Category: Uncategorized

1.Ingabo z’Abafaransa baje mu cyo bise ” Opération Amaryllis ” zateraranye Abatutsi mu maboko y’abicanyi

Tariki ya 9 Mata, nibwo icyo Abafaransa bise ” Operation Amaryllis ” yatangiye mu Rwanda kugera 12 Mata. Igisobanuro cy’iyo operasiyo kwari ugucyura Abafaransa n’abanyamahanga bari mu Rwanda. Iyo operasiyo yabaye igihe abantu bicwaga cyane muri Kigali n’ahandi henshi mu gihugu, bicwa n’abasirikari n’Interahamwe. Izo ngabo z’Abafaransa zarebaga abicwaga nyamara ntibigeze babatabara, barabaretse baricwa bikomereza gucyura bene wabo.

Abafaransa ntibashatse gutabara kugira ngo bahagarike ubwicanyi bwakorerwaga mu maso yabo, cyane cyane ku kibuga cy’indege cya Kanombe bahasize benshi babasigira Interahamwe.

Hari Abatutsi bari bashoboye kurira mu modoka z’abasirikari b’Abafaransa zacyuraga abanyamahanga, ariko bagera kuri bariyeri bakabakuramo bakabicira imbere y’ingabo z’Abafaransa.

Imiryango yarimo abashakanye hagati y’Umufaransa n’Umunyarwanda barabatandukanije, abanze gutandukana barabasiga. Mu marira menshi, abagore bashakanye n’Abanyarwanda basabye ko abao bashakanye n’abana babo, babatwara baranga. Abakozi ba ambasade y’Ubufaransa cyane cyane Abatutsi barasigaye, abenshi baricwa.

Nyamara, ambasade y’u Bufaransa yafunguriye imiryango yayo umuryango w’uwahoze ari perezida, abari mu mutwe w’abicanyi bashyizweho la Leta yariho, n’ibyegera bya Habyarimana byari ku isonga ry’Akazu. Abatutsi bageragezaga kurira urukuta rwa ambasade y’Ubufaransa barakubitwaga bakabasubiza inyuma, interahamwe zirabica.

Abakozi bo mu nzu yareraga imfubyi ” orphelinat Ste Agathe ” yari iya Agata Kanziga umugore wa Habyarimana barabatwaye, ariko u Bufaransa bwima ubuhungiro abana ba nyakwigendera minisitiri w’intebe Agathe Uwilingiyimana, wari umaze iminsi 2 yishwe n’abasirikari b’u Rwanda bayobowe na majoro Bernard Ntuyahaga.

Icyemezo cyo gucyura Abafaransa nticyafashwe indege ya Habyarimana ikimara guhanurwa cyangwa se iminsi 2 yakurikiyeho, icyo cyemezo cyafashwe n’abanyepolitiki bashakaga guha ingufu ingabo z’u Rwanda zari ku rugamba.

Uwo munsi, umuryango wa Habyarimana n’abandi bahezanguni buriye indege z’Abafaransa bajyanwa i Bangui, bakomereza i Paris.

Mu ntagondwa z’abajenosideri batwawe n’ingabo z’Abafaransa harimo Felisiyani Kabuga wabaye umushoramari wa Jenoside na Ferdinand Nahimana wabaye umukangurambaga wa Jenoside. Bombi bari mu bashinze RTLM yakoreshejwe mu kwamamaza ikowra rya Jenoside.

2.Ishyirwaho rya guverinoma y’abicanyi yari iyobowe na Kambanda

Mu gitondo cy’itariki ya 8/4, Bagosora yakoranije abayobozi bagize Hutu-Power, kugira ngo bashyireho guverinoma, bose bavaga mu mashyaka y’abahezanguni. Ishyirwaho ry’iyo guverinoma ryabereye muri Ambasade y’Abafaransa.

MRND yari ihagarariwe na Matayo Ngirumpatse, Edouard Karemera, visi perezida we na Joseph Nzirorera, umunyamabanga Mukuru ; MDR ihagarariwe na Froduald Karamira, Donat Murego, PL ihagarariwe na Justin Mugenzi na Agnes Ntamabyaliro. PSD yari ihagarariwe na François Ndungutse na Hyacinthe Nsengiyumva Rafiki, PDC ihagarariwe na Jean-Marie Vianney Sibomana, Célestin Kabanda na Gaspard Ruhumuliza.

MRND yashyizeho Dr Théodore Sindikubwabo nka perezida wa Repubulika, Bagosora nawe ashyiraho Jean Kambanda ku mwanya wa minisitiri w’intebe.

