Webrwanda Backend

Author: webrwanda

  • Ese usabana na nde? #rwanda #RwOT

    Mu nimero imwe y’ikinyamakuru cyanjye gisohoka buri kwezi, nabajije abasomyi iki kibazo: 'Ese usabana n’Imana cyangwa usabana n’ibibazo byawe' Joyce Meyer

    Impamvu nabajije kiriya kibazo abasomyi b’icyo kinyamakuru, ni uko Imana yari yarakimbajije igitondo kimwe. Uwo munsi nabyutse ndi gutekereza ku bibazo byanjye. Mu kanya gato Umwuka w’Imana aramvugisha. Numvaga ijwi rye risa nirindakariye, arambwira ati: ' Joyce, ushaka gusabana nanjye, cyangwa ushaka gusabana n’ibibazo byawe?' Hanyuma ambwira ibyo ngiye kukubwira nawe : 'Ntukibaze cyane ku byagutengushye.'

    Nihagira ibigutenguha, ntukicare, nurangiza ngo utangire kwicira urubanza. Kubera ko uko waba wiyumva kose, ntaho utandukaniye n’abandi. Bijya bidukomerera kenshi na kenshi kuko Satani ajya aza akatwereka ko nta wundi muntu wigeze ahura n’ibisa nk’ibyo twahuye nabyo. Ibyo si byo.

    Igihe kimwe nafashije umukobwa wanjye cyane, kubera ko twicaranye nkamubwira ubuzima nanyuzemo mu gihe nari mfite imyaka 18 kugeza kuri 23. Nkimutekerereza izo nkuru, yumvise asubijwemo imbaraga mu bugingo.

    Nk’umuntu uwo ariwe wese, yari yaragiye ahura n’ibintu byamubabaje, ariko uko imyaka yakuraga, ubuzima bwanjye bwo bwagendaga buba bubi cyane, kandi biteye ubwoba. Nk’urugero namubwiye uburyo nabaga mu nzu imwe muri Okalendi(Oakland) muri Kariforiniya(California), mu birometero hafi 5.000 uvuye aho twari dutuye.

    Aho nta modoka yari ihari, nta televiziyo, nta telephone nta n’uwari unyitayeho. Namubwiye uko najyaga nicara muri iyo nzu nijoro, njyenyine nkandika imivugo y’ishavu nk’icira imanza, bwacya nkajya ku kazi. Ndamubwira nti'Shima Imana ko ufite umuryango mwiza, akazi keza, urugo rwiza n’imodoka nziza, kubera ko icyo gihe njye ntabyo nari mfite.'

    Maze kumuha ubuhamya bwanjye, yumva atangajwe n’uburyo yari abayeho neza n’ibyiringiro by’ibyiza byari bimuri imbere.

    Buri wese ashobora guhitamo atyo

    Dushobora gutangazwa n’ibyo dutunze cyangwa dushobora gutunga, cyangwa tugacibwa intege nuko hari ibyo tudafite. Ikizwi ni uko niba nta kintu ufite, nta kintu ufite nyine! Kwicara ngo iyaba nari mfite ibi n’ibi ntacyo byongera. Dushobora kwifuza ngo iyaba byari bihindutse gutya na gutya, ariko nyine ntibihindutse.

    Niba dushaka gutsinda gucika intege no gusenyuka mu mutima bitewe n’uko hari ibyo twari twiringiye bitabaye, tugomba kureba uko ikibazo kiri, tugahangana na cyo uko giteye cyangwa kimeze. Ikindi tuzi, ni uko uko ububi bw’ikintu bwaba bungana kose, tugomba kumenya ko haba hari amahitamo. Tugomba guhitamo gusabana n’ibibazo byacu cyangwa gusabana n’Imana.

    Kabone n’aho twaba twakataje ibingana bite, cyangwa twumva tumeze nabi dute, tuba dufite ubushobozi bwo kuyobora ibitekerezo byacu mu muyoboro w’ibishoboka cyangwa w’ibidashoboka.

    Iyi nyigisho twayikuye mu gitabo kitwa 'Help me- I am discouraged!', cya Joyce Meyer, cyahinduwe mu Kinyarwanda gihabwa inyito ' Tuvuge tutaziguye ku gucika intege'

    [email protected]

    Source : https://agakiza.org/Ese-usabana-na-nde.html

  • Kaminuza ya Cambrigde yatsimbaraye ku cyemezo cyo guha urubuga Judi Rever, kabuhariwe mu gupfobya Jenoside yakorewe Abatutsi, nyamara uyu munyakadadakazi ashobora kwicuza icyatumye yishyira ku karubanda #rwanda #RwOT

    Bikimara kumenyekana ko Kaminuza ya Cambridge yo mu Bwongereza yakira Judi Rever kuri uyu wa gatatu tariki 21Mata 2020, Umuryango 'Ibuka' uharanira inyungu z'abarokotse Jenoside yakorewe Abatutsi ndetse n'abandi bantu bakabakaba 200 barimo abarimu muri za kaminuza, abashakashatsi n' abanyamakuru bakomeye ku isi, bahise bandikira ubuyobozi bw'iyi Kaminuza, basaba guhagarika icyemezo kigayitse cyo guha urubuga umuntu upfobya Jenoside, kuko binyuranye n'amahame ndetse n'amategeko mpuzamahanga.

    Ibi Kaminuza ya Cambridge yabyimye amatwi, ngo kuko 'ikomeye ku ihame ry'uburenganzira bwo gutanga ibitekerezo'.
    Amakuru dukesha'Versity', ikinyamakuru kigenga, kimaze imyaka 74 cyandikwa n'abanyeshuri ndetse n'abarimu ba Kaminuza ya Cambridge, aravuga ko iyi nkuru yo kwakira Judi Rever yatangaje kandi ikababaza benshi muri bo, ngo kuko amagambo ya Judi Rever adakwiriye kuvugirwa muri kaminuza yiyubashye nka Cambridge.

    Ku rundi ruhade ariko ayo makuru ya 'Versity' arasesengura uburyo Judi Rever ashobora kuba yitaye mu mutego, kuko ngo impuguke, abashakashatsi n'abandi bantu bazi neza ukuri kuri Jenoside yakorewe Abatutsi bashobora kuza kumusebereza mu ruhame, bamwereka ko ibyo agenda akwiza bihabanye cyane n'ukuri. Ikindi ngo Judi Rever yibeshye ku gihe cyo kuvugira amahomvu ye, kuko agiye guhabwa ijambo muri Kaminuza ya Cambridge nyuma ya raporo ebyiri zikomeye cyane, zigaragaza uruhare rw'uBufatansa muri Jenoside yakorewe Abatutsi, aho abashakashatsi berekanye ko icyo gihugu cyashyigikiye Leta ya Yuvenari Habyarimana muri iyo Jenoside.

