Category: Uncategorized

Mu gihe u Burusiya buvuga ko buzakomeza intambara burwanamo na Ukraine, Perezida w’Umuryango wa Afurika yunze Ubumwe, Macky Sall, yagiye gusaba Putin (…)

Minisitiri w’Imari n’Igenamigambi, Dr Ndagijimana Uzziel, yabivuze ku wa Gatatu, mu kiganiro yagiranye na Komisiyo y’Ubukungu n’Ubucuruzi mu Nteko Ishinga Amategeko ubwo yahamagarwaga ngo asobanure ibibazo abanyamuryango barimo abamaze igihe kinini muri iyi banki imaze kugurishwa kenshi, bagejeje ku bagize Inteko.

BPR Bank yashinzwe mu 1975 i Kabarondo yitwa Banki y’Abaturage, igenda igira amashami mu byahoze ari amakomine. Icyari kigamijwe ni ukwegereza abaturage serivisi z’imari. Abayinjiragamo batangaga umusanzu w’umunyamuryango bakagura udutabo two kuzigama bakabona uko babitsa bakanabikuza.

Abanyamuryango ba mbere n’abagiyemo nyuma kugeza mu 2007 babaye abanyamigabane nyuma y’uko amashami yose ahujwe ndetse hagakorwa n’izindi mpinduka zatumye ihinduka Banki y’Ubucuruzi. Ibi ngo byemejwe n’Inama rusange y’Ihuriro rya Banki z’Abaturage (Union des Banques Populaire du Rwanda).

Uretse izo mpinduka mu bihe bitandukanye Banki y’Abaturage yagiye igurishwa aho kuri ubu yaguzwe na KCB Bank ikitwa BPR Bank Rwanda Plc. KCB ifite imigabane ingana na 87,56% mu gihe abanyamuryango basanzwe bafitemo 12,44%.

Mu bibazo abaturage bagejeje ku bagize Inteko Ishinga Amategeko harimo kuba nta makuru bafite ku bijyanye n’imiterere y’imigabane yabo, inyungu yayo ndetse n’ibyemezo byagiye bibafatirwa badafiteho amakuru nk’uko Perezida wa Komisiyo y’Ubukungu n’Ubucuruzi mu Nteko, Depite Munyangeyo Théogène yabivuze.

Ati 'Ikiriho ni uko abanyamuryango bavuga bati 'nta makuru twagiye tumenya ku byemezo byagiye bidufatirwa’ ubanza ababahagarariye nta murongo wari uhari wo kunyuzamo ayo makuru ngo bajye bayamenya. Abadepite na bo bakibaza ngo ‘mu guhinduka icyari kigamijwe ni iki’, bagashaka no kumenya ngo ‘ubu abantu bariho n’abatariho, abazwi n’abatazwi bamenya gute amakuru asesuye ko uwafunguraga konti yahitaga aba umunyamigabane ?'

'Bakibaza ngo imigabane yacu ihagaze ite ? Inyungu zayo ntazo twigeze tumenya ariko noneho hagenda habaho ihererekanya bakumva byaguzwe na banki zitazwi [ubu noneho ubanza baragize amahirwe barumvise iya hafi bari bamaze kumenyera] ; mbese umuntu akibaza mu buryo bw’iterambere impamvu ibyo byose byagiye biba.'

Minisitiri Dr Uzziel Ndagijimana yavuze ko kugurishwa kwa Banki y’Abaturage byagiye bikorwa hagamijwe kongera imari shingiro no gutanga serivisi zisumbuyeho bikaba ngombwa ko andi mabanki aguramo imigabane ndetse akazana n’ubundi buzobere mu micungire y’amabanki mato nk’uko Banki y’Abaturage yari imeze.

Mu 2008, yazamuye umutungo wayo igera kuri miliyari 15 Frw. Yavuze ko icyo gihe hakozwe ibarura ry’abanyamuryango haboneka 590.291 ariko badafite imyirondoro yose bitewe n’ingaruka za Jenoside yakorewe abatutsi yatumye amwe mu madosiye agenda abura.

