Category: Uncategorized

Muri Werurwe 2023 MINEMA, ibifashijwemo n'abafatanyabikorwa bayo yateguye gahunda y'ibigenderwaho mu kwita, kwirinda no kugabanya ingaruka z'ibiza bikozwe n'inzego zitandukanye mu gihugu.

Nyuma ishingiye kuri iyo gahunda yari yatunganyijwe, muri Kanama 2023 iyi minisiteri yakoze igenzura rijyanye no kureba aho ibigo bigeze mu kubaka ubushobozi bubifasha guhangana n'ibiza.

Byakozwe mu nzego icyenda z'iterambere no mu byiciro 10 by'ibikorwaremezo bihurirwaho n'abaturage batandukanye, ibiro 1557 byo mu bigo byigenga n'ibya leta, n'ibindi bikorwaremezo nk'amashuri, ibitaro, insengero n'ibindi.

Bimwe mu byuho iyi raporo igaragaza birimo ibikoresho bidahahagije byo kurwanya inkongi, imirindankuba ikiri mike, uburyo bwo gufata amazi budahahagije, uburyo bwo kugenzura umutekano na bwo butaranozwa mu buryo bwifuzwa no kutagira ubwishingizi.

Ibindi byuho bihari ni ibijyanye n'uko installation z'amashanyarazi zikozwe mu buryo nkene no kutagira inkuta zo kurinda ahantu habugenewe.

Habonywe kandi ibisenge by'inyubako bidafashe neza, uburyo hafi ya ntabwo bwo guteganyiriza ibiza biba bishobora kuba byakwangiriza ahantu n'amatsinda adahagije ashobora gufasha abantu mu bihe by'amage.

Muri iyi raporo ya MINEMA hagaragajwe ko inyubako z'amagororero yo mu gihugu ari zo zujuje hafi y'ibyo gahunda yo kwirinda ibiza (Disaster Risk Reduction: DRR) isaba, aho zigerageza ku rugero rwa 78%.

Ibikorwaremezo byo mu nganda nk'inyubako n'ibindi, bifite ubushobozi bwo kwirinda ibyo biza ku rugero rwa 57%.

Raporo ya MINEMA igaragaza ko inganda ziri mu byanya zashyiriweho mu bice bitandukanye by'igihugu, zo zubahiriza ibisabwa cyane ko zose mbere y'uko zitangira ibikorwa zihabwa impushya zo gukora, ibitandukanye n'izibarizwa ahitaruye.

Ni mu gihe ibigo byagenewe gucumbikira abantu, inzu zabyo zifite ubwo bushobozi mu ibiza ku rugero rwa 41%, raporo ikagaragaza ko utubari na za restaurents ari byo byihariye umubare munini mu kutubahiriza amabwiriza.

Amasoko n'inyubako zagenewe ubucuruzi byagaragaye ko byihariye 32%, bikagaragazwa ko izi nyubako zagenewe gucururizwamo inyinshi zidafite uburyo bwo kugabanya ibyateza ibibazo biturutse ku biza.

Ishingiye ku byiciro by'ibigo bihuriramo abantu benshi MINEMA yasanze ko ibiro abakozi bakoreramo bigerageza kubahiriza ibisabwa na DRR ku rugero rwa 35%, iby'imirenge n'utugari bikaba ari byo byiganje mu kutayubahiriza.

Mu bikorwaremezo by'amashuri hasanzwe ko bifite ubwo bushozi bwo kwirinda ibiza ku rugero rwa 44% bitewe no kutagira ibikoresho bishobora gufasha ababikoresha, kumva batekanye, nk'ibizimya inkongi n'ibindi.

Ni mu gihe kwa muganga ho hafite ubwo bushobozi ku rugero rwa 44%, icyakora MINEMA ikagaragaza ko ibitaro bikuru n'iby'uturere bifite ubushobozi bwo hejuru ugereranyije n'amavuriro n'ibigo nderabuzima.

Inzu zifashishwa mu gusenga zo MINEMA yasanze zifite ubwo bushobozi ku rugero rwa 41%, icyakora hakagaragazwa ko izubakwa muri iyi minsi, zifite ubwo bushobozi kurenza, izishaje zubatswe kera ari zo zishyira ubuzima bw'abazisengeramo mu kaga.

Sitasiyo za lisansi n'ibindi bikomoka kuri peteroli n'ububiko bwa gaz butandukanye bufite ubushobozi bungana na 65% bwo kwirinda ibiza, ariko MINEMA ikagaragaza ko umubare ugaragara w'ibyo bikorwaremezo utubahiriza amabwiriza ya DRR.

Ibikorwaremezo bya siporo n'imyindagaduro byo bigerageza kugira ubwo bushobozi ku rugero rwa 45%, nabwo hakagaragazwa ko ibibuga n'izindi nyubako za siporo zidahuza n'ingamba DRR.

Mu buryo butomoye mu igenzura ryakorewe ku biro 1557 hagaragaye ko mu biro bigera kuri 650 bingana na 42% ari byo bidafite imirindankuba iby'utugari byihariye 61% iby'umurenge bikiharira 26%.

Ibiro 1362 ntibifite intabaza zijyanye n'inkongi ishobora kubifata, ibigera kuri 405 bingana na 25% by'ibyagenzuwe ntibifite uburyo bwo gufata amazi y'imvura, ibigera ku 1090 bingana na 70% nta bwishingizi bifite.