    Ibi byegeranyo kandi bishimangira ko Jenoside yakorewe Abatutsi yahagaritswe na FPR-Inkotanyi, mu gihe i Judi Rever we yihanukira agahamya ko FPR-Inkotanyi ariyo yateguye ikanashyira mu bikorwa Jenoside yakorewe Abatutsi. Uku guhuzagurika no kunyuranya n'abakoze ubushakashatsi bwimbitse kandi bwizewe, ngo bishobora kutagwa neza Judi Rever

    Ikinyamakuru 'Versity'cyo muri Kaminuza ya Cambridge gikomeza cyerekana amakosa akomeye ari mu cyo Judi Rever yise'ubushakashatsi', ashingiye ku buhamya bw'abantu batazwi cyangwa batanabayeho, ibp yabwiwe abahamwe n'icyaha cya jenoside bagerageza kwigira abere, n'ibindi binyuranye n'ibyemejwe bidasubirwaho ku rwego mpuzamahanga.

    Izi nenge zose rero nk'uko 'Versity' isoza ibivuga, ngo zishobora kubera Judi Rever nka cya gihu cyikururiye amakara, ngo kuko ashobora kuza gukanja amanwa n'ahatwa ibibazo n'abazi neza ukuri. Mu bandi baza gufata ijambo harimo Filipp Reyntjens, Umubiligi nawe wiyemeje kugoreka amateka y'uRwanda, dore ko yari inkoramutima ndetse n'umucurabwenge w'ubutegetsi bwateguye bukanashyira mu bikorwa Jenoside.

    Iri tsinda ry'abahakana bakanapfobya Jenoside yakorewe Abatutsi ryakomeje kwamaganwa ntiryashirwa, ariko ibiza kuba ku barigize bishobora gutuma abarigize bicuza kuba bihaye rubanda muri Kaminuza ya Cambridge. Amakinamico yabo ashobora kurushaho kubatesha , nubwo ako bafite n'ubundi gaciriritse.

    The post Kaminuza ya Cambrigde yatsimbaraye ku cyemezo cyo guha urubuga Judi Rever, kabuhariwe mu gupfobya Jenoside yakorewe Abatutsi, nyamara uyu munyakadadakazi ashobora kwicuza icyatumye yishyira ku karubanda appeared first on RUSHYASHYA.

    Source : https://rushyashya.net/kaminuza-ya-cambrigde-yatsimbaraye-ku-cyemezo-cyo-guha-urubuga-judi-rever-kabuhariwe-mu-gupfobya-jenoside-yakorewe-abatutsi-nyamara-uyu-munyakadadakazi-ashobora-kwicuza-icyatumye-yishyira-ku-karuban/

  • Kuki inkoko yibwa mukabimenya ariko ntimumenye ko hari ibiyobyabwenge-Gatabazi abwira ba Mudugudu #rwanda #RwOT

    Muri iki kiganiro yagiranye n’Abayobozi kuva ku rwego rw’Umurenge kugeza ku bayobozi b’Imidugudu mu Mirenge itandatu ikora ku gihugu cya Uganda ahakunze kwinjirira ibiyobyabwenge, basinye amasezerano y’imihigo.

    Minisitiri Gatabazi avuga ko ubusanzwe Umuyobozi w’Umudugudu amenya amakuru y’ibintu byose bibera mu Mudugu we bityo ko atari akwiye kuyoberwa ko hari ibiyobyabwenge cyangwa hari utubari dukora muri ibi bihe bya COVID-19.

    Yagize ati 'kuko inkoko irabura bakabimenya, ihene ikabura bakabimenya, igitoki baKiba agatanga raporo…Nta mpamvu wavuga ngo hari ibiyobyabwenge, nta mpamvu haba magendu ngo ntibimenyekane.'

    Gatabazi avuga ko muri ariya masezerano basinye n’imihigo biyemeje, bemeranyijwe ko umuyobozi w’Umudugudu basanze hacururizwa ibiyobyabwenge atarabitanzeho raporo, azajya avaho.

    Muri iki gikorwa cyatangiriye mu Murenge wa Tabagwe, umukuru w’umuryango yasinyanye imihigo n’Umukuru w’Umudugudu na we agahindukira akayisinyana n’Umunyamabanga Nshingwabikorwa w’Akgari ubundi na we akayisinyana n’uw’Umurenge.

    Minisitiri Gatabazi avuga ko gusinya imihigo muri ubu buryo, bizabafasha kuyibukiranya ariko ko utazahigura imihigo yahize, azayirwa mu muryango ariko ko kugawa bigomba kujyana no kuvanwa mu nshingano.

    Nacyanzi Harriet umwe mu bayobozi b’Imidugudu basinye iyi mihigo, avuga ko basanzwe bafite ingamba zo kurwanya ibiyobyabwenge ariko ko kuva babishyize mu mihigo yanditse bigiye kurushaho kugira imbaraga.

    Uyu muyobozi w’Umudugudu witwa Intangarugero, yemeza ibyatangajwe na Minisitiri w’Ubutegetsi bw’Igihugu ko bidashoboka ko Umukuru w’Umudugu yayoberwa ucuruza ibiyobyabwenge mu Mudugudu we.

    Yagize ati 'Aba amuzi usibye ko hari abandi babyirengagiza cyangwa ugasanga hari abandi bakorana, akagira akantu amuha agaceceka nk’umuyobozi akamuhishira ariko ubundi ntibiyoberana.'

    Mu Karere ka Nyagatare mu mwaka wa 2020, abantu 1 208 bafatiwe mu bikorwa byo kwinjiza no guuruza ibiyobyabwenge na za magendu mu gihe mu mezi atatu ashize, hamaze gufatwa abantu 250 bafatiwe mu bikorwa nka biriya.

    Umuyobozi Mukuru wa Polisi y’u Rwanda, IGP Dan Munyuza avuga ko abaturage bose bagomba kumva ko kurwanya ibi bikorwa bibareba kuko umukobwa umwe atukisha bose bityo ko bakwiye kugaragaza ababikora bakabavamo bakajya kubihanirwa cyangwa bakabagumamo ariko bakosowe.

    Yagiriye inama abijandika muri ibi bikorwa ko bazabihagarika ku neza cyangwa ku mbaraga kuko inzego zigiye kubihagurukira.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Kuki-inkoko-yibwa-mukabimenya-ariko-ntimumenye-ko-hari-ibiyobyabwenge-Gatabazi-abwira-ba-Mudugudu

  • LIVE: Ubushinjacyaha bwakomeje gusobanura ibyaha RUSESABAGINA Paul ashinjwa (Amafoto na Video) –

    Kuri uyu wa Gatatu, tariki ya 21 Mata 2021, uru rubanza rugiye gukomeza Ubushinjacyaha bukomeza gusobanura imiterere y’ibyaha Rusesabagina Paul aregwa ndetse n’uburyo yabikozemo.