Iyo guverinoma yari ifite gahunda imwe gusa : gutanga umurongo w’uko Jenoside igomba gukorwa mu gihugu cyose, gutanga intwaro, gukangurira abaturage gukora Jenoside no kuyisobanura mu mahanga.

3.Abatutsi biciwe kuri paruwasi gatolika yitiriwe Mutagatifu Visenti wa Pallotti i Gikondo muri Kigali

Tariki ya 09 Mata 1994, Interahamwe n’abasirikare barindaga Habyarimana, bishe abatutsi bari bahungiye kuri paruwasi gatulika yitiriwe Mutagatifu Vicenti wa Paloti i Gikondo bagera kuri 500. Kuri uwo munsi, Ingabo za Loni ziboneye ubwicanyi bwakorewe abatutsi biganjemo abana muri kiliziya i Gikondo. Uyu munsi kandi ni nabwo abasirikare ba Leta batwitse Abatutsi bari bahungiye mu Mudugudu wa Nyakabanda II munsi ya Hoteli BAOBAB.

Ikinyamakuru cy’abafaransa Libération ni cyo cya mbere cyise ubwo bwicanyi jenoside, mu nyandiko yanditswe n’umunyamakuru Philippe Ceppi wari mu Rwanda igihe cya Jenoside.

4.Abatutsi bakomeje kwicwa ahantu hanyuranye mu gihugu : muri Kibungo, Kigali, Ruhengeri na Kibuye.

Kuri uyu munsi kandi Abatutsi bari bahungiye ku misozi ya Murama, Murundi, MwiriNyamirama na Kabare mu Karere ka Kayonza, kimwe n’abari bahungiye kuri Paruwasi gatolika ya Kabuye mu Murenge wa Jabana mu Karere ka Gasabo barishwe.

Interahamwe zishe Abatutsi muri Segiteri Nyagatare I mu Karere ka Nyagatare ndetse n’abari bahungiye kuri paruwasi ya Zaza muri Kibungo aho guhera tariki ya 09. Ubwo bwicanyi bwarakomeje, ababarirwa hagati ya 500 na 800 bishwe.

Guhera tariki ya 9 mata, Interahamwe zatangiye kwica Abatutsi bari bahungiye i Kiramuruzi mu Karere ka Gatsibo, hamwe n’abari bahungiye ku musozi wa Nyamagumba muri Komine Mabanza muri perefegitura ya Kibuye. Mu minsi yakurikiyeho hishwe abarenga 12000.

Kuri uyu munsi nanone, hishwe Abatutsi bari bahungiye i Nyabikenke, ku biro byahoze ari iby’umurenge wa Karama muri Bumbogo ndetse n’ahandi hantu hatandukanye harimo i Cyabingo , muri perefegitura ya Ruhengeri, muri centre y’ubucuruzi ya Karamano mu Mataba mu Karere ka Gakenke, ku Rusengero rw’Ababatisiti rwa Rusiza muri Kabumba, Perefegitura ya Gisenyi, muri Kiliziya ya Nyundo no mu nkengero zayo, ndetse no muri Maternite ya Nyundo muri Perefegitura ya Gisenyi, ubu ni mu Karere ka Rubavu.

Ahitwa mu Kivuruga muri Komini Cyabingo hari huzuye abasirikare batangiraga Abatutsi bageragezaga guhunga. Uretse aho kuri bariyeri, Abatutsi biciwe i Cyabingo na Busengo. Interahamwe zabishe zazaga kuri kaburimbo ahitwa kuri Mukinga zifite ibiganza by’abo zamaze kwica ; zigakomereza i Rwaza mu yari Komine Ruhondo kwica abandi.

Umusozo

Ubwicanyi bwibasiye Abatutsi bwarakomeje hirya no hino mu gihugu, bukorwa kimwe, ni ukuvuga ko uwitwa Umututsi wese yishwe, abenshi bishwe bahunga. Kuri iyi tariki abenshi biciwe mu nsengero na za Kiliziya, kuko abantu bibeshyaga ko bashobora kuharokokera.

Irambona Eric w'imyaka 30 y'amavuko, yavukiye mu Murenge wa Shangi, mu Karere ka Nyamasheke, mu muryango w'abana barindwi akaba ari na we bucura.

Mu buhamya bwe, Irambona yasobanuye uburyo yakijijwe no kuba yarahinduwe umukobwa akambikwa imyenda y'abakobwa bigatuma arokoka Jenoside yakorewe Abatutsi mu 1994.

