Mu ijoro ryakeye ryo kuri uyu wa gatatu tariki ya 8 Nyakanga, ahagana saa 20h00 z’ijoro mu Kagari ka Saga mu Murenge wa Muganza mu karere ka Gisagara, umugabo uri mu kigero cy’imyaka imyaka 48 yishe uwo bashakanye, ngo ejo yamwatse Frw 200 umugore amubwira ko ntayo afite.

Ukekwaho kwica umugore we yitwa Nkurabanga Laurent, nyakwigendera we yitwa Domitria Ntabuzaza uri mu kigero k’imyaka 55 y’amavuko. Abaturage bahise bamufata akimara kumutema.

Urupfu rw’uyu mugore nk’uko abaturanyi babivuga, ngo bakeka ko rwatewe n’amakimbirane bari bamaze iminsi bafitanye.
Ku munsi w’ejo mu gitondo umugabo yasabye umugore we Frw 200 yo kujya kunywa inzoga, undi (Nyakwigendera) amubwira ko ntayo afite.

Munyanziza … Uyobora Umudugudu wa Nyakagezi (aho ukekwaho icyaha yari atuye mbere yo kwinjira nyakwigendera), avuga ko bariya bantu bari bamaze imyaka 3 babana mu nk’umugabo n’umugore.

Avuga ko bamenye amakuru ko amaze kwica umugore bihuta bajya gutabara basanga yamaze kumutema.
Munyanziza ati ”Bari bamaze iminsi basa nk’abafitanye ibibazo, yamutegeye mu nzira ahita amutema akoresheje umuhoro twahageze dusanga amaze kumwica ariko twamufashe tumushyikiriza Ubuyobozi.”

Nyakwigendera nta mwana n’umwe yari afitanye n’uyu wamwishe nubwo bari bamaranye imyaka itatu babana, kuko ngo uyu mugabo yinjiye uyu mugore atakibyara kuko ‘yacuze imbyaro’.

Umunyamabanga Nshingwabikorwa w’agateganyo w’Umurenge wa Muganza, Nkunda Alexis avuga ko aya makuru bayamenye ko uyu mugabo winjiye umugore mu mwaka wa 2010.
Yavuze ko ngo yatemye uyu mugore, intandaro ari amafaranga y’imbuto z’umuceri z’umugore. Umugabo ngo yarazigurishije amuhisha amafaranga yazikuyemo.

Nkunda ati ”Ku wa mbere bari bagiranye amakimbirane ubwo umugore yasabye umugabo kumugurishiriza imbuto z’umuceri, ariko umugabo amaze kuzigurisha amuhisha amafaranga, amaze kumenya ko yazigurishije amafaranga 2000 baza gushwana, umugabo nyuma amutegera mu nzira aramutema.”

Nkunda avuga ko yamutegeye mu nzira amutema ukuboko n’ijosi ahungira mu nzu yari hafi aho, ni ho yahise agwa azize ibikomere.

Si ubwa mbere uyu mugabo ngo akoze ibyaha byo gutemana, mbere ya Jenocide yakorewe Abatutsi nabwo yafunzwe azira gutema umuntu aramukomeretsa bikabije ndetse ngo na nyuma ya Jenoside yafungiwe gukubita no gukomeretsa.
Kugeza ubu uyu wakoze ibi yamaze gutabwa muri yombi n’inzego z’umutekano ndetse n’umurambo wa Nyakwigendera ugiye kujyanwa kwa muganga ngo ukorerwa isuzuma.

The post Gisagara:yishe umugore we amuziza ibiceri 2 by’ijana. appeared first on KASUKU MEDIA.

source https://kasukumedia.com/gisagarayishe-umugore-we-amuziza-ibiceri-2-byijana/

Impeshyi yageze, benshi mu banyamujyi bakunze kurimba batangiye kubika imyambaro bari bamaze iminsi bambara ijyanye n’igihe cy’ubukonje kimwe n’imvura, ari nako batekereza ku myambaro bashobora kwifashisha muri iki gihe cy’ubushyuhe.

Umunyamakuru wa hillywood.rw yaguteguriye imyambaro icumi wakwambara ukaberwa muri iki gihe cy’impeshyi

Iyi ushobora kuyambara ugiye ku kazi ukaba warenzaho ikote mu gihe uri mu kazi ariko wagira gahunda yo gusohoka ukaba wasiga ikote cyangwa ryo ukaritwara mu ntoki ugasohoka warimbye kandi bitabaye ngombwa ko ubanza kunyura mu rugo.

Indi kanzu yo kujyana ku kazi ni itaratse ushobora kujyana mu gihe waba unafite gahunda mbere y’akazi ukaba wayisohokana bitabaye ngombwa ko ujya guhindura. Iyi kanzu icyiza cyayo ni uko idasaba ko uyambaye arenzaho ikote wenda igihe ari mu kazi.

