Webrwanda Backend

Author: webrwanda

  • Amakosa yo gukomeza gutekereza ku muntu mwahoze mukundana mugatandukana. – YEGOB #rwanda #RwOT

    Birashoboka cyane ko abantu bakundana ndetse bakagirana ibihe byiza nyuma bakaza gutandukana, birababaza ndetse bitwara imbaraga nyinshi kwikuramo uwo mwahoze mukundana. Muri iyi nkuru tugiye kurebera hamwe amakosa waba ukoze iyo ukomeje gutekereza cyane ku muntu mwatandukanye.

    1.Si igihe cyo kwicuza ishimire uwo mukundana ubu.

    Byararangiye kandi mwemeranyijwe ko mutandukanye. Yaraguhemukiye cyangwa waramuhemukiye nta kundi byagenda. Kwirirwa wicuza, kugira uburakari, umubabaro ni ibindi birasanzwe ariko aho ibihe bigeze si igihe cyabyo, nta kamaro bugufitiye.

    Niba warahise ubona undi uguhoza amarira, rekera gutekereza uwo mwatandukanye bitazagusenyera n'ibyo wari umaze kubaka. Ntabwo byaba ari byiza ko ukomeza kumurya umutima kandi n'ubundi warawumuhaye igice. Uracyibereye ahandi. Urata igihe cyawe kuko umukobwa cyangwa umusore mwakundanaga wenda nawe yiboneye undi bakundana. Kwirirwa umutekereza sibyo bizamukugarurira.

    2.Umusonga w'undi ntukubuza gusinzira.

    Uramutekereza kandi igihe kinini gishoboka ariko rero ntibimugeraho kandi niyo byamugeraho ntacyo bimubwiye. Ntabwo yabaye miseke igoroye ariko nawe ntiwitwaye neza. Tangira ubuzima bushya ibyahise byararangiye hato utazashaka kubaka undi mubano ugasanga warasigaye kandi waranataye igihe ku busa. Umusonga wawe ntumubuza gusinzira kandi agasinzira neza cyane.

    3.Hari impamvu yatumye mutandukana.

    Gutandukana kwanyu byatewe n'impamvu ifatika. Urugero niba waramufashe aguca inyuma, iyo nyama ntibayimubazeho. Kwirirwa rero utekereza ko umuhaye andi mahirwe byacamo agahinduka uribeshya. Wa mugani wa ya mvugo ngo uwagukubise ntaho yagiye, nawe rero uwaguciye inyuma ntiyashizwe. Numuha amahirwe mugasubirana ya ngeso akayongera noneho uzisanga mu rwobo utazikuramo. Shaka abandi bakobwa cyangwa abasore bafite urukundo rutaryarya kandi barahari.

    4.Uri kwiyicira ubuzima bwawe bw'ejo hazaza.

    Kumutekereza bituma udakora akazi kakubeshejeho , bituma utiga amasomo neza kandi ariyo yari kuzagufasha mu gihe kizaza. Ushobora kuba uri kwiyima amahirwe y'undi mubano wari kuzishimira kurusha uwo wahozemo. Niba warahuye n'iki kibazo ntawakwirengagiza ko bigora kwibagirwa ibihe byabaranze. Ariko mu rwego rwo kurengera ubuzima bwawe n'ihazaza hawe kurikiza izi nama urebe ko ibi bitekerezo byakuvamo.

    Source : https://yegob.rw/amakosa-yo-gukomeza-gutekereza-ku-muntu-mwahoze-mukundana-mugatandukana/

  • Ijambo 'Ndagukunda' waribwira umukobwa cg umuhungu mumaranye igihe kingana gute? – YEGOB #rwanda #RwOT

    Ubusanzwe hagati y'umukobwa n'umuhungu bari kwinjira muri gajinda yo gukundana bagahuza gahunda, umutima ndetse n'ibitekerezo, ijambo 'Ndagukunda' hagati yabo ntiripfa kuza byoroshye kabone n'jbwo yaba afite amarangamutima menshi ku wo akunda.

    Mbajije iki kibazo kubera impamvu. Wakwibaza ni iyihe? Muri iki cyumweru nerekeje aho bategera hazwi nka 'Gare ya Nyabugogo' nshaka gufata imodoka zigendera igihe (Express) ngo njye gusura mu ntara, nk'uko ari akamenyero kanjye. Ku bw'amahirwe mu minota mike, nabonye imodoka nifuzaga.