Ati 'Jenoside yabaye mfite imyaka 2, nta sura mfite ya Jenoside muri icyo gihe ariko umunsi ku munsi ngenda mbona amafoto nk'uwari uhari, twari abana 7 dusigaye turi abana 4, 3 nibo bapfuye na papa yarapfuye icyo gihe.

Njye banyambitse imyenda y'abakobwa kuko bari bavuze ko bahera ku bahungu bica hanyuma abakobwa bakicwa nyuma. Babonye njye ndi umukobwa, hanyuma ndokoka gutyo.

Abasigaye ni njyewe na mukuru wanjye na bashiki banjye babiri, icyo gihe muri Jenoside bicaga cyane abahungu, abakobwa bo baravuga ngo bazabagereka cyane kuri Habyarimana sinzi ukuntu mbyumva gutyo, abapfuye b'iwacu icyo gihe bari abahungu nanjye nagombaga gupfa kuko nari umuhungu ariko bampinduye umukobwa kuko nari umwana muto bakinyita izina ry'umukobwa bakanyambika n'ikanzu abicanyi baza bakavuga ngo uyu ni umukobwa.

Muri icyo gihe nta muturanyi wabagaho kuko ni we waguhigaga, uko byagenze twarihishe, aho twihishe baravuze ngo kuko abahungu barimo kubica cyane mureke aba ngaba bahungire kuri Kiliziya ya Shangi aho abandi barimo kujya, noneho bakuru banjye baragenda abo ngabo bagiye nibo bapfuye kuko yari nka politiki yo kubakusanyiriza hamwe kugira ngo babice.

Interahamwe zahise zijya aho bagiye, batubwiye ko habaga hari intambara kuko barwanaga n'interahamwe zikaza bakazitera amabuye zigasubirayo kugeza tariki ya 15 Mata 1994 ubwo hazaga igitero kikabica, twe twasigaye twihishe niyo mpamvu twarokotse'.

Jenoside yakorewe Abatutsi ikimara kurangira, bari basigaranye na Mama wabo nubwo bitari byoroshye ariko FARG yarabafashije we n'abavandimwe be babasha kwiga barangiza amashuri yabo. Irambona avuga ko nubwo yakuze agakina umupira ariko kuva kera zitari inzozi ze kuko yari afite inzozi zo kuzaba umusirikare kugira ngo arinde umuryango we ntihazagire umuntu wongera kumukorera ku bagize umuryango we.

Uyu mukinnyi avuga ko kugeza ubu yamaze kwiyubaka ndetse ko umupira w'amaguru akina wamufashije kutigunga kuko yabonye inshuti nyinshi zimuba hafi zigatuma atigunga. Avuga ko sport ari ikintu gikomeye mu buzima bwe. Irambona avuga ko Abanyarwanda bakwiye gukomeza kujya baganira amateka yaranze u Rwanda kugira ngo n'abari bato cyangwa bataravuka, babashe gusobanukirwa neza amateka y'igihugu cyabo.

Irambona Eric avuga ko Abanyarwanda bakwiye kuganira amateka y’igihugu cyabo kugira ngo bafashe abakiri bato

Muri ibi bihe bitoroshye byo kwibuka inzirakarengane zazize Jenoside yakorewe Abatutsi mu 1994, hari imyambaro imwe n'imwe twambaraga mu buzima bwa buri munsi ukwiye kubika mu gihe ugiye mu bikorwa byo Kwibuka biri kuba ku nshuro ya 28.

Ivu ni ryo bara ryatoranyijwe nk'ibara rigomba kuranga ibi bihe bikomeye kuko binafitanye isano n'amateka y'u Rwanda. Mu bihe byo ha mbere, iyo umuryango wagiraga ibyago, abantu bisigaga ivu nk'ikimenyetso cyo kwerekana agahinda kabo.

Iyi ni imwe mu mpamvu ibara ry'ivu ryasimbuye iry'umuhemba (mauve) kuko rikoreshwa cyane mu yindi mico itari iyo mu Rwanda, aho rizwi cyane hakaba mu mico ya Gatolika, aho bakoresha iri bara mu bihe bya Pasika, bizwi nko 'Gusiga Ivu'.

Niyo mpamvu mu bihe nk'ibi turimo, ari ingenzi cyane kwita ku mabara umuntu yambara, byagushobokera ukibanda ku mabara arimo nk'irisa nk'ivu, cyangwa andi mabara nk'umukara, cyane cyane mu gihe wagiye mu bikorwa birimo Kwibuka n'ibindi bihuriza abantu benshi hamwe.

