Webrwanda Backend

Category: Uncategorized

  • RDC: Inyeshyamba za CODECO zishe abaturage 12 mu gitero bagabye i Mambisa #rwanda #RwOT

    Abantu 12 bishwe mu gitero cyagabwe ku wa gatanu tariki ya 31 Werurwe n'inyeshyamba za CODECO

    Agace aba baturage biciwemo n'agacukurwamo amabuye y'agaciro ya Wala no mu yindi midugudu itanu yegeranye nk'uko ubuyobozi bwa Mambisa mu karere ka Djugu babitangaje

    Amakuru aturuka muri ako gace avuga ko abasirikare bitwaje intwaro nyinshi babateye banabatwikira inzu bituma abaturage bata ingo nzabo ubu bari ku gasozi.

    FARDC yagize icyo ikora kugira ngo ihige uyu mutwe witwaje intwaro no kuwukumira byimbitse kugirango barinde abaturage.

    Source : https://umuryango.rw/amakuru/mu-mahanga/umutekano/article/rdc-inyeshyamba-za-codeco-zishe-abaturage-12-mu-gitero-bagabye-i-mambisa

  • Kenya: Umupolisi wakomerekeye mu myigaragambyo yapfuye #rwanda #RwOT

    Mu itangazo Polisi ya Kenya yashyize hanze ku wa Gatanu yavuze ko uyu mupolisi yitabye Imana ku mugoroba wo ku wa Kane, tariki 30 Werurwe bitewe n'ibikomere yagize ubwo yari mu kazi ko guhosha abigaragambya mu Mujyi wa Kisumu.

    uyu ngo yitwa Ben Oduor waguye mu myigaragambyo imaze iminsi muri iki gihugu yo kwamagana ibijyanye n'ikiguzi cy'imibereho gikomeje kuzamuka.

    Amakuru dukesha BBC avuga ko uyu mupolisi yatewe ibuye mu gatuza n'abigaragambya bakoresheje itopito. Yahise ajyanwa mu Bitaro bya Aga Khan ariko biza kurangira yitabye Imana.

    Kuva iyi myigaragambyo yahamagajwe na Raila Odinga utavuga rumwe n'ubutegetsi bwa Perezida William Ruto yatangira imaze kugwamo abantu batatu barimo abasivili babiri.

    Abigaragambya bavuga ko bashingiye ku mpamvu esheshatu zirimo kuba Perezida William Ruto yaranze ko hakorwa ubugenzuzi ku bakozi ba Komisiyo y'Igihugu y'Amatora, ikiguzi cyo kubaho gihenze biturutse ku kuba guverinoma yarakuyeho za nkunganire.

    Banenga kandi icyenewabo mu miyoborere ya Kenya, kuba Perezida Ruto atarahaye ijambo abandi bafatanyabikorwa mu mavugurura yakozwe muri Komisiyo y'Amatora n'ibyo guverinoma yasezeranyije abaturage ntibikorwe.

    Source : https://umuryango.rw/amakuru/mu-mahanga/umutekano/article/kenya-umupolisi-wakomerekeye-mu-myigaragambyo-yapfuye

  • Barashonje pe !!!! Umutoza wa Rwamagana City yatatse inzara y'amezi atatu #rwanda #RwOT

    Umutoza wa Ramagana FC , Ruremesha Emmanuel yavuze ko bigoye kujya imbere y'abakinnyi bashonje ukabasaba intsinzi,ariko bakoze ibishoboka byose bagatsinda ikipe ya Rutsiro FC.

    Kuri uyu wa Gatanu tariki ya 31 Werurwe,ikipe ya Rwamagana yatsinze Rutsiro FC igitego kimwe ku busa biyifasha kuzamuka ku rutonde rwa shampiyona.

    Ikipe ya Rwamagana yatsinze iki gitego ku munota wa 80 w'umukino ibifashijwemo na Mutijima Janvier kuri kufura yateye inyuma gato y'urubuga rw'amahina,umunyezamu akitsinda.

    Ikipe ya Rutsiro yarangije ari abakinnyi 10 kuko ku munota wa 35.Bukuru Christophe yahawe ikarita ya kabiri y'umuhondo,iba itukura.

    Umutoza wa Rwamagana,Ruremesha,yashimiye abakinnyi be uburyo bitanze, bakabona aya manota atatu birengagije inzara bamaranye amezi atatu.

