Category: Uncategorized

Umuholandi Erik Ten Hag yavuze ko ikipe ye ya Manchester United iri mu nzira nziza ndetse ko umwaka utaha byanze bikunze izahatanira igikombe cya shampiyona niramuka ibashije guhozaho.

Ubu United ni iya gatatu muri Premier League aho irushwa amanota 16 na Arsenal ya mbere nyuma yo gutakaza amanota 5 mu mikino ibiri iheruka.

Ten Hag yitwaye neza mu mwaka we wa mbere aho yatwaye igikombe cye cya mbere cya Carabao Cup hanyuma atuma United inahatanira kujya mu makipe ane ya mbere nyuma yo kurangiza ku mwanya wa Gatandatu ubushize.

United iheruka shampiyona ku bwa Sir Alex Ferguson mu mwaka w'imikino 2012-13.

Ten Hag ati: 'Twateye imbere ariko haracyari icyuho.Ntabwo ntekereza ko twaziba icyuho vuba.Icyakora turashaka gutsinda buri mukino,tutitaye kuwo duhanganye.

Imikino yose mwabonye kugeza ubu,tugerageza gutsinda buri mukino.

Twatsinze amakipe yose akomeye,dufite ubushobozi bwo kubikora ariko tugomba gutera intambwe ikurikiraho yo guhozaho.Turabizi ko twabikora.

United yatwaye ibikombe 13 bya shampiyona iri kumwe na Sir Alex gusa Ten Hag yizera ko Premier League igoye cyane kuyitwara ubu.

Ati “Murabona irushanwa kandi numvise ibitekerezo ku bandi bakinnyi n'abatoza ko
Premier League nta gihe yagoranye kuyitwara nkubu.

Hari abayihataniye benshi.Ntabwo ari amafarashi abiri gusa ni atanu,atandatu,arindwi.Ugomba kuba mwiza cyane niba ushaka kuyitwara.

Brashora amafaranga,bafite abatoza bakomeye n'abakinnyi.Icyakora twatsinze amakipe yose muri Premier League.'

Source : https://umuryango.rw/imyidagaduro/imikino/article/erik-ten-hag-yahishuye-icyo-man-united-isabwa-kugira-ngo-izatware-shampiyona

Perezida Lazarus Chakwera wa Malawi yatangaje ko igihugu gitangiye icyunamo cy'ibyumweru bibiri nyuma y'urupfu rw'abantu barenga 225 bishwe n'inkubi y'umuyaga uvanze n'imvura byiswe Freddy.

Abategetsi bavuga ko abantu bagera kuri 41 bataraboneka nyuma y'imyuzure n'inkangu byibasiye inzu zabo.

Chakwera yavuze ko leta yagennye miliyoni 1,5 y'amadorari ya Amerika yo gufasha ibihumbi za mirongo by'abaturage bagizweho ingaruka na Freddy. Gusa avuga ko ayo mafaranga adahagije.

Yagize ati: 'Urugero rw'ibyangiritse duhanganye narwo ni runini cyane ugereranyije n'ubushobozi dufite.'

Leta yashinze inkambi z'agateganyo zigera kuri 30 zo kwakira abantu bagera ku 20,000 bataye ingo zabo kubera iki cyago.

Blantyre, umujyi w'imisozi ari nawo mukuru w'ubucuruzi wa Malawi, ni wo wibasiwe cyane, bamwe mu bawutuye bishwe n'inkangu zaguye ku nzu zabo, abandi bicwa n'imyuzure.

Minisitiri w'ibuzima Khumbize Kandodo Chiponda yabwiye ikiganiro BBC Focus on Africa ati: 'Yewe n'abakozi bacu bashinzwe ubuzima bakeneye ubufasha.'

Avuga uburyo 'bikomeye cyane', Madamu Kandodo yavuze ko abantu barenga miliyoni eshanu bagizweho ingaruka n'iriya nkubi n'imvura.

Ati: 'Dufite amateka yo kwibasirwa n'inkubi. Ariko kuri Freddy, byari bitandukanye cyane, ntibyari byitezwe gutya.

'Turacyabona imirambo y'abapfuye. Ku bw'amahirwe hari n'umwana watabawe akiri muzima.'

