Category: Uncategorized

Mu rwego rwo gukomeza guteza imbere ubuhinzi n'ubworozi by'umwuga bitanga umusaruro ufatika, Minisitiri w'Intebe w'u Rwanda, Dr Justin Nsengiyumva, yasabye ko urubyiruko rwize ibijyanye n'ubuhinzi n'ubworozi rubyazwa umusaruro mu buryo bufatika, binyuze mu kurufasha kwishyira hamwe rugashyirwamo imishinga minini ishobora guhindura ubukungu bw'igihugu.

Yabigarutseho mu nama yiga ku iterambere ry'ubuhinzi n'ubworozi, aho yagaragaje ko u Rwanda rufite urubyiruko rufite ubumenyi n'ubushobozi buhagije, ariko rukunze guhura n'imbogamizi zo kubura igishoro n'imirima minini, bigatuma rudatanga umusaruro ukwiriye.

Dr Nsengiyumva yavuze ko kwihuza kw'urubyiruko mu makoperative cyangwa mu matsinda y'imishinga minini byatuma rubona uburyo bwo kugera ku bikoresho bigezweho, ku masoko no ku nguzanyo zorohereza ishoramari, bityo ubuhinzi bukava ku rwego rwo kwitunga bukagera ku rwego rw'ubucuruzi.

Yongeyeho ko Guverinoma ikomeje gushyira imbaraga mu gushyigikira imishinga y'urubyiruko, cyane cyane iyibanda ku buhinzi n'ubworozi bugezweho, harimo n'ikoreshwa ry'ikoranabuhanga, kuhira imyaka no gutunganya umusaruro.

Minisitiri w'Intebe yasabye inzego z'ibanze n'abafatanyabikorwa mu iterambere gufasha uru rubyiruko kubona amahugurwa ahoraho n'ubujyanama, kugira ngo imishinga yabo irusheho kuramba no gutanga umusaruro ugaragara.

Yasoje ashimangira ko kubyaza umusaruro urubyiruko rwize ubuhinzi ari imwe mu nkingi zikomeye zo kwihutisha iterambere rirambye n'umutekano w'ibiribwa mu gihugu.

Source : https://kasukumedia.com/guverinoma-yu-rwanda-irasaba-urubyiruko-rwize-ubuhinzi-guhurizwa-mu-mishinga-minini-yiterambere/

Umujyi wa Kigali wemeje ko umuhanzi Ali Kiba azafatanya n’abandi barimo Kevin Kade mu gususurutsa abazaba bitabiriye igitaramo cyo gusoza umwaka wa 2025 giteganyijwe kubera ku nyubako ya Kigali Convention Center.

Mu kiganiro yagiranye na televiziyo y’igihugu, Umuvugizi w’Umujyi wa Kigali, Madame Emma Claudine Ntirenganya yatangaje ko ubuyobozi bw’uyu mujyi bwateguye uruhererekane rw’ibirori bigomba guhera kuri uyu munsi tariki ya 24 Ukuboza 2025 kugeza ku itariki ya 2 Mutarama 2026.

Nubwo ari uruhererekane rw’ibi biori bigamije gufasha abatuye Kigali n’abayigenda gusozereza umwaka mu byishimo bidasanzwe, kimwe mu birori bitegerejwe cyane ni igiteganyijwe kuba mu ijoro rya tariki 31 Ukuboza 2025, ubwo hazaba hari kuraswa ibishashi bisoza umwaka hirya no hino.

Emma Claudine yemeje ko ku bufatanye na Kevin Kade uri kwizihiza imyaka itanu amaze mu muziki babashije gutumira umuhanzi wo mu gihugu cya Tanzania, Ali Saleh Kiba wamamaye nka Ali Kiba ugomba gufatanya n’abahanzi mpuzamahanga batari batangazwa kugeza ubu.

