Author: webrwanda

Ibi byabereye mu Murenge wa Mushubati, Akagari ka Gitwa ho mu mudugudu wa Rwintore.

Umunyamabanga nshingwabikorwa w'Umurenge wa Mushubati, Mwenedata Jean Pierre, yahamirije IGIHE aya makuru avuga ko iperereza ku gushaka uwataye uru ruhinja mu musarane rikomeje.

Ati 'Uwamutayemo ntaramenyekana, turi gukorana n'ubuyobozi bw'umudugudu n'abajyanama b'ubuzima ngo tumenye abari basanzwe batwite, turebe uwaba yakuyemo inda.'

Mwenedata yaboneyeho gukangurira abantu kwirinda kugwa mu byaha, kuko uwo bigaragayeho ko yabikoze wese abihanirwa nk'uko amategeko abiteganya.

Yasabye abangavu kwirinda kujya mu busambanyi no gukora imibonano mpuzabitsina idakingiye, mu kwirinda ibyaha byababaho.

Mwenedata yatunze agatoki ababyeyi baha akato abana babo iyo batwaye nda zitifuzwa ziterwa bigatuma abangavu batiyakira, ibishobora kuba byatuma abana biheba bakaba bakuramo inda.

Ibiro by’Akarere ka Rutsiro

Uru ruganda rwafunguwe ku mugaragaro ku wa 01 Mata 2025, ruherereye mu cyanya cy'inganda cya Mwulire giherereye mu Karere ka Rwamagana.

Uru ruganda rwitwa TKMD rwubatswe n'Abashinwa rukaba rwatangiranye abakozi 110 aho 80% ari abari n'abategarugori.

Minisitiri w'Ubuzima, Dr. Nsanzimana Sabin, yavuze ko uru ruganda ruje ari igisubizo muri Afurika yose kuko inshinge zari ikibazo hirya no hino mu bihugu bya Afurika.

Yavuze ko kuri ubu inshinge za mbere uru ruganda rwatangiye gukora zahise zigurwa zose na UNICEF aho zizoherezwa mu bihugu bya Ethiopia, u Burundi, Repubulika Iharanira Demokarasi ya Congo, Mozambique n'ahandi henshi.

Ati 'Ikibazo cyo gutegereza inshinge nticyari umwihariko wacu nk'u Rwanda twenyine. Ni ikibazo rusange kuko zavaga hanze kandi aho bazikora na bo nta bushobozi bwo guhaza isoko ryose rikenewe bafite. Ubu rero ibyo bibazo byose byakemutse uru ruganda ruje kuba igisubizo ku Rwanda no ku Mugabane wa Afurika muri rusange.''

Uruganda rwa TKMD rwatangiranye ubushobozi bwo gukora inshinge ziri hagati y'ibihumbi 600 na miliyoni ku munsi ariko intego akaba ari ukuzongera bitewe n'amasoko bazajya baba bafite.

Uruganda rwa TKMD rwari rumaze amezi atanu rukora aho inshinge rukora zabanje kugenzurwa harebwa ko zujuje ibipimo mpuzamahanga, ndetse hasangwa rubyujuje.

Icyanya cy'inganda cya Rwamagana gifite ubushobozi bwo kwakira inganda 51 kuri ubu hakaba harimo inganda 19 zikora neza, hari izindi enye zamaze kuzura zitegereje guhabwa ibyangombwa ngo zikore mu gihe izindi 11 ziri kuhubakwa.

