Author: webrwanda

“Nubwo nabateje agahinda rwa rwandiko sinicuza. Kandi nubwo nicuzaga, mbonye yuko urwo rwandiko rwabateye agahinda (nubwo kari ak’umwanya muto gusa kagashira), none ndishimye. Icyakora sinishimishijwe n’uko mwagize agahinda, ahubwo ni uko ako gahinda kabateye kwihana,kuko mwagize agahinda ko mu buryo bw’Imana ngo mutagira icyo mubura ku bwacu. Agahinda ko mu buryo bw’Imana gatera kwihana kuticuzwa, na ko kukazana agakiza, ariko agahinda ko mu buryo bw’isi gatera urupfu.” 2Abakorinto7:8-10

Kwihana ni iki?

Kwihana ni guhindura icyerekezo umutima n’ubwenge byakoreragamo. Kwihana ni ugukata, kuzinukwa burundu, kwanga byimazeyo ibikorwa byose umuntu yakoraga bibi. Igikorwa cyo guhindukira: Ni igikorwa giterwa n’agahinda gaturuka ku ijambo ry’Imana kuko ni ryo rishobora kurondora umuntu, rikamwemeza iby’ibyaha byose yakose. Maze kubera Imbaraga z’Ijambo rimaze kumugeramo rikamwereka ingaruka z’ibyaha bye nyuma y’urubanza mu gihe umuntu atamenye neza inkomoko yako gahinda kamurangira inzira nziza yo kugakiriramo (Iyo nzira ni ukwakira Yesu Kristo nk’Umwami n’umukiza witanze rimwe k’umusaraba). Iyo umaze kumwakira uhabwa imbabazi ukabana nawe, ugahora mu mahoro Yesu aha abantu be.

Ibyanditswe byera byose byahumetswe n’Imana kandi bigira umumaro wo kwigisha umuntu, no kumwemeza ibyaha bye no kumutunganya, no kumuhanira gukiranuka kugira ngo umuntu w’Imana abe ashyitse, afite ibimukwiriye byose ngo akore imirimo myiza yose. 2Timoteyo 3.16-17

Kwihana si umuhango uhoraho. Iyo bikozwe nta gahinda ko mu mutima ko muburyo buturutse ku Imana, bituma umuntu abaho yihana amasaha, iminsi n’ imyaka nyamara Imana ntimushime kandi ntabashe kunesha icyaha kuko ibyo yise kwihana bitaturutse ku gahinda, ahubwo yabikoreye akamenyero.

Hari ibintu twafashe nk’aho biba muri Bibiliya nyamara atari byo: Ngo Satani amenya aho ducumurira ntamenye aho twihanira, none ni iki kitubuza kwihana turi munzu y’Imana, cyangwa ni inde utera abajura kwibira mu rusengero? Hose arahamenya rwose ntiwishuke. Ibi bituma rimwe na rimwe duhemuka ntidusabe imbabazi tukibwira ko twakiriye imbabazi kandi atari ko biri. Dore ibintu byiza kuruta ibindi mu gihe ugiye kwihana.

Wari ukwiriye kubanza kwikiranura na mugenzi wawe, nibwo wagira amahoro y’ukuri kandi niko gukiranuka. Niba hari icyo upfa na mwene so mbere yuko uvuga ko ugiye kwihana, banza umushake maze umubwire uko wamukoshereje musabane imbabazi maze ubone uko ukiranuka naso wo mu ijuru.

“Nuko nujyana ituro ryawe ku gicaniro, ukahibukira mwene so ko afite icyo mupfa, usige ituro ryawe imbere y’igicaniro ubanze ugende wikiranure na mwene so, uhere ko ugaruke uture ituro ryawe. 'Wikiranure vuba n’ukurega mukiri mu nzira, ukurega ye kugushyikiriza umucamanza, umucamanza ataguha umusirikare akagushyira mu nzu y’imbohe. Ndakubwira ukuri yuko utazavamo rwose, keretse wishyuye umwenda wose hadasigaye ikuta na rimwe. Matayo5:23-26

