Category: Uncategorized

Ku wa Mbere w’iki cyumweru ni bwo FBI ifatanyije n’abashinzwe umutekana w’imbere mu gihugu ba Homeland Security, bataye muri yombi umuraperi akaba n’umushoramari Sean Combs wagiye amenyekana ku mazina menshi arimo Puffy Daddy, P.Diddy, Diddy, Brother Love n’andi menshi.

Uyu mugabo yasanzwe muri Hoteli yarimo i New York ahita ajyanwa gufungirwa ku biro bya FBI biherereye i Manhattan. Yatawe muri yombi mu gihe hashize iminsi ajyanwa mu nkiko n’abagore bagera ku 8 bamureze mu bihe bitandukanye bavuga ko yabafashe ku ngufu. 

Mu bindi byaha Diddy ashinjwa harimo gufata ku ngufu, gucuruza abakobwa, gutunga imbunda mu buryo butemewe n’amategeko, kunywesha ku gahato ibiyobyabwenge yahaga abakobwa n’ibindi.

Mu masaha macye ashije ni bwo Diddy yahagaze bwa mbere mu rukiko aho yanasabye ko yaburana afunguye bakabimwangira. Aha ni naho havugiwe byinshi mu byo ashinjwa ndetse hanatangajwe ibintu byatangaje benshi byasanzwe mu nzu ye ubwo yasakwaga.

1. Ingwate yatanze yabaye imfabusa

Uyu muraperi uhagarariwe n’umwavoka witwa Marc Agnefilo, yasabye urukiko ko rwamurekura akaburana ari hanze. Yanatanze ingwate ya Miliyoni 50 z’Amadolari [ararenga Miliyari 66 Frw] ngo arekurwe gusa ntabyagira icyo bimufasha kuko urukiko rwayanze bitewe n’uko akurikiranyweho ibyaha bikomeye ndetse umucamanza yavuze ko hari impungenge z’uko yahita ahunga.

2. Ni ibiki byasanzwe mu nzu ye ubwo yasakwaga

Muri Werurwe uyu mwaka ni bwo abashinzwe umutekano w’imbere mu gihugu ‘Homeland Security’ basatse inzu ze ebyiri, iherereye i Los Angeles n’indi iherereye i Miami. Ibi byakozwe mu rwego rwo gukusanya ibimenyetso.

Icyakoze iki gihe ubwo izi nzu za Diddy zasakwaga ntabwo higeze hatangazwa ibyo bamusanganye dore ko mu mashusho n’amafoto yafashwe polisi yagaragaraga itwaye ibikarito byinshi yakuye mu nzu za Diddy.

Ubu rero nibwo hatangajwe ibyo basanze mu nzu ze nk’uko Damian Williams umushinjacyaha mukuru wa New York yabitangaje mu kiganiro n’itangazamakuru. Yavuze ko hari ibyo atari buvuge bitewe n’iperereza rigikorwa.

Gusa yakomoje ku bindi birimo imbunda zitabaruye basanze mu nzu ze, ibiyobyabwenge birimo Cocaine n’ibibini bya Narcotics. Ikindi gitangaje basanze mu nzu ya Diddy ni amacupa 1000 ya ‘Baby Oil’ benshi bita ‘Lubricants’ yifashishwa mu mibonano mpuzabitsina.

Damian Williams yavuze ko batunguwe cyane no kubona aya macupa yose ari mu nzu ya Diddy hakibazwa inshuro yaba akora imibonano mpuzabitsina ku buryo yatunga aya macupa menshi. 

Yavuze ko byabaye ikimenyetso ndakuka ku byo ashinjwa ko yakoreshaga ibirori by’ubusambanyi aho yazanaga abakobwa akabasindisha hanyuma akabategeza abagabo babasambanya ku gahato.

Yakomeje avuga ko izi ‘Baby Oil’ kandi ari ikimenyetso cyerekana ko Diddy yari yaragize umwuga ibi bikorwa byo gusambanyisha abakobwa ku bagabo bakamwishyura. 

Ni mu gihe Marc Agnifilo uri kuburanira Diddy yabwiye itangazamakuru ko ari uburenganzira bwe kuba yatunga amacupa menshi ya Baby Oil ndetse ko ntawe ushinzwe kumenya ibijyanye no gutera akabariro kwe.

