Ibi bikorwa bikomeye muri siporo nyarwanda byitabiriwe n’abayobozi batandukanye b’akarere ka Ruhango, barimo na Mayor Habarurema Valens.

Mbere ya saa sita habaye igikorwa cyo kwibuka abari abakinnyi ba Volleyball bazize jenoside yakorewe Abatutsi mu 1994, nyuma ya saa sita haba imikino itandukanye mu gikorwa cyo kumurika ku mugaragaro ko ikipe ya Ruhango Volleyball Club yagiye mu maboko y’akarere.

Mu mikino yabaye mu kumurika Ruhango Volleyball Club nk’ikipe yagiye mu maboko y’akarere, yitabiriwe n’amakipe atatu arimo Unite Volleyball Club (UVC), Ruhango Volleyball Club na St Aloys Rwamagana.

Buri kipe yagiye ihura n’indi, bivuze ko buri kipe yakinnye imikino ibiri aho UVC yayitsinze yombi, Ruhango Volleyball Club itsinda umwe, itsindwa undi, mu gihe St Aloys Rwamagana yatsinzwe imikino ibiri yombi.

Ikipe ya UVC yabaye iya mbere yegukana igikombe, Ruhango Volleyball Club iba iya kabiri mu gihe St Aloys Rwamagana yabaye iya gatatu.

Mu busanzwe ikipe ya Ruhango Volleyball Club yari iy’ikigo cy’ishuri rya Indangaburezi ariko Akarere ka Ruhango kakaba kabaga hafi y’ikipe kayifasha muri byinshi, gusa magingo aya Ruhango Volleyball Club yagiye mu maboko y’akarere, niko kagiye  kujya kayirebera mu buzima bwayo bwa buri munsi.

Kapiteni w’ikipe ya Ruhango Volleyball Club, Nirere Aliane yasabye ubuyobozi bw’akarere ka Ruhango kugura abakinnyi barimo n’abakomoka hanze y’u Rwanda, kugira ngo bagere ku ntego biyemeje.

Yagize ati”Mu byukuri kugira ngo ikipe yacu igere ku rwego rwo guhatanira igikombe, birasaba ko ubuyobozi bwatugurira abakinnyi baturutse ahandi barimo n’abanyamahanga”.

Gatete Jean Claude utoza ikipe ya Ruhango Volleyball Club, avuga ko mu gihe ubuyobozi bw’akarere buzashyira mu bikorwa ibyo basezeranyijwe, Ruhango Volleyball Club igomba kwitegwa muri Champions League n’andi marushanwa akomeye.

Ati”Muri rusange ikipe yari ibayeho inafashwa n’akarere ariko tukagira ikibazo ko umukinnyi wigaragazaga yahitaga ajya mu makipe akomeye, gusa nkurikije ibiganiro twagiranye n’ubuyobozi bw’akarere ni uko hari byinshi bigiye guhinduka, birimo Staff, kugura abakinnyi bashya barimo n’abo hanze, n’ibindi.

Ruhango Women Volleyball Club mwayitegaho ko ari ikipe igiye guhangana na APR, RRA n’andi makipe akomeye, mwayitegaho ko ari ikipe ishobora kujya muri Champions League igihe cyose ubuyobozi bw’akarere bushyize mu bikorwa ibyo bwadusezeranyije”.

Umuyobozi w’akarere ka Ruhango (Mayor), Habarurema Valens yavuze icyatumye iyi kipe bayishyira mu biganza byayo ndetse n’icyo bayitezeho.

Ati”Hari ikipe y’abana b’abakobwa bakina kandi bakina neza, twafatanyaga n’ikigo cy’Indangaburezi, ariko twaratekereje dusanga tugomba gushyiramo imbaraga kugira ngo tube twagira ikipe ifatika yajya mu cyiciro cya mbere, ikaba intego nyamukuru y’akarere ka Ruhango kuba hano hari icyicaro cy’ikipe y’abakobwa ikomeye nk'uko i Gisagara hari ikipe y’abahungu ikomeye, mu Ntara rero twamaze kubisobanura y'uko iyo kipe igomba kubarizwa hano mu Ruhango.

Ni ini twarangije, twatangije ikipe,  ibibuga birahari hari n’inyubako duteganya kuvugurura muri Nyakanga kugira ngo hubakwe ‘Jimunazi’ izajya iberamo imikino abantu baticwa n’izuba.

Birashoboka ko twazana abakinnyi bashya bunganira abo basanzwe cyangwa tugakomezanya n’aba bana, ariko igihari ni uko nta kipe yatsinda idafite abakinnyi bakomeye.

