Category: Uncategorized

Nyuma yo kuva mu kibuga n’amarira menshi, umunyezamu wa Rayon Sports, Hakizimana Adolphe ubu arimo kugenda yoroherwa aho n’ukuboko kwe kwabyimbutse.

Uyu munyezamu yari yabanjemo ku mukino ubanza w’ijonjora rya 2 rya CAF Confederation Cup aho Rayon Sports yari yasuye Al Hilal Bengahazi.

Muri uyu mukino wabereye kuri Kigali Pele Stadium, ntabwo wahiriye umunyezamu kuko yaje kuvunika hakiri kare ku munota wa 10 ubwo yakuragamo umupira ukomeye wa Osamah Alshareef.

Adolphe Hakizimana yagize ikibazo ku kuboko kw’iburyo mu nkokora, abaganga binjiye mu kibuga kumuvura, baraguhambira ariko biranga maze ku munota wa 17 yasohotse mu kibuga asimburwa na Hategekimana Bonheur.

Adolphe utabyumvaga neza yasohotse mu kibuga arira kuko atumvaga uburyo avunitse hakiri kare ku mukino nk’uyu, ndetse ahita ajya mu rwambariro, yagarutse mu gice cya kabiri.

Amakuru ISIMBI yamenye ni uko, uko amasaha yashiraga ukuboko kwagendaga kubyimba ariko amakuru meza ni uko mu gitondo cyo kuri uyu wa Mbere tariki ya 25 Nzeri 2023 yari yorohewe ukuboko kwabyimbutse ndetse n’uburibwe bwagabanutse.

Amakuru avuga ko nta gupfa ryavuye mu mwanya waryo cyangwa ngo rivunike ahubwo ari ukuribwa gusa. Ntabwo biremezwa niba azasiba umukino wo kwishyura wa Al Hilal uzakinwa tariki ya 30 Nzeri 2023.

Kuri uyu wa Gatandatu tariki 24 Nzeri 2023, ni bwo Akanama Nkemurampaka k'iri rushanwa kateranye gahitamo abakobwa batatu muri 20 bari bahatanye. 

Kashingiye cyane ku byo amarushanwa mpuzamahanga asaba kugira ngo umukobwa cyangwa se umusore ayitabire n'uburyo abasha kwisobanura.

Buri wese ugize akanama nkemurampaka yanyujije amaso muri video yatanzwe na buri mukobwa ndetse n'amafoto amugaragaza hanyuma atanga amanota.

Ndekwe Paulette uhagarariye Embrace Africa yateguye iri rushanwa yabwiye InyaRwanda ko kuri iyi nshuro amarushanwa mpuzamahanga aba bakobwa bazitabira yagize uruhare mu guhitamo buri umwe.

Yavuze ati 'Twakoresheje abagize Akanama Nkemurampaka bo mu mahanga, barebye Video n'amafoto bya buri umwe, babishingiraho bahitamo abahize abandi. By'umwihariko kuri iyi nshuro, abategura amarushanwa mpuzamahanga bazajyayo nayo yagize uruhare mu guhitamo abahiga abandi.'

Akomeza ati 'Ibyo bituma twumva twizeye ko niba abategura ariya marushanwa baguhisemo bishobora kudufasha ko bagera kure.'

Abakobwa batatu batsinze ni Sandrine mukamisha, Anita Mushimiyimana na Alliance Muziranenge. Buri umwe yabonye amahirwe yo kuzaserukira u Rwanda mu marushanwa arimo Supermodel Worldwide, The look of the year ndetse na Global model of the World.

Irushanwa rya Miss SupermodeL Worldwide riri mu marushanwa akomeye mu bihugu byo mu Majyepfo ya Asia. Ryatangijwe na Sandeep Kumar mu 2004. Rishamikiye ku marushanwa y'ubwiza arimo nka Miss Supermodel Worldwide, Mrs. Supermodel Worldwide, Mister Model Worldwide, Rubaru Mr. India, Rubaru Miss India Elite n'andi.

Elite Model Look ryamamaye cyane mu myaka 1983 na 1995 ryiwa Look of the Year nyuma riza guhindurirwa izina ryitwa Elite Model Look. Ni irushanwa ry'abanyamideli rihuzwa no kumurika imyambaro itandukanye yahanzwe.

Ni mpuzamahanga kandi ryagiye rifasha abanyamideli benshi ku Isi kugaragaza ibikorwa byabo. Imibare igaragaza ko ryitabirwa n'abantu barenga 350,000 bo mu bihugu birenga 70 byo ku Isi.

Abanyamideli baryitabira batoranywa mu Mujyi irenga 800 yo ku Isi hakavamo abaserukira ibihugu by'abo. Rihatanamo nibura abanyamideli bari hatati y'imyaka 14 na 26 y'amavuko.

Global model of the world ni irushanwa Mpuzamahanga ryabereye bwa mbere mu Mujyi wa Istanbul muri Turkey mu 1988, ryitabirwa n'ibihugu 42 byo ku Isi.

Ndekwe Paulette avuga ko kuri iyi nshuro bishimira ko amarushamwa Mpuzamahanga bakorana yagize uruhare mu guhitamo abakobwa bazayitabira.