3. Yahabwa ikihe gihano igihe ahamwe n’ibyo ashinjwa

Mu birego ashinjwa bikomeye harimo ubujura bw’imbunda (Rackeetering) yahanishwa igifungo cya burundu aramutse ahamwe nacyo. Ahamwe n’icyaha cyo gucuruza abakobwa (Sex Trafficking) yahanishwa igifungo cy’imyaka 15.

Aramutse ahamwe n’icyaha cyo gutwara abakobwa akoresha ubusambanyi abakuye mu gace kamwe abajyana mu kandi (Transportation for Prostitution), yahanishwa igifungo cy’imyaka 10 muri gereza.

4. Yahamagaye kuri telefone inshuro 54 ku munsi asaba umuntu kutamushinja

Kugirango usobanukirwe neza ibi nyemerera ngusubize inyuma, mbere Diddy yashinze itsinda yise ‘Diddy Dirty Money’ ryari rigizwe nawe hamwe n’abandi bakobwa babiri, harimo Kalenna Harper hamwe na Dawn Richard uherutse kumushinja ko yamuhohoteye.

Iri tsinda rya Diddy ryamenyekanye mu ndirimbo nka ‘Coming Home’, ‘Good Morning’ n’izindi. Uyu Dawn Richard niwe yherutse kumujyana mu nkiko aho yavuze ko uyu muraperi yajyaga amuhohotera ndetse atanga umutangabuhamya we ko ari Kalena Harper babanaga mu itsinda ko ariwe wakunze kubona ibyo Diddy yakoraga.

Ibi nibyo byatumye ku wa Kabiri w’icyumweru gishinze Diddy ahamagara kuri telefone Kalenna inshuro 54 agira ngo amusabe ko ataba umutanga buhamya mu rubanza rwe. Uyu Kalenna Harper yabwiye urukiko ko Diddy yamubwiye ko natagira icyo avuga aramuha icyo ashaka cyose.

Ibi ni bimwe mu byamenyekanye ku munsi wa mbere Diddy yitabye urukiko. Ntiharatangazwa itariki urubanza ruzaba gusa uyu muraperi azaburana afunze.

Diddy yatanze ingwate ya Miliyoni 50 z’amadolari ngo aburane afunguwe urukiko rurabyanga

Ubwo bamusakaga bamusanganye amacupa 1000 ya ‘Baby Oil’ yifashishwa mu busambanyi hamwe n’ibiyobyabwenge

Ibihano yahabwa igihe ahamwe n’ibyo ashinjwa harimo n’igifungo cya burundu

Yahamagaye Kalenna kuri telefone inshuro 54 ku munsi umwe amusaba ko atazamushinja mu rukiko

Perezida wa Rayon Sports yeguye asigiye iyi kipe miliyoni 400 Frw z’umwenda yari abereyemo abantu batandukanye.

Uwayezu Jean Fidele wari umaze imyaka 4 ayiyobora, yeguye ku wa Gatanu w’icyumweru gishize ku mpamvu z’uburwayi.

Muri Gicurasi uyu mwaka yari yavuze ko ubwo ubwo yajyga ku buyobozi bw’iyi kipe yayisanganye umwenda wa miliyoni 827 Frw, akaba yari amaze kwishyuramo 1/2.

Icyo gihe yagize ati “Twaraje dusanga dufite amadeni 827, ubwo buzima urumva ni ikibazo, turimo turagenda turwana no kwishyura abantu, abakinnyi, amahoteli ibyo ni ikibazo bisaba kubanza kubaka.'

“Ayo mafaranga birumvikana ko yari menshi kandi ikindi mwibuke ko imyaka ibiri ya mbere ya komite tuyoboye yari Covid, ntacyakozwe byari ibibazo, ubu rero nubwo ntafite imibare neza ariko byagiye bigabanuka tugenda tuyishyura, ikindi gikomeye ni uguha umurongo w’uko muzayishyura, niba ari amasezerano mugirana y’uko muzishyura cyangwa mukaganira n’abo mufitiye amadeni, icyo ni ikintu gikomeye mbere kitabagaho ariko ndakeka ko hafi ½ cyagiye cyishyurwa, ibindi tubiha umurungo.'

Nyuma y’uko atangaje ibi ntabwo bizwi niba hari abandi baje kongera kwishyurwa gusa byamenyekanye ko we ku ngoma ye hari na we na ryo asize.

