Category: Uncategorized

Umwe mu baherwe bakize kurusha abandi ku isi, Jeff Bezos yerekanye amategeko meza y'amafaranga umuntu wese akeneye kumva muri uyu mwaka

Aya mategeko akurikizwa kubafite amafaranga ndetse nabashaka gushaka amafaranga arenze ayo bafite ubu.

Dore amategeko 15 y'amafaranga kuri Jeff Bezos

1. Banza wiyishyure
2. Wige gushora imari
3. Ntukabe umwanzi wayo
4. Buri mafaranga yahe icyo gukora
5. Gira gahunda kandi wishyirireho intego
6. Koresha amafaranga make kuruta ayo winjiza
7. Ntukabe imbata y'amafaranga
8. Niba uyifite, ntukayangize
9. Tegura amafaranga yawe neza
10. Amafaranga ni umukino, iga uko ukinwa
11. Buri gihe gira ikigega kigutabara mu gihe nta mafaranga ufite
12. Buri gihe tuma amafaranga agukorera
13. Menya gushaka amafaranga gusa
14. Yakoresha kugira ngo ukemure ibibazo by'isi
15. Ntukoreshe inguzanyo niba udafite amafaranga

 

 

Source : https://yegob.rw/niba-ushaka-gukira-ibi-birakureba-dore-amategeko-15-yamafaranga-kuri-jeff-bezos-niba-ushaka-kugira-amamiriyari-nkaye/

Kimwe mu bibazo abarokotse Jenoside yakorewe Abatutsi  batishoboye bo mu Murenge wa Rugalika ho mu karere ka Kamonyi bafite ni inzu zo kubamo kuko ubu izisaga 310, zimwe zikeneye gusanwa izindi nazo zikubakwa bushya. Hon Depite Uwera Kayumba Alice wifatanije n'Abanyarugalika kwibuka ku nshuro ya 29 Jenoside yakorewe Abatutsi, yahumurije abafite ikibazo cy'aho bakinga umusaya, abizeza ko ari ikibazo cy'igihe gusa kuko uwabahaye ubuzima akabavana mu menyo y'abagome b'abicanyi atananirwa kububakira.

Mu kwibuka ku nshuro ya 29 Jenoside yakorewe Abatutsi mu murenge wa Rugalika, kuri uyu wa 12 Mata 2023 bibutse, bunamira ndetse bashyira indabyo ahari ibyobo 2 byajugunywemo Abatutsi basaga 400 mu kagari ka Nyarubuye ahacukurwaga amabuye y'Urugalika. Abishwe bakuwe ahazwi nko mu Biharabuge no mu misozi itandukanye bicwa urw'agashinyaguro, bamwe bajugunywa mu byobo bakiri bazima.

Nkurunziza Jean de Dieu, Umunyamabanga Nshingwabikorwa w'Umurenge wa Rugalika, avuga ko kimwe mu bibazo bikomereye abarokotse Jenoside muri uyu murenge ayoboye ari ukuba benshi ntaho kuba( inzu).

Gitifu Nkurunziza, avuga ko inzu 272 zikeneye gusanwa, mu gihe izindi zisaga 40 zigomba kubakwa bushya. Izo inyinshi zubatswe na Leta n'imiryango ifasha Leta nyuma ya Jenoside yakorewe Abatutsi mu 1994. Nyinshi muri izo zubatswe mu 1995, 1996 kuzamura, mu rwego rwo gufasha benshi kubona aho batura.

Nyuma y'imyaka hafi 29, nyinshi zarasenyutse bamwe ntaho kuba baracumbikiwe, abandi nabo bariho nabi kuko zarangiritse cyane ku buryo igihe cy'imvura bamwe barazihunga. Izi nzu zagiye zubakwa hutihuti ndetse no mu bikoresho bidakomeye hagamijwe kwihutisha ngo haboneke amacumbi ya benshi bari bayakeneye cyane ko abenshi bari barasenyewe, baratwikiwe inzu mu gihe cya Jenoside.

Hon. Depite Uwera Kayumba Alice intumwa ya rubanda mu nteko ishinga amategeko y'u Rwanda waje kwifatanya n'Abanyarugalika kwibuka ku nshuro ya 29 Jenoside yakorewe Abatutsi, avuga ko izi nzu inyinshi zubatswe hutihuti kuko zari zikenewe. Avuga kandi ko uretse n'izi zubatswe muri ubwo buryo, ngo imyaka 29 ishize n'uwiyubakiye iye neza abenshi bagiye bazitaho ndetse bakazivugurura ku bafite ubushobozi.

Depite Uwera Kayumba Alice, avuga ko mu by'ukuri inyinshi muri izi nzu nubwo byitwa gusana, asanga inyinshi ari ugukubita zigaherwa hasi zubakwa, ibyo asanga ari nko kubaka bundi bushya. Akaba kandi asanga ari ikibazo cy'gihe gusa kuko mu bikenewe harimo ubushobozi, ko kandi uwatabaye abicwaga akabaha ubuzima, atananirwa kububakira.

Abivuga muri aya magambo ati' Biragaragara ko hakenewe ingengo y'imari nini. Ugiye gusanira umuntu cyangwa kumwubakira ntabwo wamwubakira nk'imwe yo kwikiza n'ubundi yari yubakiwe'.