Kwatura no kwihana

Ibi ni ibintu bibiri bijyana, kwatura ni igikorwa cyo gukoza isoni, gusebya imbaraga mbi zikubamo(za Satani) kugira ngo uzineshe. Ibi rero nubireba mu zindi ndimi bisobanura ngo ‘Mwaturirane kugira ngo mukire, mwomoke’. Ni gute rero: Niba wibye, wagize ibiganiro bibi, usebanya, ishyari, umujinya, wasambanye. Bibiliya ivuga ko wari ukwiriye kwegera umwe muri benedata batagitwarwa n’izo mbaraga ukamubwira uko byagenze byose, nyuma akakugira inama z’uko wakwitwara kungira ngo utazongera kugwa mu cyaha ukundi. Hanyuma agasenga agusabira imbara zo kubishyira mu bikorwa.

Kubera ko rero rimwe na rimwe tutigeze duha umwanya iki kintu, byateye benshi kwatura babifata nk’igikorwa cyo kwikoza isoni no kwimenera amabanga. Nyamara ni uko wabwiye utaranesha, maze aho kukugira inama arakoshya. Ndakwingingira ngo uhereye uyu munsi, wihane kuko nutabikora nta mugabane uzigira ubona mu Bwami bw’Imana(Ijuru).

Ikindi navuga ni uko ibi byose kubikora bitagira icyo bimara iyo hatarimo igikorwa n’ishyaka byo guhinduka, bivuze ko guhinduka ni wo musaruro wanyuma w’ibintu byose birebana no kwihana. Imana yera itugirire imbabazi kandi Imana ibahe umugisha n’amahoro. Amena!

Umwigisha: Ev. ICYITEGETSE Elisse

Source: Cepurnyarugenge.org

[email protected]

Uyu musore winjiye mu byo kuzamura impano z’abahanzi bataramenyekana, yatangaje ko kuva kuri uyu wa Gatatu tariki 07 Nyakanga 2021, MIE ari na yo yakoranaga na bariya bahanzi, yamaze gutandukana na bo.

Murindahabi Irene ntabwo yigeze atangaza icyatumye asesa amasezerano yari afitanye n’aba bana b’abakobwa bamaze kwiharira igikundiro mu muzika wo kuramya no guhimbaza Imana.

Mu gihe bari bamaranye, yabafashije gukora indirimbo eshatu. Iya mbere ni Nahawe Ijambo yakunzwe n’abatari bake, Papa ndetse na Adonai baherukaga gushyira hanze.

Aba bakobwa bakiri bato, bari mu bagezweho muri iyi minsi mu ndirimbo zo kuramya no guhimbaza Imana, kwamamara kwabo babikesha M. Irene watumye impano yabo imenyekana.

UKWEZI.RW

“Munyemerere nkoreshe ubu buryo mbabwire iyerekwa nagize ku Itorero ryacu. Ndabizi abantu bamwe baraza kundwanya kubera imitima ibarega, ariko nahisemo kwikura uyu mutwaro ku mutwe nkabivuga kugira ngo nanjye numve umutima wanjye ucyeye.” Duncan-Williams

Ubundi mu magambo make ni muntu ki?

Nicholas Duncan-Williams (wavutse ku ya 12 Gicurasi 1957) ni impirimbanyi y’ubutumwa bwiza ukomoka muri Gana, ni umushumba mukuru uyobora akaba n’umugenzuzi mukuru wa minisiteri y’ivugabutumwa(Action Chapel International (ACI), ifite icyicaro i Accra, muri Gana. Niwe washinze umuryango ‘Charismatic Movement’ watangiye mu myaka 20 ishize aho muri Gana no mu tundi duce twa Afurika y’Iburengerazuba.

CAFM, ni itorero rye rimaze kumenyekana mu duce twinshi kuko rifite amashami arenga 2000. Muri yo 250 aherereye muri Amerika ya Ruguru, Uburayi, na Afurika. Williams Duncan niwe muntu wa mbere utari Umunyamerika wayoboye isengesho mu muhango wo kurahira kwa Perezida na Visi-Perezida batorewe kuyobora Amerika.