Mu byukuri, tugamije iterambere ry’abana b’abakobwa bafite impano yo gukina Volleyball ku buryo bazaserukira Ruhango n’igihugu muri rusange.

Ikindi turashaka ibyishimo by’ababyeyi b’aba bana, ibyishimo byabo ni ukubona abana bakina bagatsinda bagateranya imbaga y’abaturage bakishima, banava gukina tukabakira ibyishimo bigasakara mu baturage hose”.

Uyu muhobozi yijeje abaturage bo mu karere ka Ruhango ko bagiye kubaka ikipe ikomeye, izahatanira ibikombe bikomeye muri Afurika.

Ruhango Women Volleyball yegukana buri gihe igikombe gihuza amashuri yisumbuye mu Rwanda, ndetse bakaba baregukanye ibikombe bibiri byo mu karere ka Afurika y’u Burasirazuba.

Igikorwa cyo kwibuka abari abakinnyi ba Volleyball bazize Jenoside yakorewe Abatutsi mu 1994 nicyo cyabimburiye ibindi

Mayor wa Ruhango Valens yari yitabiriye iki gikorwa

Habayeho kunamira no gushyira indabo ku mva z’abazize Jenoside yakorewe Abatutsi mu 1994

Habayeho igikorwa cyo gutangaza ko Ruhango Volleyball Club yagiye mu maboko y’akarere

Ikipe ya UVC yari imwe mu makipe yari ahataniye igikombe mu muhango wo gutangaza ko Ruhango Volleyball Club yagiye mu maboko y’akarere 

St Aloys Rwamagana nabo bari bitabiriye

Habaye imikino itandukanye hashakwa ikipe yegukana igikombe

Ikipe ya UVC niyo yegukanye igikombe itsinze imikino yombi yakinnye

Umuyobozi y’akarere ka Ruhango yateguje abaturage ikipe izabaha ibyishimo

Ikipe y’igihugu y’u Rwanda yageze muri Afurika y’Epfo aho igiye gukina na Mozambique umukino wo gushaka itike y’igikombe cy’Afurika cya 2023.

Ku isaha ya saa 10:07′ nibwo indege yari itwaye Amavubi agiye gukina na Mozambique umukino wa mbere wo mu itsinda L mu gushaka itike y’igikombe cy’Afurika cya 2023 kizabera muri Côte d’Ivoire yari ihagurutse ku kibuga mpuzamahanga cya Kigali i Kanombe.

Yabanje gukora urugendo rw’amasaha abiri aho yanyuze Zambia, saa 12:11′ yari igeze kuri Kenneth Kaunda International Airport i Lusaka.

Yahamaze isaha irimo kunywa amavuta maze saa 13:19′ ihaguruka Lusaka yerekeza Johannesburga, yageze kuri O.R Tambo International Airport saa 15:03′.

Yahise ikora urugendo rw’iminota 38 yerekeza kuri Gold Reef City Park Hotel, hoteli igomba gucumbikamo mu gihe cy’iminsi 5 izamara muri Afurika y’Epfo, iri hafi y’ikibua cya First Bank National Stadium (FNB) izakira uyu mukino.

Nta myitozo yakozwe umutoza yatanze akaruhuko, bahise bereka ibyumba bagomba kuraramo ndetse bafata amafunguro ya nimugoroba, bazatangira imyitozo ejo bakorera ku kibuga cya Mamelodi Sundowns ikoreho imyitozo, ni mu gihe ku wa Gatatu izakorera kuri FNB ahazabera uyu mukino tariki ya 2 Kamena 2022.

Muri rusanze abakinnyi bahageze nta n’umwe ufite ikibazo, morale yari yose cyane ko nta ngorane zigeze ziboneka mu rugendo aho ikipe yanyuze hose, byatumye Kigali — Johannesburg ikoresha amasaha 5.

Umutoza Carlos Ferrer yavuze ko ikintu cya mbere yishimira ari uko nta kibazo ikipe yigeze ihurira nacyo mu nzira.

Ati 'Urugendo rwari rwiza, nta ngorane, nta gukererwa, turahageze tugomba gutangira gutekereza ku mukino wacu kuri ubu ntabwo twakoze imyitozo hano, reka dutegereze mu gitondo turebe uko abakinnyi bameze, ikirere uko kimeze, buri kimwe. Ubu dufite iminsi 3 imbere yacu yo gutekereza ku ntego zacu, ni ugukina na Mozambique.'

Yakomeje avuga ko baramutse batsinzwe uyu mukino byamubazaza kuko ari umukino w’ingenzi nubwo mu mikino yatambutse u Rwanda rutitwaye neza.