Mu 2009 hatangiye gahunda yo kugenzura abanyamuryango umwe ku wundi ariko ngo iki gikorwa cyakomeje kuruhanya. Abari bafite imyirondoro yuzuye icyo gihe ngo bari 163.175 bakaba ari bo basaranganyijwe inyungu yabonetse.

Kugeza ubu KCB ifite imigabane ihwanye na miliyari 71,3 Frw naho abanyamigabane basanzwe bafitemo miliyari 10,1 Frw.

Minisitiri Dr Ndagijimana yavuze ko amafaranga abanyamuryango bafitemo ari make ku buryo bisa n’aho nta nyungu bibazanira bityo ko baramutse bagurishije iyo migabane bakavamo ari byo byabafasha.

Ati 'Buri munyamuryango amafaranga afite ni make cyane. Gushakisha abataraboneka bizakomeza gukorwa naho abazwi bifuza kugurisha imigabane bazabikora, abifuza gukomezanya n’iyi banki bagumemo.'

'Ni ibintu tubona bishoboka, ntabwo byari byafatwaho icyemezo. Abenshi bafitemo udufaranga duke duke ariko kubera ari umubare munini iyo ushyize hamwe usanga ari amafaranga afatika ariko buri wese afite uwe. Hakwiye kuzagera igihe abamenyekanye bakazagira igihe cyo guhitamo ushaka kugumamo nk’umunyamigabane akagumamo ariko ushaka kugurisha akavanamo amafaranga ye uko yaba angana kose akagira ikindi ayakoresha.'

Depite Habiyaremye Pierre Célestin yasabye ko amakuru y’uko imigabane y’abaturage igihari akwiye gutangazwa kuko ibibazo babaza bigaragaza ko atabageraho.

Ku rundi ruhande, Depite Karinijabo yavuze ko amakuru yo gusaranganya inyungu ku banyamuryango ashobora kuba atazwi ashingiye ku kuba na we ari umunyamuryango akaba atarayabonye.

Yagize ati “Nanjye ndi umunyamuryango [reka ne kuvuga abandi], biragoye ko twamenya ko iyo nyungu yasaranganyijwe. Nta munyamuryango uzi ngo mfite imigabane iyi n’iyi, umugabane ni amafaranga angana atya, kereka niba bamwe babimenya abandi ntibabimenye ariko ngira ngo ayo makuru ntabwo azwi.”

Depite Ruhakana Albert yavuze ko n’ubundi abanyamuryango bagurishje imigabane yabo nta cyo bakunguka kubera ko amafaranga yabo ari make. Yasabye ko ahubwo bagira andi mahirwe bashyirirwaho nko guhabwa inguzanyo ku nyungu nto.

Ati “Niba abanyamigabane b’imbere mu gihugu bafite miliyari 10 Frw, umushoramari wayiguze ari we KCB akagira miliyari 71 Frw ariharira 87%, inyungu ntiyaboneka biragaragara. Kuvuga ngo bibaye byiza bagurisha imigabane bakunguka gute ?”

Muri rusange abadepite basabye ko abaturage bahabwa amakuru mu buryo busesuye nko kumanika intonde z’abanyamuryango kuri buri shami n’amafaranga afitemo.

Minisiteri y’Imari n’Igenamigambi yatangaje ko nubwo amakuru atangwa bishoboka ko atagera kuri bose, bityo ko iki gikorwa kizarushaho gushyirwamo imbaraga.

Ati “Umwanzuro wo kunoza ihererekanyamakuru ni wo, rwose hakwiye kunozwa haba mu gukoresha radio abaturage benshi bumva ndetse no kunyuza amakuru kuri buri shami ku buryo n’abahagenda babisoma.”

Ku bijyanye n’uko hari abanyamuryango bataramenyekana kugeza ubu, yavuze ko igikorwa cyo kubashakisha kigikomeje kugeza mu Ukwakira uyu mwaka. Ku batazamenyekana nyamara harakozwe ibishoboka byose amafaranga yabo azahabwa Leta acungwe hakoreshejwe itegeko ryo gucunga imitungo yasizwe na bene yo.