    Rusesabagina Paul ashinjwa ibyaha icyenda byose bifitanye isano n’ibikorwa by’iterabwoba, MRCD/FLN yagizemo uruhare ku butaka bw’u Rwanda mu bihe bitandukanye.

    Iburanisha riheruka ryo ku wa 1 Mata 2021 ryasojwe Ubushinjacyaha bumaze gusobanura ibyaha bitandatu uyu mugabo aregwa. Birimo Kurema umutwe w’ingabo utemewe, Kuba mu mutwe w’iterabwoba, Gutera inkunga iterabwoba, Ubwicanyi nk’igikorwa cy’iterabwoba, Itwarwa ry’umuntu ritemewe n’amategeko nk’igikorwa cy’iterabwoba no Kwiba hakoreshejwe intwaro nk’igikorwa cy’iterabwoba.

    Icyo gihe Ubushinjacyaha bwerekanye ko ibitero byagabwe n’abarwanyi ba FLN byaguyemo abaturage b’inzirakarengane, byangiza imitungo yabo, indi iribwa. Bwavuze ko nubwo Rusesabagina atari aho byabereye ariko yabigizemo uruhare rukomeye nk’umuyobozi wa MRCD/FLN.

    Biteganyijwe ko kuri uyu munsi hakomeza kumvwa ibindi byaha bitatu Rusesabagina akurikiranyweho birimo Gutwikira undi ku bushake, inyubako, ibigenewe gutwara abantu cyangwa ibintu nk’igikorwa cy’iterabwoba, Ubwinjiracyaha bw’ubwicanyi nk’igikorwa cy’iterabwoba no Gukubita no gukomeretsa ku bushake nk’igikorwa cy’iterabwoba.

    Rusesabagina Paul ari kuburanishwa atari mu rukiko bitewe n’uko yikuye mu rubanza avuga ko atizeye ko azahabwa ubutabera.

    UKO IBURANISHA RIRI KUGENDA:

    10:24: Umushinjacyaha Dushimimana Claudine yavuze ko hari ibikorwa by’iterabwoba bikorwa n’abantu ku giti cyabo n’ibibera mu bikorwa by’iterabwoba.

    Ati “Ibyaha byose dukurikiranyeho abantu 21 bari muri iyi dosiye byakozwe n’abantu bahuriye muri MRCD/FLN.’’

    Yavuze ko umugambi mugari wa MRCD ari wo abaregwa bose bagendeyeho.

    10:21: Umucamanza Muhima Antoine yabajije Ubushinjacyaha ubushake bwa Rusesabagina mu cyaha cyo gukubita no gukomeretsa.

    Ruberwa yasubije ko ubwo bushake bugaragarira mu mugambi mugari MRCD/FLN yari ifite wo gutera ubwoba abaturage.

    Ati “Biriya bikorwa byaberaga mu bice bitandukanye.’’

    10:08: Umushinjacyaha Dushimimana Claudine yasobanuriye urukiko ko igikorwa cy’iterabwoba Rusesabagina akurikiranyweho ari ukuba umuyobozi w’umutwe w’iterabwoba.

    Umushinjacyaha Dushimimana Claudine asobanurira urukiko uruhare rwa Rusesabagina mu bikorwa by’iterabwoba

    Mu mafoto: Inteko iburanisha urubanza igizwe n’abacamanza batatu bayobowe na Muhima Antoine.

    Perezida w’Inteko Iburanisha, Muhima Antoine

    09:50: Umushinjacyaha Ruberwa Bonaventure yavuze ko ubushake mu gukora icyaha kwa Paul Rusesabagina ari uko yari umuyobozi wa MRCD/FLN, akayitera inkunga kandi abaturage bakubiswe nta mpamvu yihariye ihari kuko bakubiswe mu bihe bitandukanye n’ahantu hatandukanye muri Nyamagabe, Nyaruguru na Rusizi.

    Yavuze ko Rusesabagina akurikiranywe nka gatozi mu cyaha cyo gukubita no gukomeretsa kuko yari umuyobozi, akaba umuterankunga wayo kandi abagize umutwe wa MRCD/FLN aribo bakoze ibikorwa byibasiriye abasivili.

    Umushinjacyaha Ruberwa Bonaventure ni we wasobanuye ibyaha Rusesabagina ashinjwa

    09:42: Umushinjacyaha Ruberwa Bonaventure yasobanuye icyaha cya cyenda cyo Gukubita no gukomeretsa ku bushake nk’igikorwa cy’iterabwoba, Rusesabagina akekwaho.

    Yavuze ko gukubita no gukomeretsa ku bushake ari icyaha gihanwa n’amategeko y’u Rwanda.

    Ibikorwa byo gukubita no gukomeretsa byakorewe mu Murenge wa Nyabimata mu Karere ka Nyaruguru no mu Murenge wa Kitabi mu Karere ka Nyamagabe.

    Ruberwa yavuze ko ibimenyetso by’iki cyaha bishingiye kuri raporo zo kwa muganga zakozwe n’abahanga zerekana abantu bakubiswe bakanakomeretswa ndetse bakaba barasigiwe ubumuga.

    Mu buhamya bwe Karerangabo Antoine ubwo yari atabaye abaturanyi be yavuze ko yakubiswe ikintu mu mutwe agahita yitura hasi.

    Jumapili Issa na we avuga ko ubwo bafatirwaga mu Ishyamba rya Nyungwe, bavanywe mu modoka bakubitwa inkoni nyinshi.

    Ubu buhamya kandi bwatanzwe n’abandi benshi bavuga ko abarwanyi ba MRCD/FLN babakubise ubwo babagabagaho ibitero.

    09:37: Umushinjacyaha Ruberwa Bonaventure yavuze ko Rusesabagina yanyuranyije n’itegeko kuko yateraga inkunga ndetse akanayobora Umutwe w’Iterabwoba wa MRCD/FLN wateye ibisasu na grenade mu bikorwa byakorewe mu Turere twa Nyaruguru, Nyamagabe na Rusizi.

    Yavuze ko ibyo bitero aho byagabwe hose nta na hamwe hari ikigo cya gisirikare, ahubwo bateraga mu ngo z’abaturage.

    09:30: Rusesabagina anashinjwa uruhare mu bitero byagabwe mu Karere ka Rusizi hagati ya Gicurasi na Ukwakira 2019.

    Rutayisire Félix uri mu batangabuhamya watewe grenade yasobanuye ko yasigiwe ubumuga buhoraho yasigiwe n’utuvungukira twayo.

    Nsabimana Joseph na we yasobanuye ko yagizweho ingaruka n’igitero cya grenade ndetse raporo yakozwe yagaragaje ko yamuteye ubumuga buhoraho.