Akomeza ati 'Hari gihe tugendera ku bagize Akanama Nkemurampaka gusa ugasanga utoye utazapfa kugera kure mu byo agiyemo. Ariko iyo utegura agize uruhare mu kumutora uba ubizi neza ko kugera kure bishoboka.'

Sandrine Mukamisha yabonye amahirwe yo guserukira u Rwanda mu marushanwa y'imideli akomeye ku Isi

Anita Mushimiyimana yahigitse bagenzi be muri Rwanda Global Top Model

Alliance Muziranenge yatsinze nyuma y'uko Akanama Nkemurampaka kamwemeje kandi n'abategura amarushanwa bakamuhitamo

Abakobwa 3 batsinze bavuye muri 20 bageze mu cyiciro cya nyuma cy’iri rushanwa

Uba Nyampinga w’Isi, bamutora bagendeye ku bwiza n’uburanga afite ndetse n’ubwenge. Muri benshi b’abahanga baba bitabiriye iri rushanwa, havamo umwe akaba nyampinga w’Isi. 

Aya marushanwa ya nyampinga w’Isi yatangiye mu mwaka wa 1951 ku itariki ya 27 Nyakanga ashinzwe na Eric Morley wari usanzwe ategura amarushanwa ya bikini contest yari igize igice kimwe cya Festival Britain. 

Icyicaro gikuru cy’abategura aya marushanwa magingo aya kikaba giherereye mu Bwongereza aho buri mwaka bakoresha arenga miliyoni 95 z’amadorali ya Amerika mu itegurwa ry’aya marushanwa. 

Uwegukanye iri kamba bwa mbere ibi birori bigitangira, ni Kiki Håkansson ukomoka mu gihugu cya Sweden. Ibi birori byabereye Lyceum Ballroom i London mu United Kingdom ku wa 29 Nyakanga 1951.

Uheruka iri kamba rya Miss w’Isi, ni Karolina Bielawska ukomoka mu gihugu cya Poland akaba yarambikiwe iri kamba San Juan, Puerto Rico aryambikwa na Toni-Ann Singh wo muri Jamaica.

Dore ibihugu bifite amakamba menshi muri Miss World 

 India: 6

Reita Faria Powell mu mwaka wa 1966, akurikirwa na Aishwarya Rai mu mwaka wa 1994, Diana Hayden mu mwaka wa 1997, Yukta Mookhey mu mwaka wa 1999, Priyanka Chopra mu mwaka wa 2000 hanyuma na Manushi Chillar mu mwaka wa 2017.

 Venezuela: 6

Susana Duijm mu mwaka wa 1955, Pilin Leon mu mwaka wa 1981, Ninibeth Leal mu mwaka wa a1991, Jacqueline Aguilera mu mwaka wa 1995 na Ivian Sarcos mu mwaka wa 2011.

 Jamaica: 4

Carol Joan Crawford wegukanye iri kamba mu mwaka wa 1962 akurikirwa na Cindy mu mwaka wa 1976, Lisa Hanna akurikiraho mu mwaka wa 1993 hakaba haheruka Toni Ann Singh mu mwaka wa 2019.

 United Kingdom: 4

Sarah-Jane Hutt mu mwaka wa 1983,Ann Sidney mu mwaka wa 1964, Lesley Langley mu mwaka wa 1965 na Rosemarie Frankland mu mwaka wa 1961 bose bakomokaga mu bwami bw’ubwongereza.

 South Africa: 3

Rolene Strauss yambitswe iri kamba mu mwaka wa 2014, Anneline Kriel aryambara mu mwaka wa 1974 hanyuma Penelope Coelen aryambara mu mwaka wa 1954.

 United State America: 3

Marjorie Wallace mu mwaka wa 1973 akurikirwa na Gina Tolleson mu mwaka wa 1990 hakaba haheruka Alexandria Mills mu mwaka wa 2010.

Mu bindi bihugu harimo Iceland: 3, Sweden: 3, Poland: 2, Puerto Rico: 2.

Karolina Nyampinga w’Isi mu mwaka wa 2022 ukomoka mu gihugu cya Poland

Karolina niwe ufite ikampa rya Nyampinga w’isi magingo aya

Kik niwe mukobwa wa mbere wegukanye ikamba rya Miss World mu mwaka wa 1951

Irushanwa rya nyampinga w’Isi rifitanye isano n’amarushanwa yo kwambara Bikin yaberaga mu bwongereza

Amarushanwa ya Miss World ahuza abantu bose ku migabane yose

Umukino wa Rayon Sports na Al Hilal waraye usize inkuru aho hagiye hanamenyekana byinshi byagiye bibanziriza uyu mukino aho amakipe yombi yanganyije 1-1.

Ni umukino waraye ubaye tariki ya 24 Nzeri 2023 kuri Kigali Pele Stadium aho Al Hilal Benghazi yo muri Libya yari yakiriye Rayon Sports mu mukino ubanza w’ijonjora rya CAF Confederation Cup.

Ni umukino wakereweho iminota 20 yose kubera ko iyi kipe yari yavuze ko umukino uba mu muhezo ariko isanga abantu muri Stade ari benshi.

Rayon Sports yari yemerewe kuzana abantu 25 ndetse n’abanyamakuru 50. Umukino ugiye gutangira iyi kipe yanze ko utangira biba ngombwa ko abantu bose bongera gusohoka bongera kwinjira bundi bushya, hinjira abafite 'badge’.

