Ambasaderi w’u Rwanda muri Loni, Kayinamura, yagarutse ku kibazo cy’umutekano muke mu Burasirazuba bwa Repubulika Iharanira Demokarasi ya Congo, agaragaza ko umutwe wa FDLR ugikomeje guteza ibibazo bikomeye ku Rwanda no mu Karere k’Ibiyaga Bigari. Ibi yabitangaje ku wa Gatatu tariki ya 15 Mata, mu nama y’Akanama k’Umutekano ka Loni yasuzumaga ishyirwa mu bikorwa ry’amasezerano y’amahoro, umutekano n’ubufatanye yashyizweho umukono mu 2013.
Ambasaderi w’u Rwanda muri Loni, Kayinamura, yagarutse ku kibazo cy’umutekano muke mu Burasirazuba bwa DRCÂ
Yavuze ko kuba FDLR igihari ari kimwe mu bibazo bikomeye bikomeje guhungabanya ituze ry’u Rwanda, ashimangira ko abagize uwo mutwe barimo abakoze Jenoside yakorewe Abatutsi mu 1994 bakomeje gukorera ibikorwa by’ubugizi bwa nabi muri Congo. Yagaragaje ko kuba uwo mutwe warakomeje kubaho ari imwe mu mpamvu nyamukuru zatumye ayo masezerano ashyirwaho umukono.
Amb. Kayinamura yasobanuye ko nubwo ayo masezerano amaze imyaka irenga icumi, ibibazo by’umutekano muke bikiriho bitewe n’uko ibikubiyemo bitashyizwe mu bikorwa uko bikwiye, cyane cyane mu bijyanye no gusenya FDLR. Yemeje ko ikibazo atari amasezerano, ahubwo ari uburyo yashyizwe mu bikorwa.
Yanagarutse ku kibazo cy’imvugo z’urwango n’ihohoterwa rikorerwa Abanyekongo bavuga Ikinyarwanda, cyane cyane Abanyamulenge, avuga ko kubita abanyamahanga bidindiza amahoro arambye. Yasabye ibiganiro byimbitse ku bibazo byose bihari.
Yasoje ashimangira ko amahoro arambye atagerwaho hifashishijwe intambara, ahubwo asaba ubufatanye, kubazwa inshingano no kubahiriza ibyo impande zose zemeye.
Umutwe wa FDLR ukomeje guhungabanya umutekano mu Karere
Prophet Vincent Mackay ukorera ivugabutumwa muri Leta Zunze Ubumwe za Amerika agiye kurushinga n’Umunyarwandakazi Kate Clinton Ndikumagenge, bamaze igihe bari mu munyenga w’urukundo.
Ku mugoroba wo kuri uyu wa Gatatu, tariki ya 15 Mata 2026, ni bwo Ndikumagenge abinyujije ku rukuta rwe rwa Instagram yatangaje ko agiye kurongorwa.
Mu mashusho ari kumwe n’umukunzi we, Ndikumagenge yavuze ko ari kubarira iminsi ku ntoki kugira ngo impeshyi igere, ashyingirwe n’umuntu yiyumvamo byihariye.
Yagize ati ‘Nishimiye cyane kuzizihiranwa n’inkoramutima zacu.’
Prophet Vincent Mackay na Kate Clinton Ndikumagenge, ntibatangaje igihe ubukwe buzabera, ariko amakuru yizewe ni uko bazabukorera mu Rwanda.
Prophet Vincent Mackay amaze igihe akundana na Ndikumagenge ndetse yamwambitse impeta y’urukundo mu 2022, mu gikorwa cyabereye mu Kirwa cya Santorini mu Bugiriki.
Urukundo rwabo baruhamiriza no mu bantu kuko nka Ndikumagenge, yahinduye amazina akoresha kuri Instagram, yiyita Kate Clinton Mackay ndetse mu bisobanuro biri munsi yayo harimo ko umuhanuzi we ari Vincent Mackay.
Mu byo Ndikumagenge anyuza kuri Instagram ye harimo n’imikino imwe n’imwe igaragaza ko bari mu rukundo.
