Author: webrwanda

Ni inyubako y'amagorofa atandatu irimo umwanya uhagije wagenewe gutunganya no gutanga amasomo hakoreshejwe ikoranabuhanga ry'iya kure iyi kaminuza isanzwe ibangikanya n'amasomo mwarimu yigisha arebana n'umunyeshuri imbonankubone.

Iyi nyubako iri ahazwi nka Camp Kigali igenewe gusa serivisi zitangirwa ku cyicaro gikuru cya UR, bitandukanye n'aho cyahoze mu Ishami rya Gikondo aho byari bivanze n'amashuri yo kwigiramo, ibiro by'abarimu n'ubuyobozi bw'Ishami rya Gikondo.

Aha kandi hari igorofa yahariwe gutangirwamo amasomo mu buryo bw'ikoranabuhanga harimo studio yo gutunganyiririzamo amajwi n'amashusho, ibyumba bibiri abarimu bazajya bigishirizamo ndetse n'ahakorera isomero ryo kuri internet.

Ubuyobozi bwa UR busobanura ko ibyo bice by'ikoranabuhanga bizajya bihuza serivise zo kwigisha zatangirwaga ku mashami ya UR atandukanye.

Bivuze ko hari nk'amasomo azajya atangirwa ku cyicaro abanyeshuri bakayakurikira aho bari hose bitabaye ngombwa ko abarimu bayatangira mu mashami atandukanye.

Ni inyubako kandi ifite uburyo bwo gusukura amazi y'imvura akaba ari yo akoreshwa isuku, uburyo bwo kuzimya inkongi bwikoresha, ibikoresho bigezweho n'ikoranabuhanga ryo ku rwego rwo hejuru n'ibindi bishya byinshi bitabarizwaga i Gikondo.

Umuvugizi wa Kaminuza y'u Rwanda, Kabagambe Ignatius yabwiye IGIHE ko babonye ahantu hahagije icyicaro cya UR gikorera bikazatuma batanga serivise nziza.

Yagize ati 'Ni ishema ku bakozi ba UR na Leta muri rusange kuba tugiye ahantu hagutse tubasha gukorera. Nkanjye [i Gikondo] nakoreraga mu biro ukwanjye njyenyine abo dukora bimwe bakorera mu rindi gorofa ndetse hari n'abandi bakoreraga ahatandukanye n'abo bakora bimwe ugasanga koroherwa nk'abakozi bakorana bibaye imbogamizi.'

Kabagambe yongeyeho ko iyo nyubako yuzuriye rimwe n'izindi nyubako enye zo kwigishirizamo zirimo iri muri iryo shami rya Nyarugenge mu rya Huye, Nyagatare n'i Busogo zari mu mushinga umwe.

Iyo nyubako iri gukoreramo icyicaro cya UR, yatangiye kubakwa mu 2017 ikaka yaragombaga kuzura mu 2021. Byari mu mushinga mugari wubatswemo n'izindi nyubako wari ufite agaciro ka miliyoni 40$ watewe inkunga na Koreya y'Epfo.

Umuyobozi Mukuru wa UR, Prof. Kayihura Muganga Didas, mu mpera za 2024 yabwiye IGIHE ko icyadindije uwo mushinga ari ba rwiyemezamirimo bagiye bananirwa kuwusohoza bikarangira hashyizwemo abandi bituma hagenda habamo impinduka zitari ziteganyijwe.

Yongeyeho ko kwimuka i Gikondo ari uko atari ho icyicaro cya Kaminuza y'u Rwanda cyari kigenewe kuba kuko mu 2013 ishingwa nta biro yari yagahawe bituma hifashishwa inyubako yari igenewe ibiro n'amashuri byo muri iryo shami.

