Category: Uncategorized

Iyi gahunda izagera mu gihugu cyose yateguwe n'ibigo bya leta birebana n'ibijyanye n'ingufu EDCL/REG, aho abaturage batuye mu bice bitandukanye by'igihugu bagiye kujya bahabwa Gaz n'imbabura zibungaunga ibidukikije hirindwa guhumanya ikirere.

Abaturage batishoboye bari guhabwa ibikoresho bihendutse kuko hari amafaranga bishyurirwa na Leta ya Nkunganire, ku buryo nka Gaz isanzwe igura ibihumbi 78Frw barimo kuyihabwa ku mafaranga ibihumbi 42Frw.

Mu bukangurambaga bwo kwitabira gukoresha izi mbabura na Gaz, mu Karere ka Rubavu na Musanze, abaturage babwiwe ibyiza byabyo.

Birimo kuba amashyiga arondereza ibicanwa bigatuma uyakoresha azigama amafaranga, gutekera heza hatari umwanda, kurinda indwara z'ubuhumekero no gufasha ubikoresha gukora indi mirimo.
Gukoresha amashyiga avuguruye ni ibintu byiza cyane kuko araramba, aba yarasuzumwe n'Ikigo gishinzwe ubuziranenge, arondereza ibicanwa, afite umutekano uhagije ku buryo nta kwikanga ngo riratwika inzu n'ibindi.

Habarurema Evariste wo mu murenge wa Gisenyi yashimye iyi gahunda leta avuga ko kuba ishyiga rya Gaz ryaguraga ibihumbi 78Frw kuri Nkunganire riri kugura amafaranga ibihumbi 42Frw, ari inyungu izamura umuturage.

Agira ati “Ndi mu bantu batitaga ku gukoresha gaz ariko kuba leta yatangiye kutwunganira batwishyuriraho make ni byiza cyane, turifuza ko zigera kuri benshi. Ndashishikariza abaturage turi mu cyiciro kimwe cy'Ubudehe kwitabira gukoresha gaz zirondereza ntizangize n'ibidukikije kuko iriya myuka ihumanya itera indwara'.

Umugwaneza Mediatrice wo mu murenge wa Rubavu, avuga ko yari akeneye Gaz ariko agasanga ihenze akishimira inkunga ya leta itumye ayibona kuri make.

Ati “Nari nkeneye gaz n'aya mashyiga kuko amfasha guteka mfite isuku n'ubuzima bwanjye butekanye kandi mbibonye bidahenze kuko nzishyura ibihumbi 15Frw andi azishyurwa na leta.”

Umukozi w'ikigo cy'igihugu gishinzwe ingufu (EDCL) mu mushinga wibanda ku gufasha abanyarwanda 'Tekera Aheza', Alain Patience Niyibizi, avuga ko iyi gahunda ya nkunganire ku mashyiga atangiza ikirere mu gihugu hose igamije kugeza ku banyarwanda imbabura za Rondereza, Amashyiga ya gaz, amashyiga ya palete n'amakara ku ngo ibihumbi 500.

Ati “Leta y'u Rwanda yunganira abaguzi ku giciro ibikoresho bisanzwe bigura. Hari abunganirwa ku kigero cya 90%, icya 70% ndetse hari n'abunganirwa kugeza kuri 45% intego akaba ari uko tuzaba twabashije ukugabanya ibicanwa kugera ku kigero cya 42% muri 2024”.

Umuyobozi w'Akarere ka Rubavu, Kambogo Ildephonse, yemeza ko kuva iyi gahunda yo gushishikariza abaturage gukoresha amashyiga n'ibicanwa bitangiza ibidukikije yatangira imaze gutanga umusaruro.

Avuga ko iyi gahunda yatangiranye n'imirenge umunani muri 12 igize akarere, asaba abadafite ubushobozi buhagije kubyaza umusaruro amahirwe igihugu kiba cyabahaye.

Kambogo yakanguriye abaturage bose gukoresha aya mashyiga n'imbabura mu gutsinda burundu ikibazo cyo kwangiza ibidukikije n'imyuka ihumanya ikirere kuko ishyira ubuzima bwabo ku kaga.

Ati “Dufite ingo nyinshi zaciye ukubiri no gukoresha uburyo bwa gakondo, kuri ubu bakoresha amashyiga avuguruye muri gahunda ya Leta ibinyujije mu bigo byayo, natwe ubukangurambaga turabukomeje.”

Iyi gahunda ya leta y'u Rwanda Ishyirwa mu bikorwa n'Ikigo Gishinzwe Guteza imbere Ingufu (EDCL) ikaba izagera mu turere twose bikajyana na Gahunda ya Guverinoma yo kwihutisha Iterambere (2017-2024) izwi nka NST1 kugira ngo Abanyarwanda batere imbere kandi bagire imibereho myiza babigizemo uruhare.