Ikindi MINEMA yagaragaje ni uko muri ibyo biro yagenzuye ibingana na 1134 byihariye 73% by'ibyagenzuwe byose, nta dukoresho tuzwi nka 'fire hydrant' dushobora kwifashishwa ha handi umuntu uri kuzimya inkongi ashobora gucomekaho itiyo akabona amazi yo kwifashisha.

Ikindi kandi hasanzwe ko ibyinshi muri ibyo biro hasanzwemo ko nta 'kizimyamoto' zihagije bifite n'ibizifite inyinshi ntizikora neza cyangwa se zataye agaciro.

Ikindi giteye inkeke ni uko muri ibyo biro byose ibigera ku 1102 bingana na 71% bidafite ishami rishinnzwe kwita ku bintu mu gihe cy'amage, ibigera ku 1220 bingana na 78% ntibifite camera z'umutekano, 1090 byihariye 70% ntibifite ibikoresho by'ubutabazi bw'ibanze.

MINEMA yabonye kandi ko ibyumba byagenewe gufasha abakozi n'abandi bari muri ibyo biro gucika mu bihe by'amage, ibigo bimwe byabinduye ibikoni, ibindi birafunga, ibindi bigirwa ububiko bw'ibikoresho.

Iyi minisiteri igaragaza ko ibi bigo bitagira amabwiriza ajyanye n'uko abakozi bashobora kwitwara mu gihe bahuye n'ibiza runaka, ni ukuvuga ngo ntibigeze batozwa na busa ku bijyanye no ko bakwiyitaho cyangwa bakwita kuri bagenzi babo.

Inyubako zo mu magororero yo mu Rwanda zashimiwe kuba zubahiriza ibisabwa ngo zigire ubushobozi bwo kwirinda ibiza

Byatangajwe n'Umuyobozi w'Akarere ka Kirehe, Rangira Bruno, kuri uyu wa 16 Gicurasi 2024 ubwo hatangizwaga umwiherero w'iminsi ibiri wahurije hamwe abafite aho bahuriye n'uburezi bo muri aka Karere barimo abahagarariye uburezi ku mirenge, Abanyamabanga Nshingwabikorwa b'imirenge, abayobozi b'ibigo by'amashuri byose ndetse n'abafatanyabikorwa mu burezi.

Yavuze ko iki kibazo bakizi kandi bari kugerageza kugikemura mu buryo bwihuse, yavuze ko bihaye imyaka ibiri yo kuba bagejeje umuriro mu tugari twose, yavuze ko kandi kuri ubu aho amashanyarazi atari yagera baba bifashishije imirasire y'izuba.

Ati 'Turacyafute umubare w'ibigo bitagerwaho n'amashanyarazi, mu mushinga turimo gukorana na REG uzatangira mu mpera z'uyu mwaka ni uko tugeza nibura amashanyarazi mu tugari twose, iyo tuyagejejeyo tubanza kuyageza ku bigo nderabuzima n'amashuri rero ni ikibazo twumva ko u myaka ibiri tuzaba twagikemuye.'

Ku kijyanye n'amazi ho yavuze ko kuri ubu bari gutanga ibigega by'amazi ku mashuri atari yagerwaho n'amazi mu gihe hari umushinga bafatanyije na WASAC uzageza amazi ku baturage benshi.

Ni mu gihe abayobozi b'ibyo bigo bifite icyo kibazo bari bagaragaje uburyo bidindiza imyigire y'abana, basaba ko babigezwaho kugira ngo bibafashe mu kuzamura imitsindire.

Muri aka Karere hagaragajwe ko hari ibigo by'amashuri 134, muri byo ibigo 76 bigerwaho n'amazi meza mu gihe ibigo 96 ari byo bigerwaho n'umuriro w'amashanyarazi. Ibi bivuze ko ibigo 39 bidafite umuriro w'amashanyarazi naho ibigo 58 bidafite amazi.

Abayisenga Emelyne uyobora ikigo cy'amashuri cya GS Kankobwa giherereye mu Murenge wa Mpanga, yavuze ko ikigo ayobora nta mashanyarazi gifite, avuga ko kutagira umuriro bidindiza byinshi kuri iki kigo atanga urugero ngo nk'iyo ugize ikibazo urugi rugacika kurusudira bigorana cyane.

Ati 'Ikindi iyo tugiye kwigisha ikoranabuhanga abanyeshuri usanga nta muriro. Mu gihe cyo gufotora ibizamini kuko dukoresha imirasire y'izuba, hari igihe imvura igwa nko mu gihe cyo mu kwa Kane, kujya gufotora ibizamini bikagorana tugategereza ko izuba riva tukabona gufotora, izo zose ni imbogamizi kuburyo tubonye umuriro byatworohereza.'

Pasiteri Mbonyumugenzi Olivier uyobora ikigo cya GS Irama giherereye mu Murenge wa Gahara, yavuze ko ikibazo cy'amazi kibakomereye cyane ngo kuko ngo gituma nibura batanga ibihumbi 12 Frw byo kugura amazi buri munsi.

Ati 'Bigira ingaruka cyane cyane ku banyeshuri bacu tuyoboye, ni ukuvuga ngo babyuka bajya gushaka ayo mazi bigatuma bakererwa ku mashuri. Ku kijyanye n'ukuntu tubona amazi ku ishuri ni ukuvuga ngo twabanje kuvomesha amazi bakayazana ku magare kugira ngo tubone amazi dutekesha ariko ikibazo gihari ijerekani isigaye ihagaze 300 Frw wagereranya n'amajerekani 40 dukoresha ku munsi ugasanga ni ibihumbi 12 Frw ku munsi.'

