Category: Uncategorized

Rayon Sports yabonye amanota y’umunsi wa 5 wa shampiyona yakuye i Rubavu itsinze Rutsiro FC igitego kimwe ku busa.

Ni umukino wabaye kuri uyu wa Gatandatu tariki ya 28 Nzeri 2024 kuri Stade Umuganda, ni umukino Rayon Sports yashakaga gutsinda ku kabi n’akeza.

Iminota 45 y’umukino yarangiye nta kipe ibashije kureba mu izamu ry’indi amakipe ajya kuruhuka ari ubusa ku busa.

Mu ntangiriro z’igice cya kabiri, ku munota wa 50 Rayon Sports yaje kubona igitego cya mbere cyatsinzwe na Iraguha Hadji ku ishoti rikomeye yatereye inyuma y’urubuga rw’amahina.

Iraguha Hadji akaba atishimiye iki gitego ahubwo yahise asaba imbabazi kuko yari atsinze ikipe yamushyize ku itara Rayon Sports ikamubenguka. Iki gitego ni cyo cyatandukanyije impande zombi.

Indi mikino yabaye AS Kigali yatsinze Muhazi United 2-1, Musanze inganya na Marines 1-1. Ejo hashize Bugesera yanganyije 0-0 na Gasogi United, Mukura VS itsindwa na Gorilla FC 3-1.

Ejo Kiyovu Sports izakira Amagaju FC, Vision FC yakire Police FC ni mu gihe Etincelles FC izakira Police FC.

Hadji yatsinze ikipe yahozemo ayisaba imbabazi

Rayon Sports yabonye amanota 3

Ibi bitero bitigeze bibaho byibanze ku nyubako zo guturamo ziherereye mu Majyepfo y'Umurwa Mukuru Beirut, aho bivugwa ko abaturage benshi barimo n'abana bagwiriwe n'inkuta.

Ni ibitero Israel yavuze ko yiciyemo Umuyobozi w'Ishami ry'Umutwe wa Hezbollah rishinzwe kurashisha za misile witwa Muhammad Ali Ismail ari kumwe n'umwungirije witwa Hussein Ahmad Ismail.

Ntabwo abapfiriye muri ibyo bitero bose baramenyekana, na cyane ko imbangukiragutabara zabuze uko zigera mu bice byagizweho ingaruka byo mu Karere ka Dahiyen bijyanye n'uburemere bw'ibisasu IDF iri kumisha kuri uwo mujyi.

Icyakora abantu batandatu ni bo bamaze kumenyekana ko baguye mu bitero IDF yagabye abandi 100 barakomereka, icyakora kubarura bangirijwe n'ibyo bitero bikaba bikigoye kuko ubutabazi bwihuse butari gushoboka.

Israel igaragaza ko itagambiriye kwica abaturage ahubwo ishaka gutsinsura indiri ya Hezbollah, no kurimbura ububiko bw'intwaro zikomeye uwo mutwe ukoresha mu kuyigabaho ibitero.

Iki gihugu kigaragaza ko cyashakaga gusenya Akarere ka Dahiyeh, agace gafatwa nk'indiri ya Hezbollah yazengereje Israel mu bihe bitambutse.

Abaturage benshi bavuye mu Karere ka Dahiyeh aho bageragezaga gushaka ubuhungiro ahitwa Ramlet al-Baida, igice cyo ku mucanga giherereye mu Mujyi wa Beirut abantu bakunda kujya kuruhukiraho iyo bagiye ku mazi no mu bindi bice by'i Beirut rwagati.

Israel kandi yavuze ko mu Gice cya Galileya cyo mu Majyaruguru y'icyo gihugu humvikanye urusaku rw'utwuma dutanga umuburo iyo hari ikibi kigiye kuba, mu gihe gito iki gihugu gihita gitahura ibisasu 10 byari birashwe biturutse mu Majyepfo ya Liban.

