'

    Umukuru w'Igihugu yavuze ko kuko u Rwanda ari igihugu gito, 'aho umuriro uturutse' ariho ruwusanga' kuko nta mwanya uhari imbere wo kurwaniramo.

    The post Perezida Kagame yavuze ko hari ikizere k'umubano w'u Rwanda n'u Burundi appeared first on FLASH RADIO&TV.

    Source : https://flash.rw/2022/02/08/perezida-kagame-yavuze-ko-hari-ikizere-kumubano-wu-rwanda-nu-burundi/?utm_source=rss&utm_medium=rss&utm_campaign=perezida-kagame-yavuze-ko-hari-ikizere-kumubano-wu-rwanda-nu-burundi

  • Umwamikazi Elizabeth II w’u Bwongereza ni muntu ki? #Rwanda #RwOT via @kigalitoday #rwanda #RwOT

    Umwamikazi Elizabeth II mu 2022

    Umwamikazi Elizabeth II mu 2022

    Amazina ye yose ni Elizabeth Alexandra Mary, yavutse ku itariki 21 Mata 1926. Usibye kuba umwamikazi w’Ubwami bw’u Bwongereza, ni n’umwamikazi w’ibihugu 14 bihuriye ku rurimi rw’Icyongereza mu muryango wa Commonwealth, birimo ikitwa Antigua and Barbuda, Australia, The Bahamas, Belize, Canada, Grenada, Jamaica, New Zealand, Papua New Guinea, Saint Kitts and Nevis, Saint Lucia, Saint Vincent and the Grenadines, ibirwa bya Solomon n’igihugu kitwa Tuvalu.

    Elizabeth wa 2 yavukiye ahitwa Mayfair, London mu Bwongereza, avuka ari umwana wa mbere w’abatware b’umujyi wa York, ni ukuvuga Duke na Duchess (ariko nyuma baje kuba umwami n’umwamikazi (George wa 6 na Elizabeth), byumvikana ko Elizabeth wa 2 yitiranwa na nyina.

    Ise wa Elizabeth (George wa 6), yimye ingoma mu 1936, nyuma y’uko umuvandimwe we Edward wa 3 yeguye, bityo Elizabeth nk’umwana w’impfura yegukana inshingano zo kuzasimbura se.

    Elizabeth yaherewe amasomo yose mu rugo iwabo, atangira kujya mu mirimo y’igihugu mu gihe cy’intambara ya kabiri y’isi yose, ari umwe mu bari bagize icyo bitaga Auxiliary Territorial Service (ishami ry’igisirikare cy’i bwami), ryabagamo abakorerabushake b’abagore.

    Mu Gushyingo 1947, Elizabeth yashakanye na Philip Mountbatten, wari Igikomangoma cy’u Bugereki na Denmark ataraba Umutware w’umujyi wa Edinburgh, bamarana imyaka 73, ni ukuvuga kugeza Philip atabarutse muri 2021, amusigira abana bane, abahungu batatu n’umukobwa umwe. Aribo ni Charles (Igikomangoma cya Wales); Anne (ugomba kuzasimbura nyina); Prince Andrew, uyobora umujyi wa York na Prince Edward, wari umutware w’igihugu kitwaga Earl of Wessex, hatarabaho ukwihuza kw’ibihugu bigize Ubwami bw’u Bwongereza.

    Princess Elizabeth 1933

    Princess Elizabeth 1933

    Elizabeth yimye ingoma muri Gashyantare 1952 ise George wa 6 amaze gutanga, ni uko ku myaka 25 Elizabeth ahabwa ububasha bwo kuyobora ibihugu birindwi byigenga, biri mu muryango wa Commonwealth ari byo: Ubwami bw’u Bwongereza, Canada, Australia, New Zealand, South Africa, Pakistan, n’igihugu cyitwaga Ceylon (Sri Lanka), ndetse ahita agirwa n’Umuyobozi wa Commonwealth.

    Elizabeth II, ku myaka 95 ni we mwamikazi w’u Bwongereza umaze igihe kirekire mu buzima no ku ngoma, ni na we mukuru w’igihugu w’umugore mu mateka umaze igihe kirekire ku buyobozi no mu buzima.

    Source : https://www.kigalitoday.com/amakuru/mu-mahanga/article/umwamikazi-elizabeth-ii-w-u-bwongereza-ni-muntu-ki

  • Akunda kunyita Mami ! Assia yahishuye byinshi ku mukunzi we w'Umudiyasipora #rwanda #RwOT

    Assia yabitangaje mu kiganiro yagiranye na ISIMBI TV yavuze ko gukundana n'umuntu uri kure ari ibintu bitoroshye kuko nk'iyo uzi ko n'umukumbura utari buhite umubona biba bibikurushaho.

    Agira ati 'Gukundana n'umuntu uri kure biraryana, uzi kugukundana n'umuntu uri bumukumbure utari bumubone, utanabona uko ujya kumureba aho umushakiye, wanasara, iyo mukumbuye ndarira nkihanagura.'

    Yavuze ko umukunzi we ari umunyarwanda uba hanze yarwo ariko igihe cyo gutangaza amazina ye kikaba kitaragera.

    Ati 'Umukunzi wanjye ni umunyarwanda, izina si ngombwa kurivuga ariko ubu atuye hanze y'u Rwanda. Ni cyo kintu cya mbere kigora, ntuba uzi ibyo yiriwemo, ntuzi ibyo akora na we ntazi ibyo urimo, uramukumbura ukumva ikintu cyakumara urukumbuzi ni ukumva akajwi ke, hari n'igihe umuhamagara ugasanga ntabwo muhuje amasaha ntakwitabe.'