Abanya-Musanze basobanuriwe imikorere ya Gaz

Abaturage ba Rubavu basobanuriwe uko ibiciro byagabanyijwe

Amashyiga bazayahabwa kuri Nkunganire hakurikijwe ubushobozi

Amashyiga yaguraga ibihumbi 78Frw bayahabwa ku bihumbi 42Frw

I Musanze abahisemo amashyiga bahise biyandikisha

---

Source : http://igihe.com/amakuru/u-rwanda/article/imiryango-itishoboye-yatangiye-guhabwa-imbabura-na-gaz-kuri-nkunganire-ya-leta

Pep Guardiola yashimangiye ko Manchester City idashobora guhora hejuru y'andi makipe mu Bwongereza kandi yemera ko Liverpool na Chelsea zishobora kuba amakipe akomeye byoroshye.

City na Liverpool barangije shampiyona barutanwa inota rimwe inshuro ebyiri muri shampiyona enye zishize, ariko ikipe ya Jurgen Klopp irerekeza kuri stade Etihad uyu munsi irushwa na City iri ku mwanya wa kabiri amanota 19.

Ku wa gatanu, mu kiganiro yagiranye n'abanyamakuru mbere y'umukino, Guardiola yagize ati: 'Buri gihe ntekereza ko bishobora kubaho. Ntabwo nigera ntekereza cyangwa ngo nisuzugure cyane – cyangwa ikipe – ko bitazabaho.

Ibi bishobora kubaho. Navuze inshuro nyinshi ko ikipe atwaye Premier League, umwaka ukurikiye,ishobora no kutajya mu gikombe cya Europa. Nicyo kintu cyiza dushobora kugira nk'ikipe, nkumuryango.Bishobora kubaho.

'Igihe cyose bishobora kubaho, ibyabaye kuri Liverpool muri iyi shampiyona cyangwa mu yandi makipe nkaChelsea cyangwa indi kipe iri muri batandatu ba mbere.

Bishobora kutubaho, rwose. Iyo bibaye, gerageza ushake igisubizo vuba bishoboka kandi ugerageze kubyirinda. Niba bibaye, ibyumweru bibiri cyangwa bitatu, noneho mucyumweru cya kane gerageza ushake igisubizo.

Ikipe ya Liverpool ifite akazi mumaboko yabo mugihe bagerageza kuzamuka kumeza no kurangiza shampiyona muri bane ba mbere. Ikipe ya Reds kuri ubu amanota arindwi ya Tottenham iri ku mwanya wa kane, nubwo ifite imikino ibiri mu ntoki. Ariko ushyizwe hagati yamakipe yombi ni Eddie How's Newcastle United, yakinnye imikino ingana na Red, ariko ifite amanota atanu.

Source : https://umuryango.rw/imyidagaduro/imikino/article/pep-guardiola-yagaragarije-abafana-ba-man-city-ikintu-atinya

Jenerali Muhoozi Kainerugaba, umuhungu wa Perezida wa Uganda, Yoweri Museveni, yagiye mu mpaka zerekeranye n'igitero cyagabwe ku mutungo w'umuryango w'uwahoze ari Perezida Uhuru Kenyatta mu majyaruguru ahitwa Northlands.

Gen Muhoozi yavuze ko azohereza ingabo z'igihugu cya Uganda (UPDF) guhiga abantu bangije imitungo ya Perezida Uhuru Kenyatta.

Ku wa gatandatu, uyu musirikare utavugwaho rumwe yagiye ku mbuga nkoranyambaga asobanura ko uyu wari umukuru w'igihugu warangije Manda ari 'mukuru we' agaragaza ko atishimiye ibyabaye ku wa mbere.

Yakomeje avuga ko igihugu cya Uganda nacyo kizohereza UPDF kurinda uwahoze ari perezida, yongeraho ko na bo “bazakomeretsa ku mubiri” abo bagizi ba nabi bangije imitungo ye.

Yagize ati “Umurima wa mukuru wanjye watewe n'abanyakavuyo mu minsi ishize.Turohereza ingabo za UPDF kumurinda.Tuzakubita abo banyakavuyo…”

Gen Muhoozi yakomeje ati, “Nasabye Muzehe [Perezida Museveni] kunyohereza nk'Umuyobozi uyoboye ingabo,OC (Officer Commanding) muri Northlands.Icyo dukeneye ni ingabo 200 za 200 UPDF kujya gutanga amategeko. Yarambajije ngo kubera iki ?Ndamusubiza nti abanyakenya bakeneye gukubitwa .Yarabyanze.”