Ni umukino iyi kipe yari yemereye Rayon Sports nubwo nta bafana bemerewe ariko uyu mupira uzanyura kuri Televiziyo Rwanda ariko nabwo ukerekanwa ku butaka bw’u Rwanda gusa. Gusa ku munota wa nyuma byarangiye iyi televiziyo itangaje ko itari bwerekane uyu mukino.

Haje amakuru atandukanye avuga ko Ikigo cy’Igihugu cy’Itangazamakuru (RBA) cyaciwe n’iyi kipe ibihumbi 100 by’Amadorali kugira ngo cyerekane uyu mukino.

Gusa amakuru ISIMBI yamenye ni uko aya makuru ahabanye nukuri kubera ko iyi kipe ahubwo yabaciye ibihumbi 5 by’Amadorali kugira ngo yerekane uyu mukino ariko RBA ivuga ko itayabona.

Uku guca aya mafaranga RBA, Al Hilal yabitekereje nyuma y’uko yari imaze kubwirwa ko itari bukinire kuri Kigali Pele Stadium mu itishyuye ibihumbi 5 by’Amadorali y’Amerika, babibwiriwe mu nama itegura uyu mukino. Nayo yahise ihitamo kugurisha uyu mukino kugira ngo nayo ibone amafaranga yo kwishyura ikibuga.

Andi makuru adafitiwe gihamya ni uko Al Hilal yabwiwe na FERWAAFA ko kugira ngo yitoreze kuri Kigali Pele Stadium guhera kuri uyu wa Mbere kugeza ku wa Kane izajya yishyura ibihumbi 5 by’Amadorali ku munsi.

Umutoza wa Rayon Sports, umunya-Tunisia, Yamen Zelfani yavuze ko inzozi ze muri iyi kipe ari ukuba yakwegukana igikombe cya CAF Confederation Cup.

Ni mu gihe hasigaye iminota 90 ngo Rayon Sports imenye niba igomba kugera mu matsinda ya CAF Confederation Cup cyangwa se izasezererwa na Al Hilal Benghazi.

Ni nyuma y’uko umukino ubanza waraye wakiriwe na Al Hilal kuri Kigali Pele Stadium amakipe yombi yanganyije 1-1.

Umutoza wa Rayon Sports yavuze ko baremye amahirwe menshi ndetse aba yanavuyemo ibitego ariko ku bw’amahirwe make ntibyakunda ari n’aho ahera avuga ko yifitiye icyizere cyo kuzasezerera iyi kipe akagera mu matsinda.

Zelfani Yamen yabwiye abakunzi b’iyi kipe ko ikintu cya mbere we atekereza ari ukwandika amateka mu mikino Nyafurika aho yumva n’igikombe yacyegukana.

Ati “Ndi habo ku bw’igikombe cya CAF Confederation Cup, kubera iki ntakwegukana iki gikombe? Izo ni inzozi zanjye, ndabizi abafana bakunda ikipe yabo kandi bakunda n’igihugu nkoreramo buri munsi kugira ngo ndebe ko nabageza mu matsinda.”

Rayon Sports izakira umukino wo kwishyura tariki ya 30 Nzeri 2023 kuri Kigali Pele Stadium aho isabwa gutsinda cyangwa kutinjizwa igitego kugira ngo igere mu matsinda ya CAF Confederation Cup.

Myugariro wa Rayon Sports, Mitima Isaac yavuze ko bafite icyizere mu mukino wo kwishyura ko basezerera Al Hilal Bengahzi kuko ubu bamaze kuyimenya, ni mu gihe ngo iyo utarakina n’Abarabu hari ukuntu uba ubatinya.

Ni nyuma y’umukino ubanza w’ijonjora rya kabiri rya CAF Confederation Cup, Al Hilal yaraye yakiriyemo Rayon Sports kuri Kigali Pele Stadium.

Mitima yavuze ko kunganya 1-1 atari bibi kuko bakinaga nk’ikipe iri hanze nubwo bari mu rugo.

Ati “navuga ko atari bibi kuri twebwe, nubwo twari iwacu mu rugo ariko tubarwa nk’abasuye, navuga ko ari umusaruro mwiza kuri twe, ubwo umukino wo kwishyura ni ukwirinda kwinjizwa ubundi tukabyitwaramo neza.”

Yakomeje avuga ko amakipe y’Abarabu iyo utarakina nayo uba uyatinya ariko ubu bamaze gukina, babonye imikinire yabo ku buryo bizeye ko mu mukino wo kwishyura bazawitwaramo neza.

Ati “twavuga ko tuyimenye kuko iyo utarakina n’umuntu ntabwo umutinyuka, hari ukuntu Abarabu tubatinya kuko bazi kugumana umupira, bareba ikosa ryawe mu buryo bwihuse ariko ubu ngubu twabize turabazi, abakomeye, aboroshye turizera ko tuzabatsinda.”

Yashimangiye ko kuri uyu mukino babuze abafana kuko aba ari umukinnyi wabo wa 12, bizeye ko mu mukino wo kwishyura bizaba bimeze neza kurushaho.

Rayon Sports niyo izakira umukino wo kwishyura uzaba tariki ya 30 Nzeri 2023 aho isabwa gutsinda cyangwa kutinjizwa igitego kugira ngo igere mu matsinda.

