Category: Uncategorized

Pierluigi Collina ari mu Rwanda aho yitabiriye Inteko Rusange y'Ishyirahamwe rya Ruhago ku Isi, FIFA, iteganyijwe kuba ku wa 16 Werurwe 2023.

Uyu Mutaliyani yageze mu Rwanda mu gitondo cyo ku wa Gatatu, tariki ya 15 Werurwe 2023. Akihakandagiza ikirenge yabanje gusura Urwibutso rwa Jenoside rwa Kigali rushyinguyemo imibiri ibihumbi 259 yakuwe mu Turere tw'uyu mujyi turimo Gasabo, Kicukiro na Nyarugenge.

We n'abari bamuherekeje batambagijwe ibice bitandukanye birugize ndetse basobanurirwa amateka y'u Rwanda hambere n'uburyo umugambi wa Jenoside wacuzwe ukanashyirwa mu bikorwa kugeza mu 1994, ubwo inzirakarengane zirenga miliyoni zicwaga zizira uko zavutse.

Collina amaze gusura urwibutso no gusobanurirwa amateka y'u Rwanda, yanditse ubutumwa mu gitabo cy'abashyitsi ku rwibutso, bukomoza ku byo yiboneye n'amaso ye ku bihe bishaririye u Rwanda rwanyuzemo.

Ibarura ryakozwe na Minisiteri y'Ubutegetsi bw'Igihugu mu 2000 rikamara imyaka ibiri (2000-2002), ryagaraje ko Abatutsi 1.074.017 bishwe mu minsi 100 kuva muri Mata kugera muri Nyakanga 1994. Iyo raporo yatangajwe mu 2004 igaragaza aho abishwe bari batuye, imyaka bari bafite, amazina yabo ndetse bamwe muri bo bizwi neza uburyo bishwemo.

Pierluigi Collina kuri ubu ni Umuyobozi wa Komite y'Abasifuzi muri FIFA. Azitabira Inteko Rusange y'iri shyirahamwe rya Ruhago ku Isi, ari na yo izemerezwamo Infantino nk'ugomba kuriyobora muri manda y'imyaka ine iri imbere, ikaba iya gatatu agiye gutorerwa. Ni we mukandida rukumbi wiyamamaje.

Iyi Nteko Rusange iteranye ku nshuro ya 73, ikaba iya mbere ibereye mu Rwanda nyuma y'Inteko y'Inama y'Ubuyobozi bwa FIFA yabereye muri Kigali mu 2018.

Pierluigi Collina ni we musifuzi wubahwaga n'abakinnyi ndetse akagirirwa igikundiro kubera imiterere y'umutwe we n'amaso, hatitawe ku buryo yasifuye, yahawe ibihembo bitandukanye muri aka kazi nk'umusifuzi mwiza.

Kuva mu 1998 kugeza mu 2003 yahawe igihembo cy'umusifuzi wahize abandi inshuro esheshatu yikurikiranya. Yahawe kandi igihembo cy'umusifuzi w'ibihe byose kuva mu 1987 kugeza mu 2020.

Uyu mugabo w'imyaka 63 yahawe igihembo cy'umusifuzi mwiza mu Butaliyani inshuro zirindwi (1997, 1998, 2000, 2002, 2003, 2004, 2005). Yahawe kandi igihembo cy'uwagiza uruhare mu mu iterambere rya siporo y'u Butaliyani mu 2011.

Mu 1999 yasifuye umukino wa nyuma wa UEFA Champions League wahuje Manchester United na Bayern Munich mu gihe mu 2022 yayoboye uwa nyuma w'Igikombe cy'Isi cya 2022 wahuje u Budage na Brésil. Kugeza ubu ni umwe mu bagize Komisiyo y'Imisifurire i Burayi.