Aljazeera yatangaje ko ibitero byeruye kuri Liban bimaze guhitana abarenga 700 kuva ku wa Mbere w'iki cyumweru

Israel yavuze ko izatuza inyubako za Hezbollah zose izishyize hasi, icyakora bikavugwa ko n'abaturage bagakomeza gupfa.

Bijyanye n'uko igice cyarashweho cyari kigizwe n'ishyamba, abaturage bari guhora bazimya kuko buri kanya hari gututumba inkongi, bijyanye n'ibyo bitero bya Israel bityo gutabara abantu bikagorana.

Kugeza ubu ibitaro 37 byafunze kuko abaganga bakeka ko Israel ishobora kubagabaho ibitero.

Israel ikomeje umugambi wayo wo gutsinsura Hezbollah

Itegeko Nshinga ry'u Rwanda rigaragaza umuryango nk'ishingiro ry'igihugu. Ibi bituma ubuyobozi bw'u Rwanda bushyira imbaraga mu guharanira imibanire myiza n'ituze mu miryango binyuze mu kuvugurura amategeko no korohereza imiryango itari iya Leta ikora mu bijyanye no kurwanya ihohoterwa.

Mu 2021 akarere ka Karongi kakoze ikusanyamakuru gasanga gafite imiryango irenga 3000 ibanye mu makimbirane, n'abangavu barenga 500 basambanyijwe baterwa inda.

Iryo sesengura ryagaragaje ko mu byongereye amakimbirane mu miryango harimo ubusinzi no kutumvikana ku ikoreshwa ry'umutungo w'urugo.

Ibi byatumye akarere kiyambaza imiryango itari iya Leta ifite aho ihuriye no kurwanya ihohoterwa bafatanya guha imbaraga umugoroba w'imiryango n'ibiganiro bitangwa n'abahoze babanye mu makimbirane.

Umuyobozi wungirije w'Akarere ka Karongi, ushinzwe imibereho myiza y'abaturage, Umuhoza Pascasie avuga ko izi ngamba zatanze umusaruro.

Ati 'Mu miryango twari twabonye imiryango ibanye mu makimbirane igera ku 3015, nyuma yo gukorana n'abafatanyabikorwa muri ya gahunda y'umugoroba w'imiryango, dufitemo abahinduriwe imyumvire bongera kubana neza ndetse bamwe muri baranasezeranye, abagera ku 1816 ubu ni imiryango ibanye neza. Ntangarugero'.

Umubare w'abangavu baterwa inda ku mwaka mu karere ka Karongi nawo waragabanutse kuko wavuye kuri 500 mu 2021 ukagera kuri 200 mu 2023-2024.

Visi Meya Umuhoza avuga ko ari umusaruro w'ubukangurambaga bafatanyamo n'abafatanyabikorwa batandukabye by'umwihariko kwigisha abasore n'inkumi ubuzima bw'imyororokere.

Ati 'Nibura ubona ko ubukangurambaga bukorwa hari umumaro bwagize ku bijyanye no guhindura imyumvire y'umuryango ndetse no kuba abana basobanukirwa ubuzima bw'imyororokere'.

Mu karere ka Karongi imiryango ibanye mu makimbirane yagabanyutseho 1,800 mu myaka 3 ishize

Ubu butumwa yabutanze kuri uyu wa 27 Nzeri 2024 ubwo yahuriraga n'Umuyobozi mushya w'inzego z'umutekano z'u Rwanda muri Cabo Delgado, Gen Maj Emmy Ruvusha, mu Karere ka Pemba.

Mangrasse yanashimye ubufatanye buri hagati y'inzego z'umutekano z'u Rwanda n'iza Mozambique mu gucyura abaturage bari barahunze imidugudu bari batuyemo muri Cabo Delgado.

Muri Nyakanga 2021 ni bwo u Rwanda rwohereje abasirikare n'Abapolisi muri Cabo Delgado, mu gihe gito zirukana abarwanyi b'umutwe w'iterabwoba wa Ansar al Sunnah mu birindiro bari bamaze imyaka ine bahashinze.