Mbonyumugenzi yari yagaragaje ko ahandi ibibazo by'amazi bigaragara ari mu gukora isuku y'amashuri kuko usanga bayatuma abanyeshuri rimwe na rimwe ntibayazane neza, agasaba Akarere kubafasha bakagerwaho n'amazi meza.

Muri iyi nama nyunguranabitekerezo yiga ku burezi, haganiriwemo byinshi bigamije kubuteza imbere muri ako karere

Abayobora ibigo by’amashuri bitaragerwamo n’umuriro w’amashanyarazi bahawe icyizere

Bahagurutse ku kibuga cy'Indege Mpuzamahanga cya Kigali i Kanombe mu ijoro ryo kuri uyu wa Kane tariki 16 Gicurasi 2024, aho mu babaherekeje harimo n'abafasha babo.

Ni ubwa mbere aba bahanzi bombi bagiye gutaramira mu Bufaransa. Ariko baciye ibintu mu bitaramo binyuranye bagiye bagaragaramo mu Rwanda birimo nka Iwacu Muzika Festival, ibya sosiyete zinyuranye, ibyabo bwite n'ibindi binyuranye.

Indirimbo zabo zatumye hari ababafata nk'abahanganye, ariko bagiye bagaragaza ko gukurira muri Label ya Green Ferry Music byaguye imbago z'umuziki w'abo.

Mu mashusho, urubuga rwa Pan Africa rwashyize hanze mu minsi ishize, bavuze ko Bushali na B-Threy bahihibikaniye Kinyatrap, ariko ko byabasabye gushyira imbaraga hanzwe. 

Ati 'Turi ababyeyi! Dufata umwanzuro wo kubikorera kugirango bigere ahantu bigera. Urumva iyo umwe akoze ikintu ntabwo bingana n'uko abantu bose bakora ikintu.'

Ku wa 18 Gicurasi 2024, Bushali, B-Threy ndetse na Dr Nganji bazakora igitaramo gikomeye cyubakiye ku njyana ya 'Kinyatrap' kizabera ahitwa Theatre Chailot.

Ni mu gihe, ku wa 24 Gicurasi, aba bahanzi bombi bazahurira mu iserukiramuco 'Africa Fest' rizabera mu Mujyi wa Lille mu Bufaransa. Hazaririmba Bushali, B-Threy ndetse na Dr Nganji.

Ku wa 25 Gicurasi 2024, aba bahanzi bombi bazaririmba mu iserukiramuco rizwi nka 'Nyege Nyege' risanzwe rinabera mu gihugu cya Uganda mu Mujyi wa Kampala.

Ibi bitaramo bizasozwa n'ibyo bazakora ku wa 31 Gicurasi kugeza ku wa 1 Kamena 2024 bizabera ahitwa 'Because Music', aho bazanakorera bimwe mu bihangano by'abo. Bushali na B-Threy bakoranye indirimbo ‘Nituebue’ yamamaye mu buryo bukomeye bahuriyemo na Slum Drip, iri kuri Album ‘ku Gasima’.

Bombi bahahuriye mu ndirimbo ‘Amabara’ bakoranye na Marina ndetse na Alyn Sano. Banaririmbye mu ndirimbo ‘Blessed’ ya Wamunigga yaririmbyemo Bull Dogg, Bruce The 1St, Papa Cyangwe, Fireman na Jay Pac.

Dr Nganji bajyanye mu Bufaransa yanabahurije mu ndirimbo bise ‘Kanyabunyobwa’ imaze umwaka isohotse.

Mu Mujyi wa Lille aho Bushali na B-Threy bazataramira, ni Umurwa Mukuru w'Akarere ka Hauts-de-Frnce mu Majyaruguru y'u Bufarana, hafi y'Umupaka n'u Bubiligi. Ni Umujyi w'umuco na Kaminuza nyinshi utuwe n'abantu benshi muri iki gihe. Wahoze ari umurwa w'abacuruzi bakomeye mu Bufaransa.

Uyu Mujyi uteretse ku buso bwa 34.8 km2, aho utuwe n'abantu 1,085,000 ushingiye ku mibare itangazwa mu mezi ya mbere y'uyu mwaka. Mu 2023, uyu Mujyi wari utuwe n'abantu 1,079,000 bigaragaza izamuka rya 0.56% ugereranyije n'umwaka wa 2024.

Ibyo wamenya kuri Théâtre National de Chaillot, aho Bushali, Dr. Nganji na B-Threy bazataramira

Théâtre National de Chaillot aho bazamurikira urugendo rwa Kinyatrap, ni hamwe mu hantu hasanzwe hazwi cyane herekanirwaga ikinamico kuva mu kinyejana cya 16 (mu 1937).

Ni inyubako iherereye hafi y'Umunara wa Eiffel mu Busitani bwa Trocadéro. Théâtre de Chaillot ifatwa nk'ahantu hanini habera ibitaramo bikomeye mu Mujyi wa Paris.

Iyi nyubako yubatswe hagati ya 1934 na 1937 n’abavandimwe Jean na Édouard Niermans mu imurikagurisha ryabereye mu Mujyi wa Paris mu 1937, yubatse ahahoze hitwa Ingoro ya Trocadéro, ubwayo ni inyubako nini yubatswe mu imurikagurisha ry'isi rya Paris ryo mu 1878.