Umusifuzi mpuzamahanga Pierluigi Collina ubwo yageraga ku Rwibutso rwa Kigali ku Gisozi aho yunamiye inzirakarengane za Jenoside ziruruhukiyemo

Pierluigi Collina yasobanuriwe amateka u Rwanda rwanyuzemo

Pierluigi Collina yasuye Urwibutso rwa Kigali ku Gisozi

Beretswe filime mbarankuru yerekana uko Jenoside yateguwe, uko yahagaritswe n’uko u Rwanda rwongeye kwiyubaka

Umutaliyani Pierluigi Collina yasuye Urwibutso rwa Kigali, asobanurirwa amateka ashaririye igihugu cyanyuzemo

Yasobanuriwe uko Jenoside yakozwe nta kurobanura kuko n’abana bicwaga

Abanyamahanga bitabiriye Inteko Rusange ya FIFA basuye Urwibutso rwa Jenoside rwa Kigali ruri ku Gisozi

Batambagijwe ibice bigize Urwibutso rwa Kigali, banasobanurirwa amateka y'uburyo umugambi wa Jenoside wacuzwe, ukanashyirwa mu bikorwa

Pierluigi Collina na bagenzi be bunamiye inzirakarengane ziruhukiye mu Rwibutso rwa Jenoside rwa Kigali, banashyira indabo ku mva

Amafoto: Shumbusho Djasiri

---

Source : http://igihe.com/amakuru/u-rwanda/article/umusifuzi-mpuzamahanga-pierluigi-collina-yasuye-urwibutso-rwa-kigali-amafoto

Iyi nkuba yabakubise ku gicamunsi cyo kuri uyu wa Gatatu tariki ya 15 Werurwe 2023, mu Mudugudu wa Bibare mu Kagari ka Bibare mu Murenge wa Muhura ku Rwunge rw'Amashuri.

Umunyamabanga Nshingwabikorwa w'Umurenge wa Muhura, Ndayisenga Jean Claude, yabwiye IGIHE ko aba bana bakubiswe n'inkuba ari barindwi gusa ngo nta n'umwe wapfuye.

Yagize ati ' Imvura yari irimo igwa hari abana bari mu ishuri bagiye gukora ikizami nuko ihita ikubita abana barindwi aba aribo ibabura gusa nta mwana n'umwe wapfuye uretse ko yagiye ibababura ku bitugu, mu gituza, ku maguru n'ahandi henshi hatandukanye. Abo bana twahise tubajyana kwa muganga kuri ubu bari kubitaho.'

Gitifu Ndayisenga yavuze ko bagiye kongera ubukangurambaga mu kwigisha abanyeshuri uko bakwiriye kwitwara muri iki gihe cy'imvura nyinshi ndetse bakanongera kwibutsa ababyeyi n'abarezi kwita ku bana.

Ati ' Turi mu bihe by'imvura ubu haba hari ibibazo bigendanye n'ibiza rero ku mashuri hagakwiriye kuba imirindankuba myinshi ikumira izi nkuba mbere yuko zikubita abana, tugiye kuyongera rero tunasabe amashuri kubwira abana kujya birinda kugama munsi y'ibiti n'ahandi hantu habi hatuma inkuba zibakubita.'

Kuri ubu abana bakubiswe n'inkuba bose barwariye ku kigo nderabuzima cya Muhura bakaba bakomeje kitwabwaho n'abaganga.

---

Source : http://igihe.com/amakuru/u-rwanda/article/gatsibo-inkuba-yakubise-abana-bari-bagiye-gukora-ikizamini

Meya w'agace kitwa Kasama muri Zambia ari kuvugwa cyane nyuma y'aho yemeye ko imodoka ye agendamo ikoreshwa mu gutwara imyanda yari imaze kuba myinshi kubera ko ikamyo yayitwaraga yapfuye.

Nkuko ikinyamakuru Zambian Observer kibitangaza,ngo aka gace kari kugarijwe bikomeye n'ibirundo by'imyanda yari irunze cyane byatumye abantu bamuhamagara ubutitsa ngo abatabare abashakire indi kamyo.

Meya wa Kasama,Madamu Theresa Kolala abonye ko telefoni zibaye nyinshi yahisemo gutanga imodoka ye agendamo itwara imyanda.Iki kinyamakuru kivuga ko amasoko menshi y'aha yari yarengewe n'imyanda myinshi.