Ikigo cya leta gishinzwe ubutabazi kivuga ko abantu barenga 700 bakomeretse ubwo iyi nkubi yayogozaga mu mujyi wa Blantyre no mu majyepfo ya Malawi.

Fadila Njolomole w'imyaka 19 utuye i Blantyre yabwiye ibiro ntaramakuru AFP ati: 'Inshuti yanjye, musaza wanjye, mushiki wanjye na mama batwawe n'inkangu n'imirambo yabo ntiraboneka. Biteye agahinda. Ntitubasha no kubunamira.'

Perezida Chakwera, yambaye bote n'ikoti ry'imvura, yitabiriye umuhango wo gushyingura abantu 21 ku ishuri ribanza ryo muri uwo mujyi.

Aho yagize ati: 'Ndasaba inkunga y'abafatanyabikorwa n'abagiraneza bo mu mahanga. Iki ni icyago cyagwiriye igihugu cyagize ingaruka kuri buri wese'.

Gucika kw'imihanda n'ibiraro byadindije ibikorwa by'ubutabazi, mu gihe za kajugujugu nazo zari zifite ibibazo byo kuguruka kubera imvura nyinshi n'imiyaga ikomeye, nubwo ubu byacururutse.

Minisitiri w'ingabo mbere yavuze ko kajugujugu ya gisirikare izoherezwa gutabara abasirikare babiri baraye mu giti mu ijoro ryo kuwa kabiri batinya gutwarwa n'umugezi wari wuzuye ukagera munsi y'icyo giti.

Abo basirikare bari mu butumwa bwo gutabara abari mu mwuzure ubwo ubwato barimo bwarohamaga, bakoga kugeza bageze kuri icyo giti.

Abandi basirikare babiri n'umusivile umwe babashije koga bagera ahatekanya, ariko abo babiri bandi bari babanje kubura bikekwa barohamye.

Inkubi Freddy yamanuye igipimo cy'imvura yagwa mu mezi atandatu igwa mu minsi itandatu muri Malawi na Mozambique bituranye.

Muri Mozambique ho habaruwe abantu 20 bapfuye.

Myrta Kaulard, umukozi wa ONU, yatangaje ko ibyangiritse muri Mozambique bitari bikabije nk'uko byari byitezwe kuko leta yafashe ingamba mbere zo kurwanya imyuzure nyuma y'uko inkubi z'imiyaga n'imyuzure byagiye bihibasira mu myaka itatu ishize.

Myrta yabwiye BBC ati: 'Iki ni ikimenyetso gikomeye ko gushora gukomeye mu kwirinda gukenewe kubera ubukana bw'ingaruka z'ihindagurika ry'ikirere ku gihugu nka Mozambique.'

Freddy ni imwe mu nkubi enye zonyine mu mateka zaciye ku nyanja y'Ubuhinde zivuye mu majyaruguru ashyira uburengerazuba bwa Australia zikagera muri Afurika.

Freddy ishobora kandi kuba ari yo nkubi yamaze igihe kirekire kurusha izindi, nk'uko bivugwa n'ikigo World Meteorological Organisation.

Ku cyumweru iyi nkubi yibasiye Mozambique, ubwo yari imaze guca hejuru ya Madagascar naho ihangije byinshi.

Inzobere zivuga ko ihindagurika ry'ikirere ririmo guteza inkubi zikomeye kurushaho ahatandukanye ku isi.

Freddy yangije ibikorwaremezo by'amashanyarazi muri Malawi isiga igice kinini cy'igihugu ubu nta muriro gifite.

Kompanyi ya leta y'ingufu ivuga ko ingomero nyinshi z'amashanyarazi zitabasha gukora kubera imyuzure yazujujemo ibisigazwa by'ibyasenyutse.

BBC

Source : https://umuryango.rw/amakuru/mu-mahanga/umutekano/article/malawi-yinjiye-mu-cyunamo-cy-ibyumweru-bibiri-kubera-akaga-kayigwiriye

Nyuma y'icyumweru kimwe abazwe cyane ko yabazwe ku wa 7 Werurwe 2023, ku mugoroba wo ku wa 14 Werurwe 2023 yasezerewe mu bitaro ararataha ategekwa kujya kunywera imiti mu rugo.