    Twahagurutse coaster yuzuye, njye nicaye ku ntebe ya kabiri inyuma y'umushoferi, imbere yanjye hicaye umukobwa n'umuhungu. Nyuma y'iminota nk'itanu, umusore uri mu kigero cy'imyaka 22 yatangiye kuganira n'umukobwa bari mu kigero kimwe.

    Nakomeje gukurikirana hafi ibiganiro byabo, buri wese abwira mugenzi aho avuka. Mu gihe gito, umusore yanditse izina rye muri terefone n'umukobwa amwibwira akoresheje terefone. Ibiganiro byarakomeje.

    Ubwo twari tumaze kugenda nk'iminota 30, umusore yafashe agapapuro ahari kuko yakeka ko hari abagenzi bamwumva cyangwa kubera isoni zo gutobora ijambo rikomeye ririmo urukundo yandikira umukobwa agira ati: 'none se ko ngukunze nkaba nshaka ko uzansura niba ubyemeye nsubiza.'

    Umukobwa ntiyajuyaje gusubiza wa muhungu kuri ka gapapuro ariko sinabashije kumenya icyo yamushubije. Icyakora, umuhungu yakomeje guhatiriza ariko umukobwa amubera ibamba. Yagize ati: 'Ngendera ku bitekerezo byanjye kandi umuntu ni we wifatira icyemezo.'

    Ku rundi ruhande, mu bushakashatsi bwakozwe n'ikinyamakuru eharmony bugaragaza ko abagabo bakunda kuvuga ijambo ' Ndagukunda' kurusha abagore. Abagabo nibura nyuma y'iminsi 88 na ho abagore bakabitinyuka nyuma y'iminsi 134.

    Ubu ni ubushakashatsi bwakorewe mu bihugu bya kure ariko mu Rwanda byo ntibifata iyo minsi nk'iriya.

    Umugabo utifuje ko amazina ye atangazwa, avuga ijambo 'ndagukunda' ridahubukirwa kuko kubwira umuntu ngo ndagukunda bigomba kwitonderwa ukabimubwira uzi neza imico n'imyifatire ye kugira ngo ejo cyangwa ejo bundi utazisubiraho igihe wasanze itakunogeye.

    Abagabo bashatse baganiriye natwe bemeza ko kenshi na kenshi iyo ubwiye umukobwa ngo 'ndagukunda' muba mushobora no kubana igihe akwemera. Ibi byatumye nibaza iriya 'ndagukunda' ya nyuma y'iminota 30 ari 'ndagukunda' y'ukuri ivuye ku mutima cyangwa hari ikiyihishe inyuma?

    Source : https://yegob.rw/ijambo-ndagukunda-waribwira-umukobwa-cg-umuhungu-mumaranye-igihe-kingana-gute/

  • Sobanukirwa akamaro ko kurya igifenesi #rwanda #RwOT

    Igifenesi ni rumwe mu mbuto zigurwa zihenze kandi zitaboneka hose, gusa rukaba rwibitseho intungamubiri nyinshi. Ni rwo rubuto rwera ku giti rubaho runini kuko igifenesi cyakuze neza gishobora kugeza ku biro 35.

    Abahanga bavuga cyatangiye guhingwa guhera mu myaka irenga 3000 ishize, mu Buhinde, Bangladesh na Sri Lanka. Ndetse n’iri zina tucyita ngo ni igifenesi rikomoka ku izina Fanas ryacyo mu gihinde.

    Akamaro igifenesi gifitiye ubuzima:

    •Igifenesi kuba kirimo vitamini C bigiha ingufu zo kuba kiturinda indwara ziterwa na virusi na bagiteri. Si ibyo gusa kuko igifenesi cyongerera ingufu abasirikare b’umubiri.

    •Kuko kirimo ibirinda uturemangingo aribyo lignans, isoflavones, saponins binazwiho kuturinda kanseri, igifenesi kidufasha kwirinda kanseri no gusaza imburagihe kuko kibuza uturemangingo gusaza.

    •Kirwanya ibisebe byo mu gifu no mu mara bitewe nuko cyifitemo ibirinda ibisebe

    •Harimo fibre. Ku bw’ibyo kukirya birinda impatwe kuko byoroshya mu nda. Kinarinda kandi amara manini kuba yarwara kanseri.

    •Kuko ari isoko nziza ya vitamini A, kurya igifenesi bifasha uruhu n’amaso, by’umwihariko birinda ubuhumyi no kutabona neza nijoro.

    •Isukari irimo ituma ruba urubuto rwiza mu kongera ingufu mu mubiri, bigakorwa nta cholesterol yinjiyemo.

