Category: Uncategorized

Kuri uyu wa Kane tariki ya 5 Gicurasi 2022, Minisiteri ya Siporo (MINISPORTS) ifatanyije na Minisiteri y'Urubyiruko n'Umuco (MYCULTURE) na Komite Olempike y'u Rwanda (RNOSC), n'Inama nkuru y'Abahanzi (RAC), bibutse abari abakozi ba MIJEUMA, abakinnyi, abahanzi ndetse n'inshuti n'abafatanyabikorwa batezaga imbere Siporo n'Umuco bazize Jenoside yakorewe abatutsi mu 1994. 

Iki gikorwa cyabereye ku rwibutso rwa jenoside rwa Kigali ruherereye ku Gisozi, cyari cyitabiriwe n'abayobozi muri Guverinoma, abagize ingaga za siporo, abahanzi batandukanye, abakinnyi mu mikino itandukanye, ababuze ababo bakoraga muri MIJEUMA ndetse n'itangazamakuru.

Minisitiri Munyangaju na Minisitiri Mbabazi bashyize indabo ku mva

Iki gikorwa cyabimburiwe no gushyira indabo ku mva zishyinguyemo abazize Jenoside yakorewe Abatutsi mu 1994 bashyiguye mu rwibutso rwa jenoside rwa Kigali mu rwego rwo kubunamira no kubasubiza agaciro bambuwe.

Minisitiri w'Urubyiruko n'Umuco, RoseMary Mbabazi na Minisitiri wa Siporo Munyangaju Aurore Mimosa bafatanyije n'abakozi, abahanzi n'abakinnyi batandukanye gucana urumuri rw'icyizere nk'ikimenyetso cy'uko bazahora bazirikana bagenzi babo bazize Jenoside yakorewe Abatutsi.

Muri iki gikorwa, abahanzi n'abakinnyi batandukanye bibutse bamwe mu bari abakozi ba MIJEUMA, abahanzi, abakinnyi n'abatezaga imbere urubyiruko, siporo n'umuco bagenzi babo babavuga mu mazina, nk'ikimenyetso cy'uko batazazima bazahora bibukwa.

Hon. Mbabazi yakebuye urubyiruko arwibutsa ko rugomba guhangana n’abapfobya bakanahakana Jenoside yakorewe Abatutsi

Mu ijambo ry'ikaze, Minisitiri RoseMary Mbabazi yihanganishije imiryango y'abari abakozi ba MIJEUMA n'abafatanyabikorwa mu guteza imbere urubyiruko, umuco na siporo bazize Jenoside yakorewe Abatutsi mu 1994 abifuriza gukomera no kudaheranwa n'agahinda.

Minisitiri Mbabazi yavuze ko hari abakozi muri MIJEUMA bagize uruhare muri Jenoside yakorewe abatutsi mu 1994, ndetse muri bo bishe bagenzi babo bakoranaga, akebura urubyiruko.

Avuga ko MIJEUMA yagize uruhare mu ngengabitekerezo ya Jenoside kuko banateye inkunga abashakaga kwica Abatutsi babafasha muri byose ndetse banifashishije ubuhanzi. Yavuze ko Jenoside yari yarateguwe kuko utakumva ukuntu mu minsi 100 abantu barenga miliyoni bari bamaze kwicwa.

Ati'Muri MIJEUMA hari abakozi bagize uruhare muri Jenoside yakorewe Abatutsi mu 1994, kandi abenshi bari urubyiruko, nkaba mboneyeho kwibutsa urubyiruko, bahanzi, bakinnyi nimwe Rwanda rwejo hazaza, mubyo mukora byose mu bisata muherereyeho, mukangurire abantu kurwanya Jenoside n'ingengabitekerezo yayo mubinyuza mu ndirimbo zanyu, muri filime mukina cyangwa mu mu mivugo'.

Hon.Mbabazi yibukije urubyiruko ko ari imbaraga z'Igihugu abasaba kugira uruhare rufatika mu bikorwa byo kurwanya ihakana n'ipfobya rya Jenoside yakorewe Abatutsi, hamwe n'ikwirakwizwa ry'ingengabitekerezo ya Jenoside bikorerwa cyane cyane ku mbuga nkoranyambaga.

