Webrwanda Backend

Author: webrwanda

  • RIB yafashe abagabo batatu bakekwaho kwiba ibikoresho by’ikoranabuhanga muri Kigali –

    Aba bagabo bafashwe ubwo bari bamaze kwiba abantu bacuruza ibikoresho by’ikoranabuhanga birimo za mudasobwa, Camera, CPU za mudasobwa n’indangururamajwi.

    Aba bagabo ibikorwa by’ubujura babitangiye muri Mutarama aho bari barakoze umutwe w’abajura bakiba babanje gucura imfunguzo z’inzu.

    Umwe muri bo akomoka mu Karere ka Muhanga mu Murenge wa Nyamabuye mu Kagari ka Gahogo. Yemera ko bagiye biba ahantu hatandukanye, babanje kugenzura no gushaka amakuru y’uburyo baziba nyuma bagacurisha imfunguzo z’aho hantu.

    Ati “Twibye mu mujyi aho bacuruza ibikoresho bifotora, twabikoze muri uyu mwaka mu bihe bitandukanye, aho nagendaga na mugenzi wanjye, tukaka serivisi z’aho bacuruza ibyo bikoresho tukabiba imfunguzo mugenzi wanjye akajya gucurisha imfunguzo, nimugoroba tukagaruka tukabiba.”

    Yavuze ko ibyo yakoze yabitewe n’ubukene, ko yemera icyaha akagisabira imbabazi, akagira inama urubyiruko bagenzi be kutagwa mu bishuko.

    Umwe mu bibwe witwa Bugingo Nicolas, usanzwe utuye mu Murenge wa Kanombe, Akagari ka Kabeza, yavuze ko yibwe ibikoresho bitandukanye birimo CPU za mudasobwa na Camera.

    Ati “Umujura yarinjiye, arafungura bisanzwe, kuko ni wa muntu ukwiba, niba mukorana n’abantu mushobora gukekana, kuko arinjira agatwara ibintu byose, ntabwo atoranya.”

    Bugingo yavuze ko ibikoresho yibwe byari bifite agaciro kari hejuru ya miliyoni enye.

    Umuvugizi wa RIB, Dr Murangira B.Thierry, yavuze ko aba bagabo uyu mugambi bari barawucuriye muri gereza aho bari barafungiwe n’ubundi ibi byaha.

    Ati “Bakurikiranyweho ibyaha bibiri: Gushyiraho umutwe w’abagizi ba nabi cyangwa kuwujyamo n’ubujura buciye icyuho”.

    Icyaha cyo kurema umutwe w’abagizi ba nabi kiramutse kibahamye bahanishwa igifungo kiri hagati y’imyaka irindwi n’icumi.

    Ni mu gihe icy’ubujura buciye icyuho cyo bagihamijwe bahabwa igifungo kiri hagati y’umwaka umwe n’imyaka ibiri.

    Aba bagabo bakurikiranyweho icyaha cy’ubujura no kurema umutwe w’abagizi ba nabi

    Ibikoresho byibwe birimo za camera na mudasobwa

  • Dosiye ya Munyenyezi yashyirikijwe Ubushinjacyaha –

    Munyenyezi yagejejwe mu Rwanda ku wa Gatanu, tariki ya 16 Mata 2021 aturutse muri Leta Zunze Ubumwe za Amerika aho yari yarasabye ubuhungiro ariko nyuma yo kubeshya ku ruhare rwe muri Jenoside yakorewe Abatutsi akaza kubwamburwa.

    RIB yatangaje Munyenyezi w’imyaka 51 akurikiranyweho ibyaha birimo gutegura no gucura umugambi wo gukora Jenoside, kurimbura nk’icyaha cyibasiye inyokomuntu n’ubufatanyacyaha mu gusambanya ku gahato.

    Ni ibyaha byakorewe mu yahoze ari Komini Ngoma muri Perefegitura ya Butare.