Uyu murima wa Northlands Farm uherereye ahitwa Ruiru watewe n'abigaragambya bashyigikiwe n'ishyaka Azimio la Umoja riri kwigaragambya ryamagana ubutegetsi bwa Ruto.

Source : https://umuryango.rw/amakuru/mu-mahanga/umutekano/article/abanya-kenya-bakeneye-gukubitwa-gen-muhoozi-yasabye-museveni-ingabo-zo-kujya

Umuyobozi wa Gasogi United,yasabye Minisitiri wa Siporo,Munyangaju Aurore Mimosa,gukemura ikibazo cy'imyenda y'Amavubi yacuyutse n'ubuke bwayo mu Ikipe y'Igihugu Amavubi.

Mu kiganiro Rirarashe cya Radio/TV1 cyo ku wa 30 Weruwe 2023, Kakooza Nkuriza Charles na Mutabaruka Angelbert, bagarutse ku ngingo yo kwibaza ahari ibibazo by'Amavubi ndetse n'uburyo byakemuka.

Perezida wa Gasogi United, Kakooza Nkuriza Charles utajya uripfana, yavuze ibi ari igisebo ku Gihugu, kubona ikipe yambara imyenda y'imbusane ndetse imwe yaracuyutse.

Yagize ati 'Ndisabira Minisiteri ya Siporo, ntabwo ikipe yacu ikwiye gusa kuriya aho umutoza yambaye Nike (umupira) y'umukara, abandi bambaye Errea zimaze imyaka itanu, byibura umutoza iyo bamubwira akambara 'costume'.'

Yakomeje agira ati 'Icya kabiri, uriya mwana bita Sahabo ajya kubona ikarita y'umutuku ni nde wamurenganya? Ikipe y'Igihugu tugeze ahantu umukinnyi yizanira kora (collants)? Wabonye ejo isengeri Manzi Thierry yari yambaye yamanutse mu mwambaro, uzi ko umusifuzi iyo ashaka yari kumuha ikarita. Turasebye bihagije rwose.'

KNC yakomeje asaba Minisitiri wa Siporo, Munyangaju Aurore Mimosa, guca iteka agakemura iki kibazo burundu.

Yagize ati ' Nyakubahwa Minisitiri, ca iteka ntituzongere guseruka twambaye imyenda yakwedutse, yakuyutse, yacuyutse, noneho ikoze mu bikoresho nka biriya. Buriya haguye imvura bariya bakinnyi bamera nk'abikoreye imicanga. Imyenda iremereye kuriya ntabwo ikibaho.'

Uyu muyobozi yakomeje avuga ko biteye isoni kubona amakipe yambara imyenda myiza kurusha Ikipe y'Igihugu.

Ati ' Wambwiraga gute ko APR FC na Police FC zambara imyenda myiza kurusha Ikipe y'Igihugu duhuriyeho turi miliyoni 13? Ubu koko tugeze aho kwambara gapira cyangwa ibigunira? Sinitaye ku manyanga yakozwe na Muhire mu masezerano ya Masita.'

Ikibazo cy'imyambaro y'Ikipe y'Igihugu si gishya kuko mu mikino y'Igikombe cya Afurika cy'Abakina Imbere mu Gihugu (CHAN) mu 2021, ubwo u Rwanda rwakinaga na Maroc, Ngendahimana Eric yasimbuye Kalisa Rashid yinjira mu kibuga yambaye imyenda idahuje nimero.

Umwambaro Amavubi yambara uyu munsi ni ubwoko bwakozwe n'uruganda rwa Errea rwo mu Butaliyani mu mwaka w'imikino wa 2017-18, aho buri mwaka rusohora umwambaro (version) ugezweho ariko Amavubi ntahabwe imyenda mishya.

Source : https://umuryango.rw/imyidagaduro/imikino/article/knc-yasabye-minisitiri-wa-siporo-gukemura-ikibazo-cy-imyenda-mu-mavubi

Madamu Denise Bucumi Nkurunziza, bamwe bita 'mama Buntu'.wa nyakwigendera Pierre Nkurunziza,wayoboye Uburundi kuva mu 2005 kugeza mu 2020,yavuze ko nta shyaka abarizwamo mu Burundi kubera ko Imana yamuhamagaye ari umuntu usanzwe.

Bitandukanye n'abandi bagore b'abakuru b'igihugu Uburundi bumaze kugira, Denise Nkurunziza we s'umurwanashyaka w'iryo shyaka.

Kuri icyo kibazo, yabwiye BBC ati “ariko mwebwe murambeshyera, ntimuhora mubona ko nitabira ibiterane by'iryo nkabafasha gusenga? Mushaka ngo umuntu abemo gute?”