    Ati:”Ndashimira abana bitanze muri uyu mukino, barashonje pe.!! Tumaze amezi atatu nta mafaranga tubona, cyakoze dutegereje ejo ko hari icyo bazatubwira, mwabonye ko mu gice cya kabiri baje imbaraga zabashiranye mwabibonye uretse Nyagasani udufashije umuzamu wa Rutsiro fc agasa n'uduhaye kado tukabona igitego.”

    Ikipe ya Rutsiro FC yagumye ku mwanya wa 14 n'amanota 21 ku rutonde rw'agateganyo rwa shampiyona mu gihe Rwamagana FC yahise igira amanota 26 ijya ku mwanya wa 12.

    Source : https://umuryango.rw/imyidagaduro/imikino/article/barashonje-pe-umutoza-wa-rwamagana-city-yatatse-inzara-y-amezi-atatu

  • FC Barcelona yemeje ibiganiro byo kugarura Lionel Messi kuri Camp Nou #rwanda #RwOT

    Ikipe ya FC Barcelona iri mu biganiro na rutahizamu Lionel Messi kugira ngo irebe ko yagaruka aho yita mu rugo yakoreye bidasanzwe, nk'uko byemezwa na Visi Perezida w'iyi kipe,Rafael Yuste.

    Uyu rutahizamu wa Argentina w'imyaka 35 ubu niwe mukinnyi wa mbere watsindiye FC Barcelona ibitego byinshi mateka yayo, aho yinjije ibitego 672 mu mikino 778 akaba yaravuye i Nou Camp (ikibuga cya Barcelona) mu 2021 kubera ibibazo by'ubukungu.

    Amasezerano y'imyaka ibiri afitaniye na Paris St-Germain azarangira mu mpeshyi, ariko bikavugwa ko yifuza gukinira iyi kipe yo mu Bufaransa.

    Yuste ati: “Leo n'umuryango we bazi neza urukundo mbafitiye'.

    Imyaka ibiri ishize, Messi yavuye muri iyi kipe yo muri Espagne yamaze kwemera amasezerano mashya no kugabanya umushahara we, ariko byose bikaba byari gukunda ko akina bitewe nuko iyi kipe ishoboye kugurisha abakinnyi kubera amabwirizwa mashya ajyanye n'ikoreshwa ry'amafaranga.

    Icyo gihe, ibi ntibyashobotse mu gihe cyari giteganyijwe,bituma arangiza ibihe byiza yari afitanye n'iyi kipe yatwariyemo ibikombe bine bya Champions Leagues, irushanwa rya Copa del Rey, La Liga, incuro icumi — hanyuma hakiyongeraho n'Imipira ya zahabu (Ballons d'Or) itandatu.

    Yuste ati: “Nari muri ibyo biganiro bitashoboye kugera ku kintu runaka kubera amahirwe make

    “Kubona Leo adashoboye gukomezanyanatwe mu ikipe yacu ni ihwa rikomej kunjomba mu kirenge,

    “Messi azi neza agaciro tumuha.Byandyohera abashije kugaruka. Nibyo, turacyari mu biganiro nabo'.

    Uretse igikombe cy'isi yose aherutse guterura mu Ukuboza umwaka ushize, Messi amaze kwinjiriza PSG ibitego 29 mu mikino 66 amaze gukinira iyi kipe.

    Aherutse kwinjiza igiteg cya 100 mu mikino mpuzamahanga hamwe n'icya 800 mu mwuga we wo gukina umupira w'amaguru.

    BBC

    Source : https://umuryango.rw/imyidagaduro/imikino/article/fc-barcelona-yiyemeje-kugarura-lionel-messi-kuri-camp-nou

  • Umusifuzi utaranditse ikarita ya Muhire Kevin yatangiye kubiryozwa #rwanda #RwOT

    Umunya-Botswana Joshua Bondo wasifuye umukino wa Bénin n'u Rwanda i Cotonou, we n'abungiriza be bakuwe ku gusifura umukino wa ASKO na AS FAR ndetse hahita hashyirwaho abasimbura babo.

    Ibi bije nyuma y'aho uyu mugabo ahaye ikarita y'umuhondo,Muhire Kevin ntiyayandika byatumye uyu mukinnyi akinira u Rwanda atabyemerewe ndetse binatuma Benin irega.

    Bondo yahagarikanywe n'abasifuzi bane barimo uwamwungirizaga wa mbere, Souru Phatsoane, uwa kabiri Mogomotsi Morakile n'umusifuzi wa kane, Tshepo Mokani Gobogoba.

    Nyuma yo kubahagarika, aba basifuzi basimbuwe n'Abanye-Ghana barimo Charles Benle Bulu, Paul Kodzo Atimaka, Tijani Mohammed na Abdul Latif Qadiri.