    •Magnesium irimo ku bwinshi ifasha umubiri kunyunyuza calcium ije mu byo kurya bityo bikarinda indwara zinyuranye z’amagufa.

    •Igifenesi ni ingenzi mu mikorere ya thyroid. Ibi ni ukubera ko gifite muri cyo umuringa. Bityo gifasha mu ikorwa rya thyroxin n’ikoreshwa ryayo.

    •Kuba harimo potassium bifasha mu kurwanya indwara zinyuranye z’umutima. Muri zo twavuga umuvuduko udasanzwe no kuba imitsi yaturika.

    •Kimwe n’izindi mbuto, kubagifite vitamini B6 bifasha mu gutuma umutima ukora neza bikagabanya homocystein mu maraso.

    •Ubutare dukeneye mu mubiri, twabusangamo. Ubutare buvura indwara yo kubura amaraso bukanatera amaraso gutembera neza.

    •Igifenesi gituma uwakiriye ahorana itoto akagira n’uruhu rucyeye.

    •Nubwo kirimo isukari ariko kirimo calorie nkeya. Gifasha rero mu kurinda ibinure mu mubiri.

    •Burya n’imizi yacyo iravura. Gucanira imizi yacyo mu mazi akabira nyuma ukanywa bivura indwara zinyuranye nka asima, n’izindi ndwara z’ubuhumekero. Si ibyo gusa kuko binafasha mu kurwanya impiswi, kuzimya umuriro no kuvura zimwe mu ndwara z’uruhu.

    Dore ibyo ukwiriye kwitondera:

    •Kuko kirimo isukari nyinshi si byiza ko umurwayi wa diyabete yakirya.
    •Igifenesi ni byiza kukirya kitaramara iminsi myinshi gisaruwe kandi ntabwo bagitara. Ugisoroma gihiye. Niba ukiguze mu isoko, banza ugikande urebe niba kitatangiye kwangirika.

    source: umutihealth.com

    [email protected]

    Source : https://agakiza.org/Sobanukirwa-akamaro-ko-kurya-igifenesi.html

  • Rubavu : Kuvuguruzanya kw’Akarere na ba Gitifu ku gitutu kivugwa mu bwegure bwabo #rwanda #RwOT

    Aba banyamabanga Nshingwabikorwa b’utugari baherutse kwerugurizwa mu nama bari batumiyemo, bamwe muri bo bahise batangaza ko amabaruwa yabo yo gusezera bayanditse babihatiwe ndetse batewe ubwoba.

    Nyuma baje kwandika amabaruwa basaba ko ariya mabaruwa y’ubwegure yabo yateshwa agaciro ko babikoze bitabavuye ku mutima.

    Nk’ibaruwa y’Umunyamabanga Nshingwabikorwa w’Akagari ka Kinigi mu Murenge wa Nyamyumva, witwa Ngabonzima Jean de Dieu yanditse kuri uyu wa Gatatu tariki 07 Nyakanga, yasobanuye iby’ariya maburwa yo gusezera kwabo.

    Muri iyi baruwa, avuga ko impamvu yayo ari ugusaba 'gutesha agaciro ibaruwa nanditse yo gusaba akazi burundu ku mwanya w’Umunyamabanga Nshingwabikorwa w’Akagari ka Kinigi.'

    Akomeza asobanura impamvu asaba gutesha agaciro ibaruwa yanditse asezera ku kazi ko 'nayanditse ku gitutu cy’ubuyobozi bwabinsabye kandi ndengana.'

    Iyi baruwa yandikiwe Guverineri w’Intara y’Iburengerazuba, ikomeza igira iti 'Nkwandikiye ngusaba gutesha agaciro iyo baruwa nandikishijwe ku ngufu.'

    Avuga ko asanzwe ari umukozi urangwa n’umwete wo gukora neza no kuzuza inshangano bityo ko atari kubirengaho ngo yandike asezera ku bushake bwe.

    Byavugwaga ko bari banyamabanga Nshingwabikorwa begujwe kubera ko mu Tugari twabo twiganjemo ibijyanye no kurenga ku mabwiriza yo kwirinda ikwirakwira ry’icyorezo cya COVID-19.

    Nzabonimpa Deogratias, Umuyobozi w’Akarere wungirije ushinzwe imari n’iterambere ry’ubukungu, avuga ko igitutu kivugwa na bariya banyamabanga Nshingwabikorwa ntacyabayeho gusa abizeza ko ubusabe bwabo bazabusubizwaho ariko ko ntacyabuza kubanza gushyira mu bikorwa ibyo banditse mbere.