Iyi nyubako yatangiye gukorerwamo nubwo hari imirimo ya nyuma hanze igikorwa

Harimo uburyo bwo kuburira hakoreshejwe amajwi

Ibyumba by’amashuri byubatswe mu buryo bugezweho

Aha ni mu cyumba cy’inama cy’abakozi ba UR

Ni inyubako ibereye ijisho

Abakenera kunywa ibikonje cyangwa ibishyuye nta n’umwe warengejwe ingohe

Iyi studio izajya itunganyirizwamo amasomo atangwa hakoreshejwe uburyo bw’amashusho

Abakoresha amagare n’ipikipiki na bo batekerejweho bateganyirizwa umwanya wo guparikamo

Abafite ibinyabiziga bakorera muri iyi nyubako bateganyirijwe parking ihagije

Ni inyubako igezweho kandi ijyanye n’icyerekezo u Rwanda ruganamo

Amafoto: Munyemana Isaac

Abahawe impanuro ni abapolisi 320 bagize amatsinda abiri; RWAFPU1 rigizwe n'abapolisi 140 bayobowe na ACP Bernardin Nsengiyumva, bazakorera i Bangui mu murwa mukuru n'itsinda RWAFPU2 rigizwe n'abapolisi 180 bayobowe na CSP Jules Rutayisire, bazakorera ahitwa Kaga Bandoro.

DIGP Sano yabibukije ko akazi bagiyemo badahagarariye Polisi y'u Rwanda gusa, bahagarariye n'igihugu bakaba basabwa kwitwara neza birinda icyagisiga icyasha.

Ati 'Akazi mugiyemo muzaba muhagarariye igihugu kubera ko mugiye kwambuka umupaka, mukagakorera hanze y'igihugu. Mwoherezwa n'igihugu kugira ngo mujye gukora akazi kajyanye n'inshingano za Polisi, mugakorera mu izina ry'Umuryango w'Abibumbye. Impanuro muhabwa ziba zishimangira ibyo muba mwaratojwe, mugomba kubihuza n'akazi mugiyemo mukitwara neza muhesha isura nziza igihugu muhagarariye.'

Yabibukije ko abababanjirije bakoze neza, abasaba kubyubakiraho bakarushaho kubiteza imbere, imbogamizi bahuye nazo zijyanye n'imiterere y'ikirere, umuco n'ibindi, bakamenya uko babyitwaramo neza.

Ati 'Muba mwoherejwe mu butumwa bw'Umuryango w'Abibumbye kugira ngo mutange umusanzu wanyu mu kugarura umutekano mu gihugu mugiyemo. Kugira ngo muzasohoze inshingano zanyu neza mutera ikirenge mu cy'ababanjirije, mugomba kurangwa n'ubunyamwuga, ikinyabupfura, ubushake n'umwete, nicyo gituma mumaze igihe mwiga nyuma yo kuba mwaratoranyijwe kubera ko mwagiriwe icyizere na Polisi ndetse n'igihugu.'

DIGP Sano yakomeje abasaba kuzashyira imbere kumvira abayobozi, kubaha amabwiriza ajyanye n'akazi, kuzafata neza ibikoresho, buri muntu mu kazi ashinzwe babirinda, birinda ubwabo kandi banirinda uburangare no guta umwanya ku mbuga nkoranyambaga, bagakomeza gukunda igihugu no kugihesha agaciro.

U Rwanda rwatangiye kohereza abapolisi mu butumwa bw'amahoro muri Repubulika ya Centrafrique mu mwaka wa 2014.

Kuva icyo gihe, u Rwanda rwakomeje kohereza abapolisi mu butumwa bwa MINUSCA, aho kugeza ubu rufite amatsinda ane y'abapolisi bakorera mu bice bitandukanye by'igihugu arimo; RWAFPU-1 na RWAPSU, akorera mu Murwa mukuru Bangui.

Andi abiri ni RWAFPU-2 rikorera ahitwa Kaga Bandoro mu majyaruguru y'igihugu, mu bilometero 300 uturutse mu murwa mukuru Bangui, n'itsinda RWAFPU-3 rikorera mu mujyi wa Bangassou mu bilometero bisaga 720 uturutse mu Mujyi wa Bangui werekeza mu majyepfo y'Iburasirazuba.

Ubutumwa bw'Umuryango w'Abibumbye muri Santrafurika bugamije gufasha mu kugarura ituze no kwimakaza amahoro arambye, nyuma y'imyaka myinshi igihugu cyamaze mu ntambara n'ubushyamirane bw'amoko n'imitwe yitwaje intwaro.

Amatsinda y'abapolisi b'u Rwanda (RWAFPUs) afite inshingano zo kurinda abaturage b'abasivili barimo ababa mu nkambi z'abavanywe mu byabo, kurinda ibikorwaremezo by'ingenzi, guherekeza abakozi n'ibikoresho by'umuryango w'Abibumbye n'izindi nshingano zitandukanye.