Mu kiganiro na Igihe, Kabera yavuze ko nubwo atarakira neza ariko yavuwe kandi neza ku buryo kugeza ubu ategereje ko arangiza imiti no kwiyitaho kugira ngo akire neza.

Ati 'Barambaze, urutirigongo byarakemutse ndetse n'ukuboko kwari kwacomotse nako barakubaze. Bampaye imiti ngiye kunywera mu rugo kandi banyijeje ko nzakira neza.'

Kabera yavuze ko yabagiwe mu bitaro byitiriwe Umwami Faisal nyuma y'iminsi mike cyane agezeyo.

Ati 'Ndabashimira banyeretse ubunyamwuga mu kazi kabo kandi rwose bakoze iyo bwabaga ngo baramire ubuzima bwanjye. Ni ibintu byatwaye igihe gito kandi byagenze neza.'

Mu ijoro ryo ku wa 5 Werurwe 2023 ni bwo umugore wa Fireman yagejejwe mu bitaro byitiriwe Umwami Faisal nyuma yo kumara ibyumweru birenze bitatu mu bya Gisirikare i Kanombe.

Ku wa 8 Gashyantare 2023 nibwo Fireman n'umugore we Kabera Charlotte bakoze impanuka y'imodoka yatumye uyu mugore avunika.

Source : https://umuryango.rw/imyidagaduro/article/haravugwa-amakuru-meza-k-umugore-wa-fireman-wari-umaze-iminsi-arembeye-mu

Kubera imyuzure yibasiye Uganda,Gen Muhooza Kainerugaba yasabye ko abakiri bato bahabwa umwanya bakayobora iki gihugu cyane ko ngo biteye isoni kuba kitabasha kubaka ibikorwa remezo

Kuri uyu wa Gatatu mu masaha atandukanye, Gen Muhoozi usanzwe ari n'Umujyanama wa Perezida Museveni mu by'umutekano yagiye ashyira kuri Twitter ubutumwa bugaragaza ko hari byinshi anenga ubutegetsi buriho birimo icyenewabo no kudashyira imbaraga mu kubaka ibikorwaremezo.

Ubutumwa bwabimburiye ubundi ni ubugaragaza ko yashenguwe n'amashusho yagiye yohererezwa agaragaza uburyo Kampala yugarijwe n'imyuzure kubera kutagira ibikorwaremezo bigezweho.

Ati 'Mwese nakiriye amashusho mwanyoherereje agaragaza imyuzuye yibasiye Kampala ejo. Biteye ubwoya n'igisebo ku gihugu cyacu kuba tudashobora kubaka ibikorwaremezo mu mujyi wacu. Mureke abakiri bato b'uyu munsi bayobore murebe itandukanire.'

Ubu butumwa bwa Muhoozi yabukurikije ubundi bugaragaza ko kimwe mu bibazo Uganda yugarijwe nabyo harimo kuba iyobowe n'abantu bakuze kandi ikaba igaragaramo ruswa n'icyenewabo.

Ati 'Ni bangahe muri mwe mwemeranya nanjye ko igihe cyacu kigeze? Turambiwe kuyoborwa n'abakuze bataduha ijambo. Iki ni igihe cy'urungano rwacu. Ubu butumwa bukunde kandi ubusangize abandi.'

'Ejo hazaza, ibi bintu by'abantu bamwe banyereza umutungo wacu kubera icyenewabo bizarangira burundu! Tuzongera twubake igihugu cyacu bundi bushya kandi tugikure mu kangaratete ka ruswa.'

Nyuma y'ubu butumwa burebure Muhoozi yagiye yandika mu bihe bitandukanye yasoje agaragaza ko yiteguye kuzahatana mu matora y'Umukuru w'Igihugu ndetse agaragaza ko yatinze gufata izi nshingano.

Ati 'Intwari yanjye Fidel Castro yafashe ubutegetsi afite imyaka 32, ndasatira imyaka 49, mu byukuri ntibikwiriye. Umwanya w'Umukuru w'Igihugu ukwiriye abantu bato.'