    09:21: Umushinjacyaha Ruberwa yakomeje asobanura uko Rusesabagina yakoze icyaha cy’ Ubwinjiracyaha bw’ubwicanyi nk’igikorwa cy’iterabwoba.

    Yavuze ko hari abantu barashwe ariko ntibakwitaba Imana ndetse batanze ubuhamya bugaragaza uko ibyo bitero byagabwaga.

    Ruberwa ati “Kuba warasa umuntu ntapfe, ntibiba biturutse ku bushake bwawe. Kuba warasa isasu cyangwa grenade umuntu ntiyitabe Imana ntibiruka ku bushake bw’uwarashe ahubwo ni impuhwe z’Imana.’’

    Kayitesi Alice uri mu barasiwe mu gitero cyagabwe mu Karere ka Nyamagabe ahatwikiwe imodoka za Coaster mu 2018, abajijwe ku wa 5 Kamena 2019, yasobanuye ko ubwo bari mu modoka ya Alpha yavaga Rusizi igana Kigali, bageze muri Nyungwe basanga hari abantu batambitse igiti mu muhanda.

    Icyo gihe imodoka yarenze icyo giti, bahita bayirasa amasasu amapine aratoboka, bahita barasa abagenzi bamwe barakomereka, abandi bahasiga ubuzima.

    Amafoto y’inzu, imodoka na moto byatwitswe

    09:16: Umushinjacyaha Ruberwa yasobanuye ko Rusesabagina akurikiranyweho icyaha cyo gutwikira abantu nk’uwari Umuyobozi wa MRCD/FLN kubera yatanze ubufasha, akayobora umutwe wakoze icyo gikorwa cy’iterabwoba cyo gutwika.

    09:11: Umushinjacyaha Ruberwa yavuze ko itwikwa ry’imitungo y’abaturage mu Turere twa Nyaruguru, Nyamagabe na Rusizi nta kindi byari bigamije bitari ugutera ubwoba abasivili.

    Yakomeje ati “Kuba barabatwikiye nta kindi bari bagamije kitari ukubatera ubwoba. Bigaragazwa n’uko muri ibyo bitero byagabwe, batwitse imitungo y’abantu ahantu hanyuranye kandi biba byerekana ubutumwa butangwa. Ariko ikintu kitateguwe hatwikwa ahantu hamwe.’’

    Bamwe mu baregwa muri iyi dosiye mu buhamya bwabo bavuze ko ibikorwa byo gutwika byakozwe kugira ngo berekane ko FLN ihari.

    09:08: Umushinjacyaha Ruberwa Bonaventure yakomeje avuga ko mu Karere ka Nyaruguru hari ibinyabiziga byatwitswe.

    Me Ndutiye Yussuf yategewe muri Nyungwe, akurwa mu modoka, irwatwikwa irashira. Mu ibazwa rye mu Bushinjacyaha yavuze ko yambuwe ibyo yari afite ndetse anabona ko hari izindi modoka zatwitswe.

    Icyo gihe hanatwitswe Minibus yari itwaye abagenzi, barasa abari bayirimo, barayitwika irakongoka.

    Ubushinjacyaha buvuga ko izo modoka zari iz’abasivili zidafite aho zihuriye n’igisirikare ku buryo wavuga ko ari bo cyashakaga kurwanya.

    UBUSHINJACYAHA BWEREKANYE AMAFOTO Y’IBYATWITSWE NA MRCD/FLN

    Amafoto yerekanwe arimo ay’inyubako ya Koperative y’Abanyabuzima ba Nyabimata, ikaba yari ituwemo Gitifu w’Umurenge, icyo gihe baramurashe ariko ntiyitaba Imana. Ubushinjacyaha bwavuze ko uyu Nsengiyumva Vincent ari umwe mu baregwa muri uru banza.

    Umushinjacyaha Ruberwa yavuze ko hatwitswe imodoka yo mu bwoko bwa RAV4 ndetse na moto ebyiri za TVS, byose by’abasivili.

    Umucamanza Muhima Antoine amubajije uko amafoto yafashwe yasobanuye ko “yakozwe n’Ubugenzacyaha nk’ikimenyetso ubwo icyaha cyagenzwaga.’’

    08:49: Umushinjacyaha Ruberwa Bonaventure yatangiye asobanura uko Rusesabagina yakoze icyaha cyo Gutwikira undi ku bushake, inyubako, ibigenewe gutwara abantu cyangwa ibintu nk’igikorwa cy’iterabwoba.

    Yavuze ko MRCD/FLN yatwikiye abantu inzu, moto mu Turere twa Nyaruguru, Nyamagabe na Rusizi. Yasobanuye ko abarwanyi b’Umutwe wa MRCD/FLN bateye ako gace ku wa 19 Kamena 2018, batwitse inzu, imodoka na moto ebyiri.

    Ubushinjacyaha bwerekana ko mu gihe ibyo bikorwa byabaga, MRCD yari iyobowe na Paul Rusesabagina.

    Ni ibikorwa byerekanwa na raporo yakozwe n’Umuyobozi w’Umurenge wa Nyabimata mu Karere ka Nyaruguru.

    -  Gereza ya Nyarugenge yongeye kumenyesha urukiko ko Rusesabagina yanze kwitaba

    Umuyobozi wa Gereza ya Nyarugenge, CSP Kamugisha Michael yandikiye Urukiko Rukuru ruburanisha Ibyaha Mpuzamahanga n’Ibyambukiranya Imipaka

    Mu ibaruwa yandikiye urukiko yavuze ko Rusesabagina Paul yahakanye ko atazitaba urukiko.

    Yagize ati “Tubandikiye tubamenyesha ko Rusesabagina Paul yanze kwitabira iburanisha yamenyeshejwe mu nzira n’uburyo bwemewe n’amategeko. Impamvu yagaragarije ubuyobozi ni uko ku wa 12 Werurwe 2021 yikuye mu rubanza. Yavuze ko usibye uyu munsi n’ikindi gihe azaba yahamagajwe kuburanira muri uru rukiko atazarwitaba kubera nta butabera arwitezeho.’’

    Umucamanza Muhima Antoine yavuze ko ari uburenganzira bw’umuburanyi kwikura mu rubanza.

    08:39: Inteko iburanisha igeze mu byicaro byayo. Abacamanza bagiye gutangira kuburanisha urubanza.

    08:00: Ababuranyi bose 20 [ukuyemo Rusesabagina Paul wikuye mu rubanza] bageze ku Rukiko rw’Ikirenga ku Kimihurura aho urubanza ruburanishirizwa. Uru rubanza ruburanishwa n’Urugereko rwihariye rw’Urukiko Rukuru ruburanisha Ibyaha Mpuzamahanga n’Ibyambukiranya Imipaka ruherereye mu Karere ka Nyanza ariko rwimuriwe mu Mujyi wa Kigali mu rwego rwo kwirinda icyorezo cya Coronavirus.