Ni ibintu bisanzwe ko ibyamamare by'imahanga (by'abirabura) bishishikazwa no kumenya inkomoko yabyo dore ko benshi bahageze mu buryo butadukanye yaba abahavukiye, abahagiye nk'impunzi na bakomoka kubahagiye mu gihe cy'ubucakara kimwe n'abahagiye mu gushakisha ubuzima.

Gusa ntabwo ari buri cyamamare cyose gishishikazwa no kumenya igihugu gikomokamo ngo giterwe ishema no kugira ubwenegihugu bwacyo. People Magazine yatangaje ko muri Hollywood haje icyitwa 'Black Power Era' kuva mu 2016 hasohoka filime ya 'Black Panther' na 'Roots' zose zifite aho zihuriye n'amateka y'abirabura bituma ibyamamare bishishikazwa no kumenya ibihugu bya Africa bivukamo ari nabwo benshi bahise bashaka ubwenegihugu bwaho bakomoka.

Uri ni urutonde rw'ibyamamare 10 bimaze kwibikaho ubwenegihugu bw'ibihugu bakomokamo muri Afurika:

1.Oprah Winfrey

Umuherwekazi akaba n'icyamamare kuri televiziyo, Oprah Winfrey, uri mu bagore bavuga rikijyana ku isi, afite ubwenegihugu bwa Zambia nubwo nyina umubyara akomoka muri Liberia. Mu 2018 Oprah yahishuye ko yahisemo gufata ubwenegihugu bwa Zambia kuko ariho Se akomoka.

2. Idris Elba

Icyamamare muri Sinema, Idris Elba uherutse mu Rwanda mu birori bya Kwita Izina ingagi, nawe afite ubwenegihugu bwa Sierra Leone. Nubwo uyu mugabo abarizwa mu Bwongereza ari naho yavukiye, yahisemo kugira ubwenegihugu bwa Sierra Leone kuko ariho ababyeyi be bavuka.

3. Ludacris

Umuraperi w'icyamamare akaba n'umukinnyi wa filime, Christopher Brian Brigdes wamamaye nka Ludacris, ari mu basitari bibitseho ubwenegihugu bwo muri Afurika.

Mu 2019 nibwo Ludacris yahawe ubwenegihugu bwa Gabon nyuma yo gusanga nyina ariho avuka. Byumwihariko umugore we witwa Euxodie Mbouguingue nawe avuka muri Gabon.

4. Samuel L. Jackson

Icyamamare muri Sinema, Samuel L. Jackson, benshi bita 'Nick Fury' kubera filime yakinnye zirimo nka 'Avengers' za Marvel's yitwa gutya. Uyu mugabo uri mubatunze agatubutse I Hollywood, afite ubwenegihugu bwa Gabon. Yabuhawe mu 2018 na Ali Bongo Ondimba wari Perezida w'iki gihugu.

5. Tiffany Haddish

Umunyarwenya akaba n'umukinnyi wa filime byahiriye, Tiffany Haddish, wamamaye cyane muri filime nka 'Girl's Trip' yakinanye n'abarimo Jada Pinkett Smith, nawe afite ubwenegihugu bwa Eritrea. Mu 2018 ubwo yajyaga muri iki gihugu agiye gushyingura Se witwa Tsihaye Reda Haddish, nibwo yahise asaba n'ubwenegihugu.

6. Chris Rock

Umunyarwenya kabuhariwe Chris Rock, uri mu bakomeye muri Leta Zunze Ubumwe z'Amerika, afite ubwenegihugu bwa Cameroon. Mu 2020 yatangaje ko yarasanzwe aziko akomoka mu bantu bitwa 'Udeme' bo mu mujyaruguru ya Cameroon gusa akaba yaragize ishyaka ryo kugira ubwenegihugu bwaho nyuma yahoo Se abimusabye.

7. Don Cheadle

Uyu ni icyamamare muri Sinema,nawe afite ubwenegihugu bwa Cameroon yabuhawe mu 2017. Don Cheadle ariko nubwo afite ubwenegihugu bwa Cameroon aho Se akomoka, nyina umubyara we akomoka mu gihugu cya Centrafika 

8. Erykah Badu

Umuhanzikazi akaba n'umwanditsi w'indirimbo, Erykah Badu wahawe akabyiniriro ka 'Queen of Neo Soul' , kuva mu 1994 ni umwe mubakora injyana ya R&B bahagaze neza muri Amerika. Erykah Badu akaba afite ubwenegihugu bwa Cameroon yahawe mu 2016.

9.Whoopi Goldberg

Umunyarwenya w'icyamamarekazi kuri televiziyo mu kiganiro 'The View' kinyura kuri Fox, akaba n'umukinnyi wa filime, Whoopi Goldberg, nawe akomoka ku mugabane wa Africa ndetse afite ubwenegihugu bwa Guinea-Bissau yahawe mu 2019.

10. Chris Tucker

Umukinnyi wa filime n'umunyarwenya, Chris Tucker, wamamaye muri filime nka 'Rush Hour' yakinannye na Jackie Chan, 'Friday' yakinanye na Ice Cube hamwe n'izindi. Uyu mugabo afite ubwenegihugu bwa Angola yahawe mu 2016.