Nyuma yo gukura abarwanyi b'uyu mutwe mu birindiro bihoraho bari bafite muri iyi ntara, hakurikiyeho ibikorwa bihuriweho byo kubahiga mu mashyamba bahungiyemo.

Minisiteri y'Ingabo z'u Rwanda yatangaje ko Mangrasse na Gen Maj Ruvusha baganiriye ku ntambwe imaze guterwa muri ibi bikorwa.

Inkuru bifitanye isano: Kajugujugu ku rugamba, gusimbuza abasirikare, abagiye kuyobora Ingabo: Isura nshya i Cabo Delgado

Gen Maj Emmy Ruvusha yakiriye Admiral Mangrasse wa Mozambique

Abofisiye b’u Rwanda n’aba Mozambique basuzumye imigendekere y’ibikorwa byo kurwanya iterabwoba

Abofisiye b’ibihugu byombi bafashe ifoto y’urwibutso

U Rwanda rumaze iminsi mu biganiro n'ubuyobozi bwa Formula 1 bwo kwakira irushanwa rya Formula 1, nubwo Umuvugizi wa Guverinoma y'u Rwanda, Yolande Makolo, yabwiye ko The East African ko “bidakwiriye k'u Rwanda kuvuga ku biganiro biri gukorwa hagati yarwo na Formula 1.”

Uyu muyobozi yongeyeho ko u Rwanda rwahoranye ubushake bwo kwakira amarushanwa nk'aya mu gihe cyose hari amahirwe y'uko yagira uruhare mu guteza imbere ubukungu bw'u Rwanda.

Afurika y'Epfo yigeze kwakira aya marushanwa ya Formula 1 mu 1993, ari naryo rushanwa riherutse kwakirwa muri Afurika. Maroc nayo ifite ibikorwaremezo byifashishwa mu kwakira iyi mikino, aho biheruka kuyakira mu 1958, uretse ko ubu iki gihugu cyongeye kugaragaza ubushake.

Urubuga rwa F1Chronicle ruvuga ko u Rwanda rwakenera miliyoni 270$ mu kubaka imihanda yihariye ikoreshwa muri iri rushanwa, kuyitaho bigasaba miliyoni 18,5$ buri mwaka.

Ibikorwa birimo kubaka aho abafana bicara, parikingi y'imodoka z'irushanwa n'ibindi bijyana no kwita ku kibuga, bishobora gutwara miliyoni 30$, ibi bikiyongera ibyumba byo kwakira abashyitsi byinshi kandi biri ku rwego rwiza n'ibindi byangombwa byose bikenerwa.

Kugeza ubu ibihugu 34 ni byo bimaze kwakira iri siganwa ryatangiye gukinwa kuva mu 1950, ku mugabane wa Afurika ryabereye muri Afurika y'Epfo gusa ari na ho riheruka mu 1993.

Hari benshi baha amahirwe u Rwanda kuba rwakoroherezwa kwakira iri rushanwa rya mbere mpuzamahanga mu gusiganwa ku modoka nto riheruka ku butaka bwa Afurika mu myaka 31 ishize.

Ibyo ariko bijyana no kubaka ibikorwa remezo bya Formula 1 bigezweho, bifite ubushobozi buhambaye bwo kwakira iyo mikino hakiyongeraho ikoranabuhanga ry'imbonekarimwe riwifashishwamo.

Perezida Kagame yakunze kwitabira amasiganwa ya Formula 1 mu bice bitandukanye, yaba i Dubai, Singapore n'ahandi.

IGIHE ifite amakuru ko hari itsinda ryashyizweho n'u Rwanda ryo kwiga ku buryo igihugu cyakwakira iri rushanwa.

Mu mpera z'uyu mwaka mu Rwanda hazabera Inama ya FIA izaba mu Ukuboza 2024, ikazajyana n'ibindi bikorwa by'iri shyirahamwe birimo no gutanga ibihembo ku bitwaye neza muri shampiyona zikomeye zirimo na Formula 1.