Meya Kolala yakoze akandi gashya ngo we ubwe aza gufatanya n'abakozi babishinzwe kurunda iyi myanda kandi yiyemeza guhangana n'iki kibazo kugeza gikemutse.

Uyu ngo yagiriye abaturage inama yo kwitondera uburyo bajugunya imyanda kuko ngo bishobora kuba isoko yo gutuma Kasama irwara Kolera.

Source : https://umuryango.rw/ubuzima-115/udushya/article/meya-yatanze-imodoka-agendamo-ngo-itware-imyanda-yo-mu-karere-ke

Turamenyesha ko uwitwa BWAYONAKE Denys Isaac mwene Gahutu na Mujawamaliya, utuye mu Mudugudu wa Gihanga, Akagari ka Akabahizi, Umurenge wa Gitega, Akarere ka Nyarugenge, mu Mujyi wa Kigali wanditse asaba uburenganzira bwo guhinduza amazina asanganywe ariyo BWAYONAKE Denys Isaac, akitwa BWAYONATWE Benis ISAAC mu gitabo cy'irangamimerere. Impamvu atanga yo guhinduza izina ni Niyo mazina nakoresheje mu ishuli kuva ngitangira kwiga.

The post INGINGO Z'INGENZI Z'IMPAMVU YO GUSABA GUHINDUZA AMAZINA appeared first on RUSHYASHYA.

Source : https://rushyashya.net/ingingo-zingenzi-zimpamvu-yo-gusaba-guhinduza-amazina-37/?utm_source=rss&utm_medium=rss&utm_campaign=ingingo-zingenzi-zimpamvu-yo-gusaba-guhinduza-amazina-37

Amakuru aravuga ko hubuye imirwano hagati y'igisirikare cya Repubulika ya Demokarasi ya Congo (FARDC) n'umutwe wa M23,nyuma y'iminsi itatu hari agahenge.

Kuva mu mpera z'icyumweru gishize, imirwano yabaye nk'icogora n'umutwe wa M23 uva muri bimwe mu bice wafashe ubisigira ingabo za EAC nkuko wabitangaje gusa uvuga ko igihe cyose uzashotorwa ntakizawubuza kwirwanaho no kurinda abaturage bo mu bice uzaba urimo.

Rwanda Tribune ivuga ko ku mugoroba wo kuri uyu wa Kabiri tariki 14 Werurwe 2023, ahagana saa kumi z'umugoroba,urugamba rwongeye kwambikana mu bice bya Neenero werecyeza mu gace ka Kagoma muri Teritwari ya Masisi.

Ukurikiranira hafi iby'uru rugamba, yagize ati 'Imirwano mishya yubuwe n'igisirikare cya Congo cyagabye ibitero ku birindiro by'Intare za Sarambwe (M23) mu Bilometeri 13 uvuye mu mujyi wa Sake.'

Andi makuru aravuga ko guhera kuwa 12 Werurwe 2023, ubwo umutwe wa M23 watangiraga kuva mu tundi duce wafashe tugera kuri 6 muri teritwari ya Masisi,imitwe itandukanye yahise itwifatira.

Byavugwaga ko twagiye mu bugenzuzi bw'ingabo za EAC ziganjemo iza Kenya, ariko kuri ubu siko bimeze kuko ingabo za FARDC,FDLR n'imitwe ya Nyatura na Mai Mai aribo bari guhita bongera kutwisubiza.

Ubwo M23 yavaga muri Sake, byari biteganyijwe ko ingabo z'u Burundi arizo zihita zifata ubugenzuzi bwaho, ariko siko byagenze kuko FARDC ariyo yahise ihasubira.

Mu gace ka mweso naho ni uko, kuko nyuma yaho M23 ihavuye, ubu aka gace kigarurirewe n'imitwe ya Mai Mai yahise yishora no mu bikorwa by'ubusahuzi.

