Category: Uncategorized

Umuhanzi nyarwanda Mugisha Benjamin uzwi nka The Ben amaze iminsi ari mu bitaro nyuma yo gufatwa n’uburwayi butunguranye bwamufashe ku munsi wo ku Cyumweru tariki ya 13 Mata 2026.

Amakuru aturuka ku nshuti ze za hafi ndetse n’umufashe we Uwicyeza Pamella avuga ko yumvise atameze neza kuva ku Cyumweru, nyuma y’urugendo yari yagiriye ku Rwibutso rwa Jenoside rwa Kigali ku Gisozi. Nyuma yo kumva uburwayi bwiyongera, yahisemo gutandukana n’abo bari kumwe kare kugira ngo ajye kuruhuka.

Bigeze mu masaha y’ijoro, ubuzima bwe bwarushijeho kumererwa nabi, bituma ajyanwa kwa muganga byihuse. Kuri ubu ari kwitabwaho n’abaganga mu bitaro bya Kanombe, aho akomeje gukurikiranwa n’abaganga, nubwo indwara arwaye itaratangazwa ku mugaragaro.

Uburwayi bwa The Ben buje mu gihe yari mu myiteguro y’ibitaramo bikomeye azahuriramo na Bruce Melodie, biteganyijwe kuzenguruka imijyi ine yo mu Rwanda. Ibi bitaramo byari gukurikira igitaramo ‘The New Year Groove’ yakoreye muri BK Arena ku wa 1 Mutarama 2026.

Abakunzi b’umuziki we bakomeje kugaragaza impungenge, bamusabira gukira vuba kugira ngo yongere agaruke ku rubyiniro.

Source : https://kasukumedia.com/the-ben-amaze-iminsi-ari-mu-bitaro-nyuma-yo-gufatwa-nuburwayi-butunguranye/

Urwego Ngenzuramikorere mu Rwanda, RURA, rwagaragaje ko habayeho izamuka rishya ku biciro by’ibikomoka kuri peteroli, aho igiciro cya  lisansi cyiyongereyeho amafaranga 635 y’u Rwanda kuri litiro.

Iyi mpinduka ije mu gihe ibiciro by’ibikomoka kuri peteroli ku isoko mpuzamahanga bikomeje kuzamuka, bigira ingaruka ku bihugu byinshi birimo n’u Rwanda rutumiza ibikomoka kuri peteroli hanze y’igihugu.

Mu itangazo ryashyizwe ahagaragara na RURA, hagaragajwe ko iri zamuka rishingiye ku mpamvu zitandukanye zirimo ihindagurika ry’ibiciro ku rwego mpuzamahanga, ibiciro byo gutwara peteroli, ndetse n’igipimo cy’ivunjisha ry’amafaranga. Ibi byose byatumye igiciro cya lisansi ku isoko ryo mu Rwanda kigomba kongerwa kugira ngo kijyane n’igihe.

Abasesenguzi mu by’ubukungu bavuga ko izamuka nk’iri rifite ingaruka zihita zigaragara ku buzima bwa buri munsi bw’abaturage. Ubwikorezi bushobora guhenda kurushaho, ibiciro by’ibiribwa n’ibindi bicuruzwa bikazamuka bitewe n’uko ibiciro byo kubigeza ku isoko byiyongera.

The post Igiciro cya lisansi cyiyongereyeho 635 Frw appeared first on FLASH RADIO&TV.

Source : https://flash.rw/2026/04/17/igiciro-cya-lisansi-cyiyongereyeho-635-frw/

Nyuma yo kuvuga ko AS Kigali atari ikipe y’Umujyi wa Kigali, uyu Mujyi ushobora kwisanga nta yandi mahitamo uretse gukorana nayo kuko ibyifuzo byawo byose byatewe ishoti.

Umujyi wa Kigali wari wasabye amakipe atatu usanzwe ufasha (AS Kigali, Kiyovu Sports na Gasogi United) kwishyira hamwe agakora ikipe imwe ikajya mu nshingano z’Umujyi wa Kigali.

Aya makipe yari yahawe kugeza tariki ya 30 Werurwe 2026 akaba yamaze guhura yanatanze umwanzuro ku Mujyi wa Kigali.

Tariki ya 18 Werurwe 2026 Umuvugizi w’Umujyi wa Kigali, Emma Claudine yari yabwiye ISIMBI ko impamvu bashaka ikipe ntayo bafite cyane ko na AS Kigali atari iy’Umujyi ubu yigenga.

