Category: Uncategorized

Abinyujije ku rukuta rwe rwa Instagram Riderman yasangije abamukurikira ifoto iriho abana be batatu ayiherekeresha amagambo yuzuye amarangamutima avuga ko urukumbuzi yari afitiye abana be na Mama wabo ari rwinshi cyane kuko umunsi ku munsi yumvaga ari guhomba kuba atari kubabona bakura.

Ati”Kuva umunsi Yehova angirira ubuntu akampa umugisha usumba indi wo kwitwa Umubyeyi, nibwo bwa mbere nagiye kure y'umuryango wanjye igihe kinini.Urukumbuzi nari mfitiye ibi biremwa, n'umubyeyi wabyo rwari rwinshi cyane kuburyo iyo nabavugishaga kuri video numvaga nahita ntaha ako kanya. Nabonaga bari gukura umunsi k'uwundi ntari iruhande rwabo nkumva ndi gucikanwa n'ibintu byiza cyane pe'.

Riderman yakomeje avuga ko nubwo bitari bimworoheye yagombaga gusoza icyo yatangiye ati”Gusa nagombaga gusoza ibyanjyanye nkabona kugaruka mu Rwagasabo. Ninako byagenze.Umunsi ntaha ntibamvaga iruhande na gato, ubanza barakekaga ko nahita nongera ngacaho 🤠”.

Akomeza avuga ko byatumye arushaho kumva ubwitange bwa buri mubyeyi ujya mu kazi kure y'umuryango we aho atabasha kubonana n'abe umunsi k'uwundi.

Ati”Ndifuriza ishya n'ihirwe buri wese uri kure y'abe abashakira ubuzima. Imana ibane namwe, ibahe umugisha utagabanyije muhahe muronke. Ntibiba byoroshye ariko birashoboka hamwe na Nyagasani”.

Riderman ibi yabyanditse nyuma y'igihe yari amaze atari mu Rwanda kubw'impamvu z'akazi.

Source : https://umuryango.rw/imyidagaduro/article/urukumbuzi-rwari-rwose-riderman-yasazwe-n-amarangamutima-nyuma-y-igihe-atari

Mu gitondo cyo kuri uyu wa Mbere, Umuyobozi wa APR F.C yaganirije abakinnyi, abatoza ndetse n'abakozi b'iyi kipe, maze ababwira ko batishimiye uko barimo kwitwara muri Shampiyona nubwo kugeza ubu bari ku mwanya wa mbere.

Ni inama yabereye ku cyicaro cy'ikipe y'ingabo z'igihugu ku Kimihurura, aho Chairman w'Ikipe yatangiye asuhuza abantu bose bari mu nama aboneraho kubwira abakinnyi igitumye yifuza ko baganira, ababwira ko agenzwa no kubabwira ko Ubuyobozi bwa APR F.C, Abakunzi n' Abafana batishimye habe na gato.

Ati 'ndagira ngo mbere na mbere mbanze mbabwire ko tutishimye kubera uko muri kwitwara haba mu mikinire na discipline ibaranga ya buri munsi kuko byose niho bishingiye.

Murimo gutuma dutekereza ko twaba twaribeshye ku bushobozi bwanyu, nyamara muri abakinnyi beza kandi bashoboye, murimo kuduhatiriza gutangira kubashidikanyaho.'

Yongeye kwibutsa abakinnyi ko mbere yo kubazana muri APR hari habanje gusezererwa abakinnyi 17 kubera kudahozaho, Ikipe ihera hasi ishaka abandi bakinnyi(mwebwe).

Ati nubu nta kabuza nihatabaho kwisubiraho nubundi hari abazatandukana n'ikipe y' Ingabo z' Igihugu.

Mu gusoza ijambo rye Umuyobozi wa APR F.C yongeye kwibutsa abakinnyi intego z' APR F.C ko ari ugutwara ibikombe uhereye kubikinirwa hano mu Rwanda byose.

Ati 'ibyo murimo byose reka nibutse ko intego zacu(APR F.C) zidahinduka ni ugutwara ibikombe nk'uko muhora mubwirwa mu biganiro tugirana byose, kandi murabishoboye mu gihe mwaba mushyize umutima ku kazi mukagira na discipline mu byo mukora byose'

Yasoje agira inama bamwe mu bakinnyi asaba kwisubiraho bagakora akazi neza. Nanone, aboneraho gushima benshi bakorana umurava n' abazamuye urwego rwabo, abasaba gukomeza intego.