Mu biterane bitandukanye byo gushima Imana bitegurwa n'iri shyaka riri ku butegetsi rya CNDD-FDD, cyo kimwe n'ibikorwa by'iri shyaka ku munsi wa kane wa nyuma w'ukwezi, kenshi na kenshi Denise Nkurunziza ni ho aba ari ariko nta mwambaro w'ishyaka aba yambaye.

Na byo yabitangiye ubusobanuro ati:”Njyewe ninjiye mubyo gukorera Imana nta shyaka ndimo.

“Ibyabaye mu 1993, byabaye ndi ku ishuri nta shyaka ndimo. Aba bagarutse naratangiye gukorera Imana.

“Kandi ijambo ry'Imana rivuga ngo, uko wari uri mu ihamagarwa, ubigumanemo n'Imana.”

Avuga ko yumvise ko yaguma uko yari ari, kuko hariho abahamagarwa basanzwe bari mu ishyaka bagakomeza bakorera Imana n'ishyaka, nta cyo byica.

BBC

Source : https://umuryango.rw/amakuru/mu-mahanga/ubuzima/article/umugore-wa-nkurunziza-yavuze-impamvu-atari-mu-ishyaka-ry-umugabo-we

Ibi bibazo byongeye kugarukwaho muri Raporo y'Umunyamabanga Mukuru wa Loni, António Guterres yashyikirijwe ibihugu bigize Akanama k'Umutekano muri uyu muryango.

Muri iyi raporo, António Guterres agaragaza ko aho kugira ngo ibintu bijye mu buryo ahubwo birushaho kuzamba mu ntara eshatu zigize Uburasirazuba bwa Repubulika Iharanira Demokarasi ya Congo. Ibi byose agaragaza ko biterwa n'imitwe yitwaje intwaro ihakorera.

Yifashishije ingero yagaragaje ko mu Ntara ya Ituri hagati ya tariki 1 Ukuboza mu 2022 na tariki 14 Werurwe mu 2023, hishwe abasivile 485 barimo abagore 82 n'abana 51. Hakomerekejwe kandi abasivile 172 barimo abagore 20 n'abana 19. Mu gihe abashimuswe ari 168 barimo abagore 13 n'abana 35.

Ibibazo nk'ibi kandi byagaragaye mu Ntara ya Kivu y'Amajyaruguru. Hagati y'Ukuboza mu 2022 n'itariki 15 Werurwe mu 2023, habarurwa ko hishwe abasivile 187 barimo abagore 69 n'abana 20. Abakomerekejwe ni 117 barimo abagore 54 n'abana 24.

Iyo bigeze ku Ntara ya Kivu y'Amajyepfo iyi raporo ho igaragaza ko hagati y'Ukuboza mu 2022 n'itariki 31 Mutarama mu 2023 hishwe abasivile 26 barimo abagore icyenda n'abana 19, mu gihe abakomeretse ari 13.

Uretse aba bantu bapfuye, Umuryango w'Abibumye ugaragaza ko hari n'abandi 628 bagiye bahabwa igihano cy'urupfu n'imitwe yitwaje intwaro kubera kubashinja ibyaha bitandukanye kandi bigakorwa atari icyemezo cy'urukiko. Muri aba harimo abagabo 465, abagore 111 n'abana 52.

Ibi bikorwa byose Umunyamabanga mukuru wa Loni agaragaza ko bigirwamo uruhare n'imitwe yitwaje intwaro irimo na FDLR igizwe n'abagize uruhare muri Jenoside yakorewe Abatutsi.

Yarumye ahuha ku kibazo cy'indege ya Congo yarashwe n'u Rwanda

Ikindi kibazo António Guterres agaragaza muri iyi raporo ni icy'uko Umuryango w'Abibumbye uhangayikishijwe n'umwuka mubi uri hagati y'u Rwanda na Repubulika Iharanira Demokarasi ya Congo.

Ati 'Mpangayikishijwe kandi n'umwuka mubi ukomeje kuzamuka hagati ya Repubulika Iharanira Demokarasi ya Congo n'u Rwanda. Ndashishikariza impande zombi gukemura ibibazo zifitanye binyuze mu biganiro n'uburyo buhari bwo guhosha amakimbirane.'

Avuga ko ubu bwumvikane bucye bwagaragariye mu cyemezo u Rwanda ruherutse gufata cyo kurasa ku ndege y'intambara ya Repubulika Iharanira Demokarasi ya Congo yari yavogereye ikirere cyarwo mu Karere ka Rubavu.

Muri iyi raporo António Guterres avuga ko 'ku wa 24 Mutarama, Indege y'intambara y'Igisirikare cya Repubulika Iharanira Demokarasi ya Congo yarashwe ubwo yari iri kururuka ku kibuga cy'indege cya Goma. Guverinoma ya Congo ikaba ihakana ibirego by'u Rwanda by'uko yari yavogereye ikirere cy'u Rwanda.'