Itsinda RWAPSU rifite inshingano z'ibanze zo kurinda umutekano w'abayobozi bakuru muri Guverinoma ya Santrafurika n'ab'Umuryango w'Abibumbye barimo; Minisitiri w'Intebe, Perezida w'Inteko Ishinga Amategeko, Minisitiri w'Ubutabera, Intumwa yihariye y'Umunyamabanga Mukuru w'Umuryango w'Abibumbye (SRSG) n'abamwungirije babiri ndetse n'Umuyobozi w'Ishami rya Polisi muri MINUSCA.

Byatangajwe kuri uyu wa Kabiri tariki ya 6 Gicurasi 2025 ubwo Minisiteri y'Ubutegetsi bw'Igihugu ifatanyije n'Urwego rw'Ubwiteganyirize byatangizaga uburyo bushya bwo kwishyura mituweli hashingiwe ku makuru ari muri sisiteme Imibereho yasimbuye ibyiciro by'Ubudehe.

Umuyobozi Mukuru wungirije wa RSSB, Louise Kayonga, yavuze ko mu mwaka w'ingengo y'imari ya 2024/2025, RSSB yinjije amafaranga arenga miliyari 84 Frw avuye mu bwisungane ariko ko Leta yatanzemo arenga miliyari 53 Frw kugira ngo yunganire ikigega cya mituweli.

Ati ''Ayakomotse ku musanzu w'abanyamuryango ni miliyari zirenga 30 Frw bingana na 36% y'amafaranga yose. Andi angana na miliyari 53 Frw yakomotse ku bundi buryo Leta yafashije ikigega cya mituweli mu kubona inkunga.''

Kayonga yavuze ko nibura amafaranga abaturage batanga kuri mituweli Leta ibongereraho amafaranga menshi kugira ngo bivuze. Yasabye abaturage badafite ubundi bwishingizi kwishyurira mituweli hakiri kare kugira ngo bazabone uko bivuza.

Kuri ubu abaturage batangiye kwishyura mituweli hashingiwe kuri Sisiteme Imibereho, aho amakuru y'urugo ari muri Sisiteme Imibereho agaragaraza ishusho y'imibereho y'urwo rugo ari na yo agenderwaho mu kugena ingano y'abagize umuryango bishyura ubwisungane mu kwivuza nk'uko ibyiciro by'Ubudehe byabigaragazaga mbere bigikoreshwa.

RSSB ivuga ko kandi imiti yatangirwaga kuri mituweli yongerewemo imiti ya kanseri, insimburangingo n'inyunganirangingo n'indi miti myinshi izafasha abaturage kubona ubuvuzi bufite ireme.

Kugeza ubu abanyamuryango basaga miliyoni 11 bangana na 88% by'Abanyarwanda bose nibo bamaze kwiyandikisha mu gutanga ubwisungane mu kwivuza, mu gihe Leta yifuza ko nibura bigera ku 100%.

Abaturage basabwe kwishyura mutuweli hakiri kare

Umuyobozi Mukuru Wungirije wa RSSB, Louise Kayonga yavuze ko mu ngengo y'imari ya 2024/2025 Leta yatanze miliyari 53 Frw mu kunganira abakoresha mituweli

Ni igikorwa cyabaye ku wa 3 Gicurasi 2025, aho cyitabiriwe n'abayobozi batandukanye ba Rwanda Foam n'abakozi bakorera uru ruganda, aho bahavuye bagaragaje ko bagiye gukora birushijeho ku byo bakoraga.

Umuyobozi ushinzwe Ubucuruzi muri Rwanda Foam, Maniraho Ernest, yavuze ko bateguye iki gikorwa mu rwego rwo gusabana n'abakozi bishimira ibimaze kugerwaho, banaganira kugira ngo ibitaragenze neza bizakosorwe mu gihe kiri imbere.

Yagize ati 'Akenshi duhura n'abakozi kubera akazi, ariko uyu munsi twagira ngo tubagaragarize ko atari icyo kiduhuza gusa, aho kuri ubu tugomba kwishimira ibyo amaboko yacu aba yarakoze, ariko tunasaba ko batateshuka ku murimo kuko ni wo utubeshejeho, ni na wo utumye turi hano.'