IVOMO: APR FC

Source : https://umuryango.rw/imyidagaduro/imikino/article/umuyobozi-wa-apr-fc-yanenze-bikomeye-imyitwarire-y-abakinnyi-muri-shampiyona

Inkuru y'ishinga ry'iri tsinda yasamiwe hejuru n'abakurikira imyidagaduro, buri wese yibaza icyo rigiye gukora cyane ko nubwo benshi muri bo basanzwe bazwi mu bikorwa bitandukanye by'imyidagaduro, ari ubwa mbere bari bagaragaye bahuje imbaraga.

Amakuru ahari n'uko iri tsinda rigiye gutangira gukora ibiganiro bivuga ku mibereho bwite y'abantu [Reality TV Show].

Ni ibiganiro bizajya bitunganywa na Ajalaja Stanley, umuhanga mu gutegura no gutunganya sinema ukomoka muri Nigeria wari umaze igihe i Kigali aho yari yitabiriye ibirori byo gutanga ibihembo bya Rwanda International Movie Awards.

Nyuma yo guhura na Isimbi Alliance wamamaye nka Alliah Cool bakaganira ku mishanga itandukanye, Ajalaja yakunze bikomeye igitekerezo cyo gukora 'Reality TV Show' mu Rwanda.

Byitezwe ko guhera muri Kamena 2023, Ajalaja azaba ari i Kigali aho azaba ari gufata amashusho y'ibiganiro bya mbere bizahuriramo aba bagore bamaze kwihuriza mu itsinda rimwe.

Uretse ibi biganiro, Ajalaja mu minsi mike yamaze i Kigali, yahavuye akoze umushinga wa filime nshya yakoreye Alliah Cool ikazajya hanze mu minsi ya vuba.

Ajalaja Stanley ufite ikigo gikora sinema kizwi nka 'Superstanfame' aherutse guhabwa igihembo na Rwanda International Movie Awards nk'uhiga abandi mu gutunganya filime ku Mugabane wa Afurika.

Uyu mugabo yayoboye filime zirimo Mr&Mrs Okoli, Boycott, Home & Away n'izindi.

Itsinda 'Kigali Boss Babes' rihuriyemo Gashema Sylvie, Queen Douce, Christella, Camille Yvette, Isimbi Model na Alliah Cool.

Source : https://umuryango.rw/imyidagaduro/article/bashaka-gutangiza-ikiganiro-cya-reality-tv-show-menya-byinshi-kuri-rya-tsinda

Ingabo z'Umuryango wa Africa y'Iburasirazuba (EACRC) zatangaje ko ubu hashize ukwezi hari agahenge hagati y'ingabo za leta n'inyeshyamba za M23 kandi izi zikomeje gusubira inyuma ziva aho zari zarigaruriye.

Nubwo hari agahenge, M23 ivuga ko itazashyira intwaro hasi niba leta itemeye ko baganira mu buryo butaziguye (direct), leta ishimangira ko itazaganira na M23. Ibi bituma impungenge zikomeza kuba nyinshi ku bihumbi amagana by'abahunze iyi mirwano.

Ku cyumweru izo nyeshyamba zavuye muri centre ya Tongo muri teritwari ya Rutshuru, nk'uko Gen Jeff Nyagah, umugaba mukuru w'izi ngabo z'akarere, yabibwiye abanyamakuru kuwa mbere i Goma.

Ibi biri mu muhate wo gufungura umuhanda Bunagana-Rutshuru-Rumangabo-Kibumba-Goma. Aha Tongo hahise hajya ingabo za Kenya.

Muri iki kiganiro n'abanyamakuru, Gen Nyagah yavuze ko muri uku kwezi inyeshyamba za M23 “zasubiye inyuma bigaragara” ziva aho zari zarafashe.

M23 isubira inyuma ijya he?

Nubwo hari agahenge, hari imirwano ya hato na hato ikomeza kuvugwa hano na hariya mu bice bitandukanye ahari M23.