Herekaniwe amakinamico akomeye arimo aya Valentine Fabre na John Perrottet. Banafite ishuri ry'ikinamico hamwe n'ahantu habera amakinamico.

Hari igice cy'iyi nyubako cyitiriwe 'Jean Vilar' cyakira abantu 250, hari kandi 'Salle Gémier' ifite imyanya 420, na Studio y'imyanya 80 yeguriwe ku bikorwa bito.

Mu 2007, nibwo Minisiteri y'Umuco y'u Bufaransa iyobowe na Christine Albanel yasabye ubuyobozi bwa 'Théâtre national de Chaillot' guteza imbere imbyino zigezweho, cyane cyane umurimo w'abakorikori b'Abafaransa.

Kuva icyo gihe iyi nyubako yatangiye kwerekana imbyino mpuzamahanga ku rwego mpuzamahanga ku Isi , amakinamico, umuziki ndetse n'ubuhanzi bugaragara – kuba “ikinamico yakira ibihangano mu buryo butandukanye”.

Hahora habera ibirori by'amasosiyete mpuzamahanga y'imbyino nka Forsythe Company, Royal Ballet yo muri Suède hamwe n'ingabo za Irlande Colin Dunne. 

Abaraperi bakuranye nk’impanga, Bushali na B-Threy berekeje mu Bufaransa ku nshuro yabo ya mbere

 

Ku nshuro ye ya mbere, umuraperi Bushali agiye gutaramira mu gihugu cy’u Bufaransa- Ku kibuga cy’indege yaherekejwe n’umugore we n’umwana

Nyuma y’uko aherutse gushyira hanze Extended Play (EP), B-Threy yerekeje mu Bufaransa- Ku kibuga cy’indege yaherekejwe n’umugore we n’umwana

Dr Ngaji uherutse gushyira hanze Album ya kane yise ‘Kinyarwanda’ yerekeje mu Bufaransa

StarTimes ikugezaho filime z’iri mu ndimi zitandukanye. Waba ukunda filime z’urukundo, izisekeje, cyangwa izirimo imirwano, izo zose uzisanga kuri StarTimes.

StarTimes kandi itanga uburyo bworoshye bwo kugura ifatabuguzi bukwemerera guhitamo hagati y'icyumweru cyangwa ukwezi buhura n’amafaranga yawe ubundi ukareba ibyo ukunda.

Nsobeddwa S2: Nyuma yo gutandukana n'umugore we wa mbere, yongeye gushaka, bituma habaho amakimbirane hagati y'abakobwa be na Mukase. Iyi filime iri mu Kinyarwanda, ikaba inyura kuri Ganza TV guhera kuwa mbere kugeza kuwa gatanu Saa 18h30.

Bad Romeo: Iyi filime yo muri Thailand ivuga ku nkuru y’urukundo rugongana n’inzangano mu gihe umukobwa w’umukire ajya mu rukundo n’umuhungu ukanika imodoka. Iyi filime iri mu rurimi rw’icyongereza ikaba inyura kuri ST Novela E Plus, saa 21h30.

Iron Heart: Iyi filime igaruka kuri Apollo Adelantar, umukozi utazwi, wagiye mu butumwa buteye inkeke bwo gusenya ikigo cy'ubugizi bwa nabi cyitwa Altare, ariko aza gusanga abagambanyi mu bo yizeraga. Reba ibice bishya Saa 19h50 kuri ST Novela E Plus, mu rurimi rw’icyongereza.

Monsieur Mauvais: Nyuma yo kubaho ubuzima bw’ubugambanyi, inzozi za Ezgi wari wizeye kubana n’umusore yakunze zirangirika. Ariko iyo ahuye na Ozgur w'umuhehesi, ahazaza he n’ababyeyi be babyivangamo bigatuma ibintu bigenda neza. Iyi filime y’urukundo iri mu rurimi rw’Igifaransa inyura kuri Novela F Plus, saa 19h30.

Ibi kandi byiyongera no ku zindi filime zirangira zinyura kuri Movie Plus na AMC Movies. Hamwe na filme zacu, Umunezero wawe urizewe.

Komeza ube kuri StarTimes ukoreshe Application ya StarTimes ON ubundi wishimire ibyo ukunda igihe icyo ari cyo cyose, aho uri hose. Ukeneye ibisobanuro birambuye kubyerekeye porogaramu zacu no kugura ifatabuguzi, sura imbuga nkoranyambaga zacu arizo 'StarTimesRwanda_' cyangwa uduhamagare kuri 0788156600.

Gendana n'imyidagaduro igezweho hamwe na StarTimes!

Imibare igaragaza ko Miliyoni icyenda n’ibihumbi Magana atanu (9.500.000) bafite imyaka 18 kuzamura bari kuri Lisiti y’itora. Kandi hafi 90% bamaze kwikosokoza kuri Lisiti y’Itora bitegura kuzagira uruhare muri aya matora Abanyarwanda bafata nk’ubukwe.

Amatora agiye kuba ku nshuro ya Kane kuva Jenoside yakorewe Abatutsi mu 1994 yahagarikwa. Imibare igaragaza ko amatora azakorerwa kuri site z’itora 2,441 zifite ibyumba by’itora 17,400 mu gihugu hose.