Akomeza ati' Navuga ko abarokotse Jenoside, tuvuge ab'ino aha muri Rugalika ni bakomere n'izo nzu bazazibona kuko n'ubuzima barabubonye. Uwabahaye ubuzima nti yananirwa no kubaha inzu, ni ikibazo cy'igihe gusa'.

Yaba Depite Uwera Kayumba Alice, yaba Gitifu Nkurunziza Jean de Dieu, bose bahuriza ku guha icyizere uwarokotse Jenoside yakorewe Abatutsi 1994. Bavuga ko bashingiye ku mirongo migari y'Igihugu gifite ubuyobozi bwiza, ko niba RPF yaratangiye urugamba rwo kwibohora n'urwo guhagarika Jenoside mu bushobozi buke bwari buhari, ko niba   ibyakorwaga muri icyo gihe byarakunze, ubu hari ubushobozi igihugu kimaze kwiyubaka ataribwo byananirana, ko ahubwo buri wese asabwa imbaraga ze mu kubaka ibyiza kandi bizaramba.

 

Munyaneza Theogene

Source : https://www.intyoza.com/2023/04/13/kamonyi-rugalika-kwibuka-29-uwabahaye-ubuzima-ntabwo-yananirwa-kubaha-inzu-hon-uwera-kayumba-alice/

Talon ubwo aheruka mu Rwanda, yashyize ibyiyumviro bye hanze, yerekana ko ashaka gufatira urugero ku rw'imisozi igihumbi, agahindura igihugu cye. Yavuze ko “imiyoborere y'u Rwanda izahindura Afurika'.

Kuva uwo munsi, yahise atangira guhindura ibintu, inzego z'igihugu cye azubaka agendeye ku byo yabonye ku Rwanda, n'ibyo yakunze kuganira na Perezida Kagame.

Yigeze kuvuga ati “Na mbere y'uko mba perezida nemeraga Perezida Kagame, uko ateye, ndetse n'igikundiro cye.”

Mu 2017, u Rwanda na Bénin byasinye amasezerano yo gushyiraho ikompanyi y'ubwikorezi y'indege ihuriweho igomba kugira icyicaro i Cotonou. Iyo sosiyete byitezwe ko izitwa Bénin Airlines, bivugwa ko izatangirizwa mu ruzinduko Perezida Kagame azagirira i Cotonou muri iki Cyumweru.

U Rwanda ruzaba rufite imigabane ingana na 49% muri Bénin Airlines mu gihe Bénin yo izaba ifite imigabane ingana na 51%. Gushinga iyi sosiyete bije bikurikira n'ubundi imikoranire yari isanzwe hagati y'ibihugu byombi, aho guhera muri Nzeri 2016 RwandAir yari yarafunguye ishami i Cotonou, rikora nk'igicumbi cyayo muri Afurika y'Iburengerazuba.

Bénin Airlines izajya ikora mu byerekezo bya Abidjan, Brazzaville, Douala, Libreville, Bamako, Dakar na Conakry.

Ubwo Patrice Talon yari mu Rwanda, yasuye inzego zitandukanye zirimo Urwego rw'Igihugu rushinzwe Iterambere, RDB. Yeretswe uburyo rufasha abashoramari kwandikisha imishinga yabo mu gihe gito n'uburyo serivisi hafi ya zose zikorwa hifashishije ikoranabuhanga.

Yavanye i Kigali igitekerezo cyo gukora muri ubwo buryo, kugeza n'aho yatumiye Serge Kamuhinda wakoraga muri RDB ngo ajye gukora mu Biro bye i Cotonou, kugira ngo asangize ubunararibonye abenegihugu be.

Mu ntangiriro za 2017, Talon yanzuye ko abaturage baturuka mu bihugu 31 bya Afurika batazongera kwaka viza kugira ngo binjire mu gihugu cye. Ni umwanzuro yafashe nyuma y'aho u Rwanda rwari rumaze gutangaza ko Abanyafurika bose bemerewe kwinjira mu gihugu batatse Viza.

Ubufatanye mu by'umutekano ku isonga

Muri Nyakanga 2022, Umugaba Mukuru w'Ingabo za Bénin, Brig Gen Fructueux Candide Ahodegnon Gbaguidi, yagiriye uruzinduko rw'akazi i Kigali, abonana na mugenzi we w'Ingabo z'u Rwanda, Gen. Jean Bosco Kazura.

Mbere yaho gato muri uwo mwaka, nabwo yari yaje i Kigali abonana na Perezida Kagame ari kumwe na Minisitiri w'Ububanyi n'Amahanga we.

Uruzinduko rwe ruca amarenga ko hari imikoranire yihariye yitezwe hagati y'impande zombi. Umukuru w'Igihugu, Paul Kagame, yabikomojeho ku wa 30 Mata, ubwo yari mu Nama Nkuru ya 15 y'Umuryango FPR Inkotanyi.

Icyo gihe yavuze ko hari ibihugu bibiri u Rwanda ruteganya koherezamo ingabo mu bikorwa byo gushaka no gusigasira amahoro, gusa ntiyigeze atangaza ibyo aribyo ariko yavuze Bénin mu gutanga urugero.

Magingo aya u Rwanda rufite Ingabo mu bihugu birimo Repubulika ya Centrafrique na Mozambique. Hose ziriyo mu butumwa bushingiye ku masezerano y'ubufatanye hagati y'ibihugu byombi.