Afurika y’Epfo, Maroc n’u Rwanda bihanganiye kwakira Formula 1

Umusuwisi Muriel Furrer yitabye Imana nyuma yo kugira ibikomere ku mutwe ubwo yari mu isiganwa rya Shampiyona y’Isi iri kubera i Zurich.

Uyu mukobwa w’imyaka 18, yaguye ku wa Kane w’iki cyumweru ubwo yari mu isiganwa ryo mu muhanda.

Yahise ajyanwa na kajugujugu ku bitaro kugira ngo yitabweho, yaguye bitewe n’imvura yari yaguye imihanda ikanyerera.

Imvura nyinshi yaguye haba isiganwa i Zurich ku wa Kane, yatumye imihanda inyerera ndetse benshi mu bakinnyi baragwa.

Mu kiganiro n’abanyamakuru cyabaye ku wa Gatanu, Umuyobozi wa Siporo mu Mpuzamashyirahamwe y’Umukino w’Amagare ku Isi (UCI), Peter van den Abeele, yavuze ko nta makuru menshi batangaza ku byabaye kuko hakiri gukorwa iperereza.

Mu muhango wo gutanga imidali wabaye ku wa Gatanu, imiziki n’indirimbo zubahiriza ibihugu ntibyacuranzwe mu gihe amabendera yururukijwe kugeza hagati.

Hafashwe kandi umunota wo guha icyubahiro Furrer, hanasomwa ubutumwa bwo kwihanganisha umuryango we.

Furrer yaguye mu mpanuka

Myugariro wa Gasogi United, Nshimiyimana Marc Govin amaze icyumweru afunzwe nyuma yo gutumizwaho n’Urwego rw’Igihugu rw’Ubugenzacyaha (RIB).

Tariki ya 20 Nzeri 2024 ni bwo Urwego rw’Igihugu rw’Ubugenzacyaha, Sitasiyo ya Kanombe rwari rwatumijeho uyu myugariro wo ku ruhande rw’iburyo kugira ngo bagire ibyo bamubaza.

Ntabwo byakunze ko yitaba kuri uwo munsi ahubwo yabanje gukina umukino wa shampiyona bari bafitanye na Rayon Sports ibatsinda 1-0 ku wa 21 Nzeri 2024.

Amakuru ISIMBI yamenye ni uko ku wa Mbere tariki ya 23 Nzeri ari bwo yitabye ahita anafungwa kuko ntiyagarutse.

Inshuro zose ISIMBI yagerageje kuvugana n’Umuvugizi wa RIB, Dr Murangira B. Thierry ngo imenye byinshi uyu mukinnyi aregwa ntibyakunze kuko atatibaga telefoni.

ISIMBI yamenye ko umukobwa bahoze bakundana ari we ushobora kuba yaratanze ikirego bitewe n’uko uyu mukinnyi yamubangamiraga, akamukangisha amafoto bari kumwe igihe bakundanaga.

Nshimiyimana Marc Govin amaze icyumweru afunzwe

Aba bahanzi bazahurira muri iri serukiuramuco rizarangwa n'ibikorwa binyuranye, birimo gupima kanseri y'impindura, ibitaramo by'abahanzi, ibiganiro n'ibindi.

Rizaba ku wa 26 Ukwakira 2024 kuri BK Arena ku nshuro yaryo ya mbere, ndetse ibihumbi by'abantu bifashishije imbuga nkoranyambaga bamaze igihe bagaragaza ko biteguye kuryitabira.

Iri serukiramuco rigiye kuba mu rwego rwo gushyira mu bikorwa inzozi Yvan Buravan yari afite akiri ku Isi yo gukora ibikorwa nk'ibi bihuza abahanzi, agamije gusigasira umuco.