Mu kiganiro n'itangazamakuru kuri uyu wa Kane tariki 16 Gicurasi 2024, Perezida wa Komisiyo y’Igihugu y’Amatora (NEC), Oda Gasinzigwa yagaragaje ko bishimiye kuba hari urubyiruko rugera kuri Miliyoni 2 rugiye gutora ku nshuro ya mbere.

Ati “Ni ibintu byiza kandi dukomeza gukangurira urubyiruko kwitabira  ibikorwa by’amatora, biyongera ku rundi kuko muzi ko mu Rwanda umubare munini dufite ari urubyiruko.”

Asubiza ikibazo cy’umunyamakuru wa InyaRwanda, Gasinzigwa yavuze ko igihugu gifite urubyiruko kiba gifite ubuzima, bityo bishimishije kubona umubare wabo wariyongereye, bakaba bazagira uruhare muri aya matora agiye kuba ku nshuro ya kane.

Yabwiye urubyiruko kugira uruhare mu matora, kandi ntibirangirire mu gutora gusa, kuko bashobora no kwiyamamaza. Ati “Icyo twabakangurira rero ni uko batumva ko ibikorwa by’amatora ari iby’abantu bakuze gusa, ahubwo ari ibyabo kuko igihugu ari icyabo, uyu munsi n’ejo bundi.'

Yavuze ko bafite icyizere ku rubyiruko bashingiye ku kuba bari mu mirimo myinshi muri iki gihe, kandi bakora neza. Ati ‘Turifuza y’uko rero bakomeza gutora no gutorwa, kuko ntabwo bajya mu gutora gusa  n’abifuza gutorwa muri ibyo biciro bitandukanye, baba babifitiye uburenganzira.”

 Mu matora ya Perezida wa Repubulika yabaye mu 2017, hatoye abaturage Miliyoni 6,897,76.

Mu matora y’Abadepite yabaye mu 2018, hatoye abaturage Miliyoni 7, 172, 612. Mu matora y’abayobozi b’inzego zibanze mu 2021, hatoye abaturage Miliyoni 8,130,46. Ni mu gihe abazatora kuri iyi nshuro biteganyijwe ko ari Miliyoni 9,500,000.

Ufashe imibare y’abazatora muri uyu mwaka ugakuramo abatoye mu 2018 (9,500,000- 7,172,612) ubona ko mu mibare habayeho ubwiyongere bw’abarenga Miliyoni 2 ari nabo bashya bazatora birangana na Miliyoni 2,327,388.

Ukoze isesengura mu mibare, bigaragaza ko buri mwaka umubare w’abatora wiyongeraho abari hagati y’ibihimbu 200 n’ibihumbi 500. Akenshi ni urubyiruko baba bagejeje imyaka yo gutora.

Abanyarwanda baba mu mahanga bazatora Umukuru w'Igihugu n'Abadepite barenga ibihumbi 53 bavuye ku bihumbi 20 bariho mu matora aheruka yo mu 2017.

Mu ijambo risoza umwaka wa 2023 ryatambutse kuri Televiziyo Rwanda saa mbili z'ijoro, ku wa 31 Ukuboza 2023, Perezida Kagame yinjiza Abanyarwanda mu 2024, yavuzemo ko uyu mwaka udasanzwe ku rubyiruko, abasaba kuzagena ahazaza h'Igihugu binyuze mu matora azaba muri Nyakanga 2024.

Ati 'Ni umwaka w'ingenzi ku gihugu cyacu. Twizeye ko tuzumva amajwi menshi y'abakiri bato mu kugena ahazaza h'igihugu.' 

Perezida wa Komisiyo y’Igihugu y’Amatora (NEC), Oda Gasinzigwa yasabye urubyiruko kuzagira uruhare mu matora ateganyijwe muri Nyakanga 2024

Iki kiganiro n’itangazamakuru cyabaye kuri uyu wa Kane tariki 16 Gicurasi 2024, nyuma y’uko Inteko Ishinga Amategeko itoye itegeko ririmo ingingo ikomatanya amatora ya Perezida n'ay'Abadepite, azatwara Miliyari 8 Frw.

Ni ubwa mbere aya matora agiye kuba ahujwe, yaba aya  Perezida wa Repubulika ndetse n’Abadepite. Manda ya Perezida wa Repubulika wa Repubulika yarahindutse, iva ku mwanya irindwi igera ku myaka itanu.

Oda Gasinzigwa avuga ko kugeza ubu mu cyiciro cy’abifuza kuba abakandida mu Inteko Ishinga Amategeko bamaze kwakira hafi 41, ni mu gihe abifuza kwicara mu ntebe y’Umukuru w’Igihugu ari umunani (8).

Gasinzigwa yavuze ko igikorwa cyo kwakira kandidatire gikomeje, ariko kandi hari abahabwa impapuro bakazisubizayo. Ati “Icyo navuga hari abo duha impapuro nyuma y’igihe hakagira abazigarura, bavuga bati twebwe tubihagaritse kubera impamvu z’abo baragiharitse, hari abamaze kuzigarura kubera impamvu zabo.”

Yavuze ko impapuro zihabwa abashaka guhatanira Umwanya w’Umukuru w’Igihugu ndetse n’abashaka kwinjira mu Inteko Ishinga Amategeko ziba ziriho ibirango bya Komisiyo y’Amatora ku buryo abazihawe biborohera igihe bashaka kwegera abaturage. Gasinzigwa yavuze ko atahita atangaza amazina y’abashaka kwiyamamaza kuko igikorwa kikigikomeza.

