Category: Uncategorized

Kuri uyu wa Kabiri saa tatu z’ijoro ni bwo umuriro uraka kuri Stamford Bridge hagati ya Real Madrid na Chelsea mu mukino wa 1/4 muri Champions League, umukino ubanza wabereye kuri Santiago Bernabeu aho Real Madrid yari yatsinze ibitego 2-0.

Ese birashoboka ko Frank Lampard uri mu bihe bibi n’abasore be bakurira umusozi ugoye bagatsinda Real Madrid? Igisubizo ni ibiragoye. 

Carlo Ancelotti muri Champions League y’umwaka ushize, yatwaye igikombe akuyemo Paris Saint-Germain, Chelsea, Manchester City ndetse no ku mukino wa nyuma akubita Liverpool. 

Kuva Chelsea yakwirukana Grahm Potter bakazana Frank Lampard w’umusigire,   nta mukino n’umwe aranganya cyangwa ngo atsinde, yose aratsindwa kuko amaze gukina imikino 3 harimo uwa Champions League n’indi 2 ya Premier League. 

Kuba Chelsea mu mpera z’iki cyumweru yaratsinzwe na Brighton, byayishyize mu mwanya mubi wo kwitegura ikipe ikomeye nka Real Madrid imaze gutwara ibikombe 14 bya Champions League bari gukinira. 

Iyi kipe yambara ubururu yageze muri 1/4 ikuyemo Borussia Dortmund, umukino ubanza bari batsindiwe mu Budage igitego 1-0 bageze mu Bwongereza bahita basezerera ikipe bayitsinda ibitego 2-0 ariko ibi biragoye kuri Real Madrid.

Kuba wasezerera Real Madrid uvuye inyuma ntibyoroshye, yego ushobora gutsinda ibitego 2 ariko nta bushobozi wabona bwo gufata ba rutahizamu b’iyi kipe ngo barangize umukino nabo batakwinjije igitego. 

Mu mukino ubanza ubwo abakinnyi ba Real Madrid bushimiraga intsinzi

Real Madrid mu nshuro 19 bamaze gukina batsinze ibitego 2 cyangwa birenzeho mu mukino ubanza muri Champions League bashoboye gukomeza inshuro 18. Ikipe yashoboye kuva inyuma igatsinda Real Madrid ikanayikuramo kandi bayitsinze ibitego bitari munsi ya 2 ni Monaco gusa yabikoze muri Champions League ya 2003-2004.

Nk’uko The Sun ibyandika nta kipe iratsindira Chelsea kuri Stamford Bridge inshuro 2 mu mikino ya Champions League, Real Madrid yabikoze bwa mbere mu mwaka ushize w’imikino. 

Ikindi wamenya ni uko Chelsea mu mikino 7 iheruka yo gukinamo muri Champions League iyo babaga batsindiwe hanze bamaze gukomezamo inshuro 5, bivuze ko bazaga bagatsindira mu rugo mu mukino wo kwishyura. 

Imikino ya hafi abantu bibuka ikipe ya Chelsea yabikoreyemo ni uwa Napoli muri Champions League ya 2011-12 n’uwa Paris Saint-Germain muri 2013-14.

Iyi Chelsea igiye gukina uyu mukino imaze imikino 6 idatsinda kandi ibi byaherukaga mu 1995 aho bamaze imikino 7 bataratsinda ariko n’ubundi uyu munsi ishobora kurara yuzuye. 

Rutahizamu wa Chelsea ufite ibitego byinshi muri uyu mwaka w’imikino ni Kai Havertz afite ibitego 9 naho uwa Real Madrid umaze gutsinda ibitego byinshi ni Karim Benzema amaze gutsinda ibitego 25 kandi mu mikino 5 iheruka amaze gutsindamo ibitego 7. 

Chelsea niramuka itsinzwe, umwaka wayo uraba urangiye kuko ntacyo iraba ikirwanira muri uyu mwaka w’imikino. Kugeza ubu muri Premier League, iyi kipe yambara ubururu ni iya 11 n’amanota 39 kandi nta rindi rushanwa ikirimo.

Abakinnyi 11 bashobora kuza kubanzamo ku ruhande rwa Chelsea iri mu rugo ni Kepa; Chalobah, Silva, Fofana; James, Kovacic, Fernandez, Kante, Cucurella; Havertz na Felix. 

Ku ruhande rwa Real Madrid abitezwe ko bashobora kuza kubanzamo ni: Courtois; Carvajal, Militao, Alaba, Camavinga; Kroos, Modric, Valverde; Rodrygo, Benzema na Vinicius.