Ngabo Olivier ushinzwe gahunda muri IBUKA yavuze ko kwibuka abazize Jenoside yakorewe Abatutsi mu 1994 ari umwanya wo kuganira ku mateka abantu bakumva aho igihugu cyavuye bakanareba n'aho kigana.

Ngabo umuyobozi muri IBUKA 

Mu ijambo rye, Minisitiri Munyangaju yibukije abagize uru rwego rugizwe ahanini n’urubyiruko, inshingano zabo mu guhangana n'abahakana ndetse n'abapfobya amateka ya jenoside yakorewe Abatutsi mu 1994 agaruka ku mahitamo y’Abanyarwanda yo kuba umwe.

Minisitiri Munyangaju yibukije urubyiruko ko rugomba kuba umusemburo w’ibisubizo by’igihugu kuko aribo Rwanda rwejo rutezweho byinshi n’igihugu.

Asoza ijambo rye ry'uyu munsi, Minisitiri Munyangaju yongeye kwihanganisha imiryango y'abari abakozi ba MIJEUMA hamwe n'abafatanyabikorwa bayo. Yibukije abitabiriye uyu muhango ko Abanyarwanda dufite Igihugu cyiza kiba hafi abaturage bacyo kandi cyiyemeje kubafasha kwiteza imbere.

Minisitiri Munyangaju Aurore Mimosa avuga ko urubyiruko rukwiye kuba umusemburo w’ibisubizo

Yongeyeho kandi ko kurwanya ingengabitekerezo ya Jenoside n'abapfobya Jenoside yakorewe Abatutsi ari urugendo abantu badakwiye kurambirwa, ahubwo ko bakwiye gufatanya nk'inshingano bahuriyeho nk'abanyagihugu.

MIJEUMA yashyizweho mu 1972. Muri 1994, MIJEUMA yari ifite amashami atatu ariyo; Ubuyobozi bukuru bushinzwe siporo n'imyidagaduro n’ubuyobozi bukuru bushinzwe amashyirahamwe, ubuyobozi bukuru bushinzwe urubyiruko.

Mu mpera za Werurwe 1994, MIJEUMA yari ifite abakozi 544. Muri aba bakozi, hari abakoreraga ku cyicaro cya minisiteri, abandi bagakorera kuri za Perefegitura, Superefegitura na Komini no mu bigo by'amahugurwa y'urubyiruko (CFJ) byari hirya no hino mu gihugu.

Muri aba bakozi, Abatutsi bari 49 bahwanye na 9% y'abakozi bose. Mu 1994, nta mututsi n'umwe wari ukibarizwa mu mwanya w'ubuyobozi kubera umwuka mubi wa politiki. Muri aba bakozi, 37 (75%) ni bo bishwe muri Jenoside yakorewe Abatutsi mu Rwanda muri Mata 1994, 12 bararokoka.

Abatutsi bavutswaga uburenganzira bwabo (Abemerewe kujya kwiga barangiza ntibasubizwe mu mirimo yabo; Urugero: Oscar Ruzagiriza; Nehemie Mureramanzi).

Iyimurwa mu kazi ryakorerwaga Abatutsi hatitawe ku mategeko agenga umurimo. Ivangura ry'amoko ryari ryarimakajwe mu gihugu ryagaragaraga muri MIJEUMA, Mu bakozi ba MIJEUMA bo mu bwoko bw'Abatutsi batanageraga ku 9% y'abakozi bose, kandi bakoraga imirimo yo hasi irimo ubwanditsi, gutwara imodoka cyangwa ubukangurambaga.

Hashyizwe indabo ku mva ziruhukiyemo inzirakarengane riruhukiye mu rwibutso rwa Kigali

Minisitiri Munyangaju na Minisitiri Mbabazi bacanye urumuri rw’icyizere

Umuhanzi Andy Bumuntu yari yitabiriye iki gikorwa

Umukinnyi ukina umukino wo gusiganwa ku magare Samuel Mugisha 

Iki gikorwa cyari cyitabiriwe n’ibyamamare bitandukanye mu Rwanda

Itangazo ryashyizweho Umukono na Minisitiri w’Intebe, Dr Ngirente Edouard ryo kuri uyu wa Kane tariki 5 Gicurasi 2022 rivuga ko 'Ashingiye ku biteganywa n’Iteko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 116;

None ku wa 5 Gicurasi 2022, Nyakubahwa Perezida wa Repubulika [Paul Kagame] yahagaritse’ ku mirimo Bwana Bamporiki Edouard wari Umunyamabanga wa wa Leta muri Minisiteri y’Urubyiruko n’Umuco kubera ‘ibyo agomba kubazwa akurikiranyweho.'