    UKWEZI.RW

    Source : http://www.ukwezi.rw/mu-rwanda/3/article/Rubavu-Kuvuguruzanya-kw-Akarere-na-ba-Gitifu-ku-gitutu-kivugwa-mu-bwegure-bwabo

  • Ubutabera ntibuzagwe mu mutego wa Aimable Karasira wiyita umurwayi wo mu mutwe, kandi ari'umusazi-mwenge'!! #rwanda #RwOT

    Ubutabera ntibuzagwe mu mutego wa Aimable Karasira wiyita umurwayi wo mu mutwe, kandi ari'umusazi-mwenge'!
    Aimable Karasira ni umwe mu bantu bamaze igihe bapfobya bakanahakana Jenoside yakorewe Abatutsi, ari nako basebya ubuyobozi bagamije kubwangisha abaturage.

    Ibikorwa bye bibi Rushyashya yabigarutseho kenshi, yerekana ko niba Aimable Karasira adafashwe ngo aryozwe ubugizi bwa nabi, byari kuba ari ukorora umurozi ejo akakumara ku rubyaro. Igihe cyarageze, atabwa muri yombi, ndetse yamaze gushyikirizwa urukiko.
    Tariki 07 Nyakanga 2021, imbere y'Urukiko yarihanukiriye ati:'Maze imyaka 18 ndi ku miti y'abarwayi bo mu mutwe'. Biramenyerewe ko mu nkiko abunganizi mu mategeko bategura amayeri yose ashobora gutabara umukiliya, cyane cyane iyo babona ibyaha aregwa bikomeye, ku buryo nta ngingo yindi imurengera uretse ayo mayeri nyine. By'umwihariko kuri Karasira Aimable, nta tegeko abunganizi be bashoboraga kwitabaza ngo rimugire umwere, ku magambo yivugiye mu ruhame kandi inshuro nyinshi. Icyari gisigaye gusa rero ni ukumugira inama yo kwigira umusazi, bagamije kugusha urukiko mu mutego wo kureka urubanza, Karasira akarekurwa.
    Nyamara rero, nk'uko abasesenguzi bakomeje kubigarukaho ku mbuga nkoranyambaga, nta kuntu wavuga ko amahano ya Karasira yayakoreshejwe n'uburwayi bwo mu mutwe, mu gihe bigaragara ko imigambi ye yayicuranye ubwenge n'intego yo kwangiza. Ibyo yavuze byose yabisubiyemo kenshi nta gutegwa, nta guhuzagurika, ndetse n'abamuhaye ijambo inshuro utabara barabibonaga neza ko ibitekerezo bya Karasira bikurikiranye mu buryo bwa gihanga mu konona.

    Wasobanura ute uburyo umuntu amaze imyaka 18 ari ku miti y'abarwayi bo mu mutwe, kandi muri iyo myaka hari iyo yamaze yigisha muri Kaminuza ibijyanye n'ikoranabuhanga? Niba abaganga baramubonagamo uburwayi kuki batamenyeshe Kaminuza ko ikoresha musazi ngo nibiba ngombwa ahabwe ikiruhuko gihagije cyo kwivuza? Kuki muri iyo myaka yose, baba abayobozi be, abarimu bakoranye, abanyeshuri yigishaga, nta muntu n'umwe wigeze agaragaza ko Aimable Karasira ari umurwayi udakwiye kwigisha muri kaminuza?

    Twibukiranye ko Karasira Aimable yirukanywe muri Kaminuza y'uRwanda kubera amakosa arimo no 'kuroga' urubyiruko arushyiramo imyumvire y'amacakubiri. Ntaho bihuriye n'uburwayi ubwo ari bwo bwose bwaba bwaramugaragayeho.

    Ubwo inzego zibishinzwe zajyaga gusaka mu rugo rwa Karasira, zahasanze amamiliyoni y'amafaranga(arimo n'amanyamahanga). Hari amakuru yizewe avuga ko ayo mafaranga yayahabwaga n'abanzi b'uRwanda. Ese bakagize menshi, bafite n'ayo guha abasazi? Igisubizo buri wese yacyiha, nta mukoresha wahitamo umurwayi wo mu mutwe, ahubwo ahitamo uzatanga umusaruro umutezeho.