Binyuze muri Foundation YB iri gutegura iri serukiramuco, bagaragaje ko mu bahanzi bazaririmba muri iri serukiramuco harimo Jules Sentore, Andy Bumuntu, Ish Kevin, umuhanzikazi Boukuru uherutse gushyira ku isoko Album nshya, Alyn Sano ugezweho muri iki gihe binyuze mu ndirimbo 'Head' ndetse na Nel Ngabo.

Aba batangajwe mu gihe hategerejwe abandi bahanzi 10 bagomba kuzaririmba muri iri rushanwa, rizanarangwa n'ibikorwa byo kumurika ibihangano by'ubugeni Buravan yagiye akora.

Buri muhanzi yafashwe amashusho, atumira abantu kutazacikwa n'iri serukiramuco, ndetse buri wese yumvikanishije ko yiteguye gutanga ibyishimo ku bakunzi be.

Abazitabira iri serukiramuco bazapimwa kanseri y'impindura yibasiye umubare munini ku Isi, ndetse niyo yatwaye ubuzima bwa Buravan. Umuryango we ugaragaza ko wiyemeje gushyira imbaraga mu gukangurira abantu kwipimisha iyi ndwara, kugira ngo buri wese amenye uko ahagaze.

Mu bihe bitandukanye, Buravan yagiye agaragaza ko ari umuhanzi wari ugamije guteza imbere umuco n'injyana ya gakondo, ndetse binumvikana kuri Album ye 'Twaje'.

Yagiye agaragara kenshi yambaye imyambaro yihariye ijyanye na gakondo, inigi mu ijosi yabaga yahanze. Ushingiye ku myiteguro y'iri serukiramuco, bigaragara ko abaritegura, banatekereje uburyo bazamurika ibihangano uyu muhanzi yasize, ku buryo buri wese ashobora kwigurira. 

Ubwo Ruti Joel yakoraga igitaramo cyo kumurika Album ye 'Musomandera' mu Ukuboza 2023, yanagaragaje amashusho y'indirimbo 'VIP' Buravan yakoranye na Ish Kevin yari imaze igihe muri studio.

Hari abatekereza ko mu gitaramo cy'iri serukiramuco, hashobora kuzamurikwa zimwe mu ndirimbo, Buravan yasize muri studio zitararangira, icyo gihe zikazashyirwa hanze.

Ku wa 4 Ukuboza 2022, nibwo YB Foundation yaramuritswe ku mugaragaro mu rwego rwo guha icyubahiro Buravan ndetse no gukomeza ibikorwa yakoze akiraho.

Hari ibikorwa byinshi biteganyijwe muri YB Foundation harimo Twande; Gahunda z’umuco Buravan yatangije mu 2021 ndetse na gahunda zireba ubuzima, bizafasha guhangana n’umuvuduko w’indwara ya Cancer mu Rwanda.

Uyu muryango ufite inshingano zo gushyira ikiragano gishya aheza. Ibigwi by’inshingano, gukorera mu Mucyo ndetse no kugira ubushobozi bwo gutsinda no gukora itandukaniro.''

Ni umushinga Buravan yari yaratangije ndetse uri no mu yahembwe na 'Imbuto Foundation', binyuze muri Minisiteri y'Urubyiruko.

Yvan Buravan yitabye Imana ku wa 17 Kanama 2022 aguye mu bitaro byo mu Buhinde, aho yari yaragiye kwivuriza kanseri.

  

Umuhanzikazi Alyn Sano yemeje kuzitabira iserukiramuco 'Twaje Fest'

Umuraperi Ish Kevin yagaragaje ko yiteguye kuzasusurutsa abazitabira iri serukiramuco

Umuhanzi mu njyana gakondo, Jules Sentore wabanye igihe kinini na Buravan 

Andy Bumuntu azaririmba mu iserukiramuco ryitiriwe Album ya Buravan

Umuhanzikazi Boukuru uherutse gushyira ku isoko Album ye nshya

Nel Ngabo wo muri Kina Music agiye kongera kugaragara mu bitaramo nyuma y'igihe

Kwinjira muri iri serukiramuco byashyizwe ku mafaranga ibihumbi 5 Frw, n’ibihumbi 30 mu myanya ya VVIP

Ubu u Rwanda ruhanze amaso abakinnyi 3 Noam Emeran, Warren Kamanzi na Ndayishimiye Mike Tresor ngo barebe ko bakwemera kuza gukinira ikipe y’igihugu Amavubi.