Rutayisire Théogène ushinzwe guhuza Banki n’izindi nzego muri BPR Bank Rwanda Plc, yavuze ko ibyo gutanga inguzanyo ku banyamigabane biri kwigwaho ariko agaragaza impungenge ko Banki Nkuru y’u Rwanda itemera ko abanyamigabane bahabwa inguzanyo.

Yavuze ko banatekereje kubafasha mu bundi buryo nko kubaha amakarita ya ATM hamwe n’aya VIP kugira ngo ugiye ku ishami rukana bamwakire mbere y’abandi.

Ku bijyanye no gutanga amakuru ku buryo buri munyamuryango wa kera yamenya aho abariza, Manzi Bruce uhagarariye Serivisi z’Ubujyanama mu by’Amategeko muri BPR Bank Rwanda Plc, yavuze ko ubu lisiti z’abanyamigabane bose ziri ku mashami yose ku buryo ukeneye kumenya imigabane afashwa kuyibona naho utariyandikisha na we yabikora agahabwa ayo makuru.

Abahagarariye BPR Bank Rwanda Plc basobanuye ko amakuru y’ibikorwa byose atangwa binyuze mu bahagarariye abanyamuryango kuko inzego zibahuza na Banki zitigeze zivanwaho.

Abanyamuryango bafite umuntu umwe ubahagarariye mu nama y’ubutegetsi ku rwego rw’igihugu n’abandi 54 babahagarariye mu nama rusange ya BPR Bank Rwanda Plc.

Mu Ukuboza 1993 nibwo Batayo ya gatatu y’abasirikare 600 bitwaje intwaro yuriye imodoka igana i Kigali, biba ubwa mbere RPA yinjira mu murwa mukuru w’u Rwanda.

Ubutwari bw’izi ngabo bukunze kugarukwaho na benshi kubera uruhare zagize mu kurokora Abatutsi n’umurava waziranze mu rugamba rwo kubohora igihugu. Gusa iyo uganiriye na benshi, usanga ari bake bazi ibikorwa byazo by’umunsi ku munsi mu gihe zamaze muri CND Jenoside yakorewe Abatutsi mu 1994 itaratangira.

Umuyobozi Mukuru w’Urwego rw’Igihugu Ngishwanama rw’Inararibonye, Tito Rutaremara, wari mu banyapolitiki ba FPR bari barinzwe n’izi ngabo, aherutse kuganiriza She ya Youtube yitwa Izingiro, ubuzima bw’umunsi ku wundi bw’izi ngabo mu mezi hafi atanu zamaze muri iyi nzu jenoside yakorewe Abatutsi itaratangira ngo bahabwe amabwiriza mashya yo kuyihagarika.

N’ubwo Ingabo za RPA 600 n’abayobozi zari ziherekeje bageze muri CND mu Ukuboza 1993, gufata umwanzuro ubazana muri iyi nzu ntibyari byoroshye kuko hari aho bagiye babanza gusaba harimo Byumba, Kinihira na Camp Kigali bahimwe bababwira ko hegereye Radiyo Rwanda bikaba byaborohera kuyifata.

Leta ya Habyarimana yashatse ko izi ngabo n’abo zari ziherekeje bajya Camp Kami ariko nabo barabyanga kuko imihanda yose yajyagayo yari ibitaka bigatuma bahabona nk’ahantu hashobora gutegwa ibisasu byo mu butaka.

Nyuma y’ibiganiro ku mpande zombi RPF yaje kwemera kujya muri CND nyuma y’uko iyi nzu yari yasuwe na zimwe mu ntumwa zayo zirimo Gen James Kabarebe bakayishimira ko ikomeye, kuba ifite inzu yo munsi y’ubutaka kandi ikaba yari ifite ibyangombwa byose nkenerwa.

Rutaremara avuga ko ubwo bababwiraga ko ari ho bagiye kujya babanje kugira impungenge bitewe n’uko yari hagati y’ibigo by’abasirikare birimo n’icy’abarindaga Perezida Habyarimana (Camp GP) gusa bakaza guhumurizwa na Perezida Kagame icyo gihe wari uyoboye ingabo za RPA wababwiye ko batayo bari kumwe nayo akazi kayo ari ako kubarinda.