Umunyarwandakazi Kate Clinton Ndikumagenge abinyujije ku rubuga rwa Instagram, azwi cyane mu kwigisha inzira y’agakiza binyuze mu kwamamaza ubutumwa bwiza mu nyigisho yise ‘Preeminent Touch’, atambutsaho.
Umukunzi we, Prophet Vincent, ni we washinze akaba anayobora Umuryango w’Ivugabutumwa witwa ‘Prayer Warriors Global’. Umaze imyaka itandatu aho ukorera muri Leta zitandukanye muri Amerika, Afurika, u Burayi na Amerika y’Amajyaruguru.
Abinyujije muri uyu Muryango, Prophet Vincent Mackay ategura ibiterane bigari mu bice bitandukanye by’Isi. Nko mu mpeshyi ya 2023, yahurije abagera kuri 500 mu cyo yise ‘Purpose Conference’ cyabereye i Dallas muri Texas.
Igitaramo aheruka gukora ni icyabereye muri Bethesda Holy Church mu Mujyi wa Kigali, ku wa 14 Ukuboza 2025, yise ‘Seek Conference Rwanda 2025’, aho yatumiye Israel Mbonyi, Itsinda ryo kuramya no guhimbaza Imana rya True Promises na Boanerges Gospel Group.
Prophet Vincent Mackay agiye kurongora Kate Clinton Ndikumagenge
Mu mukino wari utegerejwe cyane wa 1/2 cya UEFA Champions League wabereye kuri Allianz Arena ku wa Gatatu nijoro, ikipe ya Real Madrid yasezerewe na Bayern Munich mu mukino waranzwe n’amarangamutima akomeye, uburakari n’imvururu hagati y’abakinnyi.
Uyu mukino wari ugeze ku munota wa 83, Real Madrid iri imbere n’ibitego 3-2, mu gihe amakipe yombi yarimo anganya 4-4 mu mikino ibiri, bigana ku gihe cy’inyongera. Icyo gihe ni bwo habayeho guterana amagambo hagati ya Jude Bellingham na Vinicius Junior.
Bellingham yari yinjiye neza mu rubuga rw’amahina asaba Vinicius kumuha umupira, ariko Vinicius agerageje gutera yatambikwa na Dayot Upamecano, bituma uwo mupira utamugeraho. Ibyarakaje cyane Bellingham, maze agaragaza uburakari bwe. Mu mashusho yafashwe, Vinicius yasubije mugenzi we arakaye ati: ‘Urashaka iki? Funga umunwa wawe!’
Ibi byabaye mu gihe umukino wari ugeze ahakomeye cyane, ariko ibintu byarushijeho gukomera nyuma y’ikarita itukura yahawe Eduardo Camavinga ku munota wa 86. Camavinga yari amaze kubona indi karita y’umuhondo mbere, nyuma yo gukurura umwambaro wa Jamal Musiala, maze yirukanwa azira gutinza gutera coup-franc.
Minisitiri w’u Burundi ushinzwe Itumanaho n’Itangazamakuru, Gabby Bugaga, yasanzwe yapfuye mu gitondo cyo kuri uyu wa Kane, aho umurambo we wabonetse mu modoka yari iparitse mu mirima y’imikindo iri hafi y’umujyi wa Bujumbura.
Â
Gabby Bugaga yasanzwe mu modoka ye yapfuye
Amakuru atangwa n’inzego z’ubuyobozi n’iz’umutekano avuga ko umurambo we wabonwe n’abahinzi bari mu kazi kabo ka buri munsi, bawusanga mu modoka yo mu bwoko bwa pick-up yari iri hafi ya metero icumi uvuye ku muhanda unyura muri ako gace ka Kivoga, mu bilometero nka icumi uvuye mu murwa mukuru w’ubucuruzi, Bujumbura.
Amafoto yafashwe n’abaturage bagize uruhare mu kuwubona yakwirakwijwe ku mbuga nkoranyambaga, agamije kumenya uwo nyakwigendera ari we, aza kwemezwa n’inzego zitandukanye ko ari koko Minisitiri Gabby Bugaga.