Kuva mu gitondo cyo kuri uyu wa Kane, abakoresha imbuga nkoranyambaga bahererekanyije amakuru avuga ko Bamporiki yatawe muri yombi. Gusa, 

Ku mugoroba wo kuri uyu wa Kane, Urwego rw'Igihugu rw'Ubugenzacyaha (RIB) rwatangaje ko “Bamporiki Edouard wari Umunyamabanga wa Leta muri Minisiteri y’Urubyiruko n’Umuco akurikiranweho icyaha cya ruswa n’ibyaha bifitanye isano nayo’.

RIB yavuze “Iperereza ku byaha akurikiranweho rikaba rikomeje mu gihe afungiwe iwe mu rugo.”

Tariki 4 Ugushyingo 2019, nibwo Bamporiki usanzwe ari umuhanzi yagizwe Umunyamabanga wa Leta muri Minisiteri y'Urubyiruko n'Umuco. Ni nyuma imyaka isaga itatu yari ishize ari umuyobozi w'Itorero ry'Igihugu.

   

Bamporiki wari Umunyamabanga wa Leta muri Minisiteri y'Urubyiruko n'Umuco, yahagaritswe ku mirimo kuva kuri uyu wa Kane

Hagiye gushira ibyumweru bibiri abatuye Umujyi wa Kigali no mu nkengero zawo batabona amazi atangwa n'Ikigo Gishinzwe Amazi, Isuku n'Isukura (WASAC) kandi ariyo barambirijeho.

Hari ubwo yagendaga rimwe akaza ariko byahumiye ku murari ku wa Gatandatu tariki ya 30 Gicurasi 2022 ubwo yagendaga none kugeza ubu mu matiyo y'abakoresha aya mazi nta n'igitonyanga.

Nk'uko WASAC ikunze kubivuga, amazi ni ubuzima. Imirimo ya muntu yose ikenera amazi kugira ngo akomeze kubaho ariko ubu biragoye cyane ku batuye uyu Mujyi kuko amazi ari kubona umugabo agasiba undi.

Iki kibazo kiri hirya no hino aho usanga ijerekani y'amazi iri hagati ya 300 Frw na 1500 Frw bitewe n'agace uherereyemo.

Bamwe mu baturage baganiriye na IGIHE bayibwiye ko bagowe n'iki kibazo kuko batabasha gukomeza imirimo yabo ndetse bakaba bari kugura amazi abahenze kandi adasukuye.

Nshimiyimana Desire atuye mu Murenge wa Muhima mu Kagari ka Rugenge, amaze ibyumweru birenga bibiri adafite amazi, yavuze ko bagura amazi yo mu gishanga ku 1000 Frw.

Ati 'Tugowe n'amazi dutuma, amazi mu gishanga hano hahoze hakorerera ULK, umuntu utuma ijerekani umuha 100 0Frw ubwo uko aba menshi niko amafaranga yikuba.'

Yakomeje ati 'Uyu muntu umutuma saa Moya akukugeraho nka Saa Tanu, icyo gihe cyose gahunda zawe ziba zapfuye kandi akakuzanira amazi asa nabi ku buryo bigoye kuyakoresha ibintu byose.'

Umutesi Chantal atuye mu Murenge wa Remera yavuze ko hagiye gushira icyumweru nta mazi bafite, kugira ngo babashe kubona ayo gukoresha batuma abanyonzi ku giciro kiri hagati ya 500 Frw na 1000 Frw.

Ati 'Nko ku Cyumweru twagize amahirwe imvura iragwa aba ariyo dukoresha ariko yarashize ubu tujya ku muhanda gushaka abanyonzi dutuma, bitewe n'uko mwumvikanye akakuzanira.'

Yakomeje ati 'Ubuzima buragoye, reba ibiciro biri ku isoko n'ugize amahirwe yo kugira icyo agura kubona amazi yo kugiteka biba ibibazo, rwose aho u Rwanda rugeze ntabwo twakabaye tubaho gutya.'

Umuturage wo mu Murenge wa Gatsata, twamusanze muri Nyabugogo ari kuvoma amazi ya Nyabarongo, abajijwe impamvu avuga ko atabona ubushobozi bwo kugura ijerekani ya 300 Frw.