'Mwagiye mushaka ko mbisubiramo iteka! Ntacyo bintwaye, mu izina rya Yezu Kirisitu Imana yanjye, mu izina ry'urubyiruko rwose rwa Uganda n'urw'Isi ndetse no mu izina ry'impinduramatwara yacu ihambaye nzahatanira umwanya w'Umukuru w'Igihugu mu 2026.'

Perezida Museveni ntabwo aravuga ku byavuzwe n'uyu muhungu we utacyumvikana n'ishyaka riri ku butegetsi NRM rimushinja kurisiga icyasha.

Source : https://umuryango.rw/amakuru/mu-mahanga/politiki/article/gen-muhoozi-yavuze-ko-abasaza-badakwiriye-kuyobora-uganda-kandi-se-ariwe

Ikigo cy'Igihugu gishinzwe Ibizamini n'Ubugenzuzi bw'Amashuri (NESA) cyagaragaje ingengabihe y'ingendo z'abanyeshuri biga bacumbikiwe ku mashuri, y'uburyo bazasubira mu miryango, kigira ibyo gisaba ababyeyi n'abayobozi b'Ibigo.

Bikubiye mu itangazo ryashyizwe hanze kuri uyu wa Gatatu tariki 15 Werurwe 2023, rivuga ko 'abanyeshuri biga bacumbikirwa bazatangira kujya mu biruhuko bisoza igihembwe cya kabiri guhera ku wa 28/03/2023 kugeza ku wa 31/03/2023.'

Iri tangazo rigaragaza ko tariki 28 Werurwe, izi ngendo zizatangirira ku banyeshuri biga mu bigo by'amashuro byo mu Turere dutatu twose tw'Umujyi wa Kigali.

Harimo kandi Uturere twa Nyanza na Nyaruguru mu Ntara y'Amajyepfo, utwa Musanze na Burera mu Majyaruguru, utwa Nyagatare na Gatsibo mu Burasirazuba ndetse na Ngororero mu Ntara y'Iburengerazuba.

Naho tariki 29 Werurwe 2023, hazataha abanyeshuri biga mu bigo by'amashuri byo mu Turere twa Gisagara na Ruhango mu Majyepfo, utwa Nyabihu na Rubavu mu Ntara y'Iburengerazuba, utwa Rulindo na Gakenke mu Ntara y'Amajyaruguru ndetse n'Uturere twa Rwamagana na Kayonza mu Burasirazuba.

Iri tangazo rikomeza risaba 'abayobozi b'Ibigo by'amashuri kubahiriza ingengabihe y'ingendo uko iteganyijwe, bashaka imodoka hakiri kare mbere yuko itariki yo gutaha igera, bohereza abana hakiri kare kugira ngo bagere mu miryango yabo butarira kandi bambaye umwambaro w'Ishuri.'

Ababyeyi bafite abana biga muri ibi bigo bibacumbikira na bo 'Basabwe guha abana babo amafaranga y'urugendo azabageza mu rugo.'

Source : https://umuryango.rw/amakuru/article/hagaragajwe-uko-ingengabihe-y-ingendo-z-abanyeshuri-bitegura-kujya-mu-biruhuko

Amakipe yagaragaje imbaraga nyinshi arimo Real Madrid na Napoli yamaze kugera muri 1/4 cy'irangiza cya UEFA Champions League yigaragaje cyane.

Real Madrid yageze muri ¼ cya UEFA Champions League nyuma yo gutsinda Liverpool igitego 1-0, iyisezerera ku giteranyo cya 6-2 mu mikino ibiri.

Ku rundi ruhande,Napoli yasezereye Eintracht Frankfurt iyitsinze ibitego 3-0 byiyongeraho 2-0 yayitsindiye iwayo, iyisezerera ku giteranyo cya 5-0.

Mu mukino wari utegerejwe na benshi i Santiago Bernabeu,ikipe ya Real Madrid itigaragaje cyane yatsinze Liverpool yari yitezweho ibitangaza ihita iyisezerera.

Byasabye umunota wa 78 w'umukino kugira ngo Real Madrid ifungure amazamu ku gitego cyinjijwe na Benzema wahawe umupira mwiza na Vinícius.

Icyakora Benzema mbere y'aho yahushije igitego cyabazwe ubwo yari ahawe umupira mwiza na Vinícius Júnior, ateye ishoti rizamuka hejuru y'izamu.