    Musoni Callixte wagize uruhare muri Jenoside yakorewe Abatutsi, akaza no kwirega akemera icyaha agakatirwa n’Inkiko Gacaca, yabwiye IGIHE ko azi Munyenyezi Béatrice kuko bakoranye kuri bariyeri yafatirwagaho Abatutsi bakanicwa muri Jenoside yakorewe Abatutsi mu 1994.

    Yavuze kandi ko Munyenyezi yakundaga kuba ari kuri bariyeri yari iri haruguru ya Hotel Ihuriro yabagamo Nyiramasuhuko Pauline.

    Ati “Bikimara kumenyekana [ko ubwicanyi bwatangiye] Abatutsi batangiye guhungira ahantu hatandukanye, hajyaho bariyeri mu nkengero z’umujyi no mu mujyi hagati. Bariyeri zari mu mujyi hose. Uva kuri ESO ujya kuri Kaminuza hari indi bariyeri yariho Munyenyezi Béatrice, yashyizweho na Nyiramasuhuko Pauline.”

    Mu gihe cya Jenoside, Munyenyezi yari ari gusoza amasomo muri Kaminuza Nkuru y’u Rwanda ndetse icyo gihe yabaga mu Ishyaka ryari ku Butegetsi, MRND.

  • Rayon Sports yatsinze Bugesera FC mu mukino wabonetsemo amakarita 2 atukura #rwanda #RwOT

    Mu mukino wa gicuti wahuje Rayon Sports na Bugesera FC, warangiye ku ntsinzi ya Rayon Sports y’ibitego 2-0, ni mu gihe buri kipe yasoje ari abakinnyi 10 nyuma y’uko buri ruhande ruhawe ikarita itukura.

    Wari umukino wa gicuti amakipe yombi yateguye mu rwego rwo kuyafasha kwitegura shampiyona izatangira tariki ya 1 Gicurasi.

    Ni umukino wabereye ku kibuga cya Bugesera, aho ku ruhande rwa Rayon Sports umutoza Guy Bukasa yari yahisemo kubanza amwe mu mazina azwi ku ntebe nka kapiteni Rugwiro Herve, rutahizamu Sugira Ernest, Manace Mutatu.

    Igice cya mbere Rayon Sports ntabwo yari mu mukino neza kuko bagaragaza kudahuza neza ndetse banatakaza imipira myinshi, gusa nabyo ntacyo byafashije Bugesera FC kuko itabashije kubyaza umusaruro uku guhuzagurika kwa Rayon Sports.

    Mbere gato y’uko igice cya mbere kirangira, ku munota wa 40 Sugira Ernest yinjiye mu kibuga asimbura Drissa Dagnogo wagize imvune. Igice cya mbere cya mbere cyarangiye ari 0-0.

    Mu gice cya kabiri Rayon Sports yari yakoze impinduka aho Manace Mutatu yari yinjiyemo asimbura Sekamana Maxime.

    Izi mpinduka zagize akamaro kuko Rayon Sports yasatiriye cyane ndetse baza no kubona igitego ku munota wa 60 gitsinzwe na Manace Mutatu ku mupira yari ahawe na Ciza Hussein.

    Iyi kipe yakomeje gusatira cyane ndetse iza kubona igitego cya kabiri ku munota wa 81 gitsinzwe na Sugira Ernest.

    Bugesera FC yakomeje gushaka uko yakwishyura ibi bitego ariko iza kugira ibyango rutahizamu wayo Rafael aza guhabwa ikaruta itukura. Umukino warangiye ari 2-0.

    Muri uyu mukino kandi Mudacumura Jackson[Rambo] wa Rayon Sports winjiye mu kibuga mu gice cya kabiri asimbura Nshimiyimana Amran na we yahawe ikarita itukura nyuma yo kubona imihondo 2.

    Rayon Sports iri mu itinda B, izatangira shampiyona ikina na Gasogi United. Bugesera FC yakinaga umukino wayo wa 2 wa gicuti nyuma yo kunganya na Police FC 1-1, izatangira imikino yo mu itsinda A ikina na AS Muhanga.