    Ninde murwayi wo mu mutwe ushobora gushinga televiziyo nk'uko Aimable Karasira yabikoze ashinga 'Umubavu TV'?! Ese ninde usara akamenya ko ari umusazi ra?
    Iturufu ya Karasira n'abanyamategeko be yatarahuwe. Bahisemo iyi'stategy' yo kwisarisha, nk'uko Rusesabagina yahisemo iyo kwihakana ubunyarwanda, Béatrice Munyenyezi ahitamo iyo kuvuga ko atazi Ikinyarwanda n'abandi benshi nka Ngeze Hassan wasabye kuburana mu cyarabu byo kuruhanya, ariko birangira n'ubundi uhanwa ahanwe. Aha rero niho dusaba urukiko kutazagwa mu mutego wo kwibwira ko Aimable Karasira afite uburwayi bwo mu mutwe, aho kumuburanisha ku byaha bikomeye aregwa rukaba rwamwohereza i Ndera mu bitaro. Ikindi, urukiko ruzaperereze ku mpapuro Karasira avuga ko yavanye kwa muganga, kuko bishobora kuba birimo ruswa.

    Ntawe usarira kuri Jenoside, n'ubwo koko kuyipfobya no kuyihakana ubwabyo ari ubusazi, ariko Aimable Karasira ni' UMUSAZI-MWENGE'.

    The post Ubutabera ntibuzagwe mu mutego wa Aimable Karasira wiyita umurwayi wo mu mutwe, kandi ari'umusazi-mwenge'!! appeared first on RUSHYASHYA.

    Source : https://rushyashya.net/ubutabera-ntibuzagwe-mu-mutego-wa-aimable-karasira-wiyita-umurwayi-wo-mu-mutwe-kandi-ariumusazi-mwenge/?utm_source=rss&utm_medium=rss&utm_campaign=ubutabera-ntibuzagwe-mu-mutego-wa-aimable-karasira-wiyita-umurwayi-wo-mu-mutwe-kandi-ariumusazi-mwenge

  • Uganda yarekuye abandi banyarwanda 11 yari imaze igihe ikorera iyicarubozo #rwanda #RwOT

    Mu masaha ya saa saba z’amanywa kuri uyu wa Kane tariki 08 Nyakanga 2021 ni bwo imodoka zizanye abo Banyarwanda zageze ku mupaka wa Kagitumba na Milama, abo Banyarwanda bakaba barimo abagabo 10 n’umugore umwe.

    Abo Banyarwanda baje bakurikira abandi 17 birukanywe na Uganda mu kwezi kwa Gicurasi k’uyu mwaka, ndetse n’abandi bagiye barekurwa urusorongo mbere yabo, bose bakaba barekurwa bamaze igihe kinini bafungiwe muri igereza zitandukanye.

    Aba bose, baba abagabo,abagore n’urubyruko bajyanwa muri za gereza zitandukanye bashinjwa kunekera u Rwanda mu gihe ari abaturage bajyagayo mu bihe bitandukanye bagiye gushaka imibereho igihe inzira zari zikiri nyabagendwa.

    Kuri ubu ibihugu byombi bikomeje ibiganiro bigamije kuzahura umubano wajemo agatotsi, kaje mu buhahirane nyuma y’aho bigaragariye ko Uganda ifunga ikanakorera iyicarubozo Abanyarwanda bagiye guhahirayo ndetse ikaba ishinjwa no gufasha imitwe ihungabanya umutekano w’u Rwanda.

    Source : http://www.ukwezi.rw/mu-rwanda/Amakuru-anyuranye/article/Uganda-yarekuye-abandi-banyarwanda-11-yari-imaze-igihe-ikorera-iyicarubozo

  • Usenze byaburizamo imigambi ya Satani-Pst Desire Habyarimana #rwanda #RwOT

    Hari ibintu bizakubaho bitari ubushake bw’Imana, ariko kuko wananiwe gusenga ngo ubone imbaraga, bizakubaho! Hari igihe umuntu akubwira ngo ' Disi nari nabirose!' hanyuma ubirose wabikozeho iki?

    'Umuntu yaraje arambwira ati’ Narose’, nti warose iki?’ ati' Narose ikiyoka kinini kintera ndwana nacyo ariko numva simfite imbarag, kiranshika kirigendera' nti ye?!!, arambwira ngo ndumva ntazi n’icyo bisbanura. Ndamubwira nti sawa, icyakora ukwiye gusenga. Kubw’akazi kenshi na stress y’ubuzima ntiyasenga. Ibyabaye, umugabo we yamusabye ko ko bajya kuba iburayi, amusaba ko bafunguza konte y’amadorari iburayi bakazajyenda bayasanga yo. Umudamu utwo ahembwe twose akatwohereza, hashira iminsi bashyiraho amafaranga.