Ati 'Ni umukino w’ingenzi, ntabwo ari uwa nyuma kuko ni wo wa mbere, dufite imikino tutagiye twitwaramo neza, ntabwo twahisha ukuri, ukuri ni uko ari umukino w’ingenzi kuri twe tugomba kuwutsinda, nicyo gitumye turi hano, nitudatsinda uyu mukino ntabwo nzishima.'

Guhera ku munsi w’ejo nibwo bazakora imyitozo, aho bazakorera ku kibuga cya Mamelodi Sundowns kugeza ku wa Kabiri, ni mu gihe ku wa Gatatu bazakorera ku kibuga cya FNB Stadium kizakira umukino ku wa Kane.

Perezida wa FERWAFA ari na we muyobozi w’uruvugendo, avuga ko abakinnyi bagomba kumenya ko abanyarwanda babizeye ndetse batezeho byinshi, ibijyanye n’agahimbazamusyi byo ngo akenshi biza nyuma y’umukino.

Ati 'nizere ko n’abakinnyi bacu barimo kubyumva, imbaraga za mbere nibo, uburyo bakunda igihugu n’uburyo biteguye kwitangira igihugu, ni abakinnyi b’abanyamwuga, ngira ngo muzi ko iyo dutangaje urutonde rw’abitabira bose baritabira ntawureka kuza, icyo nicyo cya mbere, ibya gahimbazamusyi cyangwa n’ibindi bintu bijya bibaho, ariko akenshi biba iyo abantu bamaze gukina rimwe na riwe tukabyishimira, n’abanyarwanda bajya bagira icyo batanga ku ikipe y’igihugu.'

Ati 'Abakinnyi bacu ntabwo bakinira amafaranga, bafite umutima wo kwitangira igihugu, ni abakinnyi b’abanyamwunga (…), abanyanrwanda bafitiye abakinnyi icyizere n’igihugu kuko ibyo bakora byose ni amafaranga igihugu gisohora, ntabwo rero baba bayasohora ntacyo biteze. Ntabwo duhindura kubera guhindura gusa ahubwo duhindura dufite icyo tugamije dufite n’icyo twizeye kubo dushyiramo.'

Umutoza Carlos Alós Ferrer akaba yahagurukanye abakinnyi 21 bari 23 agomba kuzifashisha muri uyu mukino, ni mu gihe Meddie Kagere na Rafael York bazasanga ikipe muri Afurika y’Epfo ku munsi w’ejo ku wa Mbere tariki ya 30 Gicurasi 2022.

Niyomugabo Claude na Ruboneka mbere yo guhaguruka ku kibuga mpuzamahanga cya Kigali i Kanombe

Nishimwe Blaise na Olivier Kwizera akanyamuneza kari kose

Bizimana Djihad usanzwe ukinira KMSK Deinze mu Bubiligi

Manzi Thierry ku kibuga cy’Indege i Kanombe

Mugunga Yves, Aimable na Fiacre

Muhire Kevin

Abatoza b’Amavubi, Carlos Ferrer n’umwungiriza we, Jacint Magriña Clemente

Ntwari Fiacre na Muguna Yves

Ubwo Amavubi yasesekeraga Johannesburg

Kimenyi Yves na Serumogo basanzwe bakinira Kiyovu Sports

Amavubi yinjiye Johannesburg na morali nyinshi

Kwizera Olivier hagati ya Kimenyi Yves na muganga rutamu

Perezida wa FERWAFA, Nizeyimana Olivier ni we wagiye ayoboye delegasiyo

Umutoza wungirije Jacint Magriña Clemente (ubanza ibumoso), umutoza mukuru Carlos Ferrer (hagati) n’umutoza wungirije wa kabiri Yves Rwasamanzi (ibumoso), bageze Johannesburg bafite icyizere

Irushanwa rya Kigali international Peace Marathon ryari ritegerejwe na benshi, byarangiye ribaye nta gisibya kuri iki cyumweru tariki 29 Gicurasi 2022 aho abasiganwa bahagurukiye kuri BK Arena bakanyura Remera, Nyarutarama, Kimironko, ndetse bakagenda bazenguruka bagendeye ku ntera bari bukine.

Abasiganwa bari mu byinshiro 3 harimo Marathon yuzuye ya Kirometero 42, igice cya Marathon kingana na Kirometero 21 ndetse n’abirukanka bishimisha.

Mu cyiciro ya Marathon yuzuye mu bagabo, Wilfred Kigen ukomoka muri Kenya, yegukanye umwanya wa mbere akoresheje amasaha 2, iminota 16 n’amasegonda 36. Johnstone Kibet Maiyo nawe ukomoka muri Kenya yabaye uwa kabiri akoresheje amasaha 2, iminota 17 n’amasegonda 41. Ku mwanya wa gatatu haje George Nyamori nawe wo muri Kenya akoresheje amasaha 2, iminota 17 n’amasegonda 47.