Amakuru ISIMBI yamenye ni uko aya yari asigaye kwishyurwa hiyongeraho umushahara imishahara y’abakinnyi, amafaranga yaguzwe bamwe mu bakinnyi batarabona (muri uyu mwaka w’imikino), umwenda wa miliyoni 50 Frw iyi kipe imufitiye kuko ari ho yakoreraga umwiherero.

Bivugwa ko Rayon Sports iheruka guhemba mu kwezi kwa 5 aho abakinnyi, abatoza n’abandi bakozi bose ku kwezi bahembwa miliyoni zirengaho 50 Frw (gusa abakinnyi bose si ko bafite amasezerano y’amezi 12 hari n’abasinya umwaka w’imikino).

Ikindi kandi ni uko hari abasinyiwe sheki zigomba kuba zishyuwe bitarenze uku kwezi kwa 9, iyo uteranyije ayo mafaranga agera kuri miliyoni 64.

Uwayezu Jean Fidele yasigiye Rayon Sports umwenda wa miliyoni 400 Frw

Mu 2018 nibwo hatangijwe uyu mushinga wo kubaka ibitaro bya Nyarugenge biri ku rwego rw'akarere, bitangira gukora muri Gicurasi mu 2020.

Ni umushinga wahinduye Imibereho y'Abanyarwanda by'umwihariko abo mu Mujyi wa Kigali, ariko usiga akangononwa mu bayisilamu kuko bari biteze ko ubutaka byubatsweho aribwo bwagombaga gushyirwaho umusigiti w'icyitegererezo.

Umushinga wo kubaka umusigiti mukuru kuri ubu butaka watangajwe mu 2012 n'ubuyobozi bw'Umuryango w'Abayisilamu mu Rwanda, ndetse hahita hatangira gukusanywa inkunga yagombaga gukoreshwa muri iyi mirimo.

Mbere y'uko uyu mushinga w'umusigiti utekerezwaho ubu butaka bwakoreshwaga nk'irimbi ry'Abayisilamu, ariko riza kuzura ndetse nk'uko biteganywa n'itegeko nyuma y'imyaka 20 umuntu wa nyuma ashyinguwemo hagomba kugira ikindi bukoreshwa ari nabwo hatekerejwe kuri uyu musigiti.

Mu kiganiro IGIHE iheruka kugirana na Mufti w'u Rwanda, Sheikh Mussa Sindayigaya yagarutse ku miterere y'iki kibazo.

Sheikh Sindayigaya yavuze ko ubu butaka bwari ubwa Leta n'ubwo Abayisilamu benshi bari barishyizemo ko ari ubwabo kubera kutagira amakuru ahagije.

Ati 'Buriya butaka rero buriya hahoze hari irimbi abayisilamu bashyinguragamo, ariko ntabwo bwari ubutaka bwacu nka RMC. Bwari ubutaka bwa Leta. Irimbi ntabwo riba ari ubutaka bwite bw'umuntu kereka iyo yaryiguriye kuko amategeko na byo arabyemera, ariko iyo ari leta yaritanze, iguha serivisi yo gushyingura ariko ntabwo ubutaka buba ari ubwawe.'

Yakomeje avuga ko nyuma Umuryango w'Abayisilamu mu Rwanda waje gusaba ubu butaka Umujyi wa Kigali kugira ngo ubwubakeho Umusigiti, gusa ntiwahabwa igisubizo gitomoye.

Ati 'Iyo irimbi ryuzuye rero umuntu wa nyuma arishyinguwemo, babara imyaka 20 uhereye icyo gihe, yashira leta igasubirana ubutaka bwayo. Hariya rero iyo myaka yari ishize ndetse Umuryango w'Abayisilamu wari wahasabye Meya kuko bwari ubutaka bwite bw'akarere ariko ntabwo yari yarigeze asubiza ngo avuge ngo ndabubahaye hamwe n'icyangombwa. Hari isezerano ko bazadusubiza ariko biza kurangira hajemo undi mushinga wa leta na wo ukenewe, bituma leta itahatanga. Hari abantu badasobanukiwe rero bajyaga bavuga ngo n'ubutaka bwarariwe.'