Yagize ati 'Ku itariki 31 Ukuboza murabizi ni bwo haraswa umwaka, rero mu gutuma ibyo birori birushaho gukurura abantu benshi, kuri KCC hazaba hari igitaramo gikomeye kizaririmbamo Kevin Kade ndetse na Ali Kiba basanzwe bafitanye imikoranire ya hafi.'

Usibye Ali Kiba, Umujyi wa Kigali watangaje ko ku wa Gatandatu tariki ya 27 Ukuboza 2025 igitaramo cy’urwenya kizwi nka Gen-Z Comedy kitazongera kubera imbere mu mahema ya Camp Kigali ahubwo ko abanyarwenya bose bazasusurutsa abantu bazaba bari hanze y’amahema mu rwego rwo gutuma byitabirwa n’abantu benshi by’umwihariko urubyiruko.

Umujyi wa Kigali wanagaragaje ko ukomeje gushaka inzindi ngamba zafasha abaturage bawo kunogerwa na serivisi z’ingendo muri iki gihe iminsi mikuru irimo kwegerezwa.

Kuva ku wa 23 kugeza ku wa 24 Ukuboza, Umujyi w’a Kigali washyizeho gahunda idasanzwe yo kongera gutunganya ingendo, hagamijwe kugabanya umubyigano no korohereza abagenzi muri ibi bihe by’iminsi mikuru. Muri iyo gahunda, abagenzi bajya mu ntara boherejwe ku bibuga byihariye birimo na sitade ya Kigali Pele bitewe n’aho berekeza.

Ali Kiba azataramira i Kigali tariki ya 31 Ukuboza

Source : http://isimbi.rw/ali-kiba-ari-mu-bazasusurutsa-abanya-kigali-mu-ijoro-rya-bonane.html

Mu Karere ka Ngororero, Umurenge wa Ndaro, ubuyobozi bw'inzego z'ibanze bwatangaje ko hafashwe umugabo w'imyaka 49 ukekwaho gukubita umuhungu we w'imyaka 19, bikamuviramo urupfu, amuziza icyaha cyo kwiba amatunda.

Aya makuru yemejwe n'ubuyobozi bw'Umurenge wa Ndaro, bwavuze ko byabaye mu mpera z'icyumweru gishize, ubwo uyu musore yakubitwaga n'umubyeyi we nyuma yo kumushinja kwiba amatunda yo mu rugo. Ubuyobozi buvuga ko amakimbirane hagati yabo yahise afata indi ntera, se akoresha imbaraga zikabije mu guhana umwana we.

Nyuma yo gukubitwa, uyu musore ngo yahise agira ikibazo gikomeye cy'ubuzima, atangira kugaragaza ibimenyetso byo kuremba. Abaturanyi bavuga ko hageragejwe kumufasha, ariko biba iby'ubusa kuko yahise apfa ataragezwa kwa muganga.

Inzego z'ibanze n'abaturage bahise batanga amakuru ku nzego z'umutekano, maze uyu mugabo arafatwa ashyikirizwa RIB n'izindi nzego zibishinzwe kugira ngo hakorwe iperereza ryimbitse. Umurambo w'uwitabye Imana wajyanywe gukorerwa isuzuma (autopsie) mu rwego rwo kumenya icyateye urupfu mu buryo bwemewe n'amategeko.

Ubuyobozi bw'Umurenge wa Ndaro bwihanganishije umuryango wagize ibyago, bunasaba abaturage kwirinda ihohoterwa iryo ari ryo ryose, cyane cyane irikorerwa mu miryango. Bwibukije ko amakimbirane yo mu rugo agomba gukemurwa hifashishijwe inzego zibishinzwe aho kwifashisha imbaraga, kuko zigira ingaruka zikomeye ku buzima bw'abantu.

