Webrwanda Backend

Category: Uncategorized

  • Urubyiruko rwa CEPGL rwakuye isomo rikomeye ku Rwibutso rwa Jenoside rwa Kigali – #rwanda #RwOT

    Rwabigaragaje kuri uyu wa 15 Werurwe 2023 ubwo rwasuraga uru rwibutso nka kimwe mu bikorwa byari biteganyijwe mu nama ihuje urubyiruko rusaga 250 rwo mu Karere k'Ibiyaga Bigari, igamije kwimakaza iterambere n'amahoro arambye.

    Ni inama yitabiriwe n'abahagarariye imiryango ikorera muri ibyo bihugu n'abo mu nzego za leta by'umwihariko izishinzwe urubyiruko hagamijwe no kurutegura cyane ko ari bo bayobozi b'ejo hazaza.

    Iyi nama kandi ni imwe mu bikorwa by'umushinga ugamije kubakira ubushobozi urubyiruko rwo muri CEPGL rurajwe ishinga no guharanira aamahoro binyuze mu biganiro (Great Lakes Youth Network for Dialogue and Peace) uterwa inkunga n'Umuryango w'Ubumwe bw'u Burayi n'Ikigo cy'Abagiraneza cy'Abadage (Konrad Adenauer Foundation: KAS)

    Anisha Alinda ushinzwe porogaramu za KAS muri Uganda na Sudani y'Epfo yavuze ko ibyo yabonye bimuhaye imbaraga zo kurwanya yivuye inyuma ibikorwa bishobora gutuma yongera kuba jenoside aho ari ho hose.

    Ati “Nubwo hashize imyaka ibaye ariko n'ubu turacyabona ibimenyetso by'indi ishobora kuba muri RDC ndetse n'ibikorwa by'ubwicanyi bibera muri Sudani y'Epfo. Buri gihugu cya Afurika y'Uburasirazuba hano cyari gihagarariwe, ibyumvikana ko twese dukeneye gufatanya ibi bintu bigacika.'

    Alinda avuga ko guharanira amahoro bigomba guhera ku muntu ku giti cye akumva ko mugenzi we afite agaciro kuko 'ntabwo dukeneye ko leta z'ibihugu ari zo zibanza kubidukangurira. Yego nabo ni inshingano zabo ariko nitubihagurukira ubwacu bizacika kuko urubyiruko rugambiriye ibyiza rwagera kuri byinshi.'

    Umuyobozi uhagarariye Umuryango Vision Jeunesse Nouvelle uharanira iterambere ry'urubyiruko, mu buryo bw'amategeko ari na wo wakiriye iyi nama, Frѐre Emmanuel Rwandamuriye yavuze ko gusura Urwibutso rwa Jenoside rwa Kigali byakozwe kugira ngo barwanye ingengabitekerezo aho iva ikagera mu bihugu byabo.

    Ati “Bagomba kugira uruhare mu kurwanya iyo ngengabitekerezo kugira ngo ibyabaye mu Rwanda bitazongera kugira aho biba ukundi. Tuzi ko urubyiruko rugira uruhare mu kubaka igihugu iyo rutojwe neza. Iyo rutabaye ibyo rufasha mu gusenya'

    Uretse gusura Urwibutso rwa Jenoside yakorewe Abatutsi rwa Kigali ruri ku Gisozi, uru rubyiruko rwanasuye Inteko Ishinga Amategeko rwerekwa uko ikora ndetse n'uburyo abagore bagize umubare munini mu nteko, aho biyemeje kujya gukora ubuvugizi kugira ngo n'iwabo iyo gahunda yimakazwe.

    Uru rubyiruko rwagize umwanya wo kunamira abazize Jenoside yakorewe Abatutsi

    Babanje gushyira indabo ku mva zishyinguyemo abishwe muri Jenoside yakorewe Abatutsi bashyinguye ku Rwibutso rwa Kigali

    Source : http://igihe.com/amakuru/u-rwanda/article/urubyiruko-rwa-cpgl-rwasuye-urwibutso-rwa-jenoside-rwa-kigali-ruhiga-guhangana

  • Abapolisi b'u Rwanda bari mu butumwa bw'amahoro bambitswe imidali y'ishimwe – #rwanda #RwOT

    Mu bambitswe imidali y'ishimwe harimo abapolisi 239 bagize itsinda RWAFPU-1 rikorera mu mujyi wa Malakal, mu gace ka Upper Nile muri Sudani y'Epfo aho bari mu butumwa bw'Umuryango w'abibumbye bwo kugarura amahoro muri icyo gihugu (UNMISS).

