Category: Uncategorized

Dream Team football academy ifatanyije n’ishyirahamwe ry’umupira w’amaguru mu Rwanda FERWAFA, bateguye amahuruwa agamije kongerera ubumenyi abatoza b’amarerero bagera kuri 47 baturutse mu bice bitandukanye by’igihugu.

Amahugurwa ari kubera mu cyumba cy'inama cya sitade ya kigali i Nyamirambo.

Ni amahugurwa yatangiye kuri uyu wa Mbere akaba mu gihe cy’iminsi 8 aho azarangira tariki 3 Mutarama umwaka utaha, bivuze ko harimo akaruhuko k’iminsi 2. 

Umuyobozi wa tekinike muri FERWAFA, Gerrad Busher niwe watangije aya mahugurwa, aho yasabye abayitabiriye ko nibasoza kwiga batagomba kugenda ngo basinzire. Yagize ati” ndasaba ko abitabiriye aya mahugurwa, narangira nta kugenda ngo mwidamararire ahubwo mugomba gukomeza kwihugura kuko kwiga ari uguhozaho.”

Gerrard Busher ushinzwe tekinike muri FERWAFA, niwe watangije aya mahugurwa 

Aya mahugurwa ayobowe n’abarimu barimo Antoine Rutsindura bakunze kwita Mabombe, Muhire Hassan ndetse hakaba hari n’umukozi wa FERWAFA uhagarariye amasomo, Bazirake Hamim.

Mu bitabiriye aya mahugurwa, harimo abakinnyi ba Kiyovu Sports barimo Mugenzi Bienvenue, umwe mu banyarwanda bafite ibitego byinshi muri shampiyona kuri ubu, na Iradukunda Bertrand uherutse gusinyira iyi kipe avuye muri Botswana.

Iradukunda Bertrand wakiniye APR FC, Police FC, Bugesera FC, Mukura VS Gasogi United, Township na Kiyovu Sports arimo kuri ubu, nawe yari ari mubitabiriye aya mahugurwa 

Mugenzi nawe ukinira Kiyovu Sports ari mubitabiriye aya mahugurwa 

Henriette Byukusenge, ari mu bagore 2 bagaragaye muri aya mahugurwa 

Mutezinka Prisca nawe yitabiriye aya mahugurwa, akaba asanzwe ari umutoza w’abana 

Ramadhan ubanza iburyo nawe ni umukinnyi wa Kiyovu Sports wayigezemo avuye muri Mukura 

Muhire Hassan ni umwe mu barimu bari guhugura aba batoza 

Muhire afatanyije na Antoine Rutsindura 

Didier Cyiza usanzwe ubu mu ikipe y’abasheshakanguhe ya ASV FC nawe yari yitabiriye aya mahugurwa
 

Source : https://inyarwanda.com/inkuru/124278/mugenzi-bienvenue-na-bertrand-mu-bitabiriye-amahugurwa-yubutoza-mu-gushaka-license-d-124278.html

Umupasiteri ukiri muto yakoze agashya ubwo yafatwaga amashusho ari mu kabyiniro ari kunywa inzoga yasinze bikomeye.

Ikinyamakuru Netizens cyashyize hanze iyi foto y'uyu mupasiteri ukiri muto waciye ibintu muri Kenya kubera ukuntu yiyahuzaga inzoga mu kabyiniro.

Uyu mupasiteri yaciye ibintu ku mbuga nkoranyambaga kubera ukuntu yanywaga byeri nta gutuza ari no kubyina bidasanzwe.

Iyi foto yatumye benshi bacika ururondogoro aho hari uwagize ati “Igice kimwe Yesu ikindi gice umunyabyaha.

Source : https://umuryango.rw/ubuzima-115/udushya/article/umupasiteri-yatamajwe-n-agasembuye-benshi-bacika-ururondogoro

Umubyeyi wo mu Karere ka Bugesera yibarutse abana 4 icyarimwe nyuma y'imyaka 15 yari amaze ategereje urubyaro.

Ibi byabaye mu rukererera rwo kuri uyu wa Mbere, tariki 26 Ukuboza 2022, mu bitaro byitiriwe Umwami Faisal, aho uyu mugore yibarutse abakobwa babiri n'abahungu babiri.