Yakomeje agira ati 'Tuba tunabagaragariza ko Rwanda Foam nubwo ari sosiyete ariko ari n'umuryango ufasha Abanyarwanda ndetse n'abandi bose mu kwiteza imbere kuko mu bo dukoresha ahari ababyeyi,abasore n'abakuzi ntabo dusiga inyuma.'

Umubyeyi umaze imyaka 26 akorera uruganda rwa Rwanda Foam, Francine Mukamuhizi, yavuze ko kuba babatekerezaho ku munsi w'umurimo bakishimana n'abakoresha babo ari iby'igiciro kenshi kandi bigiye gutuma barushaho gukora cyane nk'abikorera.

Undi mukozi muri Rwanda Foam, Ndaruhutse Aimable, yagize ati 'Kuba baduhurije hano ni ibintu duha agaciro kenshi bikatwereka ko Rwanda Foam ari umubyeyi, kuko hari abanda usanga badaha agaciro uyu munsi, umwaka uba ari munini tumaze turi mu kazi ariko kuba badushimira akazi dukora biranejeje'

Uruganda rwa Rwanda Foam rumaze imyaka irenga 40 rukora matelas kuva mu 1983. Aho rufite amashami agera muri atatu, Serivisi zarwo ziboneka ku bacuruzi barenga 60 bayihagarariye mu gihugu hose.

Kugeza ubu Rwanda Foam ifite abakozi bagera ku 150 barimo ingeri zose, aho yibutsa kandi ushaka kuyihagarira wese cyangwa wifuza gucuruza matelas zayo ko hari poromosiyo yo kwishyurirwa amezi abira y'ubukode bw'inzu ugiye gukoreramo.

Aharanga umucuruzi wa Rwanda Foam haba hari icyapa cy'umuhondo cyanditseho izina ryayo ndetse nta zindi matelas acuruza. Ushobora no guhaha unyuze kuri https://rwandafoam.com/ ikakugeraho bitarenze amasaha atatu ku bantu bari muri Kigali.

Umuyobozi wa Rwanda Foam, Makuza Patrick, yavuze ko abakozi bayo bakwiye kuyifata nk’umuryango, anabasaba gukomeza gukorana umurava no gukunda akazi

Abakozi ba Rwanda Foam bayishimiye kuba yarabatekerejeho bakizihizanya umunsi w’umurimo

Niyonsenga Elizabeth, utuye mu Murenge wa Gisenyi, Akagari ka Mbugangari urerera muri uru rugo mbonezamikurire, yabwiye IGIHE ko akora ubucuruzi bwambukiranya umupaka bw'amafi ayajyana mu mujyi wa Goma.

Ati 'Mbere ntarabona ahantu nasiga umwana, mu rugo harangwaga inzara ariko aho uru rugo mbonezamikurire ruziye rwaramfashije mbasha gukora ngateza imbere umuryango, kuko mba namusize aha mu gitondo nkajya gushakisha nkagaruka ku mutwara ku mugoroba ntahanye amafunguro.'

Yakomeje avuga ko gusiga umwana muri uru rugo mbonezamikurire yishyura ibiceri 300 Frw ku munsi, kandi bitamugora kuyabona kuko aba yakoze kandi yaronse, ku buryo rumaze kumurerera abana batatu, ndetse babiri muri bo baracutse.

Umuyobozi wungirije w'Akarere ka Rubavu ushinzwe imibereho myiza, Ishimwe Pacifique, yavuze ko uru rugo mbonezamikurire rufasha ababyeyi bakora bucuruzi bwambukiranya umupaka rwakemuye ibibazo by'ingutu.

Ati 'Uru rugo mbonezamikurire rwakemuye ibibazo bibiri by'ingutu, birimo icy'umutekano w'abana nk'abari mu kigero cyo gukura, isuku n'imirire yabo, ndetse rwagabanyije ikibazo cy'abata ishuri, kuko mbere abana bato basigaraga ku mupaka bigasaba ko basigana na bakuru babo bari mu kugero cyo kwiga, ibyatumaga umuryango utakaza kabiri.'

Akomeza avuga ko bakeneye izindi ngo mbonezamikurire zikora nk'uru, kuko basanze ari igisubizo.