Ati 'Icyo gihe natwe tugiye kuza twarabajije tuti ko tugiye kujya hariya hantu kandi ko byagaragaye ko dukikijwe n’abasirikare hirya no hino bizagenda bite ?. Icyo gihe umukuru w’ingabo niwe watubwiye ati batayo nk’iyi muba mufite niyo ishobora kubarwanaho nk’iminsi igera kuri itanu tukaba twabagezeho cyangwa se ikaba yabafasha irwana igenda babazana tugahurira mu nzira ati iyi batayo n’icyo iba imaze'.

Nyuma yo kumarwa impungenge iri tsinda ry’abanyapolitiki ba RPF baherekejwe n’ingabo 600 za RPA zirimo Charles Kayonga wari ubayoboye, Gen Maj Charles Karamba icyo gihe wari kapiteni, JacobTumwine, Emmanuel Rugazora na Kwikiriza bafashe inzira bava ku Murindi berekeza i Kigali muri CND.

Muri uru rugendo Tito Rutaremara yibuka neza nk’urwabaye ejo, avuga ko mu nzira aho bagiye banyura hose habaga hari abaturage bashungereye ku muhanda bamwe baje kwirebera Inkotanyi gusa abandi babishimiye.

Ati 'Tuza umunsi wa mbere abantu bose kuva i Byumba bari badutegereje aho u Rwanda rwavugaga ko bari budutere amabuye ahubwo wabonaga bishimye, mu mpunzi zari ziri Nyacyonga hariya nazo bavugaga ko ziri budutere amabuye ahubwo wabonaga zishimye ziri ku muhanda, amapikipiki yaduherekezaga aturi imbere n’abantu bose ku mihanda kugera tugeze muri CND.'

Rutaremara akomeza agira ati “Leta y’u Rwanda yanze ko tunyura muri za Minisieri kugira ngo abantu badahurura ni ko kutunyuza muri Poids Lourd tuzamuka hariya hahinguka kuri Minisiteri y’ingabo, tunyura hariya hahoze Rond Point KCC tuboneza tujya muri CND.'

Leta y’u Rwanda yahisemo kubanyuza iyi nzira mu gihe iyari isanzwe ari nyabagendwa ari iyo kuzamukira ku Kinamba ukanyura kuri za Minisiteri.

Ubuzima muri CND

Nyuma yo kugera muri CND izi ngabo 600 n’abo zari ziherekeje batangiye imibereho mishya muri iyi nzu ubu ikoreramo inteko ishinga amategeko y’u Rwanda.

Muri iyi nzu izi, ngabo zahawe igice kimwe, aho abayobozi bararaga mu gice cyo hejuru ahandi hakaba ibiro.

Muri iki kiganiro Tito Rutaremara yagiranye na Izingiro, yavuze ko izi ngabo zabaherekeje zikimara kugera muri CND zatangiye gucukura indake nabo batangira imirimo ijyanye na politiki no kwakira abanyarwanda batandukanye babasuraga.

Yagize ati 'Icyo abasirikare bacu batangiye ni ugushaka indake zabo zo kwirinda ariko bashaka n’izacu noneho tuguma aho ngaho dutangira gukora imirimo. Ubwo twatangiye guhura n’amashyaka yandi ndetse dutangira guhura n’abanyarwanda baza kureba, hari abazaga kutureba bishimye, hari abazaga kuko bafite amatsiko, hari abazanwaga n’uko babaga badukunze, baje kutuganiriza, hari abazaga mu mirimo nka ba Ambasaderi n’abandi ba tekinisiye bazaga'.

Akomeza avuga ko muri gahunda z’ubuzima bw’aba basirikare hataburagamo siporo ya mu gitondo bavayo bakabona kujya mu yindi mirimo irimo no guteka.