Yakomeje avuga ko 'Umuntu utazi iby'amategeko akabona ari abayisilamu bahashyingura rero, akabona ni ubuyobozi bw'idini buhagena, we ahita avuga ati buriya butaka ni ubwacu ahubwo baraburiye; abitewe no kuba atarahawe amakuru, ibihuha no kudasobanukirwa amategeko. Buriya butaka rero nashakaga gutangariza Abayisilamu ko butigeze buba ubwacu ahubwo ko ari ahantu twari twarahawe kujya dushyingura hanyuma igihe twahasabaga ntitwahahawe kuko leta yazanye undi mushinga na yo yari ikeneye gushyiramo. Ibyo rero byabaye imbogamizi yo kuba umushinga utarashyizwe mu bikorwa.'

Bite by'imisanzu yatanzwe n'Abayisilamu?

Uyu mushinga ukimara gutangizwa n'Umuryango w'Abayisilamu mu Rwanda, abayoboke b'iri dini batangiye kwitanga kugira ngo uzashyirwe mu bikorwa.

Amakuru yizewe IGIHE ifite ni uko imisanzu yari imaze kwemerwa n'abayisilamu nk'amafaranga bazatanga yabarirwaga muri miliyoni 60Frw.

Mufti Sheikh Musa Sindayigaya yavuze ko 'Ku mafaranga rero abayisilamu batanze, na none habayemo gukabya no gukabiriza. Impamvu ni uko mu buryo bwo gukusanya amafaranga y'uwo mushinga, abantu benshi basezeranye ko bazatanga amafaranga ariko mu bintu by'inyubako, abantu batanga amafaranga ni abantu baba bazi iby'inyubako banayafite bagatanga inkunga nini ariko ntibapfa guhita bayatanga batarabona ko iyo nyubako yatangiye kubakwa. Abenshi baravugaga ngo nimutangira nzatanga iki, ariko mu by'ukuri atanzwe mu buryo bwa kashi ugasanga ntagera kuri ayo ni make cyane. Bamwe bavugaga ngo tuzatanga mutangiye kubaka mukaba mutarabitangiye, ubwo nyine ntabwo ayo mafaranga bayatanze. Uko ni ko kuri k'ukuntu byagenze.'

Yakomeje avuga ko inkunga yari imaze gutangwa mu yemewe ari miliyoni 20Frw.

Ati 'Amake yari yatanzwe mu buryo bw'amafaranga ni miliyoni 20 Frw. Nyakubahwa Mufti ucyuye igihe Sheikh Salim Hitimana agitangira manda ye y'ubuyobozi, yabitangarije abayisilamu ku munsi w'Ilayidi abishyira no mu butumwa bwagenewe abiyisilamu arababwira ati za miliyoni 20 Frw mwatanze mu buryo bw'amafaranga ziri kuri konti z'umuryango, nitujya gutangira tuzayaheraho, hanyuma tubatangarize icyo yakoze.'

Yavuze ko kugeza ubu hari undi mushinga wo kubaka Umusigiti Mukuru n'Icyicaro Gikuru ry'Umuryango w'Abayisilamu mu Rwanda, mu Karere ka Gasabo muri Kacyiru. Aya mafaranga ngo azaherwaho muri uyu mushinga mushya.

Ati 'Ibyo nanjye ndabishimangira kandi ndabitangariza abayisilamu ko nidutangira uwo mushinga tuzabanza gushyiraho ariya tukabereka icyo yakoze, hanyuma tubone kubabwira ngo nimuzane ayandi dukomeze umushinga. Icyo gihe ubwo tuzanakangurira na ba bandi biyemeje ya masezerano kugira ngo na bo bahigure wa muhigo wabo, ariko ariko ntidushaka gutangaza ibintu imburagihe.'

Abayisilamu bari biteze ko ubu butaka bwubatsweho ibitaro bya Nyarugenge buzashyirwaho Umusigiti Mukuru

Yabigarutseho ubwo yatangizaga icyumweru cyahariwe ubukangurambaga ku ihame ry'uburinganire n'ubwuzuzanye mu muryango, cyatangirijwe mu Murenge wa Gahini kuri uyu wa Kabiri tariki ya 17 Nzeri 2024.

Nsengiyumva Elias utuye mu Mudugudu wa Rwinkuba mu Kagari k'Urugarama, yabwiye IGIHE ko mu myaka nka 20 ishize abagore benshi bumvise nabi ihame ry'uburinganire ku buryo barikoresha nabi batsikamira abagabo bikanavamo gatanya.