Yasabye abashaka kuba abakandida kwitwararika mu gihe bashaka ko abaturage babashyigikira, kuko hari ababashukisha amafaranga kandi biteweme. 

Ati 'Iyo ugiye gusaba umukono icyo biba bivuze ni uko umwegera, ukamusobanurira, ukareba ko ari kuri lisiti y'itora, ni ikiganiro cy'umuntu n'undi kandi twizera ko twabisobanuye bihagije, twizeye ko bizagenda neza.'

Tariki 14 Nyakanga 2024, amatora azabera muri Diaspora, naho tariki 15 Nyakanga 2024 amatora azaba imbere mu gihugu naho tariki 17 Nyakanga 2024 hazaba amatora y’ibyiciro byihariye.

Tariki 14 na 15 Nyakanga 2024 hazatorwa aba Depite 53, ariko biteganyijwe ko hazatorwa Abadepite 80 bagomba kujya mu Inteko Ishinga Amategeko.

Nk’uko amategeko abiteganya, abandi 27 basigaye bazatorwa bavuye mu byiciro byihariye, bazatorwa n’inteko itora.

Kugeza ubu hari gutegurwa Liste y’Itora izashingirwaho mu gihe cyo gutora. NEC isaba buri wese kwikosoza kuri Liste y’itora kugirango amenye aho azatorera.

Buri mwaka, Liste y’itora iravugururwa mu rwego rwo kwakira abagejeje imyaka 18 y’amavuko yo gutora.

Komisiyo y’Amatora (NEC) ivuga ko guhera kuri uyu wa Gatanu tariki 17 Gicurasi 2024, batangira kwakira Kandidatire z’abashaka kwiyamamaza ku mwanya wa Perezida wa Repubulika ndetse no ku mwanya w’Abadepite.

Umuyobozi w’iyi komisiyo, Oda Gasinzigwa avuga ko abasaga hafi Miliyoni 2 z’urubyiruko bagiye gutora bwa mbere. Ati “Ni ibintu byiza kandi dukomeza gukangurira urubyiruko, kwitabira ibikorwa by’amatora, biyongera ku rundi kuko muzi ko mu Rwanda umubare munini dufite ari urubyiruko.”

Yavuze ko ingengo y’imari ya Miliyari 8 Frw bazakoresha mu gutegura no gushyira mu bikorwa aya matora yatanzwe na Guverinoma y’u Rwanda. 

Muri buri cyumba cy’itora hazaba harimo amasandu abiri. Isanduku y’umweru ifite n’umufuniko w’umweru izashyirwamo impapuro zatoreweho Perezida n’aho isanduku y’umweru ifite umufuniko w’umukara izatorerwaho abadepite.

Hari kandi impapuro z’itora zizaba ziri mu mabara atandukanye; hari urupapuro rw’ibara ry’umweru imbere n’inyuma ruzatorerwaho Perezida wa Repubulika, hari kandi urupapuro rwa kaki inyuma ruzatoterwaho Abadepite.

Amatariki y’ingenzi muri gahunda y’amatora ateganyijwe

-Tariki 17-30 Gicurasi 2024: Kwakira Kandidatire.

-Tariki 14 Kamena 2024: Gutangaza Kandidatire zemejwe burundu.

-Tariki 22 Kamena-13 Nyakanga 2024: Kwiyamamaza kw’abakandida

-Tariki 29 Kamena 2024: Gutangaza Lisiti y’itora ntakuka.

-Tariki 14 Nyakanga 2024: Amatora ku Bnyarwanda baba mu mahanga.

-Tariki 15 Nyakanga 2024: Amatora ya Perezida wa Repubulika n’y’abadepite 53

baturuka mu mitwe ya Politiki cyangwa mu bakandida bigenga imbere mu gihugu.

-Tariki 16 Nyakanga 2024: Amatora y’Abadepite 24 b’abagore, babiri bahagarariye urubyiruko n’umudepite umwe uhagarariye abafite ubumuga.

-Bitarenze ku wa 20 Nyakanga 2024: Gutangaza by’agateganyo ibyavuye mu matora

-Bitarenze ku wa 27 Nyakanga 2024: Gutangaza burundu ibyavuye mu matora.

Perezida wa Komisiyo y'Igihugu y'Amatora, Oda Gasinzigwa yatangaje ko abakandida bigenga umunani basabye guhatanira umwanya w'Umukuru w'Igihugu mu matora ateganyijwe tariki 15 Nyakanga 2024
 

Komiseri ushinzwe amategeko yavuze ko uwataye indangamuntu cyangwa se uwafashe indi akaba atarabasha kwiyimura kuri Lisiti y'itora akoresha *169#

Umunyamabanga Nshingwabikorwa wa Komisiyo y'Igihugu y'Amatora, Munyaneza Charles yavuze ko bakorana n'inzego zitandukanye mu kugera ku ntego za Komisiyo y'Amatora

 

Umuvugizi w'Urwego rw'Igihugu rw'Ubugenzacyaha (RIB), Dr. Murangira B. Thierry yabwiye InyaRwanda, ko batangiye gukora iperereza kuri Brianne na Djihad kuva mu cyumweru gishize. Ati 'Nibyo! Iperereza ryatangiye mu cyumweru gishize.'