Aba ni bamwe mu byamamare bifite ubwenegihugu bwo muri Africa, gusa hari n'abandi benshi barimo nka Anthony Anderson,Meghan Markle, Lil Wayne, Kerry Washington n'abandi bavuka muri Africa gusa badafite ubwenegihugu bw'ibihugu baturukamo. 

Aha kandi hakongerwaho Winston Duke wamamaye muri filime ya ‘Black Panther’ aho aherutse guhabwa ubwenegihugu bw’u Rwanda nyuma yo kwitabira umuhango wo Kwita Izina ingagi. Mushiki we kandi witwa Dr. Cindy Duke wari wamuherekeje nawe yatashye yahawe ubwenegihugu bw’u Rwanda.

Winston Duke ukomoka mu birwa bya Tobago, aherutse guhabwa ubwenegihugu bw’u Rwanda

Mushiki wa Winston Duke, Dr. Cindy Duke nawe yahawe ubwenegihugu bw’u Rwanda.

Nubwo mu Rwanda mu mpera z’icyumweru dusoje nta mikino ya shampiyona yigeze ikinwa ariko mu bindi bihugu yarakinwe niyo mpamvu InyaRwanda yabateguriye uko abakinnyi bakina hanze bitwaraga n’amakipe yabo.

Sandkven IF ikina shampiyona y’icyiciro cya gatatu muri Sweden  yatsindwaga na Boden ku munsi w’ejo ku cyumweru ibitego 3-1.Abanyarwanda babiri bakina muri iyi kipe, Mukunzi Yannick yinjiye mu kibuga ku munota wa 74 asimbuye Byiringiro Lague.

Iyi kipe ya Sandkven IF iri ku mwanya wa mbere ku rutonde rwa shampiyona izagaruka mu kibuga mu cyumweru gitaha tariki 30 ikina na Sollentuna.

Mu cyiciro cya mbere cya shampiyona ya Kenya mu ikipe ikinamo Abanyarwanda 2 ya Gormahia FC ejo ku cyumweru yanganyaga na Kakamega Homeboyz F.C igitego 1-1. Sibomana Patrick yabanje mu kibuga naho Emery Bayisenge aza kwinjiramo asimbuye.

Kuri ubu Gormahia iri ku mwanya wa 2 ku rutonde rwa shampiyona ikaba izagaruka mu kibuga tariki 1 yukwezi gutaha kwa 10.

Ikipe ya FK Jerv ikina icyiciro cya kabiri muri Norway ikaba ikinamo na myugariro w’ikipe y’igihugu y’u Rwanda Amavubi ,Mutsinzi Ange ku wa Gatandatu yanganyaga n’ikipe yitwa Hødd igitego 1-1.

Muri uyu mukino uyu munyarwanda yabanje mu kibuga ndetse ntiyasimbuzwa,kuri ubu FK Jerv iri kumwanya wa 13 ku rutonde rwa shampiyona ikaba izagaruka mu kibuga kuwa 6 tariki 30 Nzeri ikina na Sogndal.

Ku wa Gatandatu  w’icyumweru gishize ikipe ya SL16 Football Campus y’abakinnyi batarengeje imyaka 23 ikina shampiyona y’icyiciro cya kabiri mu Bubiligi yatsindwaga ibitego 4-1 na Club NXT. 

Hakim Sahabo ukina muri iyi kipe yinjiye mu kibuga asimbuye ku munota wa 77. Kuri ubu iyi kipe iri ku mwanya wa nyuma wa 16 ikaba izagaruka mu kibuga tariki 29 zuku kwezi ikina na Patro.

Ikipe ya FC Groningen ikina icyiciro cya kabiri mu Buholandi ikaba ikinamo n’umukinnyi w’umunyarwanda, Noam Emeran kuwa 6 w’icyumweru gishize yatsindaga ikipe yitwa Helmond Sports ibitego 2-1.

Noam Emeran muri uyu mukino yinjiye mu kibuga asimbuye,kuri ubu FC Groningen iri kumwanya wa 3 muri shampiyona ikaba izagaruka mu kibuga ku wa Gatanu w’iki cyumweru ikina na Den Bosch.

Kryvbas KR ikina icyiciro cya mbere muri Ukraine ikinamo kapiteni w’Amavubi, Bizimana Djihad ku wa Gatandatu  w’icyumweru gishize yatsindaga ikipe yitwa Vorskla ibitego 4-1.

Uyu mukinnyi ukina mu kibuga hagati yabanjemo ndetse arangiza umukino, Kryvbas KR iri ku mwanya wa Kabiri muri shampiyona ,izagaruka mu kibuga ku wa Kane.

Ikipe yo mu cyiciro cya mbere mu Bufaransa ya Toulouse ikinamo umukinnyi ufite inkomoko mu Rwanda,Warren Kamanzi uri no kuganirizwa ngo azakinire Amavubi,ejo yatsindwaga na Lens ibitego 2-1.

Uyu mukinnyi ukina asatira anyuze ku ruhande rw’iburyo yabanje mu kibuga gusa aza gusimbuzwa, Toulouse FC kuri ubu iri kumwanya wa 15 ikaba izagaruka mu kibuga ku cyumweru ikina na Metz.

Ku wa Kane  nibwo Manishimwe Djabel yakinaga umukino we wa mbere mu ikipe USM Khenchela ikina shampiyona y’icyiciro cya mbere muri  Algeria. Uyu wari umukino wa gicuti wabahuje na Crbaf ndetse uyu mukinnyi w’Umunyarwanda yahitse atsinda igitego cye cya mbere muri iyi kipe.