    -  Amafoto y’ababuranyi bagera ku Rukiko rw’Ikirenga ku Kimihurura

    • Ibyaha icyenda Rusesabagina Paul aregwa

    - Kurema umutwe w’ingabo utemewe

    - Kuba mu mutwe w’iterabwoba.

    - Gutera inkunga iterabwoba.

    - Ubwicanyi nk’igikorwa cy’iterabwoba.

    - Itwarwa ry’umuntu ritemewe n’amategeko nk’igikorwa cy’iterabwoba.

    - Kwiba hakoreshejwe intwaro nk’igikorwa cy’iterabwoba.

    - Gutwikira undi ku bushake, inyubako, ibigenewe gutwara abantu cyangwa ibintu nk’igikorwa cy’iterabwoba.

    - Ubwinjiracyaha bw’ubwicanyi nk’igikorwa cy’iterabwoba.

    - Gukubita no gukomeretsa ku bushake nk’igikorwa cy’iterabwoba.

    Urutonde rw’abaregwa muri uru rubanza

    1. Nsabimana Callixte alias Sankara

    2. Nsengimana Herman

    3. Rusesabagina Paul

    4. Nizeyimana Marc

    5. Bizimana Cassien, alias BIZIMANA Patience, alias Passy, alias Selemani

    6. Matakamba Jean Berchmans

    7. Shabani Emmanuel

    8. Ntibiramira Innocent

    9. Byukusenge Jean Claude

    10. Nikuze Simeon

    11. Ntabanganyimana Joseph alias Combe Barume Matata

    12. Nsanzubukire Félicien alias Irakiza Fred

    13. Munyaneza Anastase alias Job Kuramba

    14. Iyamuremye Emmanuel alias Engambe Iyamusumba

    15. Niyirora Marcel alias BAMA Nicholas

    16. Nshimiyimana Emmanuel

    17. Kwitonda André

    18. Hakizimana Théogène

    19. Ndagijimana Jean Chrétien

    20. Mukandutiye Angelina

    21. Nsabimana Jean Damascène alias Motard

    KANDA HANO UREBE ANDI MAFOTO MENSHI

    Inkuru bifitanye isano wasoma: Uruhare rwa Rusesabagina mu bwicanyi n’ubujura byakorewe abaturage muri Nyabimata na Nyungwe (Amafoto na Video)

    Amafoto: Igirubuntu Darcy

  • Mu mikino ya gicuti itegura isubukurwa rya shampiyona Gasogi United yatsinze Gorilla FC, Marines FC inganya na AS Kigali. #rwanda #RwOT

    Kuri uyu wa kabiri hakomeje imikino ya gicuti hagati y'amakipe yo mu kiciro cya mbere hitegurwa isubukurwa rya shampiyona y'u Rwanda y'umwaka w'imikino wa 2020-2021, kuri Sitade ya Bugesera Gasogi United yatsinze ikipe ya Gorilla FC ndetse ikipe ya Marines inganya na AS Kigali kuri sitade Umuganda y'i Rubavu.

    Ku mukino wa Gasogi United yakinaga umukino wayo wa mbere wa gicuti mu kwitegura iyi shampiyona izakinwa ku itariki ya 1 Gicurasi 2021, muri uyu mukino ikipe ya Gasogi United yari yakiriye uyu mukino yatsindiwe na Tuyisenge Hakim Dieme mu minota y'igice cya kabiri.

    Ikipe ya Gorilla FC itozwa na Ruremesha Emmanuel yo yatsinzwe uyu mukino wa gicuti ubaye uwa kabiri itsinzwe kuko mu mpera z'icyumweru gishize iyi kipe yari yatsinzwe n'ikipe y'abanyamujyi ya AS Kigali, muri uwo mukino wari wabaye ku wa gatandatu warangiye AS Kigali itsinze Gorilla FC Ibitego bitatu kuri bibiri.

    Ku rundi ruhande i Rubavu ikipe ya Marines FC yo yari yakiriye ikipe ya AS Kigali, ni umukino warangiye amakipe yombi anganyije igitego kimwe kuri kimwe, muri uyu mukino ikipe ya AS Kigali yatsindiwe na myugariro wayo Ishimwe Christian wahuraga n'ikipe yahoze akinira.

    Ku ruhande rwa Marines FC ikipe y'ingabo z'igihugu zirwanira mu mazi yo mu karere ka Rubavu yatsindiwe na rutahizamu wayo Mugenzi Bienvenu.

    Mu yindi mikino ya gicuti iteganyijwe muri iki cyumweru, harimo umukino ukinwa kuri uyu wa gatatu ugahuza ikipe ya Bugesera FC yakira ikipe ya Rayon Sports kuri sitade ya Bugesera, kuri uyu wa kane ikipe ya Kiyovu Sports izakirira ku Mumena ikipe ya Police FC mu gihe ku wa gatandatu Gasogi United yo izakira ikipe ya AS Kigali bakinire mu mujyi wa Nyamata.

    The post Mu mikino ya gicuti itegura isubukurwa rya shampiyona Gasogi United yatsinze Gorilla FC, Marines FC inganya na AS Kigali. appeared first on RUSHYASHYA.

    Source : https://rushyashya.net/mu-mikino-ya-gicuti-itegura-isubukurwa-rya-shampiyona-gasogi-united-yatsinze-gorilla-fc-marines-fc-inganya-na-as-kigali/

  • Appolinaire yashyize hanze indirimbo ‘Ineza’ yakoranye na Patient Bizimana-VIDEO #rwanda #RwOT

    Umuramyi Nshuti Appolinaire ukorera umurimo w’Imana mu Itorero Living Worship church i Kanombe, nyuma y’amezi macye ashyize hanze indirimbo ‘Wewe ni Bwana’, kuri ubu yamaze gusohora indi nshya yise ‘Ineza’ yakoranye na Patient Bizimana uri mu baramyi bazwi mu Rwanda.

    Nshuti Appolinaire yakiriye agakiza akiri muto akura akunda kuririmba, ubu akaba ari umuramyi umaze gukora indirimbo zirenga 10 nk’uko abyitangariza, ati “Maze gukora album igizwe n’indirimbo 10 zakozwe n’aba Producers babiri; Boris pro na Mast P.”. Kuba ari gukora muzika ubutitsa mu gihe benshi mu bahanzi ba gospel basa nk’abafashe ikiruhuko, Appolinaire avuga ko ibanga ari ugusenga no gukora cyane.