    Ababanjemo ku moande zombi

    Bugesera FC: Twagirayezu Aman, Mucyo, Mugisha Francois, Ishimwe Elie, Rucogoza Djihad, Rafael, Niyongira Danny,Rucogazi Ilias, Kwitonda Allain, Theophile

    Rayon Sports: Kwizera Olivier, Habimana Hussein, Niyigenda Clement, Iradukunda Axel, Niyibizi Emmanuel, Blaise Nishimwe, Nshimiyimana Amran, Vital Aurega, Sekamana Maxime, Drissa Dagnogo na Ciza Hussein

    Sugira Ernest yatsindiye Rayon Sports igitego cya kabiri

    Rambo yabonye ikarita itukura mu mukino wa Bugesera FC

    Source : http://isimbi.rw/siporo/article/rayon-sports-yatsinze-bugesera-fc-mu-mukino-wabonetsemo-amakarita-2-atukura

  • RIB yashyikirije Ubushinjacyaha dosiye ya Munyenyezi uherutse koherezwa na USA #rwanda #RwOT

    Munyenyezi Beatrice woherejwe na Leta Zunze Ubumwe za America tariki ya 15 Mata 2021 nyuma yo kurangiza igihano cy’igifungo cy’imyaka 10 yari yakatiwe n’urukiko rwo muri kiriya gihugu nyuma yo kumuhamya icyaha cyo kubeshya ubwo yashakaga ubwenegihugu bwa kiriya gihugu.

    Uyu Munyenyezi Beatrice ubu ufungiye mu Rwanda, akurikiranyweho ibyaha bitandukanye birimo gutegura no gucura umugambi wo gukora Jenoside, kurimbura nk’icyaha cyibasiye inyoko muntu ndetse n’ubufatanyacyaha mu gusambanya ku gahato.

    Ibi byaha akekwaho byakorewe mu cyahoze ari Komini Ngoma muri Perefegitura ya Butare ubwo uyu Munyenyezi akaba n’umukazana wa Pauline Nyaramasuhuko wahoze ari Minisitiri w’Umuryango mu butegetsi bwateguye Jenoside yakorewe Abatutsi.

    Kimwe mu bikorwa avugwaho yakoze muri Jenoside yakorewe Abatutsi, ni ukuba ubwe yarabaga ari kuri za bariyeri ziciweho Abatutsi benshi.

    Avugwaho kandi kuba yarafataga Abatutsikazi akabaha Interahamwe zikabasambanya, hakaba hari n’uwo bivugwa ko yahagarikiye zikamusambanya ubundi agahita amwirasira n’imbunda ntoya.

    UKWEZI.RW

    Source : http://www.ukwezi.rw/mu-rwanda/3/article/RIB-yashyikirije-Ubushinjacyaha-dosiye-ya-Munyenyezi-uherutse-koherezwa-na-USA

  • Nyamasheke: Impanuka y’imodoka yari itwaye inka yahitanye abantu babiri –

    Abari aho iyi mpanuka yabereye babwiye IGIHE ko ishobora kuba yaturutse ku kuba imodoka yabuze feri maze igeze ahitwa ku Muhororo igwa munsi y’umuhanda.

    Abantu babiri bahise bakurwamo, abandi bavanwamo mu masaha ya nyuma ya saa sita bamaze kwitaba Imana.

    Umunyamabanga Nshingwabikorwa w’Umurenge wa Kirimbi iyi mpanuka yabereyemo, Mudahigwa Félix, yabwiye IGIHE ko iyi mpanuka yabaye ahagana saa kumi n’imwe n’igice za mu gitondo kuri uyu wa gatatu tariki ya 22 Gicurasi.

    Ati “Yabaye saa 05: 45 za mu gitondo, babiri bitabye Imana, abandi babiri barakomereka, yabereye mu Kagari ka Muhororo, yari ivuye mu Karere ka Bugesera.”

    Iyi modoka ya Fuso yari itwaye inka 20, muri zo zirindwi zahise zipfa.