Avuga ubutumwa yahawe ku itorero, mu magambo ye yagize ati” Munyemerere nkoreshe ubu buryo mbabwire iyerekwa nagize ku Itorero ryacu. Ndabizi abantu bamwe baraza kundwanya kubera imitima ibarega ariko nahisemo kwikura uyu mutwaro ku mutwe nkabivuga kugira ngo nanjye numve umutima wanjye ucyeye.

Imana yanganirije mu buryo burambuye ku Itorero, Imaze kumbwira, ndababara, ndarira cyane! Byagenze gutya: Duherutse gupfusha umusore muto w’imyaka 22 ku rusengero rwacu azize indwara itaramenyekanye neza. Uyu musore yagiraga umuhate cyane ku buryo nanjye ubwanjye namutangariraga. Yari akiri muto kandi ari inkingi ikomeye muri korari ndetse no muri department (igice c)y’urubyiruko. Amaze kuremba twaramusengeye cyane, Itorero ryarasenze inshuro nyinshi rimusabira gukira ariko n’ubundi birangira apfuye. Uri nirwo rupfu rwambabaje no kugeza uyu munsi kandi nzakomeza kubabara.

Mbere yuyu, hari undi mushiki wacu nawe wari umaze iminsi apfuye. Nawe yagiraga umuhate cyane, kandi umugabo we nawe yari umukristo pe! Bari bamaze igihe kirekire barabuze urubyaro, ariko ntibigeze bacika intege mu kwizera kwabo. Bitunguranye, umugore aratwita Itorero ryose riranezerwa! ariko apfa abyara nubwo twari twasenze mu marira menshi, mu gutaka no kwinginga ngo Imana imukize birarenga arapfa.

Imfu nyinshi mu itorero, n’ibindi bintu bisa naho bitagihindurwa n’amasengesho kandi atariko byari bimeze mbere (mbere amasengesho yarabihinduraga), byatumye njya gushaka mu maso h’Imana ngo menye aho bipfira. Byumwihariko, urupfu rw’inshuti yanjye rwanteye agahinda kenshi n’uyu munsi ndacyamuririra!

Natangiye amasengesho y’iminsi 33, nshaka ngo Imana inkure mu ntege nke ndetse neshe ibirimo binsinda kandi ngo menye n’impamvu y’ibintu bibi byinshi byari bimaze igihe biba mu Itorero n’impamvu amasengesho atakibasha kubihangara. Mu minsi yose namaze nsenga mu marira menshi, ntacyo Imana yambwiye! ku munsi wanyuma numva imbaraga zashize kandi numva bisa naho ntacyo Imana izigera imbwira, yaje kunyiyereka mu ishusho y’umusaza imbwira ibintu byatumye n’uyu munsi nkirira nsaba ngo Imana itugirire impuhwe/ imbabazi.

Ibyo yambwiye ni ibi:

'Wansabye kukubwira ngo umenye, reka nanjye nkubwire. Amateraniro wita Itorero ntabwo akiri itorero mu maso yanjye, ahubwo ni ahantu abantu baza: Kumaranira icyubahiro, kumenyekana, gushyirwa mu myanya y’ubuyobozi, amacakubiri, ubutware. Abashumba benshi bari bashinzwe kurinda intama ngo zitaribwa n’intare nibo babaye intare zirya intama bari bashinzwe kurinda.

Imitima y’abantu yajemo amacakubiri, umuvandimwe arwanya mugenzi we ashaka ngo ahanuke agwe maze abone uko amusimbura mu mwanya w’icyubahiro! Igicaniro cy’itorero cyahindutse aho bakinira umukino w’iteramakofe, aho abungeri, abashumba, abadiyakoni bakubitana ibipfunsi n’amagambo yo gukomeretsanya ngo abandi bose bajye hasi abe ari we usigara wenyine bityo yubahwe n’abasigaye bose. Abapasiteri bajya gushaka abandi ba pasiteri bakabazana ku gatuti ngo bigishe bagamije inyungu zabo ku giti cyabo.