Ibyatangajwe n'Umunyamabanga Mukuru wa Loni bisa n'ibihabanya n'ibyatangajwe na Guverinoma y'u Rwanda kuri uwo munsi kuko yavuze ko iyi ndege yarashwe yavogereye ikirere cy'u Rwanda.

Ati “Uyu munsi ahagana saa kumi n'imwe n'iminota itatu, indege yo mu bwoko bwa Sukhoi-25 iturutse muri Repubulika Iharanira Demokarasi ya Congo, yavogereye ikirere cy'u Rwanda ku nshuri ya gatatu. Ingamba z'ubwirinzi zahise zifatwa. U Rwanda rurasaba Congo guhagarika ubu bushotoranyi.'

Iyo ndege yo mu bwoko bwa Sukhoi-25 yarashwe ku mugoroba wo kuwa Kabiri tariki 24 Mutarama 2023, irasirwa mu karere ka Rubavu yavogereye ikirere cy'u Rwanda, nk'uko itangazo rya Guverinoma ryabigaragaje.

Iyo ndeye yarashwe ku ibaba, ihita isubira inyuma yafashwe n'inkongi ijya kuzimirizwa ku kibuga cy'indege cya Goma.

Yarashwe hashize iminsi umwuka utameze neza hagati ya Guverinoma ya Congo n'u Rwanda, aho Congo ishinja u Rwanda gufasha M23, rukabihakana ahubwo rugashinja icyo gihugu gukorana na FDLR yashinzwe n'abasize bakoze Jenoside yakorewe Abatutsi.

Mbere y'iyi nshuro, indege za FARDC zavogereye ikirere cy'u Rwanda inshuro ebyiri, ndetse rimwe yaguye umwanya muto ku kibuga cy'indege cya Rubavu.

Ibi byose ni ibintu bidafite aho bigaragara na hamwe muri iyi raporo y'Umunyamabanga Mukuru wa Loni.

---

Source : http://igihe.com/amakuru/u-rwanda/article/antonio-guterres-yatanze-impuruza-ku-bibazo-bya-congo-abererekera-ikibazo-cy

Mu itangazo RRA yashyize hanze kuri uyu wa 31 Werurwe 2023 yavuze ko 'ibi bikozwe hashingiwe ku busabe bw'abasora bagaragaje ko bagize ibibazo by'ikoranabuhanga mu kumenyekanisha bityo ntibabashe kuzuza inshingano zabo mu gihe cyari giteganyijwe.'

Yakomeje iti 'Tuboneyeho kwibutsa abasora bose ko bagomba kumenyekanisha hakiri kare buri gihe kugira ngo bahabwe ubufasha mu gihe babukenera kandi banirinde ingorane n'igitutu cyo ku munota wa nyuma.'

RRA yagaragaje ko ibibazo byose byatewe n'uko abasora benshi baje kumenyekanisha uwo musoro muri iyi minsi ya nyuma ndetse ko bari gushaka uko ikibazo cyakemuka vuba hashoboka kugira ngo abantu bamenyekanishe banishyure igihe kitararenga.

RRA itangaje ibi mu gihe inaherutse kugaragaza ko mu kumenyekanisha umusoro ku nyungu w'umwaka wa 2022, yashyizeho impinduka zigamije korohereza abasora.

Izo mpinduka zirimo kubongereramo uburyo bwo kumenyekanisha ibyatunze umwuga 'Depenses', badafitiye inyemezabuguzi za EBM cyangwa se andi mamenyekanisha akorewe muri gasutamo n'imisoro ifatirwa.

Ni impinduka zatumye hakurwaho 27% ya depenses, kugira ngo buri wese yemererwe kumenyekanisha ibyatunze umwuga ariko bidaherekejwe na fagitire za EBM cyangwa ibindi bisabwa kugira ngo izo 'depenses' zemerwe.

Izo depenses ariko zigomba kuba ari izituruka ku bantu cyangwa ibigo byemerewe kudakoresha EBM nk'amabanki cyangwa ibigo bya Leta.

Icyo gihe Komiseri w'Imisoro y'Imbere mu Gihugu, Batamuliza Hajara, yasabye abasora bose gushyiramo gusa depenses zijyanye n'ibyatunze umwuga koko nyakuri kuko nyuma y'imenyekanisha ry'umusoro ku nyungu, iyo migereka izagenzurwa bihutiyeho.

Ati 'Nyuma y'itariki 31 Werurwe 2023 tuzatangira kugenzura bya byatunze umwuga byashyizweho bigendeye ku mugereka gusa kugira ngo turebe ko koko ari ibyatunze umwuga by'ukuri, niba bitaraje kugabanya gusa inyungu zisoreshwa atari iby'ukuri'.