    Abitabye Imana n’abandi bakomeretse bajyanwe ku bitaro bya Kibogora.

    Impanuka y’imodoka yari itwaye inka yaguyemo abantu babiri abandi babiri barakomereka

  • Perezida Kagame yihanganishije abanya-Tchad ku bw’urupfu rwa Déby –

    Ku wa Gatandatu tariki ya 17 Mata, mu masaha y’umugoroba nibwo Perezida Déby yahagurutse i N’Djamena yerekeza mu Majyaruguru y’Igihugu cye hafi y’imbibi zigitandukanya na Libye aho guhera ku wa 11 Mata hari imirwano yo guhashya imitwe yitwaje intwaro yigometse ku butegetsi bwe.

    Inzego z’Ubutasi za Tchad n’iz’u Bufaransa zari zaragaragaje ko umutwe wa FACT uherereye muri ibyo bice ahitwa Kanem, mu Majyaruguru y’Umujyi wa Mao mu bilometero 300 uvuye mu Murwa Mukuru w’Igihugu.

    Déby yari yaroherejeyo ingabo zo guhashya uwo mutwe, ariko wari ukomeje kurwana cyane dore ko ngo ufite ibikoresho bikomeye by’Abarusiya wakuye muri Libye. Déby yahisemo kujya kureba uko byifashe nk’uko n’ubundi yari asanzwe abigenza, akajya ku rugamba gutera ingabo ze mu bitugu.

    Bivugwa ko yafashe urugendo ari mu modoka ya gisirikare ya Toyota aherekejwe na bamwe mu basirikare bakomeye barimo musaza w’umugore we witwa Khoudar Mahamat Acyl. Umuhungu we w’Umujenerali mu ngabo we yari muri ako gace kaberagamo imirwano.

    Yakomeje urugendo yerekeza mu gace ka Mao ahari ibirindiro by’ingabo ze, mu rukerera agera mu gace ka Nokou kari mu bilometero 40 mu Majyaruguru y’Uburengerazuba bwa Mao.

    Mu masaha ya nyuma ya saa sita bivugwa ko yinjiye mu modoka, asaba umushoferi kumujyana aho urugamba rwari ruri kubera, abarinzi be nabo baramukurikira kugira ngo bamurinde.

    Muri urwo rugendo bivugwa ko imodoka yari irimo Perezida yahuye n’abarwanyi bari guhunga igitero gikomeye bari bagabweho n’ingabo ziyobowe n’umuhungu we, bakabarasaho, muri iyo mirwano bakamurasa mu gatuza isasu rikagera mu bihaha.

    Perezida Kagame ni umwe mu bakuru b’ibihugu bafashe mu mugongo Tchad muri ibi bihe by’akababaro irimo, aho yagaragaje ko Déby azibukirwa ku muhate we wo kurwanya iterabwoba n’ubutagondwa.

    Mu butumwa yashyize ku rukuta rwa Twitter ye yagize ati “Nihanganishije abaturage ba Tchad n’umuryango wa Perezida Idris Déby Itno ku bw’urupfu rwe. Mu byo azibukirwaho harimo umusanzu we ntagereranywa mu kurwanya iterabwoba n’ubutagondwa.”

    Déby yari umuntu ukunda gusura u Rwanda, yaherukaga i Kigali muri Mata 2019 mu muhango wo kwibuka ku nshuro ya 25 Jenoside yakorewe Abatutsi.

    Perezida Kagame ubwo yashimirwaga na Déby ku bwo kwitabira umuhango w’irahira rye mu 2016

    Perezida Déby yari umuntu ushyize imbaraga mu kurwanya ibikorwa by’imitwe y’iterabwoba

    Amafoto: Village Urugwiro

  • Nigeria : Abitwaje intwaro bashimuse abanyeshuri ba kaminuza bataramenyekana umubare #rwanda #RwOT

    Umuvugizi wa polisi muri iyo leta Kaduna, Muhammad Jalige yabwiye Ibiro Ntaramakuru by’Abongereza Reuters dukesha iyi nkuru ko bariya bagabo bashimuse abanyeshuri benshi bataramenyekana umubare.