Uru rugo mbonezamikurire rufite abana 80, mu busanzwe rufite umwihariko w'uko rwakira abana bari mu kigero cy'amezi atandatu kugeza ku myaka itatu, ndetse rikora amasaha menshi kuko ritangira saa moya za mu gitondo kugeza saa kumi n'ebyiri z'umugoroba, ibifasha ababyeyi bahasiga abana kwisanzura.

Urugo mbonezamikurire rwa Petite Barriere rwubatswe mu 2018 n'Umuryango uharanira iterambere ry'umuturage n'uburenganzira bwa muntu ku bufatanye na Leta y'u Rwanda.

Mu Karere ka Rubavu habarurwa abana 50,096 barererwa mu marerero, mu gihe muri bo 1,434 barererwa mu marerero yo mu ngo.

Urugo mbonezamikurire rwa Petite Barriere

Umuyobozi w’Akarere ka Rubavu wungirije ushinzwe imibereho myiza y’abaturage, Ishimwe Pacifique, yavuze ko iyi ECD yakemuye ibibazo by’ingutu

Abana barererwa muri uru rugo usanga bafite ibikinisho bitandukanye byo kubakangura ubwonko

Mu kwishakamo ibisubizo byo kunganira ibiceri biba byatanzwe n’ababyeyi, bafite n’uturima tw’igikoni tubafasha kubona imboga zo gutekera abana bitabasabye kujya kuzigura

Amakuru avuga ko mu gitondo cyo kuri uyu wa 6 Gicurasi 2025 mu masaha ashyira saa sita z'amanywa ari bwo abakozi bo mu ruganda ruteka amavuta mu bibabi by'inturusi, ubwo barimo gukaragira ishyamba babonye umurambo wa Nyiragasigwa Eugenie mu ishyamba.

Ibi yabereye mu Murenge wa Mukura, Akagari ka Karambo ho mu Mudugudu wa Karambo II.

IGIHE yamenye amakuru ko Nyiragasigwa Eugenie yari atuye mu Mudugudu wa Bandamiko, Akagari ka Karambo.

Umuyobozi w'Akarere ka Rutsiro wungirije ushinzweiterambere ry'Ubukungu, Uwizeyimana Emmanuel, yahamije aya makuru.

Ati 'Urupfu rwe twarumenye uyu munsi mu masaha ashyira saa sita z'amanywa, twakurikiranye maze abo mu muryango we batubwira ko yavuye mu rugo ku wa Gatandatu mu gitondo, bigaragara ko yakubiswe inkoni kuko afite ibikomere mu mutwe.'

Yakomeje yihanganisha umuryango wabuze uwabo.

Ubwo twakoraga iyi nkuru abakozi b'Urwego rw'Igihugu rw'Ubugenzacyaha, RIB, bari bageze aho umurambo wa nyakwigendera wasanzwe mu iperereza, hategerejwe ko umurambo ujyanwa ku Bitaro bya Murunda gukorerwa isuzuma mbere y'uko ushyingurwa.

Umurambo w'umukobwa wasanzwe mu ishyamba mu Karere ka Rutsiro

Mu kiganiro The Long Form na Sanny Ntayombya, Nathalie Munyampenda, yavuze ko ubwo yahamagarirwaga izo nshingano atabuze kugira akantu k'ubwoba, yibaza uko yaje kuri urwo rutonde kandi akiri muto, kuko ari imyanya abantu bumvaga ari iy'abasaza bakuru mu ishyaka, gusa yavuze ko iyo uhamagariwe gukorera igihugu ubikora, ndetse ko bitagoye kuko igihugu kigirira icyizere n'abakiri bato.

Ati 'Nk'igihugu turatandukanye mu rwego rw'uko abakiri bato bari mu myanya y'ubuyobozi, hano ndavuga no hanze y'umuryango FPR, muri rusange mu nzego z'abikorera, muri Leta, ni ibintu bimaze kumenyerwa kubona abakiri bato mu myanya yose, ntekereza ko ari ibyo gushimira igihugu cyacu n'umuryango wa FPR n'ubuyobozi bwacu, mu gukoresha amaboko dufite ari yo rubyiruko.'