Bénin imaze iminsi ifite ikibazo cy'umutekano muke giterwa n'ibikorwa by'iterabwoba biri mu Majyaruguru yayo, aho umutwe utaramenyekana ukomeje kwangiza ibintu.

Aho bigabwa ni hafi ya Burkina Faso, igihugu n'ubundi kimaze igihe cyibasirwa n'ibyihebe. Kubera ibitero bya hato na hato bigabwa mu duce twa Monsey na Karimama, Guverinoma ya Bénin yafashe umwanzuro wo kongera abasirikare mu duce twose tubarizwamo umutekano muke.

Abanyarwanda bahawe rugari mu nzego za Bénin

Umuntu wa hafi wa Talon muri Guverinoma ye, Minisitiri w'Ububanyi n'Amahanga, Aurélien Agbénonci, azi u Rwanda iburyo n'ibumoso kuko yarubayemo imyaka ine ari Umuyobozi wa Gahunda y'Umuryango w'Abibumbye ishinzwe Iterambere, UNDP hagati y'umwaka wa 2008 na 2011.

Mu minsi ishize, Nyamulinda Pascal wigeze kuyobora Umujyi wa Kigali, yagizwe Umuyobozi w'Ikigo gishinzwe Indangamuntu muri Bénin (ANIP).

Undi wahawe umwanya mu buyobozi bwa Bénin yitwa Richard Dada uri mu buyobozi bw'Ikigo cyo muri Bénin Gishinzwe ubwikorezi bwo ku butaka (ANATT: Agence Nationale des transports terrestres).

Dada yahoze ari Umukozi mu Kigo cy'Imisoro n'Amahoro mu Rwanda, mu ishami rishinzwe iperereza no kugenzura iyubahirizwa ry'amategeko agenga imisoro.

Perezida Kagame afitanye umubano mwiza na mugenzi we wa Bénin, Patrice Talon

---

Source : http://igihe.com/amakuru/u-rwanda/article/ikinyotera-cy-umubano-w-u-rwanda-na-benin

Perezida wa Sena Dr. Kalinda François Xavier, yagaragaje ko Jenoside yakorewe Abatutsi itari gushoboka iyo itaza gutegurwa n'abanyapolitiki, ari nabo bayihagarikiye igashyirwa mu bikorwa.

Ibi umukuru wa Sena yabigarutseho kuri uyu wa Kane tariki 13 Mata 2023, mu muhango wo gusoza icyumweru cy'icyunamo wabereye ku rwibutso rwa Jenoside yakorewe Abatutsi rwa Rebero ahasanzwe hasorezwa iminsi 7 yo kunamira abazize Jenoside yakorewe abatutsi mu Rwanda.

Ni icyumweru gisozwa hibukwa abanyapolitiki bazize kutemera no kwitandukanya n'ikibi, bagaharanira kurwanya akarengane mu banyarwanda.

Joseph Kavaruganda, wari Perezida w'urukiko rurinda ubusugire bw'itegeko nshinga mu bihe bya Jenoside yakorewe Abatutsi na mbere yaho, ni umwe mu banyapolitiki bibukwa mu gusoza icyumweru cyo kunamira abazize Jenoside yakorerwe abatutsi.

N'ubwo Kavaruganda atari mu bwoko bwahigwaga, muri Jenoside yakorewe abatutsi yari mu mwanya wari gutuma ashyigikira ubutegetsi bwateguye Jenoside yakorewe abatutsi, ariko siko byagenze yitandukanije nabwo kugeza ubwo abizize.

Murindabigwi Marcelet ni umukwe wa Joseph Kavaruganda babanye igihe kinini mbere y'uko yicwa.
Yagize ati 'Kavaruganda ni umuntu twabanye igihe kirekire, yari umuntu w'inyangamugayo, ukunda ukuri kugeza ubwo kuva mu bwana bwanjye anyitaho anshakira imibereho, kugeza ubwo Jenoside yabaga kuko nabaga iwe Kimihurura. Yari umuntu w'inyangamugayo ushaka gukoresha ukuri kose.'

Murindabigwi Marcelet, asanga imyitwarire ya sebukwe Joseph Kavaruganda watsimbaraye ku kuri kugeza ubwo abizize ikwiye kubera isomo rikomeye ababyiruka ubu.

Yakomeje agira ati 'Nkabona uburyo yitwaraga, ukuntu yakundaga abantu nta kuvangura, urubyiruko rwamureberaho,bakanarebera kuri bariya babyeyi bacu bitandukanije n'ikibi.'

Minisitiri w'Ubumwe bw'Abanyarwanda n'Inshingano Mboneragihugu, Dr.Bizimana Jean Damascene, yavuze ko Jenoside yakorewe Abatutsi yatewe na Politiki mbi yamaze imyaka irenga 35 mu gihugu, kandi amashyaka ya politiki y'icyo gihe akaba yaravukaga ashingiye ku bwoko.