Undi mukino wabaye ku wa 15 Werurwe, warangiye Napoli itsinze Eintracht Frankfurt ibitego 3-0 birimo bibiri bya Victor Osimhen na Pietr Zielinski kuri penaliti.

Amakipe 6 mu yazakina ¼ yose yatwaye iki gikombe uretse Napoli na Man City.

Amakipe yabonye itike ni: Chelsea, Benfica, Bayern Munich, AC Milan, Inter Milan, Manchester City, Napoli na Real Madrid.

Tombora y'uburyo azahura izaba ku wa Gatanu, tariki ya 17 Werurwe, i Nyon mu Busuwisi. Imikino ibanza izakinwa tariki ya 11 n'iya 12 Mata mu gihe iyo kwishyura izaba tariki ya 18 n'iya 19 uko kwezi.

Source : https://umuryango.rw/imyidagaduro/imikino/article/real-madrid-na-napoli-zabaye-ikipe-za-nyuma-zakatishije-itike-ya-1-4-cya

Bamwe mu badepite mu mashyaka atavuga rumwe n'ubutegetsi muri Uganda, bavuze ko barambiwe igipindi cya Perezida Yoweri Kaguta Museveni, bavuga ko ijambo arageza ku nteko ishinga amategeko kuri uyu wa Kane tariki 16 Werurwe 2023, bashobora kutazaryumva nasubira kubabwira amateka nk'aho yatanze ijambo rizana ikizere mu baturage.

Ikinyamakuru Nile Post cyanditse ko Depite Anthony Akol uhagarariye akarere ka Kilak ya ruguru, yagiriye inama Perezida Museveni gutangira kuvuga ijambo rizana ibisubizo mu baturage.

Iyi ntumwa ya rubanda ngo ntiyumva ukuntu perezida umaze imyaka 36 ku butegetsi, akijya imbere y'imbaga akavuga amateka yaza 1986 kandi abantu benshi barayasomye mu ishuri, agasanga nakomeza ibi bazajya mu muhanda bakamwamagana.

Perezida Museveni akunze gushinjwa guhora mu mateka yamugejeje ku butegetsi, agamije guhunga ibibazo by'ubukene byugarije abaturage.

Anthony Akol avuga ko perezida Museveni ajya imbere ya rubanda akababwira ibyo ashaka kuvuga nk'aho yavuze ibyo bashaka kumva bibateza imbere, ndetse akenshi ajya mu baturage akaganya nk'abo kandi ari perezida utegerejweho ibisubizo. 

Uyu mugabo uhuje imyumvire na bagenzi be avuga ko ubu abanya-Uganda bategereje kumva icyo perezida akora kuri minisitiri waterewe ikizere n'abadepite ndetse n'abategetsi bariye amabati y'abakene ba Karamoja, ariko ubwo ari we azaza yivugire ibyabaye Luweero kandi ntawe utarabisomye mu mateka mu ishuri. 

Iri jambo ngo rishobora kubura abafana bo mu mashyaka atavuga rumwe na NRM, kuko ngo bari bwisohokera bamagana inyuruzwa ry'abagenzi babo badashyigikiye ubutegetsi baburirwa irengero.

The post <strong>Perezida Museveni yasabwe kuvuga ijambo rihindura ubuzima bw'abaturage akava mu mateka</strong> appeared first on FLASH RADIO&TV.

Source : https://flash.rw/2023/03/16/perezida-museveni-yasabwe-kuvuga-ijambo-rihindura-ubuzima-bwabaturage-akava-mu-mateka/?utm_source=rss&utm_medium=rss&utm_campaign=perezida-museveni-yasabwe-kuvuga-ijambo-rihindura-ubuzima-bwabaturage-akava-mu-mateka

Minisiteri y'Ubuzima iravuga ko ihangayikishijwe no kuba indwara zo mu kanwa zikomeje kuza ku isonga mu ndwara zituma abantu benshi bajya kwivuza mu mavuriro y'ibanza.

Imibare y'abarwayi bagannye ikigo nderabuzima cya Kagugu kiri mu Karere ka Gasabo, muri Gashyantare 2023 iragaragaza ko hafi 10% bose bagiye kwivuza indwara zo mu kanwa.