Major Willy Ngoma, umuvugizi wa gisirikare wa M23 yabwiye BBC Gahuzamiryango ati: 'Ingabo za leta zikoresha abarwanyi ba FDLR, Nyatura, CODECO, APCLS…bakadutera aho turi umwanya uwo ariwo wose. Muheruka kumva ibyabereye i Kibumba.'

Ingabo za leta zihakana gukorana n'imitwe yitwaje intwaro kurwanya M23, nubwo ibyo byemejwe n'inzobere za ONU mu mwaka ushize.

Ingabo za EACRF zivuga ko imitwe itandukanye yitwaje intwaro ikomeje kugerageza guhungabanya umutekano muri iki gihe cy'agahenge.

Gen Nyagah yabwiye abanyamakuru ko iyo mitwe nayo bazayihagurukira. Ati: 'Hari imitwe irenga 100 yitwaje intwaro, niyo iteje umutekano mucye mu karere. Tugomba gukora ibishoboka kugira ngo iranduke.'

Willy Ngoma yabwiye BBC ko basubira inyuma bajya mu duce twagenewe, “aho n'abakuru b'ibihugu by'akarere bemeje ko tujya”.

Ati: “Nkanjye n'itsinda ryanjye turi i Mbuzi (muri Rutshuru). Ahandi baduhaye urugero ni i Bigega – Bigega ni muri 1km uvuye i Bunagana, Rutsiro, Chanzu na Runyoni munsi ya Sabinyo (Sabyinyo).

“Twemeye gusubira inyuma nk'uko twabisabwe, niyo mpamvu dusaba ko habaho ibiganiro”.

'Nta biganiro n'u Rwanda' – Muyaya

Leta ya Kinshasa ivuga ko M23 ari ingabo z'u Rwanda zihishe inyuma yayo.

Leta y'u Rwanda ihakana ko hari ubufasha cyangwa ikorana na M23, nubwo umwaka ushize ibyo byemejwe n'inzobere za ONU.

Kuwa mbere mu kiganiro n'abanyamakuru i Goma umuvigizi wa leta ya DR Congo, Patrick Muyaya, yabwiye abanyamakuru ko ibiganiro bidashoboka.

Yagize ati: “Ntawe uzadutegeka kuganira n'u Rwanda rwihishe inyuma ya M23. Inzira yonyine igomba gukurikizwa ni ukubahiriza ibyasabwe n'ibiganiro bya Nairobi”.

Naho Willy Ngoma we yagize ati: “Niba tutaganiriye [na leta] ntituzashyira intwaro hasi.”

Abasesenguzi bavuga ko bigikomeye ko agahenge hagati y'impande zombi karamba, kandi ko ingabo z'akarere -ubu ziri hagati y'abarwana – zidashobora kuhaguma iteka.

BBC

Source : https://umuryango.rw/amakuru/mu-mahanga/umutekano/article/leta-ya-rdc-yemeje-ko-nta-biganiro-izagirana-n-u-rwanda-mu-gihe-m23-nayo

Uyu mukobwa ukunda kumvikana cuyane avuga ibintu byamubayeho ariko bikaba ibitangaje ku babyumva yongeye guhishura byinshi ku buzima bwe bw'urukundo.

Ubwo yari mu kiganiro gitambuka kuri Youtube 'Love or Lies' yahishuye ko yigege kuryamana n'umukunzi we inshuro 27 ku munsi umwe.

Ati 'Twaryamanye inshuro 27, twari tukiri kumwe, byarabaye! Umunsi umwe nagiye kumusura turyamana inshuro 27.'

Umunyamakuru watunguwe n'iki gisubizo yamubajije niba koko ibyo avuga byarabaye umunsi umwe cyangwa ari iminsi myinshi, ati 'None se byari Marathon cyangwa mwari muri kurushanwa kuririmba halleluyah?'

Uyu mukobwa wanamamaye mu kumurika imideli nk'umunyamideli ubyibushye, mu kumusubiza agira ati 'Ntabwo byari Marathon, twamaranye umunsi wose twisanga byabaye. Twanyuzagamo tukaruhuka tukirebera filime, njye narabibaze zari inshuro 27.'

Uyu mukobwa w'imyaka 31 uri mu bakunzwe cyane ku mbugankoranyambaga yavuze ko icyo gihe nubwo yaryamanye n'umukunzi we inshuro 27 k'umunsi umwe uwo musore atigeze agera ku byishimo bye.