Abakinnyi nka Rafael York ikipe ye ya Gefle IF ikina icyiciro cya kabiri muri Sweden yakinnye ejo ku cyumweru inganya 2-2 ariko ntabwo yigeze akina, Rubanguka Steve ukina muri FC Zimbru ikina icyiciro cya mbere muri Moldova iyi kipe ejo yatsindwaga igitego 1-0 ariko nabwo uyu mukinnyi yagaragaye.

Ku bakinnyi bakina muri Libya barimo Manzi Thierry, Haruna Niyonzima na Mugisha Bonheur bo amakipe yabo ntabwo ari gukina.

Kuri uyu wa mbere Saa tatu z’ijoro ikipe ya AS Far Rabat ikinamo myugariro, Imanishimwe Emmanuel Manguende iraba imanuka mu kibuga ikina na MC Oujda muri shampiyona y’icyiciro cya mbere muri Morocco.

 

Djihad ikipe ye ya Kryvbas KR  yatsindaga ibitego 4-1

Manishimwe Djabel watsinze igitego cye cya mbere mu ikipe nshya 

Niwe wari umunyarwenya mukuru muri iki gitaramo cya Seka Live cyabaye mu ijoro ryo kuri iki Cyumweru tariki 24 Nzeri 2023 muri Kigali Conference and Exhibition Village ahazwi nka Camp Kigali mu ihema ryakira abantu barenga ibihumbi bitatu (3000).

Yaherukaga gutarmaira Abanyarwanda muri Nzeri 2022, icyo gihe hari hashize imyaka itanu batamuca iryera. Yagarutse i Kigali afite inkuru nyinshi zo kuvugaho zijyanye n'ubuzima yanyuzemo nyuma yo gupfusha ababyeyi, ibiganiro bigaruka ku buzima bwe bitambuka kuri DSTV, ubuzima n'imibereho by'u Rwanda, ukuntu Uganda yahagarariwe n'abantu 70 mu nama iheruka ya UN n'ibindi.

Ku rubyiniro yabanjirijwe n'abanyarwenya barimo No Stress uzwi cyane mu bitaramo by'urwenya bya Gen-Z Comedy, umunyarwenya akaba n'umunyamakuru wa Kiss Fm, Patrick Rusine, Dr Andre wo muri Uganda, Ambasaderi w'Abakonsomateri ndetse na Herve Kimenyi.

Ni igitaramo cyayobowe na Nkusi Arthur wagiye agaruka ku ngingo zinyuranye birimo ibimaze iminsi bivugwa ku mbuga nkoranyambaga nk'urubanza rwa Kazungu Denis wemeye ko yishe abantu barenga 14, Ikigo cy'Igihugu cy'Itangazamakuru RBA kisobanuye imbere ya PAC ku kuntu imodoka yabo yakoresheje Litre za essence zirenga 300, izamuka ry'ibiciro by'ibirayi, Zimbabwe yatowe Miss w'umuzungu n'ibindi.

Ni ubwa mbere ahabereye iki gitaramo huzuye ku buryo byari bigoye kubona aho umuntu yicara. Ahanini byatewe n'uko abaguze amatike ya VIP bari benshi, ku buryo bamwe batorohewe no kubona aho kwicara kugeza ubwo hongewemo izindi ntebe.

Ni Seka Live yari yihariye kandi, kuko yitabiriwe n'abakiri bato kugeza mu bakuze mu myaka, kandi harimo abantu bazwi muri 'Showbiz' nka Rocky usobanura filime, umusizi Junior Rumaga, Dj Dizzo, umunyamakuru akaba n'umuhanzi Uncle Austin, Jordan Mushambokazi witabiriye Miss Rwanda 2018 n'abandi.

Ni igitaramo cyamamajwe cyane kuva mu mezi abiri ashize, kandi cyagize imbaraga bitewe n'umubare w'abakunzi Anne Kansiime afite muri Kigali.

Nawe ageze ku rubyiniro, yavuze ko atajya abasha kwakira urukundo Abanyarwanda bamukunda, kandi ntiyabona amagambo abisobanuramo.

Yavuze ko buri gihe iyo atumiwe gutaramira i Kigali atajya ashidikanya kuko azirikana neza ko ari mu rugo. Uyu mubyeyi yataramiye abantu muri Seka Live ahuza umuziki n'urwenya, kuko yanyuzagamo akabaririmbira ubundi akabasetsa. Hari aho yaririmbye imwe mu ndirimbo ye izwi cyane yise 'Mwanjari'.

Kansiime yagiye araranganya amaso mu bantu akabaganiriza, ubundi akagaruka ku kuntu iwabo bari baturanye n'isoko ubundi akaza gucudika n'umusore bari baturanye.

Inkuru ye y'ukuntu yakundanye na Bob irasekeje. Kuko irangira avuga ukuntu uyu musore basohokanye akamugurira ibyo kurya birimo ifiriti bataha mu rugo umusore agakubitwa bitewe n'uko bari batinze. Kandi ngo bagiye barema imirimo yatumaga bahura n'ubwo ababyeyi babo babaga batabishaka.