    Ngo bariya bagabo bagabye igitero cyaguyemo umuntu umwe kuri iriya kaminuza ya Greenfield iri mu nkengero z’umujyi wa Kaduna, ubundi bakura bariya banyeshuri mu byuma byabo barabashimuta.

    Ngo ubwo bagabaga kiriya gitero babanje kurasa ari na byo byatumye umuntu umwe ahasiga ubuzima.

    Muhammad Jalige yagize ati 'Umwe mu bakozi ba Kaminuza yarashwe arapfa ariko umubare w’abanyeshuri bashimuswe ntabwo urabasha kumenyekana.'

    Kuva mu kwezi k’Ukuboza 2020, abarwanyi b’imitwe yitwaje intwaro bamaze gushimuta abanyeshuri babarirwa muri 700 bo mu mashuri yisumbuye na kaminuza.

    Bamwe muri aba banyeshuri, bagiye barekurwa nyuma y’ibiganiro byabaga byatangijwe n’uruhande rwa Guverinoma.

    Muri Gashyantare uyu mwaka wa 2021, Perezida Muhammadu Buhari yatanze itegeko ku nzego za Leta guhindura politiki yo guha ingurane amabandi muri kiriya gihugu nk’amafaranga n’imodoka ngo kuko iyi politiki yashobora gutuma biriya bikorwa bikomeza.

    UKWEZI.RW

    Source : http://www.ukwezi.rw/Mu-mahanga/Politiki/article/Nigeria-Abitwaje-intwaro-bashimuse-abanyeshuri-ba-kaminuza-bataramenyekana-umubare

  • Ubuhamya bwa Philomene warokotse Genocide mu buryo bw’amayobera #rwanda #RwOT

    Umubyeyi Philomene uzwi ku izina rya Bitangaza ni umukristo mu Itorero ADPR Paroisse Remera Itorero rya Rukurazo. Mugihe cya Genocide Imana yamurinze mu buryo bw’ibitangaza kuko bamukubise amahiri barangije bamuroha mu ruzi bazi ko yapfuye, ariko ku bw’umugambi mwiza Yesu yari amufiteho yaramurize abaho ubu ni umuvugabutumwa bwiza.

    Mu magambo ye aradusobanurira uburyo yanyuze mu bihe bigoye n’uko Imana yamwimanye akaba ari muzima.

    Ati: 'Habyarimana akimara gupfa ibintu byahise bihinduka, ariko twari dufite amakuru nk’abantu basenga. Imana yatubwiraga ko mu Rwanda hisutse abadayimoni b’ubwicanyi bo mu rwego rukomeye, ariko ko hari abo igiye gucyura.Imana yaratubwiraga ngo ibintu bizaba mu Rwanda n’umwana batwite azabimenya bizamugiraho ingaruka kandi ni ko byaje kugenda. Yaratubwiraga ngo hari abazataha izaha ubugingo, hari n’abandi izarinda, ariko kubera ko umurimo uri imbere ukomeye izasigaza abanyembaraga naho abanyantege nke izabacyura.

    Mu bantu bagomba gutaha niyumvagamo kuko nari umunyantege nke. Abantu batangiye gupfa menya ko umuryango w’iwacu bawishe. Njyewe ibitero byaje kundeba Le 16/4/1994 umuntu yaraje arambwira ngo basize ibitero inyuma ndebe ahantu mpungira. Nahise mvuga nti oya! Reka ndebe umugambi w’Imana. Hashize nk’isaha uwo muntu avuye mu rugo igitero kiba kiraje ndebye iyo mipanga n’amahiri ndebye abo bantu mpita ninjira mu nzu.