Isoko z'amakuru zivuga ko mu minshi ishize hari umugabo uba hanze y'u Rwanda watandukanye n'umukunzi we ubarizwa i Kigali, mu gushaka kumwihimuraho asaba ubufasha Brianne na Djihad kugirango basakaze amafoto ye, ku mbuga nkoranyambaga z'abo nka bamwe mu bantu bakurikirwa cyane.

Bisa n'aho igihe cyageze umugabo akitekerezaho, asaba Brianne na Djihad kudasakaza y'amafoto yari yabahaye y'umukobwa batandukanye.

Brianne na Djihad barabyanze, ahubwo basaba uriya mugabo kubaha amafaranga nk'ingurane, ndetse amakuru avuga ko amafaranga ya mbere yari yamaze kuyabaha.

'Gukangisha gusakaza amafoto y'urukozasoni' ni kimwe mu byaha biri kwigaragaza cyane muri iki gihe! Ndetse, ku wa Kane tariki 9 Gicurasi 2024, Urwego rw’Igihugu rw’Ubugenzacyaha (RIB) rwataye muri yombi batandatu bakurikiranywehi gusakaza amafoto n’amashusho by’urukozasoni.

Bamwe muri bo Dosiye zabo zamaze gushyikirizwa ubushinjacyaha! Abatawe muri yombi ni Mukamana Francine w'imyaka 24, akaba akoresha shene ya YouTube izwi nka Fanny TV 250 na Iradukunda Themistocles uzwi nka T. Bless w'imyaka 27, akagira shene ya YouTube izwi nka Kigali Magazine.

Hafunzwe kandi Gasore Pacifique uzwi nka 'Yaka Mwana' w'imyaka 38, Uwase Natasha w'imyaka 20, Uwimana Jeannette uzwi nka Gaju w'imyaka 20 ndetse na Mugwaneza Christian w'imyaka 26, akaba afata amashusho anyuzwa kuri za shene ya YouTube. Abafashwe bafungiye kuri Sitasiyo ya RIB ya Nyamirambo.

Umuvugizi w'Urwego rw'Igihugu rw'Ubugenzacyaha (RIB), Dr Murangira B. Thierry, avuga ko muri iki gihe hari kwaduka cyane icyaha cyo ‘gukangisha gushyira amafoto y’ubwambure bw’umuntu cyangwa se asambana akagira ibyo amutegeka’.

Mu mategeko byitwa ‘gukangisha gusebanya’ cyangwa se ‘Blackmail’. Abandi babizi nka 'Sextortion' aha hakoreshwa amafoto y’umuntu yambaye ubusa cyangwa se asambana, agakangishwa ko ashyirwa hanze mu gihe atemeye ibyo asabwa.

Dr. Murangira Thierry avuga ko iki cyaha cyinganje cyane mu rubyiruko ariko ‘bigenda bigaragara no mu bakuze. Ati “Ni ugufatirana umuntu mu ntege nke ukumukangisha kumusebya bashyira hanze amafoto ye yambaye ubusa cyangwa se asambana. Impamvu mvuga asambana ntabwo ibyo bintu biba hagati y’abantu bashakanye, biba hagati y’abantu nyine badafitanye isezerano, basambana.”

Dr. Murangira yavuze ko hari igihe umwe afata icyemezo cyo gusakaza amafoto n’amashusho ya mugenzi we agamije kumwihimuraho cyangwa se akabikora agamije kugira icyo amusaba cyane cyane amafaranga.

Dr. Murangira yavuze ko ibi ari bimwe mu byaha bakira muri RIB, kandi imibare igenda izamuka. Yavuze ko mu myaka itanu ishize (kuva mu 2019 kugeza mu 2023) bamaze kwakira ibirego/Dosiye 46.

Mu 2019 bakiriye ibirego 3, mu 2020 bakiriye ibirego 8, mu 2021 bakiriye ibirego 12, mu 2022 bakiriye ibirego 8 naho mu 2023 15. Ati “Ibyo byose ni ibijyanye n’amafoto (Ibyaha). Ni ukuvuga ngo ni wa muntu wakundanaga na Kanaka akajya amukangisha ibyo ngibyo.”

Ubyitwaramo gute iyo ukangishijwe amafoto y’ubwambure?

Dr. Murangira yavuze ko ikosa rya mbere ari ukwemera ibyo wategetswe n’umuntu ugusaba kumuha amafaranga cyangwa se kongera gusubirana nawe kugirango adasakaza amafoto n’amashusho byawe.

Avuga ko igihe bigenze uko utagomba kwemera ibyo agutegeka. Ati “Niba ari amafaranga agusabye ntuyamuhaye. Niba agusabye ngo wongera umwoherereze andi mafoto ntubyemere.”

Akomeza avuga ko irindi kosa rikorwa n’abantu benshi, ari uko bagaragaza ko batewe impungenge kandi bahangayikishijwe nuko amafoto yabo ashobora kujya hanze. Ati “Ibyo ngibyo ntugomba kubimwereka.”

Yavuze ko udakwiriye kwicira urubanza, kuko bituma ‘udatekereza cyane’. Avuga ko buri wese akwiye kwibuka ko ari ugukorerwa icyaha cyo gusebanya, akibuka ko arengana, kandi akibuka ko Urwego rw’Igihugu rw’Ubugenzacyaha ruhari.

Dr. Murangira yavuze ko abagenzacyaha ba RIB barahiriye kurinda ibanga, bityo ntawe ukwiriye kudatanga ikirego yumva ko ibye bizamenyakana.