    Icyakurikiyeho yaramubwiye ngo hasigaye iminsi ibiri tugiye kugenda impapuro zabonetse, bagurisha ibintu byose bafite mu rugo, umudamu afata conge ku kazi azi ngo bazagenda mu minsi 2 Kumbe umugabo agiye gutorokana n’indaya. Hashize imyaka 7(isaga) umugabo ntarongera kumubonesha amaso. Inzoka ni uburiganya aba arariganyijwe. Aza arira ambwira ngo 'Disi za nzozi nazisobanukiwe, nahuye n’uburiganya! Nti 'nibwo ukizimenya?' Pst Desire. Imana, ntacyo izakora itabanje kumenyesha intore zayo, ariko ikibazo iyo ibitubwiye tubikoraho iki?

    Iyo dusenze Imana ishobora kuburizamo imigambi ya Satani

    Imbaraga zo gusenga, zaburijemo jenoside y’abayahudi igihe bari i Babuloni(mu bihugu 127) bagiye gupfa, itegeko ryanditswe ryasinywe ko uwo munsi abayuda bagomba gupfa. Hanyuma bahitamo gusenga amasengesho y’iminsi 3, haba impinduka abayuda ngo bagira ububasha ku banzi babo! Kugeza uyu munsi muri Isiraheli uwo munsi urakizihizwa. Igihugu cyose gifata konge bakibuka ko hari umuntu w’intwari witwa Esiteri na Morodekayi bahagaritse jenoside bari bagiye gukorerwa na Hamani. Akabazo gato? Ubwo iyo badasenga yari kuba, cyangwa ntiyari kuba? Yari kuba.

    'Rimwe nari ndi i kibungo muri Sake, turyamanye n’umupasiteri umwe ararota. Arota arwana n’inzoka3, ebyiri arazica imwe iraguruka iramusiga. Ahita abwira umudmu we ngo’ Mada, ntegurira igikapu ngiye gusenga nzagaruka nayo ipfuye! Ndamubwira nti' ariko pasite naje kugusura mvuye i Kigali, ugiye kunta mu nzu ngo ugiye gusenga ngo warose?' arambwira ati'Ntubizi wowe, njyewe urugamba ndwana ndaruzi!' icyakurikiye ni iki? Yaragiye ajya gusenga iminsi 3 ndamutegereza. Aho agarukiye, arambwira ati “Noneho nabonye Imana impa insinzi kuri cya kibazo’ Uzi ibyabaye? Icyumweru gikurikiyeho haje umuntu amurogera abana3, kumwe za nzoka zaje ari eshatu. Abana babiri bagerageza kubarutsa ntibaremba cyane, umwe araremba agera muri koma!

    Ubwo iyo ataba yarasenze ngo ya nzoka ipfe, yari bubeho? Imana yamumugaruriye nk’uzutse kubera ya masengesho y’iminsi 3. Ariko dufite stress nta mwanya dufite wo gusenga, nyamara gusenga bizana imbaraga byatuma Imana iburizamo imigambi ya Satani. Nagira ngo mbibutse ko tutaremye mu buryo bw’inka n’ihene, hari akantu Imana yadusigiye itahaye inyamanswa kitwa amahitamo. Iyo ukoresheje amahitamo yawe mu gushaka Imana no kuyegera, imbaraga z’umutima zizaza bizaburizamo imigambi ya Satani. Ariko ntidufite umwanya wo gusenga! Bigeze aho dusigaye dufite abantu dukodesha ngo bajye kudusengera, ariko biriya ni ubutubuzi baba babehsya! Ubugingo burakureba ku giti cyawe.

    Kwikorererana imitwaro Bibiliya irabyemera, ariko ku kibazo kirebana n’ubugingo ni wowe ku giti cyawe. Hezekiya, Imana yaramubwiye iti'Ugiye gupfa' imutumaho umuhanuzi iramubwira ngo 'Itegure usezere’ ahita yerekera ivure yibutsa Imana imirimo, Imana ibwira Yesaya ngo 'subira yo umubwire ngo ikongereye imyaka 15'

    Satani azanwa no: Kwica, kwiba, no kurimbura ariko Yesu atanga ubugingo bwinshi iyo abantu basenze. Tubasha kuburizamo imigambi ya Satani iyo twasenze.

    Pasiteri Desire Habyarimana

    Reba hano iyi nyigisho yose

    [email protected]

    Source : https://agakiza.org/Usenze-byaburizamo-imigambi-ya-Satani-Pst-Desire-Habyarimana.html

  • Ni iki kigaragaza Umwuka Wera ku muntu? #rwanda #RwOT

    “Umuntu wese ahabwa ikimwerekanaho Umwuka Wera kugira ngo bose bafashwe” 1 Abakorinto 12:7

    Mubyerekana ko umuntu yahawe Umwuka Wera harimo n’imbuto z’Umwuka Wera, kandi impano zitangwa atari inyungu bwite ku muntu wazihawe ahubwo ari ukugira ngo bose bafashwe.