Source : https://umuryango.rw/imyidagaduro/article/monalisa-yatunguranye-avuga-ko-yaryamanye-n-umukunzi-we-inshuro-27-umunsi-umwe

Pasiteri Bizimungu niwe wabaye Perezida w'u Rwanda nyuma ya jenoside yakorewe Abatutsi kuva tariki 19 Nyakanga 1994,aho yabarizwaga mu ishyaka rya FPR INKOTANYI.

Urubuga rwa Wikipedia, rugaragaza ko Pasteur Bizimungu yavukiye mu cyahoze ari Gisenyi mu 1950, ndetse akaba yaranahoze mu ishyaka rya Perezida Juvenal Habyarimana mbere yo kwiyunga na FPR Inkotanyi.

Hagati y'umwaka wa 1980 na 1990, Bizimungu yari mu ishyaka rya MRND ndetse yari umuntu wa hafi wa Perezida Juvenal Habyarimana, muri icyo gihe akaba yaranakoze imirimo inyuranye irimo kuba umuyobozi mukuru w'icyahoze ari Electrogaz.

Mu 1990, Pasteur Bizimungu yagiye muri FPR nyuma y'uko umuvandimwe we wari umusirikare w'ipeti rya Colonel mu gisirikare cy'ingabo za Leta ya Habyarimana, yari yishwe [ Col. Mayuya ].

Muri icyo gihe, nibwo FPR yari itangiye ibikorwa bya mbere by'urugamba rwo kubohora u Rwanda.

Muri icyo gihe, Bizimungu nyuma y'urupfu rw'umuvandimwe we, yahise ahunga u Rwanda ajya kuba mu Bubiligi, aho yahise ashingwa iby'amakuru n'itumanaho muri FPR nk'ishyaka ryisuganyaga rishaka uko ryabohora igihugu.

Mu 1993, nyuma y'imyaka 3 ingabo za FPR zirwana n'ingabo za Leta y'icyo gihe, Pasteur Bizimungu yagize uruhare mu mishyikirano y'amasezerano y'amahoro ya Arusha n'ubwo Perezida Juvenal Habyarimana yishwe ibyari bikubiyemo bitarashyirwa mu bikorwa ahubwo Jenoside yari imaze igihe itegurwa igahita ishyirwa mu bikorwa. Nyuma y'ihagarikwa rya Jenoside rero niwe wahise aba Perezida.

Pasteur Bizimungu yagizwe Perezida ahanini bishingiye ku mwanya yari afite muri FPR Inkotanyi, no kuba yari yarakoze muri Guverinoma ya mbere ya Jenoside ayizi neza, akamenya n'amahame FPR Inkotanyi ishingiyeho.

Perezida Kagame yigeze gutangaza impamvu atahise aba Perezida nyuma ya Jenoside ati “Narababwiye nti njyewe sinshaka kuba Chairman, sinshaka kuba Minisitiri w'Intebe wungirije cyangwa uw'Ingabo wungirije. Ndashaka kuba umugaba w'Ingabo wungirije, mbabwira n'impamvu… Nababwiye nti numva nshaka kuba hafi cyane y'ingabo twari tumaze igihe dufatanya kurwana, ndashaka kwigumanira n'abarwanyi banjye, kuburyo nihagira n'ikintu cyaba tuba twizeye ko twongera tukarwana tukizera umutekano wacu. Narababwiye ngo sinshaka kuba Perezida, kuko Perezida agomba kuba ahugiye mu bindi bintu, nti ariko nimurebe amamiliyoni y'abantu ku mupaka [w'u Rwanda na Zaire], baracyafite intwaro kandi barimo kwisuganya, barimo gushaka kudutera bityo ntabwo naba Perezida ngo mbashe no gutangira kurwana nabo.