    Baraje baranjyana ariko abaturage bati 'Uyu mugore ntabwo mumwica' Abandi bati 'Iyi ni inzoka ntisigara' umwe yakururaga ajyana hanze undi agakurura ajyana mu nzu, ndavuga nti 'Mutantanyura' baranjyana bajya kunyica, bamwe baramvugiraga abandi bakarwana bati 'Murarengera inyenzi' Narababwiye nti 'Ariko murarwana mupfa jye, imyaka yose nabanye namwe hari uwigeze antunga urutoki? Aho munjyanye ni ukunyica nimunyicire aha njyewe ndapfuye ngiye mu ijuru ariko mwe nimutihana muzajya mu muriro'. Mubyukuri abaturage banze ko banyica igitero kinsubiza mu rugo.

    Bigeze saa yine z’ijoro igitero cyaraje twumva bakubise urugi ruba ruguye imbere.Umutware yari ari muri salon njyewe ndi mu cyumba ndi kuryamisha umwana. Narabyutse nkenyera igitenge nambara n’umupira w’imbeho ndaza mbasanga muri salon ndabasuhuza. Bahise banjyana hari haje abasore n’abagabo nka 30, baranjyanye ngenda ndirimba indirimbo y’108 ivuga ngo 'Njye ndi umukristo nzahora ndi we’ ariko nakwibuka ko hari imipanga n’amahiri bigiye kunjyaho nkabwira Yesu nti imbaraga wari ufite ku musaraba zatumye udataka uzimpe rwose.

    Twaragiye nk’iminota 10 tugera hasi mu kabande hari ikiraro cy’uruzi numva bakubise ubuhiri mu mutwe mbona umuriro watse mu maso umutima urambwira ngo ryama hasi urahita wigira mu ijuru, barakubita igihe nakavugije induru ngasenga nti 'Yesu nyakira', barakubita nakumva ngiye gutaka nti 'Yesu nyakira', kugeza igihe numvise bavuga ngo erega yapfuye, abandi ngo oya nimuhorahoza, abandi ngo yapfuye kare ntagisamba. Narabyumvise ndavuga ngo ese iyo umuntu agiye gutaha ko abona abamalayika bambaye imyenda yera baza kumutwara nkaba ntabo nabonye ndi mu mubiri? Nabaye nk’urambura amaso mbona arareba. Numva baravuze ngo nimukurure mujugunye muruzi. Amazi yaranjyanye ngera epfo kure yabo mbona ngeze ahantu amazi asandaye numva ngeze nko ku mucanga nsa nk’ujya ku ruhande numva ndacyafite ubwenge ndavunga ngo ariko se Mana bite ko utanjyanye ngo umpe ubugingo?

    Navuye muri ayo mazi njya kureba aho nihisha nzamuka umusozi ahantu ngiye kurara nsanga nta bahari hakinze nsunika akugi k’igikoni kagwa imbere ni ahongaho naraye ariko iryo joro ryari ribi ku buzima bwanjye, twari dutuye ahantu hitwaga ku Kibuye mu Gisovu ahantu hakonja cyane hegereye Nyungwe. Urumva uko nakaguye mu mazi imyenda yose yuzuye amazi n’amaraso, simfite n’umuntu wo kunyitaho ariko nagumanye na Yesu.

    Nakomeje kwihisha ugasanga barambwiye bati: 'Hano uhamaze iminsi have ujye kureba ahandi ujya. Nararaga ngenda ngwa mu miringoti no mu mahwa. Abantu barampishe,barangaburiye bampa amazi yo kwiknda ahantu hose hababara, Hamwe na Yesu n’amahoro ye yagiye adukiza. Abicanyi baje kumenya ko nkiriho batangira kujya birirwa basaka mu mazu y’abantu no mu ntoki bakavuga ko umuntu bazasanga ampishe azanyica n’urugo rwe bagasiga barumaze. Abantu rero batangiye gutinya kumpisha.

    Nageze aho ntuma ku mutware wanjye mubwira ko nateje ikibazo gikomeye mu bantu musaba kugaruka mu rugo, yarabyemeye ndagenda njya mu rugo nahamaze nk’ibyumweru nka 2 ariko wa mwana w’uruhinja nasize agakanguka saa sita akarira kubera kubura mama akageza mu gitondo badashobora kumunyereka ngo muhe ibere kugira ngo batamenya ko mpari.