Amakuru ISIMBI yamenye ni uko Kiyovu Sports na Gasogi United icyifuzo cyo kwihuza akaba ikipe imwe uko ari atatu bagiteye utwatsi batagikozwa ni mu gihe AS Kigali yo yabyemeye.

Amakuru ISIMBI yamenye ni uko mu ntangiriro za Mata 2026 ni bwo AS Kigali yandikiye Umujyi wa Kigali iwumenyesha ko yo kwihuza n’andi makipe ntacyo biyitwaye yo yiteguye.

Umujyi wari ufite gahunda ko mu gihe aya makipe yakwanga kwihuza uzahita ushinga ikipe yawo, ubu rero urimo kureba niba aho gushinga ikipe ahubwo wafata AS Kigali akaba ari yo bashoramo ubushobozi bwose.

Ntacyo Umujyi wa Kigali urifuza kuvuga kuri iyi ngingo kuko inshuro zose ISIMBI yagerageje kuvugana n’Umuvugizi w’Umujyi wa Kigali, yavuze ko “Ngiye kureba uko bimeze nkubwire” ariko bikarangira atongeye kugira icyo asubiza.

Source : http://isimbi.rw/as-kigali-yihakanywe-n-umujyi-ishobora-kungukira-mu-kwinangira-kwa-kiyovu-na-gasogi.html

Abahanzi b’ibyamamare ku rwego mpuzamahanga barimo Chris Brown na Usher batangaje gahunda idasanzwe yo guhurira mu rugendo rw’ibitaramo bihuriweho bise ‘The R&B Tour’, ruzabera mu mijyi itandukanye yo muri Amerika na Canada mu mwaka wa 2026.

Ibi bitaramo bitegurwa na sosiyete ikomeye ya Live Nation, bikazaba bigizwe n’amatariki 33, aho aba bahanzi bombi bazajya basusurutsa abakunzi babo mu buryo bugezweho, bahuza imbaraga zabo mu ndirimbo za R&B zakunzwe cyane ku Isi. Ni igikorwa cyitezweho kuzaba amateka, kuko aba bombi bafite izina rikomeye muri iyi njyana.

Mu mijyi izagerwamo harimo Las Vegas, aho bazataramira kuri Allegiant Stadium inshuro ebyiri, ku matariki ya 5 na 6 Nzeri 2026. Biteganyijwe ko ibi bitaramo bizakurura imbaga y’abakunzi b’umuziki baturutse hirya no hino ku Isi.

Uretse kuba ari ibitaramo byo kwidagadura, uru rugendo rufite n’intego nziza, kuko ruzagira uruhare mu bikorwa byo gufasha abana kubona uburezi, binyuze mu mishinga y’ubugiraneza izajyana n’ibi bitaramo.

‘The R&B Tour’ ni kimwe mu bikorwa bikomeye byitezwe mu muziki mu 2026, bikaba bigaragaza ubufatanye n’imbaraga z’abahanzi babiri bakomeje kugira uruhare rukomeye mu guteza imbere injyana ya R&B ku rwego rw’Isi.

Source : https://kasukumedia.com/chris-brown-na-usher-bagiye-guhurira-mu-bitaramo-33-bikomeye-bya-the-rb-tour/

Depite Nyabyenda Damien, yabwiye Abaturage b’Umurenge wa Runda ya Kamonyi hamwe n’inshuti zabatabaye kuri uyu wa 15 Mata 2026, mu kwibuka ku nshuro ya 32 Jenoside yakorewe Abatutsi mu 1994, ko’INKOTANYI NI UBUZIMA’ ku Banyarwanda. Ati’ Perezida wa Repubulika, Paul Kagame n’Ingabo za FPR-Inkotanyi yari ayoboye bahagaritse Jenoside yakorerwaga Abatutsi. Inkotanyi ni Ubuzima, tuzahora dushimira Umutima w’Urukundo n’Ubwitange bagaragarije u Rwanda n’Abanyarwanda’.

Depite Nyabyenda, yibukije abaje Kwibuka ku nshuro ya 32 Jenoside yakorewe Abatutsi mu 1994 ko Kwibuka ari umwanya wo kunamira no guha icyubahiro Abatutsi bishwe bazira uko baremwe, ariko kandi no kuzirikana Amateka mabi u Rwanda rwaciyemo hagamijwe gukuramo isomo kugira ngo Jenoside itazongera kubaho ukundi.