Ubu gahunda u Rwanda rwihaye ni ugushaka buri mukinnyi wese ufite inkomoko mu Rwanda rukamwegera bakamwumvisha kuba yaza gukinira ikipe y’igihugu.

Ni urugamba rutoroshye kuko aba bakinnyi baba baravukiye hanze y’u Rwanda baba bafite inzozi ko bazakinira ibihugu by’ibihangange.

Ubu mu bakinnyi Amavubi ahanze amaso harimo Noam Emeran ukinira FC Groningen mu cyiciro cya mbere mu Buholandi, avuka kuri nyina w’Umunyarwandakazi na se Emeran Fritz Nkusi wakiniye ikipe y’igihugu Amavubi.

Uyu byakabaye byoroshye kuko hari impamvu nyinshi yakabaye ahitamo u Rwanda, gusa uyu mukinnyi w’imyaka 22 wakuriye mu Bufaransa akahava yerekeza mu irerero rya Manchester United ariko ntagire amahirwe yo kuzamurwa mu ikipe nkuru aka kanya ntabwo yiteguye.

Ikintu cya mbere cyabanje kugorana ni uko se yambuwe ubwenegihugu, ibintu yavugaga ko atakwifuriza umwana we ko byazamubaho.

Gusa nyuma y’ibiganiro byafashe igihe kinini, yaje kuva ku izima binagizwemo uruhare na nyina wa Emeran cyane ko aba mu Rwanda.

Gusa yababwiye igisigaye ari amahitamo ya Emeran Noam, gusa uyu mukinnyi abamwegereye bakubwira ko atari nonaha kuko yumva afite icyizere ko u Bufaransa buzamuhamagara, gusa bitinze yemereye u Rwanda ko azarukinira.

Undi u Rwanda ruhanze amaso ni Ndayishimiye Mike Tresor w’imyaka 25 ukinira Burnley mu Bwongereza, avuka kuri se w’Umurundi na nyina w’Umunyarwandakazi ariko akaba yarakiniye abato b’ikipe y’igihugu y’u Bubiligi ndetse no muri Kamena 2023 yahamagawe mu ikipe nkuru arayikinira.

Gusa nyuma y’icyo gihe ntabwo yongeye guhamagarwa ibintu abamwegereye bavuga ko byatumye atekereza kabiri.

Ni umukinnyi usatira anyuze ku ruhande, amakuru avuga ko u Rwanda rutigeze rukurayo amaso ubu ndetse ari dosiye igezweho barimo gukoraho hakaba hari icyizere ko yakwemera guhindura akaza gukinira u Rwanda.

Undi ni myugariro wo ku ruhande rw’iburyo muri Toulouse FC mu Bufaransa, Warren Håkon Christofer Kamanzi w’imyaka 23 uvuka ku mubyeyi w’umunyarwanda.

Kamanzi wakiniye abatarengeje imyaka 21 ba Norway ategereje ko no mu ikipe nkuru yagirirwa icyizere, gusa uko bitinda agenda abivamo, amakuru avuga ko kuri iyi nshuro adahamagawe yahita afata umwanzuro akaba yakinira u Rwanda, amakuru aturuka muri FERWAFA ni uko adahamagawe hari amahirwe yo kumubona mu Mavubi mu kwezi gutaha.

Warren Kamanzi ashobora kuza mu Mavubi vuba

Emeran Noam biracyagoranye

Ndayishimiye Mike Tresor ashobora kuza mu Mavubi