    Abandi ni abapolisi 184, bakorera ahitwa Kaga Bandoro, mu Ntara ya Nana Gribizi barimo 180 bagize itsinda RWAFPU-II ndetse n'abapolisi bane bakora akazi k'ubujyanama, mu butumwa bw'Umuryango w'Abibumbye bwo kugarura amahoro mu gihugu cya Centrafrique (MINUSCA).

    Imihango yo kubashyikiriza imidali yayobowe na ba Komiseri ba Polisi y'Umuryango w'Abibumbye; Christine Fossen muri Sudani y'Epfo na Commissioner of Police (CP) Christophe Bizimungu uyobora Polisi ya Loni muri Repubulika ya Centrafrique.

    Ni ibirori byari byitabiriwe n'abandi bapolisi, abasirikare n'abasivile baturutse mu bihugu bitandukanye bitanga umusanzu mu bikorwa byo kugarura amahoro, abayobozi muri Guverinoma n'abaturage ba Sudani y'Epfo na Centrafrique.

    Amatsinda yombi y'abapolisi b'u Rwanda yoherejwe muri ibyo bihugu mu bikorwa byo kurinda abasivile, gufasha mu kugarura amahoro n'umutekano muri ibyo bihugu, gukurikirana no gukora iperereza ku ihohoterwa ry'uburenganzira bwa muntu, gushyigikira ishyirwa mu bikorwa ry'amasezerano y'amahoro ndetse n'izindi nshingano nko guherekeza abayobozi.

    Madamu Fossen yongeye gushimangira ko u Rwanda rufite ubushake budashidikanywaho mu kubungabunga amahoro cyane cyane muri Sudani y'Epfo, anashimira abapolisi bambitswe imidari ku muhate n'ubwitange bagaragaje.

    Yagize ati “Uyu munsi twishimiye kandi tuzirikana umuhate n'ubwitange mugaragaza mu guharanira amahoro. Mwagize uruhare rukomeye mu bikorwa by'umutekano w'abaturage kandi mukomeza kuwubungabunga mukora amarondo amanywa n'ijoro murinda umutekano w'inkambi z'abavanywe mu byabo n'intambara.”

    Yunzemo ati “Mwagize kandi uruhare rukomeye mu kugenzura iyubahirizwa ry'amategeko, kurinda ituze rusange n'umutekano, gukumira ubugizi bwa nabi ku nkambi z'impunzi no gutanga uburyo bwo kubaka icyizere ku mpunzi mu rwego rwo kubafasha gusubira mu ngo zabo.”

    Umuyobozi w'itsinda Rwanda FPU-1, Senior Superintendent of Police (SSP) Prudence Nirere Ngendahimana, yashimiye abaturage ba Malakal ku bufatanye bagaragarije itsinda ayoboye mu kubungabunga amahoro.

    Yagize ati “Twagiranye umubano mwiza n'abaturage ba Malakal cyane cyane abo mu bice dukoreramo. Turashimira UNMISS n'ubuyobozi bwa Sudani y'Epfo ku nkunga yabo n'uburyo badufasha mu kubungabunga umutekano w'abaturage.”

    U Rwanda rwohereje itsinda rya mbere ry'abapolisi (FPU-1) muri Malakal mu 2015. Abapolisi bambitswe imidali kuri uyu munsi bagize itsinda rya karindwi ryoherejwe muri Mata umwaka ushize.

    Mu butumwa bwo kugarura amahoro muri Repubulika ya Centrafrique (MINUSCA), CP Christophe Bizimungu, uyobora Polisi y'Umuryango w'Abibumbye muri icyo gihugu, yashimiye abapolisi bambitswe imidari ku bwitange bwabaranze mu kurengera ikiremwamuntu.

    Yagize ati ” Ndabashimira ko mwagaragaje ubwitange mu kazi kanyu ka buri munsi murinda abaturage bavanywe mu byabo n'intambara.”

    Yakomeje abibutsa ko aho bari hose bakwiye guharanira guhora bahesha ishema igihugu cy'ababyaye.

    Umuyobozi w'Itsinda ry'abapolisi b'u Rwanda bambitswe imidali, Chief Superintendent of Police (CSP) Hodali Rwanyindo, yashimiye ubuyobozi bwa Minusca butahwemye kubaba hafi mu kazi kabo ka buri munsi.