Yagize kandi ati’ Ingengabitekerezo ya Jenoside yigishijwe igihe kirekire. Abakoroni basenye Ubumwe bw’Abanyarwanda kugira ngo babone uko bigarurira Abanyarwanda!, Ubutegetsi bwa Repubulika ya mbere n’iya Kabiri bwubakiye kuri iyo Politiki mbi, bigisha ivangura ry’amoko, bakomeza gukwirakwiza ingengabitekerezo ya Jenoside yagejeje kuri Jenoside yakorewe Abatutsi mu 1994‘. Akomeza avuga ko kwica Abatutsi no kubajugunya mu migezi byatangiye cyera.

Yibukije ko muri Repubulika ya Kabiri, kwica Abatutsi no kubajugunya muri Nyabarongo byongeye kwibutswa na Mugesera Leo muri Mitingi ya MRND yabereye ku Kabaya mu mwaka w’1992 tariki 22 Ugushyingo.

Depite Nyabyenda, ahamya ko iryo jambo rya Mugesera Leo yavugiye ku Kabaya muri iyo Mitingi ari kimwe mu bimenyetso bidashidikanywaho cy’uko Jenoside yakorewe Abatutsi yateguwe cyera mbere y’ihanurwa ry’indege y’uwari Perezida w’u Rwanda, Habyarimana Juvenal.

Yashimiye Perezida Paul Kagame n’Ingabo za RPA, ku guhagarika Jenoside bakarokora Abatutsi bicwaga, ariko kandi bakanabohora Igihugu. Ati’ Turashimira Nyakubahwa Perezida wa Repubulika, Paul Kagame n’Ingabo za FPR-Inkotanyi yari ayoboye, bahagaritse Jenoside yakorerwaga Abatutsi. Inkotanyi ni ubuzima, tuzahora dushimira Umutima w’Urukundo n’Ubwitange bagaragarije u Rwanda n’Abanyarwanda. Kubohora Igihugu no guhagarika Jenoside yakorewe Abatutsi byabaye Umusingi wo kongera kubaka Ubumwe n’Ubudaheranwa bw’Abanyarwanda‘.

Yagize kandi ati’ Twongeye gushima Nyakubahwa Perezida wa Repubulika, Paul Kagame wongeye kubanisha Abanyarwanda, u Rwanda rukaba rwubakiye ku ndangagaciro n’ihame ry’Ubunyarwanda‘.

Depite Nyabyenda Damien, yabwiye abitabiriye Kwibuka ku nshuro ya 32 Jenoside yakorewe Abatutsi mu 1994, by’umwihariko I Runda ko Jenoside yahagaritswe n’Abanyarwanda amahanga arebera. Yasabye buri wese guharanira gukomeza umuco wo kwishakamo ibisubizo nk’Abanyarwanda kuko ngo ak’imuhana kaza imvura ihise.

Yabasabye kandi ati’ Ni ngombwa ko Abanyarwanda dukomeza Ubumwe bwacu twiyemeza guhangana no kurwanya abashaka kugarura amacakubiri. Tugomba kurwanya abahakana n’abapfobya Jenoside, abakwirakwiza Ingengabitekerezo ya Jenoside aho baba bari hose, baba mu Rwanda, mu karere no hirya no hino ku Isi‘.

Kwibuka Jenoside yakorewe Abatutsi mu 1994 by’umwihariko mu Murenge wa Runda ari naho hahoze ari muri Komine Runda, byabanjirijwe n’Urugendo rwakozwe kuva ku biro by’uyu Murenge, abarukoze bajya kunamira no gushyira Indabo kuri Nyabarongo, aho abenshi mu batutsi bishwe bakuwe kuri Paruwasi Gatolika ya Gihara bakazanwa kujugunywa muri Nyabarongo. Tariki ya 15 Mata 1994, ni itariki Abatutsi bishwe ari benshi ndetse inafatwa nk’iyatangirijweho Jenoside ku mugaragaro I Runda, Gihara kuri Kiliziya Gatolika ku batutsi bari bahahungiye bumva ko ubwo ari mu Kiliziya bahabonera Umukiro, ariko abicanyi barahabasanga batangira kubica.

Théogène Munyaneza

The post Runda-Kwibuka32: Inkotanyi ni Ubuzima, tuzahora dushimira Umutima w’Urukundo n’Ubwitange-Depite Nyabyenda Damien first appeared on Intyoza.