Icya kabiri narababwiye nti mureke duhitemo umuntu wakuriye hano, uzi abantu ba hano, umenyereye ikirere n'imitere ya hano mu Rwanda, njyewe ndumva ntabyiteguye bihagije. Ni uko kandi ndababwira nti hari ikintu gikomeye tugomba kubanza kurwana nacyo, aho bakidufata nk'abanyamahanga… Uko niko natekerezaga, naberekaga ko tugifite inshingano zo gushakisha umutekano uhamye, icya kabiri nkabereka ko amateka yanjye ashobora gutuma bitagira isura nziza ku bantu bamwe bari bakiri mu rujijo…'

Pasteur Bizimungu ku butegetsi bwe yagombaga gusubiza igihugu ku murongo, gucyura impunzi z'abanyarwanda zirenga miliyoni zari muri RDC,gushakira ubutabera imiryango yiciwe abayo muri jenoside yakorewe Abatutsi,kuzamura ubukungu n'ibindi.

Guverinoma ya mbere ya nyuma ya Jenoside yarahiye ku wa 19 Nyakanga 1994,ivuye mu biganiro byahuje amashyaka ya politiki atari yarijanditse muri Jenoside yakorewe Abatutsi. Ni ukuvuga ko ishyaka rya MRND na CDR atari yemerewe kugaragara mu buyobozi bushya.

Iyi Guverinoma yagiyeho nyuma y'iminsi mike Pasteur Bizimungu yemejwe nka Perezida wa Repubulika. Mu baminisitiri 17 bari bagize iyo guverinoma, umunani bari abo muri FPR Inkotanyi, batatu bo muri MDR, batatu bo muri PL, babiri bo muri PSD n'umwe wo muri PDC. Tariki 19 Nyakanga harahiye abaminisitiri 14, abandi bongerwamo tariki 20 Nyakanga.

Ni guverinoma yari igizwe n'abasivili hafi ya yose, mu kwereka abaturage ko basubijwe ubuyobozi, ingabo zikaberaho kubarinda nyuma yo kubabohora.

Inzibacyuho yashyizweho nyuma ya Jenoside yakorewe Abatutsi yagombaga kurangira mu 1999 ariko icyo gihe byageze u Rwanda rugihanganye n'ibibazo by'ingutu byiganjemo iby'umutekano bituma yongerwaho indi myaka ine.

Ibibazo by'ingutu Perezida Bizimungu yahuye nabyo

FPR Inkotanyi nyuma yo guhagarika Jenoside yakorewe Abatutsi, yabaye ku isonga ry'ibitekerezo byo kongera kubaka igihugu. Niryo shyaka ryari rifite ubwiganze haba muri Guverinoma no mu Nteko, bikaba akarusho ko ari naryo ryaturukagamo Perezida Bizimungu.

Icyakora ahagana mu 1997 hatangiye kuzamo umwuka mubi, bamwe mu bayigize bashinja bagenzi babo imikorere mibi irimo ruswa, icyenewabo n'ibindi.

Hari n'abataratinyaga kuvuga ko ibiri gukorwa birimo no kwigarurira imitungo y'abandi bikozwe n'abayobozi nibikomeza, u Rwanda rwa nyuma ya Jenoside ruzaba rubi kurusha urwa mbere yayo.

Bimwe mu byagaragaje kwikunda kw'iyi Guverinoma harimo ko Minisitiri w'Ububanyi n'Amahanga wa mbere nyuma ya Jenoside yakorewe Abatutsi mu 1994,Jean Marie Vianney Ndagijimana,yahawe amafaranga mu ntoki, ibihumbi amagana by'amadolari, ngo ajye mu mahanga asubukure ibikorwa bya za ambasade cyangwa afunguze inshya,agezeyo ayishyirira ku mufuka ntiyagaruka.

Ikindi gitangaje n'ukuntu mu 1998, nyuma y'imyaka ine Jenoside ihagaritswe,abagize guverinoma ya Rwigema batari barajwe ishinga no kubaka inzego z'igihugu ahubwo bicaye bagasaba ko leta yabagurira imodoka za Mercedes Benz zo kugendamo.

Kwegura kw'abagize guverinoma ya Bizimungu biri mu byamukomye mu nkokora, kuko guhera mu Ukwakira 1999 kugeza muri Gashyantare 2000, abaminisitiri batatu muri Guverinoma batakarijwe icyizere n'Inteko mu gihe abandi batatu batangiye gukurikiranwa n'ubutabera.

Kuva mu mpera za 1999 habaye impinduka zinyuranye kandi zitavuzweho rumwe mu bagize guverinoma.