    Yakomeje avuga ko kandi gukundana n'umuntu uri kure bisaba kwihangana kuko biba bigoye, ntabwo umwe aba azi ibyo mugenzi we yiriwemo, umuntu ashobora kuguha inkuru utanazi ukaba wayifata nk'ukuri kandi ari ikinyoma, bikaba bisaba kwizerana hagati y'abakundana.

    Uyu mukobwa akaba yavuze ko atari ubwa mbere akundanye n'umuntu uba hanze y'u Rwanda kuko hari abandi 3 batandukanye.

    Uyu mukobwa wakoze filime n'indirimbo yise 'Long Distance' biri busohoke uyu munsi, ngo yashakaga kugaragaza imvune ziba muri urwo rukundo ndetse no kugaragaza amwe mu manyanga akorerwamo aho hari ababa bashaka kurya abantu baba hanze amafaranga yabo kandi batanabakunda.

    Source : https://umuryango.rw/imyidagaduro/article/akunda-kunyita-mami-assia-yahishuye-byinshi-ku-mukunzi-we-w-umudiyasipora

  • Nyuma y’imyaka 2 igikombe cy’Amahoro cyagarutse #rwanda #RwOT

    Ishyirahamwe ry’umupira w’amaguru mu Rwanda ‘FERWAFA’ ryamaze kumenyesha amakipe yo mu cyiciro cya mbere n’icya kabiri mu bagabo ko igikombe cy’Amahoro kizatangira muri Werurwe, bayasaba kwiyandikisha.

    Mu ibaruwa yasinyweho n’umunyamabanga mukuru wa FERWAFA, Muhire Henry bamenyesheje aya makipe ko kwiyandikisha kwitabira igikombe cy’Amahoro 2022 bizarangirana na tariki ya 25 Gashyantare 2022.

    Kwiyandikisha ikipe izatanga ibaruwa iherekejwe n’inyemezabwishyu y’amafaranga ibihumbi 100 byo kwiyandikisha.

    Iki gikombe cya 2022, kigiye kuba nyuma y’uko cyari kimaze imyaka 2 kitaba, cyaherukaga muri 2019 ubwo AS Kigali yacyegukanaga itsinze Kiyovu Sports ku mukino wa nyuma.

    AS Kigali niyo ifite igikombe cy’Amahoro giheruka

    Source : http://isimbi.rw/siporo/article/nyuma-y-imyaka-2-igikombe-cy-amahoro-cyagarutse

  • Abanditsi bakomeye ku Isi bandikiye Perezida Kagame ku kibazo cya Bahati waburiwe irengero #rwanda #RwOT

    Nk’uko The Guardina ibivuga, aba banditsi barimo Umunya-Canada Margaret Eleanor Atwood, Umunya-Nigeria Ben Okri, Umunya-Afurika y’Epfo John Maxwell Coetzee, Umunyamerika Jonathan Franzen, Umwongereza Elif Shafak ; bavuga ko izimira rya Bahati ryaba rifitanye isano n’ubusizi bwe, bwerekeye ku bibazo byugarije umuryango nyarwanda.

    Mu rwandiko bageneye Umukuru w’Igihugu, aba banditsi bagize bati : “Tubagejejeho iki kibazo kugira ngo mugikurikirane byihutirwa kubera ko nyuma y’umwaka, Bahati ntaraboneka kandi uko yaba ameze ntikuzwi.”

    Ubwo byavugwaga ko Bahati yaburiwe irengero, urwego rw’ubushinjacyaha, RIB, tariki ya 9 Gashyantare 2021 rwatangaje ko atari muri kasho zarwo, rwemeza ko rugiye gukora iperereza ku ibura rye.

    Gusa aba banditsi bavuga ko kuva icyo gihe nta makuru mashya uru rwego ruratanga kuri Bahati, ikaba imwe mu mpamvu basaba Perezida Kagame kwikurikiranira iki kibazo. Bati : “Dutewe impungenge n’uko ubuyobozi bw’u Rwanda butaratangaza amakuru mashya cyangwa ibyavuye mu iperereza kuri dosiye ye.”

    Bamenyesheje Perezida Kagame ko bizera ko hari umwe mu bayobozi waba azi irengero rya Bahati. Bati : “Turizera ko umwe muri buyobozi bw’u Rwanda azi irengero rya Bahati. Ubusizi si icyaha. Isi itegereje kongera kumva ijwi rya Bahati Innocent.”

    Inshuti imwe mu za Bahati, yavuze ko uyu musizi yaburiwe irengero nyuma yo gusangirira n’abantu batatu muri hoteli iri mu Karere ka Nyanza. Ngo byageze nijoro, telefone ye iva ku murongo, ntiyongera gusubiraho kugeza mangingo aya.

    Bahati yamenyekaniye mu bisigo yatambutsaga kuri shene ye ya YouTube, birimo : Mfungurira, Urwandiko rwa Bene Gakara, Urwandiko rwa Masisi, Imana ya Sembwa na Muvunyi.

    Source : http://www.ukwezi.rw/Mu-mahanga/Amakuru-anyuranye/article/Abanditsi-bakomeye-ku-Isi-bandikiye-Perezida-Kagame-ku-kibazo-cya-Bahati-waburiwe-irengero