    Aba basifuzi ni bo bazasifura umukino w'Umunsi wa Gatandatu wo mu Itsinda C rya CAF Confederation Cup, uzahuza AS FAR yo muri Maroc na ASKO Kara yo muri Togo ku wa 2 Mata 2023.

    Mu mukino u Rwanda rwanganyijemo na Bénin igitego 1-1 ku wa 22 werurwe 2023 ni bwo Kevin Muhire yahawe ikarita y'umuhondo ku munota wa 53 n'Umusifuzi Joshua Bondo, iba iya kabiri yeretswe mu mikino ibiri yikurikiranya byari gutuma adakina umukino wo kwishyura i Kigali.

    Ikipe y'Igihugu ya Bénin yahise irega u Rwanda mu Mpuzamashyirahamwe y'Umupira w'Amaguru muri Afurika, CAF, ivuga ko rwakinishije Muhire Kevin kandi afite amakarita abiri y'umuhondo.

    Ku ruhande rw'Amavubi, bavuga ko raporo babonye ku mukino wa Bénin, igaragaza ko nta karita y'umuhondo yahawe Muhire Kevin nubwo umusifuzi yari yayitanze mu kibuga.

    Umunyamakuru w'Umunya-Bénin, Évrard Fulgérale, yatangaje ko Bondo yavuze ko kuba ataratanze ikarita y'umuhondo ya Muhire Kévin muri raporo byari ukwibeshya, ariko 'staff' y'Amavubi yagombaga kumenya ko atemerewe gukina.

    Yagize bati 'Kuba tutaramuhaye [Muhire Kevin] ikarita y'umuhondo byaturutse ku kwibeshya, ariko n'Amavubi yagombaga kumenya ko umukinnyi wayo atemerewe gukina.'

    Raporo ya Bondo yagombaga kwemezwa mu masaha 24, igaragaza ko u Rwanda rwahawe ikarita itukura, ku makarita abiri y'umuhondo yeretswe Hakim Sahabo ndetse n'indi y'umuhondo kuri Mugisha Gilbert.

    IVOMO:IGIHE

    Source : https://umuryango.rw/imyidagaduro/imikino/article/umusifuzi-utaranditse-ikarita-ya-muhire-kevin-yatangiye-kubiryozwa

  • RIB yatangiye iperereza ku rupfu rw'umukozi w'Akarere ka Kamonyi #rwanda #RwOT

    Madamu Mujawayezu Madeline wakoraga isuku ku karere ka Kamonyi yabuze ku kazi ku wa 30 Werurwe 2023,telefone ye ivaho ndetse musaza we atabaza ko yamubuze.

    Inzego z'umutekano zagiye aho yari atuye mu Mudugudu wa Kanyinya,Akagari ka Remera,Umurenge wa Rukoma zica urugi zisanga yapfuye umurambo uhambiriye mu nzitiramubu.

    Ntabwo haramenyekana abahitanye uyu mubyeyi wabaga mu rugo wenyine ariyo mpamvu RIB yatangiye iperereza ishaka abagizi ba nabi bikekwa ko bamuhitanye.

    Ubutumwa RIB bugira buti 'RIB irasaba umuntu wese waba afite amakuru yafasha mu iperereza ko yayatanga kuri sitasiyo yayo imwegereye cyangwa agahamagara kuri nimero ya RIB itishyurwa 166.'

    Mujawayezu wari wararokotse Jenoside yakorewe Abatutsi mu 1994, yari yarapfushije umugabo we amusigira umwana umwe.

    Source : https://umuryango.rw/amakuru/mu-rwanda/umutekano/article/rib-yatangiye-iperereza-ku-rupfu-rw-umukozi-w-akarere-ka-kamonyi

  • Uduhigo 4 Lionel Messi ategerejwe gukuraho nasubira muri FC Barcelona #rwanda #RwOT

    Birashoboka ko mu mwaka w’imikino wa 2023-24 Lionel Messi azasubira mu ikipe ya FC Barcelona yo muri Espagne yavuyemo muri 2021 agiye muri PSG yo mu Bufaransa.

    Uyu mukinnyi ukomoka muri Argentine ntabwo arimo kumva neza ibyo kongera amasezerano mu ikipe ya Paris Saint Germain ni mu gihe Rafa Yuste visi perezida wa FC Barcelona aheruka kuvuga ko barimo kwifuza kugarura uyu mukinnyi muri iyi kipe.