The post Runda-Kwibuka32: Inkotanyi ni Ubuzima, tuzahora dushimira Umutima w’Urukundo n’Ubwitange-Depite Nyabyenda Damien appeared first on Intyoza.

Source : https://intyoza.com/2026/04/16/runda-kwibuka32-inkotanyi-ni-ubuzima-tuzahora-dushimira-umutima-wurukundo-nubwitange-depite-nyabyenda-damien/

Mu gihugu cya Uganda, urubanza rw’umugabo witwa Christopher Okello w’imyaka 38 rukomeje kuburanishirizwa mu ruhame, rukaba rwarakuruye impaka nyinshi mu baturage no mu itangazamakuru. Uyu mugabo akurikiranyweho icyaha gikomeye cyo kwica abana bane, bivugwa ko yabasanze ku ishuri aho bigaga.

Nk’uko bikomeje kugarukwaho mu rukiko, Okello akekwaho kuba yarakoze icyo gikorwa mu buryo bwateguwe, ibintu byateye ubwoba abaturage, cyane cyane ababyeyi bafite abana biga. Ibi byatumye ubuyobozi bukaza ingamba zo gukaza umutekano mu bigo by’amashuri.

Christopher Okello bivugwa ko afite pasiporo zo muri Leta Zunze Ubumwe za Amerika, ndetse akaba yunganiwe n’umunyamategeko yashyiriweho ku bufasha bw’ambasade ya Amerika. Ibi byatumye uru rubanza rufata indi ntera, ruba n’inkuru iri gukurikiranwa no ku rwego mpuzamahanga.

Nubwo akurikiranyweho ibi byaha bikomeye, Okello akomeje kuburana ahakana yivuye inyuma ibyaha byose ashinjwa, avuga ko nta ruhare na ruto yabigizemo. Abamwunganira mu mategeko nabo bakomeje kugaragaza ko hakiri ibimenyetso bikwiye gusuzumwa neza mbere yo gufata umwanzuro.

Hari amakuru avuga ko uyu mugabo yaba afite imyizerere idasanzwe, irimo n’iy’uko igitambo cy’amaraso gishobora kuzana amahirwe cyangwa ubutunzi. Nubwo ibi bivugwa, inzego z’ubutabera ziracyari mu iperereza ngo hamenyekane ukuri kw’ibyo ashinjwa.

Uru rubanza rukomeje gukurikiranwa n’imbaga y’abantu batandukanye, bitewe n’uburemere bw’ibyaha bivugwa ndetse n’ingaruka byagize ku miryango yabuze abana babo. Abaturage benshi bakomeje gusaba ubutabera buboneye, mu gihe hakomeje gutegurwa iburanisha rikurikira rizatanga icyerekezo cy’aho uru rubanza rugeze.

Source : https://kasukumedia.com/uganda-urubanza-rwumugabo-ukekwaho-kwica-abana-bane-rukomeje-guteza-impaka/

Umukino uzahuza Arsenal na Manchester City utegerejwe n’abakunzi b’umupira w’amaguru ku isi hose, aho amakipe yombi akomeje guhatana bikomeye mu rugenda rugana ku gikombe cya Premier League.

Abasesenguzi b’umupira bagaragaza ko uyu mukino ushobora kuba uw’ingenzi mu kugena icyerekezo cy’uzatwara igikombe. Arsenal iyobowe na Mikel Arteta iri kwitwara neza muri iyi minsi, igaragaza imikinire yihuta ishingiye ku gusatira no gukoresha neza impande z’ikibuga.

Ku rundi ruhande, Manchester City ya Pep Guardiola ikomeje kugaragaza ubunararibonye n’imikinire ishingiye ku kugenzura umupira no kurema uburyo bwinshi bw’ibitego. Ibi bituma uyu mukino uba nk’intambara y’amayeri hagati y’abatoza babiri bafite ubumenyi buhambaye.

Abakinnyi b’ingenzi nabo bitezweho gutanga itandukaniro. Bukayo Saka na Gabriel Martinelli bashobora guteza ibibazo ku bwugarizi bwa City, mu gihe Erling Haaland na Semenyo nabo bitezweho kubangamira ikipe ya Arsenal.

Abasesenguzi kandi bemeza ko amakipe yombi afite ubushobozi bwo gutsinda, ariko uzitwara neza kurusha undi mu kwirinda amakosa no gukoresha amahirwe abonetse, ari we uzegukana intsinzi.