    Yagize ati “Ndashimira mbikuye ku mutima ubuyobozi bw'umuryango w'abibumbye muri Centrafrique butahwemye kutuba hafi, haba mu buryo bw'imikoranire myiza ndetse no kuzuzanya biganisha mu kurinda abaturage no kugarura ituze n'umutekano”

    Uretse gucunga umutekano, Itsinda RWAFPU-2 ryakoze ibikorwa bitandukanye byo guteza imbere imibereho myiza y'abaturage birimo kubagezaho ibikoresho by'ubuhinzi n'imbuto yo gutera, cyane cyane ku baturage bakuwe mu byabo n'intambara bari mu nkambi ya Razaret.

    Batanze kandi serivisi z'ubuvuzi ku buntu ku bagera kuri 380, banatera ibiti mu rwego rw'ubukangurambaga bwo kurengera ibidukikije.

    Abapolisi bambitswe imidali kuri uyu munsi bagize itsinda rya karindwi ryoherejwe muri Mata umwaka ushize

    Abapolisi b’u Rwanda bashimiwe ko bagize uruhare rukomeye mu bikorwa by'umutekano w'abaturage

    Source : http://igihe.com/amakuru/u-rwanda/article/abapolisi-b-u-rwanda-bari-mu-butumwa-bw-amahoro-bambitswe-imidali-y-ishimwe

  • Umunyamakuru Maria Malagardis yagizwe umwere ku cyaha cyo gusebya Ntiwiragabo ukekwaho Jenoside – #rwanda #RwOT

    Col Ntiwiragabo uba mu Bufaransa, yashinjaga Malagardis kumusebya mu itangazamakuru, akamwita 'Hitler w'umwirabura'.

    Urukiko rwavuze ko Malagardis ibyo yakoze biri mu burenganzira bwe nk'umunyamakuru bwo gutanga ibitekerezo, aho yemerewe kuvuga ibintu mu yindi mvugo mu rwego rwo kumvikanisha uburemere bwabyo, bitandukanye n'ibyo Ntiwiragabo avuga.

    Ikirego cya Col Ntiwiragabo wahoze ashinzwe ubutasi bwa gisirikare mbere ya Jenoside yakorewe Abatutsi mu Rwanda, yagishingiye ku butumwa bwanyujijwe kuri Twitter nyuma yo gutangaza inkuru ku rubuga rw'ikinyamakuru cya Médiapart ivuga ko Ntiwirigabo Aloys ushinjwa uruhare muri Jenoside yidegembya mu Bufaransa.

    Iyo nkuru yo muri Nyakanga 2020, yagaragazaga ko uyu mugabo yihishe ubutabera imyaka myinshi nyamara atuye mu gace kazwi nka banlieue d'Orléans.

    Nyuma y'iyo nkuru yatangajwe, uyu munyamakuru yasubije mu buryo busanzwe bwo gutanga igitekerezo kuri iyo nkuru agira ati “Umu-Nazi w'Umanyafurika mu Bufaransa? Hagira unsobanurira?”

    Ntiwiragabo kandi yareze umwanditsi w'ikinyamakuru Médiapart, Théo Englebert wanditse iyo nkuru yatumye Maria Malagardis amwibasira ngo akurikiranwe n'ubutabera, kubera kumuharabika.

    Urukiko rw'i Paris rwanzuye ko nta kosa Malagardis yakoze, ko byose biri mu burenganzira bwe nk'umunyamakuru, nk'uko ikinyamakuru L'orient Le Jour cyabitangaje.

    Emmanuel Soussen wunganira Maria Malagardis yashimye umwanzuro w'urukiko, avuga ko ibyo umukiliya we yavuze nta kosa ririmo kuko Col Ntiwiragabo byanze bikunze afite uruhare muri Jenoside, yaba yarayikoze cyangwa atarayikoze.

    Yavuze ko mu bubasha bwe nk'uwari ushinzwe iperereza, ntacyo yakoze ngo arokore abahigwaga cyangwa ngo agerageze guhagarika ubwicanyi.

    Benjamin Chouai wunganira Ntiwiragabo we yabiteye utwatsi, avuga ko batashimishijwe n'umwanzuro w'urukiko kandi bazajurira.

    Ntiwiragabo w'imyaka 75, nyuma yo guhunga u Rwanda ubwo Jenoside yakorewe Abatutsi yari imaze guhagarikwa, yagiye muri Repubulika Iharanira Demokarasi ya Congo aho yagize uruhare mu ishinjwa ry'umutwe wa FDLR.

    Yashakishijwe kenshi n'abashinjacyaha b'Urukiko Mpuzamahanga Mpanabyaha rwashyiriweho u Rwanda (TPIR), ngo abazwe ku ruhare rwe muri Jenoside yakorewe Abatutsi.