    Messiyashyizeho uduhigo tutabarika ubwo yari muri iyi kipe yo mu Ntara ya Catalonia, harimo kuba ari we mukinnyi w’ibihe byose watsindiye iyi kipe ibitego byinshi, gusa hari ibyo yananiwe gukora byitezwe ko ashobora kuzakora asubiyeyo.

    Messi mu gihe yasubira muri iyi kipe ashobora kuzakuraho agahigo ku mukinnyi wegukanye ibikombe byinshi mu ikipe imwe aho ubu gafitwe na Ryan Giggs wegukanye ibikombe 36 ubwo yakiniraga Manchester United, Messi yavuye muri Barcelona amaze kwegukana 35.

    Ashobora kandi kuba umukinnyi wegukanye ibikombe byinshi anyuze kuri Dani Alaves ufite 45 ni mu gihe Messi ubu afite 42.

    Ubu Lionel Messi ari ku mwanya wa 2 w’abakinnyi bamaze gukinira FC Barcelona imikino myinshi aho amaze kuyikinira imikino 149 inyuma ya Xavi Hernandez (ubu ni we mutoza wa FC barcelona) umurusha imikino 2.

    Akandi gahigo ariko gakomeye kuzakuraho ni ako kuba umukinnyi watsinze ibitego byinshi mu gikombe cya Copa del Reyaho afite 56 mu gihe asabwa kurenza 69 bifitwe na Josep Samitier wakiniye FC Barcelona na Real Madrid.

    Lionel Messi nasubira muri FC Barcelona afite guhangana n’uduhigo 4

    Source : http://isimbi.rw/siporo/article/uduhigo-4-lionel-messi-ategerejweho-gukuraho

  • Sinshaka kuraga abana banjye ihungabana – Zari Hassan #rwanda #RwOT

    Umuherwekazi ukomoka muri Uganda akaba nyina w’abana batanu barimo 2 yabyaranye n’umuhanzi Diamond Platnumz, Zari Hassan yavuze ko impamvu akora cyane ari ukugira ngo azarage abana be imitungo aho kubasigira ihungabana.

    Zari uba muri Afurika y’Epfo afite abana 5 barimo abahungu bakuru 3 yabyaranye n’uwahoze ari umugabo we witabye Imana, Ivan Semwanga n’umuhungu n’umukobwa yabyaranye na Diamond Platnumz.

    Yasabye abantu kudacika intege kuko ushobora gukora imyaka 4 nta musaruro ariko ku wa 5 ukabona uwikubye

    Ati “ushobora gukora imyaka 4 nta musaruro ariko ku wa 5 ukaba ikimenywa na bose ku Isi. Izo ni zo mbaraga zo kudacika intege.”

    Yakomeje avuga ko impamvu adacika intege, akarara amajoro ari uko adashaka kuzasigira abana be ihungabana ahubwo azabarage imitungo.

    Ati “impamvu nkora cyane ndashaka kuzaraga abana banjye ubutaka, ubucuruzi n’imitungo. Nta bubabare, nta hungabana no guhangayika.”

    Abahungu be 3 bashobora kuba barahuye n’ihungabana mu buryo bumwe cyangwa ubundi kuko nyuma y’uko Semwanga yitabye Imana, bari baramaze gutandukana byakuruye imvururu nyinshi mu muryango ariko nyuma biza kwemezwa ko abana ari bo bagomba kuragwa imitungo ya se.

    Zari ntiyifuza kuzaraga abana be ihungabana ngo ni yo mpamvu akora cyane

    Source : http://isimbi.rw/imyidagaduro/article/sinshaka-kuraga-abana-banjye-ihungabana-zari-hassan

  • Ida shot 35 times by unknown men from Belarus #rwanda #RwOT

    Ida lda shot 35 times by unknown men from Belarus […]

    The post Ida shot 35 times by unknown men from Belarus appeared first on UGWIRE.

    Source : https://ugwire.com/ida-shot-35-times-by-unknown-men-belarus/

  • Daddy, Alyn Sano na Wyre batanze ibyishimo mu… – #rwanda #RwOT

    Ijoro rya Tariki ya 31 Werurwe 2023, ryasize bamwe bakiriye agakiza abandi barabyina karava binyuze mu gitaramo cya Kigali Jazz Junction cyamamajwe kuva mu mezi abiri ashize, mu rugendo rwo gufasha abantu kurangiza neza ukwezi kwa Werurwe.