Ati 'Amazi hano yarabuze ijerekani iri kugura 300 Frw. Twe ko tubasha kugera hano kuri Nyabarongo ubasha nko kugura ayo kunywa no gutekesha wenda ariko indi mirimo dukoresha aya hano.'

Manizabayo Phenias utuye ku Gisozi yavuze ko ubuzima bumaze kubananira agereranyije ibiciro bisanzwe byariyongereye, byiyongeraho n'ibura ry'amazi.

Ati “Nkumbuye amazi. Ubuzima bwarushijeho kugorana. imibereho y'i Kigali isanzwe itatworoheye, kongeraho amajerekani atatu y'amazi ku munsi, aratuma birushaho kuzamba. Leta nitabarire hafi.''

Usibye aba kandi ku mbuga nkoranyambaga abaturage bakomeje kwandika bagaragaza ko babangamiwe n'ikibazo cy'ibura ry'amazi, benshi babaza WASAC uburyo iki kibazo kizakemuka.

Bamwe mu basubije ubutumwa bwa IGIHE bwanyujijwe ku mbuga nkoranyambaga bagaragaje ko babangamiwe n'iki kibazo bityo ko hakwiye kugira igikorwa mu maguru mashya.

Uwiyita Kavukire kuri Twitter yagize ati 'Iyo abenshi mu Mujyi wa kigali tugiye gusenga dusaba Imana ngo abayobozi b'Ikigo WASAC beguzwe ariko Imana ntiradusubiza, ariko ngo isubiriza igihe bararye bari menge, ibyumweru bibiri muri Kigali nta mazi koko.'

Uwitwa Ntigurirwa Fabien Miracle, yagize ati 'Twebwe ku Gisozi tugiye kwimuka kuko ijerekani imwe iri kugura 1500 Frw.'

Ruzindana serge ati 'Gisozi ho turi gukaraba Jibu kuko niyo ihendutse kurusha kwishyura abantu bajya kukuvomera amazi ahandi. Duheruka amazi kera cyane mudufashe rwose ubuzima buri guhagarara.'

Abanyujije ibitekerezo byabo kuri Facebook bo bahurije ku kuba barambiwe no kugura ijerekani y'amazi ku 1000 Frw.

Byagenze bite ngo amazi abe ay'ibura?

Nubwo ikibazo cy'amazi kimaze ibyumweru bibiri kivugwa, cyakajije umurego kuva ku wa Gatandatu, bitewe n'uko imiyoboro ikura amazi mu Ruganda rwa Nzove yangiritse igacomoka, bigatuma amazi adakomeza gusakara.

Uru ni Uruganda rutanga amazi mu bice bya Runda, Rugalika, Gihogwe, Kabuye, Nyarutarama, Kibagabaga, Kinyinya, Bumbogo, Rukiri-Gishushu-Remera, Nyakabanda, Gisozi, Kamatamu, Meredien, Faisal, Kanserege, Kimihurura, Rugando, Gacuriro, Kagugu, Rwankuba, Kami na Gasanze.

Umuyobozi muri WASAC ushinzwe gukwirakwiza Amazi mu mijyi, Rutagungira Methode, yasobanuye uko byagenze ngo habeho ikibazo cyateje ibura ry'amazi.

Ati 'Havutse ikibazo kubera imyuzure imaze iminsi, yagiye ikuraho itaka ubusanzwe uburemere bwaryo nibwo bufata aya matiyo, ryavuyeho uburemere buba buke amatiyo aratandukana.'

Yakomeje avuga ko imirimo yo gusana iyi miyoboro igeze kure ndetse ko 'abaturage bari bubone amazi bidatinze'.

Ati 'Ubu turi kongera kuyahuza no gutsindagira, amakamyo ari kuzana itaka ngo tubashe gutsindagira. Twizera ko amazi aboneka vuba.'

Usibye aho amazi yabuze ku wa Gatandatu, uyu muyobozi yasobanuye ku kibazo cy'amazi amaze ibyumweru bibiri yaragiye mu Murenge wa Muhima, avuga ko umuyoboro waho wari wagize ikibazo.