Ushobora kandi no kwambara andi mabara nk'ubururu bwijimye n'andi ari muri uwo murongo, ajya gusa nk'ayijimye, nk'uko abahanga mu by'imyambarire babitangaza.

Mu myambarire kandi hari amabara asa nk'aranga ibyishimo, arimo umuhondo, icyatsi, pink n'andi nk'ayo. Mu bihe nk'ibi ntabwo ari byiza kuyambara cyane. Ibi kandi bijyana n'andi mabara nk'umutuku nayo akwiriye kwirinda muri ibi bihe bikomeye, kuko ashobora no kuba yateza ibyago birimo ihungabana dore ko asa nk'amaraso.

Birumvikana ko umuntu ari we ufite uburenganzira bwo kwambara umwambaro yifuza bijyanye n'imyambaro afite, ariko muri ibi bihe byo Kwibuka Jenoside yakorewe Abatutsi mu 1994, ni ingenzi cyane kwirinda kwambara amabara agaragaza ko umuntu yifatanyije n'abandi bari mu bikorwa byo Kwibuka ku nshuro ya 28.

Umwenda ufite ibara rijya gusa nk’ivu niwo ukwiriye kwambara muri ibi bihe

Abategetsi bo mu Burusiya bashinje YouTube guhagarika shene y'inteko ishingamategeko umutwe w'abadepite y'iki gihugu, ndetse baburira ko hazabaho kwihimura.

Umukuru w'inteko ishingamategeko y'Uburusiya Vyacheslav Volodin ashinja Amerika guhonyora 'uburenganzira bw'Abarusiya', mu gihe umuvugizi wa minisiteri y'ububanyi n'amahanga y'Uburusiya Maria Zakharova avuga ko 'YouTube yirangirije urwayo'.

Ku rubuga rwa Telegram, Volodin yagize ati: 'Leta Zunze Ubumwe [z'Amerika] zirashaka kugira ukwiharira itangazwa ry'amakuru. Ibyo ntitwabyemera'.

Kuri uyu wa gatandatu, ubutumwa bwo kuri YouTube bwavuze ko iyo shene 'yahagaritswe kubera ihonyorwa ry'amategeko y'imikorere ya YouTube', nkuko bitangazwa n'ibiro ntaramakuru Reuters.

Abanyamakuru b'ibiro ntaramakuru AFP bemeje ko urwo rubuga rw'inteko y'Uburusiya rutagerwaho.

Umuvugizi wa ARC (Armée Révolutionaire Congolaise) Major Willy Ngoma ishami rya gisirikare ry’umutwe wa M23, yavuze ko FARDC ifatanyije na Batayo ya FDLR yitwa CRAP iyobowe na Colonel Ruhinda, ndetse na Mai Mai Nyatura.

Yagize ati ” Ubundi ni gute twakiriye aba FDLR, Nyatura mu gisirikare cya FARDC ? Nk’uko M23 twabivuze, hari abasirikare ba leta bakorana n’iyi mitwe kandi byigaragaje.”

“Tuzakomeza kwihagararaho, bigaragara ko twabarashe bariruka bamwe bavanamo imyambaro.”

Iyi mirwano yatangiye ku wa Gatatu taliki 7 Mata 2022.

Ingabo za FARDC zifatanyije na FDLR ndetse na Mai Mai Nyatura bagabye ibitero ku birindiro bikuru by’umutwe wa M23 hafi ya Cyanzu ku kirunga cya Sabyinyo ku ruhande rwa Congo, bitwaje intwaro zikomeye.

Mu mirwano yabaye kuri uyu wa Kane iyobowe na Gen Sultan Makenga wigiriye ku rugamba, hari amakuru ko FARDC yatakaje uduce twa Gasiza, Gisiza, Bugusa, Bikenke, Kinyamahura na Rwambeho muri teritwari ya Rutshuru.

Nyampinga w’u Rwanda 2009, Bahati Grace muri iki gihe cyo Kwibuka Jenoside yakorewe Abatutsi muri Mata 1994, yafashe umwanya yibuka Sebukwe na Nyirabukwe batagize bagira amahirwe yo gutaha ubukwe bwe na Murekezi Pacifique.

Ni ku nshuro ya 28 Abanyarwanda n’ishuti zabo bibuka Jenoside yakorewe Abatutsi muri Mata 1994, mu minsi 100 gusa yatwaye ubuzima bw’inzirakarengane busaga miliyoni bazira uko bavutse.