Uyu muryango ukaba wari umaze imyaka 15 utegereje urubyaro, aho bari barivuje mu bitaro binyuranye ariko bikananirana.

Uwiragiye Marie Chantal yasamaga inda zikavamo.

Nk'uko RBA dukesha iyi nkuru yabitangaje, Uwiragiye Marie Chantal yibarutse abana hakoreshejwe uburyo bwo kubagwa, bavutse bafite hagati y'ikilo na garama 700g n'ikiro na garama 300g.

Bari barivuje mu mavuriro anyuranye harimo ayo mu Karere ka Bugesera ndetse n'ibindi bitaro bikomeye mu gihugu.

Uwiragiye Marie Chantal akaba yageneye ubutumwa indi miryango itegereje urubyaro, aho abasaba kwihangana kandi ntibacike intege.

Uyu muryango ukaba uvuga ko ubushobozi wari ufite bumaze gucyendera bitewe n'imyaka bari bamaze bivuza, bagasaba ubufasha bwo kubunganira harimo no kwishyura ibitaro n'ibizatunga abo bana.

IFOTO: yakuwe kuri Interineti si iyabo bana

Source : https://umuryango.rw/ubuzima-115/imibereho/article/bugesera-yibarutse-abana-4-icyarimwe-nyuma-y-imyaka-15-ategereje-urubyaro

Umuyamabanga Nshingwabikorwa w'Intara y'Amajyepfo, Busabizwa Parfait arasaba abikorera bo muri iyi ntara gukora uko bashoboye bakamenyakanisha ibyo bakora kurusha uko bisanzwe bikorwa kugira ngo ababigura babigure babizi ko ari iby'umwimerere kandi biri ku rwego rwiza.

Busabizwa Parfait, ibi yabisabye abikorera ubwo hafungurwaga Imurikagurisha ryateguwe n'Urugaga rw'Abikorera mu ntara y'Amajyepfo, aho ryatangiye tariki ya 22 rikazageza tariki ya 30 Ukuboza 2022. Rirabera kuri sitade y'Akarere ka Muhanga.

Yagize ati' Hashize igihe tudategura iri murikagurisha kubera icyorezo cya COVID-19, ariko ikigaragara ni uko dufite ibikorwa byinshi byo kugaragariza abaguzi harimo; Amavuta twabonye y'umwimerere akomoka ku bihwagari akorerwa mu karere ka Ruhango, twabonye kandi ko abahinzi bo mu ntara yacu basigaye bohereza imiteja mu gihugu cy'ubudage ndetse n'izindi nganda zitandukanye zigira uruhare mu guha agaciro ibikomoka ku buhinzi'.

Akomeza agira ati' Dufite ibikorwa byinshi bikwiye kugaragazwa ariko turasaba abikorera kumenyekanisha ibyo bakora bakabasha kwigarurira isoko kandi bakabikora neza bikamenyekana ko ari byiza. Nibabigenza gutyo abaguzi bazabigura kuko bazaba babyizeye neza'.

Bamwe mu bacuruzi batashatse ko dutangaza amazina yabo babwiye intyoza.com ko iyo imurikagurisha rije abaguzi baboneka. Gusa bahamya ko hari aho usanga abitabira Imurikagurisha batungurwa, batazi bimwe mu bikorwa ahubwo bakabibonera ku imurikwa ryabyo.

Benshi mu bacuruzi ntabwo baramenya akamaro ko kumenyakanisha ibyo bakora kuko usanga bazi ko ibyo bakoze kubishyira ku isoko bihagije kandi nyamara kubihashyira ari kimwe no kubimenyekanisha bikaba ikindi.

Perezida w'urugaga rw'Abikorera mu ntara y'Amajyepfo, Dr Kubumwe Celestin avuga ko abikorera bakwiye kwigira ku bandi bakamurika kandi banacuruza. Yemeza ko 80% by'imyanya yari yarateganyijwe yafashwe n'abarimo kumurika ibikorwa byabo. Ahamya ko hakiri urugendo kuko hari inganda zitunganya umusaruro ariko ugasanga ibikorwa bitamenyekana.