Yagize ati 'Mu gitondo kare 4h30 bajyaga kuri mucakamucaka nk’isaha yose ariko natwe rimwe na rimwe hari ubwo twagendaga tukajya kwirukankana na bo bavayo abateka bagateka, bikagera igihe cyo gufungura abarangije bakajya mu bikorwa byo gusuzuma imbuda zabo no kumva amabwiriza y’abayobozi y’ibyo bagomba gukora, hakaba hari abari ku burinzi n’abandi bari buduherekeze nk’abasivire bakababwira, urebye byabaga ari ukujya ku burinzi no guherekeza abayobozi bagiye ku Murindi'.

Ibiryo n’inkwi aba basirikare batekeshaga bajyaga kubikura ku Murindi gusa mu minsi yakurikiye ibiryo byo batangiye kuzajya babikura mu Mujyi wa Kigali aho bari bari.

Iyi nyubako ya CND kuri ubu ikoreramo Inteko Ishinga Amategeko niyo yari icumbitsemo abasirikare 600 ba RPA n’abanyapolitiki bari baherekeje

Rutaremara avuga ko uretse iyi mirimo yo mu buzima busanzwe, abasirikare bagiraga umwanya wo gukora imyitozo ijyanye n’akazi kabo noneho bose bakaza guhurira mu gitaramo cyabaga mu masaha y’umugoroba.

Aha muri CND kandi hari Canteen umuntu yashoboraga kuguriramo ibyo kunywa birimo inzoga na fanta.

Bagabweho igitero bageze mu Gatsata

Rutaremara avuga ko mu mezi atanu bamaze baba muri iyi nzu mbere y’uko jenoside yakorewe Abatutsi mu 1994 itangira, bagabweho ibitero bigera kuri bibiri birimo icyabereye mu Gatsata.

Yagize ati 'Byabaye kabiri, hari kimwe barashe abahungu bacu bavuye ku Murindi babarasira mu Gatsata, baraswa n’abantu barasaga bari mu nzu zo hirya no hakuno, icyo gihe abana bavamo bajya mu miserege ari nako banarwana gusa baje kurasamo umwe arapfa, abandi bacu bari muri CND baje kubafasha birukana abo bari babateye barataha'.

Ku wa 6 Mata ubwo indege ya Perezida Habyarimana yahanurwaga, ibintu byahise bihindura isura kuri izi ngabo 600 zari zitegereje guverinoma y’inzibacyuho, maze zitangira kuraswa n’ingabo za Leta zari i Kanombe na Kacyiru.

Nyuma y’uko Jenoside yakorerwaga abatutsi itangiye aba basirikare bahawe inshingano nshya na Gen Maj Paul Kagame wari uyoboye urugamba, wababwiye ko bagomba kuyihagarika.

Iki gihe iyi nzu bari bacumbitsemo batangiye kuyakiriramo abahungaga ndetse igice gito kigirwa ibitaro byitaga ku bakomeretse.

Reka tugusubize inyuma gato umenye aba basirikare 600 bahawe inshingano zo kurinda abanyepolitiki ba FPR ,Gen Sam Kaka wari umwe mu bayobozi b’urugamba rwo kubohora u Rwanda avuga ko icyangedeweho ari ukureba abasirikare bagombaga gutanga icyo bari bitezweho.

Gen Charles Karamba , ubu ni Ambasaderi w’u Rwanda muri Tanzanie nawe yari mu basirikare 600 ndetse icyo gihe yari afite ipeti rya Captain aho avuga ko ibigo bya Gisirikare byari bikikije CND byibuze byari birimo abasirikare ba Leta bagera ku Bihumbi 10.

CND ikaba yari ikikijwe n’ibigo bikomeye bya gisirikare bikomeye birimo Camp Kanombe, Camp Kami,Camp Rebero , Camp Kigali na Camp GP.

Ubwo Indege ya Habyarimana yamara guhanurwa , abatutsi batangiye kwicwa ndetse ibitero bikomeza kwiyongera ku ngabo za CND ari nako abatutsi bakomeretse n’abasumbirijwe bahahungira.

Abatutsi muri Kigali bari bagiye bahungira ahantu hatandukanye maze harimo Saint Andres, Sainte Famille n’ahandi.