    Akekwaho kuba hagati ya 1990 na Nyakanga 1994 ari umwe mu bagize uruhare mu ikorwa ry'amalisiti y'Abatutsi bagombaga kwicwa ndetse n'abandi babaga batavuga rumwe na Leta. Uyu mugabo kandi ashinjwa kugira uruhare mu bwicanyi.

    Nubwo nta byangombwa bimwemerera kuba mu Bufaransa aho yageze mu 2011, u Bufaransa bwanze kumwohereza mu Rwanda. Mu 2020 yongeye gusaba ubuhungiro barabumwima.

    Urukiko rwagaragaje ko ibyatangajwe na Maria Malagardis nta cyaha kirimo

    Umunyamakuru Maria Malagardis washinjwaga gusebya Col Ntiwiragabo Aloys

    Source : http://igihe.com/amakuru/u-rwanda/article/umunyamakuru-maria-malagardis-yagizwe-umwere-ku-cyaha-cyo-gusebya-ntiwiragabo

  • Urubyiruko rwa CEPGL rwiyemeje gukoresha imbuga nkoranyambaga mu kubaka umuco w'amahoro – #rwanda #RwOT

    Ni umukoro rwihaye kuri uyu wa 15 Werurwe 2023 mu nama yateguwe na Vision Jeunesse Nouvelle, igahuriza hamwe urubyiruko rugera kuri 250 hagamijwe kwimakaza iterambere n'amahoro arambye muri aka karere.

    Iyo nama yitabiriwe n'abahagarariye kandi inzego zitandukanye z'urubyiruko muri ibyo bihugu n'abafatanyabikorwa bo mu miryango ya Actions for Democracy and Local Governance wo muri Tanzania, Cornerstone Development Africa wo muri Uganda n'u Burundi, Leo Africa Institute wo muri Uganda ndetse na Pole Institute wo muri Repubulika Iharanira Demokarasi ya Congo.

    Mu byaganiriweho harimo uburyo urubyiruko rwashyira imbaraga mu gukoresha imbuga nkoranyambaga hagamiriwe kubaka amahoro aho kuzikoresha abantu babiba urwango no gushishikariza bamwe kwibasira abandi.

    Ni ingingo yagarutsweho mu gihe mu karere hakunze kugaragara amakimbirane ndetse n'umwiryane bitijwe umurindi n'imvugo zihembera urwango bikozwe n'urubyiruko cyangwa inzego z'ubuyobozi akenshi ziba zihunza inshingano, bihahitana n'abaturage.

    Isaac Mumbele Muchele uhagarariye umushinga Great Lakes Project ukorera muri RDC yavuze ko bakora umunsi ku wundi kugira ngo urubyiruko ndetse n'abaturage bashishikarire gukoresha izo mbuga mu kurwanya imvugo zihembera urwango zigaragara muri ako karere.

    Ati 'Uyu munsi dushishikariye kurwereka ko rugomba kubanza gusesengura amakuru bakura ku mbuga nkoranyambaga kuko yose aba atari ukuri. Niba babonye amakuru yuzuye urwango bagomba kugira uruhare mu kuyanyomoza no kutayahererekanya kuko bigira ingaruka ku baturage muri rusange.'

    Abajijwe icyo bakora nk'imiryango itegamiye kuri leta mu gutanga umusanzu wo kurwanya imvugo zihembera urwango no kwibasira igice kimwe cy'abaturage, zikunze kugaragara mu gihugu cye, Muchele yavuze ko ubuyobozi bw'ibihugu burebwa n'icyo kibazo bugomba kwicara bukaganira bukabikemura.

    Ati ” Abaturage bagomba kubana mu mahoro, bakibonanamo. Urabizi Umunyarwanda ahahira iwacu natwe tugahahira mu Rwanda. Nitubigeraho abanyapolitiki nabo bazabona ko bahanganiye ubusa baganire aho kurwana. Bizatanga umuti urambye.'

    Nicholaus Luhende wari uhagarariye umuryango Youth- VDT wo muri Tanzania yavuze ko nubwo abaturage bo mu bihugu bigize akarere bamaze gutera imbere ku buryo buri wese afite telefoni, binagira ingaruka mbi kuri sosiyete bijyanye no kuzikoresha nabi.

    Avuga ko iwabo hari amakuru amwe n'amwe igihugu gikumira ntigitume agera ku baturage kuko hari ashobora kubagumura kandi mu by'ukuri nta shingiro afite, agasaba n'ibihugu kubigenzura hirindwa ko byakwangiza byinshi.