Yagize ati 'Jenoside yakorewe Abatutsi yatewe na Politiki mbi yamaze imyaka 35 mu gihugu, inaterwa no kuba hari benshi mu ba nyapolitiki bayiyobotse. Aha mbere politiki y'u Rwanda yapfiriye ni ukuba amashyaka ya mbere yaravutse ashingiye ku irondabwoko, duhereye ku ishyaka rya Paremehutu ryashinzwe tariki 26 Nzeri 1959 rikomotse ku ishyirahamwe ryitwaga Mouvement Social Muhutu, ryari rigamije guharanira imibereho myiza y'abahutu.'
Mu muhango wo gusoza icyumweru cyo kunamira ku nshuro ya 29 abazize Jenoside yakorewe abatutsi, Perezida wa Sena Dr. Kalinda François Xavier, yagaragaje ko Jenoside yakorewe Abatutsi itari gushoboka iyo itaza gutegurwa n'abanyapolitiki, ari nabo bayihagarikiye igashyirwa mu bikorwa,anashimangira impamvu yo kwibuka byihariye abanyapolitiki bayizize, ari uko gusa bitandukanije na Politiki mbi.

Yagize ati 'Jenoside ntabwo yari gushoboka itarateguwe n'ubutegetsi ndetse n'abanyapolitiki,ntabwo yari gushoboka kubera ko ni nabo bayihagarikiye mu kuyishyira mu bikorwa. Ukuri kw'amateka y'igihugu cyacu n'ubuyobozi bubi bwaranze u Rwanda kuva mu gihe cy'ubukoloni, na Repubulika ya mbere n'iya kabiri mukarugeza ku ndunduro ya Jenoside yakorewe abatutsi mu 1994 birazwi.'

Urwibutso rwa Rebero ruruhukiyemo imibiri y'abarenga ibihumbi 14, barimo Abatutsi biciwe muri Kigali mu minsi ya mbere ubwo Jenoside yatangiraga ndetse na bamwe mu banyepolitiki, bamaganye umugambi wa Jenoside bakanga akarengane.

Muri abo banyapolitiki bashyinguye ku i Rebero harimo Landouard Ndasingwa, Charles Kayiranga , Jean de la Croix Rutaremara , Augustin Rwayitare , Aloys Niyoyita , Venantie Kabageni , Andre Kameya, Frederic Nzamurambaho Felicien Ngango (PSD), Jean Baptiste Mushimiyimana, Faustin Rucogoza na Joseph Kavaruganda.

Tito DUSABIREMA

The post Jenoside yakorewe Abatutsi ntiyari gushoboka iyo itaza gutegurwa n'abanyapolitiki-Perezida wa Sena Dr. Kalinda appeared first on FLASH RADIO&TV.

Source : https://flash.rw/2023/04/13/jenoside-yakorewe-abatutsi-ntiyari-gushoboka-iyo-itaza-gutegurwa-nabanyapolitiki-perezida-wa-sena-dr-kalinda/?utm_source=rss&utm_medium=rss&utm_campaign=jenoside-yakorewe-abatutsi-ntiyari-gushoboka-iyo-itaza-gutegurwa-nabanyapolitiki-perezida-wa-sena-dr-kalinda

Polisi y'Igihugu, ivuga ko yahagurukiye ikibazo cy'ubujura bumaze iminsi hirya no hino mu gihugu, bamwe bakanahasiga ubuzima.

Muri iki gihe mu bitangazamakuru byo mu Rwanda, ntihasiba inkuru y'ubujurq mu buce bitandukanye by'igihugu, bumwe bugakoreshwa intwaro gakonda bamwe bakanahasiga ubuzima abandi bagakomereka.

Umuvugizi wa Polisi y'u Rwanda, CP John Bosco Kabera, avuga ko Polisi yahagurukiye abakora ibi bikorwa kandi abazajya bafatwa bazajya bashyikirizwa inzego z'ubutabera.

Yagize ati 'Reka mbwire abajura aho bari, niba baryamye, aho bari bube bahuriye cyangwa se n'ubitekereza atari yabibwira undi cyangwa se n'uwabikoze bikamuhira ntafatwe ntibamutangeho amakuru, uwambuye telefone, turagira ngo tumubwire ko ibyo akora bitajyanye n'amategeko. Icya kabiri, niba abikora abe yiyemeje ingaruka zabyo.'

CP Kabera yunzemo agira ati 'Ubutumwa bwa nyuma twamuha ni uko mu gihe azi ko yakoze ibi bikorwa ari muri iki gihugu, tukamenya amakuru hakiri kare byihuse, ntaho azaducikira.'
Icyakora CP Kabera agaragaza ko nka Polisi bagenda bahura n'imbogamizi z'abantu badatangira amakuru ku gihe bigatuma hari ubwo batabasha gukurikirana neza abakekwaho ubujura.

CP Kabera avuga ko amakuru atangiwe igihe, iki kibazo cyajya gikurikiranwa bigishoboka.

Ati 'Icya mbere ndabahumuriza, icya kabiri ndabasaba ko batanga amakuru ku buryo bwihuse. Atari ugutegereza icyumweru cyangwa ukwezi, cyangwa n'ikindi gihe ku buryo bitihuta cyane. Kuko iyo tubonye amakuru ako kanya bituma inzego zikora iperereza amakuru agishyushye cyangwa se yabasha gushakishwa agahita anafatwa, atari yajya guhungabanyiriza umutekano ahandi.'

Yakomeje agira ati 'Nibatanga amakuru ku mbuga nkoranyambaga, nibatange telephone tubahamagare inzego zibikurikirane. Turagira ngo tubabwire baduhe amakuru, ingamba zirahari maze Polisi ikore akazi.'

Hari ibice bimwe na bimwe by'igihugu byagiye bigaragaramo ubujura bushobora no gutera imfu, aho hari n'abagiye bafatwa bakaraswa bagerageza kurwanya inzego z'umutekano.