Ati 'Leta ikwiriye kumanuka igasobanurira neza abaturage ibijyanye n'ihame ry'uburinganire. Ni ukuri mu giturage abenshi barikoresha nabi batsikamira abagabo, nta mugore ugiha icyubahiro umugabo mbese bumvise nabi uburinganire. Hari usanga umugabo nta jambo afite mu rugo ku buryo yibeshye akanasakuza ahubwo yafungwa.'

Mukamazimpaka Jacqueline utuye mu Mudugudu wa Nyagitabire we yavuze ko koko iki kibazo cy'abagore bumvise nabi uburinganire kiri hose bitewe nuko umugore asigaye yumva yarara mu kabari nk'umugabo.

Ati 'Ubundi kera nta mugore wajyaga mu kabari ngo ageze saa Moya akikarimo ariko ubu kubera uburinganire arakicaramo ukaba utamukabukira ngo akumve, ahita akubwira ngo bariya bagabo bo se ko bakicayemo. Leta niyongere ubukangurambaga yereke buri wese ko nubwo hari ibyo yemerewe ariko ko umuco ugihari ku buryo hari ibyo adakwiriye kurenga.'

Munyaneza Emmanuel we yavuze ko hari ibyo Leta yatangiye gukora byo guhugura abantu ku ihame ry'uburinganire n'ubwuzuzanye, asaba ko byakongererwa imbaraga kuko muri iki gihe abagore bari kumva nabi ihame ry'uburinganire n'ubwuzuzanye.

Ati 'Barumva ko abagabo babakandamije igihe kinini bagomba nabo kubakandamiza mbese bakabishyura.'

Umuyobozi w'Akarere kayonza, Nyemazi John Bosco yavuze ko bishoboka ko abagore bashobora kumva nabi ihame ry'uburinganire bigatuma bateshuka ku nshingano zabo avuga ko bidakwiye.

Yavuze ko ari kimwe n'uko n'umugabo nawe ashobora kumva nabi ihame ry'uburinganire.

Ati 'Icyo rero tubagiramo inama ni ukubigisha inzira nziza ishingiye ku cyo amategeko ateganya ariko ikiruta byose ni ubwumvikane. Umuryango uhari uteganya kwiteza imbere urangwa no gufatanya, gushyira hamwe ndetse n'ukuri.'

Meya Nyemazi yakomeje agira ati 'Ubutumwa twabaha ni ukwirinda kumva nabi uburinganire, uyu munsi igihugu cyacu gifite politiki yo guha umugore ijambo, guhabwa ijambo ntibisobanuye guteshuka ku nshingano, ntibisobanuye kwitiranya inshingano ugomba kuba ukora no kuba wakoresha ubwo burenganzira ukabukoresha nabi. Iyo hari ubukoresheje nabi amategeko nawe aramuhana, abagore nibumve ko ihame ry'uburinganire ari ukubabanisha neza n'abagabo babo buri wese akagira uburenganzira bungana n'ubwa mugenzi we.'

Abaturage basabye ko ibiganiro byibanda ku ihame ry'uburinganire n'ubwuzuzanye byakongerwa cyane mu midugudu batuyemo, ababukoresha nabi bakajya babihanirwa abagabo batarindiriye kujya kubarega kuko abenshi batinya kujya kurega abagore babo.

Umuyobozi w'Akarere ka Kayonza, Nyemazi John Bosco yakebuye abagore batubahiriza inshingano z'urugo bitwaje ihame ry'uburinganire n'ubwuzuzanye

Byabereye mu Murenge wa Butare ku wa 17 Nzeri 2024, nyuma y'uko abaturage bagize amakenga kuri uyu mugabo w'imyaka 40, bagatanga amakuru ku nzego z'ubuyobozi.

Mu mirenge itandukanye y'Akarere ka Rusizi no mu mirenge y'Akarere ka Nyamasheke hashize igihe humvikana abantu biyitirira REG bakagenda mu ngo z'abaturage, babaka amafaranga kugira ngo babahe umuriro w'amashanyarazi mu buryo budakurikije amategeko.

Umuyobozi wa REG, ishami rya Rusizi, Nzayinambaho Tuyizere Jacques yabwiye IGIHE ko iki kibazo nyuma yo kukimenya bakoze ubugenzuzi basanga koko hari abagenda bigize abakozi ba REG kandi atari bo bakaka abaturage amafaranga.