    Umuyobozi wa Radiyo Isangano ikorera mu Burengerazuba bw'Igihugu, Charles Twagiramungu yavuze ko muri iki gihe buri wese yabaye umunyamakuru kubera izo mbuga nkoranyambaga ikaba ari yo mpamvu uzikoresha agomba kwigengesera akabanza kumenya ukuri kwayo.

    Umuyobozi wa Vision Jeunesse Nouvelle, Ringuyeneza Frère Vital yavuze ko muri uyu muryango bateye imbere mu gusobanura uburyo izo mbuga zikora dore banafite ishami ry'uburezi rigaruka kuri icyo kintu.

    Ati 'Bidufasha kugira urubyiruko rusobanutse. Niba ruhuye n'amakuru atari yo cyangwa akangurira kugirira abandi nabi baba aba mbere kubirwanya kuko batojwe uko bikorwa.'

    Iyi nama yahuje uru rubyiruko iri mu murongo w'umushinga uharanira amahoro binyuze mu biganiro bikorwa n'urubyiruko rwo mu Karere k'Ibiyaga Bigari (Great Lakes Youth Network for Dialogue and Peace) uterwa inkunga n'Umuryango w'Ubumwe bw'u Burayi n'Ikigo cy'abagiraneza cy'Abadage cya Konrad Adenauer Foundation.

    Intego yawo ni ugushyigikira mu buryo bw'ubushobozi urubyiruko rufite intego yo kugarura amahoro muri CEPGL himakazwa imiyoborere itagira uwo iheza.

    Abagize Inteko Nshingamategeko basobanuriye urubyiruko rwitabiriye inama yo kubaka amahoro no kwimakaza iterambere rirambye rwo muri CPGL, imirimo yose iyo nteko ikora

    Ubwo rwasuraga Inteko Ishingamategeko rwabajije ibibazo bitandukanye bijyanye n’uko ikora aho babonye udushya bakiyemeza kujya gukora ubuvugizi

    Urubyiruko rwo mu bihugu bigize Akarere k’Ibiyaga bigari rwahize ko rugiye gukoresha imbuga nkoranyambaga mu kurwanya amakuru ahembera urwango

    Urubyiruko rwo mu bihugu bigize Akarere k’Ibiyaga bugari rwahize ko rugiye gukoresha imbuga nkoranyambaga mu buryo bwo kurwanya amakuru ahembera urwango no kwimakaza amahoro arambye

    Source : http://igihe.com/amakuru/u-rwanda/article/urubyiruko-rwa-cpgl-rwiyemeje-gukoresha-imbuga-nkoranyambaga-mu-kubaka-umuco-w

  • Menya uburyo bwiza wafatamo amafunguro ntibigire ingaruka ku buzima bwawe #rwanda #RwOT

    Kurya ni kimwe mu bintyu bicye dukora buri munsi,hakaba hariho abantu bafata amafunguro gatatu ku munsi cyangwa bakarya kenshi ku munsi kugeza aho barya ibiryo birenga 1,000 ku mwaka!

    Ibi bisobanura ko abantu bafite ubushobozi bwo kugira ubuzima bwiza 1,000 ku mwaka buzira ingaruka mbi nkuko ubushakashatsi bubyerekana.Uburyo bwiza bwo kuryamo bufite ubuzima buzira umuze bugizwe no kugufasha gufata icyemezo cyatuma ugira ubuzima buzira umuze kandi bikorwa mu buryo bworoshye 3:

    1.Toranya Ubuzima buzira umuze ufata ibiryo bikungahaye ku ntungamubiri.

    2.Ndya mu buryo bwiza butagirira ingaruka mbi ku buzima bwawe,byibura urye nka kabili ku munsi hanyuma n'ijoro nujya kuryama wirinde kurya ibintu bikomeye maze ufate utuntu tworohereye kandi ntiwuzuze inda.

    3.Koresha uburyo bwiza bwo guteka,urye ibiryo bihiye kandi bigiye birimo ibirungo biri ku bipimo biringaniye.

    Uburyo bwiza bwo kurya ntabwo ari ubwa wa muntu urya ashaka 'Guhaga'gusa ahubwo ni ubwa wa wundi ushaka kurya ibiryo bifite intungamubiri kugira ngo agire ubuzima bwiza.