Miss Bahati Grace, abinyujije ku rukuta rwe rwa Instagram, yibutse ababyeyi b’umuabo we bishwe muri Jenoside.

Post ya mbere yahereye kuri Sebukwe, Raphaël Murekezi wari uzwi nka Fatikaramu, yavuze ibigwi by’uyu mugabo wakiniye ikipe ya Rayon Sports, agashinga ishuri rya ESPANYA.

Ati 'Yari umugabo uzwi kandi ukunzwe. Umugabo wicisha bugufi. Umubyeyi, umwarimu, umukinnyi w’umupira w’amaguru muri Rayon Sports aho nyuma yaje kuba umwe mu batoza. Yashinze ikigo cy’amashuri cya ESPANYA muri Nyanza — Butare. Ni umwe mu bashinze umuryango udaharanira inyungu wa Girumpuhwe wafashije abatishoboye by’umwihariko ababana n’agakoko gatera SIDA, nakomeza nkavuga byinshi byiza yafashije abaturage n’umuryango we. Ibigwi bye bizahoraho iteka. Yasize abana babiri muri 5.'

Yakomeje avuga ko abana be babiri yasize bateye ikirenge mu cye mu bikorwa by’ubugira neza yakoraga, ahamya ko ibigwi bye bizahoraho iteka ryose.

Ati 'Olivier wari umwana wa 3 na bucura bwe Paicifique (ari we mugabo we). Bombi barazwe imico ye. Olivier yateye ikirenge mu cyawe mu gukunda abantu, aho umuntu akeneye ubufasha abari ari yo kugira ngo icyo amufasha, simvuze umukinnyi w’umupira w’amaguru na Volleyball yavuyemo. Pacifique yarazwe byinshi byawe, umugabo wo kwizerwa, wicisha bugufi, ugira impuhwe n’umugabo witangiye umuryango we. Ibigwi byawe bizabaho kugeza igihe cyose tukiri ku Isi.'

Avuga kuri Nyirabukwe, Josepha, yavuze ko yari umubyeyi mwiza kuri benshi ariko na none ngo yagiraga igitsure.

Ati 'Baravuga ngo buri ruhande rw’umugabo mwiza ahaba hari umugore mwiza, Mama Regis nk’uko abantu benshi bamwitaga, yari azwi neza nk’umurezi ndetse n’umubyeyi kuri benshi. Yari umubyeyi mwiza ariko w’igitsure. '

Nubwo yari afite igitsure ariko ngo yemereraga abana be buri umwe kujya mu byo yumva yifuza ariko na none biri mu murongo mwiza atari ibimushora mu ngeso mbi.

Ngo yari kandi umugore wo kwizerwa weguriye ubuzima bwe guhindura imibereho y’abamuri hafi, yizeraga Imana ndetse atanga ibitambo byinshi kugira ngo abone ibitunga abana be 5 kandi nk’umuntu wari mukuru mu muryango wabo, yagize uruhare mu kurera abavandimwe be.

Akomeza avuga ko yari umubyeyi waharaniye uburezi bw’umwana w’umututsi kugeza aho we n’umugabo we bashinze ikigo cy’Amashuri i Nyanza.

Ati 'Yari umurezi ariko yabuze ibikoresho by’uyu munsi kugira ngo akangurire benshi ariko yakoresheje buri gikoresho cyari gihari mu gihe cye. Nubwo bagezweho n’amarorerwa kubera ko bavutse ari Abatutsi, bakomeje kwihangana kandi ibyo bakoze byose byaranzwe n’icyerekezo kinini; kumva no guhangayikishwa no kwangirwa kwiga ku Batutsi, byaje kuvamo ko bafatanyije n’inshuti zabo bashinze ikigo cy’amashuri i Nyanza aho buri umwe yabashaga kubona uburezi.'

Bahati Grace akaba yarashakanye na bucura muri uyu muryango, Murekezi Pacifique, ni mu bukwe bwabaye muri Nzeri 2021 aho ababyeyi b’uyu musore batabonye ibirori bye kuko bitabye Imana muri Jenoside yakorewe Abatutsi muri Mata 1994.

Olivier (ubanza iburyo) na Pacifique (uwo nyina ateruye) ni bo bonyine babashije kurokoka muri uyu muryango, abandi bavandimwe babo (batatu babanza iburyo) bicanywe n’ababyeyi babo muri Jenoside

Josepha ngari umubyeyi kuri benshi

Ntabwo bagize amahirwe yo gutaha ubukwe bwa bucura wabo