    Cyabereye mu ihema rya Virunga muri Kigali Conference and Exhibition Village ahazwi nka Camp Kigali, ari naho habereye igitaramo nk'iki cyahekereje Gashyantare ya 2023 yaririmbyemo B2C bo muri Uganda, Kidum wo muri Burundi na Confy wo mu Rwanda.

    Buri muhanzi waririmbye muri iki gitaramo yagerageje gufata bugwate abakunzi b'ibihangano bye, kandi akagerageza kutabicisha umuziki ahubwo akabaganiriza.

    Wyre ni we washyize akadomo ku gitaramo cya Kigali Jazz Junction cyambukiranyije umunsi:

    Wyre yageze ku rubyiniro ahagana saa sita zuzuye z'ijoro. Ni umuhanzi wo muri Kenya, ariko wagiye ataramira mu Rwanda mu bihe bitandukanye.

    Aherutse kubwira InyaRwanda ko umuziki w'u Rwanda wiganje muri Kenya, kuko indirimbo z'abahanzi barimo The Ben zumvikana muri iki gihe.

    Yavuze ko yishimiye 'kugaruka mu gihugu cyiza'. Igice cya mbere cy'indirimbo yaririmbye muri iki gitaramo, yagishingiye cyane ku ndirimbo ze zo hambere.

    Uyu muhanzi akora injyana ya R&B ndetse na Reggae. Ikinyamakuru KenyaLife giherutse kwandika ko Wyre ari umwe mu bahanzi bari bagize itsinda ry'abaririmbyi rya Necessary Noize ndetse na East African Bashment Vrew.

    Yaririmbye indirimbo ye 'Sina Makosa' yakunzwe mu buryo bukomeye. Asoje kuririmba iyi ndirimbo, yaganirije abafana be ababaza niba bameze neza, abandi ababaza ibihugu bavukiyemo hagati ya Kenya, Uganda n'u Rwanda.

    Byageze hagati mu gitaramo, avuga ko afite amakuru yemeza ko abanya-Kigali bazi kubyina neza ubundi abasaba gufatanya nawe.

    Uyu musore afitanye indirimbo n'abarimo Naziz, Kidis, Prezzo, Khaligraph Jones, Vigeti, Nonini, JB Maina, Benjamin Kabaseke n'abandi.

    Bivuga ko adashidikanwaho mu bijyanye no gususurutsa abantu ku rubyiniro. Yakoranye na studio zikomeye z'umuziki kugeza ubwo anashinze inzu ifasha abahanzi mu bya muzika ye yise 'Love Child Records' aho yasinyishije abahanzi banyuranye.


    Daddy Andre yataramiye 'bwa mbere' i Kigali nyuma y'igihe kinini:

    Ni umuhanzi w'umuhanga w'umwanditsi w'indirimbo ubimazemo igihe kinini. Andrew Ojambo [Daddy Andre] yinjiriye mu ndirimbo ye yakunzwe mu buryo bukomeye yise 'Sikikukweeka', asoje kuyiririmba yabajije abafana be niba bameze neza.

    Ubwo yari afite imyaka itandatu nibwo Nyina Nekesa yitabye Imana. Nyuma, ubwo yari agejeje imyaka 13 y'amavuko, Se Jackson yitabye Imana.

    Uyu muririmbyi yigeze kuvuga ko nyuma y'uko ababyeyi be bitabye Imana, yanyuze mu bihe bigoye n'abavandimwe be batanu kuko babayeho ubuzima bw'impfubyi, bimenyera buri kimwe- imyaka irahita.

    Yataramiye i Kigali avuga ko yishimye kandi akunda abafana be. Ariko hashize igihe ashyize akadomo ku rugendo rw'urukundo n'umukobwa bari bacuditse.

    Uyu muhanzi yaririmbye yitaye cyane ku ndirimbo zo hambere n'izakunzwe cyane. Yanaririmbye indirimbo ye yise 'Andele' yakoranye na Nina Roz imaze imyaka ibiri isohotse, 'Don’t Stop' yakoranye na John Blaq n'izindi zitandukanye.

    Mbere y'uko aririmba indirimbo 'Tugende Mu Church' yakomeje izina rye, yabanje kuvuga ko byose birangirira mu rusengero, kuko ariho haba gusubizwa ku byifuzo byari buri kimwe. Yanahamagaye ku rubyiniro Levixone amufasha kuyiririmba.

    Daddy avuga ko iyi ndirimbo yakunzwe cyane, kandi ko yagiye ayisubiramo mu bihe bitandukanye ikanyura benshi. 

    Yavuye ku rubyiniro ahagana saa 23:35', ashima buri wese uko yamwakiriye. Ati “Ndabashimiye.”