Icyo gihe Gen Maj Paul Kagame yatanze amabiwirza yo guhagarika Jenoside yakorerwaga Abatutsi no gutsinda ingabo zayikoraga.

Mu gutangira gutabara ya Batayo ya 3 yigabanyijemo kabiri ,Eagle Company ihabwa ubutumwa bwo kuri kuri Stade amahoro kubohora abatutsi bari bahahungiye bari basumbirijwe n’interahamwe.

Umwe mu basirikare barurwanye yavuze ko Eagle Company nayo yigabyemo ibice bibiri , bamwe bazamuka umuhanda wa Kaburimo abandi banyura mu Migina , ngo muri uru rugendo babanje guhura n’umwanzi barwana inkundura.

Gen Maj Charles Karamba avuga ko ku rundi ruhande ingabo za RPA zari zimerewe nabi n’aba GP ba Habyarimana aho Company ya Chui yari ifite inshingano zo guhangana nayo gusa ngo byaje kuyigora kuko hapfuyemo benshi.

Hejuru y’inyubako ya CND hari imbunda nini yari ishinzwe kurasa kure mu gukumira ibitero by’ingabo za Habyarimana, uwakoreshaga iyi mbunda , Rwabinuni avuga ko yatangiye kuyikoresha tariki ya 7 Mata 1994 arwana n’aba GP bashakaga kugera muri CND ati’‘Imbunda zandasaga na none nyinshi zari muri Camp Kigali , ku buryo bo bashakaga kugirango baze batwicire abayobozi , natwe batwice abandi badufate mpiri”

Akomeza avuga ko ku itariki ya 7 , iya 8 n’iya 9 Mata 1994 we n’abandi basirikare bane bamufashaga bahuye n’akazi gakomeye aho buri munota yabaga ashakisha umuntu wese utari uwabo ugeregeje gusatira CND .

Gen Charles Karamba avuga ko iyi mbunda nini yari ahantu heza cyane ndetse ngo niyo nini bari bemerewe.

Aba basirikare bakomeje guhatana bonyine kugeza ku itariki ya 11 Mata 1994 ubwo batayo ya Alpha yabaga mu karere ka Gicumbi yasesekaraga i Kigali iyobowe na Sam Kaka maze ibongerera ingufu babasha gufata uduce dutandukanye mu mujyi no guhagarika Jenoside.

Amabanga, imibereho n’ibikorwa bitangaje by’abasirikare 600 b’Inkotanyi bari muri CND

M23 ivuga ko imitwe itandukanye y’igisirikare cya Congo, FARDC ndetse n’ibikoresho byayo byavuye ahantu hanyuranye byegerezwa ahazagabwa igitero, ndetse ngo ingabo za Leta zifatanyije n’imitwe irimo na FDLR- FOCA, iyobowe na Col. RUHINDA.

Izi nyeshyamba za FDLR-FOCA ngo zajyanywe ahitwa KASIZA, naho inyeshyamba zitwa NYATURA ziyobowe na Jean-Marie ariko zikaba zambara imyenda y’abantu bashinzwe kurinda pariki (ICCN) bo bagiye ahitwa BIKENKE nk’uko iryo tangazo ryasinywe na Major Willy NGOMA ndetse rikanasangizwa na Bertrand Bisimwa ribivuga.

Uyu mutwe uvuga ko umenyesha amahanga n’abanyekongo ko FARDC ishaka kuwushozaho intambara yirengagije imyanzuro y’Akanama ka UN gashinzwe umutekano yasabye ko imirwano ihagarara bakayoboka ibiganiro bibera i Nairobi ndetse bikaba byaremejwe mu nama y’Abakuru b’Ibihugu bya Africa y’Iburasirazuba, kandi na M23 ikaba ibirimo.

Itangazo rivuga ko M23 yemera ndetse igashimangira ko nta nzira yo gukemura ibibazo mu Ntaramba ishaka, ikifuza ko ibyo isaba bibonerwa igisubizo mu biganiro, bidaheza kuko ari byo byakwiga neza ibibazo bihari kandi bigakemurwa.