Yavuze ko hari abanga gutanga ikirego kuri RIB, ugasanga bahisemo gukomeza gutanga amafaranga kugirango amafoto n’amashusho byabo bitajya hanze. Avuga ko hari abatanze ibihumbi 20 by’amadorali kugirango amafoto yabo atajya hanze.

Dr. Murangira yavuze ko ibi byaha bihanwa hagati y’imyaka 1 n’imyaka 5, ndetse hakiyongeraho n’amande ari hagati ya Miliyoni 1 na Miliyoni 2 Frw.

Ingingo ya 129 ivuga ko gukangisha gusebanya ni igikorwa cyo gusaba umuntu umukono ku nyandiko, ukwemera cyangwa uguhakana inshingano, ugutangaza ibanga, uguhabwa amafaranga, inyandiko mvunjwafaranga cyangwa ikindi kintu icyo ari cyo cyose hakoreshejwe gukangisha uwo muntu cyangwa undi muntu ikangwa rye ryagira ingaruka ku wakorewe icyaha, kumurega, gutangaza cyangwa kumuvugaho ibintu bishobora kumutesha agaciro cyangwa icyubahiro, byaba ari ukuri cyangwa se atari ukuri.

Umuntu wese ukangisha gusebanya, aba akoze icyaha. Iyo abihamijwe n'urukiko ahanishwa igifungo kitari munsi y'umwaka umwe (1) ariko kitarenze imyaka itatu (3) n'ihazabu y'amafaranga y'u Rwanda atari munsi y'ibihumbi ijana (100.000 FRW) ariko atarenze ibihumbi magana atatu (300.000 FRW).

Iyo uwakoze icyaha cyo gukangisha gusebanya ashyize ibikangisho bye mu bikorwa, igihano kiba igifungo kirenze imyaka itatu (3) ariko kitarenze imyaka itanu (5) n'ihazabu y'amafaranga y'u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).

RIB yatangaje ko kuva mu cyumweru gishize yatangiye gukora iperereza kuri Dj Brianne na Djihad 

Djihad asanzwe ari umunyamakuru wa Isibo TV, ariko azwi cyane mu biganiro atambutsa ku muyoboro wa Youtube 

Dj Brianne ari mu bakobwa bavanga imiziki bagezweho muri iki gihe, asanzwe ari n’umunyamakuru wa Isibo Tv

Mu kwezi gushize nibwo Agasaro Diane yongeye kuvugwa mu itangazamakuru biturutse ku ibaruwa yanditswe n'umunyamategeko we, Turahirwa Théogène wo muri Authentic Advocates, aho bandikiye Bruce Melodie na 1:55 AM Ltd abarizwamo, basaba ko bakemura ikibazo cy'indezo y'umwana babyaranye.

Muri iyi baruwa Agasaro n'umunyamategeko we bavuze ko ije ikurikiye ibiganiro Agasaro yagiranye na Bruce Melodie mu bihe bitandukanye icyakora ntabashe kuzuza ibyo babaga bumvikanye.

Kuva aho ibaruwa igiriye hanze, Bruce Melodie na 1:55 AM ntibigeze bagira icyo bayivugaho gusa uyu munsi ubwo yari mu rugendo rwerekeza muri Nigeria, yabwiye 1:55AM Media ko ubu yamaze kumenya agaciro gakomeye umwana aba afite, bityo adateze kongera kuvuga kuri iki kibazo cy'umwana na Agasaro.

Ati 'Buriya ibintu birimo abana sinkibivugaho cyane, kera ntarakura, ntaraba umuntu mukuru najyaga mbiganiraho ariko aho maze gukurira namenye ko umwana ari umutware mpita ndekera, ndanabasezeranya ko uretse n'uyu munsi n'ikindi gihe ntabwo nzabivugaho.'

Kuva iyi baruwa yajya hanze kugeza uyu munsi, ntibizwi neza niba Agasaro Diane n'umunyamategeko we barasubijwe na Bruce Melodie, bakicarana bagakemura ikibazo bafitanye dore ko uyu mubyeyi yirinze kuvugisha itangazamakuru.

Bruce Melodie avuga ko ubu yamaze kwakira ubuzima arimo bw'icyamamare ku buryo ahora yiteguye ko isaha n'isaha hasohoka inkuri y'ibibi cyangwa ibyiza bimuvugwaho.

Aha niho yahereye asaba ibyamamare n'abandi bagana muri ubu buzima kwakira ko ibi biba bigomba kubabaho uko byagenda kose.

Ku bijyanye n'amakuru avuga ko yagabanyishije inda, Melodie yagize ati 'Akanure kanjye ndi kugakoraho. Mungendaho mukagenda no kukanure nibikiye imbere, inda yanjye iracyariho. Niba naranayigabanyishije nta mukene ubikora, mbaye narakoze ibyo naba narageze ku rundi rwego. Hari imikino abakene badakina.'

Melodie wari warasezeranyije abakunzi be ko album ye yise 'Sample izasohoka muri Gicurasi 2024, yabasabye kwihangana avuga ko hari ibitaratungana neza ku ndirimbo ziyigize bityo hazasohoka indirimbo imwe, ahereye kuri 'Sowe' nyuma yaho nibwo azasuzuma niba ari ngombwa kuyishyira hanze ari icya rimwe.

Reba video y'ikiganiro Bruce Melodie yatanze hano

Bruce Melodie yavuze ku birego ku kwibagisha inda n’ibirego bimushinja kwanga gutanga indezo