Itorero ry’iremyemo amacakubiri, bahitamo abayobozi bagendeye ku cyo bazunguka mu buryo bw’ibifatika (amafaranga), aho kugendera ku byo bazunguka mu buryo bw’Umwuka. Abapasiteri barwanya bagenzi babo bapfa imyanya, abagize Itorero (abakristo) bakarwanya abapasiteri ngo begukane Itorero. Abantu bahoze mu mukumbi umwe bamaze gucikamo ibice, umwe asengera mugenzi we ngo agwe kandi bagasaba ngo bituruke mu maboko yanjye(Imana).

Ibyejejwe byo mu rusengero rwanjye bisigaye bikoreshwa mu nyungu z’abantu ku giti cyabo, abantu b’abapagani bo mu isi nibo bacira urubanza ibintu byo mu Itorero. Mu nkiko akaba aribo babifataho imyanzuro ngo amahoro atahe, nyamara abantu banjye n’ubu ntibarakareka kurwana hagati yabo. Itorero ryahindutse: Isibaniro, aho urugamba rubera n’intambara, abayobozi barwanira icyubahiro ngo bakunde babona uko bakwigwizaho amafaranga no kugira ngo babashe gutegeka uwo bashaka gutegeka wese! Itorero riranshaririye cyane'

Iki gice rero ni cyo cyankuye umutima cyane!(Imana yakomeje kumubwira)

'Kubera ibyo byose, singishaka kumva amasengesho y’Itorero, ariko numva amasengesho y’umuntu ku giti cye. Amasengesho ya bacye cyane muri bamwe bagize Itoero bagifite ishyaka ryo kumenya. Amasengesho yabagize Itorero yahindutse ikizira kuri njye! Kuko imitima aya masengesho aturukamo ntabwo ishyize hamwe, ahubwo yuzuye amacakubiri n’urwango umuntu yanga mugenzi we.

Iyo basenze bansaba igisubizo ku kibazo runaka, mbona itsinda ry’abantu babeshya ko bashyize hamwe nyamara mu kuri bangana, kandi birwanya nanjye bakandwanya. Ntabwo basengera imbabazi n’ubumwe, ahubwo basenga ngo mpane abavandimwe babo kuko nta n’umwe ushaka kuyoborwa. Nta n’umwe ushaka kumvira mu genzi we, buri wese arashaka gutegeka abandi kandi buri umwe arashaka kuba ari we wunguka.

Nahisemo kuzajya numva amasengesho ya buri muntu kugi cye. Amasengesho ya babandi bafite imitima y’ukuri atari ay’amatsinda (amagroupe) y’indyarya bampamagaza iminwa yabo gusa nyamara mu mitima yabo hibereyebo ububi bwose: Ishyari, kubeshyerana, umururumba, imigambi mibisha ndetse n’amacakubiri. Ni yo mpamvu bansaba gukiza abarwayi nkatinda, bakansaba umugisha, ngaha umugisha bake muri bo bafite imitima y’ukuri.

Amaturo yabo, ibyacumi ndetse n’imbuto byabaye ubushwambagara mu maso yanjye kuko bituruka mu mitima yanduye ndetse n’ibiganza bivusha amaraso. Nahisemo kuzajya mpamagara abankiranukira bari mu Itorero biciye mu mfu zitunguranye no mu burwayi no mu bundi buryo mbona bukwiye. Nakabaye mbareka bakarama ariko nanga ko nazababura nabo. Niyo mpamvu mbahamagara bagihagararanye nanjye neza. Rekeraho kuririra inshuti yawe rero kuko nayihamagaye nk’uko nahamagaye abandi bana banjye.

Igihe gisigaye ni kigufi kandi umunsi w’imperuka uregereje. Ukwiye guhagaragara ugakomera kandi ntunkureho amaso kuko umunsi mubi wegereje.