NGOLO Kante witezweho kuza gufasha Chelsea

Ni irushanwa rizaba taliki 30 Mata muri uyu mwaka, rizabera mu gace ka Rukoba mu gihugu cya Tanzania. Rubare Forest Train Run yateguwe n’ikigo cya Victoria Events Organizer, iki ni ikigo kigenga gikorera muri Tanzania aho gikora ibikorwa byo kumenyakanisha ndetse bikamamaza  n’ubukerarugendo  bwo mu gihugu cya Tanzania muri rusange.

Iri rushanwa rifite intego zo kwamamaza ndetse no kumenyekanisha ibikorwa by’ubukerarugendo byo mu gace ka Rubare muri Tanzania, binyuze mu bikorwa bya siporo ndetse n’ibindi. Abazasiganwa ku maguru muri Rubare Forest Train Run bazagenda ibirometero 16, bazahagurukira ahitwa kuri Sunrise bitch pub muri Rukoba ubundi basoreze ahitwa Kalobera beach ku nkombe za Lake Victoria.

Family Sports Club yo mu Rwanda izitabira iri rushanwa iyobowe  na Mukasa Nelson, ndetse ni nawe uzajya kuyihagararira  muri Tanzania. Mukasa Nelson asanzwe akora ibikorwa bitandukanye mu Rwanda, cyane cyane ibifite aho bihuriye na siporo. 

Yashinze umuryango witwa “Children and Youth Sports organization”, uzamura impano z’abana bakiri bato muri siporo zitandukanye ndetse ukanabatoza kugira siporo umuco. Uyu muryango kandi urwanya ibiyobyabwenge, agakoko gatera SIDA, ihohoterwa ry’abana b’abakobwa muri siporo ndetse unakoresha siporo abagore batwite.

Mukasa Nelson ari mu bashinzwe gutegura Car Free day ndetse yagiye ahabwa ibihembo by'indashyikirwa haba mu Rwanda, muri Afurika y’Iburasirazuba ndetse n’ahandi. 

Mukasa Nelson ni umwe mu bamaze igihe muri Siporo zihuza abantu benshi 

Nelson yatumiwe na Tanzania kubera ibikorwa byo gukora muri siporo rusange 

Umukinnyi mpuzamahanga w’umunyarwanda, Rafael York yagize imvune yo kubabara kw’inyama yo mu itako (hamstring) aho azamara hanze y’ikibuga ibyumweru 4.}}

Ni imvune yagize tariki ya 10 Mata 2023 mu mukino wa shampiyona y’icyiciro cya kabiri aho ikipe ye ya Gefle yatsindaga Helsingborg 1-0.

Byatumye uyu mukinnyi ukina mu kibuga hagati ariko asatira adasoza umukino w’umunsi wa 2 w’iyi shampiyona kuko yavuyemo ku munota wa 30.

Ni imvune yatumye atagaragara ku mukino w’umunsi wa 3 wakinwe ejo hashize wo bari basuye Jönköpings Södra ikanabatsinda ibitego 2-1.

Biteganyijwe ko uyu musore agomba kumara hanze y’ikibuga ibyumweru 4 yitabwaho n’abaganga akabona kugaruka mu kibuga.

Nyuma y’umunsi wa 3, Gefle IF iri ku mwanya wa 6 n’amanota 6, Öster ya mbere ikagira 9.

Rafael York yagize imvune izatuma amara ibyumweru 4 hanze y’ikibuga

Kuva ku munsi w’ejo hashize ku mbuga nkoranyambaga hakwirakwiye ifoto ya bamwe mu bagize itsinda Tuff Gang bari kumwe n’umuraperi Ish Kevin bamwe batangira kwemeza ko yaba yamaze kwinjira muri iri tsinda ry’abaraperi.

Ni ifoto yateje urujijo ku mbuga nkoranyambaga, Fireman, Bulldogg na P FLA bari kumwe n’umuraperi Ish Kevin ndetse benshi bemeza ko na we yamaze kuba umwe mu bagize iri tsinda.

Benshi bagiye bagaragaza ibitekerezo bitandukanye aho bamwe bavuze ko ntacyo byaba bitwaye abandi bagaragaza ko injyana uyu musore aririmbamo idahuye n’amajwi y’aba baraperi bomoye imitima ya benshi.

ISIMBI mu gushaka kumenya byinshi kuri iyi foto, yagerageje kuvugana na Fireman utifuje kuvuga byinshi ariko yavuze ko ari akazi bari barimo iyo foto ifatwa.

Ati “tubirimo, ni akazi.”

Abajijwe niba Ish Kevin na we ashobora kuzakirwa mu bagize itsinda Tuff Gang, yagize ati “igihe icyo ari cyo cyose.”

Iri ni itsinda ryakunzwe cyane kuva 2008 bitewe n’indirimbo bahangaga zirimo ubutumwa bwubaka kandi bukora ku buzima bwa benshi banyuramo buri munsi.