    Ubu buryo bushya bwo kurya neza bwuzuye Calories zifite ububasha bwo guhangara inzara yawe;ni uburyo bwo kuryoherwa n'ibiryo biri bugirire akamaro umubiri wawe.
    Niba ushaka kurya ibiryo bifite akamaro ubuzima bwawe,rwanya kwigana abandi ndetse no kuvumbura,kurya ngo wishimishe cyangwa ngo ni uko biryoshye.

    Umubiri wawe uba ukeneye Vitamine zirenga 50 ,Minerals,Fatty acids na Amino acids buri munsi kugira ngo ugume ku gipimo nyacyo no kugira ubuzima bwiza.Kandi ibi byose ushobora kubisanga mu biribwa byose bikungahaye ku ntungamubiri.

    Source : https://umuryango.rw/ubuzima-115/article/menya-uburyo-bwiza-wafatamo-amafunguro-ntibigire-ingaruka-ku-buzima-bwawe

  • Reba amafoto utabonye y'ubukwe bwa B-Threy n'umukunzi we(Amafoto) #rwanda #RwOT

    Ni ubukwe bwabaye ku wa 11 Werurwe 2023 bubera i Gikondo mu mujyi wa Kigali ahitwa 248 Events bwasusurukijwe n'umuhanzi Cyusa Ibrahim umenyerewe mu muziki Gakondo.

    Amakuru ahari ahamya ko B.Threy na Keza Nailla bari bamaze igihe mu rukundo, gusa bari barahisemo kurugira ibanga kugeza mu mpeshyi ya 2022 ubwo batangiraga kurugaragariza ababakurikira ku mbuga nkoranyambaga.

    Uyu muraperi Bertrand Muheto wiyise B-Threy uri mu batangije injyana ya Kinyatrap, ni umwe mu baraperi bamaze kuzamura izina ryabo.

    B. Threy akoze ubukwee mbere y'uko akora igitaramo kimurika EP (Extended Play) yise 'For Life' giteganyijwe ku wa 16 Werurwe 2023 kuri Institut Français Kigali.

    B.Threy muri muzika amaze kugira album eshatu zirimo 'Nyamirambo' agace yakuriyemo , '2040' yasohoye mu 2019 na 'Muheto wa mbere' yasohotse mu 2022, izi ziyongera kuri EP yise 'Shwiii dah!' yasohoye mu 2020.

    Source : https://umuryango.rw/imyidagaduro/article/reba-amafoto-utabonye-y-ubukwe-bwa-b-threy-n-umukunzi-we-amafoto

  • Gianni Infantino yongeye gutorerwa kuyobora FIFA asezeranya ikintu gikomeye #rwanda #RwOT

    Umutaliyani Gianni Infantino wari umukandida rukumbi, yatorewe kuyobora FIFA muri manda ya gatatu, 2023-2027, ari nayo ya nyuma.

    Infantino yatorewe mu Nteko Rusange ya FIFA iteraniye muri BK Arena mu Mujyi wa Kigali kuri uyu wa Kane, tariki ya 16 Werurwe 2023.

    U Rwanda rwabaye igihugu cya mbere ku Mugabane wa Afurika cyakiriye Inteko Rusange ya FIFA ikanakorerwamo amatora y'uzayobora iri Shyirahamwe rya Ruhago ku Isi.

    Uyu Mutaliyani w'imyaka 53, ayobora FIFA kuva mu 2016. Yatorewe manda ya kabiri mu 2019.

    Ingingo ya 30 mu gika cyayo cya gatatu mu mategeko shingiro ya FIFA, ivuga ko iyo umukandida ari umwe, yemezwa hakomwa amashyi.

    Nyuma yo gutorwa, Infantino yashimiye abantu bose bagaragaje ko bamushyigikiye, yemeza ko azakomeza guteza imbere ruhago ku Isi.

    Ati 'Nzakomeza kwitangira FIFA, nzakomeza kwitangira umupira w'amaguru hagamijwe iterambere ryawo ku Isi yose.'

    Infantino yavuze ko abamukunda ari benshi n'abamwanga ari bake ariko ashimangira ko bose abakunda kandi cyane.

    Yagize ati 'Ndabashimira mwese, ndashimira umuryango wanjye, umugore wanjye, inshuti zanjye, abo dukorana, komite ya FIFA n'ikipe y'abanyabigwi ba FIFA. Mwese munkunda ndabizi ko muri benshi, abanyanga ndabizi ko muri bake ariko ndabakunda by'umwihariko uyu munsi.'