Muri iki gitaramo, Kansiime yaserutse yambaye imyenda y'ibara ry'umutuku. Uyu mugore yavuze ko mu myaka ishize yanyuze mu bihe bikomeye, kuko yabuze ababyeyi be 'mu gihe nanjye niteguraga kuba umubyeyi'- Ni agahinda avuga ko adafite uko yabara.

Ashimangira ko byinshi mu byo ateraho urwenya ari ibibazo by'ubuzima bwe ariko 'bigafasha abandi guseka no kubaho nanjye bikambeshaho'.

Yavuze ko ari umunyeshuri mwiza ku buryo buri kimwe kibaye mu buzima bwe kimusigira amasomo. Kansiime yanagarutse ku bw'ubwenge buremano (AI) n'imikorere ya Google.

Yakomeje avuga ko u Rwanda rwakiriye inama y'Abakuru b'Ibihugu yUmuryango uhuza ibihugu bikoresha Icyongereza (Commonwealth) izwi nka CHOGM (Commonwealth Heads of State and Government Meeting) benshi batabyumva ariko rwatsinze igitego cy'umutwe inama iraba ikandi igenda neza.

Avuga ko iyi nama yasize hubatswe ibikorwaremezo birimo n'imihanda kandi n'ubu irakoreshwa. Ati 'U Rwanda ndugereranya n'umugore ukizamuka, mwiza kandi wujuje buri kimwe.'

Yavuze ko adafite gushidikanya muri we ko u Rwanda rufite ubushobozi bwo kwakira igikombe cy'Isi ashingiye kubyo yiboneye. Ati 'Simbashidikanyaho. Sinzi impamvu tutabigeraho? Ariko se mwakiriye igikombe cy'Isi cyabera he?'

Uyu mugore yavuze ko u Rwanda rudasanzwe mu maso y'amahanga, anashingiye ku kuntu rwateje imbere ubukerarugendo, aho usanga ingagi zisurwa cyane. Avuga ko no muri Uganda zihari ariko zidafashwe kimwe n'izo mu Rwanda.

Yanavuze ko atiyumvisha ukuntu ibyamamare bisura u Rwanda bakifashisha imbuga nkoranyambaga zabo bakagaragaza ibihe byiza bahagiriye, ariko basura Uganda bakaryumaho. Ati 'Uganda nayigereranya na Google iri kuberera ubwenge karamano (AI) [u Rwanda].'

Kansiime yavuze ko yakozwe ku mutima n'imbwirwaruhame za Perezida Kagame, kandi ko yakuze yifuza kuba umuntu uvuga rikumvikana kandi uhindura ubuzima bw'abandi.  Anavuga ko yanyuzwe n'imiyoborere ya Perezida Kagame n'imibereho y'umuryango we.

Ambasaderi w'Abakonsomateri, umunyarwenya udasanzwe

Uyu mugabo yageze ku rubyiniro avuga ko yabaye umunyarwenya mu rwego rwo kwishakamo ibisubizo 'nk'uko Leta ihora ibidushishikariza'. Avuga ko mu ibarura yakoze yasanze abantu bafite ibibazo 104, kandi mu gihe cy'umwaka umwe hakemuka ibibazo bitatu hakiyongeramo bine.

Ambasaderi yikije cyane kuri serivisi zihabwa abantu-Avuga ko ntawe ukwiye kwihanganira guhabwa serivisi mbi kuko bigira ingaruka kuri we no ku gihugu.

Kuri we asanga bidakwiye ko wishyura ibitaro igihe umurwayi wawe yapfuye, kuko abaganga baba batakoze ibyo bari bashinzwe gukora.

Seka Live yo kuri iyi nshuro yari rurangiza…. Abantu basetse barihirika

Anavuga ko Camera zo ku muhanda zizwi nka Sophia zakabaye zitegurwa zikandikira umuntu ikosa inshuro imwe aho kuba buri cyuma cyose cyagufotora.

Uyu mugabo anavuga ko Polisi ikwiye gukora ibishoboka byose akuma kifashishwa mu kureba ko umuntu yasinze kagashyirwa mu tubari 'kugirango umuntu ajye anywa anipima'.

Yanavuze ko Ikinyarwanda gicyekennye mu magambo, kuko usanga uwitwa ko ari Umunyamabanga Uhoraho muri Minisiteri yirukanwa mu kazi kandi byumvikana ko ahoraho.

Uyu mugabo yanagurutse ku mibereho y'ingo muri iki gihe, asaba abagore kubaha abagabo babo, ariko kandi abagabo n'abo bagakunda abagore babo.

Akiva ku rubyiniro, Nkusi Arthur yavuze ko buri gihe iyo agiye gutumira 'Ambasaderi w'Abakonsomateri anza mu ntekerezo buri gihe'.

Rusine Patrick, yongeye gushimangira ubuhanga bwe muri Seka Live

Uyu musore yageze ku rubyiniro ashima byimazeyo Nkusi Arthur wamubereye ikiraro mu rugendo rwo gutera urwenya. Kuri we avuga ko iyo Arthur atamufasha 'nakabaye ndi ahandi hantu hatari hano'. Ati 'Ni uwo gushimirwa.'

Yabaze inkuru y'ukuntu yakodesheje imodoka ikamugora kubera ibibazo yari afite. Agaruka ku kanyamuneza yagize nyuma yo kubona akazi kuri Kiss Fm, ukuntu Austin yamufashije gutunga Miliyoni 1 Frw ku nshuro ye ya mbere n'ibindi.