Minisitiri w’Ubuzima, Dr Sabin Nsanzimana, yagaragaje ko uru ruganda rwa TKMD rukora inshinge ruje ari igisubizo muri Afurika

Abayobozi batandukanye batashye uruganda rukora inshinge

Uruganda rw’inshinge rwatashywe mu Rwanda rwitezweho gufasha urwego rw’ubuzima muri Afurika

Uru ruganda rwitwa TKMD ruzajya rukora inshinge miliyoni ku munsi

Uru ruganda rwitwa TKMD rukora inshinge rukoresha ikoranabuhanga rigezweho

Uruganda rwa TKMD rukora inshinge rufite abakozi barenga 100

Uruganda rwa TKMD rukora inshinge zikoreshwa mu bihugu bitandukanye bya Afurika

‎Ni mu mikino yo ku munsi wa 30 wa shampiyona y’icyiciro cya mbere mu Bwongereza yakinwe kuri uyu wa Kabiri. ‎‎Mu mukino wabereye kuri Emirates Stadium, Arsenal yatangiye umukino ihererekanya neza gusa kugera imbere y’izamu bikaba ikibazo bijyanye nuko ba myugariro ba Fulham bari bihagazeho.

‎‎Ku munota wa 16 ikipe y’abarashi yagize ibibazo ivunikisha Gabriel Magalhaes hajyamo Jacob Kiwior. ‎‎Arsenal yakomeje kwatsa umuriro imbere y’izamu rya Fulham maze bigeze ku munota wa 38 Ethan Nwaneri aha umupira mwiza Mikel Melino arekura ishoti rikubita ku maguru ya Jorge Cuenca uruhukira mu izamu. 

‎‎Nyuma y’uko Fulham itsinzwe yakomeje kurushwa gusa ikanyuzamo ikabona koroneri zitagize icyo ziyifasha. ‎‎Mbere y’uko igice cya mbere kirangira, Gabriel Martinelli yarekuye ishoti ryashoboraga kuvamo igitego cya kabiri ariko Bernd Leno aratabara.

‎Mu gice cya kabiri nabwo Arsenal yaje ikomeza gusatira ndetse binashoboka kubona igitego nk’aho Jurrien Timber yarekuye ishoti riremereye, gusa birangira umunyezamu atabaye.

‎‎Ku munota wa 63 Fulham yari yibye umugono ku mupira Adama Traore yatse Jacub Kiwior ageze imbere y’izamu awusunikira Raul Jimenez Gus birangira umubanye muremure.

‎‎Amakipe yombi yakoze impinduka mu kibuga aho ku ruhande rwa Arsenal havuyemo Ethan Nwaneri hajyamo Bukayo Saka wari umaze amezi menshi yaravunitse naho ku ruhande rwa Fulham havamo Saka Lukic na Adama Traore hajyamo Andreas Pereira na Willian.

‎‎Bidatinze ku munota wa 73 Bukayo Saka yahise atsinda igitego ya 2 akoresheje umutwe ku mupira yahawe na Gabriel Martinelli.

‎‎Mbere y’uko umukino urangira, Fulham yarungurutse mu izamu rya Arsenal ku gitego cyatsinzwe na Rodrigo Muniz ahawe umupira na Ryan Sessegnon.

‎‎Indi mikino yakinwe, Manchester United yatsinzwe na Nottingham Forest igitego kimwe ku busa [1-0] naho Wolves itsinda West Ham United igitego kimwe ku busa [1-0].

‎‎Kugeza ubu Liverpool yo izajya mu kibuga ejo kuwa Gatatu niyo ikomeje kuyobora urutonde rwa shampiyona n’amanota 70 mu gihe Arsenal yo iri ku mwanya wa 2 n’amanota 61.

‎

Arsenal yatsinze Fulham 2-1

Bukayo Saka wari amaze igihe kinini yaravunitse yagarutse atsinda 

BDF yashinzwe mu 2011 igamije gufasha ibigo bito n'ibiciriritse kugera kuri serivisi z'imari, ariko benshi bagaragaza ko imishinga ibona inguzanyo n'ingwate.

Raporo y'Umugenzuzi w'Imari ya Leta ya 2023 igaragaza ko kuva muri Kamena 2017 kugeza ku wa 30 Kamena 2023 hari koperative n'ibigo 18 byahawe amafaranga na BDF angana na miliyoni 411 Frw, ariko muri Mutarama 2024, izo koperative ntizari zigikora n'imitungo yazo ntiyari igikoreshwa.