CYUBAHIRO GASABIRA Gad

The post Abamaze iminsi mu bikorwa by'ubujura bahawe gasopo appeared first on FLASH RADIO&TV.

Source : https://flash.rw/2023/04/13/abamaze-iminsi-mu-bikorwa-byubujura-bahawe-gasopo/?utm_source=rss&utm_medium=rss&utm_campaign=abamaze-iminsi-mu-bikorwa-byubujura-bahawe-gasopo

Usanase Bahavu Jannet, yageneye abanyarwanda ubutumwa bw’ihumure muri iki gihe cyo kwibuka ku nshuro ya 29 Jenoside yakorewe Abatutsi mu 1994.

Uyu mukinnyi wa filime unafite filime ye bwite “Impanga Series” ikunzwe bikomeye, yashishikarije abanyarwanda kwirinda amacakubiri.

Yabasabye kandi kwimika urukundo mu mitima yabo no kurandura amoko kuko ariyo yagejeje u Rwanda kuri Jenoside yakorewe Abatutsi mu 1994. Aragira ati:

Nk'abanyarwanda twese cyane cyane urubyiruko, twimakaze ubupfura n’urukundo mu bo tungana ndetse no mu bakiri bato, duharanire kurandura burundu amoko yashyizwe muri twe akatuzanira amacakubiri yabyaye Jenoside yakorewe Abatutsi mu 1994.

Bahavu yasabye kurwanya ingengabitekerezo ya Jenoside, ati 'Twirinde tunamagane icyadusubiza mu macakubiri no guhembera ingengabitekerezo ya Jenoside, kandi Twibuke Twiyubaka'.   

Bahavu arakunzwe cyane muri sinema nyarwanda ndetse aherutse guhiga abandi mu bihembo Rwanda International Movie Awards aho yegukanye ibihembo bitatu birimo n’icyamuhesheje imodoka nshya.

Bahavu arasaba abanyarwanda kwimika urukundo

Source : https://inyarwanda.com/inkuru/128016/kwibuka29-bahavu-jannet-arasaba-abanyarwanda-kurandura-burundu-amoko-bakimika-urukundo-128016.html

Kuwa 12 Mata 2023 ni bwo abakozi n’abayobozi bakorera kompanyi ya Fortebet basuye Urwibutso rwa Jenoside yakorewe Abatutsi rwa Kigali, basobanurirwa amateka yaranze Jenoside yakorewe Abatutsi muri Mata 1994.

Nyuma bunamiye banashyira indabo aharuhukiye inzirakarengane za Jenoside yakorewe Abatutsi, banafata umwanya wo kungurana ibitekerezo ku cyo bungutse n’icyo bagiye gukora.

Mu kiganiro na InyaRwanda, Mugabo Steven ushinzwe Iyamamazabikorwa muri Fortebet wari unahagarariye iyi kompanyi y'imikino y'amahirwe ikorwa hifashishijwe ikoranabuhanga, yasobanuye byinshi.

Yatangiye asobanura Kwibuka n’akamaro kabyo, ati:'Kwibuka, tubifate nk'ikintu gikomeye cyane kubera ni amateka yac,u ni amateka atari meza y'igihugu cyacu nkatwe nk'urubyiruko tuba duhanira ko bitazongera, kandi kwibuka bikaba ari ikintu cy'ingenzi kigomba guhoraho kugira ngo abanyarwanda tutazibagirwa.'

Yageneye ijambo ry'ihumure abarokotse Jenoside, ati:'Ubutumwa twagenera abanyarwanda by'umwihariko abarokotse twababwira ‘mukomere, muhumure igihugu kirabakunda’, kandi ni ugukomeza guharanira guhesha ishema inzirakarengane za Jenoside yakorewe Abatutsi mu 1994.'

Agaruka ku cyo bungukiye mu gusura uru rwibutso rwa Jenoside yakorewe Abatutsi, ati: 'Twungutse byinshi, twasobanuye byisumbuyeho amateka yaranze Jenoside yakorewe Abatutsi, byadufashishije cyane mu buryo bwo kumenya aho tuva n’aho tujya.'

Yijeje abanyarwanda ko binyuze mu ikoranabuhanga bakoresha umunsi ku wundi, bazaba intumbwa nziza mu kugaragaza amateka nyayo yaranze Jenoside yakorewe Abatutsi muri Mata 1994.

Ati:'Nk’abakora ibikorwa bifite aho bihuriye n'ikoranabuhanga rinifashishwa na benshi bapfobya banahakana Jenoside yakorewe Abatutsi, twiteguye kwerekana ukuri nyako no gutanga ubutumwa bwiza bwubaka abanyarwanda.'