Mu bagore, Margeret Agai ukomoka muri Kenya yabaye uwa mbere akoresheje amasaha 2, iminota 35 n’amasegonda 23. Koria Rebecca nawe wo muri Kenya yabaye uwa kabiri akoresheje 2h36’09. Bornes Kitur na we wo muri Kenya aza ku mwanya wa 3 akoresheje 2h38’29.

Mu cyiciro cy’abiruka igice cya Marathon, mu bagabo Shadrack Kimining ukomoka muri Kenya yabaye uwa mbere akoresheje 1h04’30, Gilbert Kamutwere ukomoka muri Uganda aba uwa kabiri akoresheje 1h05’03, naho Kajuga Robert aza ku mwanya wa 3 akoresheje 1h05’17.

Mu bagore, umunyarwanda Musabyeyezu Adeline yegukanye umwanya wa mbere akoresheje 1h14’09, Nimbona Elvanie ukomoka mu Burundi aba uwa kabiri akoresheje 1h14’20 naho umunya-kenya Doris Jepkoech aba uwa 3 akoresheje 1h17’02.

“Ndashima cyane igihugu cyidutekerezaho, ndetse na Federasiyo yacu iduha umwanya wo kwitegura. Twari tumaze hafi ukwezi i Musanze turi kwitegura ari nabyo navuga bitumye negukana umwanya wa mbere.” Musabyeyezu Adeline umunyarwanda witwaye neza.

“Iri rushanwa riri ku rwego rwo hejuru, riri gukura umunsi ku munsi ndetse abakinnyi bajemo ubona ko bari ku rwego rwo hejuru. Twajyaga tugira ikibazo ugasanga kugira ngo umuntu abone ibihe biramusaba kujya hanze mu yandi marushanwa, ariko kuri ubu iri rushanwa naryo riratanga ibihe.” Kajuga Robert wabaye uwa gatatu muri Marathon y’igice, ariko akaba asanzwe yiruka Metero ibihumbi 10.

Iyi mikino yari ibaye ku nshuro ya 17 yanitabiriwe na Nyakubahwa Jeannette Kagame, ndetse na Mo Farah umwongereza wagize amateka akomeye mu kwiruka Marathon mu mikino Olympic, akaba yanagerageje kwiruka n’ubwo atabariwe ibihe.

Ingeri zose ziba zitabiriye

Ibihembo: umukinnyi wa mbere muri Marathon yuzuye mu bagabo n’abagore yahembwe miliyoni 4, uwa kabiri ahabwa miliyoni 2 n’igice, naho uwa 3 ahabwa miliyoni 2.

Mu birukanse igice cya Marathon uwa mbere yahawe miliyoni 2, uwa kabiri ahabwa miliyoni n’igice, naho uwaje ku mwanya wa gatatu ahabwa miliyoni 1.

Imwe mu mihanda Abasiganwa banyuragamo yari ifunze ku bandi bantu kuva saa 07:00 am

Margaret Kenyatta, Nyakubahwa Jeannette Kagame na minisitiri wa Sports Aurore Mimosa birukanse mu cyiciro cya Run for Peace

Umuyobozi w'Umuryango utabara imbabare, Croix Rouge muri aka gace, David Beiza yavuze ko abarwanyi b'umutwe wa ADF urwanya Leta ya Uganda ari bo bashobora kuba barishe aba bantu, kuko ariwo urangwa n'ibi bikorwa byo guca abantu imitwe.

Dieudonne Malangay utuye muri aka gace yabwiye Ibiro Ntaramakuru, AFP ko batabashije kumenya imyirondoro y'aba bantu bishwe kuko iyi mirambo yatahuwe yaratangiye kwangirika. Ati: “Kugeza ubu, hari imitwe 17, imwe yagiye iboneka mu bwato n’ahandi… mu bihuru, hafi y’umugezi. Biragoye kumenya abishwe kubera uko imirambo imeze, ariko bashobora kuba ari abaturage bafashwe bugwate bakicwa n'inyeshyamba za ADF”. 

Agace ka Irumu mu majyepfo ya Ituri, gahana imbibi n'intara ya Kivu y’Amajyaruguru. Ni ko gakunze kwibasirwa n’ibitero bimena amaraso, bigabwa n’umutwe wa ADF wagaragajwe nAbajihadiste ba Leta ya Kisilamu nk'ishami ryayo muri Afurika yo Hagati. Igitero gikomeye giheruka kitiriwe uyu mutwe ni icyabaye muri Gicurasi gihitana uhuzima bw’abaturage 20 biciwe mu mudugudu wa Monge.

Src: Africa News