Izindi mpinduka zakozwe mu imenyekanisha ry'umusoro ku nyungu ni uko usora cyangwa umwunganira iyo akora imenyekanisha, mu kuryohereza mu ikoranabuhanga rya RRA asabwa gushyiraho umwirondoro we, akanabyemeza ko ari we ubikoze.

Kumenyekanisha umusoro ku nyungu bikorwa unyuze ku rubuga rwa RRA www.rra.gov.rw, ku bamenyekanisha umusoro bashingiye ku nyungu nyakuri (Regime Reel) hamwe n'abakora ibaruramari riciriritse (simplified accounting), ukajya ahanditse 'Menyekanisha Imisoro y'Imbere mu gihugu'.

Abamenyekanisha umusoro ku nyungu w'ibinyabiziga cyangwa uw'ubucuruzi mu buryo bukomatanije (Flat Regime na Lampsum Regime) bo, bashobora gukora imenyekanisha bakoresheje Telefone igendanwa.

Amafaranga yacibwaga umucuruzi muto watinze kumenyekanisha azaba ibihumbi 50Frw mu gihe itegeko ryari risanzwe yari ibihumbi 100Frw.

Umucuruzi uzajya utinda kwishyura mu gihe kitarenze amezi atandatu azajya acibwa amande angana na 0.5% nageza ku mezi 12 ahanishwe kwishyura 1% by'agaciro k'umusoro ugomba kwishyurwa kandi nawo awutange.

---

Source : http://igihe.com/amakuru/u-rwanda/article/rra-yongereye-igihe-cyo-kumenyekanisha-no-kwishyura-umusoro-ku-nyungu-wa-2022

Yatowe binyuze mu matora yabaye kuri uyu Gatanu tariki ya 31 Werurwe 2023, yashyizeho komite nshya igiye kuyobora uru rugaga mu gihe cy'umwaka isimbuye icyuye igihe.

Hatowe abantu bayobowe na perezida Mugisha John, visi perezida Twahirwa Hebert, umubitsi Abayo Emmanuella, ushinzwe ubushakashatsi yabaye Uwamahoro Angelique, ushinzwe imyitwarire ni Niyongombwa Phocas, ushinzwe kwakira abanyamuryango ni Kwitonda Armand.

Iyi komite nshya yatowe yavuze ko igiye gukorera hamwe mu kongera ubumwe bw'abagize urugaga no guteza imbere ubunyamwuga, bizajyana no gushyiraho ibigenderwaho cyane by'umwihariko kwita ku kinyabupfura n'imyitwarire y'abanyamuryango ndetse no gushyira imbaraga mu gukorana n'abafatanyabikorwa batandukanye.

Perezida mushya wa IRVP, Mugisha John, yasabye abanyamuryango bose gufatanyiriza hamwe bagakora ibikorwa bigamije guteza imbere urugaga rwabo.

Ati 'Abagenagaciro bari mu rugaga ni bareke tujye inama, duhitemo icyerekezo kimwe kugira ngo dufatanye ibibazo bihari tubashe kubikemura, kugira ngo duteze imbere urugaga rwacu.'

Ku ruhande rw'abagenagaciro basabye iyi komite nshya gushyira imbaraga mu kongerera ubunyamwuga abagize urugaga ndetse no kwiteza imbere.

Munyabugingo Bonaventure ati 'Urugaga ruracyakura haracyari urugendo rurerure hari ibigomba gukorwa nko gukuza abanyamuryango mu buryo bw'ubunyamwuga n'iterambere ry'urugaga muri rusange.'

Uru rugaga ryashyizweho n'itegeko numero 17/05/2010 ryo kuwa 12 Gicurasi 2010 risohoka mu igazeti ya Leta yo ku itariki ya 17 Gicurasi 2010. Kugeza ubu rufite abanyamuryango bemewe basaga 248.

Abanyamuryango bafitiye icyizere komite nshya

Buri wese yatoye abayobozi ku mahitamo ye

Buri wese yatoye abayobozi ku mahitamo ye

Babanje gusobanurirwa uko amatora ari bugende

Amajwi yabaruwe ku mugaragaro

Mugisha John yahize kongera ubunyamwuga bw’abagenagaciro

Perezida ucyuye igihe Ndabirorere Annick yashimiye uwamusimbuye

Perezida Mugisha na Ndabirorere asimbuye baganira

Perezida Mugisha na Ndabirorere asimbuye baganira

Komite nshya yatowe kuri uyu wa Gatanu

Amafoto: Habyarimana Rauol

---

Source : http://igihe.com/amakuru/u-rwanda/article/mugisha-john-yatorewe-kuyobora-urugaga-rw-abagenagaciro-ahiga-kunoza

Inteko Rusange y'Umutwe w'Abadepite yemeje ishingiro ry'umushinga w'ivugurura ry'Itegeko Nshinga watangijwe na Nyakubahwa Perezida wa Repubulika.