    Hashize nk’ibyumweru 2 umugabo yarasohotse asanga urugo barugose abantu baruzuye, agaruka mu nzu arabimbwira. Naramubwiye ngo kirazira kikaziririzwa ko Yesu yakongera kuntanga. Nawe yazamuye kwizera arasohoka bamubwiye ngo azane uwo mugore arabibwira ati 'Ese si mwe mwamujyanye? Mwaramungaruriye ngo mumumbaze? Bati 'ari mu nzu turabizi'. Baramuhiritse binjira mu nzu bajya muri, parafo, bahirika ameza, ibitanda, garde robe. Njyewe naravugaga nti ” Humura mutima wanjye. Basatse inzu baba barambuze kandi ndimo bati umugore yarapfuye dore turamubuze. Basubiranyemo barataha ni uko narokotse.

    Asoza ubuhamya bwe Philomene arabwira abantu gukora kw’Imana ati ” Imana irahari, Imana irakora. Imana yaduhaye Yesu, Yesu akaduha Umwuka Wera akaba adutegurira ubugingo ibyo birahagije”

    Source :Agakiza Tv

    [email protected]

    Source : https://agakiza.org/Ubuhamya-bwa-Philomene-warokotse-Genocide-mu-buryo-butangaje.html

  • Dore uko bigenda ku mubiri wawe iyo unyoye amazi mu gitondo ukibyuka . – YEGOB #rwanda #RwOT

    Umubiri ukoze ku buryo iyo urugero rw'amazi rugabanutse ugusaba andi, ubibwirwa n'uko wagize inyota. Gusa hari ibindi bimenyetso umubiri ushobora kukwereka, ukumenyesha ko ukeneye amazi cg utayakeneye.

    Kunywa amazi mu gihe nta kintu uragashyira mu gifu nabyo bifitiye umubiri umumaro mwiza, ibi ni bimwe mu bintu byiza biterwa no kunywa amazi mu gitondo nta kintu urafata cyo kurya.

    1.Bituma umuntu agira uruhu rwiza

    Niba ushaka koza uruhu rwawe rugasa neza, kunywa amazi ni imwe mu nzira zifasha umuntu kubigeraho ugasa neza.i Iyo umuntu afite umwanda mwinshi mu mubiri uruhu ntirushobora gucya usanga rwijimye. Kunywa amazi bituma uruhu rworoha , rugatoha bituma umuntu agira uruhu rukeye cya cyane urwo mu maso.

    2.Bigabanya imyanda mu mubiri

    Kubera kunywa amazi bituma ujya kenshi mubwiherero, bituma hari imyanda isohoka akenshi ituruka mubyo turya n'ibyo tunywa bishobora kwangiza umubiri, iyo ufashe amazi rero uba ugabanya n'umwanda mu mubiri kandi bigabanya kubyimba inda.

    3.Birinda impatwe

    Iyo unywa amazi ahagije bikurinda uburwayi bw'impatwe(kwituma bigoye)kuko kunywa amazi bizafasha umubiri gukora igogora.

    4.Birinda kuribwa n'umutwe

    Imwe mu mpamvu nyinshi zitera abantu kuribwa n'umutwe ni uko batanywa amazi ahagije. Umwuma ni kimwe mubitera umutwe. Kunywa amazi birinda umuntu umwuma. Kunwa amazi ikirahure kimwe mu gitondo ni umwe mu muti w'umutwe. Kunywa amazi uhereye mu gitondo kandi bituma umuntu atagira umwuka mubi n'izindi ndwara ziterwa na mikorobe.

    5.Bituma umuntu asonza

    Buri wese azi ko kurya ari ingezi, ese ni iki ukora iyo wumva ushonje ? kunywa amazi mu gifu nta kintu kirimo byongera ubushake bwo gusha kurya(apetite). Nubyuka mu gitondo ujye unywa amazi, ikirahure bizakurinda kugira ibindi bibazo byose byaturuka ku mafunguro uri bufate uwo munsi.