Ati 'Mu Kiyovu dufite umuyoboro uturuka Kagugu ugera Nyabugogo ahitwa ku Ndagara, wari wapfuye mu gihe tugiye kuwukora aha haba harangiritse. N'ubundi ntacyo twari kuwukoraho kuko ubona amazi aturutse aha.'

Si ubwa mbere ikibazo cy'amazi gica igikuba mu Mujyi wa Kigali, benshi bakibaza impamvu iki kibazo kitabonerwa umuti urambye.

Rutagungira yavuze ko hari gahunda yo kubaka inganda zitandukanye hirya no hino kugira ngo ikibazo cy'ibura ry'amazi gikemuke.

Ati 'Iyo Uruganda rwa Kanzenze ruba rudahari ubu Umujyi wose wari kuba usinziriye, aho kugira ngo dukomeze kubaka inganda inzira imwe hatangiye gahunda yo kugenda tuzishyira n'ahandi kugira ngo uruhande rumwe nirugira ikibazo urundi rube ari ruzima.'

Yakomeje ati 'Ingamba zihari ni uko hari izindi nganda zizubakwa duteganya ko mu mwaka wa 2026 haba hagize urundi rwuzura mu bice by'Iburasirazuba kugira ngo amazi aturuke hirya no hino tuyahurize mu mujyi hagati, hamwe nihaba ikibazo ahandi hakore.'

WASAC yahumurije abaturage bo mu Mujyi wa Kigali no mu nkengero zawo ko bari butangire kubona amazi mu gihe kitarenze amasaha 24.

---

Rock & Roll Hall of Fame ni inzu ndangamurage yahariwe gushyirwamo abahanzi bageze ku bikorwa by’indashyikirwa n’amateka yabo. Iherereye mu gace ka Ohio ho muri Cleveland muri Leta Zunze Ubumwe za Amerika. Rock & Roll Hall Of Fame kuva yashingwa mu 1983 iri ku isonga mu gushyirwamo abahanzi bakomeye ndetse n’abahanzi benshi baharanira kuyijyamo nubwo bose atariko bibahira.

Buri mwaka hakaba hatangazwa abahanzi batoranijwe kushyirwa mui iyi nzu ndangamurage y’umuziki. Mu masaha macye ashize ni bwo hasohotse urutonde rw’abahanzi bagiye gushyirwa muri Rock & Roll Hall of Fame 2022.

CNN yatangaje ko urutonde rwabagiye gushyirwa mu nzu ndangamurage ya Hall of Fame rugizwe n’abahanzi 14 bakora injyana z’itandukanye. Muri aba bahanzi barangajwe imbere na Pat Benatar icyamamarekazi mu njyana ya Rock. Umuraperi kabuhariwe Eminem nawe agaragara kuri uru rutonde by’umwihariko akaba ari namwe muraperi wenyine ugiye gushyirwa muri Rock & Roll Hall Of Fame 2022. Icyamamare mu njyana ya R&B Lionel Richie nawe ari mu bahanzi batoranijwe bazashyirwa muri iyi nzu ndangamurage.

Urutonde rw’abahanzi bagiye gushyirwa muri Rock & Roll Hall Of Fame 2022.

Abandi bahanzi bakomeye baje kuri uru rutonde kandi harimo umuhanzikazi w’icyamamare Dolly Parton ukora injyana ya Country Music wamamaye kuva mu 1974. CNN yatangaje ko uru rutonde rwishimiwe n’abenshi kuko rwagaragayeho abahanzi bakoze amateka mu muziki kandi bamaze igihe kinini bakora uyu mwuga kuburyo igihe cyabo cyari kigeze ngo bashyirwe muri Hall of Fame. Eminem, Lionel Richie na Dolly Parton bagiye kuri uru rutonde barusanzeho ibindi byamamare nka Jay Z, Micheal Jackson, Nipsey Hussle, 2 Pac, Whitney Houston, Elvis Presley hamwe n’abandi benshi bagiye baca uduhigo mu muziki.

Dolly Parton, Eminem na Lionel Richie mu bahanzi bagiye gushyirwa muri Rock & Roll Hall Of Fame 2022

Juno Kizigenza yabwiye INYARWANDA ko yagiye muri Uganda muri gahunda yo kuhafatira amashusho y'indirimbo ye yakoranye na Bushali [Nawe bari kumwe muri Uganda] ndetse n'indirimbo ye bwite ashaka gushyira ahagaragara mu minsi iri imbere.