    Impano z’Umwuka Wera zirimo ibyiciro bibiri:

    1. Hari izishira cyangwa zirangira, ni 7 ariko zishira kubera impamvu , izi mpano zituma abantu baza bakurikiye imirimo yazo:

    i. Kuba intumwa, Abefeso4:11

    ii.Ubuhanuzi, 1Abakorinto 12:10

    iii. Gukora ibitangaza, 1 Abakorinto 12:28

    iv.Gukiza indwara, 1 Abakorinto 12:9

    v. Impano y’ijambo ryo kumenya , 1 Abakorinto 12:8

    vi. Kuvuga indimi nyinshi , Yakobo 3:5

    vii. Gusobanura indimi, 1 Abakorinto12

    2. Hari izindi mpano zitarangira, izi ni 11 izi mpano mbere yuko zifasha abandi zibanza zigafasha uzihawe.

    i. Ubwenge, 1 Abakorinto 12:8

    ii. Kurobanura imyuka , 1 abakorinto 12:18

    iii. Kutikanyiza, Abaroma 12:8

    iv. Guhugura , Abaroma 12:8

    v. Gufasha , Abaroma 12:7

    vi. Ubugwaneza , Abaroma 12:8

    vii. Ubuyobozi n’ubutegetsi, Tito 1:4-5,1 Abakorinto 12:28

    viii. Kwizera, 1 Abakorinto 12

    ix. Kwigisha, Abefeso 4:11, Ibyakozwen’intumwa 18:24-25

    x. Kubwiriza ijambo ry’Imana, 2 Timoteyo4:5

    xi. Kuba umushumba, Ibyakozwe n’intumwa 20:28

    Buriwese agire ikimwerekanaho Umwuka Wera w’Imana kugira ngo abizera n’abatizera bafashwe.Imana itwambike imbaraga muri uru rugendo Dushake uwo Mwuka Wera ni Yesu wamutugeneye.

    Source: cepurhuye.org

    [email protected]

    Source : https://agakiza.org/Ni-iki-kigaragaza-Umwuka-Wera-ku-muntu.html

  • Abarwariye covid-19 mu ngo barasaba ubufasha bwo kwita ku miryango yabo #rwanda #RwOT

    Mu karere ka Nyagatare, abanduye icyorezo cya Covid-19 barwariye mu ngo no mu bigo bibitaho, baragaragaza ko bisaba ubufasha buturutse ahandi kugira ngo bite ku miryango yabo.

    Inzego z'ubuzima mu karere ka Nyagatare, ziravuga ko abadafite amafunguro zibafasha, zikaba zisaba aba barwariye mu ngo kubahiriza amabwiriza bahabwa, kugira ngo batazanduza abo babana.

    KANDA MURI VIDEO UKURIKIRE INKURU IRAMBUYE

    The post Abarwariye covid-19 mu ngo barasaba ubufasha bwo kwita ku miryango yabo appeared first on Flash Radio TV.

    Source : https://flash.rw/2021/07/08/abarwariye-covid-19-mu-ngo-barasaba-ubufasha-bwo-kwita-ku-miryango-yabo/?utm_source=rss&utm_medium=rss&utm_campaign=abarwariye-covid-19-mu-ngo-barasaba-ubufasha-bwo-kwita-ku-miryango-yabo

  • Kubyara ntibikiri amahitamo meza -Abagore #rwanda #RwOT

    Hari bamwe mu bagore bavuga ko bitewe nuko ikiguzi cyo kwita ku mwana gihenze muri iki gihe kubyara bitari  amahitamo meza.

    Ubushakashatsi bwakozwe n'Ikigo cy'Igihugu cy'Ibarurishamibare, bwerekana ko 64% by'abagore mu Rwanda  bitabira serivisi zo kuboneza urubyaro.

    Hari bamwe mu bagore baganiriye n'itangazamakuru rya Flash bavuga ko kubera ikiguzi cy'ubuzima gihenze, kubyara bisaba imibare muri iki gihe.

    Umwe ati 'Umwana asigaye agira umwaka umwe, ugatekereza ngo ejo bundi azajya ku ishuri. Ni iki se ndimo nkora ku buryo nagera igihe cyo kujya ku ishuri nzabasha no kumwishyurira ishuri? Urumva rero ntabwo wapfa kubyara gutyo gutyo gusa uko woboneye.'