Naho Itorero ryo, byinshi byarabaye kandi biraza gukomeza kubaho nibatagaruka ngo bagire umutima umwe (uhuje), nk’uko byahoze bimeze kera mu minsi yashize maze ngo banshake. Kandi nzababarira, mbakirize imitima, mbakirize ubuzima kandi mbakirize n’igihugu. Ariko nibabyanga, nzahangana nabo mu buryo bwanjye. Genda ubabwire ibyo nkubwiye. Ubabwire uti 'Ndi Uwahozeho, Uriho kandi Uzahoraho'

Ayo niyo magambo yambwiye hanyuma mperako ndakanguka.

Noherereje abantu bose, ahantu hose. Ndabinginga ngo mumfashe mu byoherereze abandi. Ntureke koherereza abandi ubu butumwa cyangwa se ugirweho n’urubanza rwo kwitambika ubutumwa bw'Imana ku bantu bayo! Ndabizi ko ntari guhabwa amahirwe yo kubwira Itorero ibi ngibi mu magahunda akomeye y’igihugu nka Peniel n’izindi nkizo, ariko ndashimira Imana ubu buryo. Ndekeye aho

NB: Ubu butumwa tubwanditse nk’uko bwatugezeho, nta na kimwe dukuyemo cyangwa ngo twongeremo!

[email protected]

Abinyujije muri M Irene Entertainment(MIE), umunyamakuru wa ISIBO TV, Murindahabi Irene uzwi nka M Irene yatangaje ko yamaze gutandukana n’abakobwa babiri b’abahanzi yari umujyanama wabo ari bo Vestine na Dorcas.

Mu itangazo ryagiye hanze rigaragaza ko MIE yahisemo gutandukana n’aba bahanzi ku mpamvu zitaramenyekana.

Rigira riti 'Nyuma yo gusesengura imikoranire ya MIE na Vestine na Dorcas, MIE yifuje kubwira abakunzi bayo ndetse n’umuryango mugari wa muzika ko guhera tariki 7 Nyakanga yahagaritse ibikorwa yakoranaga n’aba bahanzikazi ku mpamvu muzamenyeshwa mu minsi iri imbere.'

Vestine na Dorcas bakaba bavukana aho biyemeje kuririmba indirimbo zihimbaza Imana, bakaba bamaze mu muziki amezi agera ku munani.

Ishimwe Vestine Taricy w’imyaka 17 na Kamikazi w’imyaka 15 bavuka mu Karere ka Musanze, bari bamaze gukora indirimbo 3'Nahawe Ijambo’, 'Papa’ ndetse na 'Adonai’, ubu bari mu irushanwa rya Rwanda Gospel Stars Live aho uzaryegukana azatwara miliyona 7 z’amafaranga y’u Rwanda.

Dorcas na Vestine barebererwaga inyungu na MIE

M Irene(hagati) yamaze dutandukana na Vestine na Dorcas

Kugeza ubu ubuyobozi bwa Musanze FC buribaza icyo gukora ni nyuma y’uko ubuyobozi bw’Akarere ka Musanze bubujije iyi kipe kugira igikorwa na kimwe bukora butakamenyesheje, n’ibyo buteguye gukora Akarere kakanga.

Ikipe ya Musanze FC ni ikipe itaragize umusaruro mwiza mu mwaka w’imikino wa 2020-2021 aho yisanze mu cyiciro cy’amakipe arwana no kutamanuka mu cya kabiri aho muri rusange yasoje ku mwanya wa 12 mu makipe 16.

Nk’uko amakuru ISIMBI ikesha umwe muri komite y’iyi kipe, ni uko uyu musaruro mubi ahanini watewe n’uko ubuyobozi bw’aka Karere bwivanze mu micungire n’imiyoborere y’iyi kipe.

Umwaka wa 2020-2021 Musanze yatanze amafaranga angana na miliyoni 80 muri iyi ikipe isanzwe ifte abandi batera nkunga nka CETRAF LTD.

Komite ya Musanze FC iyobowe na Tuyishime Placide uzwi nka Trump bivugwa ko yabwiwe na Bagirishya akaba umunyamabanga nshingwabikorwa w’akarere ka Musanze ko nta kintu na kimwe bagomba gukora batabibabwiye, iki kikaba ari kimwe mu byatumye iyi kipe isoza shampiyona nta mutoza ifite, ni nyuma yo kwirukana Seninga.