Source : https://kasukumedia.com/ngororero-umugabo-yafunzwe-nyuma-yo-gukubita-umwana-we-kugeza-aho-bimuviriyemo-urupfu/

Ikipe ya Manchester City irateganya kwegera ikipe ya Bournemouth muri iki cyumweru mu biganiro bigamije gusinyisha rutahizamu w'Umunya-Ghana Antoine Semenyo, mu rugendo rwo gushimangira ubusatirizi bwayo mbere y'uko isoko ryo kugura no kugurisha abakinnyi rifunga muri Mutarama mu mwaka wa 2026.

Amakuru aturuka hafi y'iyi dosiye avuga ko Manchester City yamaze kumvikana n'abahagarariye Semenyo ku bijyanye n'amasezerano ye bwite, birimo umushahara n'igihe azamara muri iyi kipe. Icyiciro gikurikiraho ni ibiganiro hagati y'amakipe yombi, aho City ishaka kuganira na Bournemouth ku buryo bwiza bwo kugurana uyu mukinnyi hatagombeye kwishyura amafaranga yose ya 'release clause' icyarimwe.

Antoine Semenyo afite ingingo imwemerera kugurwa n'undi muryango wishyuye miliyoni 65 z'amapawundi, ingingo izakomeza gukurikizwa kugeza tariki ya 10 Mutarama 2026. Ibi bituma Manchester City yihutira gutangira ibiganiro, ishaka uko yagabanya ayo mafaranga cyangwa igashyiramo ibindi byiyongeraho nko kwishyura mu byiciro cyangwa kongeramo undi mukinnyi mu masezerano.

Semenyo amaze kwigaragaza cyane muri shampiyona y'Ubwongereza Premier League, aho imbaraga, umuvuduko n'ubushobozi bwo gukina mu myanya itandukanye y'ubusatirizi byatumye amakipe akomeye amukurikirana. N'ubwo hari andi makipe yamwifuzaga, amakuru ahamya ko icyifuzo cye nyamukuru ari ukwerekeza muri Manchester City, aho yakorana na Pep Guardiola akanahakura amahirwe menshi yo gutwara ibikombe byinshi bitandukanye.

Mu gihe ibiganiro bikomeje kujya mbere, Manchester City ishobora kwihutisha amasezerano kugira ngo uyu mukinnyi atangire kwinjira mu mushinga wayo vuba, mbere y'uko isoko ry'igura n'igurisha rifunga.

Source : https://kasukumedia.com/man-city-irateganya-kuganiriza-ikipe-ya-bournemouth-ku-igurwa-rya-antoine-semenyo/

Urwego rw'Igihugu rw'Ubugenzacyaha (RIB) rwatangaje ko ku wa 23 Ukuboza 2025 rwashyikirije Ubushinjacyaha dosiye ikubiyemo iperereza ryakorewe abantu batanu bakekwaho icyaha cyo kugayisha agaciro k'ifaranga ry'Igihugu. Iyi dosiye irimo uzwi ku izina rya Prophet Joshua, uri mu bakurikiranyweho ibyaha bijyanye n'imikoreshereze y'ifaranga.

Umuvugizi wa RIB, Dr. Murangira B. Thierry, yemeje aya makuru, avuga ko dosiye yoherejwe mu bushinjacyaha nyuma y'iperereza ryimbitse ryakozwe n'inzego zibishinzwe. Yagize ati: 'Iperereza ryarangiye, dosiye ishyikirizwa Ubushinjacyaha kugira ngo hakurikizwe amategeko.'

Abandi bakekwa muri iyi dosiye ni Mbabazi Winny, Niyigena Deborah, Murekatete Alice, Umutesi Salima Linda na Heradi Sefu Josué uzwi nka Prophet Joshua. Bose bakurikiranyweho icyaha cyo kugayisha agaciro k'ifaranga ry'Igihugu, icyaha gishobora kugira ingaruka zikomeye ku bukungu bw'Igihugu no ku mutekano w'ifaranga.

By'umwihariko, Prophet Joshua we anakekwaho icyaha cyiyongera cyo kudasobanura inkomoko y'umutungo we, bikaba bisaba ko atanga ibisobanuro bifatika by'uko yawubonye, nk'uko amategeko abiteganya.