Amajwi yabo ni kimwe mu byafashaga iri tsinda ryari rigizwe na Jay Polly (witabye Imana), Bulldogg, Green P (uba Dubai), Fireman na P FLA kwiyongerera igikundiro mu bakunzi babo.

Kubera ibibazo byo kutumvikana, Tuff Gang yari yarakunzwe mu ndirimbo nka “Inkongoro y’Umushimusi”, “Gereza”, “Amaganya” n’izindi yaje kumera nk’isenyutse.

Mu ntangiriro z’uku kwezi nibwo hagiye hanze amashusho y’abaraperi batatu P FLA, Bulldogg na Fireman bari muri studio bivugwa ko bari gukora ku mushinga ‘Mixtape’ yabo barimo gufashwa na Davydenko.

Ni umushinga bivugwa ko watangiye mbere ariko uza gukomwa mu nkokora n’urupfu rwa Jay Polly witabye Imana muri Nzeri 2021.

Byitezwe ko ijwi rye rizumvikanamo nubwo yitabye Imana kimwe na Green P ubu usigaye uba Dubai.

Ifoto ya Tuff Gang irimo Ish Kevin (wa kabiri uturutse ibumoso) yavugishije benshi

Tuff Gang ya kera

Jean Paul Nkurunziza, umunyamakuru w’imikino akaba n’umuvugizi wa Rayon Sports, yashyize hanze amatariki y’ubukwe bwe na Gogo bamaze igihe bakundana.

Biteganyijwe ko ubu bukwe buzaba tariki ya 2 Nyakanga 2023, aho buzabera n’amasaha yabwo bikaba bizamenyekana mu minsi ya vuba.

Bagiye gukora ubukwe nyuma y’uko ku mugoroba wo ku wa Gatatu tariki ya 28 Ukuboza 2022 muri Quiet Heaven Garden, Jean Paul Nkurunziza yambitse impeta ya fiançailles Nkusi Goreth (Gogo) amusaba ko igihe basigaje ku Isi bazakimarana undi aremera.

Nkurunziza Jean Paul asanzwe ari n’umunyanyamakuru w’imikino ubimazemo igihe aho akorera Isango Star & TV amazeho imyaka itari mike.

Nkurunziza Jean Paul agiye gukora ubukwe na Gogo

Biravugwa ko amafaranga abanyamuryango ba FERWAFA bari bategereje gutera imirwi yinjiye muri iri shyirahamwe kubera ikipe y’igihugu bitakibaye ko ahubwo azakoreshwa mu kunganira ayo Minisiteri yashoraga mu Mavubi.

Amakuru avuga ko umuyobozi w’ishyirahamwe ry’umupira w’amaguru mu Rwanda, Nizeyimana Mugabo Olivier yemereye abanyamuryango ko hari amafaranga agera kuri miliyoni 360 yaje avuye muri FIFA kubera imikino y’Amavubi iyi mpuzamashyirahamwe y’umupira w’amaguru ku Isi yerekanye (FIFA TV Rights).

Yari yabemereye ko bazayagabana ndetse bikazanozwa mu mwiherero w’abanyamuryango uzaba tariki ya 22 na 23 Mata ugamije gukemura ibibazo biri muri FERWAFA.

Gusa yari yababwiye ko miliyoni 160 zo zizajya mu iterambere ry’umupira w’abana (development) bo bakagabana miliyoni 200.

Nizeyimana Olivier yakoresheje inama komite nyobozi ya FERWAFA ngo ibyemeze ariko babitera utwatsi bavuga ko bo bumva yose yajya mu iterambere ry’umupira w’abana.

Uku kutumvikana icyo agomba gukoreshwa bivugwa ko bahisemo kwitabaza Minisiteri ya Siporo ngo ibagire inama.

Amakuru ISIMBI yamenye ni uko Minisiteri ya Siporo yabujije FERWAFA kuba yatanga aya mafaranga kuko yinjiye kubera ikipe y’igihugu bityo ko azakoreshwa mu kuyunganira andi ashyirwe mu iterambere ry’abakiri bato.

Amakuru avuga ko Olivier atarava ku izima we yumva yagafashije abanyamuryango kuko birya bakimara ngo amakipe abeho neza ndetse n’ikipe y’igihugu ikabona abakinnyi babaturutsemo, yumva hari icyo bagahawe.

Amafaranga abanyamuryango ba FERWAFA bagombaga kugabana yajemo ibibazo

Ahagana saa Munani n'Igice zo ku wa Mbere, tariki ya 17 Mata 2023, ni bwo polisi yeretse itangazamakuru uyu musore w'imyaka 22 ukekwaho kwiba aya mafaranga umukoresha we.