Nubwo bigoye guhanura neza uzatsinda, benshi bemeza ko uyu mukino ushobora kurangira habonetse ibitego byinshi cyangwa amakipe yombi akanganya bitewe n’uburyo yose afite imbaraga zisatira.

Mu gusoza, umukino wa Arsenal na Manchester City si umukino usanzwe, ahubwo ni urugamba rwerekana urwego rwa buri kipe mu guhatanira igikombe cya shampiyona, bikaba byitezwe ko uzatanga ibyishimo byinshi ku bakunzi b’umupira w’amaguru.

Umukino wa Arsenal na Manchester city uzaba kuri iki cyumweru tariki saa kumi n’ebyiri n’igice ku masaha y’I Kigali no mu Rwanda hose ubere kuri Etihad stadium ikibuga cy’ikipe ya Manchester city.

The post ARSENAL VS M.CITY: UMUKINO W’AMAYERI KU BATOZA appeared first on FLASH RADIO&TV.

Source : https://flash.rw/2026/04/17/arsenal-vs-m-city-umukino-wamayeri-ku-batoza/

Mu mikino ya 1/4 cya UEFA Champions League cyakinwe kuri uyu wa Gatatu, amakipe ya Bayern Munich na Arsenal ni yo yakomeje muri 1/2, asezereye Real Madrid na Sporting Lisbon mu mikino yari ihanzwe amaso kubera ihangana rikomeye ryagaragayemo.

Ku ruhande rwa Bayern Munich, umukino wabereye ku kibuga Allianz Arena mu gihugu cy’u Budage wasize inkuru itazibagirana.

Bayern yatsinze Real Madrid ibitego 4-3 mu mukino waranzwe no gusimburana mu gutsinda hagati y’impande zombi.

Umukinnyi ukomoka muri Turikiya, Arda Guler yafunguye amazamu hakiri kare cyane ku munota wa mbere cyaje kwishyurwa na Aleksandar ku munota wa 9 ni mu gihe ku munota wa 29 Arda Güler yatsindiye Real Madrid icya kabiri cyaje kwishyurwa na Harry Kane ku munota wa 38 mbere y’uko Kylian Mbappe atsindira Real Madrid icya gatatu ku munota wa 42 maze bajya kuruhuka ari 3-2.

Ibi byari bivuze ko mu mikino yombi ari igitego 4-4 kuko umukino ubanza Bayern Munich yari yatsinze Real Madrid 2-1.

Icyakora, mu gice cya kabiri ibintu byahindutse cyane, cyane cyane nyuma y’uko Eduardo Camavinga yeretswe ikarita itukura ku munota wa 86.

Ibi byahaye Bayern amahirwe yo kongeramo ibindi bitego byatsinzwe na Luis Diaz ku munota wa 89 na Michael Olise ku munota wa 4 w’inyongera, bahita babona itike ku giteranyo cya 6-4.

Mu wundi mukino, Arsenal yakomeje isezereye Sporting Lisbon ku giteranyo cy’igitego 1-0, kuko umukino wo kwishyura wabereye mu Bwongereza warangiye ari 0-0.

Igitego rukumbi cyabonetse cyatsinzwe na Kai Havertz mu mukino ubanza, kikaba ari cyo cyabaye itandukaniro hagati y’impande zombi.

Nubwo umukino wo kwishyura utari ufite umuvuduko uri hejuru, Arsenal yagaragaje gukina neza kurusha uwo bahanganye mu mibare itandukanye.

Iyi ntsinzi ije ari inkuru nziza kuri Arsenal, dore ko yari imaze imikino itanu ititwara neza mu marushanwa yose mu gihe yitegura gucakirana na Man City mu mpera z’iki cyumweru mu mukino uhatse byinshi mu kugena uzegukana Premier League uyu mwaka.

Mu mikino ya 1/2 itegerejwe, Bayern Munich izahura na Paris Saint-Germain yaraye ikuyemo Liverpool, mu gihe Arsenal izacakirana na Atletico Madrid yasezereye FC Barcelona.

Arsenal yasezereye Sporting

Bayern Munich yageze muri 1/2 isezereye Real Madrid

Source : http://isimbi.rw/ucl-bayern-munich-yakubise-ahababaza-real-madrid-arsenal-igera-muri-1-2.html

Umwuka mubi hagati ya Leta Zunze Ubumwe z’ Amerika n’u Bushinwa ukomeje gufata indi ntera, nyuma y’uko ubwato bw’Abashinwa butwara peteroli  bwanyuze mu umuhora wa Hormuz mu gihe Amerika yari yashyizeho ingamba zo kuyifunga.