Rusine yanavuze ko ari inzozi zabaye impano gukorana na Sandrine. Ati 'Byaranshimishije ku rwego mputakumva gukorana na Isheja. Ni umuntu mwiza cyane. Noneho icyanshimishije ni ugukorana nawe nsimbuye Nkusi Arthur. Ni ibi bya Seka Live nabivamo.'

Yanagarutse ku kuntu mu minsi ishize yabonye akazi mu bukangurambaga bwa gahunda ya Tunywe Less ariko basanga yasinze.

Umunyarwenya No Stress wafunguye iki gitaramo yateye urwenya ku ndirimbo 'Ideni' ya Chriss Eazy, agaruka ku ndirimbo z'abahanzi bahimbaza Imana n'ibindi.

Ni mu gihe umunyarwenya Dr Andre wo muri Uganda yagarutse ku ndirimbo 'Fou de Toi', avuga ko ikunzwe muri Uganda muri iki gihe kandi nawe ayiharaye.

Uyu musore yavuze ko ari ku nshuro ye ya kabiri ataramiye i Kigali, kuko yahaherukaga ibitaramo bya Seka Live bibera kuri M Hotel.

Yateye urwenya ku kuntu atinya ba gafotozi, ashingiye ku kuba hari ifoto yifotoje n'inshuti ze ari batanu, none batatu muri bo bamaze gupfa, kandi urupfu rwahereye iruhande ku buryo we na mugenzi be basigaye bafite ubwoba.

Herve Kimenyi, umunyarwenya ukoresha cyane ururimi rw'Igifaransa, yagarutse ku bihe byashize aho Televiziyo Rwanda yafungaga saa tanu z'ijoro, uburyo amatangazo yatambukaga kuri televiziyo azamuka, umunyamakuru Umutoni Rhadia wamamaye kuri TVR n'ibindi.

Uyu mugabo yanagarutse ku ihirikwa ry'ubutegetsi mu bihugu bitandukanye nka Gabo, anagaruka kuri Captain Traore wafashe ubutegetsi muri Burkinafaso n'ibindi.

Anne Kansiime yavuze ko yanyuzwe n'imiyoborere n'ubuhanga biranga Perezida Kagame
 

Kansiime yumvikanishije ko u Rwanda rudasanzwe mu maso y'amahanga, kuko rwakoze ibyo benshi batatekerezaga

Kansiime yavuze ko adafite gushidikanya muri we ko u Rwanda rwakakira Igikombe cy'Isi

Kansiime yataramiye abitabiriye Seka Live ahuza umuziki n'urwenya. Yanaririmbye indirimbo ye yise 'Mwanjari'

 

Umucuranzi wa Gitari usanzwe ari Producer w'ibiganiro bya Anne Kansiime

Kansiime yavuze ko buri gihe iyo agiye gutaramira mu Rwanda ari ibihe atabasha gusobanura neza 

Seka Live yabaye urubuga rufasha benshi kwiyibagiza ibibazo by’ubuzima  

Ambasaderi w'Abakonsomateri yongeye kugaruka kuri serivisi mbi abantu batakabaye bishimira-Yishimiwe mu buryo bukomeye 

Abarimo Jordan Mushambokazi, Nyambo uzwi cyane muri filime bitabiriye iki gitaramo

Malik Shaffy Lizinde washinze Kina Rwanda ari kumwe n’umugore we Nadia Umutoni ukorera RBA

Rusine yashimye Nkusi Arthur wabaye ikiraro cy'ibyo agezeho mu gutera urwenya- Anagaruka ku kazi yigeze gukorera Uncle Austin

Herve Kimenyi ni umwe mu banyarwenya bamaze igihe kinini kandi wagiye ataramira mu bihugu bitandukanye-Yavuze uburyo ababazwa n’abantu bavuga izina rye nabi

Promesse Kamanda ntiyacitswe n’iki gitaramo cya Seka Live

Ibihumbi by’abantu ntibacitswe na Seka Live yaherekeje Nzeri ya 2023
Umunyarwenya Dr Andre yataramiye ku nshuro ya kabiri muri Seka Live 

Byamusabye gufata akanya atekereza neza ibyo Anne Kansiime yavugaga muri iki gitaramo

Bisaba gukoma amashyi mu kumwerekana ko wanyuzwe n’ingingo yagarutsweho

Mu gitaramo nk’iki ukora uko ushoboye ugatahana urwibutso binyuze mu gufata amashusho

Rocky uzwi cyane mu gusobanura filime ari kumwe n’umusizi Rumaga muri iki gitaramo

Buri wese yasekaga mu buryo nyuma yo gucengerwa n’ingingo yabaga igarutsweho

Byari bigoye kwifata muri iki gitaramo- abantu basetse baratembagara

Umunyarwenya No Stress yagarutse ku ndirimbo zihimbaza Imana  

Nkusi Arthur yagarutse ku bimaze iminsi bivugwa cyane ku mbuga nkoranyambaga

Nkusi Arthur yagiye agaruka kuri buri munyarwenya wateye urwenya muri Seka Live

Kanda hano urebe amafoto meshi yaranze igitaramo cya Seka Live cyabereye muri Camp Kigali

AMAFOTO: Freddy Rwigema-InyaRwanda.com