Ati 'Mu cyumweru gishize nibwo twamenye ko uyu mugabo wo mu Murenge wa Butare agenda yaka abaturage amafaranga ababwira ko azaba umuriro. Birashoboka ko ibikoresho akoresha yabyibaga mu giturage kuko ntabwo tuzi aho yabivanaga'.

Umunyabanga Nshingwabikorwa w'Umurenge wa Butare, Ildephonse Ngamije yabwiye IGIHE ko uyu mugabo w'imyaka 40 wafashwe ku bufatanye bw'inzego z'umutekano n'inzego z'ubuyobozi akurikiranyweho kwiba ibikoresho bya REG no kwaka ruswa abaturage.

Uwafashwe afungiye kuri sitasiyo y'Urwego rw'Igihugu rw'Ubugenzacyaha mu Murenge wa Nyakabuye mu gihe iperereza rikomeje.

Ubuyobozi bw'Ikigo cy'Igihugu gishinzwe ingufu (REG), buvuga ko uyu mugabo wo mu Murenge wa Butare mu Karere ka Rusizi, abaye uwa gatanu ufatiwe muri ibi byaha mu gihe kitageze ku mezi atanu.

Ibyishimo ni byose mu muryango w’umunyamakuru akaba n’umuhanzi w’imideli Murenzi Emmanuel uzwi mu itangazamakuru nka Emmalito n’umugore we Umwali Liliane bibarutse imfura.

Aba bombi bibarutse umwana w’umukobwa bise ‘Kena’.

Abinyujije ku mbuga nkoranyambaga ze Emmalito yashimiye umugore we watumye yitwa Papa agaragaza ko ari ashema kuri we.

Ati “Warakoze Mama Kena, ntewe ishema no kwitwa Papa Kena.”

Yakomeje agaragaza ko ibyishimo afite utabyumva utarabyara, abwira umwana we ko amukunda ndetse amuraga kuzaba Intwali, gukunda Imana n’u Rwanda.

Ati “Akenshi ubyumva neza iyo ubyaye, gusa ntewe Ishema no kwitwa Papa Kena. Ndakwishimiye kandi ndagukunda mwana wanjye, uzabe umunyabigwi, ube intwali nk’uko izina ryawe ribivuga.”

“Uzakunde abantu, wange umugayo, ukunde umurimo uharanire guhindura amateka unategurira abazagukomokaho, uzabe umunyabwenge, uzumvire ababyeyi bawe, uzafashe abagushakaho ubufasha uko ushoboye kandi utarobanuye k’ubutoni, ntuzirate ubutwari, ahubwo uzaburatwe. Ikirenze kuri ibi nkubwiye, uzakunde Imana n’u Rwanda, ndagukunda cyane mukobwa wanjye, imigisha kuri mama wawe.”

Emmalito na Umwali bakoze ubukwe ku wa 4 Kanama 2023, umunsi wabereyeho umuhango wo gusaba no gukwa mu gihe ku mugoroba basezeranye imbere y’Imana mu Itorero rya Angilikani Paruwasi ya Remera.

Emmalito yamamaye mu bitangazamakuru bitandukanye hano mu Rwanda birimo Royal TV, Isibo TV n’ibindi, akaba kandi ari umuhangamideli binyuze muri sosiyete ye yise 'Loto Ris Design’, ubu asigaye atuye muri Canada n’umugore we.

Emmalito na Umwalimu bibarutse imfura yabo

Umwali yibarutse

Bibarutse imfura ya bo

RUKUNDO Sulaiman / ISIMBI.RW

Umuhanzikazi wo muri Kenya, Tanasha Donna Oketch, yanenze abagereranyije iminwa ye n’iya Diamond Platnumz babyaranye.

Mu minsi ishize ni bwo uyu mugore yahishuye ko yagiye kwibagisha iminwa ngo igire imiterere y’uko yifuza.

Nyuma yo kwibagisha byagaragaye iminwa ye yabaye minini ari ho abantu batangira kuvuga kuyigereranya n’iya se w’umwana we Diamond Platnumz cyane ko nawe adafite mito.

Abinyujije kuri Instagram Story ye, yavuze ko bibabaje kuba abantu bifata bagasuzugura umuntu ariko ngo hari igihe bazamushimira atagihari.

Ati “Muransuzugura mukantesha agaciro, ariko ni byiza. Hari umunsi uzagera mukanshimira ntakiri hano.”

Tanasha Donna yibagishije iminwa mu ntagiriro z’uyu mwaka aho yavuze ko gukira bibasaba ibyumweru bibiri.