RIB yibukije abaturage ko kugayisha agaciro k'ifaranga ry'Igihugu ari icyaha gihanwa n'amategeko, isaba buri wese kubahiriza amategeko no kwirinda ibikorwa byose byahungabanya ubukungu bw'igihugu. Dosiye yamaze kugezwa mu Bushinjacyaha, hakaba hategerejwe icyemezo ku ntambwe zikurikiraho mu rwego rw'ubutabera.

Source : https://kasukumedia.com/rib-yashyikirije-ubushinjacyaha-dosiye-yabarimo-prophet-joshua-ku-cyaha-cyo-kugayisha-agaciro-kifaranga-ryiguhugu/

Uwankusi Nkusi Lynda, wamenyekanye cyane mu gukina filime nyarwanda ku izina rya Lynda Priya, yamaze gushyira hanze amakuru y'urukundo rushya arimo n'umusore wigaruriye umutima we, aho banatangaje ko bari mu mishinga yo kurushinga.

Lynda, wigeze kuvugwa mu rukundo na Zaba Missedcall, yanyujije kuri konti ze za Instagram n'izindi mbuga nkoranyambaga amafoto agaragaza ibyishimo ari kumwe n'uyu musore mushya witwa Christian Irenge.

Bombi bamaze umwaka n'igice mu rukundo, ibintu Lynda avuga ko byamuhaye isura nshya y'urukundo rufite intego, aho bagaragaza ko ubu bafite gahunda yo kurushinga mu mwaka utaha wa 2026.

Nubwo batatangaje igihe nyacyo cy'ubukwe, inshuti zabo za hafi zivuga ko imyiteguro y'ubukwe igeze kure, ndetse amafoto bashyira hanze agaragaza urukundo rukomeye rubaranga.

Lynda Priya asanzwe ari umwe mu bakinnyi ba filime b'abahanga mu Rwanda, ndetse akunze kugaragara no mu bikorwa bitandukanye by'urubyiruko. Iyo urebye uburyo ari gusangiza urukundo rwe ku mbuga nkoranyambaga, bigaragaza ko yishimiye urwo rukundo rushya yinjiyemo.

Source : https://yegob.rw/lynda-priya-yahishuye-umukunzi-mushya-avuga-ko-bari-mu-mishinga-yo-kurushinga/

Inkuru ya Denis Omedi, rutahizamu w'Ikipe y'Igihugu ya Uganda, ni isomo rikomeye rigaragaza ko inzozi zitagendana n'inzira imwe gusa. Mu gihe benshi bamubonaga nk'umukinnyi usanzwe w'umupira w'amaguru, hari ubuzima bwihariye yabagamo hanze y'ikibuga,  ubuzima bwo kwitangira akazi ko gucunga gereza.

Mu mwaka wa 2019, Denis Omedi yarangije amasomo ye y'Abacungagereza, ahita atangira akazi mu rwego rw'Igihugu cya Uganda (Uganda Prisons Service). Ntabwo byari byoroshye guhuza ako kazi n'imyitozo y'umupira w'amaguru. Yitozaga mu masaha make yabonaga hagati y'akazi, rimwe na rimwe ananiwe, ariko ntiyigeze arekura inzozi ze zo kuba umukinnyi wabigize umwuga.

Iterambere rye ryaje gahoro, nta ntera asimbuka, nta nzira ngufi. Byamusabaga kwihangana, kwitanga no kwemera ko urugendo rurerure rushoboka. Mu myaka yakurikiyeho, yakomeje gukina, yiyubaka buhoro buhoro, anereka ko n'iyo ubuzima bugushyize mu mbogamizi, ushobora gukomeza imbere nta nkomyi.