    Umuramyi Levixone wo muri Uganda yinjiye ku rubyiniro saa tanu zikabakaba:

    Ijambo rya mbere yavuze ageze ku rubyiniro ni 'Allelluah', abaza Abanyarwanda niba biteguye gufatanya nawe kuramya no guhimbaza Imana.

    Uyu musore yinjiriye mu ndirimbo yakunzwe mu buryo bukomeye yise 'Turn the replay', yatumye abitabiriye iki gitaramo batangira guhaguruka.

    Uyu musore waherukaga i Kigali mu giterane 'Revival Conference', cyabereye muri BK Arena, yakoresheje imbaraga nyinshi ku rubyiniro, asaba abitabiriye iki gitaramo gufatanya nawe gushima Imana. Ati 'Banyarwanda mureke turirimbire hamwe.'

    Yakomereje ku ndirimbo ye yise 'Enjoy Yo Blessings' ayisoje yaganiriza abafana be n'abakunzi b'umuziki muri rusange. 

    Hari aho yagize ati 'Imana ishimwe cyane, Imana ihimbazwe. Mukomere amashyi Imana. Wazanye n'umugore wawe, ni inde wazanye n'umugabo we, mubwire ngo ndagukunda cyane.”

    Mbere y'uko aririmba indirimbo ye yise 'Mbeera' yakoranye na Grace Morgan Hammondge, Levixone yateye isengesho ryumvikanisha ko nta bihe biruhije umutima Imana idashobora gukuraho.

    Uyu musore yavuze ko hari umuntu ushobora kuba yaje muri iki gitaramo agamije kwishima gusa, ariko ko yizera Imana rurema ko aza gutahana umugisha.

    Mu isengesho rye yavuze ati 'Nta bihe bibi biramba ku muntu. Ndasengera buri wese kuva mu bihe arimo. Twese, dukura dushaka kuzavamo abantu bakomeye, umwe ashaka kuba Perezida, undi ashaka kuba umuyobozi runaka, ariko birangira Imana, iguhitiyemo inzira igukwiriye.

    'Rero ndakubwira ko nta bihe bikomeye by'imisozi biri imbere yawe Imana itakuraho. Ndasabye nizeye mu izina rya Yesu. Ndasenga Imana ko nkiri muzima.'

    Ndashaka gusengera umugisha ku buzima bwawe. Ndashima ko nkiriho. Uyu munsi ushobora kuba waje mu gitaramo gusa, ariko Imana igiye kuguha ubuzima bwiza, hari impamvu waje hano, mukunde Imana, ndashaka gusabira imigisha mu buzima bwawe gusa.'

    Levixone yavuze ko wabyemera cyangwa utabyemera Yesu ari urufatiro rw'ubuzima 'rwa buri wese'. Yasabaga abitabiriye iki gitaramo, gushyira amaboko mu kirere bakavuga 'Amen'. Yashimangiye ko indirimbo zihimbaza Imana 'zuzuye urukundo rw'Imana gusa'.

    Yaririmbye kandi indirimbo yise 'More Blessings', 'Chikibombe' yakoranye na Timeless Noel n'izindi. Yanyuzagamo akajya kuririmba n'abafana abasanze mu byicaro.

    Levixone yubakiye umuziki ku njyana ya R&B, Soul ndetse na Reggae. Uyu musore yavutse ku wa 7 Ukuboza 1992, avuka mu muryango w'abana icumi.

    Mu 2012 yavuye mu rugo iwabo, nyuma yo kumenya ko uwo yitaga Se atari we. Yigeze kubwira ibitangazamakuru byo muri Uganda, ko uyu mugabo yitaga Se yamutotezaga cyane akamukubita, igihe kiragera yumva aramuzinutswe. Yavuye ku rubyiniro ahagana saa 23:20' ashima uko yakiriwe. 


    Hari abari bitwaje indabo muri iki gitaramo cyaherekeje ukwezi kwa Werurwe 2023



    Alyn Sano yinjiriye mu ndirimbo isogongeza album ye nshya:

    Uyu muhanzikazi ukirikirwa n'abantu barenga ibihumbi 213 ku rubuga rwa Instagram, yinjiye ku rubyiniro ahagana saa 21:50' yinjirira mu ndirimbo yise 'Rumuri' yitiriye album ye.

    Ubwo yatangaza iyi album yavuze ko 'isobanuye byose kuri nge'. Akomeza ati 'Album yange ya mbere yitwa ‘Rumuri’ iraje vuba. Isobanuye byose kuri nge.”