    Ati “Nta kindi uretse gukora cyane nasenga kugira ngo Covid-19 irangire tubone uburyo twatarama (concert)”. Ibi yabitangaje ubwo yatugezagaho indirimbo ye nshya ‘Ineza’ yakoranye na Patient Bizimana yamenye kuva kera cyane. Yavuze ko Patient ari umuhanzi wicisha bugufi, bityo akaba abimushimira cyane kuko ‘guca bugufi uri icyamamare bigora benshi’.

    Mu kiganiro na InyaRwanda.com dukesha iyi nkuru, Nshuti Appolinaire yadutangarije impamvu yakoranye indirimbo na Patient Bizimana anamutangira ubuhamya bwiza, ati “Impanvu nahisemo Patient ni uburyo akoramo umurimo w’Imana. Namumenye ataramamara ariko uko nari muzi n’uyu munsi niko mubona. Biri mu bintu byatumye nifuza kuba nakorana nawe kuko guca bugufi uri icyamamare bigora benshi. N’imyandikire ye ndayikunda ngakunda n’uko adahindagura injyana akora”.

    Asobanura byimbitse ibanga rimufasha gukorana imbaraga nyinshi muri iki gihe Isi n’u Rwanda rurimo byibasiwe na Covid-19, yagize ati “Ibanga nta rindi, uretse amahirwe ubona ukagira ibyo wigomwa ugakora icyo ukunda kuruta”. Ku bijyanye n’inama yaha abahanzi bagenzi be, yabasabye gukundana no gushyigikirana, ati “Inama natanga kuri bagenzi banjye ni ugukundana tugashyigikirana kuko icyo kintu ntacyo mbona”.

    REBA HANO INDIRIMBO ‘INEZA’ YA NSHUTI APPOLINAIRE FT PATIENT BIZIMANA

    Source: InyaRwanda.com

    [email protected]

    Source : https://agakiza.org/Appolinaire-yashyize-hanze-indirimbo-Ineza-yakoranye-na-Patient-Bizimana-VIDEO.html

  • Equity Bank yashyizeho inguzanyo nshya yitezweho guhindurira ubuzima abahinzi n’aborozi –

    Iyi nguzanyo Equity Bank yayimuritse kuri uyu wa Kabiri tariki ya 20 Mata 2021 mu muhango wabereye mu Karere ka Rwamagana. Mu bihingwa umunani byamuritswe n’iyi banki izajya yorohereza abaka inguzanyo birimo umuceri, ibigori, ibirayi, icyayi, ikawa, ubworozi bw’inka, ubworozi bw’inkoko n’ubuhinzi bw’imboga n’imbuto.

    Ibi bihingwa kimwe n’indi mishinga yo mu bworozi Equity Bank yabimuritse nyuma y’ubushakashatsi yakoze ifatanyije n’Ikigo gitsura Amajyambere cy’Abongereza UKaid kibicishije mu Kigo cya IMSAR kimenyerewe mu gutera inkunga imishinga y’ubuhinzi n’ubworozi.

    Umuyobozi ushinzwe Ubuhinzi muri Equity bank, Umugwaneza Belise, yavuze ko bazatanga inguzanyo mu byiciro bibiri. Yasobanuye ko icya mbere kirimo inguzanyo z’igihe gito zizajya zimara hagati y’amezi atandatu n’umwaka umwe, zihabwa umuhinzi wifuza amafaranga yo kugura inyongeramusaruro, imashini zo guhinga n’ibindi bimufasha kongera umusaruro mu gihe gito.

    Yakomeje ati “Icyiciro cya kabiri kirimo abahinzi bifuza kwagura ubuhinzi bwabo nibura bakubaka nk’inganda, ubwanikiro bunini n’ibindi bikorwa byagutse ariko biteza imbere ubuhinzi n’ubworozi bo bakazajya bahabwa inguzanyo bishyure guhera ku myaka ibiri kugera ku myaka icumi. Aba bose nta ngwate bazajya bakwa ahubwo ingwate ikazajya iba ibikorwa bakora.’’

    Umuyobozi Mukuru wa Equity Bank Rwanda, Hannington Namara, yavuze ko bamaze igihe kinini bakora ubushakashatsi kugira ngo bamenye igikenewe kugira ngo ubuhinzi butere imbere mu Rwanda.

    Yavuze ko buri gihingwa bagifashe bakareba ibikenewe byose kugira ngo gitere imbere abagihinga nabo batere imbere.

    Ati “Kimwe nk’uko dushora imari mu bwubatsi, ubwikorezi, ubucuruzi n’ibindi, mu buhinzi n’ubworozi twakoze ubushakashatsi kugira ngo tumenye icyo banki yakora kugira ngo ifashe icyo gice nubwo atari twe twenyine tuyikoramo.”

    Nyuma y’ubwo bushakashatsi, Equity Bank yasanze igisubizo ari ugushora imari mu buhinzi aho yashinze ishami rishinzwe ubuhinzi n’ubworozi.

    Hannington Namara yavuze ko amafaranga ubusanzwe bashoraga mu buhinzi ari munsi ya 10% y’inguzanyo batangaga ariko ngo kuri ubu barifuza kujya hejuru ya 30%.

    Ati “Icyifuzo cyacu ni uko byanarengaho ariko ntituzajya munsi ya 30%, uko tubikora gutya amafaranga akajya mu buhinzi ni nako igihugu gitera imbere kuko ubuhinzi n’ubworozi ni byo bikorwa n’abaturage benshi. Ubu tugiye gukorana na bo kugira ngo turebe uko twabyaza umusaruro iki gice.”

    Namara yavuze ko buri muturage wifuza inguzanyo azajya abanza kuganira na banki kugira ngo harebwe uburyo azunguka ku buryo atazakwa inyungu iri hejuru ku nguzanyo azajya ahabwa.

    Mu mitangire y’iyi nguzanyo, biteganyijwe ko inyungu izajya yakwa umuntu bitewe n’umushinga afite n’uko azunguka ngo nta nyungu ihoraho bazigera bagira.

    Anna Wilson uhagarariye Ikigo gitsura amajyambere cy’Abongereza UKaid, yavuze ko bishimiye gufatanya na Equity Bank mu kuzamura ubuhinzi mu Rwanda ngo kuko kuri ubu iyo urebye usanga bushorwamo 2% nyamara ari igice gitunze abaturage benshi aho bukorwa n’abarenga 70%.

    Yavuze ko kuri ubu mu myaka ine IMSAR yashoye arenga miliyari 13 Frw mu mishinga itandukanye igamije guteza imbere ubuhinzi n’ubworozi mu Rwanda.

    Abahinzi bishimiye uburyo Equity bank igiye gushora mu buhinzi

    Umurerwa Agnes uhagarariye Koperative y’Abahinzi b’Ibigori iherereye mu Karere ka Rwamagana mu Murenge wa Kigabiro, yavuze ko bishimiye uburyo Equity Bank igiye kujya ibafasha kubaha inguzanyo.