Yavuze ko ari ibintu urubyiruko rwo mu Rwanda rudaha agaciro, ariko ko iyo ugiye mu bindi bihugu ari bwo ubona itandukaniro, ukabona abari mu myanya y'ubuyobozi bose ni abangana na So, n'urubyiruko rukaba rwarabyakiriye ko rugomba gutegereza ku myaka nka 60 ngo rubone kuba rwajya mu myanya y'ubuyobozi.

Ati 'Hano urakora ukaba umuyobozi, atari impuhwe ugiriwe, ni iby'agaciro kugirirwa icyo cyizere ukiri muto, ni amahirwe kuri twe.'

'Mu Rwanda ntekereza ko abakiri bato bagira amahirwe yo gukora mu nzego zitandukanye, hari igihe ushobora kwibaza uti ibi ni binini birandenze, ngiye gukora ibishoboka byose, icyo ni cyo nabonye…kimwe mu byo nigiye ku badukuriye haba mu muryango [FPR] cyangwa mu gihugu muri rusange, ni uko dutandukanye n'imiyoborere ya Amerika ivuga ngo nakoze ibi ngibi nubatse ibi ngibi, hano ni ukuvuga ngo mpawe inshingano kuko nkenewe hano ngo dufatanye kubaka.'

Yavuze ko mu Rwanda ahanini gushyirwa mu myanya y'ubuyobozi bishingira ahanini no ku myitwarire ufite aho gushingira gusa ku bushobozi. Avuga ko abenshi mu bajya mu buyobozi ari abakiri bato, rimwe na rimwe ari ubwa mbere baba bakoze mu myanya nk'iyo, bagakora amakosa ariko bakayigiraho.

Yavuze ko nk'Umuyobozi Mukuru hari byinshi yigira kuri Perezida Kagame, birimo kugaragariza abantu intumbero y'igihugu ndetse no kubereka uruhare bakwiye kubigiramo, 'Icya kabiri, ntabwo agira ubwoba bwo gufata ibyemezo bikomeye…ajya akunda kubivuga ngo ukwiye gufata ibyemezo bikomeye mu buryo bwihuse…ikindi ni ukurinda igihugu guhungabanywa n'ibibonetse byose.'

Nathalie Munyampenda kuri ubu ni Umuyobozi Mukuru wa Kepler, umwanya yagiyeho avuye ku buyobozi bwa Next Einstein Forum nyuma y'izindi nshingano yari asanganywe muri AIMS, ndetse akaba yarabaye Umuhuzabikorwa w'Ibiro by'Umuvugizi wa Guverinoma.

Nathalie Munyampenda yavuze ku byo kuba mu buyobozi bwa FPR n'ibyo yigira kuri Perezida Kagame

Ibi byavugiwe mu biganiro Never Again Rwanda yagiranye na na Komisiyo y'Ubumwe bw'Abanyarwanda, Uburenganzira bwa Muntu no kurwanya Jenoside mu Nteko Ishinga Amategeko.

Umuyobozi wa Never Again-Rwanda, Dr. Nkurunziza Ryarasa Joseph yavuze ko muri rusange Abanyarwanda bateye intambwe nziza muri gahunda y'ubumwe n'ubwiyunge, ariko ko hakiri ibibazo by'amacakubiri ahanini afitanye isano na Jenoside yakorewe Abatutsi mu 1994.

Yagize ati 'Sosiyete ziba zaranyuze mu bibazo nk'ibyo igihugu cyacu cyanyuzemo habaho ubwo abantu bakoresha ibyo bibazo kugira ngo bigishe amacakubiri. Urugero nk'ubushomeri ni ikibazo ku Isi hose ariko hari abashobora kubikoresha bati 'wabuze akazi kuko uri mwene runaka kandi uwo babibwira ntabone ko atari ikibazo cye wenyine.'

Never Again Rwanda isanga gukemura ibyo bibazo mu buryo burambye bigomba ku kwigisha abato kubyaza umsaruro amahirwe Igihugu gifite ariko kandi bikajyana no kwihutisha Politiki y'igihugu y'Uburere Mboneragihugu igatanga umurongo kandi abana bakabyigishwa mu ishuri.

Ati 'Bakwiye kwihutsisha iriya politiki y'uburere mboneragihugu kugira ngo tunagabanye ibibazo by'ihugungabana rihererekanywa mu bisekuru. Dukwiriye kugira politiki y'uburere mboneragihugu yatanga umurongo w'ibyo abana bakwigishwa.'