Umwe mu bapolisi bo ku rwego rwo hejuru, utifuje ko amazina ye atangazwa, yemeje ko umurambo wabonetse ari uwe, ariko ashimangira ko icyateye urupfu rwe kitaramenyekana. Yongeyeho ko nyakwigendera yari afite igikomere ku mutwe, ndetse ko imodoka yari arimo yangiritse cyane ku ruhande rw’iburyo no inyuma, bigaragaza ko ishobora kuba yaragize impanuka ikomeye.
Undi muyobozi mu nzego z’ibanze mu ntara ya Bujumbura na we yemeje aya makuru, avuga ko hatangiye iperereza rigamije kumenya icyateye uru rupfu rudasobanutse.
Kuri ubu, bamwe mu bayobozi bakuru mu gihugu barimo Minisitiri w’Umutekano mu Gihugu, uw’Ubutabera, Umushinjacyaha Mukuru ndetse n’abayobozi mu nzego z’umutekano, bageze ahabereye ibi kugira ngo bakurikirane hafi iperereza.
Urupfu rwa Minisitiri Bugaga rwateje impaka nyinshi ku mbuga nkoranyambaga, aho benshi bibaza impamvu yaba yari muri ako gace ka kure, nijoro, kandi adafite abamurinda nk’uko bisanzwe ku bayobozi bo kuri urwo rwego.
Nyakwigendera Gabby Bugaga yari yarabanje kuba umunyamakuru kuri Radiyo na Televiziyo y’Igihugu cy’u Burundi (RTNB), nyuma akora mu nzego zitandukanye z’itumanaho mu bigo bya Leta, aza no kuba umwe mu bakozi ba Komisiyo y’Igihugu y’Amatora (CENI), mbere yo kugirwa Minisitiri w’Itumanaho mu mwaka wa 2025.
Iperereza rirakomeje kugira ngo hamenyekane ukuri ku rupfu rwe.
Umuvugizi w’Urwego rw’Ubugenzacyaha, Dr Murangira B. Thierry, yemeje ko dosiye ya Eric Semuhungu yamaze gushyikirizwa Ubushinjacyaha ku wa 14 Mata 2026, kugira ngo hatangire iperereza ryimbitse ku byaha akekwaho.
Nk’uko byatangajwe, Eric Semuhungu akurikiranyweho ibyaha bitatu bikomeye birimo gukoresha undi imibonano mpuzabitsina ku gahato, gushyira ku karubanda amashusho ajyanye n’imikoreshereze y’ibitsina, ndetse no gukangisha gusebanya. Ibi byaha bivugwa ko byakozwe mu bihe bitandukanye, bikaba byaratumye inzego z’umutekano zitangira kumukurikirana kugeza ubwo afashwe.
Dr Murangira yavuze ko kohereza dosiye mu Bushinjacyaha ari intambwe ikomeye mu rugendo rwo gushaka ukuri no kurenganura ababa barahohotewe, anasaba abaturage gukomeza gutanga amakuru ku byaha nk’ibi kugira ngo bikumirwe hakiri kare.
Ubwami bw’ U Bubiligi bukomeje kugaragaza izamuka rikabije ry’umubare w’abasaba ubuhungiro baturuka muri Repubulika iharanira Demokarasi ya Congo aho mibare igaragaza ko mu mwaka wa 2023, abasaba ubuhungiro bari hafi 1,250, mu gihe mu 2025 bageze ku 2,500. Mu mezi atatu ya mbere ya 2026 gusa, hamaze kwakirwa ubusabe burenga 450, ibintu byerekana ko iyi mibare ikomeje kuzamuka ku muvuduko ukabije.
Iyi mibare yatangajwe ku wa Mbere tariki ya 13 Mata 2026, i Kinshasa, aho Minisitiri w’u Bubiligi ushinzwe ubuhunzi n’abimukira, Anneleen Van Bossuyt, yari ari mu ruzinduko rw’akazi.