Mu ntangiriro ya za 2000 havutse ikibazo cya politiki nyacyo ubwo tariki 06 z'ukwezi kwa mbere Joseph Sebarenzi wari ukuriye inteko ishingamategeko yeguraga bitunguranye.

Perezida Bizimungu yeguye hashize ibyumweru bitatu uwari Minisitiri w'Intebe Pierre Celestin Rwigema na Guverinoma ye nabo beguye. Bashinjwaga imikorere mibi harimo no kunyereza amafaranga ya Leta.

Kubera ko Guverinoma yashyizweho iyobowe na Faustin Twagiramungu, yari irimo benshi mu bahoze mu butegetsi bwa Habyarimana,benshi bapingaga bagenzi babo by'umwihariko abo muri FPR INKOTANYI.

Perezida Kagame yavuze ko hari umuyobozi yigeze kubaza impamvu umwanya we wose awumara mu bintu bijyanye n'inyungu ze bwite, undi amusubiza ko 'umuyobozi w'umukene nta muyobozi uba umurimo'.

Nko mu 1996 ubwo Kagame wari Visi Perezida akaba n'umugaba w'ingabo yajyaga muri Leta Zunze Ubumwe za Amerika, Washington Post yanditse inkuru imwita 'Umuyobozi nyawe wa Guverinoma y'u Rwanda”. Byateje umwuka mubi mu butegetsi bw'u Rwanda.

Bivugwa ko hari n'abayobozi bakuru benshi bajyaga basura u Rwanda, bakavuga ko bashaka guhura na Visi Perezida Kagame aho guhura na Perezida cyangwa Minisitiri w'Intebe, bikabarakaza.

Perezida Bizimungu yashinjwe kugambanira Kagame

Mu 1996, Museveni yasuye u Rwanda, maze mu ruzinduko rwe ajyana na Perezida Bizimungu kuri Kaminuza y'u Rwanda I Huye aho bari bagiye kuganira n'abanyeshuri.

Nyuma byamenyekanye ko mu rugendo rw'amasaha ane bakoranye, kugenda no kugaruka, bombi batangiye ibiganiro byo kugambanira Perezida Kagame, wari visi perezida icyo gihe. Aha ngo ni naho ibibazo bya Bizimungu ku butegetsi byatangiriye.

Pasiteri Bizimungu yaje guhangana n'abadepite

Nubwo Perezida Pasteur Bizimungu yari afite ibindi ashinjwa, kimwe mu byamuteranyije na FPR Inkotanyi kugeza ubwo ahatiwe kwegura, harimo gushaka kwitambika iperereza rya Komisiyo y'Inteko ku bayobozi muri Guverinoma.

Hari itegeko riha ububasha abadepite bwo kugenzura Guverinoma ryari rimaze imyaka isaga itatu Perezida Bizimungu yaranze gusinya, riza gusinywa na Perezida w'Inteko Ishinga Amategeko ku gitutu cy'abadepite.

Byarakaje abadepite na bamwe muri FPR, bikubitiraho ko ubwo Guverinoma ya Rwigema yeguraga, hari abo Perezida Bizimungu yashakaga ko bagaruka muri Guverinoma ya Bernard Makuza, ariko abandi bayobozi bakabyanga kuko abo baminisitiri bari bafite ibyo bashinjwa.

Bizimungu ntiyahishe ko atishimiye kwegura kwa Pierre-Célestin Rwigema, ashinja abagize guverinoma gusuzugura uyu wari minisitiri w'intebe.

Ubwo yarahizaga Guverinoma nshya ya Makuza, Perezida Bizimungu yavuze ijambo ririmo uburakari, abwira abadepite ko bihaye ububasha ubwo batangizaga gahunda yo guhamagaza abagize Guverinoma kugeza beguye.

Ati 'Bariya baminisitiri bagiye ku buryo budafututse, ntihazagire n'uvuga ngo hari umujura urimo. Ntabwo ari abajura. Ntabyo mwerekanye ahubwo nimwe muri kuzana akaduruvayo mu gihugu.'

Yakomeje agira ati “Mwirukanye ba Minisitiri, mwavanyeho Guverinoma, Perezida w'Inteko nimwe mwamwirukanye, na Perezida wa Repubulika murashaka kumwirukana. Hari ikibazo rero mu mikorere y'Inteko, ntabwo ari mwe banyarwanda b'abatagatifu”.