Basuye ibice bitandukanye bigize Urwibutso rwa Jenosid rwa Kigali ari na ko basobanurirwa amateka yaranze Jenoside yakorewe Abatutsi mu 1994Mugabo Steven ni we wari uhagarariye Fortebet akaba asanzwe ashinzwe iyamamazabikorwa n’umuvugizi w’iyi kompanyi Bafashe umunota wo kuzirikana inzirakarengane zazize Jenoside yakorewe Abatutsi mu 1994Steven yatangaje ko Fortebet izakora igishoboka cyose igahangana n’abapfobya Jenoside yakorewe Abatutsi, yerekana amateka nyayoBafashe umwanya wo kuganira banumva ubuhamya bw’umwe mu bakozi ba Fortebet, Kayitesi Amina, wagizwe impfubyi na Jenoside yakorewe Abatutsi

KANDA HANO UREBE ANDI MAFOTO

AMAFOTO: NATHANAEL NDAYISHIMIYE-INYARWANDA.COM

Source : https://inyarwanda.com/inkuru/128014/kwibuka29-abayobozi-nabakozi-ba-fortebet-basuye-urwibutso-rwa-jenoside-rwa-kigali-amafoto-128014.html

Jowest agaruka ku ndirimbo 'Witinya' yahuriyemo n'abandi bahanzi batanga icyizere mu muziki nyarwanda nka Afrique, The Nature, Fela Music, Kenumu, Fifi Raya na Kaayi, yasobanuye uko igitekerezo cyaje.

Ati:'Nari ngiye kuyikora njyenyine ariko mu busanzwe nari mfite gahunda yo gukorana indirimbo n'abahanzi beza bakizamuka turi mu gisekuru kimwe hamwe n'itsinda rya Fela Music dufata umwanzuro w’uko twayigira iyo.'

Ati: 'Tuganiriza bamwe mu bo twabonaga, hafi dusanga duhuje igitekerezo cyo gutanga ubutumwa bw'isanamutima mu gihe cyo Kwibuka Jenoside yakorewe Abatutsi mu 1994, kandi icyiza ni uko twakoze indirimbo nziza izahora ikenerwa mu bihe byose byo Kwibuka.'

Uyu muhanzi kandi yageneye ubutumwa abanyarwanda mu gihe cyo #Kwibuka29. Yabasabye kwibuka biyubaka kandi “tukababarira, tugasenyera umugozi umwe tukirinda amacakubiri ndetse n'ingengabitekerezo ya Jenoside.'

Asoza agira ati: 'Dukomeze kuba hafi Abarokotse Jenoside kandi tugira uruhare mu kwigisha amateka nyayo cyane abanyamahanga bagifite ipfobya n'ihakana rya Jenoside yakorewe Abatutsi muri Mata 1994.'

KANDA HANO UREBE INDIRIMBO ‘WITINYA’ JOWEST YAHURIYEMO N’ABANDI BAHANZI MU #KWIBUKA29

“>

Jowest yafatanije n’abahanzi barimo Afrique n’itsinda rya Fela Music mu ndirimbo ‘Witinya’ ikubiyemo ubutumwa bw’isanamutimaKaayi, Fifi Raaya, The Nature, Manick Yani na Kenumu na bo bari mu bafatanije na Jowest muri ‘Witinya’

Source : https://inyarwanda.com/inkuru/128007/kwibuka29-jowest-yahuje-imbaraga-nabarimo-kaayi-afrique-na-fela-music-bahumuriza-abanyarwa-128007.html

Ni ku nshuro ya 6 Itorero Evangélique des Amis au Rwanda ryibutse abari abayoboke baryo bagera kuri 35 bazize Jenoside yakorewe Abatutsi mu 1994. Ni igikorwa cyabaye kuri uyu wa Gatata tariki 12 Mata 2023, kibera kuri EEAR Kagarama mu Karere ka Kicukiro mu Mujyi wa Kigali. Hatanzwe ibiganiro ku mateka asharira yaranze u Rwanda, hanatangwa impanuro ku rubyiruko. 

Uwiragiye Genevieve uhagarariye abacitse ku icumu rya Jenoside yakorewe Abatutsi, mu Itorero Evangélique des Amis au Rwanda, yavuze ko abacitse ku icumu rya Jenoside bafite aho bageze biyubaka. Ati: “Uyu munsi twariyubatse, hari aho twavuye, hari n’aho tugeze, abari abasore bato bavuyemo abagabo, bakaba bafite imiryango kandi turacyafite icyizere cyo kubaho”.

Uwiragiye Geneviever uhagarariye abacitse ku icumu rya Jenoside yakorewe Abatutsi 1994, mu itorero Evangelique des Amis au Rwanda, avuga ko afite icyizere cy’ubuzima nyuma yo kurokorwa n’Inkotanyi

Pastor Mupenda Aaron Umuvugizi w’Itorero Evangelique des Amis au Rwanda, arasaba urubyiruko kurwanya abapfobya Jenoside yakorewe Abatutsi mu 1994

Pastor Mupenda Aaron, Umuvugizi w'Itorero Evangélique des Amis au Rwanda (EEAR) akaba n'Umushumba Mukuru wa EEAR Kagarama ahari icyicaro gikuru cy’iri Torero, avuga ko ari ku nshuro ya 6 bibuka nk'Itorero Evangélique des Amis au Rwanda abari abakrisitu babo, ndetse n’abari abakozi babo bazize Jenoside yakorewe Abatutsi mu 1994.

Uyu mushumba yavuze ko ari gahunda izajya iba buri mwaka kandi ikabera mu Turere 18 iri Torero rikoreramo hirya no hino mu gihugu. Ati “Iyi gahunda twayishyize mu Itorero hose”. Mu butumwa yageneye abanyarwanda ndetse n’abakiristu b'Itorero Evangélique des Amis au Rwanda, ni “ugushyigikira gahunda yo kwibuka”.