Anneleen Van Bossuyt yagaragaje ko ikibazo cy’abanyekongo basaba ubuhungiro giteye impungenge
Muri uru ruzinduko, yagiranye ibiganiro n’abayobozi ba Congo ku bibazo bitandukanye bijyanye n’abimukira. Mu ijambo rye, Minisitiri Van Bossuyt yagaragaje ko u Bubiligi bumaze igihe buhanganye n’iyongera rikabije ry’abasaba ubuhungiro baturuka muri RDC, ashimangira ko ‘iyi mibare irenze urugero.’ Yavuze ko n’ubwo Abanye-Congo bakirwa, bagomba kubahiriza amategeko n’inzira zemewe n’amategeko.
Minisitiri yanibukije ko gusaba ubuhungiro bigengwa n’amasezerano mpuzamahanga arimo ay’ I Genève, kandi ko bigenewe gusa abantu bahuye n’ihohoterwa rikomeye cyangwa bafite impamvu zifatika zituma bahunga.
Yagaragaje ko abenshi mu Basaba ubuhungiro bakomoka i Kinshasa aho kuba mu burasirazuba bwa Congo burimo intambara, bityo ko hari ababa badafite impamvu zifatika zo guhabwa ubuhungiro.
Yanihanangirije abakoresha inyandiko mpimbano cyangwa amakuru atari yo, avuga ko ari uburiganya bushobora kubagiraho ingaruka zikomeye. Yongeyeho ko gukoresha Visa ya Schengen ugamije kwinjira mu Bubiligi hanyuma ugasaba ubuhungiro ari uguhabanya intego yayo, kuko igenewe ingendo z’igihe gito nko gusura cyangwa ubucuruzi, atari ugutuyeyo burundu.
Ku birebana n’ingaruka, yavuze ko abazahabwa ibisubizo bibi bazasabwa kuva ku butaka bw’u Bubiligi mu gihe gito. Abatazabyubahiriza bashobora kubaho mu buryo butemewe, batemerewe gukora cyangwa kubona ubufasha, ndetse bakaba bashobora gufatwa bagashyirwa mu bigo bifungirwamo abimukira mbere yo koherezwa mu gihugu cyabo ku gahato.
Nubwo bimeze bityo, u Bubiligi na RDC bifitanye amateka akomeye y’ubufatanye, bigaragarira mu mubare munini w’Abanye-Congo batuye muri iki gihugu cy’i Burayi, harimo abanyeshuri, abakozi ndetse n’abagiye mu buryo bwo kongera guhura n’imiryango yabo.
Gusa nk’uko abasesenguzi babivuga, impamvu zitandukanye z’imbere mu gihugu cya Congo zikomeje gutuma abaturage bahunga. Muri zo harimo umutekano muke mu burasirazuba bw’igihugu, by’umwihariko intambara ifitanye isano n’umutwe wa AFC/M23, ibibazo bya politiki bidashira, ubukungu bwifashe nabi n’ubuzima bugenda burushaho gukomera ku baturage.
Nubwo hari ibiganiro n’ingamba zitandukanye zivugwa, biracyagaragara ko ibibazo by’imbere mu Repubulika iharanira Demokarasi ya Congo bitarakemuka ku buryo bufatika, ari na byo bikomeje gutuma umubare w’abashaka ubuhungiro mu mahanga wiyongera uko bukeye n’uko bwije.
Umuhanzi w’icyamamare muri Afurika, Diamond Platnumz, yemeje ko azataramira i Kigali mu Rwanda, mu ruhererekane rw’ibitaramo yise ‘Retro Tour’, azakorera mu bihugu bitandukanye byo muri Afurika ndetse no muri Australia.
Nk’uko bigaragara ku ngengabihe y’ibi bitaramo, igitaramo cyo mu Rwanda kizaba ku wa 29 Kanama 2026, aho abazitabira bazabona uburyohe bw’umuziki w’uyu muhanzi umaze igihe uri ku isonga muri Afurika y’Iburasirazuba.
Ibi bitaramo bizatangirira iwabo muri Mwanza tariki ya 25 Mata 2026, bikazanyura mu mijyi itandukanye irimo Dodoma, Mbeya, Arusha muri Uganda, Maroc na mbere yo gukomereza mu bindi bihugu birimo Zambia.
Urugendo rwa ‘Retro Tour’ ruzasorezwa hanze ya Afurika aho azahita ajya muri Australia mu mujyi wa Melbourne ku wa 11 Ukwakira 2026, nyuma yo gutaramira i Perth ku wa 10 Ukwakira 2026.