    'Kuba perezida wa FIFA ni iby'agaciro. Ni ibidasanzwe kandi ni inshingano zikomeye. Nicishije bugufi ku bw'ubufasha bwanyu. Ndabizeza ko nzakomeza gukorera FIFA, gukorera inyungu za ruhago n'amashyirahamwe arenga 211 ku Isi. Ubuyobozi ni ugukomeza kwiga, kandi niga buri munsi.'

    Yasabye abanyamuryango gukomeza kumugirira icyizere no gukorana mu guteza imbere umupira w'amaguru ku Isi.

    Ati 'Mukomeze mwizere umuhate wanjye. Icyo mbasaba ni uko twakomeza gukorana imbaraga ngo duhuze Isi twifashishije ruhago.'

    Kuva mu 2016, Infantino yatangira kuyobora iri shyirahamwe, yahinduye byinshi kuko icyo gihe yinjiye agomba kurwana no kugarurira uru rwego isura nziza mu bakunzi ba ruhago nyuma yo kugaragara ko rwamunzwe na ruswa mu myaka 20 ishize byanatumye uwari Perezida warwo, Sepp Blatter ahagarikwa mu bikorwa byose bya ruhago.

    Gianni Infantino watorewe kuyobora FIFA mu nama yayo ya 73 iri kubera i Kigali,yasezeranyije ko mu myaka ine iri imbere azazamura inyungu y'iri Shyirahamwe agere kuri miliyari 11 z'amadolari ndetse yizeza ko umupira uzakinwa birenze ku isi nzima.

    Source : https://umuryango.rw/imyidagaduro/imikino/article/gianni-infantino-yongeye-gutorerwa-kuyobora-fifa

  • Abafana ba Frankfurt batwitse imodoka banarwana na polisi y'Ubutaliyani #rwanda #RwOT

    Umujyi wa Napoli wahuye n'uruva gusenya ubwo wagorwaga bikomeye n'abafana bo mu Budage baje gutwika imodoka ndetse banarwana n'abapolisi 800 mbere y'umukino wa 1/16 wa Champions League, wahuje Napoli na Eintracht Frankfurt.

    Imodoka nyinshi zatwitswe n'abapolisi barakubitwa aho amakuru avuga ko abafana ba Frankfurt bashakaga gutwika Umujyi.

    Umunyamakuru w'Umutaliyani witwa Tancredi Palmeri yavuze ko abagizi ba nabi bo mu Budage bihuje n'intagondwa zifana Atalanta ziteza akavuyo mu mujyi wa Napoli.

    Amashusho yagaragaje aba bafana b'impande zombi barwana na polisi.

    Mu rwego rwo gukaza umutekano,abapolisi 800 boherejwe ku muhanda,bagombaga guhangana n'abafana b'abanyarusaku 300 bari bateje akavuyo batera ibintu byaka umuriro ndetse bararwana.

    Imwe mu mavidewo yagiye hanze yerekanye abapolisi bagabweho igitego,aho bamwe mu bafana bari bambaye masks bateye intebe ku modoka z'abapolisi.

    Hari amakuru avuga ko imodoka yari itwaye ikipe ya Frankfurt yatewe ibintu byaka.

    Ibi byabaye mbere y'umukino warangiye iyi kipe yo mu Budage itsinzwe igayitse ibitego 3-0 byiyongeraho 2-0 batsindiwe mu Budage na Napoli iri mu makipe ahagaze neza cyane i Burayi.

    Abayobozi b'inzego zibanze bari banze ko umuntu wese uvuka mu Budage yagura itike y'uyu mukino kubera ubwoba bw'umutekano.

    Icyakora baje kwemerera umuntu wese uvuka ndetse unatuye i Frankfurt kugura itike gusa mu mukino ubanza nabwo habaye intambara ikomeye hagati y'abafana b'amakipe yombi.

    Football Italia ivuga ko abafana 400 ba Frankfurt aribo bageze i Napoli ariko baza kwivanga n'aba Atalanta bateza akavuyo kuko bari babafashije kubona amatike.

    Aya matsinda ngo yaje na gari ya moshi avuye Bergamo, Salerno na Bari.

    Aba rero baje guhura n'abafana b'indakoreka ba Napoli bararwana ndetse bamwe batangira kwangiza ibintu,kurwana na polisi no gutwika imodoka.

    Kugeza ubu ngo hafunzwe abafana benshi cyane nyuma y'uko barwanye na Polisi.