    Ati “Ubushize twagannye Ishami rya Rwamagana dushaka kwaka inguzanyo y’amafaranga yadufasha mu buhinzi bw’ibigori byacu batubwira ko bishoboka ndetse tunayihabwa mu buryo bwihuse ku buryo abanyamuryango bishimye. Icyo gihe twaguze inyongeramusaruro tuyikoresha mu bigori byacu ndetse turaneza neza.”

    Umurerwa yavuze ko kuri ubu bategereje isoko ry’ibigori bejeje ahanini babikesha inguzanyo yatumye babasha kubona amafaranga yo kugura inyongeramusaruro.

    Yavuze ko kubera iyi nguzanyo, abahinzi bazava ku guhingisha amasuka bakagera ku mashini, bakanagura izisya akawunga.

    Munyaburanga Emmanuel usanzwe acuruza imyaka akaba n’umuhinzi mworozi yashimiye Equity Bank ku kuba igiye kujya yita ku bahinzi.

    Ati “Twari tumenyereye ko banki nyinshi zireba ku bacuruzi kuruta abahinzi nyamara ubuhinzi aribwo bufite abantu benshi, wasangaga banki nyinshi zitabitaho ariko Equity bank turayishima ko yatangiye kubitaho uhereye hasi. Turizera ko abahinzi benshi uhereye hasi bazitabwaho bakabona ubufasha kandi bagatera imbere.”

    Umuyobozi Mukuru ushinzwe ubucuruzi muri Equity Bank, Jean Claude Ngoga, we yavuze ko biteguye gufasha abahinzi n’aborozi guhindura ubuzima hakoreshejwe inguzanyo bazabaha, yavuze ko nibinaba ngombwa bazabafasha mu gukora urugendo shuri bakareba abateye imbere uburyo bahinga n’uburyo borora.

    Equity Bank ni banki y’ubucuruzi yatangiye gukorera mu Rwanda mu 2011, ifite amashami 14 hirya no hino mu gihugu n’aba-ajenti 2800, ifite kandi ibyuma by’ikoranabuhanga bya ATM 1220 hirya no hino mu gihugu bifasha abayigana.

    Munyaburanga Emmanuel usanzwe acuruza imyaka, yishimiye uburyo Equity Bank igiye kujya ibaha inguzanyo bakoresha mu buhinzi

    Rugaju Alexis wari uhagarariye Guverineri w’Intara y’Iburasirazuba yijeje Equity Bank ubufasha mu kugera ku baturage

    Uhagarariye Ikigo gitsura Amajyambere cy’Abongereza, UKaid, Anna Wilson yavuze ko bishimiye uburyo iyi banki igiye gufasha abaturage mu kwiteza imbere

    Umugwaneza Belise ukuriye ishami ry’ubuhinzi muri Equity Bank yavuze ko bazatanga inguzanyo kuva ku muhinzi muto kugera ku wifuza gushinga uruganda

    Umurerwa Agnes wari uhagarariye koperative ihinga ibigori mu Karere ka Rwamagana yavuze uburyo bafashijwe kubona inguzanyo yo kugura inyongeramusaruro bigatuma beza neza

    Umuyobozi Mukuru muri Equity Bank ushinzwe ubucuruzi avuga ko biteguye gufasha abahinzi mu kwiteza imbere no kuzamura umusaruro wabo

    Umuyobozi Mukuru wa Equity Bank Rwanda, Hannington Namara, yavuze ko bifuza kuzamura inguzanyo batangaga mu buhinzi nibura ikagera kuri 30%

    Amafoto: Niyonzima Moise

  • Hagaragajwe imbogamizi ibigo bito n’ibiciriritse bihura nazo mu kubaka izina hakoreshejwe ikirango –

    Ni iby’agaciro ariko ni n’umuzigo ku bigo bicyiyubaka mu bucuruzi kuko byo nta mazina akomeye yabyo azwi muri rubanda, ibintu bituma ibicuruzwa cyangwa serivisi byabyo bitizerwa n’abaguzi.

    Kubaka izina ukizerwa n’abaguzi ku isoko biterwa n’ubuziranenge buzwi ku bicuruzwa utanga, bituma n’ikirango cyabyo kimenyekana kandi binajyana n’uburambe. Ni yo mpamvu uzabona umuntu ajya kugura igicuruzwa akabanza yareba ikirango kiriho. Nubwo igicuruzwa cyaba kitujuje ubuziranenge ariko ikirango kiriho kizwi gishobora kugurwa, icyujuje ubuziranenge gifite ikirango kitazwi ntikigurwe.

    Ku bigo bito n’ibiciritse bikeneye kugira ikirango kizwi, haracyari imbogamizi zinyuranye nk’uko byagaragajwe mu kiganiro cyabaye kuri uyu wa 20 Mata 2021cyahuje abo mu ngeri zitandukanye bazi iby’umutungo bwite mu by’ubwenge birimo n’ikirango.

    Ni ikiganiro cyibanze ku “kubaka izina mu bucuruzi wifashishije umutungo bwite mu by’ubwenge,” harebwa amahirwe n’imbogamizi ku bigo bito n’ibiciriritse.

    Umunyamategeko mu by’umutungo bwite mu by’ubwenge, Mugengangabo Jean Nepomuscène, wari mu bitabiriye icyo kiganiro cyakozwe mu buryo bw’ikoranabuhanga, yavuze ko ubumenyi n’ubushobozi buke bikiri imbogamizi ku bigo bito n’ibiciriritse mu rugendo rwo kubaka ikirango kizwi, nk’umutungo wabifasha kugira izina mu bucuruzi.

    Ati “Imbogamizi zihari ku bigo bito n’ibiciriritse n’izigendanye n’ubumenyi buke, kubera ko abantu badafite amakuru ahagije ku bibafitiye akamaro cyangwa se batabihugurwamo kugira ngo bamenye aho bashobora gukura amahirwe babyaza umusaruro.”

    Mugengangabo yasobanuye ko hari n’imbogamizi y’ubushobozi buke kuri ibyo bigo mu bijyanye no kugikora cyangwa kukibungabunga.

    Ati “Ikindi ni ubushobozi buke bwo kuba wenda umuntu yakora ikirango, kucyandikisha no kukirengera. Nabyo hari igihe bisaba ko haba hari amikoro.”

    Ikirango gifite akamaro gakomeye

    Rwiyemezamirimo Sina Gérard wari muri icyo kiganiro yasobanuye uko ibicuruzwa bya Entreprise Urwibutso ye bidashobora kwiganwa n’ubonetse wese kuko biba bifite ikirango.

    Ubusanzwe igicuruzwa kiriho ikirango kizwi kiba cyarandikishijwe. Mu Rwanda, ibicuruzwa na serivisi byandikishwa mu Rwego rw’Igihugu rushinzwe Iterambere, RDB.