Ibi bitaramo bitegerejwe n’abakunzi b’umuziki cyane cyane dore ko uyu muhanzi ari umwe mu bamaze igihe ku itara ry’umuziki wa Afurika muri rusange.
Uyu muhanzi w’icyamamare ku ruhando Mpuzamahanga yaherukaga i Kigali mu Ukwakira kwa 2023 ubwo yitabiraga itangwa ry’ibihembo bya Trace Awards.
Ku itariki ya 8 Mata 2026, Urukiko rw’Ubujurire i Paris mu Bufaransa rwagombaga gutanga icyemezo gikomeye cyane mu rubanza rumaze imyaka 16 rukurikirana Agathe Habyarimana,umugore wa Perezida w’u Rwanda Juvénal Habyarimana wari inking ya mwamba mu kazu.
Icyo cyemezo cyagombaga kugaragaza niba iperereza ku byaha aregwa rizakomeza cyangwa rizasozwa burundu binyuze mu ‘non-lieu’ (kudashyikirizwa urukiko).
Urukiko rwemeje indi tariki ya 6 Gocurasi 2026 ko aribwo ruzatangaza umwanzuro.Â
Ashinjwa ubufatanyacyaha muri jenoside yakorewe Abatutsi, ubufatanyacyaha mu byaha byibasiye inyokomuntu, ndetse n’ubufatanyacyaha mu mugambi wo gukora jenoside.
Ibyaha byose bifitanye isano na Jenoside yakorewe Abatutsi yakozwe hagati ya Mata na Nyakanga 1994, igatwara Abatutsi basaga miliyoni.
Mu mpera za Mutarama 2026, abacamanza b’Urukiko rw’Ubujurire i Paris bateranye mu ibanga bareba ubujurire bwatanzwe n’Ubushinjacyaha bukuru bushinzwe kurwanya iterabwoba hamwe n’imiryango iharanira inyungu z’abarokotse.
Ibi byari bijyanye n’icyemezo cyafashwe ku itariki ya 20 Kanama 2025, aho umucamanza wari ushinzwe iperereza yavuze ko nta ‘bimenyetso bihagije’ bihari byatuma Agathe Habyarimana ajyanwa mu rukiko.
Abamwunganira bavuga ko ari isozwa risanzwe ry’iperereza rirerire cyane, ryabayemo abacamanza benshi barenga icumi. Ariko ubushinjacyaha n’abaregera indishyi bavuga ko iperereza ryakozwe nabi, ryaranzwe no kudakora ubushakashatsi bwimbitse hagahitwamo ibimenyetso bishyigikira uruhande rumwe gusa.
Mu rubanza, Agathe Habyarimana agaragazwa mu buryo bubiri butandukanye: hari abamufata nk’uwagize uruhare mu miyoborere yari ifite aho ihuriye n’imyiteguro ya jenoside, abandi bakamugaragaza nk’uwahohotewe n’ibihe bikomeye byakurikiye iyicwa rya Perezida Habyarimana.
Imwe mu ngingo zikomeye ziri muri uru rubanza kandi zishinja Kanziga ni ijambo ‘akazu’, ryakoreshwaga mu kuvuga itsinda ry’abantu bake ba hafi y’umuryango wa Perezida Habyarimana, bakekwaho kugira uruhare rukomeye mu miyoborere no mu migambi yagejeje u Rwanda kuri jenoside.
Hari inyandiko yanditswe n’umuhezanguni Gaspard Musabyimana, wahoze mu nzego z’ubutasi mu Rwanda, yakoreshejwe nk’inyigo y’impuguke, nyamara ubushinjacyaha buvuga ko ari inyandiko y’ubwunganizi ya propaganda.
Nanone hari ibitekerezo by’umunyamateka Bernard Lugan, inshuti magara y’interahamwe kuba byarifashishijwe mu nyandiko y’urukiko.
Ikindi cyateje impaka ni uko iperereza ritigeze ryinjira cyane mu ruhare rw’u Bufaransa nyuma y’itangira rya jenoside.