Yakomeje ati: 'Kugira ngo aya mateka atazazima, ni nshingano zacu twese nk’abanyarwanda ikindi no kwigisha abana bacu bakiri bato kugira ngo bakure bazi amateka y'u Rwanda, kugira ngo no mu gihe abakuze nkatwe tutazaba tukiriho, ariko tuzumve ko hari abo dusize bazarinda igihugu ndetse bakagisigasira'.

Umuyobozi Nshingwabikorwa w’Akarere wungirije wari umushyitsi mukuru mu kwibuka abari abakirisitu ba Eglise Evangelique des Amis au Rwanda bazize Jenoside yakorwe Abatutsi mu 1994

Monique Huss, Umuyobozi Nshingwabikorwa w’Akarere ka Kicukiro Wungirije wari umushyitsi mukuru muri iki gikorwa, mu butumwa yageneye abitabiriye bose yatangiye abihanganisha ndetse anabizeza ko Leta izakomeza kubaba hafi. 

Ati: 'Hari byinshi Leta yakoze kandi izakomeza kubaba hafi, kubafasha kwiyubaka ndetse nabo bakaba bafite umusanzu bakwiye gutanga bo ubwabo kugira ngo dufatanye kubaka u Rwanda twifuza, u Rwanda ruzira amacakubiri, u Rwanda ruzira Jenoside'.

Monique Huss, yongeye gusaba abagifite amakuru y’ahakiri imibiri y’abazize Jenoside yakorewe Abatutsi, batarashyingurwa mu cyubahiro, gutanga amakuru nabo bagashyingurwa mu cyubahiro.

Ati: 'Gutanga aya makuru biri muri bimwe bizakomeza kudufasha kwiyubaka, bizafasha abarokotse Jenoside yakorewe Abatutsi, gukomeza kubakika, gukomera no gukangurira buri wese yaba umuturage utuye mu karete ka Kicukiro ndetse n’ugize igihugu cyacu muri rusange'.

Mu butumwa bwihariye Monique Huss yageneye abashumba b’amatorero muri rusange ni ugukomeza kwimakaza ubutumwa bw’amahoro biciye mu butumwa bwiza bavuga.

Hibutswe abari abayoboke ba EEAR bazize Jenoside yakorewe Abatutsi mu 1994

REBA AMASHUSHO UBWO EEAR YIBUKAGA ABARI ABAYOBOKE BAYO BAZIZE JENOSIDE YAKOREWE ABATUTSI MU 1994

Source : https://inyarwanda.com/inkuru/128011/kwibuka29-itorero-ryivugabutumwa-ryinshuti-mu-rwanda-ryibutse-abari-abayoboke-baryo-bazize-128011.html

Muri iyi myaka 29 ishize, inyangabirama ntako zitagize ngo zihindanye isura y'uRwanda muri rusange, n'iya Perezida Kagame by'umwihariko. Nyamara ibitutsi byabo ahubwo byabaye nk'ibisingizo, kuko byateye Abanyarwanda kurushaho gukomera, gukora no gutera imbere. Nta kintu kigoye nko gushyuha umutwe uhimbira umwere ibirego n'ibitutsi, uzi neza ko ibyiza bye bizagutamaza.

Uko ni ko bimereye Anjan Sundaraman , Umuhinde wigize Umwongereza ku ngufu, akaba ashakira amaramuko mu gusebya Perezida Kagame, atitaye ku kuba imyaka amaze muri uwo mwanda nta kindi yasaruyemo uretse umunuko. Anjan Sundaram, menya ko inyandiko zawe zinukira abazisoma, nk'uko nawe ubwawe uteye ishozi kubera umwanda mu mutwe no ku mubiri.

Urinda wivanga mu bibazo by'uRwanda, ibyabaye urudaca mu ntara ya Kasmir iwanyu, warabirangije? Nk'uko bisanzwe iyo turi mu bihe nk'ibi byo kunamira abacu bazize Jenoside yakorewe Abatutsi, abadukina ku mubyimba bazura umugara. Nguko uko tariki 11 Mata 2023, uyu 'Rutumivu' Anjan Sundaram yasohoye inyandiko mu kinyamakuru 'The New York Times', ashinja Perezida Kagame kuba'umunyagitugu ucuditse n'ibihugu byo mu burengerazuba bw'isi'.

Iyi nyandiko ya Sundaram irimo ubuswa no kwivuguruza biteye isoni. Wasobanura ute ukuntu umunyagitugu aba inshuti magara y'ibihugu by'Amarika n'Uburayi, kandi ngo ari byo ntangarugero muri demokarasi? Keretse niba ibyo bihugu nabyo bitegekeshwa igitungu, cyangwa se Satan ikaba ari inshuti y'Imana!

Anjan Sundaram aratanga ingero zigaragaza umubano mwiza hagati y'uRwanda n'ibihugu bikomeye ndetse n'imiryango mpuzamahanga ifite imbaraga ku isi. Izo ngero nizo rwose, uretse ko izo atazi ari zo nyinshi cyane. Arashaka gusobanura se ko uwo mubano ari igihembo cyahawe Perezida Kagame kubera 'igitugu'? Cyangwa ahubwo ibyo bihugu n'imiryango avuga, byashimye imikorere ya Perezida Kagame, maze bimushakaho ubucuti?