Hari kandi n'utundi duce turimo Karuba,Muremure na Nyamitaba bivuga ko natwo FARDC ishabora kutwinjiramo nyuma yaho M23 ihavuye.

Source : https://umuryango.rw/amakuru/mu-mahanga/umutekano/article/imirwano-yongeye-kubura-hagati-ya-fardc-na-m23-nyuma-y-agahenge-k-iminsi-itatu

Uwitwa NTIBIHANGANYE Ancille yasabye guhindura amazina mu buryo bwemewe n'amategeko akitwa KWIZERA Ancille mu bitabo by'irangamimerere.

Impamvu atanga zituma asaba guhindura amazina akaba ari uko ari izina riteye ipfunwe.

Source : https://umuryango.rw/amatangazo/article/itangazo-ntibihanganye-ancille-yasabye-guhindura-amazina-akitwa-kwizera-ancille

Ikipe y'u Rwanda yarimo Perezida Kagame yatsinze iya Gianni Infantino uyobora Ishyirahamwe rya Ruhago ku Isi, FIFA, yari igizwe n'abarimo Umunya-Brazil Cafu mu irushanwa rihuza amakipe umunani, y'abitabiriye Inteko Rusange ya FIFA.

Mu mukino ufungura wahuje Ikipe y'u Rwanda irimo Perezida Paul Kagame n'iya FIFA irimo Gianni Infantino.

U Rwanda rwatsinze uyu mukino ku bitego 3-2 rukomeza mu kindi cyiciro.

Umunya-Nigeria Augustine Azuka Okocha wamamaye nka Jay-Jay Okocha, ni we watsindiye u Rwanda ibitego bitatu byabonetse muri uyu mukino.

Okocha w'imyaka 49 yakiniye amakipe anyuranye arimo Paris Saint-Germain F.C. yo mu Bufaransa na Hull City yo mu Bwongereza.

Ikipe ya FIFA yo yatsindiwe n'Umunya-Brazil Marcos Evangelista de Morai [Cafu]. Uyu munyabigwi ukina yugarira anyuze ku ruhande rw'iburyo, yanyuze mu makipe atandukanye arimo AC Milan na AS Roma yo mu Butaliyani.

Ikipe y'u Rwanda itozwa na Mashami Vincent usanzwe ari Umutoza wa Police FC, wanabaye Umutoza w'Ikipe y'Igihugu Amavubi. Irimo Perezida Kagame; Jay Jay Okocha; Jimmy Mulisa, Karekezi Olivier, Murangwa Eugène, Nshimiyimana Eric, Kayiranga Jean Baptiste, Ngabo Albert bakiniye Amavubi; Mateso Jean de Dieu utoza Kiyovu Sports; Nizeyimana Olivier uyobora FERWAFA; Nyinawumuntu Grace uyobora Siporo mu Irerero rya Ruhago rya Paris St Germain mu Rwanda n'abandi.

Iri rushanwa riri kubera kuri Kigali Pelé Stadium iherereye i Nyamirambo. Iyi stade yatashywe na Perezida Paul Kagame na Gianni Infantino nyuma yo kuyivugurura.

Mukansanga Salma niwe wasifuye uyu mukino.

AMAFOTO:IGIHE

Source : https://umuryango.rw/imyidagaduro/imikino/article/perezida-kagame-yakiniye-ikipe-y-u-rwanda-mu-mukino-yatsinzemo-iya-infantino

Source : https://umuryango.rw/amakuru/urukundo/article/dore-ibintu-wakora-bikagufasha-kongera-kwigarurira-icyizere-cy-muunzi-wawe

Ubuyobozi bw'ikipe ya Arsebal bwatangaje ko bwamaze gukora neza gahunda y'abakinnyi buzagura mu mpeshyi igiye kuza ndetse ngo banatangiye kubaganiriza kare.

Ikipe ya Arsenal iyoboye Premier League kubera kugura neza mu masoko abiri aheruka,yatangaje ko nubu yamaze gupanga abakinnyi izagura mu mpeshyi ubu iri kubaganiriza bucece kugira isoko rizafungure ihita ibagura ntawe uyisagariye.