Akomeza asaba ko buri karere gakwiye kujya gategura imurikagurisha kandi rigategurwa bijyanye n'icyerekezo haba mu buhinzi, ikoranabunga, ibikorerwa mu nganda, iby'ubwubatsi, Ubukorikori ndetse n'ibindi hagamijwe kuzamura buri kiciro. Asaba ko buri wese yajya ahitamo aho ajya bitewe n'imiterere y'ibyo akora n'umwihariko we.

Iri murikagurisha ryatangiye tariki ya 22 Ukuboza, rizagera tariki ya 30 Ukuboza 2022. Rihuje abikorera bo mu ntara y'Amajyepfo, baba abafite inganda zitunganya umusaruro w'ibikomoka ku buhinzi, ibikorerwa mu nganda nk'imitobe ndetse n'ibisembuye ariko hakabamo na sosiyete z'itumanaho, amabanki n'ibigo by'Imari n'ibindi bitandukanye.

Akimana Jean de Dieu

Source : https://www.intyoza.com/2022/12/26/muhanga-expo-abikorera-barasabwa-kumenyakanisha-ibyo-bakora-kurushaho/

Umuhanzi Diamond Platnumz wari utegerejwe i Kigali mu gitaramo cyiswe One People Concert cyagombaga kuba ku wa 23 Ukuboza 2022 ariko ntaboneke,yagaragaje ko arwaye.

Diamond Platnumz yasangije abakunzi be amashusho agaragara ko ameze nabi ari mu bitaro.

Amakuru aravuga ko kuri iki cyumweru,Diamond yiriwe aryamye mu bitaro yitabwaho n'abaganga,ameze nabi cyane.

Yanditse ko Noheli yamugendekeye nabi kuko yabaye ari mu bitaro ndetse yari mu byuma byinshi bigaragaza ko uburwayi bwe butoroshye.

Yavuze ati “Noheli yagenze nabi uyu mwaka”.

Diamond Platnumz yatangaje ko kutaza gutaramira mu Rwanda byatewe no guhuzagurika n'uburangazi bw'abateguye igitaramo.

Haravugwa kandi umwuka mubi mu mubano wa Diamond Platnumz n'umujyanama we Sallam SK Mendez aho ngo bamaze amezi ane badahurira mu bikorwa bitandukanye nk'uko byari bisanzwe.

Sallam SK Mendez yatangiye gukorana na Diamond Platnumz mu 2013 nyuma yo kumuhuza na Davido bagakorana indirimbo bise 'Number One'.

Source : https://umuryango.rw/imyidagaduro/umuziki/article/diamond-platnumz-watengushye-abanyarwanda-yariye-noheli-nabi

Batitaye ku nyungu Abanyekongo bafite mu buhahirane n'Abanyarwanda, Martin Fayulu, Denis Mukwege na Matata Ponyo barasaba ko imipaka yose ya Kongo n'u Rwanda ifungwa!

Mu gihe Afrika n'isi yose bahangayikishijwe no gushaka uko imipaka itakomeza kuba inzitizi y'ubuhahirane n'imigenderanire hagati y'ibihugu, aba bana muri politiki bo bati 'imipaka nifungwe'!
Ubundi buswa no kwivuguruza biri mu itangazo ry'aba bagabo banarota kuyobora Kongo, ni uko bivugira ko ubutegetsi bubi bwa Perezida Tshisekedi ari wo musingi w'ibibazo by'igihugu cyabo, ariko bakongera bakabigereka ku Rwanda.

Fayulu,Matata na Mukwege bari mu Banyekongo bakomeje guhakana ko FDLR ari ikibazo ku mutekano w'u Rwanda n'akarere kose, bagera n'aho bemeza ko itakibaho, nyamara muri kwa guhuzagurika mu bikorwa no mu mvugo, bati 'FDLR ikwiye kwigizwa kure hashoboka y'umupaka w'u Rwanda'.
Ntushobora rero gukemura ikibazo utazi cyangwa wirengagiza inkomoko yacyo. Niba Abanyekongo batagize ubutwari bwo kwemera ko ikibyimba barwaye gikubitwa umwotso, igihugu cyabo kizakomeza kubaho ku izina gusa.