Umutwe wa M23 uvuga ko intambara, bizwi ko igira uyitsinda n’utsindwa, kandi nta kindi yagezaho uretse gutinza kubona ibisubizo bikwiye nk’uko byagiye bigenda.

Itangazo bivugwa ko ryasinyiwe i Sarambwe ku wa 03 Kamena, 2022 rivuga ko igihe M23 izaterwa yiteguye kwitabara no kurinda abantu bayo.

Kuri uyu wa Gatanu igisirikare cya Congo, i Goma cyasezeye bwa nyuma abasirikare bagera ku 10 bishwe mu ntambara iheruka gushyamiranya M23 n’izo ngabo mu Cyumweru gishize.

Imirwano ikomeye yasize Congo ishinja u Rwanda gufasha M23, u Rwanda rukabihakana ariko na rwo rukayishinja kuba iri gukorana na FDLR mu bitero igaba kuri M23.

Yabigarutseho kuri uyu wa 2 Kamena 2022, ubwo ikigo ayoboye cyibukaga ku nshuro ya 28 Jenoside yakorewe abatutsi.

Abakozi n’abayobozi b’iki kigo basuye banunamira abatutsi bashyinguye mu rwibutso rwa Jenoside yakorewe abatutsi rwa Bisesero, ruherereye mu murenge wa Twumba mu karere ka Karongi ahahoze ari Komine Gisovu.

Abasesero bazwiho cyane ku butwari bagaragaje mu gihe cya Jenoside aho bashoboye kwihagararaho bagahangana n’ibitero by’abicanyi.

Uku kwihagararaho kwatumye abayobozi bari bafite ingengabitekerezo yo kurimbura abatutsi, bohereza ingabo,iterahamwe n’imbunda zikomeye,Abasesero bakomeza kurwana ariko hicwamo benshi.

Umutima wo kurwana kugeza ku mwuka wa nyuma n’uburyo bw’imirwanire, Abasesero babikesha umusaza witwa Birara Aminadab, bafata nk’intwari y’Abasesero.

Gasimba Narcisse, warokokeye mu Bisesero, avuga ko ahandi bakomoye umutima wo kwirwanaho ari mu kuba kuva mu 1959, ubuyobozi bwariho butari bubitayeho.

Ati “Ubutumwa naha urubyiruko ni uko nta mutima wo kwica ugira icyo umara, birangiza ukugizeho ingaruka mbi ndetse bikagira ingaruka no kubagukomokaho. Abakiri bato bagombye kutumva ijwi na rimwe ribabwira kugirira nabi bagenzi babo”.

Mufulukye yashimye ubutwari bw’Abasesero bashoboye kwirwanaho bagahangana n’izari ingabo z’igihugu zabishe aho kubarinda, avuga ko ubufatanye bwaranze Abasesero bukwiye kuba isomo ku Banyarwanda bose.

Uyu muyobozi avuga nta muntu ukwiye kwaga mugenzi we, ngo amwambure ubuzima kuko ku ihererezo birangira buri wese apfuye, ndetse hakaba ubwo uwishe mugenzi we apfa urupfu rubi kumurenza.

Ati “Dushyire imbere ubumwe bwacu nk’Abanyarwanda, dushyire imbere urukundo, turangwe no gushyira hamwe amateka turayasangiye”.

Abakozi b’Ikigo cy’Igihugu gishinzwe Igororamuco nyuma yo kunamira abazize Jenoside yakorewe abatutsi baremeye abarokotse Jenoside batishoboye, babaha inka ebyiri,ibikoresho n’ibiribwa.

Mu Bisesero hiciwe abatutsi benshi, barimo abari bahatuye n’abaturutse mu ma komine 9 yari agize icyahoze ari Perefegitura ya Kibuye bahahungiye nyuma yo kurokoka ibitero babaga bagabweho.

Urwibutso rwa Jenoside yakorewe Abatutsi rwa Bisesero rwashyizwe mu nzibutso ziri mu murage w’Isi zicungwa na UNESCO. Rushyinguyemo abatutsi barenga ibihumbi 50.