    6.Byihutisha igogorwa

    Kunywa amazi mbere yuko ugira ikintu kintu cyose ushyira mu nda byoroshya igogorwa, bikaba bifasha umubiri gusaka intungamubiri aho zigenewe bibyura kunywa ibirahure umunani birebire ku munsi bifitiye umumaro umubiri w'umuntu.

    7.Byoza amara y'umuntu

    Kunywa amazi bituma imyanda yo mu mara isohoka, kandi bifasha umubiri kuvoma intungamubiri byihuse ziboneka mubyo turya.

    8.Bituma utakaza ibiro

    Kuberako amazi atagira intungamubiri nkiboneka mu birirwa bisanzwe(calories), ntabwo kuyanywa bizanira umubiri ingaruka n'imwe bityo rero kunywa amazi bigabanya ibiro byinshi n'umubiri harimo no kugabanya umubyibuho ukabije (Obesite. Iyo umuntu anywa amazi aragenda akagabanya imbaraga amavuta menshi n'umunyu biba bifite.

    9.Byongera imbaraga z'umubiri

    Nuzajya wumva ufite intenke z'umubiri, jya unywa amazi, byibura ikirahure kimwe kirekire, byongera abasikirikare b'umubiri, kandi bikwirakwiza umwuka mwiza mu maraso(oxygen).

    Leave your vote

    Comments

    0 comments

    Source : https://yegob.rw/dore-uko-bigenda-ku-mubiri-wawe-iyo-unyoye-amazi-mu-gitondo-ukibyuka/

  • Bamuguye gitumo asambanya umukobwa we w' imyaka 13 , ayita amira agakingirizo #rwanda #RwOT

      Umugabo w'imyaka 50 y'amavuko utuye mu gace ka Embu muri Kenya, yamize agakingirizo ubwo yafatirwaga mu cyuho asambanya umukobwa we w'imyaka 13 y'amavuko.

    Nk'uko abaturage bafashe uyu mugabo amaze gukora aya marorerwa babitangarije The Standard dukesha aya makuru, byabaye ku wa Gatanu w'icyumweru gishize, tariki ya 16 Mata 2021.

    Umuturanyi witwa Stephen Macharia yavuze ko umucuruzi w'ibiribwa witwa Caroline yagiye kwishyuza amafaranga mu rugo rw'uyu mugabo, yumva umwana atakira mu nzu ifunze, akeka ko yaba ari gusambanywa.

    Macharia yavuze ko yajyanye n'abandi baturanyi gutabara umwana, basanga umugabo yafunze urugi, bararumena, basanga koko ari gusambanya umukobwa we.

    Ati: 'Umuturanyi wacu, Coroline, yambwiye ko yasanze urugi rufungiyemo imbere, yumva ijwi ry'umukobwa wari wananiwe ari mu nzu. Nahamagaye abaturanyi bandi, maze tujya mu rugo rw'uwakoze icyaha, dusanga urugi rurafunze, turarumena dusanga ari gusambanya umukobwa we'.

    Macharia yabwiye iki gitangazamakuru ko muri icyo gihe, umugabo yahise amira agakingirizo yakoreshaga asambanya uyu mukobwa.

    Ati: 'Yamize agakingirizo mu gusibanganya ibimenyetso'.

    Ubwo aba baturage basangaga uyu mugabo asambanya umukobwa we, batangiye kumukubita, bamukomeretsa mu mutwe, akizwa n'abapolisi bagiye kumuta muri yombi nk'uko Caroline Imaya wungirije umuyobozi wa Polisi muri Embu yabitangaje.

    Uwafatiwe mu cyuho ari kuvurirwa mu bitaro, arinze n'abapolisi kugira ngo adatoroka ubutabera.

    Source : https://impanuro.rw/2021/04/21/bamuguye-gitumo-asambanya-umukobwa-we-w-imyaka-13-ayita-amira-agakingirizo/