Iminwa ya Tanasha bayigereranyije n’iya Diamond Platnumz babyaranye

Diamond Platnumz na we iminwa ye si mito

Ni amakuru yatangajwe kuri uyu wa 17 Nzeri 2024.

Ibinyujije ku rubuga rwa Minisiteri y'Ububanyi n'Amahanga, Singapore yatangaje ko uruzinduko rwa Perezida Kagame ruzahera ku wa 18-23 Nzeri 2024.

Itangazo rirakomeza riti 'Nk'ibihugu binyamuryango by'Ihuriro ry'Ibihugu bifite ubuso buto (Forum of Small States: FOSS), Singapore n'u Rwanda bikorana bya hafi mu guteza imbere inyungu z'ibihugu bito ndetse no guha imbaraga gahunda ihuriweho n'ibyo bihugu.'

Uruzinduko rwa Perezida Kagame muri Singapore rubaye urwa gatanu agiriye muri icyo gihugu gifite ubuso bwa kilometero kare 734.3. Uruheruka ni urwo yagiriye muri iki gihugu muri Nzeri 2022

Muri urwo ruzinduko biteganyijwe ko Perezida Kagame azagirana ibiganiro na mugenzi we Tharman Shanmugaratnam na Minisitiri w'Intebe wa Singapore, Lawrence Wong, unasanzwe ari Minisitiri w'Imari.

Biteganyijwe kandi ko Perezida Kagame azakirwa ku meza n'uwahoze ari Minisitiri w'Intebe wa Singapore, Lee Hsien Loong.

U Rwanda na Singapore bikunze gufatanya mu nzego zitandukanye. Bihuriye muri FOSS, umuryango washinzwe mu 1992 n'iki gihugu gituwe n'abarenga miliyoni eshanu.

FOSS ni umuryango uhuriwemo n'ibihugu byo ku migabane itandukanye, aho ibihugu biwugize bifatanya mu kwiteza imbere no guhangana n'ibibazo biba byugarije ibihugu bifite ubuso buto.

Muri Nzeri 2023 kandi u Rwanda na Singapore byashyize umukono ku masezerano y'ubufatanye mu guteza imbere imibereho myiza y'abaturage no kwimakaza iterambere ry'ubukungu.

Ni amasezerano yasinywe binyuze muri Minisiteri y'Ububanyi n'Amahanga n'Ikigo cya Singapore Cooperation Enterprise, SCE, asinywa na Ambasaderi w'u Rwanda muri Singapore, Jean de Dieu Uwihanganye n'Umuyobozi Mukuru wa SCE, Wy Mun Kong.

Azamara imyaka itanu ashyirwa mu bikorwa mu nzego zirimo ikoranabuhanga cyane cyane mu kwimakaza umutekano wo kuri internet no guhangana n'imihindagurikire y'ibihe.

Yari arimo kandi gukora ibishushanyo mbonera by'imijyi y'u Rwanda, gutunganya ibyanya byahariwe ubucuruzi n'inganda, guteza imbere ibikorwaremezo n'ubwikorezi rusange n'ibindi.

Umubano w'u Rwanda na Singapore kandi ushimangirwa no kugenderanirana hagati y'abayobozi b'ibihugu bombi.

Uretse Perezida Kagame ugiye kugirira uruzinduko muri Singapore, mu 2022 uwari Minisitiri w'Intebe wa Singapore, Lee Hsien Loong, yagiriye uruzinduko mu Rwanda, ruba urwa mbere agiriye mu gihugu no Afurika muri rusange.

Uyu muyobozi ukomeye muri Singapore uzanakira Perezida Kagame ku meza yabyawe na Lee Kuan Yew afatwa nk'umubyeyi w'iki gihugu kirutwa n'u Rwanda kuko yaharaniye ubwigenge bwacyo kikareka kuba agace ka Malaysia.

Singapore iri mu bihugu bya mbere bikize ku Isi. Mu 2023 umusaruro mbumbe wayo wageze kuri miliyari 501$ uvuye kuri miliyari 0.70$ mu 1960.

Imibare yo mu 2023 igaragaza ko umusaruro mbumbe ku muturage wari ugeze ku bihumbi 84,6$ ku mwaka.