    “Nk'umugore cyangwa umukobwa wifuza gutsinda amateka yo hambere, nkagira aho ndi heza n’ahazaza hatangaje nca muri byinshi; birimo umwijima w'ahahise, icuraburindi ndetse na byinshi cyane bishaka kunyitambika ngo ntagera ku nzozi zange.'

    Akomeza ati 'Ariko ibyo byose ntibimbuza na gato kwaka, kumurika, kumurikira isi mu buryo bwanjye no gusakaza urumuri ruri muri njye kuko nasobanukiwe agaciro kange, nkanamenya uwo ndi we.'

    Yahise yanzika mu ndirimbo ze zirimo 'Radio' yakunzwe mu buryo bukomeye na 'For Us'. Asoje kuririmba iyi ndirimbo yabajije abafana be niba bameze neza.

    Uyu mukobwa yakomereje ku ndirimbo ye yise 'Rwiyoborere' imaze imyaka ine isohotse. Ku rubyiniro, yari kumwe n'abasore n'inkumi bamufashije mu miririmbire.

    Yanaririmbye indirimbo ye yise 'Naremewe wowe' imaze imyaka itanu isohotse. Bisa n'aho yashakaga kubanza gukumbuza abakunzi be indirimbo zo hambere.

    Mbere yo kuririmba indirimbo ye 'Fake Gee' yabanje kubaza abitabiriye iki gitaramo niba biteguye kubyinana nawe, anaririmba indirimbo yise 'Hono'.

    Ku rubyiniro yafashijwe n'itsinda rya Symphony Band ribarizwamo Frank wizihije isabukuru y'amavuko muri iki gitaramo. Alyn Sano yasabye abantu gufatanya nawe kwifuriza uyu musore isabukuru y'amavuko, maze aranzika mu ndirimbo ye yise 'Say Less' yakoranye na Sat B na Fik Fameica.

    Mbere yo kuva ku rubyiniro, Alyn Sano yakiriye ku rubyiniro umuhanzikazi mugenzi we Big Rachael. Yavuze ko nk'abari n'abategarugori bakwiye gushyigikirana. Big Rachel aherutse gutangira urugendo rw'umuziki, aho yasohoye indirimbo 'Twuzuzanye' imuha ikaze mu muziki.

    Shauku Music banyuze abantu binyuze mu ndirimbo zabo ziri kuri album nshya:

    Si ubwa mbere, iri tsinda riririmbye muri iki gitaramo, Baherukaga gutanga ibyishimo muri Kigali Jazz Junction ya Gashyantare 2023 bahuriyemo n'abarimo Kidum wo mu Burundi, B2C bo muri Uganda ndetse na Confy wo mu Rwanda.

    Basoje kuririmba iyi ndirimbo bagize 'Mwakoze kubana natwe muri iri joro. Abantu biteguye kubyina iri joro ni bande? Turi Shauku Band.'

    Bahise banzika mu ndirimbo zabo ziri kuri album nshya baherutse gusohora bise 'Sebisage'. Iri tsinda ryifashishije cyane umurishyo w'ingoma mu kumvikanisha uburyo urugendo rw'umuziki wabo bawubakiye kuri gakondo y'Abanyarwanda.

    Iyi album yabo ya mbere iriho indirimbo nka ‘Umurashi’ bakoranye na Riderman, ‘Sebisage’ bitiriye Album, ‘Karangwe’, ‘Iyarare’, ‘Ideni’, ‘Tsinda ya Remera’, ‘Joli’, ‘Juice’ ndetse na Imigembe ft Sophie nzayisenga.

    Buri ndirimbo iri kuri iyi album ifite ubutumwa bwihariye, kuko buri yose hafashwe igihe cyo kuyikoraho kitari munsi y'amezi atanu kuri buri imwe.

    Kandi yakozweho n'abantu batandukanye barimo Aaron Tunga na Kipeti. Nkomeza Alex uri mu bagize iri tsinda, yabwiye InyaRwanda ko iyi album bahisemo kuyita 'Sebisage' mu gusobanura u Rwanda n'Abanyarwanda.

    Nyuma yo kuva ku rubyiniro, iri tsinda ryakurikiwe n'umuziki wacuranzwe igihe kinini na Nep Djs [DJ Habz & DJ Berto] baherutse gutangira urugendo rwo gukora indirimbo. Baherutse gusohora indirimbo bise 'Mid Night' bakoranye n'umuraperi Kivumbi.

    Umurishyo wa nyuma w'iki gitaramo wavugijwe ahagana saa sita z’ijoro n’iminota 34′ (00:34′). 