Iri raporo igaragaza ko kuva mu 2020 kugeza mu 2024 BDF yagombaga kwishingira inguzanyo z'imishinga 2.733 buri mwaka, ariko kugeza mu 2023 bari bamaze kwishingira imishinga 5.418 bingana na 49,6%.

Mu biganiro Abadepite bagiranye na Minisitiri w'Ubucuruzi n'Inganda, Prudence Sebahizi, ku wa 1 Mata 2025, bagaragaje ko mu myaka 14 iki kigega kimaze, abaturage batari bakimenya ndetse n'abantu bashyizwe mu nzego z'ibanze ngo bafashe abaturage nta bumenyi bafite.

Depite Niyorurema Jean Rene yavuze ko ibibazo muri BDF bikunda kugaruka ndetse byanze gukemuka by'umwihariko abatinda kubona inguzanyo bibangamira abakora ubuhinzi.

Ati 'Ikibazo cy'inguzanyo z'ubuhinzi n'ubu kiracyagaragara ko kigihari aho abaturage bakoze imishinga y'ubuhinzi n'ubworozi babona inguzanyo igihembwe cy'ihinga cyararangiye icyo kikaba ari ikibazo bakibonamo imbogamizi.'

Yanavuze ko hari abayobozi ba BDF ku karere bohereza dosiye ku rwego rw'igihugu ariko bagatinda kubona ibisubizo, bityo n'umuturage amaso agahera mu kirere.

Depite Musolini Eugène yavuze ko amafaranga ibihumbi 12 Frw acibwa abaturage bose bigiwe imishinga ari umutwaro, hakiyongeraho n'ubumenyi buke bw'abashinzwe gufasha abaturage kwiga imishinga.

Ati 'Ikindi ni ubushobozi bw'abiga iyi mishinga muri BDF.[…] Uretse ubumenyi bw'abiga imishinga ariko bivuze ko muri biriya bihumbi 12 Frw basaba abaturage, nubwo Minisitiri [Sebahizi] yatubwiye ko bishyura 50% ariko twasanze bayatanga yose. Kandi bivuze ko uko yize imishinga myinshi ni ho yungukira, ariko ni ingahe ibasha gufatwa banki zikayiha inkunga? Aho ni ho hari ikibazo.'

Minisitiri Sebahizi yavuze ko uko imishinga ikorwa ari myinshi atari ko ihabwa inkunga bityo ko hagomba gushyirwaho uburyo bushya bwo guhitamo abahabwa ubufasha.

Ati 'Iyo natwe dukoze isesengura dusanga uko imishinga yabaye myinshi atari ko ihabwa inkunga kuko umushinga uhabwa inkunga ari uko wemejwe na banki. Ushobora gusanga hari umuntu ukoze imishinga 100 muri yo 15 ikaba ari yo ihabwa inguzanyo, mu gihe undi yakoze 100, na ho 90% ikabona amafaranga bitewe n'ubunararibonye yakoranye. Bivuga ko hari ikibazo.'

Imishinga yahawe inguzanyo iherekezwa ite?

Depite Mukarugwiza Judith yagaragaje ko ubusabe bw'inguzanyo muri BDF butangwa hakoreshejwe ikoranabuhanga butuma abantu basa n'abasahuranwa bigatuma amafaranga adasaranganywa mu turere mu buryo Bungana kandi bugendewe ku bikenewe.

Ati 'Usanga n'iyo mishinga yatewe inkunga nta buryo buhari bwo kuyikurikirana kugira ngo iherekezwe itange umusaruro yari yitezweho, ndasaba ko imitangire y'inguzayo za BDF ivugururwa kugira ngo izo nguzanyo zigire uruhare mu kuzamura ubukungu bw'igihugu.'