Mu 1998 ngo nibwo hatangiye igisa nko kugenzura Bizimungu harimo n'icyemezo cyo gutandukanya umwanya w'umukuru w'igihugu n'umukuru w'ishyaka.

Kwegura kwa Pasiteri Bizimungu n'akaga yahuye nako nyuma

Tariki 22 Werurwe 2000 habaye inama idasanzwe y'ubuyobozi bukuru muri FPR Inkotanyi, bucyeye bwaho tariki 23 Perezida Bizimungu ashyikiriza Inteko Ishinga Amategeko ibaruwa ivuga ko yeguye ku bushake.

Nyuma yo kwegura, Bizimungu yavuzweho ibyaha bitandukanye birimo ruswa, kwambura abantu amasambu, kunyereza imisoro n'ibindi.

Amaze gutakaza umwanya wa Perezida wa Repubulika yari amazeho imyaka itandatu, habura imyaka 3 gusa ngo amatora arangiza inzibacyuho abe,Pasiteri Bizimungu yibwiye ko gushinga ishyaka ari andi mahirwe yo kumusubiza ku butegetsi.

Yumvaga ko byanze bikunze ashinze ishyaka rye ryagira uburemere bwa Politiki agendeye ku kizere n'imibare ya Politiki. Yari afite ikizere ko hari rubanda uru n'uru rwari kumujya inyuma agatsinda amatora.

Iyo niyo mpamvu yahise yiyemeza gushinga ishyaka rye yise “PDR-Ubuyanja”.

Ishyaka PDR Ubuyanja ryari rije kongera impungenge ku hazaza h'ubutegetsi bwa FPR, ikiyongera ku bibazo yagombaga guhangana nabyo, utibagiwe ko hari n'impungenge ko ryazagarura mu buryo buteruye amoko nk'uburyo bwo kugena icyerekezo n'uburemere bwa Politiki.

Muri kiriya gihe, mu Rwanda ndetse n'ahandi hanyuranye ku isi hari hafungiye abarenga ibihumbi 100 bagize uruhare muri Jenoside yakorewe abatutsi mu 1994. Ibikomere bya Jenoside ku bayirokotse byari bikiri bibisi.

Iki gihe kandi Leta yavugaga ko hari izindi Leta zikomeye zigitera inkunga igisilikare n'abanyapolitiki bari basize bakoze Jenoside yakorewe abatutsi ngo bagaruke ku butegetsi birukanweho na FPR, ari nayo yahagaritse iyi Jenoside.

Nyuma y'umwaka umwe yeguye,Pasiteri Bizimungu mu 2001 yatawe muri yombi ari iwe ubwo yari agiye kugirana ikiganiro n'abanyamakuru ngo ababwire ku ishyaka rishya yari yashinze ryitwa PDR-Ubuyanja.

Muri Mata 2002, Pasteur Bizimungu yarafashwe arafungwa ashinjwa kunyereza umutungo wa rubanda, kwigomeka no kwangisha rubanda ubutegetsi.

Ibi byaha byaje kumuhama muri 2004 ahanishwa igifungo cy'imyaka 15. Ni igihano cyari burangire muri 2017, ariko yaje guhabwa imbabazi na Perezida wa Repubulika taliki 06/04/2007.

Kuva icyo gihe,Bizimungu aba i Kigali mu buzima buri kure ya politiki, ku mpamvu zitazwi neza.

Pasteur Bizimungu, afite agahigo ko kuba ariwe Perezida wayoboye u Rwanda akava k'ubutegetsi akaba akiriho.

Source : https://umuryango.rw/amakuru/mu-rwanda/politiki/article/ibyaranze-ubutegetsi-bwa-bizimungu-pasteur-n-ibibazo-by-ingutu-yahuye-nabyo

Ku mbugankoranyambaga hamaze iminsi hacicikana inkuru ya Achraf Hakim n'uwahoze ari umugore we Hiba Abouk uherutse kwaka gatanya yamara kuyihabwa agasaba ko bagabanywa imitungo ariko akamenyeshwa ko uwari umugabo we nta mutungo n'umwe afite umwanditseho.