    Sina yavuze ko kuba ibicuruzwa bye bitandukanye biba byanditswe bituma bitekana ku buryo bitakwiganwa.

    Ati “Buri gicuruzwa cyose kiba cyanditswe muri RDB. Ibindi [tujyana hanze] nabyo biba byanditseyo ku buryo bitanga icyizere cy’uko isoko ufite ritapfa kuvanwaho n’ubonetse wese. Ntabwo umuntu wese yaza acyigana cyangwa ngo acyiyitirire ngo bishoboke.”

    Uyu mugabo uri mu bafite izina rikomeye haba mu Rwanda no mu mahanga yahumurije abafite ibigo bito n’ibiciriritse, ababwira ko kubigeraho “bidahenze”.

    Uretse kurinda umutekano w’ibicuruzwa, Mugengangabo yavuze ko ikirango kinagira uruhare runini mu gutandukanya ibicuruzwa by’ikigo runaka n’iby’ikindi, kucyegurira abandi mu gihe runaka bakakwishyura, kucyifashisha waka inguzanyo muri banki n’ibindi.

    Hasobanurwa ko ikirango cy’ubucuruzi gishobora kuba inyuguti, imibare cyangwa byombi bigahuzwa, igishushanyo, amashusho, amabara cyangwa amajwi.

  • Umunyamakuru wakunze umukobwa wo mu cyaro akamubenga byahaye inganzo Victor Rukotana #rwanda #RwOT

    Uyu muhanzi Victor Rukotana washyize hanze iyi ndirimbo yise Kideyo, avuga ko ikubiyemo ubutumwa bugaruka ku nkuru mpamo y’umunyamakuru ukorera mu Rwanda ariko atifuje gutangaza.

    Uyu muhanzi uherutse gusinya muri Label nshya izwi nka Edman Entertainment, avuga ko igitecyerezo cy’iriya ndirimbo cyashibutse ku nkuru yatekererejwe n’umwe mu banyamakuru bo mu Rwanda wamubwiye uko yakunze umukobwa akiri mu cyaro ariko akamutera umugongo.

    Yagize ati 'Ubwo yari akiri mu cyaro ataraza mu Mujyi yakunze umukobwa akajya kumutereta ariko umukobwa buri munsi akamwangira.'

    Akomeza avuga ko igihe kimwe uwo munyamakuru yakoze ibishoboka byose ngo uriya mukobwa amukunde bikanga hanyuma yigira inama yo guhimba amayeri yumvaga ko hari icyo yamufasha.

    Ngo yaje kubeshya uyu mukobwa ko hari umusore witwa Kideyo urembye umeze nabi kandi ko ntakindi cyamuvura atari uwo mukobwa.

    Ngo uwo mukobwa yabanje gutsimbarara ariko nyuma aza kujya kumureba asanga ni wa munyamakuru birangira n’ubundi ntacyo bitanze.

    Mu mashusho y’iyi ndirimbo yafatiwe mu cyaro, Victor Rukotana ni we ukina ari we Kideyo wabenzwe n’uwo mukobwa.

    UKWEZI.RW

    Source : http://www.ukwezi.rw/Imyidagaduro/article/Umunyamakuru-wakunze-umukobwa-wo-mu-cyaro-akamubenga-byahaye-inganzo-Victor-Rukotana

  • Nyamagabe: Polisi yataye muri yombi abacyekwaho kwiba insinga z'amashanyarazi #rwanda #RwOT

    Polisi y'u Rwanda ikorera mu Karere ka Nyamagabe mu Murenge wa Tare kuri uyu wa mbere tariki ya 19 Mata yafashe abantu 4 bamaze kwiba ikizingo cy'insinga z'amashanyarazi  zipima ibiro 40. Abafashwe ni Ntawukuriryayo Samuel w'imyaka 21, Manirakuzwa Jean Damascene w'imyaka  25, Sindayiheba Alexis ufite imyaka  28 na  Ndikumana Elie w'imyaka 26. Bafatiwe mu Karere ka Nyamagabe, Umurenge wa Tare, Akagari ka Gasarenda mu Mudugudu wa Murangara.

    Umuvugizi wa Polisi mu Ntara y'Amajyepfo, Superintendent of Police(SP) Theobald Kanamugire yavuze ko bariya bantu bafashwe nyuma yo kwiba kirya kizingo cy'insinga z'amashanyarazi bajya kuzigurisha ku mucuruzi ugura ibyuma bishaje (injyamani) nyuma uwo mucuruzi atanga amakuru.

    Ati'Abakozi bo mu kigo cy'Igihugu gishinzwe gukwirakwiza amashanyarazi mu gihugu(REG)  muri iyi minsi barimo guhanga umuyoboro mushya w'amashanyarazi kuva Gasarenda-Kitabi(Shara). Ubwo bari muri ibyo bikorwa baje kubitsa umuturage ikizingo cy'insinga z'amashanyarazi kugira ngo nibucya bakomeze akazi nibwo bariya basore bagiye mu rugo aho bazibikije baraziba.'

    SP Kanamugire akomeza avuga ko bamaze kuziba bazishyiriye umuntu usanzwe ugura ibyuma bishaje bagira ngo agure izo nsinga abahe amafaranga, uwo mucuruzi niwe waje gutanga amakuru barafatwa.

    Umuvugizi wa Polisi mu Ntara y'Amajyepfo yashimiye umuturage watanze amakuru ariko agaya  bamwe mu bantu usanga bashishikajwe no kubangamira ibikorwa byiza by'amajyambere  Leta igenda igeza ku baturage.

    Ati'Kiriya kigo cyarimo kwegereza abaturage umuriro w'amashanyarazi abaturge benshi kuko barimo guhanga umuyoboro mugari w'amashanyarazi Gasarenda-Kitabi. Birababaje kubona abantu b'abasore nka bariya biba insinga zarimo gukoreshwa bakajya kuzigurisha ahubwo aribo bakagombye kuzirinda.'

    Yashishikarije abaturage muri rusange kujya baba maso bakarinda ibikorwaremezo Leta igenda ibegereza kugira ngo hatagira ababyangiza. Yakanguriye abaturage cyane cyane urubyiruko gukura amaboko mu mifuka bagakora aho guhora bararikiye amafaranga bakuye mu nzira zitemewe n'amategeko.

    Abafashwe bahise bashyikirizwa Urwego rushinzwe ubugenzacyaha(RIB) rukorera muri sitasiyo ya Polisi ya Tare kugira ngo bakorerwe idosiye.

    Iyi foto yakoreshejwe yakuwe kuri interineti, ku rubuga rwa RNP

    Source : https://impanuro.rw/2021/04/21/nyamagabe-polisi-yataye-muri-yombi-abacyekwaho-kwiba-insinga-zamashanyarazi/