Avuga ko ageze muri Uganda yahahuririye n'uyu muhanzi Grenade, baraganira biyemeza gukorana iyi ndirimbo. Yavuze ko bari kuganira ku ku buryo bwo gukora ‘Audio’ ndetse n'amashusho (Video) mbere y'uko agaruka mu Rwanda.

Kizigenza ati 'Twahuriye muri Uganda. Turaganira, turahuza, twemeza gukorana indirimbo. Gusa, ubu sinavuga ngo izasohoka [Indirimbo] ryari. Kimwe n'uko nshobora kuzishyira hanze zose [Indirimbo eshatu ari gukora].”

Grenade uri gukorana indirimbo na Juno Kizigenza ni umwe mu bahanzi bagezweho muri Uganda, kuva mu mwaka w'2019 yashyira hanze indirimbo ye yise 'Nkuloga'.

Yavutse yitwa Dewis Ndugwa, avukira ahitwa Lyantode muri Uganda mu 1997. Amashuri abanza yize ahitwa Kitebi ayisumbuye yiga Makindye.

Uyu muhanzi yaririmbye mu bitaramo bikomeye birimo African Music Festival cyabereye mu Mujyi wa Dubai. Azwi mu ndirimbo ziirmo “Olimba,” “Mpulira Bibyo,” 'Amen' n'izindi.

Juno Kizigenza uherutse gusohora indirimbo 'Urankunda' yatangaje ko ari gukorana indirimbo na Grenade ugezweho muri Uganda 

Grenade yagize izina rikomeye kuva mu 2019 ubwo yasohoraga indirimbo 'Nkuloga'

KANDA HANO UREBE AMASHUSHO Y'INDIRIMBO 'NKULOGA' YA GRENADE

Umutoza wa Manchester City Pep Guardiola, ubu ahanze amaso igikombe cya Premier League nyuma yo gusezererwa muri Champions League, aho ikipe ye irusha inota rimwe Liverpool iyikurikiye ku mwanya wa kabiri, mu gihe hasigaye imikino ine ngo shampiyona irangire.

Pep Guardiola yashavujwe cyane no gusezererwa na Real Madrid

Agaruka ku gutsindwa na Real, Guardiola yagize ati: “Birakomeye kuri twe, sinabihakana”.

Yabwiye igitangazamakuru BT Sport ati: “Ntitwakinnye neza cyane uko dushoboye, ariko ni ibisanzwe, muri kimwe cya kabiri, abakinnyi bumva igitutu no gushaka kubikora. Iby’umupira w’amaguru ntumenya uko bigenda, ni umukino nk’uyu ubiboneraho. Tugomba kubyemera.

Twari turi hafi cyane y’umukino wa nyuma wa Champions League, tubibuze mu kanya gato cyane.

Ubu dukeneye kubyakira tukabivamo, hamwe n’abantu bacu iwacu ndetse no mu mikino ine ya nyuma dufite muri shampiyona”.

Umutoza wa Real Carlo Ancelotti, ubaye umutoza wa mbere ugeze ku mikino ya nyuma itanu ya Champions League, yagize ati:

“Sinshobora kuvuga ko tumenyereye kubaho ubuzima nk’ubu, ariko ibyabaye iri joro byabaye ku mukino wa Chelsea no ku mukino wa Paris Saint-Germain”.

Ni ngombwa kuvuga impamvu yabyo, ni amateka y’iyi kipe adufasha gukomeza guhatana n’iyo biba bisa nkaho ibyacu byarangiye'.

Carlo Ancelotti yanyuzwe n’uburyo ikipe ye yitwaye muri uyu mukino

Real Madrid izahura na Liverpool ku mukino wa nyuma wa Champions League uteganyijwe tariki ya 28 Gicurasi 2022, umukino uzabera i Paris mu Bufaransa.

Real Madrid izahura na Liverpool ku mukino wa nyuma

Ku uyu wa Katatu tariki 5 Gicurasi 2022,nibwo hasojwe imikino ya 1/4 mu gikombe cy’Amahoro aho ikipe ya Police FC yabaye ikipe 4 izakina 1/2 nyuma y’uko (…)

Minisiteri y’Uburinganire n’iterambere ry’umuryango (MIGEPROF), iratangaza ko umuti urambye wo guca burundu ihohoterwa rishingiye ku gitsina, ugomba guturuka (…)