Nyuma y'imyaka itandatu, ku myaka 31 y'amavuko, Denis Omedi yanditse amateka ye bwite. Ku mukino we wa mbere mu irushanwa rya AFCON, yahesheje Uganda igitego cy'ingenzi mu mukino bahuyemo na Tunisia. Byari nk'igihembo cy'urugendo rurerure rwuzuyemo kwiyanga, nyuma y'icyo gihe cyose.

Source : https://kasukumedia.com/umucungagereza-denis-omedi-yatanze-ibyishimo-muri-afcon/

Umuhanzikazi w'indirimbo zo kuramya no guhimbaza Imana, Rachel Uwase, yarushinze n'umukunzi we Shafati usanzwe ari umucuranzi wa guitar ya solo. Ni umuhango w'ubukwe wabereye mu rusengero rwa ADEPR Segeem mu Karere ka Kicukiro, ku wa Gatandatu tariki ya 20 Ukuboza 2025, imbere y'Imana n'imbaga y'abakristu, inshuti n'abavandimwe.

Uyu muhango waranzwe n'amasengesho, indirimbo zo kuramya Imana ndetse n'ubuhamya bw'abacuranzi. Rachel Uwase na Shafati basezeranye kubana mu akaramata, nyuma y'uko ubwabo bashimanye, bashyingiranwa imbere y'Imana nk'ishingiro ry'urugo rwabo rushya.

Rachel Uwase ni umwe mu bahanzi bakiri bato bamaze kwigarurira imitima ya benshi mu muziki wo kuramya no guhimbaza Imana mu Rwanda. Yatangiye uru rugendo rwe mu mwaka wa 2024, aho yahise agaragaza impano idasanzwe n'umutima wuzuye ukwizera. Indirimbo ze zirimo nka 'Ndakwizera' zakunzwe cyane, zituma benshi bongera kwizera Imana no kuyegera mu masengesho.

Abitabiriye uyu muhango bagaragaje ibyishimo byo kubona uyu muhanzikazi atangiza indi ntambwe ikomeye mu buzima bwe, bamusabira imigisha ku Mana mu rugo rwe rushya. Benshi bashimangiye ko ubukwe bwe bubaye urugero rwiza rwo guhuza impano, ukwizera n'ubuzima bwo kubaha Imana.

Source : https://kasukumedia.com/rachel-uwase-yasezeranye-imbere-yimana-numukunzi-we-shafati-mu-itorero-rya-adepr-segeem/

Umuraperikazi w'icyamamare ku Isi, Nicki Minaj, yongeye guteza impaka nyinshi ku mbuga nkoranyambaga, nyuma y'uko konti ye ya Instagram yakuwe ku murongo bitunguranye, bigatera benshi kwibaza icyabaye n'impamvu yabyo. Ibi byabaye mu gihe uyu muhanzikazi yari asanzwe afite abamukurikirana bagera hafi kuri miliyoni 200, bigatuma iki gikorwa cye gifatwa nk'ikidasanzwe.

Amakuru atandukanye yatangiye gukwirakwira avuga ko Nicki Minaj yaba ari we wafashe icyemezo cyo gukuraho konti ye ku bushake bwe, cyane cyane nyuma y'uko atakaje abakurikirana benshi, babarirwa hafi kuri miliyoni 10. Ibi byakurikiye ikiganiro yagiranye n'itangazamakuru kuri televiziyo, aho yagaragaje amagambo bamwe bafashe nk'ashimagiza Perezida wa Leta Zunze Ubumwe za Amerika, Donald Trump.

Nyuma y'icyo kiganiro, imbuga nkoranyambaga zahise ziba isoko y'impaka nyinshi. Abakunzi be bamwe bagaragaje ko batishimiye iyo myitwarire, bamushinja gushyigikira politiki batemera, bituma bahita bahagarika kumukurikira ku mbuga nkoranyambaga. Abandi bo bagaragaje ko umuntu wese afite uburenganzira bwo gutanga ibitekerezo bye bya politiki, bityo bakomeza kumushyigikira.