    Undi yagize ati 'Umwana  akenera ibintu byinshi, ni muri ubwo buryo  rero ugomba kubyara umwana  ari uko ubona koko wamubonera ubushobozi.'

    Ku ruhande rw'abagabo basanga koko ubu ubuzima buhenze, bikwiriye ko abantu batabyara uko babonye nk'uko byahoze.

    Kuri ubu ngo gutunga umwana kugera ku mwigisha si ibya buri wese.

     Umwe aragira aragira ati 'Ni ibintu Leta yakunze kudushishikariza cyera, kubyara abana benshi ntabwo ari ngombwa, cyane cyane muri iki gihe noneho  ni ibintu bigoye.'

     Undi mubyeyi yagize ati 'Iki gihe turimo, umuntu akwiriye kubyara abana Babiri cyangwa  Batatu gusa akihangana. Naho wongeyeho benshi icyo gihe ntacyo kubarera bimeze nabi.'

    Impuguke mu bukungu mu Rwanda zishima bene iyi myumvire y'abaturage cyane ko ubu isi ihangayikishijwe n'ubwiyongere bw'abaturage.

    Bwana Straton Habyarimana avuga ko kuba abagore 51% bavuga ko batifuza kubyara atari ikibazo, cyeretse ari ibizamara igihe kirekire.

    Habyarimana yagize ati 'Kuba rero iyo myumvire iri kugenda ifata ntabwo ari ikintu kibi. Gusa twitege ko  bikomeje  bidatewe n'ibihe turimo, bishobora kuzagira ingaruka turi kubona mu bihugu bimwe nk'ubuyapani, aho usanga abantu bageze ku kigero cyo kuvuga ngo niba dukeneye amaboko yo gukora reka tujye kuyashaka hanze cyangwa tuyashake mu mashini.'

    Habyarimana yunzemo agira ati 'Ubwo ariko kugira ngo icyo kiciro tuzabe tukigezho  bizasaba imyaka myinshi cyane, n'abantu bakagombye kugira impugenge kuri icyo kibazo. '

    Mu mibare y'ikigo cy'igihugu cy'ibarurishamibare igaragaza ko ubu bushakashatsi bwakozwe mu gihugu hose hakurikijwe uburumbuke mu Rwanda, bukagaragaza ko abagore bo mu mijyi, nibura umwe abarirwa abana 3.4, naho uwo mu cyaro akabarirwa abana 4.3.

    Umuyobozi w'ishami rishinzwe imibare ifitanye isano n'ubwiyongere bw'abaturage muri iki kigo Ndakize Michel asanga abagore n'abagabo barasobanukiwe ko, iyo ubukungu budahuye n'uburumbuke mu miryango yabo bibateza ibibazo, akaba ariyo mpamvu bamwe bahisemo kutongera kubyara. Arabisobanura muri aya magambo.

    Ndakize ati 'Ubu baba abagabo baba abagore baragenda biga, baragenda  basobanukirwa  n'ubuzima, bamenya uko ubukungu bwabo buhagaze bidahuye n'uburumbuke mu miryango  bibateza ikibazo.'

    Yakomeje avuga ko ' Hari ikibazo rero twababazaga, tuti ko ufite abana Batanu (5) cyangwa 4 wumva wifuza  kongera kubyara? Akavuga ati abo nari naratekereje kubyara ni aba ndumva narabihagaritse. '

    Iyi mibare yerekana kandi ko Abagore bakoresha uburyo bwo kuboneza urubyaro mu 2019/20 bari 64% naho abatagerwaho na serivisi zo kuboneza urubyaro bavuye kuri 39% muri 2005, bagera kuri 14% muri 2019/20.

    Ikigo cy'Igihugu cy'Ibarurishamibare kigaragaza ko mu 2019/20, abagore 51% batifuza kongera kubyara cyangwa barifungije burundu, 34% bifuza kuzongera kubyara nyuma, naho 3% ari ingumba, mu gihe 10% bifuzaga kubyara mu gihe cya vuba, 2% bo nta mwanzuro bafashe.

    CYUBAHIRO GASABIRA Gad

    The post Kubyara ntibikiri amahitamo meza -Abagore appeared first on Flash Radio TV.

    Source : https://flash.rw/2021/07/08/kubyara-ntibikiri-amahitamo-meza-abagore/?utm_source=rss&utm_medium=rss&utm_campaign=kubyara-ntibikiri-amahitamo-meza-abagore