Sinjyeniyo, ukekwaho kwiba uyu mubyeyi Nyirakanani, yari asanzwe amukorera akazi ko kumutwarira imizigo y'ibicuruzwa asanzwe acururiza muri Quartier Matheus, ayishyira mu modoka z'abakiliya. Ku wa Gatanu, tariki 15 Mata 2023, ni bwo yibye ayo mafaranga, afatwa bukeye bwaho ku wa Gatandatu.

Gusa, uyu musore yatawe muri yombi amaze gukoresha ibihumbi 470 Frw aho yari yamaze kuyaguramo inkweto, igikapu, telefone n'imyenda ku buryo yasubije 1,430,000 Frw gusa.

Nyirakanani Antoinette yabwiye itangazamakuru ko uyu musore yamwibye ubwo yari agiye mu bwiherero, anashimira polisi yahise imufata.

Yagize ati 'Yari umukozi wanjye, ari umuntu umfasha mu bucuruzi bw'ibikoresho byo mu rugo bimwe biba bimanitse, haza umukiliya akurira akabimuha. Haje umukiliya aranyishyura, noneho ndibagirwa nsiga urufunguzo aho mbika amafaranga, njya mu bwiherero ariko we yari hanze rero yahise yinjira atwara miliyoni ebyiri zarimo.'

Yakomeje avuga ko akimara kwiba ayo mafaranga yahise amubura biba ngombwa ko ahita ajya gutanga ikirego kuri RIB, na yo itangira igikorwa cyo kumushakisha.

Umuvugizi wa Polisi mu Mujyi wa Kigali, CIP Twajamahoro Sylvestre, yabwiye itagazamakuru ko uyu musore ukekwaho ubujura yafatiwe mu Karere ka Kayonza, mu Ntara y'Iburasirazuba.

Ati 'Uyu mubyeyi yibwe tariki 15 Mata 2023, yibwa n'umukozi we. Amaze kuyiba yacikiye mu Karere ka Kayonza, agezeyo nyuma yo gutanga amakuru habayeho gukorana n'inzego polisi yo mu Karere ka Nyarugenge n'iyo mu Karere ka Kayonza, hatangwa amakuru arafatwa. Yafatanywe 1,430,000 Frw kuko andi yari yamaze kuyakoresha.'

Yongeyeho ko uyu musore agiye gushyikirizwa Ubugenzacyaha kugira ngo akurikiranwe ku byaha ashinjwa, aboneraho gusaba abacuruzi kujya birinda kurarana amafaranga bacuruje mu rwego rwo kwirinda ko bayibwa.

Ubwo Polisi y’Igihugu yari igiye gusubiza Nyirakanani Antoinette amafaranga ye

Nyirakanani Antoinette ntiyiyumvishaga ko ashobora kongera kubona amafaranga yibwe

Sinjyeniyo Claude wibye aya mafaranga, yeretswe itangazamakuru

Bimwe mu byo Sinjyeniyo yaguze mu mafaranga yari amaze gukoresha

Umukuru w'Igihugu na Madamu Jeannette Kagame bagiriye uruzinduko rw'akazi muri Bénin hagati ya tariki 15-16 Mata 2023. Ni uruzinduko bari batumiwemo na Patrice Talon uyobora Bénin.

Muri urwo ruzinduko rwari rugamije gushimangira umubano usanzwe hagati y'ibihugu byombi, nibwo Perezida Kagame yatumiye Patrice Talon ngo nawe azaze i Kigali gusura u Rwanda n'Abanyarwanda.

Ibiro by'Umukuru w'Igihugu muri Bénin, byatangaje ko bizaba bigamije gushimangira imibanire y'ibihugu byombi.

Muri uru ruzinduko Perezida Kagame yari kumwe n'abayobozi mu nzego zitandukanye, barimo Minisitiri w'Ububanyi n'Amahanga n'Ubutwererane, Dr Vincent Biruta; Minisitiri w'Ubucuruzi n'Inganda, Dr Ngabitsinze Jean Chrysostome; Minisitiri w'Ibidukikije, Dr Mujawamariya Jeanne D'Arc; Umuyobozi Mukuru wa RDB, Clare Akamanzi n'abandi.

Ni abayobozi kandi basinyanye na bagenzi babo bo muri Bénin amasezerano anyuranye y'ubufatanye mu ngeri zitandukanye zirimo ikoranabuhanga, iterambere rirambye, guteza imbere inganda, ubukerarugendo, ishoramari, ubucuruzi n'ubuhinzi ndetse n'umutekano.

U Rwanda na Bénin bisanzwe bifitanye umubano mu ngeri zirimo ikoranabuhanga, ubucuruzi, kwita ku butaka, kubyaza umusaruro ibijyanye n'imbaho n'amabuye azwi nka granite akorwamo amakaro n'ibindi. Ibihugu byombi byakuyeho viza mu koroshya imigenderanire.

Perezida Kagame yatumiye mugenzi we, Patrice Talon i Kigali