Anjan Sundaram agoreka amateka y'uRwanda agambiriye gusa kuyobya abatayazi neza. Urugero ni nk'aho avuga ko Perezida Kagame yagize uruhare muri Jenosideyakorewe Abatutsi, yirengagije ko yateguwe ikanashyirwa mu bikorwa n'ubutegetsi Perezida Kagame ubwe yarwanyije, ndetse iyo Jenoside ikaba yarahagaritswe n'ingabo za RPA yari abereye Umugaba Mukuru. ' Les faits sont têtus'.

Ukuri ntaho waguhungira, Bwana Sundaram.Inyandiko ya Anjan Sundaram yasamiwe hejuru n'ibigarasha n'abajenosideri, kimwe n'ababakomokaho. Urugero ni umuhungu wa Yuvenali Habyarimana, Jean Luc Habyarimana, wishyize ku Karubanda, ubwo yashyanukaga agasubiramo amateshwa ya Anjan Sundaram.Isi yose yagabye ibitero kuri Jean Luc Habyarimana, imwibutsa amarorerwa ise na nyina Kanziga bakoze.

Nk'aho yashimangiraga ko ngo Perezida Kagame yahinduye Itegekonshinga ngo agume ku butegetsi, abatari bake bamwibukije ko kuvugurura Itegekoshinga byavuye mu bushake bw'abaturage, bitandukanye n'ibyo ise Habyarimana yakoze mu mwaka w'1973, ubwo yafataga ubutegetsi amennye amaraso y'abo yasimbuye.

Bamubajije niba kwica Perezida Kayibanda n'abandi bategetsi biganjemo abakomokaga muri Gitarama, ari byo yita demokarasi yaranze ubutegetsi bwa se.Jean-Luc Habyarimana ati mu Rwanda nta bwisanzure muri politiki no mu itangazamakuru. Aha nahoabantu batabarika bamukurugutuye, bamubwira ko RTLM, Kangura, n'iindi bitangazamakuru bibiba amacakubiri , byashinzwe na se Habyarimana, nyina Agatha Kanziga ndetse na ba nyirarume, Zigiranyirazo na Sagatwa, bitagifite umwana mu Rwanda rwa none.

Kuba umwuzukuru wa Ntibazirikana(ise wa Yuvenali Habyarimana) biranze biramukurikiranye. Ese koko birakwiye ko mwene Habyarimana Yuvenali yishinga Umuhinde Anjan Sundaram, nawe akemeza ko Perezida Kagame 'ahejeje Abanyarwanda ishyanga', yirengagije ko Habyarimana we ahubwo yanavugaga ko nta mpunzi y'Umunyarwanda igomba gutahuka, kuko 'uRwanda ari ruko cyane, rumeze nk'ikirahure cyuzuye amazi'!

Tugarutse kuri Anjan Sundaram, uyu mugome afitiye uRwanda urwango rwihariye. Yabaye mu Rwanda ari umwinjira w'umugore Nathalie Blaquière wakoreraga Ishyirahamwe Mpuzamahanga ry'itangazamakuru 'Internews'.

Nguko uko abakozi ba Internews bamwitaga'Mario', bashaka kuvuga imburamumaro, ingirwamugabo y'imyaka 23, yinjiye umukecuru w'imyaka 53.

Anjan Sundaram yaje kwihindura umunyamakuru, atangira kohereza mu mahanga ibinyoma bisebya uRwanda, kugirango yigarurire imitima y'ibigarasha n'abajenosideri, maze areke gukomeza gutamikwa n'umugore.

Bidatinze, ihabara rya Anjan Sundaram ryaje kwirukanwa ku kazi kubera kwirirwa mu busambanyi aho gukora, umunsi ryabonetse rikaza rije gusebya uRwanda. Ryaje guhungira muri PNUD ribifashijwemo n'abandi banye Canada benewabo, ariko abakozi babanye muri Internews batanga amakuru ko adashobotse, naho arahirukanwa.Nathalie Blaquière na Anjan we baje kuva mu Rwanda, ariko biba imodoka 2 za Internews zaje kugurishirizwa muri Tanzaniya.

N'uyu munsi 'Internews' byarayigoye kongera kwemererwa gukorera mu Rwanda, kubera ko isura yayo yangijwe na Anjan n'ishoreke ye, nyamara mu mwimerere wa Internews, ryari ishyirahamwe rifitiye akamaro kanini Abanyarwanda.Ubwo inama ya CHOGM yari igiye kubera mu Rwanda, Anjan Sundaram ari mu bangiwe kuza gutara amakuru, kuko byari bizwi ko agenzwa no kwangiza.

Ngiyo rero inkomoko y'umujinya Anjan Sundaram afitiye uRwanda n'Ubuyobozi bwarwo, unatuma yinyuramo, agasohora inyandiko zerekana imitekerereze ye iciriritse.

Byarya menshi, ariko ayo gusebya Perezida Kagame ni indyankurye, kuko bigoye guhora utuka inka ngo'dore igicebe cyayo'!

The post Bayarya yabagoye, kuko guhora uhimbira Perezida Kagame ibirego ari umuzigo ubavuna cyane. appeared first on RUSHYASHYA.

Source : https://rushyashya.net/bayarya-yabagoye-kuko-guhora-uhimbira-perezida-kagame-ibirego-ari-umuzigo-ubavuna-cyane/?utm_source=rss&utm_medium=rss&utm_campaign=bayarya-yabagoye-kuko-guhora-uhimbira-perezida-kagame-ibirego-ari-umuzigo-ubavuna-cyane