Perezida wa Komisiyo y'Ubumwe bw'Abanyarwanda, Uburenganzira bwa Muntu no kurwanya Jenoside, Ndangiza Madina, yavuze ko bibazo bizafatwaho umwanzuro nyuma y'isesengura iyo komisiyo yatangiye gukora kuri politiki y'Igihugu y'ubumwe n'ubwiyunge yashyizweho mu mwaka wa 2020.

Ati 'Nituganira na Minisiteri y'Ubumwe bw'Abanyarwanda n'Inshingano Mboneragihugu tuzumva aho bigeze dufate umwanzuro. Tuzanereba ikindi Never Again Rwanda yagaragaje ko uburere mboneragihugu bukwiye kwigishwa guhera mu mashuri abanza. Ibizavamo tuzabishyikiriza Inteko Rusange.'

Komisiyo y'Ubumwe bw'Abanyarwanda, Uburenganzira bwa Muntu no kurwanya Jenoside igaragaza ko mu bibazo bibangamiye ubumwe bw'Abanyarwanda harimo ingengabitekerezo ya Jenoside yiganje mu banyapolitiki ba bimwe mu bihugu byo mu karere no mu Banyarwanda baba mu mahanga ya kure.

Harimo kandi ibikomere bifitanye isano na jenoside yakorewe abatutsi byo biri ku kigereranyo cya 27%.

Never Again Rwanda ivuga ko ikibazo cy'ikibikomere bikomoka kuri Jenoside yakorewe Abatutsi giteye impungenge cyane nk'uko ubushakashatsi yakoze bwerekanye ko ababyeyi bashobora kubyanduza abana bikavamo ingaruka zirimo gutekereza kwihorera, gushaka kwiyahura n'ibindi.

Umuyobozi wa Never Again-Rwanda, Dr. Nkurunziza Ryarasa Joseph, yavuze ko hakwiye kujyaho poliki y’uburere mboneragihugu kandi ikigishwa abana mu mashuri

Ndangiza Madina (uri ibumoso) yavuze ko bibazo bizafatwaho umwanzuro nyuma y’isesengura iyo komisiyo yatangiye gukora kuri politiki y’Igihugu y’ubumwe n’ubwiyunge

Ibi RURA yabitangaje nyuma y'uko abamotari batwara moto z'amashanyarazi bakomeje gusaba ko ibiciro byo kongereza umuriro muri batiri byaba bizwi hose kandi ari bimwe ku masitasiyo yose bikajya bishyirwa ahagaragara bigakurikizwa.

Umwe mu batwara izi moto zikoresha amashanyarazi, Muneza Regis, agaragaza ko iyo bagiye gushyirisha umuriro muri batiri ya moto usanga hari aho bacibwa 2110, ahandi ugasanga ni 2010, bakaba babangamirwa no kuba nta gahunda ihari izwi neza y'uko bigomba gukurikizwa.

Ati 'Turasaba ko RURA igena ibiciro yavugana n'abantu bafite ama-sitasiyo atanga serivisi zo kongera umuriro muri batiri za moto kugira ngo abamotari tudakomeza kurengana, bikozwe nk'uko ibicuruzwa bikomoka kuri peteroli bigenda, byatuma abacuruzi badahinduranya ibiciro uko bishakiye.'

Umuyobozi Mukuru wa RURA, Rugigana Evariste yijeje abamotari ko mu minsi ya vuba iki kibazo kigiye gukemurwa, hagashyirwaho ibiciro bingana kandi bikajya bitangazwa nk'uko iby'ibikomoka kuri Peteroli bikorwa.

Yagize ati 'Ikibazo cya moto zikoresha amashanyarazi n'ibiciro byo gushyirishamo umuriro muri batiri bigenda bihinduka, ikintu turi gukora ni uko tugiye gushyiraho amabwiriza ku buryo ba rwiyemezamirimo batazongera guhindagura ibiciro uko bishakiye, uko dutangaza ibiciro by'ikomoka kuri peteroli, na byo ni uko bigiye kujya bikorwa vuba aha.'