Depite Mukarugwiza yavuze ko mu kigega kigamije kuzahura ubukungu gitegerejwe hari abantu bari mu turere baryamiye amajanja kuko bazi ko hari miliyari 30 Frw yenda gutangwa.

Ati 'Ndasaba ko mu gutanga izo nguzanyo hazashyirwaho uburyo bunoze, hagakorwa itoranywa ry'imishinga, hakitabwa ku mishinga ibyara inyungu itanga akazi ku bandi baturage benshi kandi ifite uruhare mu kuzamura umusaruro w'ibyoherezwa mu mahanga mu rwego rwo gusubiza umuhigo igihugu cyihaye wo gukuba kabiri ibyoherezwa mu mahanga.'

Najya inama y'uko BDF ivaho

Depite Mukabunani Christine yavuze ko mu myaka yose BDF imaze yagaragayemo ibibazo byinshi birimo kutamenyekana mu baturage, akanayishinja kutagira icyo ibamarira.

Ati 'Njye natanga inama ko BDF yavaho hakajyaho ikindi kintu ariya mafaranga yakoreshwa. Ashobora gushyirwa mu Umurenge SACCO, ashobora gushyirwa ahandi. Urebye igihe kimaze BDF itagaragara, abaturage ntibayizi ntacyo ibamariye yewe n'ingamba zagaragajwe ni izisanzwe.'

'Njye nibuka ingendo Abadepite bakoze mu 2022 na bwo ibi bibazo byari bihari n'ingamba zaragaragajwe ariko ntacyo byatanze[…] njyewe rero natanga inama y'uko ariya mafaranga ajya muri BDF Leta yayashyira muri SACCO akagurizwa abaturage bisanzwe nk'uko bigenda bikorwa.'

Minisitiri Sebahizi yamusubije ko BDF ifite ibikorwa byinshi yakoze mu myaka 14 imaze birimo kuba yaratanze inkunga ku mishinga irenga ibihumbi 53, hahangwa imirimo ku bantu ibihumbi 159, na ho abafashijwe barimo abagore 40% na ho 25% bakaba urubyiruko.

Ati 'BDF igendera muri gahunda za Leta kandi ikadufasha mu gukusanya inkunga. Uyu munsi hamaze kuboneka miliyari zirenga 120 Frw zakusanyijwe binyuze muri BDF. Ntabwo twabara ko itakoze ahubwo icyo twabara ni ukureba niba ikora neza.'
Gahunda ihari ni uko muri NST2 ikigega BDF kizafasha mu guhanga imirimo ibihumbi 60.

Biteganyijwe Kandi ko mu bihe bya vuba hazarangira amavugurura muri BDF ku buryo imikorere yayo izarushaho kunoga no kugera ku bantu benshi hagamijwe iterambere.

Abadepite bagaragaje ko hari byinshi bikwiye kunozwa mu mikorere ya BDF kugira ngo ibashe gufasha igihugu gutera imbere

Nk'uko urubuga news-medical.net rubitangaza, ubushakashatsi buherute gukorwa bwagaragaje ko kutoza amenyo nijoro byongera ibyago byo kurwara indwara z'umutima, cyane cyane ku bantu barengeje imyaka 20.

Abahanga bavuga ko mu ijoro bitewe n'uko umuntu aba agiye kumara amasaha menshi afite ibiryo biba byasigaye mu menyo, ari bwo 'microbe' zivuye muri bya biryo zororoka ndetse zigatangira kwangiza ingingo zitandukanye zihereye ku ishinya.

Mu bibazo biterwa no kutoza amenyo nijoro hazamo kandi umuvuduko w'amaraso ukomoka ku bintu bitandukanye biba byangijwe na za microbe, ari byo ahanini bishobora kurangira uteje ibibazo bikomeye ku mutima.

Ubundi umuntu agirwa inama yo koza amenyo buri uko amaze kurya, cyangwa se akoza amenyo gatatu ku munsi ubwo bikaba mu gitondo, saa sita na nimugoroba. 