Habihirwe Callixte umuyobozi wungirije w'icyo kigo nderabuzima, avuga ko 90% by'abaguye kwivuza izo ndwara zo mu kanwa, baba bazitewe n'isuku  nke ikorerwa icyo gice cy'umubiri.

Ati 'Nk'abarwayi twakiriye uku kwezi kwa kabiri gushize bagera ku 4.032, ariko muri bo 366 baje baje kwivuza indwara zo mu kanwa. Mu by'ukuri muri rusange indwara nyinshi nibyo ziterwa n'umwanda, ariko tugarutse ku ndwara zo mu kanwa nanone usanga 90% inyinshi ziterwa n'umwanda.'  

Izi ndwara sibasira akanwa zigaragazwa na Ministeri y'ubuzima, nk'aho kuri ubu ari wo mutwaro uza ku isonga mu yo inzego z'ubuzima z'ibanze zikoreye, ukurikije uburemere n'imibare yiyongereye y'abakeneye ubuvuzi bw'izo ndwara. 

Dr. Sabin Nsanzimana ni Minisitiri w'Ubuzima.

Ati 'Hakaba n'ikibazo gikomeye cyane cy'indwara, ubu ng'ubu mu mavuriro mato, 'Centre de Santé' n'ibitaro by'uturere ikintu cya mbere gituma abanyarwanda bajya kwivuza, ni indwara zo mu kanwa n'amenyo. Nizo ziza ku mwanya wa mbere.'

Itangazamakuru rya Flash ryabajije bamwe mu baturage uburyo n'inshuro bakora isuku yo mu kanwa, maze bamwe bavugisha ukuri ko batayikora uko bikwiye,  hakaba  n'abasaga n'abatuvusha ukuri ariko bakaba barivuje indwara zo mu kanwa, kandi muganga akaba yarababwiye ko bazitewe n'umwanda.

Umwe yagize ati 'Tugereranyije ntabwo twabeshya ngo ni buri munsi, ariko nka rimwe mu minsi 3 turabikora cyangwa kabiri mu cyumweru.'

Undi ati 'Iyo dusukura mu kanwa dukoresha uburoso naziriya kolugate ziciriritse.'

Mugenzi we yungamo ati 'Ni intoki n'amazi ubundi umuntu agahita yigendera. Ubuse nk'ubu njyewe nkoreye igihumbi, ubuse igihumbi wagikuramo 'colgate' ya 600?'

Minisiteri y'Ubuzima nayo ishimangira ko indwara zibasira akanwa ahanini ziterwa n'isuku hafi ya ntayo yo muri icyo gice cy'umubiri.

Minisitiri Dr Sabin Nsanzimana, ashishikariza rubanda gukora iyo bwabaga bagakora isuku yo mu kanwa, mu rwego rwo kugabanya umuvundo wo kwa muganga.

Ati 'Iyo tubisuzumye dusanga zituruka ku mwanda, abantu ntabwo bakora isuku yo mu kanwa. Mu kanwa ntiwashyiramo ibyo kurya birimo imyunyu, isukari za aside zitandukanye ziba mu biryo. Abongeraho imisururu inzoga n'ibindi, ibyo byose bikajya mu kanwa ntabwo wakwizera ko ayo menyo atazarwara. Rwose twagira ngo tubishishikarize abantu ko isuku cyane cyane ihereye mu kanwa, iraza kuduha akazi gacye kwa muganga.'

Mu buryo rusange minisiteri y'ubuzima igaragaza ko 85% by'indwara zituma abantu bajya kwa muganga, ari izishobora kwirindwa bityo ntibibe ngombwa ko zijya kwa muganga, muri zo 40% zikaba ari izituruka ku mwanda.

Tito DUSABIREMA

The post <strong>Indwara zo mu kanwa ku isonga muzigitera umuvundo kwa muganga</strong> appeared first on FLASH RADIO&TV.