Hari inyandiko z’ubutasi bw’u Bufaransa (DGSE) zagaragaje ko hari ibikorwa byo kugerageza kohereza intwaro no gushaka ubufasha bwa gisirikare mu gihe cya jenoside, bikorwa n’abantu bari hafi y’umuryango wa Habyarimana.
Zimwe muri izo nyandiko zigaragaza ko hari abacanshuro b’abafaransa nka Bob Denard na Paul Barril bakoranye n’abantu bo mu muryango wa Habyarimana mu gihe cya Jenoside. Ibi ariko ntibyigeze bishyirwa mu isuzuma ry’uru rubanza, bikaba kimwe mu byanenzwe cyane n’abaregera indishyi.
Umwe mu ba blogger bazwi cyane mu Rwanda, Jay Squeezer, yongeye kuvugisha benshi nyuma yo gutangaza ko yatewe n’abantu atazi mu rugo iwe nijoro ryo ku wa 13 Mata, bakamukubita bikabije kugeza ubwo ubuzima bwe bwari mu kaga.
Nk’uko yabitangaje kuri channel ya YouTube ye Kasuku Media Tv, yavuze ko abo bagizi ba nabi binjiye iwe bambaye (mask) ku buryo byamugoye kubamenya. Icyamutangaje kurushaho ni uko bavugaga Ikinyarwanda neza, ibintu byatumye hakeka ko bashobora kuba ari abantu basanzwe baba hafi cyangwa se bafite aho bahuriye n’aho atuye.
Mu magambo ye yuzuyemo agahinda n’ubwoba, Jay Squeezer yagize ati: ‘Bamfashe barankubita bikabije, ku buryo numvaga ubuzima bwanjye burangiye, bankubise nk’izasagutse kuri Yesu.’
Aya magambo agaragaza ubukana bw’ihohoterwa yakorewe, ndetse anatera impungenge abakurikiranira hafi ibikorwa bye ku mbuga nkoranyambaga.
Amakuru aturuka hafi ye avuga ko aba bantu bashobora kuba bari bafite umugambi mubisha, ndetse hakaba hakekwa ko bashobora kuba baratumwe n’undi muntu utaramenyekana kugeza ubu. Ibi byatumye benshi batangira kwibaza ku mutekano w’abanyamakuru n’abakora ibijyanye no gutangaza amakuru kuri internet mu Rwanda, dore ko mu bisanzwe ubu atari kubarizwa mu Rwanda aho ari muri Leta Zunze Ubumwe z’Amerika
Nubwo kugeza ubu inzego z’umutekano zitaragira byinshi zitangaza kuri iki kibazo, haracyakomeje iperereza kugira ngo hamenyekane abihishe inyuma y’iki gitero. Abakunzi ba Jay Squeezer bakomeje gusaba ko hakorwa iperereza ryimbitse, kugira ngo abakoze ibi bagezwe imbere y’ubutabera.
Iyi nkuru yasize benshi mu rujijo, bamwe bibaza niba koko ari igitero cyateguwe neza cyangwa niba hari ibindi byihishe inyuma yacyo. Icyakora, ikigaragara ni uko ubuzima bw’uyu mu blogger bwari mu kaga, kandi hakenewe ingamba zihamye zo kurinda abakora umwuga nk’uwe.
Rutahizamu w’ikipe y’igihugu Amavubi na Zira FK muri Azerbaijan, Leroy-Jacques Mickels yasabye urubyiruko gukomeza kugira uruhare mu kubaka igihugu.
Ni ubutumwa uyu rutahizamu yatanze mu gihe u Rwanda rwibuka ku nshuro ya 32 Jenoside yakorewe Abatutsi mu 1994.
Mu kiganiro yahaye ikinyamakuru ISIMBI, Leroy-Jacques Mickels yasabye urubyiruko kwigira ku mateka rukubaka u Rwanda rushingiye ku bw’ubahane, urukundo no guterwa ishema n’igihugu cyabo.
Ati “Muri iki gihe cyo twibuka abacu, ubutumwa ku banyarwanda bagenzi banjye by’umwihariko urubyiruko ni ukugumya kuba umwe.”