Perezida Kagame agiye kugirira uruzinduko muri Singapore ruzasiga agiranye ibiganiro n’abarimo Lee Hsien Loong wabaye Minisitiri w’Intebe w’iki gihugu

Ibi byagarutsweho n'abaturage bo mu Murenge wa Gahini kuri uyu wa Kabiri tariki ya 17 Nzeri 2024, ubwo hatangizwaga icyumweru cyahariwe ubukangurambaga ku ihame ry'uburinganire n'ubwuzuzanye mu muryango. Muri uyu Murenge habarurwa ingo 86 zifitanye amakimbirane.

Bamwe mu baturage bo mu Murenge wa Gahini biganjemo abakuze, babwiye IGIHE ko muri iki gihe abashakanye cyane cyane abakiri bato bugarijwe n'ikibazo cyo guhishanya imitungo ku buryo giteje inkeke.

Hategekimana Phocas utuye mu Mudugudu w'Ubuyanja, yavuze ko ikibazo cyo guhishanya imitungo gihari cyane ariko ko kenshi gikunze kugaragara mu bashakanye bakiri bato ku buryo usanga umugore afite imitungo umugabo we atazi n'umugabo bikaba uko.

Yasabye Leta kongera amahugurwa hagati y'abashakanye kuko ngo inama bakoreshwa zikiri nke cyane ugereranyije n'izikenewe.

Uwajeneza Béatrice ni umugore w'abana batanu utuye mu Mudugudu wa Nyiramata mu Kagari ka Kiyenzi. Yatanze ubuhamya bw'ukuntu yanyerezaga umuntu wabo kugeza ubwo urugo rwabo rudindiye cyane.

Ati 'Nari umugore mubi pe, umugore wiba nkaca umugabo wanjye inyuma nkanyuza umutungo hirya, nari umugore ufite ihene n'inkoko ku ruhande umugabo wanjye atabizi. Twabaga twejeje ibishyimbo nkarenzaho ingemeri 20 nkazibitsa ku ruhande, ku munsi w'isoko narazigurishaga nkahahamo ibintu atazi nk'imyambaro nkamubeshya ko ari mubyara wanjye wayinguriye.'

Uwajeneza yavuze ko igihe cyageze yigishwa ku mpinduka zatuma umuryango we utera imbere, ava ku kureka konti ye bwite umugabo we atari azi arahinduka afatanya nawe mu kubaka urugo rwiza rutarimo kwishishanya.

Munyaneza Emmanuel utuye mu Mudugudu wa Nyagitabire mu Kagari k'Urugarama, nawe yavuze ko iki kibazo cy'abahishanya imitungo gihari cyane, aho usanga hari abagore baba mu bimina abagabo babo batazi ndetse n'abagabo bikaba uko.

Ati 'Ibintu byo guhishanya imitungo birahari cyane nkatwe dukora mu midugudu n'Amasibo hari igihe duhura nabyo ukagenda ugasanga umugore aba mu kimina ariko iyo agabanye umugabo ntamenya aho ashyira amafaranga, hari n'abumva ko amafaranga y'umugore ngo ari aye bwite ku buryo umugabo atayafiteho uburenganzira.'

Umuyobozi w'Akarere ka Kayonza, Nyemazi John Bosco, yavuze ko iki kibazo cy'abashakanye bahishanya imitungo kenshi kigaragara mu miryango iba itarasezeranye imbere y'amategeko.

Yavuze ko bari mu bukangurambaga bwo gusaba ababana batarasezeranye kubikora kuko bikuraho kwishishanya hagati yabo ahubwo bikanarema ubumwe bwo gukorera hamwe.

Ati 'Guhishanya imitungo ahanini bishingiye ku kuba abantu babanye mu buryo bunyuranyije n'amategeko, ariko iyo babanye mu buryo bwemewe n'amategeko barasezeranye iyo hagaragaye n'ikibazo tumenya n'uburyo tugikurikirana. Ubu rero tugiye gukora ubukangurambaga aho binagaragaye ko hari uwakoze ibinyuranyije n'amategeko hagati y'abashakanye amategeko amuhane.'

Kuri ubu ibi bikorwa byahariwe uburinganire n'ubwuzuzanye biteganyijwe ko hazasezeranwa imiryango irenga 700 mu Karere kose, imiryango ibana mu makimbirane izegerwa iganirizwe ndetse hakazanakemurwa ibibazo bitandukanye birimo gusubiza abana mu ishuri no gutanga serivisi z'irangamimerere.