    Source : https://umuryango.rw/imyidagaduro/imikino/article/abafana-ba-frankfurt-batwitse-imodoka-banarwana-na-polisi-y-ubutaliyani

  • FARDC irashinjwa kwica umukoloneri wayo ukomeye nyuma yo kwibeshya ku indege yayo #rwanda #RwOT

    Igisirikare cya Repubulika ya Demokarasi ya Congo FARDC, cyongeye kwikora mu nda,ubwo cyamenyaga ko mu bitero by'indege giheruka kugaba ku mutwe wa M23, cyishe Col uzwi ku kazina ka 'Niko' umwe mu ba ofisiye ba FARDC bari bayoboye imirwano bahanganyemo na M23 mu nkengero za Sake.

    N'ibitero by'indege ingabo za FARDC zari zimaze iminsi zirasa ku mutwe wa M23 mu duce dukikije umujyi wa Sake.

    Muri ibi ibitero, FARDC ikoresheje kajugujugu y'intambara yarashe bombe mu gace ka Ngingo hafi y'umujyi wa Sake iziko ibisutse ku barwanyi ba M23,ariko nyuma biza kugaragara ko yibeshye kuko bari abasirikare ba FARDC bagera kuri 40 bahise bahasiga ubu buzima.

    Muri aba basirikare ,byaje kumenyekana ko Col Niko umwe mu bari bayoboye urugamba muri ako gace ,ari mu bahitanywe n'iyo bombe yarashwe na FARDC.

    Amakuru dukesha Rwanda Tribune nayo ikesha imboni yayo mu mujyi wa Sake, avuga ko Col Niko yabanje gukomereka bikabije, ahita ajyanwa ikitaraganya ku bitaro, ariko kuri uyu wa 15 Werurwe 2023 byaje kurangira ashizemo umwuka.

    Abanye Congo batandukanye bakomeje kunenga FARDC ,bayishinja ubunyamwuga buke harimo no kutamenya gukoresha indege z'intambara neza ,kuko kenshi itajya irasa ku ntego ahubwo ihamya aho itagendereye ndetse rimwe na rimwe ikikora mu nda irasa ku basirkare ba Leta .

    Ni ibirego igisirikare cya FARDC kinashinjwa na M23, aho uyu mutwe wakunze kugaragaza uburyo FARDC ikoresha indege z'intambara ikarasa za Bombe mu baturage no mu matungo yabo izi ko ari abarwanyi ba M23.

    Source : https://umuryango.rw/amakuru/mu-mahanga/umutekano/article/fardc-irashinjwa-kwica-umukoloneri-wayo-ukomeye-nyuma-yo-kwibeshya-ku-indege

  • Perezida Kagame yitabiriye ifungurwa ry'inteko rusange ya 73 ya FIFA #rwanda #RwOT

    Perezida Paul Kagame yifatanije  na Perezida wa FIFA Gianni Infantino, mu nteko rusange ya 73 ya FIFA iri kubera muri BK Arena, kuri uyu wa Kane tariki 16 Werurwe 2023.

    Perezida Kagame washimiwe na Infantino  amuha impano ya jezzy, mu ijambo rye nawe ateruye ijambo rye ashimira Fifa kuba yarahisemo ko inteko itora Perezida wa FIFA  ibera mu Rwanda.

    Perezida Kagame yibukije abitabiriye iyi nteko rusange ko Siporo ihuza abantu, ndetse ko akamaro kayo mu buzima bwa muntu by'umwihariko umupira w'amaguru ari uburyo butuma ubufatanye bw'abatuye Isi butajegajega.

    Umukuru w'igihugu yashimangiye ko  icyo Isi ikeneye ari ukubona ubworoherane muri politiki kuruta kuzana politiki mbi muri siporo.

    Iyi nteko ibereye muri Afurika ku nshuro ya Kane, yitabiriwe n'abahagarariye ibihugu binyamuryango 208 mu banyamuryango 211 bagize FIFA.

    Koreya ya Ruguru ntiyaje hakiyongeraho Zimbabwe na Sri Lanka byahagaritswe, ikibazo cyabyo kikaza kwigwaho muri iyi nama.

    Umunyamabanga wa FIFA, Madame Fatma Samoura yemeje ko kongere yaba uko ikurikije amategeko y'abitabiriye.

    The post <strong>Perezida Kagame yitabiriye ifungurwa ry'inteko rusange ya 73 ya FIFA</strong> appeared first on FLASH RADIO&TV.

    Source : https://flash.rw/2023/03/16/perezida-kagame-yitabiriye-ifungurwa-ryinteko-rusange-ya-73-ya-fifa/?utm_source=rss&utm_medium=rss&utm_campaign=perezida-kagame-yitabiriye-ifungurwa-ryinteko-rusange-ya-73-ya-fifa