Iya gatatu yo kuba wajyana ku kazi ariko ukaba wanayisohokana ukagaragara neza nk’uwarimbye, ni ikanzu yo kujyana ku kazi mu gihe wenda ufite inama witabiriye. Icyiza ni uko iyo uyambaye warenzaho agakote mu gihe uri mu kazi ariko waba usohotse ukaba wanayambara bitabaye ngombwa ko ubanza guca mu rugo.

Uyu ni umwenda woroheje utuma uruhuka nko mu gihe watembereye ahantu nko ku mazi ukiruhukira neza.

Uyu ni umwambaro w’impeshyi nko ku muntu ushaka gusohoka yaba ku manywa ndetse na nijoro, ushobora kuwambaraho inkweto ngufi cyangwa indende bitewe n’aho ugiye.

Uyu mwambaro ni isarubeti umuntu yambara yaba yasohotse mu birori binyuranye cyangwa se ku muntu wifuza kuwusohokana kimwe n’abahanzi bakora amashusho y’indirimbo. Ujyana n’inkweto zizamuye cyangwa inkweto ngufi ifite ibara bijyanye.

Iyi ni ikanzu ushobora gusohokana yaba ku manywa cyangwa nijoro waba wasohotse cyangwa wagiye gutembera, kubera ko igizwe n’amarase biba byiza uyambaye iyo ahisemo kwambariramo kora nk’umwenda w’imbere cyangwa byaba bitabangamye ukayambarira aho.

Iyi kanzu iroroshye cyane ni umwambaro umuntu yatahana ubukwe mu mpeshyi izuba riva cyangwa hari ubushyuhe ntimubangamire, ifite pasure igaragaza ikimero cy’uyambaye uko ateye intambwe ikagaragaza ubwiza bw’uyambaye.

Iyi ni ikanzu yo mu bukwe bidasabye abantu izishashagirana, si ikanzu y’amaboko maremare abantu bambara bazi ko bataha hakonje cyangwa imvura iri kugwa. Ni ikanzu nziza kandi ikomeye ishobora kugufasha mu gihe watashye ubukwe.

Ikanzu ya nyuma ni iyo ushobora kwambara yaba uri umugeni cyangwa watashye ubukwe, ni nini ariko nanone ni iyo mu mpeshyi kuko idafite amaboko ku buryo uyambaye hejuru adashyuhirana cyane.

source https://www.hillywood.rw/?p=74773

Abakinnyi ba APR FC bari ntizanyo mu yandi makipe, baribaza niba iyi kipe izabagarura cyangwa izabagumisha mu ntizanyo, ibyo byaba bidakunze ikaba yabarekura, ni mu gihe yo ivuga ko nta gahunda yo kubagarura mu mwaka w’imikino ugiye kuza.

Mu mwaka ushize w’imikino wa 2019-2020, bitewe n’impamvu zitandukanye APR FC yatije bamwe mu bakinnyi bayo andi makipe.

Abo bakinnyi twavuga nka Songayingabo Shaffy watijwe AS Kigali, uyu akaba ari n’umwana wazamukiye mu irerero ry’iyi kipe.

Myugariro Niyigena Clément baguze muri Marines FC bagahita bongera bakamutiza iyi kipe mu gihe cy’umwaka umwe, hari kandi na Sugira Ernest watijwe Rayon Sports mu gihe cy’amezi 6.

Aba bakinnyi bose bakaba bari basoje intizanyo zabo, gusa bamwe muri bo babwiye ISIMBI ko kugeze ubu batazi niba bazasubira muri APR FC cyangwa bazakomeza mu ntizanyo.

Umwe yagize ati“ubu naba nkubeshye, ndatagereje rwose sinzi niba nzakomeza mu ntizanyo. Gusubirayo nabyo simbizi ni ugutegereza tukareba.”

Amakuru aturuku mu nshuti za hafi naza Niyigena Clement avuga ko we yamaze guhakanira Marines FC ayibwira ko batazakomezanya, aho amakuru avuga ko yifuza ko yagurishwa aho gutizwa, cyangwa ngo yaba anatijwe akajya ahembwa na APR FC kuko ari yo afitiye amasezerano.

Mu kiganiro kigufi cyane umuvugizi w’ikipe ya APR FC yahaye ISIMBI, Kazungu Claver yavuze ko abo bakinnyi nta gahunda bafite yo kubagarura mu mwaka w’imikino wa 2020-2021, bakaba bazaguma mu ntizianyo

Niyigena Clement(uwa kane uhereye ibumoso) yifuza ko yagurishwa

Sugira yatijwe muri AS Kigali

Shaffy yatijwe muri AS Kigali

source http://isimbi.rw/siporo/article/bamwe-mu-bakinnyi-ba-apr-fc-mu-gihirahiro