Kugeza ubu, Nicki Minaj ntaragira itangazo risobanura impamvu nyayo yatumye konti ye ibura, cyangwa niba koko yayisibye ku bushake. Ibi bikomeje gutuma urujijo rwiyongera, abakunzi n'abakurikiranira hafi ibikorwa bye bakomeza gutegereza igisobanuro kizima kiva kuri we ubwe.

Source : https://kasukumedia.com/nicki-minaj-yateje-urujijo-nyuma-yo-kugaragara-ko-konti-ye-ya-intsagram-itakiri-ku-murongo/

Umunyarwenya Atome uherutse guhurira na Samuel Eto’o Fils mu giterane cya pasiteri Ndikumana Chris muri Côte d’Ivoire yagaragaje ko uyu muvugabutumwa ari umuntu ushobora ku kwigisha isomo ryo guca bugufi ushingiye ku myitwarire ye gusa.

Ku wa Gatandatu tariki 6 Ukuboza 2025, imihanda migari n’iy’imigenderano yo mu murwa mukuru Cotonou muri Benin , yari yafunzwe kuva mu gitondo kubera igiterane cy’ivugabutumwa cyari kiyobowe na Pastor Chris Ndikumana, ukomoka mu gihugu cy’u Burundi.

Usibye uwahoze ari rutahizamu wa FC Barcelona na Inter Mian, ubu akaba ari Perezida w’Ishyirahamwe ry’Umupira w’Amaguru muri Cameroun, Samuel Eto’o, indi mbaga y’abantu basaga ibihumbi 150 barimo n’Umunyarwenya Ntarindwa Diogène wamenyekanye nka Atome cyangwa Gasumuni yari yitabiriye iki giterane kidasanzwe.

Mu kiganiro na ISIMBI; uyu munyarwenya yasobanuye uburyo uyu muvugabutumwa ukomoka mu gihugu cy’u Burundi yicisha bugufi ku kigero bamwe babona ko ashobora kuba arimo gukabya ariko abikomora ku itabaza ry’amavuta yasizwe n’Imana.

Ati 'Pasiteri Ndikumana aratangaje cyane gusa niba hari abantu bake bashobora kukwigisha isomo ryo guca bugufi ushingiye ku myitwarire yabo ari mu ba mbere wareberaho. No mu murimo w’Imana ni abantu bake wamugereranya nawe.'

Atome yakomeje agaragaza ko Pasiteri Chris yahisemo kugenda agabanya icyubahiro ahabwa na sosiyete uko yagendaga azamurwa n’Imana mu ntera yo kuba yakora ibitangaza bidasanzwe birimo no gukiza abantu batabashaga kugenda burundu.

Ati 'Kubera ko yatangiye kubona mu mbaraga arimo kuzamurwa mu ntera kuko aba yaganirijwe n’Imana akamenya ko umurimo ari bwo ugitangira we yahisemo kongera uguca bugufi kwe uko yazamurwaga.'

Uyu mupasiteri w’imyaka 51 amaze igihe agaragara nk’umwe mu bayobozi b’ivugabutumwa bakunzwe cyane, by’umwihariko binyuze kuri muri porogaramu yashinze asangizaho abantu amasengesho, inyigisho n’ubuhamya, bikurikirwa n’abantu bagera kuri miliyoni imwe.

Si aho bigarukira gusa, kuko Pasiteri Chris Ndikumana yanashinze urubuga ritwa Kanguka, itambutsa ibiganiro byibanda ku gukangura umutima n’imyemerere ya gikristo.

Chris Ndikumana ni umupasiteri w’Umurundi usengera abantu bagakizwa

Atome yavuze ko Chris Ndikumana ari umuntu ukora ibitangaza

Samuel Eto’o Fils ni umwe mu bitabiriye isengesho rye

Source : http://isimbi.rw/yakwigisha-guca-bugufi-ushingiye-ku-myitwirire-ye-gusa-atome-kuri-pasiteri.html