Ni umushinga washyikirijwe Abadepite kuri uyu wa 31 Werurwe 2023, aho Guverinoma yari ihagarariwe na Minisitiri w'Ubutabera akaba n'Intumwa Nkuru ya Leta, Dr Ugirashebuja Emmanuel.

Hakurikije ibiteganywa n'Itegeko Nshinga byerekeye manda ya Perezida n'iy'Abagize Inteko Ishinga Amategeko, amatora y'Abadepite bazasimbura abari mu mirimo yagombye kuba muri Kanama 2023, na ho aya Perezida akaba muri Kanama 2024.

Perezida Kagame ashingiye ku Itegeko Nshinga rya Repubulika y'u Rwanda ryo mu 2003 ryavuguruwe mu 2015 mu ngingo yaryo ya 175, yasabye ko ingingo z'Itegeko Nshinga zerekeye amatora y'Abadepite zahindurwa kugira ngo ahuzwe n'aya Perezida, kubera ko hari ibyiza byinshi byo kuyahuza yombi.

Minisitiri Dr Ugirashebuja yasobanuriye abadepite ko mu mpamvu zatumye Perezida asaba guhuza igihe cy'amatora y'Abadepite n'aya Perezida harimo kugabanya igihe cyakoreshwaga mu gutegura ayo matora yombi n'ingengo y'imari yifashishwaga.

Ati 'Igihe cy'amatora y'Abadepite nigihuzwa n'icy'amatora ya Perezida wa Repubulika, bizatuma ayo matora yombi ategurirwa icyarimwe, bigabanye igihe cyagakoreshejwe igihe yaba buri tora ryategurwa ukwaryo.'

Ni ibintu avuga ko bisanzwe no mu bindi bihugu byaba ibyo mu Karere n'ahandi aho usanga manda ya Perezida n'iy'Abadepite zingana.

Minisitiri Dr Ugirashebuja yavuze kandi ko izindi mpamvu zishingiye ku kugabanya ingengo y'imari yakoreshwaga n'igihugu ndetse n'iy'abiyamamaza muri rusange.

Ati 'Ikindi ni Igihe cy'amatora y'Abadepite nigihuzwa n'icy'aya Perezida, ingengo y'imari yagendaga kuri buri tora izahuzwa, bityo bitume amafaranga yakoreshwaga mu bikorwa bijyanye n'amatora agabanuka.'

Minisiteri y'Ubutabera igaragaza ko guhuza amatora y'Abadepite n'aya Perezida wa Repubulika bituma hari ingingo z'Itegeko Nshinga zikwiye guhindurwa.

Zirimo ingingo ya 75, ivuga ibyerekeranye n'Abagize Umutwe w'Abadepite n'itorwa ryabo. Iyi ngingo yongewemo igika cya kane gishya kugira ngo hahuzwe igihe cy'amatora y'Abadepite n'icy'amatora ya Perezida wa Repubulika.

Icyo gika kivuga ko 'Itora ry'Abadepite bavugwa mu gika cya Mbere (a) cy'iyi ngingo rikorwa ku munsi umwe n'irya Perezida wa Repubulika.'

Indi ngingo ni iya 79 igena ibijyanye n'iseswa ry'Umutwe w'Abadepite ku mpamvu z'amatora, aho yakuwemo igika cyateganyaga igihe amatora y'Abadepite akorwamo, kubera ko umunsi amatora y'Abadepite akorerwaho wateganyijwe mu ngingo ya 75.

Icyo gika cyakuwemo cyavugaga ko 'Itorwa ry'abagize Umutwe w'Abadepite rikorwa mu gihe kivugwa mu gika kibanziriza iki, mbere y'uko manda yabo irangira.'

Igika cyayo cya Mbere kivuga ko 'Ku mpamvu z'amatora, Perezida wa Repubulika asesa Umutwe w'Abadepite hasigaye nibura iminsi mirongo itatu (30) kandi itarenga iminsi mirongo itandatu (60) ngo manda y'abawugize irangire.'

Ingingo ya 66 yo ivuga ko igihe cyo gutumiza inama ya mbere ya nyuma y'amatora y'abagize Inteko Ishinga Amategeko cyashyizwe mu minsi itarenze 15 nyuma y'itangazwa ry'amajwi rya burundu ku bireba Sena, no mu minsi itarenze 15 nyuma y'irahira rya Perezida wa Repubulika ku bireba Umutwe w'Abadepite.