Ni inkuru yabaye ikimenyabose benshi bagaragaza ko bishimiye cyane ibyo Hakim yakoze ariko n'abandi barabinenga bavuga ko ari ikimenyetso kigaragaza ko nta kwizerana kwari mu muryango wabo.

Source : https://umuryango.rw/imyidagaduro/article/amafoto-reba-uburanga-bwa-hiba-abouk-wahoze-ari-umugore-wa-hakim-achraf

Igihugu cya Nigeriya cyabaye igihugu cya 2 muri Afurika cyemeje urukingo rwa Malariya nyuma y'uko igihugu cya Ghana kibimburiye ibindi kwemeza uru rukingo.

Uru rukingo rushya rwa Malariya rwavumbuwe n'abahanga muri siyansi bo muri kminuza ya Oxford

Nigeriya yateye iyi ntambwe nyuma y'iminsi mike Ghana nayo yemeje urukingo rwa (R21) nk'urukingira marariya,ibimburira ibindi ku isi.

Mojisola Adeyeye ukuriye urwego rushinzwe inking n'imirire muri Nigeriya yavuze ko urukingo rwa Marariya ruzakoreshwa mu kuyirinda abana bari hagati y'amaezi 5 n'imyaka 3 nk'ikiciro ikunda kwibasira.

Kwemeza urwo rukingo ngo ntibyatunguranye cyane kuko rwemejwe nyuma yo kurugerageza kenshi kandi rugatanga ikizere ku kigero cya 80% cyo gukingira Marariya.

Kugeza ubu Nigeriya nicyo gihugu gikunze kwibasirwa na Malariya kurusha ibindi muri Afurika no ku isi , kuko habarurwa umubare mu nini w'abo ihitana.

Malariya yica byibura abantu 6000 ku isi buri mwaka, kandi benshi muri bo biganjemo abana, bakomoka muri Afurika yo munsi y'ubutayu bwa Sahara.

Source : https://umuryango.rw/amakuru/mu-mahanga/ubuzima/article/nigeriya-nayo-yemeje-urukingo-rwa-malariya-nyuma-ya-ghana-yabimburiye-ibindi-ku

Source : https://umuryango.rw/amakuru/mu-rwanda/umutekano/article/umujyi-wa-kigali-wiyemeje-guhangana-n-ikibazo-cy-abajura-bamaze-iminsi

Abashinjacyaha bashinje umusaza w'umuzungu w'imyaka 84 wo mu mujyi wa Kansas, muri Leta ya Missouri,muri Amerika kuba yararashe umwana w'Umwirabura amuziza kuvuza inzogera yo ku muryango itari yo ubwo yari agiye gucyura abavandimwe be.

Andrew Lester arashinjwa icyaha cyo gukomeretsa mu rwego rwa mbere, gishobora guhanishwa igifungo cya burundu, ndetse n'icyaha cyo gukoresha nabi intwaro ubwo yarasiraga umwana witwa Ralph Yarl w'imyaka 16, ku muryango w'urugo rwe, ahagana mu ma saa yine z'ijoro ryo ku wa kane ushize.

Umushinjacyaha Zachary Thompson yabwiye abanyamakuru ati: “Nshobora kubabwira ko muri iki kirego harimo n'irondaruhu.”

Yongeyeho ko ariko, Lester ataregwa icyaha cy'urwango kandi inyandiko zimurega ntizisobanura neza icyaha gishingiye ku ironndaruhu

Abashinjacyaha bavuga ko Lester yarashe amasasu abiri ayanyujije mu muryango w'ikirahure akoresheje imbunda ya 32-caliber revolver.

Bwana Thompson yavuze ko Ralph warashwe ku mutwe no ku kuboko, atarenze imbibi ndetse Bwana Thompson akomeza avuga ko bigaragara ko nta guterana amagambo hagati yabo.

Ibitangazamakuru by'aho byatangaje ko uyu mwana yabwiye polisi yamusuye mu bitaro aho yavuriwe ko uyu mugabo yamubwiye ngo: 'Ntiwegere hano.'

Kuri uyu wa mbere,umuryango w'uyu mwana wavuze ko arwariye mu rugo.

Source : https://umuryango.rw/amakuru/mu-mahanga/umutekano/article/umusaza-w-umuzungu-yarashe-umwana-muto-w-umwirabura-amuziza-kuvuza-inzogera-y