Mu Rwanda, mu 2019 ni bwo moto zikoresha amashanyarazi zatangiye imirimo yo gutwara abagenzi mu Rwanda, mu rwego rwo guhangana n'ikibazo cy'ibyuka bihumanya ikirere, bikanangiza ibidukikije.

Ikigo cy'Igihugu gishinzwe kurengera ibidukikije (REMA) cyagaragaje ko u Rwanda rwihaye intego y'igihe kirekire yo kuba igihugu kidateza imyuka ihumanya ikirere, nk'uko byagaragajwe mu cyerekezo 2050.

U Rwanda rwiyemeje ko bitarenze umwaka wa 2030 ruzaba rwaragabanyije imyuka ihumanya ijya mu kirere ku gipimo cya 38%, kandi ikoreshwa rya moto n'imodoka zikoresha amashanyarazi rizagira uruhare rukomeye mu kugera kuri iyo ntego.

Abatwara moto zikoresha amashyanyarazi bavuga ko babangamirwa n’ibiciro byo kongererwamo umuriro muri za batiri za moto bidahura

Ibiciro byo kongere umuriro muri batiri za Moto zikoresha amashanyarazi bigiye guhuzwa mu rwego rwo kwirinda abahinduranya ibiciro uko bishakiye

Raporo y'Umugenzuzi Mukuru w'Imari ya Leta y'umwaka warangiye muri Kamena 2024, igaragaza ko 56% by'abasabye amazi muri WASAC batayaherewe igihe, ubukererwe bukabarirwa hagati y'iminsi 30 n'iminsi 298.

Ku rundi ruhande WASAC ivuga ko umuntu ushaka amazi ayahabwa mu minsi ibiri amaze kuzuza ibisabwa.

Kamuhire yagaragaje ko kugeza igihe raporo yakorwaga abakiliya 3.988 ba WASAC bari bategereje guhabwa amazi, ubukererwe bukaba bwari hagati y'iminsi 11 na 463.

Ati 'Ubuyobozi butubwira ko biterwa n'uko usanga mubazi zidahari […] ariko wareba n'ubu bukererwe uko bungana na bwo burakabije. Ubwo rero ibyo bikoresho bya mubazi bibura kugira ngo umuturage ahabwe amazi cyangwa se amashanyarazi, hari hakwiye gushakwa igisubizo gituma izo mubazi ziboneka kuko kutazitanga ahubwo ni byo bituma icyo kigo kidacuruza kubera ko ntabwo cyatanze amazi. Kuko uko gitanga amazi menshi ni ko bakwishyura igihe bayakoresheje.'

Iyi raporo igaragaza ko amazi yatunganyijwe ariko ntacuruzwe angana na 39%, byabarwa ku giciro gito cyane yagurishwaho akaba akagira agaciro ka miliyari 9,7 Frw.

Hari kandi imiyoboro mu turere 16 tw'igihugu idatanga amazi, amavomo n'ibigega by'amazi, imashini zizamura amazi n'ibindi bidakora kandi bikeneye gusanwa.

Gahunda yo gusaranganya amazi yubahirizwa ku rugero ruri hagati ya 20% na 70% ugereranyije n'ingengabihe iba yatanzwe.

Bigaragazwa kandi ko muri Nyakanga 2023 WASAC yasinye amasezerano yo kubaka ibikorwa remezo by'isuku n'isukura bifite agaciro ka miliyoni 60,5$ na miliyari 13,3 Frw, ibishushanyo by'ibyo bikorwaremezo bikaba byaragombaga kurangira muri Gashyantare 2024, nyamara muri Kanama 2024 byari bitararangira, hamaze kwemezwa igishushanyo ku rugero rwa 20%.

Umugenzuzi Mukuru w'Imari ya Leta yashimangiye ko uyu mushinga watangiye mu 2018.

Abayobozi b’Inteko Ishinga Amategeko bose bari bategereje kumenya intambwe yatewe mu gukoresha imari ya Leta

Umugenzuzi Mukuru w’Imari ya Leta Alexis Kamuhire yavuze ko amazi WASAC yatunganyije ntagurishwe afite agaciro ka miliyari 9,7 Frw

Abadepite n’Abasenateri basabye ko hashyirwa imbaraga mu guha amazi abaturage kuko ari na byo bizafasha gucuruza cyane

Amafoto: Nzayisingiza Fidele