Ingingo ya 174 yo ivuga ku kugira ngo amatora y'Abadepite azabere rimwe n'aya Perezida wa Repubulika ateganyijwe mu 2024 bidateje icyuho cy'Inteko Ishinga Amategeko, mu Itegeko Nshinga hongewemo ingingo nshya y'inzibacyuho iteganya ko 'Abadepite bari mu myanya igihe iri Tegeko Nshinga rivuguruye ritangiye gukurikizwa bakomeza imirimo yabo kugeza igihe cy'iseswa ry'Umutwe w'Abadepite ku mpamvu z'amatora'

Mu bindi bikubiye mu muri uyu mushinga w'itegeko, n'ukuba minisiteri w'intebe azajya ageza ku nteko inshingamategeko ibikorwa bya guverinoma nibura 3 mu mwaka, no kuba impanza bitazongera kuba ihame ko zisomerwa mu ruhame.

Nyuma yo kwemeza umushinga wo kuvugurura itegekonshinga, ukaba uzohereherezwa mu nama y'abaperezida b'amakomisiyo akorera mu nteko inshingamategeko umutwe w'abadepite.

The post <strong>Ishingiro ry'umushinga w'ivugurura ry'itegeko Nshinga ryemejwe</strong> appeared first on FLASH RADIO&TV.

Source : https://flash.rw/2023/04/01/ishingiro-ryumushinga-wivugurura-ryitegeko-nshinga-ryemejwe/?utm_source=rss&utm_medium=rss&utm_campaign=ishingiro-ryumushinga-wivugurura-ryitegeko-nshinga-ryemejwe

Madamu Jeannette Kagame yifatanyije n'ibihumbi by'abantu b'ingeri zitandukanye biganjemo Abanyamuryango ba FPR Inkotanyi n'inshuti zayo ziturutse mu bihugu bitandukanye, mu nama Mpuzamahanga ya FPR yahujwe no kwizihiza isabukuru y'imyaka 35 ishinzwe.

Iyi nama izamara iminsi ibiri guhera kuri uyu wa Gatandatu kugera ku Cyumweru tariki 2 Mata.

Ihurije hamwe abayobozi b'Umuryango FPR Inkotanyi, imitwe ya politiki ikorera mu Rwanda, abayobozi mu nzego za leta, abayobozi mu mashyaka yo mu bihugu by'inshuti, abashakashatsi n'abahagarariye ibihugu hirya no hino.

Insangamatsiko y'iyi nama iragira iti 'Ugutekereza ku rugendo rw'imyaka n'ahazaza'. 

Ibiganiro biribanda k'uruhare rwa politiki nziza ya FPR Inkotanyi mu kongera kubaka u Rwanda n'uburyo bwo gukomeza guteza imbere Igihugu hitawe no ku mpinduka n'ibibazo bigaraga hirya no hino.'

Ni inama ibaye u Rwanda rurangajwe imbere na FPR Inkotanyi rukomeje urugendo rudasanzwe rw'iterambere.

Urugero nko mu 1994, amafaranga Umunyarwanda yinjizaga ku mwaka yari amadolari 146 [hafi ibihumbi 150 Frw].

Uko imyaka yagiye ikurikirana, byagiye bihinduka. Nko mu 2001 yari 201$; 2003 aba 342$; 2011 aba 627$; 2014 agera kuri 718$. Mu 2015 yari 728 $, mu 2017 yari amaze kugera kuri 774 $, naho mu 2018 yari 788$ ku mwaka.

Mu 2020 intego yari 1.240 $ hanyuma mu 2035 u Rwanda rukazaba rufite ubukungu buciriritse kandi rwarateye imbere mu 2050.

 Ni mu gihe ubukungu buzaba bwihuta ku 10%, ku buryo Umunyarwanda azaba yinjiza 12.476$ ku mwaka.

Imibare ya Minisiteri y'Imari n'Igenamigambi yo muri Nzeri 2002 igaruka ku bushakashatsi bwakozwe mu 1999 na 2000, igaragaza ko nibura 60,2% by'Abanyarwanda bari abakene naho 57% bari mu bukene bukabije.

The post <strong>Jeannette Kagame yitabiriye inama Mpuzamahanga y'Umuryango ya FPR Inkotanyi</strong> appeared first on FLASH RADIO&TV.

Source : https://flash.rw/2023/04/01/jeannette-kagame-yitabiriye-inama-mpuzamahanga-yumuryango-ya-fpr-inkotanyi/?utm_source=rss&utm_medium=rss&utm_campaign=jeannette-kagame-yitabiriye-inama-mpuzamahanga-yumuryango-ya-fpr-inkotanyi