Source : https://flash.rw/2023/03/16/indwara-zo-mu-kanwa-ku-isonga-muzigitera-umuvundo-kwa-muganga/?utm_source=rss&utm_medium=rss&utm_campaign=indwara-zo-mu-kanwa-ku-isonga-muzigitera-umuvundo-kwa-muganga

Ishyaka United Progressive Alliance risanzwe ribogamiye kuri Fred Matiang'i wahoze ari somaho mbike wa perezida Uhuru Kenyatta, ryatangaje ko ubu rishyigikiye Perezida William Ruto mu nyungu z'abanya-Kenya.

Iri shyaka ubusanzwe risanzwe rishyigikiye umunyapolitiki utavuga rumwe n'ubutegetsi Raila Odinga, ryavuze ko ubu rishyize imbere inyungu z'igihugu.

Ikinyamakuru The Star cyanditse ko Perezida w'iri shyaka usanzwe ategeka intara ya Nyamira, bwana Amos Nyaribo, yavuze ko gushyigikira gahunda za perezida uriho bitavuze ko batandukanye na Raila Odinga.

Iri shyaka rivuga ko kuwa mbere w'iki cyumweru  ryakoze inama rikanzura ko rigomba gushyigikira guverinoma iriho, ikabasha kugeza kubaturage ibyo bemerewe ihangana rikazaza nyuma.

Iri shyaka ryavuze ko ritazajya mu ihuriro Kenya Kwanza cyangwa se mu ishyaka UDA rya perezida Ruto, bashaka gushyigikira gahunda za leta gusa.

Iri shyaka UPA ryahise ritangaza ko ryivanye mu myigagarambyo karundura ya Raila Odinga, izaba tariki 20 Werurwe 2023, igamije kwamagana ubutegetsi buruho muri Kenya.

Guverineri Nyaribo amaze iminsi n'ubundi agaragaza ko ashishikajwe no guteza imbere abaturage bamutoye, kurusha kwirirwa ari mu mihanda mu myigaragambyo itagize icyo imariye rubanda.

Ihuriro Azimio ryamubwiye ko kuba arivuyemo kare ari byiza kuko n'ubundi amaze igihe agaragara nk'ingwizamurongo yishakira imyanya mu butegetsi, mbese ngo akunda gukeza abimye kubera ubwoba bwo gutakaza akazi nka guverineri.

The post Kenya: Ishyaka UPA rya Matiang'i ryashimangiye ko rishyigikiye Ruto appeared first on FLASH RADIO&TV.

Source : https://flash.rw/2023/03/16/kenya-ishyaka-upa-rya-matiangi-ryashimangiye-ko-rishyigikiye-ruto/?utm_source=rss&utm_medium=rss&utm_campaign=kenya-ishyaka-upa-rya-matiangi-ryashimangiye-ko-rishyigikiye-ruto

Umusifuzi mpuzamahanga w’umunyarwanda, Mukansanga Salima Rhadia yagaragaye afungira imishumi y’inkweto, Perezida wa Repubulika y’u Rwanda, Paul Kagame mu mukino w’umupira w’amaguru wabaye ku munsi w’ejo.

Wari umukino wa mbere w’irushanwa rihuza amakipe y’abakanyujijeho nka kimwe mu bikorwa bishamikiye ku Nteko Rusange ya 73 ya FIFA iri kubera i Kigali.

Ni irushanwa ryabereye kuri Kigali Pele Stadium yafunguwe kuri uyu wa Gatatu tariki ya 15 Werurwe 2023.

Uyu mukino wahuje u Rwanda na FIFA aho warangiye ikipe y’u Rwanda ibyitwayemo neza itsinze ibitego 3-2.

Ni umukino wakinwe na Perezida Paul Kagame wishimiwe cyane bitewe n’ubuhanga yagaragaje muri uyu mukino.

Ubwo umukino warimo uba, imishumi y’inkweto yakinanaga yaje gufunguka maze umusifuzi warimo asifura uyu mukino, Mukansanga Salima Rhadia aba ari we umufungira.

Iyi foto abantu bahise bayihererekanya ku mbuga nkoranyambaga ubona ko bayishimiye cyane.

Mukansanga Salima Rhadia afungira imishumi y’inkweto Perezida Kagame

Source : http://isimbi.rw/siporo/article/ifoto-y-umunsi-mukansanga-salima-afungira-imishumi-y-inkweto-perezida-kagame