Iki kibazo cyatangiye gukomera ubwo ubuyobozi bwa Leta zunze ubumwe z’Amerika buyobowe na Donald Trump bwatangazaga ko bushyizeho ‘blockade’ igamije gukumira amato yose ajya cyangwa ava muri Iran, mu rwego rwo gushyira igitutu kuri icyo gihugu.

Nubwo ibyo byari byatangajwe, ubwato bw’Abashinwa butwara peteroli bwakomeje urugendo rwabwo bunyura muri iyo nzira bigaragaza ko Ubushinwa butemera byimazeyo izo ngamba z’ Amerika.

Mu itangazo ryashyizwe ahagaragara na Beijing, u Bushinwa bwamaganye iyo blockade buvuga ko ari ‘iteye inkeke kandi idafite ubushishozi,’ busaba impande zose kwirinda ibikorwa bishobora guteza umutekano muke ku rwego mpuzamahanga.

Abasesenguzi bavuga ko iyi nyanja irimo inzira ya Hormuz ari ingenzi cyane kuko inyuramo igice kinini cya peteroli ikoreshwa ku isi. Icyo ari cyo cyose cyahungabanya imigendekere yayo gishobora gutuma ibiciro bya peteroli bizamuka cyane, bigahungabanya ubukungu bw’ibihugu byinshi.

Kuba ubwato bw’Abashinwa bwarashoboye kuhanyura nta nkomyi byerekana ko Amerika ishobora guhura n’imbogamizi mu gushyira mu bikorwa ibyo yafasheho icyemezo, ndetse bikaba bishobora no gutuma ibindi bihugu bitangira kwirengagiza ayo mabwiriza.

Ibi byose bikomeje kongera ubushyamirane hagati y’ibihugu byombi bikomeye ku isi, aho u Bushinwa bugaragaza ko butazemera kugengwa na Amerika mu bijyanye n’ubucuruzi n’umutekano w’inyanja, mu gihe Amerika yo ikomeje gushaka gukaza igitutu kuri Iran.

Mu gihe ibintu bikomeje gufata indi ntera, amahanga akomeje gukurikiranira hafi uko umubano w’ibi bihugu byombi uzagenda uhinduka, cyane ko ushobora kugira ingaruka zikomeye ku mutekano n’ubukungu bw’isi muri rusange.

The post IBY’AMERIKA N’UBUSHINWA BIRAGANISHA HE ISI? appeared first on FLASH RADIO&TV.

Source : https://flash.rw/2026/04/14/ibyamerika-nubushinwa-biraganisha-he-isi/

Perezida wa Repubulika y’u Rwanda, Nyakubahwa Paul Kagame, yagaragaje ibyishimo atewe n’uko amakipe ane y’umupira w’amaguru afitanye ubufatanye na gahunda ya Visit Rwanda yageze muri kimwe cya kabiri cya UEFA Champions League.

Mu butumwa yanyujije ku rubuga rwa X ku mugoroba wo ku wa Gatatu tariki ya 15 Mata 2026, Perezida Paul Kagame yavuze ko ari intambwe ishimishije kubona ayo makipe akomeje kwitwara neza ku rwego rwo hejuru. Yashimangiye ko imikinire yayo igaragaza umuhate, ubuhanga ndetse n’icyizere cyo kugera kure, anemeza ko ategereje n’amatsiko imikino itaha.

Mu makipe yashimiye harimo Atletico Madrid yasezereye FC Barcelona ku giteranyo cy’ibitego 3-2, Arsenal FC isezerera Sporting CP ku gitego 1-0, ndetse na Paris Saint-Germain yatsinze Liverpool FC ibitego 4- naho Buyern Munich igasezera Real Madrid ku bitego 4-3.

Mu mikino ya 1/2 itegerejwe, Paris Saint-Germain izacakirana na FC Bayern Munich, mu gihe Arsenal FC izahura na Atletico Madrid.

Iyi ntsinzi y’aya makipe ikomeje gushyira imbere izina rya ‘Visit Rwanda’ ku rwego mpuzamahanga, bigafasha mu kumenyekanisha u Rwanda nk’ahantu nyaburanga hakwiye gusurwa.

Source : https://kasukumedia.com/paul-kagame-yishimiye-amakipe-yamamaza-visit-rwanda-amaze-kugera-muri-1-2/