    Uncle Austin yashimiye Levixone nyuma yo kumunyura


    Abari bitwaje indabo bazimugejejeho baramushimira



    Levixone yahawe impamba y’amafaranga azakomeza urugendo muri Uganda


    Dj Dizzo ni umwe mu bitabiriye iki gitaramo



    Ifoto y’umunsi: Levixone ku rubyiniro rwa Camp Kigali

    Abarimo Muyango Claudine wabaye Miss Photogenic muri Miss Rwanda 2019 bitabiriye iki gitaramo, aha yari kumwe n’inshuti ze


    Levixone yakoresheje imbaraga nyinshi bigaragarira buri wese




    Ubusabane mu bafana na Levixone ubwo yabataramiraga



    Levixone yaherukaga gutanga ibyishimo muri BK Arena



    Levixone yihariye urubyiniro rwa Kigali Jazz Junction, kuko yasoje abantu batabishaka





    Daddy yaririmbye abwira abafana be kwiyegereza Imana




    Daddy yifashishije umwe mu baraperi bakomeye muri Uganda, amusanga ku rubyiniro


    Daddy yaririmbye agaragaza akanyamuneza


    Daddy Andre yataramiye ku nshuro ye ya mbere i Kigali


    Victor Rukotana wamenyekanye mu ndirimbo zirimo ‘Warumagaye’, ‘Promise’ n’izindi yari muri iki gitaramo 



    Mbere yo kwinjira ahabereye iki gitaramo babanje gufata agafoto ku rwibutso


    Alyn Sano yagaragaje ubuhanga bukomeye muri iki gitaramo, yifashisha indirimbo ze zakunzwe atanga ibyishimo


    Umunyamakuru wa Isibo, Muyango Claudine witabiriye Miss Rwanda 2019 ni umwe mu bitabiriye iki gitaramo

    Alyn Sano yaririmbye agaragaza ko yishimiye gutaramira abitabiriye Kigali Jazz Junction

    Umuhanzikazi Big Rachel uherutse kwinjira mu muziki yahawe umwanya muri iki gitaramo. Uyu mukobwa asanzwe asubiramo indirimbo z’abahanzi

    Frank, umucuranzi wo muri Symphony Band yizihirije isabukuru y’amavuko muri Kigali Jazz Junction

    Frank yaririmbiwe indirimbo imwifuriza isabukuru y’amavuko, arabashimira ku bwo kumuzirikana

    Umuhanzi akaba n’umunyamakuru Luwano Tosh [Uncle Austin] ni umwe mu bitabiriye iki gitaramo

    Amaboko hejuru ku bakunzi b’umuziki banogewe n’umuziki w’injyana zirimo Afrobeat, Zouk n’izindi

    Producer The Major usanzwe utunganya indirimbo z’abahanzi, yafatanyije na Alyn Sano kuririmba indirimbo ‘Ide’ bakoranye na Alyn Sano

    Mu gitaramo nk’iki buri wese atekereza ku mwambaro wihariye uzatuma agaragara neza

    Buri wese abyina uko ashoboye ariko agasigarana ibyishimo bisendereye

    Mbere yo kwinjira muri iki gitaramo cya Kigali Jazz Junction, werekanaga itike ubundi ugahabwa uburenganzira bukwemerera kwinjira

    Gakondo muri Kigali Jazz Junction- Umusore wabyirutse ari intore yabigaragaje muri iki gitaramo

    Nta kwicwa n’inzara muri iki gitaramo- ‘Mucoma’ yari yiteguye gufasha benshi kubona icyo kurya

    Umwe mu basore b’abahanga bagize itsinda ry’abacuranzi n’abaririmbyi rya Shauku Music Band

    Mu masaha ya mbere y’iki gitaramo, abantu bari batangiye kwicara mu myanya y’imbere

    Werekana niba waraguze tike y’ahasanzwe (Regular), VIP cyangwa se VVIP ubundi ugahabwa ikaze

    Umuhanzikazi Neema Rehema ufasha benshi mu bahanzi mu miririmbire mu bitaramo n’ahandi

    Kanda HANO ndetse na HANO urebe amafoto yaranze igiatramo cya Kigali Jazz Junction

    AMAFOTO: Ndayishimiye Nathanael& Jean Nshimiyimana-INYARWANDA.COM

    Source : https://inyarwanda.com/inkuru/127680/daddy-alyn-sano-na-wyre-batanze-ibyishimo-mu-gitaramo-levixone-akora-ivugabutumwa-amafoto-127680.html