The post Ubushishozi bw'abanyapolitiki ba Kongo bugerwa ku mashyi appeared first on RUSHYASHYA.

Source : https://rushyashya.net/ubushishozi-bwabanyapolitiki-ba-kongo-bugerwa-ku-mashyi/?utm_source=rss&utm_medium=rss&utm_campaign=ubushishozi-bwabanyapolitiki-ba-kongo-bugerwa-ku-mashyi

Mu byishimo byinshi abinyujije kuri konti ye ya Instagram, Isimbi yizihije iminsi mikuru neza ya Noheri, yerekana amarangamutima ye nyuma yo gusoza icyiciro cya gatatu cya Kaminuza muri Amerika.

Mu magambo yuzuye ikiniga uyu mukobwa yavuze ko yasenze cyane kuruta kwiga none Imana ikaba ibikoze, ndetse agenera ubutumwa abantu bwo gutumbera Imana cyane kuko ibindi byose biba biri mu biganza byayo.

Yagize ati 'Iyo mvuze ko bishoboka ntekereje ukuntu namaze igihe kinini mu masengesho nsenga kuruta uko nigaga? Nkaba nshoboye kurangiza mfite 4.0?! ni Imana gusa.''

Isimbi kandi yakomeje avuga ko yaraye amajoro yigira ikizame ndetse rimwe na rimwe agafungura ijisho rimwe, ariko Imana byose ikaba ibimugaruriye mu buryo bwiza.

Isimbi ubwo yasekaga amasaro agaseseka nyuma yo gusoza

Isimbi yavuzwe cyane mu Rukundo na Jay Rwanda, ariko urwabo rugenda rushonga nk'isabune kugeza ubwo Jay Rwanda yongeye kwerekana uwo yakunze mu myaka ibiri ishize, ndetse aca amarenga yo kumugira umugore.

Uyu mukobwa wahoze mu rukundo na Jay Rwanda, akurikirwa n'abarenga 2000 kuri konti ye ya instagram. Iyo winjiye kuri konti ye usanganirwa n'amagambo agira ati: 'Nakijijwe n'ubuntu kubwo kwizera.'' Konti ya Isimbi iyo amaze kukwemerera nibwo wemerewe kureba amafoto ye gusa.

Mu busanzwe Isimbi atuye muri Leta Zunze Ubumwe za Amerika aho na Jay Rwanda asanzwe atuye, urukundo rwabo rukaba rwaramenyekanye cyane ubwo ku isabukuru ya Jay Rwanda birekuraga bakerekana ko bakundana, mu mafoto n'amashusho basangije abantu.

Isimbi yerekanye ibyishimo byinshi

Isimbi yasoje ikiciro cya Gatatu cya kaminuza

Yagaragaraga anyuzwe cyane

Isimbi ni umukobwa w’ikimero gitangaje

Yavuzwe mu rukundo na Jay Rwanda

Source : https://inyarwanda.com/inkuru/124262/isimbi-wavuzwe-mu-rukundo-na-jay-rwanda-yasoje-masters-muri-amerika-amafoto-124262.html

Abagize sosiyete Sivile, basabye ko guteza imbere ikoreshwa rya Internet mu mashuri, bikwiye no guherekezwa n'ingamba zo kurinda  abana bayikoresha  kuko hari byinshi bibaho, bishobora kwangiza ubuzima bwabo.

Iterambere ry'ikoreshwa rya Internet rizana n'impungenge z'abantu mu ngeri zinyuranye  ku mutekano w'abana bayikoresha.

Ku rubuga rw'Ihuriro Mpuzamahanga ry'Ubukungu WEF, batanga  urugero rw'umwana w'imyaka 10 mu Butaliyani  wapfuye ageregaza kwigana umukino uteye ubwoba,  yari yabonye ku rubuga rwa Tiktok. 

U Rwanda nka kimwe mu bihugu bya Afurika biri gutera imbere mu gukoresha ikoranabuhanga, abaturage basaba ko runashyira imbaraga mu kurinda umutekano w'abana muby'ikoranabuhanga.

Umwe ati 'Ikibi ni amafirime y'urukozasoni n'ariya y'indwano.'