Muri Gicurasi 2021 nibwo umuyobozi w’iyi kipe, Trump yirukanye Seninga Innocent nyuma yo kunyagirwa na Gasogi United no kutaza mu makipe 8 ya mbere, kuva icyo gihe iyi kipe yatojwe n’umutoza wungirije Canavalo.

Uwahaye amakuru ISIMBI yavuze ko kuva icyo gihe bangiwe kuzana umutoza babwirwa ko baba babyihoreye.

Ati'ubu Musanze FC ni iyo gutozwa na Canavalo? Umutoza yari yabonetse n’amafaranga azishyurwa aho azava habonetse ariko bamwe mu bayobozi b’akarere barabyanga.'

Uretse ibi kandi ni uko ubu iyi kipe itemerewe kugura umukinnyi Akarere katabihaye umugisha, ni mu gihe andi makipe yatangiye kwiyubaka yo n’abo yari ifite bamwe barimo kuyivamo nka Ndoli Jean Claude wasinyiye Gorilla ni mu gihe ngo hari n’abandi bakinnyi basoje amasezerano bashobora kuyivamo.

Ibi byose ngo akarere ntacyo bikabwiye aho kabasabye kuba baretse bakaba bitonze, ubu nabo ngo ntibazi icyakorwa.

Ati'ubu ntawuzi icyo gukora, twabujijwe kugura umukinnyi, urumva batanga amafaranga bakanategeka ikipe uko iyoborwa kandi ifite ubuyobozi, yakabaye ibikora igasabwa raporo.'

Mu kiganiro ISIMBI yagiranye n’uyu muyobozi, Bagirishya yavuze ko atari ukuri ndetse ko nta n’aho bihuriye.

Ati'ntabwo ari ukuri nta n’aho bihuriye, none se ko ikipe ifite ubuzima gatozi yigenga, ikaba ifite komite yayo ko itavuyeho, ibyo urumva byaba bihuriye he.'

Kuba baranze ko bagura umutoza nabyo yabihakanye avuga ko komite y’ikipe izi ukuri kwabyo.

Ati' ibyo ni ukubeshya, komite y’ikipe ukuri kwabyo irakuzi, impamvu batazanye umutoza ni uko babonaga shampiyona irimo irangira, ntekereza ko bashaka umutoza bagiye gutangira shampiyona nshya, twumvaga ari byo byiza kuko umutoza waza iki gihe yaba ari ukubahendera ubusa. Ibindi ikipe irahari bashobora kutugisha inama nk’abanyamuryango, nk’abaterankunga bayo ibindi byaba ari ukutubeshyera.'

Yakomeje avuga ko impamvu ubu batagura abakinnyi ari uko akarere ariko muterankunga w’iyi kipe, bityo ko ubu bataratangira gukoresha ingengo y’imari y’uyu mwaka ku buryo byanagorana ko iyi kipe igura abakinnyi kuko ntaho yaba yakuye amafaranga bityo ko igomba gutegereza.

Ibi bikaba ari no mu rwego rwo kwirinda ibyigeze kubaho ubwo iyi kipe yigeze kugura abakinnyi isanga yarakoresheje amafaranga menshi ugereranyije n’ayo bagenewe nabo bavuga ko batari bazi ayo bazahabwa.

Uretse Musanze FC, usanga n’andi makipe y’uturere atabayeho neza aho imiyoborere yayo ikemangwa kuko nk’uyu mwaka mu makipe 8 yarwanaga no kutamanuka harimo 5 aterwa inkunga n’uturere, abiri(Sunrise FC na AS Muhanga) yaje kumanuka mu cyiciro cya kabiri.

Musanze FC ivuga ko yazitiwe n’akarere

Nyuma y’igenda rya Seninga Innocent nta wundi mutoza uraza

Musanze FC ntiyemerewe kugira umukinnyi igura