Gusa ibi bibaye bikunaniye wajya woza amenyo nyuma yo gufata ibyo kurya bya mu gitondo, ndetse ukongera nyuma yo gufata ibyo kurya bya nijoro mbere yo kuryama.

Iyo uvuze Healing Worship Team, benshi bahita bibuka indirimbo zamamaye bikomeye nka: “Calvary”, “Nta misozi”, “Icyo Wavuze”, “Mbali na Kelele”, “Nguwe neza”, “Amba Hafi”, “Atatimiza” yarebwe n’abarenga Miliyoni 2.6 kuri Youtube, “Shikilia Pindo”, “Jina Hilo ni Uzima”, “Tuliza nguvu za Shetani” n’izindi nyinshi zahembuye abantu babarizwa muri za miliyoni.

Ni itsinda ryubatse ibigwi bikomeye mu Rwanda ku buryo buri wese wateguraga igitaramo mu Rwanda ari bo yatekerezaga bwa mbere nk’abaramyi azisunga mu gitaramo cye. Ku ruhimbi, byabaga ari ibicika, bagatarakira Imana mu buryo bukomeye yaba mu gusirimba, kuyiririmbira mu njyana zituje, imyambarire ibereye abana b’Imana, amajwi aryoshye nk’ubuki n’ibindi.

Nkivuga amajwi y’abaririmbyi ba Healing Worship Team yo mu myaka yatambutse uhite wibuka Diane Nyirashimwe wafatwaga nka nimero ya mbere mu baririmbyi bo mu Rwanda babarizwa muri za Worship Teams, ahanini bikaba biterwa n’uburyo atera indirimbo ahanika ijwi akongera akarimanura mu buryo buryoheye amatwi.

Uyu Diane ni we wari ishyiga ry’inyuma muri Healing Worship Team dore ko ari we wayoboraga indirimbo zabo hafi ya zose. Nyuma y’uko mu 2021 agiye gutura muri Leta Zunze Ubumwe za Amerika, yasize icyuho muri iri tsinda dore ko kuva agiye, ritongeye kumvikana cyane nka mbere. Diane yahise atangira kurirmba ku giti cye akabifatanya no kuririmba muri Asaph DFW.

Si Diane gusa wagiye bigateza icyuho mu muziki wa Gospel mu Rwanda by’umwihariko muri Healing Worshio Team, ahubwo hari na bagenzi be bandi bagiye hanze y’u Rwanda mu bihe bimwe barimo Kadogo [Eric Byiringiro] wagiye kuba muri Amerika na Rumenge Etienne wari Perezida wa Healing WT akaba yaragiye kuba muri Canada. 

Muri ibyo bihe humvikanye inkuru yaciye igikuba muri Gospel ko Healing Worship Team yacitsemo ibice bibiri nyuma y’uko bamwe mu baririmbyi bayo bagiye kuba hanze y’u Rwanda  bahisemo kuba Minisiteri ndetse bagashyizeho izina rya Healing Worship Ministry, icyakora abo mu Rwanda bo batsimbaraye ku gukomeza kwitwa Healing Worship Team. 

Nyamara kuva bamwe mu ba Diaspora ba Healing batangaje izina rishya n’imikorere mishya, nta gikorwa cyabo kigeze kigaragara, ahubwo hakomeje kugaragara ibikorwa by’abaririmbyi bo mu Rwanda – bamwe bakomeje kwitwa Healing Worship Team nubwo ibyo bikorwa byagizwe ubwiru ntibabishyire mu itangazamakuru kuko bahisemo kubanza “kubaka no gusiba icyuho”.

Kuri ubu Healing Worship Team Rwanda igarukanye imbaraga nyinshi mu muziki ndetse baravuga ko bafite indirimbo 10 bamaze gutunganya muri studio. Abaririmbyi bayo nta rusengero rsihariye babarizwamo ahubwo baturuka mu nsengero zitandukanye ndetse “ufite impano n’ubushake wese yaza akadusanga tugakora umurimo wo kuramya no guhimbaza”. 