Undi nawe ati 'Umwana niba ashobora kuba yareba filime, ejo ashobora kwigana ibyo yabonye, ugasanga havuyemo gukomereka.'

Umuryango Uharanira ko Murandasi igera kuri bose Internet Society, 

uherutse kugaragaza ko uko u Rwanda rushyira imbaraga mu guteza imbere ikoreshwa rya Internet mu mashuri, bikwiye no guhekezwa n'Ingamba zikomeye zo kurinda Umutekano w'abanyeshuri kuko ngo bashobora gutandukira bakajya ku mbuga ziriho ibibangiza.  

Emmanuel Mfitimukiza ni umuyobozi wa Internet Society.

Ati 'Umubyeyi akwiye guhabwa amahugurwa ku ikoranabuhanga, kuko niwe ukwiye kurinda umwana we muby'ikoranabuhanga. Arahererwa amahugurwa he? Ni ku ishuri kuko riramwegereye, kandi umwana we niho ahererwa ubumenyi.'

Ikigo cy'igihigu gishinzwe uburezi bw'ibanze REB, kivuga ko kiri mu biganiro n'abatanga internet mu mashuri, kugira ngo muri mudasobwa hashyirwemo uburyo bwihariye bwo gukumira ko umunyeshuri ajya ku mbuga, ziriho ibishobora kumuyobya.

Diane Sengati, ni Umuyobozi muri REB ushinzwe imyigishirize y'Ikoranabuhanga.

Ati 'Twatekereje ku kintu bita 'content filtering solution' hari abo twegereye dusanzwe dukorana nabo batanga Interineti mu mashuri, ariko nabo ni gahunda batubwiye isaba ikindi kiguzi, bisaba indi ngengo y'imari tutarabonera ubushobozi. Turabizi kuko abana ni urugero rwabo baba bafite ibyo bagomba kureba cyangwa gukoresha k'urugero bariho. Ibyo byose rero nabyita ko turi kubiganiraho.'

Kuri ubu Isi yabaye umudugudu kubera iterembere rya Internet.

Abarezi ndetse n'ababyeyi bagirwa inama yo kuba hafi y'abana babo, kugira ngo babereke uburyo bashobora gukoresha ikoranabuhanga ritabateza ingorane.

Ikindi cy'ingenzi abanyeshuri bagirwaho inama ni ukwirinda kuvuga amakuru yabo arebana n'ikoranabuhanga, kugira ngo hatagira uyitwaza akaba yabajyana mu wundi murongo ubaganisha mu byabangiriza ubuzima.

Daniel Hakizimana

The post <strong>U Rwanda rwasabwe kubungabunga umutekano w'Abana mu ikoranabuhanga ku mashuri</strong> appeared first on FLASH RADIO&TV.

Source : https://flash.rw/2022/12/26/u-rwanda-rwasabwe-kubungabunga-umutekano-wabana-mu-ikoranabuhanga-ku-mashuri/?utm_source=rss&utm_medium=rss&utm_campaign=u-rwanda-rwasabwe-kubungabunga-umutekano-wabana-mu-ikoranabuhanga-ku-mashuri

Amashyirahamwe atanu akomeye cyane yahagaritse ibikorwa muri Afghanistan nyuma y'aho aba Taliban bahagaritse abakozi b'abagore bayakoreraga.

Amashyirahamwe arimo Care International, Norwegian Refugee Council (NRC) hamwe na Save the Children avuga ko adashobora gukomeza ibikorwa byayo 'abakozi bacu b'abagore batarimo'.

International Rescue Committee (IRC) nayo yahagaritse ibikorwa, mu gihe irindi na Islamic Relief rivuga ko ryahagaritse hafi ibikorwa byaryo byose.

Ubutegetsi bw'aba Taliban muri Afghanistan bukomeje kubangamira uburenganzira bw'abagore.

Iri tegeko ku mashyirahamwe y'abagiraneza rije nyuma y'iminsi mike aba Taliban babujije abagore kwiga amashuri ya kaminuza.

Ubuyobozi bw'Abatalibani bwafashe umwanzuro ko imiryango itegamiye kuri Leta igomba guhagarika gukorana n'abagore nyuma y'uko bivuzwe ko batambara mu buryo buboneye.