Diregiteri wa siporo wa Arsenal,Edu,abajijwe kuri gahundayo mu mpeshyi yagize ati “Twamaze gutangira kubera ko muzi ibibera ku isoko,buri wese aba akora ibye.

Uba ugomba kuganira n'abantu kugira ngo mwitegure kugira ngo niwongera kwinjira mu mpeshyi ube witeguye neza.

Buri gihe nitegura kare kugira ngo nzajye ku isoko niteguye guhangana n'ibyo bibazo [biribamo].Muri Premier League hari amakipe menshi n'abatoza b'abahanga niyo mpamvu ihatana riba rikomeye.Uko witegura kare niko wumva umerewe neza.”

Edu yavuze ko mu isoko riheruka bari biteguye ndetse byagenze neza bakagura abakinnyi 3 barimo Trossard,Kiwior na Jorginho ndetse no mu mpeshyi bamaze kwitegura ku buryo isoko rizaborohera.

Ikipe ya Arsenal ikomeje guhatana ngo irebe uko yakwigaranzura Man City ikayitwara igikombe cya Premier League cyane ko iyirusha amanota 5 hasigaye imikino 11 gusa.

Abakinnyi bivugwa ko Arsenal iri kurambagiza barimo Decran Rice wa Westham,Moussa Diaby wa Leverkusen n'abandi.

Source : https://umuryango.rw/imyidagaduro/imikino/article/arsenal-yatangaje-inkuru-yashimishije-abakunzi-bayo

Perezida Paul Kagame na Gianni Infantino uyobora FIFA, bafunguye ku mugaragaro Kigali Pelé Stadium, mu muhango wabaye kuri uyu wa Gatatu, tariki ya 15 Werurwe 2023.

Stade yahoze yitwa iya Kigali yatashywe nyuma yo kuvugururwa. Muri uyu muhango, irakinirwaho imikino itandukanye y'irushanwa rihuza amakipe y'abakanyujijeho nka kimwe mu bikorwa bishamikiye ku Nteko Rusange ya 73 ya FIFA iri kubera i Kigali.

Imirimo yo kuyivugurura yatangiye tariki 4 Mutarama 2023. Mu byayikozwemo harimo gusimbuza tapis yarimo, guhindura igisenge, kuvugurura urwambariro no gusiga amarangi mu mfuruka zayo zitandukanye.

Perezida Paul Kagame yashimiye Perezida wa FIFA, Gianni Infantino, kuri iki gikorwa.

Ati “Tubashimiye kubana natwe muri aka kanya. Ndashaka kugushimira Gianni, Perezida wa FIFA kuduha aya mahirwe yo guhuriza aba bantu bose hano mu gihe dufungura iyi Stade yitiriwe Pelé.”

“Iyi stade ni ahantu hagenewe abakobwa bakiri bato n'abahungu bahurira hamwe bagakina, bashaka kwigira ku munyabigwi Pelé.”

Gianni Infantino yavuze ko bishimiye kuba mu Rwanda mu gihe hagiye kubera Inama ya 73 ya FIFA.

Ati “Uyu munsi twazanye Isi yose mu Rwanda kubera umupira w'amaguru uhuza Isi.”

“Twishimiye kandi gufungura iyi “Kigali Pelé Stadium”. Pelé ni umupira w'amaguru kandi ni ngombwa ko tumuha icyubahiro nubwo yadusize.”

Stade ya Kigali iherereye i Nyamirambo yahinduriwe izina yitiririrwa Umunya-Brazil Edson Arantes do Nascimento 'Pelé'. Ni icyemezo cyafashwe nyuma y'urupfu rw'uyu munyabigwi witabye Imana tariki 29 Ukuboza 2022 azize uburwayi.

IVOMO:IGIHE

Source : https://umuryango.rw/imyidagaduro/imikino/article/perezida-kagame-na-gianni-infantino-bafunguye-stade-ya-kigali-yahawe-izina