Magingo aya bafite indirimbo nshya, ikaba iya 4 mu ndirimbo 10 bakoze mu buryo bwa ‘Live Recording’ ku itariki ya 01/09/2024. Indirimbo nshya basohoye yitwa “Nafurahi ndani ya Yesu”, akaba ari indirimbo yabo “Nguwe neza” bashyize mu ruririmi rw’igiswahiri, ikaba isanzwe iri kuri album yabo ya gatatu. 

“Nafurahi ndani ya Yesu” iterwa n’umukobwa w’umuhanga cyane witwa Abimana Benitha, akaba ari we ufatwa nk’uwiteye umwitero wa Diane Nyirashimwe. “Ni Umuririmbyi wacu uri kubizamo neza tumufitiye icyizere”. Byatangajwe na Perezida wa Healing Worship Team Rwanda, Muhoza Budete Kibonke. 

Yakomeje avuga ko ikorwa rya “Nafurahi ndani Yesu” ryaturutse ku busabe bw’abakunzi babo baherereye mu bihugu bitandukanye mu Karere. Ati “Abantu benshi ba Kenya na Tanzania bagiye babidusaba ko twayiririmba mu rurimi bumva twarabyumvise ubu twabikoze”. 

Muhoza Kibonke na we yemera ko Healing Worship Team Rwanda yari imaze igihe itumvikana cyane mu muziki, gusa akaba ari kibazo cyamaze kuvugutirwa umuti. Aganira na InyaRwanda, yagize ati “Yego mbere twari ku muvuduko uri hejuru. Itsinda ryacu ryahuye n’imbogamizi zitandukanye. 

Bamwe bagiye mu bihugu byo hanze, abandi batangije ministry, duhitamo kubanza kubaka no gusiba ibyuho gahoro gahoro, kuri ubu turabona tumaze kugera ku kigero cyiza cyo kwongera guhaguruka, kandi ubu twagarutse, indirimbo nyinshi ziri mu nzira, turategura no gukora izindi vuba cyane ntaguhagarara”. 

Yavuze ko kubera ibihe bikomeye banyuzemo mu myaka itambutse, ubu Healing Worship Team Rwanda yiganjemo amasura mashya “kubera izo mpamvu nari mbabwiye haruguru kandi twaziboneye ibisubizo rwose u Rwanda rufite impano nyinshi”. 

Yongeyeho ko ubu bahari ijana ku ijana anasaba ko abashaka kubatumira babikora ku bwinshi, ati “Impamvu abakundi ba Gospel batubuze ni uko twari tumaze igihe dushakira ibisubizo birambye ibibazo twahuye na byo ariko ubu turi tayari rwose ushaka kudutumira turahari”. 

Healing Worship Team Rwanda yiganjemo amasura mashya, gusa ni abanyempano bakomeye nk’uko bigaragarira mu ndirimbo bamaze gushyira hanze. Abaririmbyi bahanzwe amaso ubu muri iri tsinda harimo: Eulade, Shukuru, Dodos, Benitha, Emerence, Tuzayikorera n’abandi.

Healing Worship Team Rwanda bateguje imishinga ikomeye mu muziki wa Gospel

Healing Worship Team Rwanda batangaje ibyo bari bahugiyemo banateguza ibitangaza mu muziki

REBA INDIRIMBO NSHYA “NAFURAHI NDANI YA YESU” YA HEALING WORSHIP TEAM RWANDA

REBA INDIRIMBO “NGUWE NEZA” YA HEALING WORSHIP TEAM YASHYIZWE MU GISWAHILI

REBA INDIRIMBO “ICYO WAVUZE” IRI MU ZAKUNZWE CYANE ZA HEALING WORSHIP TEAM