Minisiteri y'Imari ifite mu nshingano imiryango itegamiye kuri leta, yavuze ko ifite impungenge ku kuba abagore batambara 'hijab' uko bikwiriye cyangwa se ngo bakurikize andi mahame ajyanye n'imyitwarire y'abagore mu kazi mu gihe bakora mu miryango mpuzamahanga.

Source : https://umuryango.rw/amakuru/mu-mahanga/ubuzima/article/imiryango-ikomeye-yafashaga-abanya-afghanistan-yahagaritse-ibikorwa-kubera

Bamwe mu baturage bivuriza ku mavuriro mato azwi nka poste de santé, bavuga hari serivise bajya kwaka ku kigo nderabuzima, bakifuza ko zashyirwa muri poste de santé, mu rwego kubagabanyiriza ingendo.

Hirya no hino mu gihugu hari abaturage bagaragaza ko poste de santébahawe zidakora, ariko aho zikora bazivuga imyato, urugero ni urwa Poste de sante Buvungira, mu mudugutu w'ikitegererezo wa Bushekeri.

Umwe ati 'Twivuzaga tugiye ku Kinini cyangwa se i Ruvumbo ariko aho igereye hano, abantu bose bivuriza aha. Byabaye byiza kuba itwegereye.'

 Undi ati 'Aha bampa serivise nziza, ibitaro bitari byahagera twari twarapfuye ariko aho byaziye byaradutabaye. Nubwo haba n'ijoro umuntu akarwara ahita aza kwivuza.'

Aha niho bahera basaba ko muri aya mavuriro mato hari serivise adatanga, kandi bazishyizemo byabafasha kudakora ingendo ndende, bajya kwivuriza ku bigo nderabuzima.

Umwe ati 'Ubuyobozi bwadufasha kutwongerera ibitaro, wenda nk'abagre bakabibyariramo,bakabipimiramo bakaduha Ambulance (imbangukiragutabara).'

 Undi ati 'Hari umudamu uza afite ikibazo cy'inda akabura ahantu yabyarira cyangwa se ahandi hantu yaba yaruhukira bigasaba ko bamwohereza ahandi hantu, byaba byiza batwubakiye ibitaro byagutse.'

 Mugenzi wabo ati 'Bayagura ku buryo bishobotse baduha uburyo bwo gukingirira hano kuko nabyo ni ibintu bitugora kubona. Izo serivise bidusaba kujya ku kigonderabuzima.'

Umuyobozi w'iri vuriro rito, Ntagayisha Alex, avuga ko hari imbogamizi bahura nazo, ariko bafite icyizere ko hari icyo leta igiye kubafasha kugira ngo barusheho gutanga serivise nziza.

Ati 'Nka serivise yo gukingira ntayo dukora,  hari serivise yo gupima abadamu batwite  na serivise yo kubyaza, izo ni ntabwo tuzemerewe ariko iyo baje turabasobanurira  tunagerageza kujya no mu nteko z'abaturage tukababwira ibyo twemerewe  bitewe n'ubushobozi bwa poste de santé, icyo gihe tubohereza ku kigo nderabuzima.'

Yakomeje agira ati 'Hari gahunda nshya igiye gusohoka  y'ama poste de santé  y'uburyo bagiye bayagabanyamo  ikiciro cya mbere n'icya Kabiri. Ikiciro cya Kabiri  ishobora kuzabona ayo mahirwe yo kugira serivise zari zisanzwe , tugize amahirwe natwe dushobora kwibonamo  noneho abaturage tukabibaher ahamwe.'

Hirya no hino mu Rwanda hari amavuriro mato, intego ni uko mu mwaka wa  2024, muri buri Kagari hazaba hari poste de santé.

Sitio Ndoli

The post <strong>Nyamasheke: Barasaba ko poste de santé za kongererwa serivise zitanga</strong> appeared first on FLASH RADIO&TV.

Source : https://flash.rw/2022/12/26/nyamasheke-barasaba-ko-poste-de-sante-za-kongererwa-serivise-zitanga/?utm_source=rss&utm_medium=rss&utm_campaign=nyamasheke-barasaba-ko-poste-de-sante-za-kongererwa-serivise-zitanga